ଭୋପାଳ : ମଧ୍ୟପ୍ରଦେଶର ରାଜନୈତିକ ଛକାପଞ୍ଝା ପରେ କାଲି ମୁଖ୍ୟମନ୍ତ୍ରୀ କମଲନାଥ ନିଜ ପଦବୀରୁ ଇସ୍ତଫା ଦେଇସାରିଛନ୍ତି । କିନ୍ତୁ କମଲନାଥଙ୍କ ଇସ୍ତଫା ପରେ ଏବେ ମଧ୍ୟପ୍ରଦେଶରେ ବିଜେପି ସରକାର ଗଢିବ ନା ପୁଣି ଥରେ ନିର୍ବାଚନ ହେବ, ସେଥିନେଇ ଆଶଙ୍କା ଲଗାଯାଉଛି । ଆଜି ବିଜେପିର ବିଧାୟକ ଦଳ ବୈଠକ ହେବାର ସମ୍ଭାବନା ରହିଛି । ସେହିପରି ଆଜି କଂଗ୍ରେସର ବିଦ୍ରୋହୀ ବିଧାୟକ ଭୋପାଳରୁ ପ୍ରତ୍ୟାବର୍ତ୍ତନ କରିବେ ।
କଂଗ୍ରେସରୁ 22 ବିଧାୟକ ଇସ୍ତଫା ଦେବା ପରେ ବିଜେପି ଏବଂ ସଂଖ୍ୟା ଗରିଷ୍ଠତା ଦୃଷ୍ଟିରୁ ବଡ଼ ଦଳ ଭାବେ ଉଭା ହୋଇଛି । ବିଜେପି ପାଖରେ 106 ବିଧାୟକ ରହିଛନ୍ତି । କଂଗ୍ରେସ ପାଖରେ ବାଚସ୍ପତିଙ୍କ ସମେତ 92ଜଣ ବିଧାୟକ ରହିଛନ୍ତି । ସେହିପରି ନିର୍ଦ୍ଦଳୀୟ, ବସପା-ସପାର 7ଜଣ ବିଧାୟକଙ୍କ ସମର୍ଥନ ରହିଛି କଂଗ୍ରେସ ପାଖରେ । ସେହିପରି ମଧ୍ୟପ୍ରଦେଶରେ ସରକାର ଗଢିବା ପାଇଁ 103ର ବହୁମତ ରହିଛି ।
ସେହିପରି ମଧ୍ୟପ୍ରଦେଶ କଂଗ୍ରେସ ତରଫରୁ ଏକ ଟୁଇଟ୍ ମଧ୍ୟ ବେଶ୍ ଚର୍ଚ୍ଚାକୁ ଆସିଛି । କଂଗ୍ରେସ ଟୁଇଟ୍ କରି କହିଛି ଯେ, 2020 ମସିହା ଅଗଷ୍ଟ 15 ତାରିଖରେ କମଲନାଥ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ରୂପେ ଧ୍ବଜାରୋହରଣ କରି ପ୍ୟାରେଡ୍ର ଅଭିବାଦନ ଗ୍ରହଣ କରିବେ । ମଧ୍ୟପ୍ରଦେଶ କଂଗ୍ରେସର ଏହି ଟୁଇଟ୍କୁ ସମ୍ଭାଳି ରଖିବାକୁ କୁହାଯାଉଛି ।
ତେବେ ଆଜି ବିଜେପିର ବିଧାୟକ ଦଳ ବୈଠକରେ ରଣନୀତି ସମ୍ପର୍କରେ ନିଷ୍ପତ୍ତି ନିଆଯାଇପାରେ । ମୁଖ୍ୟମନ୍ତ୍ରୀ କିଏ ହେବ ସେ ନେଇ ମଧ୍ୟ ଆଲୋଚନା କରାଯାଇପାରେ । କାଲି ଶିବରାଜ ସିଂହ ଚୌହ୍ବାନ କମଲନାଥଙ୍କ ସହ ସାକ୍ଷାତ କରିଥିଲେ ।