ଭୁବନେଶ୍ୱର: କେରଳ, ରାଜସ୍ଥାନ ଓ ପଞ୍ଜାବର ସାମ୍ବାଦିକମାନଙ୍କୁ ନେଇ ପିଆଇବି ନେତୃତ୍ୱରେ ଏକ ଆନ୍ତଃରାଜ୍ୟ ଗଣମାଧ୍ୟମ ପ୍ରତିନିଧି ଦଳ ସମ୍ପ୍ରତି ଓଡ଼ିଶା ଗସ୍ତରେ ଅଛନ୍ତି। ଏମାନେ ଆଜି ଭୁବନେଶ୍ୱରଠାରେ ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କୁ ଭେଟିଛନ୍ତି। ରାଜ୍ୟର ପରିବର୍ତ୍ତନଶୀଳ ସାମାଜିକ-ଆର୍ଥିକ ସ୍ଥିତି, ପ୍ରଗତିଶୀଳ ନୀତିଗତ ଢାଞ୍ଚା ଏବଂ ପ୍ରମୁଖ କଲ୍ୟାଣକାରୀ ଯୋଜନା ଉପରେ ସେମାନେ ଉପମୁଖ୍ୟମନ୍ତ୍ରୀଙ୍କ ସହ ମତବିନିମୟ କରିଥିଲେ।
ସମାବେଶୀ ତଥା ମହିଳା-ନେତୃତ୍ୱାଧୀନ ବିକାଶ ଦିଗରେ ଓଡ଼ିଶାର ଦୃଢ଼ ପ୍ରତିବଦ୍ଧତା ସମ୍ପର୍କରେ ଶ୍ରୀମତୀ ପରିଡ଼ା ପ୍ରତିନିଧି ଦଳକୁ ସୂଚନା ଦେଇଥିଲେ। ସେ କହିଥିଲେ, ରାଜ୍ୟ ସରକାରଙ୍କ କଲ୍ୟାଣକାରୀ ଯୋଜନା ‘ସୁଭଦ୍ରା’କୁ ଦୁଇ ବର୍ଷ ପୂରଣ ହୋଇଛି। ସଂଯୋଗବଶତଃ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜନ୍ମଦିନରେ ଏହି ଉପଲବ୍ଧି ହାସଲ କରାଯାଇଛି। ଏହି ପଦକ୍ଷେପ ତୃଣମୂଳ ସ୍ତରରେ ସାମାଜିକ-ଆର୍ଥିକ ସଶକ୍ତୀକରଣ ପାଇଁ ଏକ ଅଭୂତପୂର୍ବ ପ୍ରୋତ୍ସାହନ ପାଲଟିଛି। ଏହା ଲକ୍ଷ ଲକ୍ଷ ଗ୍ରାମୀଣ ମହିଳାଙ୍କୁ ଆର୍ଥିକ ସ୍ୱାଧୀନତା, ସମ୍ମାନ ଓ ଆତ୍ମନିର୍ଭରଶୀଳତା ହାସଲ କରିବାରେ ସକ୍ଷମ କରିପାରିଛି।
ଶ୍ରୀମତୀ ପରିଡା ଓଡ଼ିଶାର ପର୍ଯ୍ୟଟନ କ୍ଷେତ୍ରକୁ ସୁଦୃଢ଼ କରିବା ଏବଂ ପର୍ଯ୍ୟଟକଙ୍କ ପାଇଁ ନୂତନ ଅଭିଜ୍ଞତା ସୃଷ୍ଟି କରିବା ପାଇଁ ପ୍ରୟାସ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ, ପର୍ଯ୍ୟଟନ ରାଜ୍ୟରେ ଆର୍ଥିକ ଅଭିବୃଦ୍ଧି ଏବଂ ନିଯୁକ୍ତି ସୃଷ୍ଟିର ଏକ ଗୁରୁତ୍ୱପୂର୍ଣ୍ଣ ବାହକ ଭାବରେ ଉଭା ହୋଇଛି। ପର୍ଯ୍ୟଟନ ଭିତ୍ତିଭୂମିର ଉନ୍ନତି, ଐତିହ୍ୟ ଓ ପରିବେଶ ପର୍ଯ୍ୟଟନ ସ୍ଥାନଗୁଡ଼ିକୁ ପ୍ରୋତ୍ସାହିତ କରିବା ଏବଂ ଓଡ଼ିଶାର ସମୃଦ୍ଧ ସାଂସ୍କୃତିକ ଓ ପ୍ରାକୃତିକ ଐତିହ୍ୟକୁ ବ୍ୟାପକ ପର୍ଯ୍ୟଟକଙ୍କ ନିକଟରେ ପ୍ରଦର୍ଶନ କରିବା ପାଇଁ ପ୍ରୟାସ ଜାରି ରହିଛି।
ରାଜ୍ୟର ବ୍ୟାପକ ଅଭିବୃଦ୍ଧି ଲାଗି କାର୍ଯ୍ୟକାରୀ ହୋଇଥିବା ରଣନୀତି ଉପରେ ଶ୍ରୀମତୀ ପରିଡା ବିସ୍ତୃତ ଭାବରେ ଆଲୋକପାତ କରିଥିଲେ। ସେ କହିଥିଲେ, ସାରା ଓଡ଼ିଶାରେ ବିଶ୍ୱସ୍ତରୀୟ ଭିତ୍ତିଭୂମି ନିର୍ମାଣ ଏବଂ ବହୁମୁଖୀ ଯୋଗାଯୋଗକୁ ସୁଦୃଢ଼ କରିବା ପାଇଁ ସକ୍ରିୟ ପଦକ୍ଷେପଗୁଡ଼ିକ ଜାରି ରହିଛି। ରେଳ କରିଡରର ଆଧୁନିକୀକରଣ, ସଡ଼କ ନେଟୱର୍କ ବିସ୍ତାର ଏବଂ ଉପକୂଳରେ ସାମୁଦ୍ରିକ ବନ୍ଦର କ୍ଷମତାକୁ ସୁଦୃଢ଼ କରିବା ପାଇଁ ପର୍ଯ୍ୟାପ୍ତ ନିବେଶ କରାଯାଉଛି। ଏହି ରଣନୀତିକ ଯୋଗାଯୋଗ କରିଡରଗୁଡ଼ିକ ଜାତୀୟ ଓ ବିଶ୍ୱ ମୂଲ୍ୟ ଶୃଙ୍ଖଳ ସହିତ ଓଡ଼ିଶାର ଆର୍ଥିକ କ୍ଷେତ୍ରଗୁଡ଼ିକୁ ମଜବୁତ କରିବା ପାଇଁ ଡିଜାଇନ୍ କରାଯାଇଛି।
ଉପମୁଖ୍ୟମନ୍ତ୍ରୀ ପରିଦର୍ଶକ ସାମ୍ବାଦିକମାନଙ୍କୁ ଘରୋଇ ଓ ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶକୁ ଆକର୍ଷିତ କରିବା ପାଇଁ ଲକ୍ଷ୍ୟବଦ୍ଧ ନୀତିଗତ ହସ୍ତକ୍ଷେପ ଏବଂ ବ୍ୟବସାୟିକ ସୁଗମତା ସଂସ୍କାର ବିଷୟରେ ଅବଗତ କରାଇଲେ। ସେ କହିଥିଲେ, ରାଜ୍ୟର ପ୍ରଚୁର ପ୍ରାକୃତିକ ସମ୍ପଦ ଏବଂ ରଣନୀତିକ ଭୌଗୋଳିକ ସ୍ଥିତି ବଳରେ ଓଡ଼ିଶା ଏକ ଶିଳ୍ପ ଶକ୍ତି କେନ୍ଦ୍ର ଭାବରେ ଉଭା ହେଉଛି। ଦୃଢ଼ ଶିଳ୍ପାୟନ, ଖଣିଜ ସମ୍ପଦରେ ମୂଲ୍ୟ-ସଂଯୋଜନ ଏବଂ ଏକ ଅନୁକୂଳ ଉଦ୍ୟୋଗ ଇକୋସିଷ୍ଟମ ସହିତ ରାଜ୍ୟ ଦୀର୍ଘସ୍ଥାୟୀ ଆର୍ଥିକ ପ୍ରସାରକୁ ଆଗେଇ ନେଉଛି ଏବଂ ଯୁବପିଢ଼ିଙ୍କ ପାଇଁ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରୁଛି।
ଗଣମାଧ୍ୟମ ପ୍ରତିନିଧି ଦଳ ଓଡ଼ିଶା ରାଜ୍ୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଓସଡମା) ମଧ୍ୟ ପରିଦର୍ଶନ କରିଥିଲ। ସେମାନେ ରାଜ୍ୟର ଅନ୍ତର୍ଜାତୀୟ ମାନ୍ୟତାପ୍ରାପ୍ତ ବିପର୍ଯ୍ୟୟ ବିପଦ ହ୍ରାସ ଏବଂ ପ୍ରଶମନ କ୍ଷମତା ସମ୍ପର୍କରେ ଅବଗତ ହୋଇଥିଲେ। ରାଜ୍ୟ ସରକାରଙ୍କ ବରିଷ୍ଠ ଅଧିକାରୀମାନେ ସାମ୍ବାଦିକମାନଙ୍କୁ ସେହି ଢାଞ୍ଚାଗତ ବିକାଶ ବିଷୟରେ ଅବଗତ କରାଇଥିଲେ ଯାହା ଓଡ଼ିଶାକୁ ଏକ ବିପର୍ଯ୍ୟୟ ପ୍ରବଣ ଉପକୂଳ ରାଜ୍ୟରୁ ଜଳବାୟୁ ସ୍ଥିରତା ଏବଂ ମୃତ୍ୟୁଶୂନ୍ୟ ବିପର୍ଯ୍ୟୟ ପରିଚାଳନାରେ ଏକ ଆଦର୍ଶ ରାଜ୍ୟରେ ପରିଣତ କରିପାରିଛି।