ଜମ୍ମୁ : କରୋନା ସଂକ୍ରମଣକୁ ନେଇ ଲୋକଙ୍କ ମଧ୍ୟରେ ଏତେ ଭୟ ସୃଷ୍ଟି ହୋଇଛି ଯେ, ସେମାନେ କେବଳ ପୀଡ଼ିତ ଠାରୁ ଦୂରରେ ରହୁନାହାନ୍ତି ବରଂ ସର୍ବସାଧାରଣ ଶବ ଦାହରେ ସେମାନଙ୍କ ଅନ୍ତିମ ସଂସ୍କାରକୁ ବିରୋଧ କରିବା ଆରମ୍ଭ କରିଛନ୍ତି । ଜମ୍ମୁକାଶ୍ମୀରଠାରେ ଏଭଳି ଏକ ଘଟଣା ଦେଖିବାକୁ ମିଳିଛି ।
ଜମ୍ମୁକାଶ୍ମୀର ଡୋଡାଠାରେ ଏଭଳି ଏକ ଘଟଣା ଘଟିଛି । କରୋନା ଯୋଗୁଁ ଜଣେ ବୃଦ୍ଧଙ୍କ ମୃତ୍ୟୁ ପରେ ଲୋକମାନେ ତାଙ୍କ ଅନ୍ତିମ ସଂସ୍କାର କରିବାକୁ ବିରୋଧ ଆରମ୍ଭ କରିଥିଲେ। ପରିସ୍ଥିତି ଏପରି ହେଲା ଯେ, ବୃଦ୍ଧଙ୍କ ପରିଜନ ଅଧାଜଳା ଶବକୁ ନେଇ ସେଠାରୁ ପଳାୟନ କଲେ ।
ମିଳିଥିବା ସୂଚନା ଅନୁସାରେ 72 ବର୍ଷୀୟ ଜଣେ କରୋନା ସଂକ୍ରମିତ ବୃଦ୍ଧଙ୍କ ମୃତ୍ୟୁ ହେବା ପରେ ତାଙ୍କ ପରିଜନ ଅନ୍ତିମ ସଂସ୍କାର ପାଇଁ ଡୋଡାର ଦାମାନଠାରେ ପହଞ୍ଚିଥିଲେ । ପ୍ରଶାସନ ଅଧିକାରୀ ମଧ୍ୟ ସେଠାରେ ଉପସ୍ଥିତ ରହିଥିଲେ । କିନ୍ତୁ ଯେତେବେଳେ ଅନ୍ତିମ ସଂସ୍କାର ପ୍ରକ୍ରିୟା ଆରମ୍ଭ କରାଗଲା ସେତବେଳେ ସ୍ଥାନୀୟ ଲୋକମାନେ ଏହାର ବିରୋଧ କରିବା ଆରମ୍ଭ କଲେ ।
ବିରୋଧ ଏତେ ତୀବ୍ରତର ହେଲା ଯେ, ଶେଷରେ ସେଠାରେ ଗୋଷ୍ଠୀ ଆକ୍ରମଣ ଘଟିଲା । ସ୍ଥାନୀୟ ଲୋକମାନେ ବାଡି ଓ ପଥରରେ ପ୍ରଶାସନ ଓ ମୃତକଙ୍କ ପରିଜନଙ୍କ ଉପରେ ଆକ୍ରମଣ କରିବା କଲେ । ପରିଜନ ଓ ପ୍ରଶାସନ ଅଧା ଜଳା ଶବକୁ ନେଇ ପଳାୟନ କରିବାକୁ ପଡିଥିଲା । କିନ୍ତୁ ଏହି ଘଟଣାକୁ ପ୍ରଶାସନ ଅଧିକାରୀ ପ୍ରତ୍ୟାଖ୍ୟାନ କରିଛନ୍ତି ।
ତେବେ ମୃତକଙ୍କ ପୁଅଙ୍କ କହିବାନୁସାରେ, ଜଣେ ଅଧିକାରୀ ଓ ମେଡ଼ିକାଲ୍ ଟିମ ସହିତ ଅନ୍ତିମ ସଂସ୍କାର ପାଇଁ ନିର୍ଦ୍ଧାରିତ ସ୍ଥଳରେ ପହଞ୍ଚିଥିଲେ । ଦାମାନ କ୍ଷେତ୍ରର ଏକ ଶଶ୍ମାନ ଘାଟରେ ତାଙ୍କ ଚିତାକୁ ଜଳାଯାଉଥିବା ସମୟରେ ହଠାତ୍ ବହୁ ସଂଖ୍ୟାକ ଲୋକ ପହଞ୍ଚି ଅନ୍ତିମ ସଂସ୍କାର କରିବାକୁ ବିରୋଧ କଲେ । ଦାହ ସଂସ୍କାର ସମୟରେ ମୃତକଙ୍କ ନିଜ ସମ୍ପର୍କୀୟ, ପତ୍ନୀ ଓ ଦୁଇ ପୁଅ ସାମିଲ୍ ରହିଥିଲେ । ସ୍ଥାନୀୟ ଲୋକଙ୍କ ଆକ୍ରମଣାତ୍ମକ ପ୍ରତିବାଦରେ ଭୟଭୀତ ହୋଇ ସେମାନେ ଅଧା ଜଳା ଶବକୁ ନେଇ ସେଠାରୁ ପଳାଇ ଆସିଲେ । ଏହି ଗୋଷ୍ଠୀ ତାଙ୍କ ଉପରେ ପଥର ଓ ଲାଠି ମାଡ କରିଥିବାର ଅଭିଯୋଗ କରିଛନ୍ତି ମୃତକଙ୍କ ପୁଅ । ପୋଲିସ୍ ମଧ୍ୟ ଏହି ଭିଡ ଗୋଷ୍ଠୀଙ୍କୁ ପ୍ରତିରୋଧ କରିବାରେ ବିଫଳ ହୋଇଥିଲେ ବୋଲି ଅଭିଯୋଗ କରିଛନ୍ତି ମୃତକଙ୍କ ପୁତ୍ର । (ଏଜେନ୍ସି)