ବାଲୁଗାଁ: ରଜ ପର୍ବ ଅବସରରେ ଚିଲିକା ବ୍ଲକ ଅନ୍ତର୍ଗତ ଗଳି କନ୍ଦିରେ ଜୁଆ ଖେଳ ଚାଲିଛି। ଏହିପରିପ୍ରେକ୍ଷୀରେ ଗବପଦର ଶିବ ମନ୍ଦିର ପରିସରରେ ଜୁଆ ଖେଳ ଚାଲିଥିବା ବେଳେ ପୋଲିସ ଚଢ଼ାଉ କରି ୪ ଜଣଙ୍କୁ ଗିରଫ କରିଛି।ଖୋର୍ଦ୍ଧା ଏସ୍.ପି ପରମାର ସ୍ମିତ ପୁରୁଷୋତ୍ତମଦାସଙ୍କ ନିର୍ଦ୍ଦେଶ ଓ ବାଲୁଗାଁ ଉପଖଣ୍ଡ ଆରକ୍ଷୀ ଅଧିକ୍ଷକ ସଞ୍ଜୟ କୁମାର ପଟ୍ଟନାୟକ ଓ ଥାନାଧିକାରୀଣୀ ଶ୍ରଦ୍ଧା ନାୟକଙ୍କ ନେତୃତ୍ୱରେ ବୁଧବାର ସକାଳେ ଗବପଦର ଶିବ ମନ୍ଦିର ପରିସରରେ ଜୁଆ ଖେଳ ଚାଲିଥିବା ଖବର ମିଳିବାରେ ଏଏସଆଇ ସୁକାନ୍ତ କୁମାର ପଟ୍ଟନାୟକ, ହାବିଲଦାର ରାମଦାସ ମାଝୀ, କନେଷ୍ଟବଳ ଆର୍. ମୋହନ ରେଡ୍ଡୀ, ସୁନୀଲ କୁମାର ପ୍ରଧାନ ଓ ରାଜୁଦ୍ଦିନ ଖାନ୍ ଘଟଣାସ୍ଥଳରେ ପହଞ୍ଚି ଚଢ଼ାଉ କରିଥିଲେ। ପୋଲିସକୁ ଦେଖି ୬ ଜଣଙ୍କ ମଧ୍ୟରୁ ୨ ଜଣ ଖସି ପଳାଇଥିବା ବେଳେ ୪ ଜଣଙ୍କୁ ପୋଲିସ କାବୁ କରିଥିଲା।
ଗିରଫ ଅଭିଯୁକ୍ତମାନେ ହେଲେ ସନ୍ତୋଷ ରାୟଗୁରୁ (୪୭), ଶ୍ରୀପତି ମହାପାତ୍ର (୩୯), ଅକ୍ଷୟ ମହାପାତ୍ର (୪୫) ଓ ସନ୍ତୋଷ ପଣ୍ଡା (୨୭)। ଘଟଣାସ୍ଥଳରୁ ପୋଲିସ ୧୦୪ ଟି ତାସ ସହିତ ନଗଦ ୯୦୬୨ ଟଙ୍କା ଜବତ କରିଛି। ସେହିପରି ଇଞ୍ଜନପୁର କୋଠ ଘରେ ଜୁଆ ଖେଳ ଚାଲିଥିବା ବେଳେ ଚଢ଼ାଉ କରି ୬ ଜଣଙ୍କୁ ଗିରଫ କରିଛି ପୋଲିସ।
ଖବର ମୁତାବକ ବାଲୁଗାଁ ପୋଲିସ ଆଜି ଇଞ୍ଜନପୁର କୋଠ ଘରେ ଚାଲିଥିବା ଜୁଆ ଆଡ୍ଡା ଉପରେ ଚଢ଼ାଉ କରି ୬ ଜଣଙ୍କୁ ଗିରଫ କରିବାସହ ୧୦୪ ଟି ତାସ ଓ ନଗଦ ୧୦୨୭୪ ଟଙ୍କା ଜବତ ହୋଇଛି। ଉକ୍ତ ଜୁଆ ଆଡ୍ଡରେ ୮ ଜଣ ଜୁଆଡ଼ିଙ୍କ ମଧ୍ୟରୁ ୨ ଜଣ ଖସି ପଳାଇଥିବା ବେଳେ ପୋଲିସ ୬ ଜଣଙ୍କୁ ଧରିବାରେ ସଫଳ ହୋଇଥିଲା।
ଗିରଫ ଅଭିଯୁକ୍ତମାନେ ହେଲେ ସର୍ବେଶ୍ୱର ଜାଲି (୪୫), ନୀଳମଣି ବେହେରା (୩୮), ଟୁନା ବେହେରା (୩୧), ପବିତ୍ର ଦାସ (୪୭), ରଞ୍ଜନ ବିଷୋଇ (୨୪), ସୀମାଞ୍ଚଳ ସାହୁ (୩୪)।