ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗତ କିଛି ଦିନ ପୂର୍ବରୁ ବ୍ରହ୍ମପୁର ଏସ୍ ପି ଙ୍କ ପ୍ରଚେଷ୍ଟାରେ ୯ ଜଣ ନବାବୀ ଗିରଫ ହୋଇ କୋର୍ଟ ଚାଲାଣ ହୋଇଥିବା ଖବର ଚର୍ଚ୍ଚାରେ ଥିବା ବେଳେ ପୁଣି ୩ ଜଣ ଠକଙ୍କୁ ଗିରଫ କରାଯାଇଛି। ବ୍ରହ୍ମପୁର ବ୍ୟାଙ୍କ କଲୋନୀ ଅଞ୍ଚଳର ଆଶିଷ ମହାପାତ୍ର, ଛତ୍ରପୁର ଅଞ୍ଚଳର ପ୍ରଦ୍ୟୁମ୍ନ ପଲେଇ ଓ ଜଗତସିଂହପୁର ଜିଲ୍ଲାର ମିହିର ରାଉତ ନାମକ ୩ ଜଣ ଯୁବକଙ୍କୁ ପୋଲିସ ବଡ଼ବଜାରରୁ ଗିରଫ କରି କୋର୍ଟ ଚାଲାଣ କରିଛି।
ସୁଚନା ଅନୁଯାୟୀ, ବଡ଼ବଜାର ଥାନା ଅର୍ନ୍ତଗତ ପଞ୍ଚାନନ ନଗର ସାହିର ଗିରିଜା ନନ୍ଦନ ପଣ୍ଡିତ ନାମକ ଜଣେ ବେରୋଜଗାରୀ ଯୁବକ ଚାକିରୀ ଅନ୍ୱେଷଣରେ ବୁଲୁଥିବା ବେଳେ ଅଭିଯୁକ୍ତ ଆଶିଷ ହାବୁଡ଼ରେ ପଡ଼ିଥିଲେ। ସେ ଚାକିରୀ କରାଇବା ପାଇଁ ଗିରିଜାଙ୍କ ଠାରୁ ୫ ଲକ୍ଷ ଟଙ୍କା ଦାବୀ କରିଥିଲେ। ଚୁକ୍ତି ମୁତାବକ ଗିରିଜା ଆଶିଷଙ୍କୁ ୫ ଲକ୍ଷ ଟଙ୍କା ଦେଇଥିଲେ ଓ ଆଶିଷ ଛତ୍ରପୁର ଅଞ୍ଚଳର ପ୍ରଦ୍ୟୁମ୍ନ ପଲେଇ ପାଖଙ୍କୁ ନେଇ କୋର୍ଟ ପେପରରେ ଏଗ୍ରିମେଣ୍ଟ କରିବା ପାଇଁ କହିବାରୁ ଦୁହେଁ ଛତ୍ରପୁର ଯାଇଥିଲେ।
ଏହା ପରେ ଆଶିଷ ଓ ପ୍ରଦ୍ୟୁମ୍ନ ଦୁହେଁ, ମିଶି ଭୁବନେଶ୍ୱର ଯାଇ ଅନ୍ୟତମ ଠକ ମିହିର ସହ ମିଶାଇ ଥିଲେ ଓ ଖୁବ ଶୀଘ୍ର ନିଯୁକ୍ତି ପତ୍ର ମିଳିବ ବୋଲି ପ୍ରତିଶ୍ରୁତି ଦେଇଥିଲେ। କିନ୍ତୁ ୬ ମାସ ପରେ ସେ ପଚାରିବାରୁ ଉକ୍ତ ଅଭିଯୁକ୍ତମାନେ ମିଛ କଥା କହି ଭଣ୍ଡାଇ ଚାଲିଲେ।
ଏମିତି ବର୍ଷ ପରେ ବର୍ଷ ଗଡ଼ି ଚାଲିଲା ପଛେ ଚାକିରୀର ନାଁ ଗନ୍ଧ ନପାଇ ନିରାଶ ଗିରିଜା ପରିଶେଷରେ ବଡ଼ବଜାର ଥାନାରେ ଅଭିଯୋଗ କରିଥିଲେ। ପୋଲିସ ଅଭିଯୋଗ ଗ୍ରହଣ କରି ସୁଚିନ୍ତିତ ଅନୁସନ୍ଧାନ ଚଳାଇ ଉକ୍ତ ୩ ଅଭିଯୁକ୍ତଙ୍କୁ ଉଠାଇ ଆଣି ଜେରା କରିବା ପରେ ସେମାନଙ୍କ ନିକଟରୁ କିଛି ଜାଲ୍ ନିଯୁକ୍ତ ପତ୍ର,ଏକ ଟଙ୍କା ଗଣିବା ମେସିନ ଓ ଏକ କାର୍ ଜବତ କରିଛି। ଠକ ମାନଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି।