ମୁମ୍ବାଇ- ( ଏଜେନ୍ସି) ମହାରାଷ୍ଟ୍ରରେ ସରକାର ଗଠନକୁ ନେଇ ଚାଲିଥିବା ଟଣାଓଟରା ପରେ ଏବେ ସେଠାରେ ରାଷ୍ଟ୍ରପତି ଶାସନ ଲାଗୁ ହେବା ନେଇ ସମ୍ଭାବନା ଦେଖାଦେଇଛି । ନିର୍ବାଚନ ଫଳାଫଳ ବାହାରିବାର ୨୦ ଦିନ ଭିତରେ ସରକାର ଗଠନ ହେବା ନେଇ ଏବେବି ସନ୍ଦେହ। ରାଜ୍ୟପାଳ ଭଗତ ସିଂହ କୋଶିୟାରୀଙ୍କ ତରଫରୁ ରାଷ୍ଟ୍ରପତି ଶାସନ ଲାଗୁ କରିବା ଅନୁରୋଧକୁ କେନ୍ଦ୍ରୀୟ କ୍ୟାବିନେଟ ମଞ୍ଜୁରୀ ପ୍ରଦାନ କରିଛି । ରାଷ୍ଟ୍ରପତି ରାମନାଥ କୋବିନ୍ଦଙ୍କ ମଞ୍ଜୁରୀ ପରେ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ ହେବ । ଏହାରି ମଧ୍ୟରେ ଶିବସେନା ଏହି ଅନୁରୋଧ ବିରୋଧରେ ସୁପ୍ରିମକୋର୍ଟରେ ଯାଚିକା ଦାଖଲ କରିଛି । ଶିବସେନା ତରଫରୁ ଆଇନଜୀବୀ ସୁନିଲ ଫର୍ନାଡିଜ ଏହି ଆବେଦନ ଦାଖଲ କରିଛନ୍ତି । ଶିବସେନା ନିଜର ଆବେଦନରେ ରାଜ୍ୟପାଳଙ୍କ ତରଫରୁ ଦଳକୁ ସରକାର ଗଠନ କରିବା ପାଇଁ ଦିଆଯାଇଥିବା ସମୟକୁ ବୃଦ୍ଧି ନକରିବା ଉପରେ ପ୍ରଶ୍ନ ଉଠାଇଛନ୍ତି । ମିଳିଥିବା ସୂଚନା ଅନୁସାରେ ରାଜଭବନ ଗୃହ ମନ୍ତ୍ରାଳୟକୁ ରାଷ୍ଟ୍ରପତି ଶାସନ ପାଇଁ ଅନୁରୋଧ କରି କହିଛନ୍ତି, ମହାରାଷ୍ଟ୍ରରେ ସମ୍ୱିଧାନ ଅନୁସାରେ ସରକାର ଗଠନ ହେବା କଷ୍ଟ ହୋଇଛି। ରବିବାରରୁ ସୋମବାର ପର୍ଯ୍ୟନ୍ତ ଶିବସେନା ସରକାର ଗଢି ନପାରିବା ପରେ ସୋମବାର ଦିନ ସନ୍ଧ୍ୟାରେ ରାଜ୍ୟପାଳ ତୃତୀୟ ସବୁଠାରୁ ବଡ ଦଳ ଏନସିପିକୁ ସରକାର ଗଠନ କରିବା ପାଇଁ ସୁଯୋଗ ଦେଇଥିଲେ । ଏନସିପିକୁ ମିଳିଥିବା ଏହି ସମୟ ଆଜି ରାତି ୮.୩୦ରେ ଶେଷ ହେବ । ଏନସିପି ପକ୍ଷରୁ ବର୍ତ୍ତମାନ ସୁଦ୍ଧା ଆନୁଷ୍ଠାନିକ ଭାବେ ସରକାର ଗଠନ କରିବା ନେଇ କୌଣସି ଦାବି ଉପସ୍ଥାନ କରାଯାଇ ନାହିଁ । ଅପରପକ୍ଷରେ କଂଗ୍ରେସ ମଧ୍ୟ ଶିବସେନାକୁ ସରକାର ଗଠନ କରିବା ନେଇ ସ୍ପଷ୍ଟ କରିନାହିଁ । ଏଭଳି ପରିସ୍ଥିତିରେ ମହାରାଷ୍ଟ୍ରରେ ସରକାର ଗଠନକୁ ନେଇ ଲାଗିଥିବା ସଂଶୟ ତୁଟିପାରୁନାହିଁ ।
