ଭୁବନେଶ୍ଵର: ସମ୍ବଲପୁର ଜିଲ୍ଲା ପରିଷଦ ସମ୍ମିଳନୀ କକ୍ଷରେ ଜିଲ୍ଲା ସମନ୍ୱୟ ଓ ତଦାରଖ କମିଟି DISHAର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଜିଲ୍ଲାର ସର୍ବାଙ୍ଗୀନ ବିକାଶ ଏବଂ ସାଧାରଣ ଜନତାଙ୍କୁ ମୌଳିକ ସୁବିଧା ସୁଯୋଗ ଯୋଗାଇଦେବା ସମ୍ପର୍କରେ ବିସ୍ତୃତ ଆଲୋଚନା କରାଯାଇଛି।
ଜଳ ସେଚନକୁ ପ୍ରାଧାନ୍ୟ ଦିଆଯାଇ କୃଷକଙ୍କ ଉନ୍ନତି ନେଇ ବୈଠକରେ ଆଲୋଚନା ହୋଇଛି। ଏହା ସହ ରେଳ ଭିତ୍ତି ଭୂମିର ବିକାଶ ସହ ରେଳ ଷ୍ଟେସନର ଉନ୍ନତିକରଣ, ଟେଲିଫୋନ ଟାୱାର, ସବୁ ଗ୍ରାମ ପଂଚାୟତ ଓ ହାଇସ୍କୁଲକୁ ଇଣ୍ଟରନେଟ ସଂଯୋଗ, ପିଏମ ସୂର୍ଯ୍ୟଘର ଯୋଜନା, ଉପରେ ଆଲୋଚନା ହୋଇଛି। ବୈଠକରେ ଗ୍ରାମୀଣ ବିକାଶ, ପଞ୍ଚାୟତିରାଜ ଓ ପାନୀୟ ଜଳ ମନ୍ତ୍ରୀ ରବି ନାରାୟଣ ନାଏକ, ସମ୍ବଲପୁର ବିଧାୟକ ଜୟନାରାୟଣ ମିଶ୍ର, ରେଙ୍ଗାଲି ବିଧାୟକ ସୁଦର୍ଶନ ହରିପାଲ ପ୍ରମୁଖ ଯୋଗଦେଇଥିଲେ।