ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଲୁଗାଁ ଅଞ୍ଚଳରେ ଘଟିଯାଇଛି ଏକ ହୃଦୟବିଦାରକ ଘଟଣା । କୃଷି କାର୍ଯ୍ୟ ପାଇଁ କ୍ଷେତକୁ ଯାଇଥିବା ବେଳେ ପ୍ରାଣ ହରାଇଛନ୍ତି ଏକାଠି ବାପା ଓ ପୁଅ। ବିଦ୍ୟୁତ୍ ଆଘାତର ଶିକାର ହୋଇ ବାପ-ପୁଅଙ୍କ ମୃତ୍ୟୁ ହେବାରୁ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ଏବଂ ସବୁଆଡେ କାନ୍ଦବୋବାଳି ଫାଟିପଟୁଛି।
ମିଳିଥିବା ସୂଚନା ମୁତାବକ, ଖୋର୍ଦ୍ଧା ଜିଲ୍ଲା ନାଚୁଣୀ ଥାନା ଅନ୍ତର୍ଗତ ହରିପୁର ଗ୍ରାମ ବାସିନ୍ଦା ରବୀନ୍ଦ୍ର ଗୁରୁ ଏବଂ ତାଙ୍କର ପ୍ରିୟ ପୁଅ ପବିତ୍ର ଗୁରୁ। ପ୍ରତିଦିନ ପରି ସେମାନେ ନିଜର ଦିନମଜୁରି ଓ ପରିବାର ପ୍ରତିପୋଷଣ ନିମନ୍ତେ କ୍ଷେତକୁ କାମ କରିବା ପାଇଁ ଯାଇଥିଲେ। କାମ କରୁଥିବା ସମୟରେ ଅସାବଧାନତା ବଶତଃ କିମ୍ବା ଖୋଲା ଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ଯାଇଥିଲେ। ପ୍ରଥମେ ବାପା ରବୀନ୍ଦ୍ର ଗୁରୁ ତାର ସଂସ୍ପର୍ଶରେ ଆସି ବିଦ୍ୟୁତ୍ ଆଘାତର ସମ୍ମୁଖୀନ ହୋଇଥିଲେ ଏବଂ ତଳେ ପଡ଼ିଯାଇଥିଲେ। ନିଜ ବାପାଙ୍କୁ ସେହିପରି ବିପଦପୂର୍ଣ୍ଣ ଅବସ୍ଥାରେ ଛଟପଟ ହେଉଥିବାର ଦେଖି ପୁଅ ପବିତ୍ର ଗୁରୁ ନିଜର ଜୀବନକୁ ବାଜି ଲଗାଇ ତାଙ୍କୁ ଉଦ୍ଧାର କରିବା ପାଇଁ ଯାଇଥିଲେ। ମାତ୍ର ଦୁର୍ଭାଗ୍ୟବଶତଃ ପୁଅ ମଧ୍ୟ ସେହି ବିଦ୍ୟୁତ୍ ତାର ସଂସ୍ପର୍ଶରେ ଆସିଯାଇଥିଲେ। ଫଳରେ ଘଟଣାସ୍ଥଳରେ ହିଁ ବାପା ଓ ପୁଅ ଉଭୟଙ୍କର ମୃତ୍ୟୁ ଘଟିଥିଲା।
ଏହି ଘଟଣା ସମ୍ପର୍କରେ ଖବର ପାଇବାକ୍ଷଣି ନାଚୁଣୀ ଥାନା ପୋଲିସ୍ ଘଟଣାସ୍ଥଳରେ ପହଞ୍ଚିଥିଲା। ପୋଲିସ୍ ଉଭୟଙ୍କ ମୃତଦେହକୁ ଜବତ କରିବା ଟାଙ୍ଗୀ ମେଡିକାଲକୁ ବ୍ୟବଚ୍ଛେଦ ନିମନ୍ତେ ପଠାଇ ଦେଇଛି ଏବଂ ଏହି ଦୁର୍ଘଟଣା କିପରି ଘଟିଲା ସେନେଇ ପୁଙ୍ଖାନୁପୁଙ୍ଖ ତଦନ୍ତ ଜାରି ରଖିଛି। ଗୋଟିଏ ପରିବାରର ମୁଖ୍ୟ ରୋଜଗାରକ୍ଷମ ବ୍ୟକ୍ତି ଏବଂ ଯୁବ ପୁଅଙ୍କ ଏଭଳି ଅକାଳ ବିୟୋଗ ସମଗ୍ର ହରିପୁର ଗ୍ରାମବାସୀଙ୍କୁ ସ୍ତବ୍ଧ କରିଦେଇଛି।