ଜାପାନରେ ଶନିବାର ଭୟଙ୍କର ବାତ୍ୟା ‘ହୋଜିବିସ’ ଆସିଛି । ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁସାରେ ବିଗତ ୬୦ ବର୍ଷ ମଧ୍ୟରେ ଏଭଳି ବାତ୍ୟା କେବେ ଦେଖାଯାଇ ନ ଥିଲା । ଏହି ଭୟଙ୍କର ବାତ୍ୟାରେ ଶହ ଶହ ଲୋକ ଆହତ ହୋଇଥିବା ବେଳେ ୭୩ ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ବାତ୍ୟା ଭୟରେ ଜାପାନ ରେଳଷ୍ଟେସନ ଗୁଡ଼ିକ ବନ୍ଦ ହୋଇଯାଇଛି । ଜାପାନର ପାଣିପାଗ ବିଭାଗର ରିପୋର୍ଟ ଅନୁସାରେ ଶନିବାର ସନ୍ଧ୍ୟାରେ ଏଠାରେ ଘଣ୍ଟାପ୍ରତି ପବନର ବେଗ ୧୪୪ କିଲୋମିଟର ଥିଲା । ଦୀର୍ଘ ୬ ଦଶନ୍ଧି ମଧ୍ୟରେ ଜାପାନ୍ରେ ସବୁଠାରୁ ଭୟଙ୍କର ସାମୁଦ୍ରିକ ଝଡ଼ ହୋଇଛି । ଏଥିରେ ବର୍ତ୍ତମାନ ସୁଦ୍ଧା ୧୧ଜଣଙ୍କର ମୃତ୍ୟୁ ହୋଇଥିବାର ସୂଚନା ରହିଛି । ଟୋକିଓ ଇଜୁ ଦ୍ବୀପରେ ସ୍ଥଳଭାଗ ଛୁଇଁବା ପରେ ବ୍ୟାପକ କ୍ଷୟକ୍ଷତି ହୋଇଛି । ଟୋକିଓ, ଇଜୁ ଓ ସିଲୁଓକାରେ ବନ୍ୟା ସ୍ଥିତି ସହ ଭୂସ୍ଖଳନ ମଧ୍ୟ ହୋଇଛି । ଏହି ସାମୁଦ୍ରିକ ଝଡ ପ୍ରଭାବରେ ପ୍ରବଳ ବର୍ଷା ଓ ପବନ ଯୋଗୁଁ ବିଦ୍ୟୁତ ସରବରାହ ମଧ୍ୟ ପ୍ରଭାବିତ ହୋଇଛି । ୮ଲକ୍ଷରୁ ଅଧିକ ଲୋକ ଅନ୍ଧାରରେ ରହିଥିବାବେଳେ ଜନଜୀବନ ଅସ୍ତବ୍ୟସ୍ତ ହୋଇପଡିଛି ।
