ନୂଆଦିଲ୍ଲୀ : ଦିଲ୍ଲୀର ନ୍ୟୁ ଉସମାନପୁର ଅଞ୍ଚଳରେ ଗୁଳିକାଣ୍ଡ । ଏହି ଗୁଳିକାଣ୍ଡରେ 12 ବର୍ଷୀୟ ନାବାଳକ ଆହତ । ମିଳିଥିବା ସୂଚନା ଅନୁସାରେ ତିନି ଜଣ ଦୁର୍ବୃତ୍ତ ଜଣେ କ୍ୟାଟରରଙ୍କ ଘର ବାହାରେ ଗୁଳି ଚଳାଇଥିଲେ । ଗୁଳି ବିନିମୟ ଶୁଣି ସମଗ୍ର ଅଞ୍ଚଳରେ ଆତଙ୍କ ଖେଳିଯାଇଥିଲା ଏବଂ ଲୋକମାନେ ଜୀବନ ବଞ୍ଚାଇବାକୁ ଦୌଡ଼ିବାକୁ ଲାଗିଥିଲେ। ସେହି ବାଟ ଦେଇ ଯାଉଥିବା ଜଣେ 12 ବର୍ଷୀୟ ବାଳକର ଗୋଡ଼ରେ ଗୁଳି ବାଜିଥିଲା । ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଶିଶୁଟିକୁ ହସ୍ପିଟାଲରେ ଭର୍ତ୍ତି କରିଥିଲା। କିଛି ଘଣ୍ଟା ମଧ୍ୟରେ ପ୍ରଙ୍କୁର ଓ ହର୍ଷ ନାମକ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଥିବାବେଳେ ଜଣେ ଏବେ ବି ଫେରାର ଅଛନ୍ତି। ପ୍ରାଥମିକ ତଦନ୍ତରୁ ପୁରୁଣା ଶତ୍ରୁତା ଓ ବ୍ୟକ୍ତିଗତ ବିବାଦ ଏହି ଗୁଳିକାଣ୍ଡର କାରଣ ବୋଲି ଜଣାପଡ଼ିଛି।
