ନୂଆଦିଲ୍ଲୀ: ସୁନା ଓ ରୁପା କିଣିବାକୁ ଯୋଜନା କରୁଥିବା ଗ୍ରାହକଙ୍କ ପାଇଁ ବଡ଼ ଖବର। ବଜାରରେ ଲଗାତାର ଖସୁଛି ମୂଲ୍ୟବାନ ଧାତୁର ଦର। ଶୁକ୍ରବାର ସୁନା ଦରରେ ୫ ହଜାର ଟଙ୍କାରୁ ଅଧିକ ହ୍ରାସ ଘଟିଥିବା ବେଳେ ରୁପା ଦର ମଧ୍ୟ କିଲୋଗ୍ରାମ ପିଛା ପ୍ରାୟ ୯,୭୮୯ ଟଙ୍କା ଖସିଛି। ଏହି ହ୍ରାସ ପରେ ସୁନା ଦର ପ୍ରାୟ ବର୍ଷକ ତଳର ସ୍ତରକୁ ଫେରିଆସିଛି।
ଇଣ୍ଡିଆନ ବୁଲିୟନ ଜୁଏଲର୍ସ ଆସୋସିଏସନ (IBJA) ଅନୁଯାୟୀ, ୧୦ ଗ୍ରାମ ୨୪ କ୍ୟାରେଟ୍ ସୁନା ଦର ହ୍ରାସ ପାଇ ୧.୨୩ ଲକ୍ଷ ଟଙ୍କାରେ ପହଞ୍ଚିଛି। ସେହିପରି ୨୨ କ୍ୟାରେଟ୍ ସୁନା ଦର ୧୦ ଗ୍ରାମ ପିଛା ପ୍ରାୟ ୧.୧୫ ଲକ୍ଷ ଟଙ୍କା ରହିଛି। ଅନ୍ୟପଟେ ରୁପା ଦର କିଲୋଗ୍ରାମ ପିଛା ୧.୫୦ ଲକ୍ଷ ଟଙ୍କାକୁ ଖସିଆସିଛି।
ସବୁଠାରୁ ବଡ଼ କଥା ହେଉଛି, ୨୦୨୫ ନଭେମ୍ବର ୨୪ରେ ୧୦ ଗ୍ରାମ ୨୪ କ୍ୟାରେଟ୍ ସୁନା ଦର ୧,୨୩,୩୦୮ ଟଙ୍କା ଥିଲା। ଏବେ ପୁଣି ସୁନା ଦର ସେହି ସ୍ତରକୁ ଫେରିଛି। ଚଳିତ ବର୍ଷ ଜାନୁଆରୀ ୨୯ରେ ସୁନା ଦର ସର୍ବୋଚ୍ଚ ସ୍ତର ୧.୭୬ ଲକ୍ଷ ଟଙ୍କାରେ ପହଞ୍ଚିଥିଲା। ସେହି ତୁଳନାରେ ଏବେ ଦରରେ ବଡ଼ ଧରଣର ପତନ ଦେଖିବାକୁ ମିଳିଛି।
ଅନ୍ତର୍ଜାତୀୟ ବଜାରରେ ଆମେରିକୀୟ ଡଲାର ମଜଭୁତ ହେବା ଏବଂ ନିବେଶକଙ୍କ ଲାଭ ବୁକିଂ ଯୋଗୁଁ ସୁନା ଓ ରୁପା ଦର ଉପରେ ଚାପ ପଡ଼ିଛି। ତେବେ ଆଗକୁ ଏହି ଦର ଆହୁରି ଖସିବ ନା ବଜାରରେ ପୁଣି ଉପରମୁହାଁ ହେବ, ତାହା ଉପରେ ଗ୍ରାହକ ଓ ନିବେଶକଙ୍କ ନଜର ରହିଛି।


