ମାଲକାନଗିରି ଜିଲ୍ଲା ସ୍ୱାଭିମାନ ଅଂଚଳ ଓ ବଣ୍ଡାଘାଟି ସୀମାରେ ମାଓବାଦୀ ଏବଂ ସୁରକ୍ଷାବାହିନୀଙ୍କ ମଧ୍ୟରେ ବୁଧବାର ସକାଳୁ ଗୁଳି ବିନିମୟ ହୋଇଛି । ମାଓବାଦୀଙ୍କ ଗୁଳିରେ ଜଣେ ଯବାନ ଶହୀଦ ହୋଇଥିବାବେଳେ ଜଣେ ଗୁରୁତର ହୋଇଛନ୍ତି । ସୂଚନା ଅନୁଯାୟୀ, ଖଇରପୁଟଠାରୁ ୫ ରୁ ୬ କିଲୋମିଟର ଦୂର ବଣ୍ଡାଘାଟିରେ ଥିବା ଏକ ପାହାଡ଼ରେ ମାଓ ଶିବିର ଥିବା ନେଇ ପୋଲିସକୁ ସୂଚନା ମିଳିଥିଲା । ଏହା ପରେ ସୁରକ୍ଷାବାହିନୀ ପକ୍ଷରୁ ସର୍ଚ୍ଚ ଅପରେସନ୍ ଆରମ୍ଭ ହୋଇଥିଲା । ଏସ୍ଓଜି ଓ ଡିଭିଏଫ୍ ଫୋର୍ସ ମିଳିତ ଭାବେ ବଣ୍ଡାଘାଟିରେ ଅପରେସନ୍ ଆରମ୍ଭ କରିଥିଲେ । ଏହି ସମୟରେ ମାଓବାଦୀ ଓ ସୁରକ୍ଷାବାହିନୀଙ୍କ ମଧ୍ୟରେ ଗୁଳି ବିନିମୟ ହୋଇଛି । ଏହି ଗୁଳି ବିନିମୟରେ ଜଣେ ଯବାନଙ୍କ ଦେହରେ ଗୁଳି ବାଜିଥିଲା । ଫଳରେ ସେ ଶହୀଦ ହୋଇଯାଇଛନ୍ତି । ଗୁରୁତର ଯବାନଙ୍କୁ ଖଇରପୁଟ ଅଣାଯିବା ପରେ ହେଲିକପ୍ଟରରେ ବିଶାଖାପାଟଣା ସ୍ଥାନାନ୍ତର କରାଯିବାର ସୂଚନା ରହିଛି ।
