ତାମିଲନାଡୁ : ଦେଶରେ କରୋନା ଭାଇରସ୍ ବ୍ୟାପିବାରେ ଲାଗିଛି । ଦେଶରେ ଏହି ରୋଗରେ ଆକ୍ରାନ୍ତଙ୍କ ସଂଖ୍ୟା 500 ଟପିଗଲାଣି । ସେହିପରି 10 ଜଣ ଏହି ରୋଗରେ ମୃତ୍ୟୁବରଣ କରିସାରିଲେଣି । ସାରା ଦେଶରେ ଏବେ ଲକଡାଉନ୍ । କିଛି କିଛି ସ୍ଥାନରେ କର୍ଫ୍ୟୁ ମଧ୍ୟ ଜାରି କରାଯାଇଛି । ଲକ୍ ଡାଉନ୍ ପାଇଁ ଆବଶ୍ୟକୀୟ ସାମଗ୍ରୀ ପାଇଁ ବହୁତ କଷ୍ଟ କରିବାକୁ ପଡୁଛି । ଏପରି ସଂକଟ ମଧ୍ୟରେ ତାମିଲନାଡୁ ସରକାର ବଡ ଘୋଷଣା କରିଛନ୍ତି । ରାଜ୍ୟରେ ରାସନ କାର୍ଡ ଧାରୀଙ୍କୁ ସରକାରଙ୍କ ତରଫରୁ 1000 ଟଙ୍କାର ସହାୟତା ରାଶି ମିଳିବ ବୋଲି ଘୋଷଣା କରାଯାଇଛି ।
ତାମିଲନାଡୁ ମୁଖ୍ୟମନ୍ତ୍ରୀ ଇ. ପଲାନିସ୍ବାମୀ ମଙ୍ଗଳବାର ଦିନ ଏହା ସମ୍ପର୍କରେ ଘୋଷଣା କରିଛନ୍ତି । ରାଜ୍ୟରେ ଥିବା ସମସ୍ତ ରାସନକାର୍ଡ ଧାରୀଙ୍କୁ ମାଗଣାରେ ଚାଉଳ ଓ ଚୀନ ଦିଆଯିବା ସହ 1000 ଟଙ୍କାର ସହାୟତା ରାଶି ମଧ୍ୟ ଦିଆଯିବ । ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ରାସନ୍ ସାମଗ୍ରୀ ନେବା ପାଇଁ ଲୋକେ ମାନେ ଲମ୍ବା ଧାଡ଼ି ବା ଗହଳି କରିବାର ଆବଶ୍ୟକତା ନାହିଁ । ଏଥିପାଇଁ ସେମାନଙ୍କୁ ଏକ ଟୋକନ୍ ଦିଆଯିବ । ଏହା ସାହାଯ୍ୟରେ ସେମାନେ ସୁବିଧାରେ ରାସନ ସାମଗ୍ରୀ ନେଇ ପାରିବେ । ସେହିପରି ରାସନକାର୍ଡ ଧାରୀଙ୍କ ପାଇଁ ଏକ ନୂଆ ଆଦେଶ ଜାରି କରିଛନ୍ତି ।
- ଯେଉଁ ରାସନ କାର୍ଡଧାରୀମାନେ ମାର୍ଚ୍ଚ ମାସର ରାସନ ସାମଗ୍ରୀ ନେଇନାହାନ୍ତି, ସେମାନେ ଅପ୍ରେଲ୍ ମାସରେ ନେଇପାରିବେ ।
- ପ୍ରତ୍ୟେକ ରାସନ କାର୍ଡଧାରୀଙ୍କୁ 1000ଟଙ୍କାର ସାହାଯ୍ୟ ମିଳିପାରିବ ।
- ରିକ୍ସା ଚାଳକ, ଅଟୋ ରିକ୍ସାବାଲାଙ୍କୁ ଅତିରିକ୍ତ 100ଟଙ୍କାର ସାହାଯ୍ୟ ମିଳିବ ।
- ବରିଷ୍ଠ ନାଗରିକଙ୍କୁ ଅଙ୍ଗନଓ୍ବାଡି ତରଫରୁ ମାଗଣା ଖାଦ୍ୟର ସୁବିଧା ମିଳିବ
- ଅଟୋ ଡ୍ରାଇଭରଙ୍କୁ ରନ୍ଧା ତେଲ ଓ ଚାଉଳ ଆଦିର ସୁବିଧା ଦିଆଯିବ ।
- ସେହିପରି ବାହାର ରାଜ୍ୟରୁ ଆସିଥିବା ଶ୍ରମିକଙ୍କୁ ରନ୍ଧା ତେଲ ଓ ଏକ କିଲୋ ଚାଉଳ ଅତିରିକ୍ତ ଭାବରେ ଯୋଗାଇ ଦିଆଯିବ ।
- ଅମ୍ମା କ୍ୟାଣ୍ଟିନ୍ ତରଫରୁ ଗରିବ ଲୋକଙ୍କୁ ମାଗଣା ଖାଦ୍ୟ ଦିଆଯିବ ।
- ଅଣ ସଙ୍ଗଠିତ କ୍ଷେତ୍ରଙ୍କ ପାଇଁ ରାଜ୍ୟ ସରକାରଙ୍କ ତରଫରୁ 3250 କୋଟିର ରିଲିଫ୍ ଫଣ୍ଡର ପ୍ରସ୍ତୁତ କରାଯାଇଛି ।
ତାମିଲ୍ନାଡୁରେ ଏପର୍ଯ୍ୟନ୍ତ 12ଟି କରୋନା ମାମଲା ସାମ୍ନାକୁ ଆସିଛି । ରାଜ୍ୟରେ ସରକାର ଧାରା 144 ଲଗାଇବା ସହିତ ଲକ୍ଡାଉନ୍ର ଘୋଷଣା ମଧ୍ୟ କରିଛନ୍ତି । (ଏଜେନ୍ସି)