ବିହାରରେ ନିତିଶ୍ ସରକାର ପାନ ମସଲା ଉପରେ ପ୍ରତିବନ୍ଧକ ଲଗାଇଛନ୍ତି । ବିହାରରେ ମଦ ବନ୍ଦ ହେବା ପରେ ଏବେ ବିହାର ସରକାର ପାନ ମସଲା ଉପରେ ମଧ୍ୟ ନିଷେଧାଦେଶ ଜାରି କରିଛନ୍ତି । ତେବେ ଏହି ପ୍ରତିବନ୍ଧକ ଗୋଟିଏ ବର୍ଷ ପାଇଁ ଲଗାଯାଇଛି । ଏନେଇ ବିହାର ସରକାର ବିଜ୍ଞପ୍ତି ଦେଇଛନ୍ତି । ଖାଦ୍ୟ ସୁରକ୍ଷା ଆୟୁକ୍ତ ବିହାରରେ ବିଭିନ୍ନ ବ୍ରାଣ୍ଡର ପାନ ମସଲା ବିକ୍ରି ଉପରେ ପ୍ରତିବନ୍ଧକ ଲଗାଇଛନ୍ତି । ବିହାରରେ ବିକ୍ରି ହେଉଥିବା ପାନ ମସଲାରେ ମ୍ୟାଗ୍ନେସିୟମ୍ କାର୍ବୋନେଟ୍ର ମାତ୍ରା ଦେଖାଯାଇଛି । ଚଳିତ ଜୁନ୍ ଓ ଅଗଷ୍ଟରେ ଖାଦ୍ୟ ସୁରକ୍ଷା ବିଭାଗର ୨୦ଟି ଭିନ୍ନ ଭିନ୍ନ ବ୍ରାଣ୍ଡର୍ ପାନ ମସଲାର ନମୁନାର ଯାଞ୍ଚ ପରେ ପାନ ମସଲାରୁ ମ୍ୟାଗ୍ନେସିୟମ୍ କାର୍ବୋନେଟ୍ର ମାତ୍ରା ପାଇଛନ୍ତି । ଯାହା ଫଳରେ ହାର୍ଟ ତଥା ଅନ୍ୟାନ୍ୟ ଗମ୍ଭୀର ରୋଗ ହେଉଛି । ତେବେ ଯାଞ୍ଚ ହୋଇଥିବା ପାନ ମସଲାଗୁଡ଼ିକ ମଧ୍ୟରେ ରହିଛି ରଜନୀଗନ୍ଧା ପାନ ମସଲା, ରାଜ ନିବାସ ପାନ ମସଲା, ସୁପ୍ରିମ୍ ପାନ ମସଲା, ପାନ ପରାଗ ପାନ ମସଲା, ବାହାର ପାନ ମସଲା, ବାହୁବଲୀ ପାନ ମସଲା, ରାଜଶ୍ରୀ ପାନ ମସଲା, ରୌନକ୍ ପାନ ମସଲା, ସିଗ୍ନେଚର୍ ପାନ ମସଲା, କମଲା ପସନ୍ଦ ପାନ ମସଲା, ମଧୁ ପାନ ମସଲା ପ୍ରମୁଖ । ସରକାରଙ୍କ ଆଦେଶ ଅନୁସାରେ ବିହାରର ଜନତାଙ୍କ ସ୍ବାସ୍ଥ୍ୟ ସୁରକ୍ଷା ଦୃଷ୍ଟିରୁ ପାନ ମସଲା ଉତ୍ପାଦନ ଓ ବିକ୍ରି ଉପରେ ସମ୍ପୂର୍ଣ୍ଣ ରୂପେ ପ୍ରତିବନ୍ଧକ ଲଗାଯାଇଛି । ସେହିପରି ବିହାର ସଚିବାଳୟରେ କର୍ମଚାରୀଙ୍କ ପାଇଁ ଡ୍ରେସ୍ କୋଡ ଲାଗୁକରିଛନ୍ତି ବିହାର ସରକାର ।