ଭୁବନେଶ୍ବର, ପର୍ଯ୍ୟଟନ ବିଭାଗ ଦ୍ୱାରା ଆୟୋଜିତ ହେଉଥିବା ମୁକ୍ତେଶ୍ୱର ନୃତ୍ୟ ଉତ୍ସବର ଦ୍ୱିତୀୟ ସନ୍ଧ୍ୟାରେ ଏକକ, ଯୁଗଳ ଏବଂ ବୃନ୍ଦ ନୃତ୍ୟ ପ୍ରଦର୍ଶିତ କରାଯାଇଥିଲା। ଏହି କାର୍ଯ୍ୟକ୍ରମର ପ୍ରାରମ୍ଭରେ ଭୁବନେଶ୍ୱର ସ୍ବପ୍ନେଶ୍ୱର ଚକ୍ରବର୍ତ୍ତୀ ଏବଂ ତାଙ୍କ ଦଳ ଶିବ ବନ୍ଦନା ସଂଗୀତ ପରିବେଷଣ କରିଥିଲେ। ଏକକ ଓଡ଼ିଶୀ ନୃତ୍ୟରେ ଓଡ଼ିଶା ଡ୍ୟାନ୍ସ ଏକାଡେମୀର ରମେଶ ଚନ୍ଦ୍ର ଜେନା ଓଡିଶୀ ପରିବେଷଣ କରିଥିଲେ। ସେ ହରଗୌରାଷ୍ଠକମ ଏବଂ ପରେ ଅଭିନୟରେ ବିଶ୍ବରୂପ ନୃତ୍ୟ ପରିବେଷଣ କରିଥିଲେ। ଏହାକୁ ଗୁରୁ ଅରୁଣା ମହାନ୍ତି ଏବଂ ବିଚିତ୍ରାନନ୍ଦ ସ୍ବାଇଁ କୋରିଓଗ୍ରାଫ୍ କରିଥିଲେ।
କୋଲକାତା ସ୍ଥିତ ଶତାଦ୍ଧୀ ମଲ୍ଲିକ ଏବଂ ଭୁବନେଶ୍ୱର ନୀଲାଦ୍ରି ମହାନ୍ତି, ଦ୍ବିତୀୟ ସନ୍ଧ୍ୟାରେ ଡୁଏଟ୍ କରିଥିଲେ। ଉଭୟ ହେଉଛନ୍ତି ଗୁରୁ ଦୁର୍ଗା ଚରଣ ରଣବୀରଙ୍କର ଶିଷ୍ୟ। ସେହିପରି ବୃନ୍ଦ ଉପସ୍ଥାପନାରେ କୋଲକାତାସ୍ଥିତ ଡୋନା ଗାଙ୍ଗୁଲି ଏବଂ ତାଙ୍କ ଟ୍ରୁପ୍ ଓଡିଶୀ ପରିବେଷଣ କରିଥିଲେ। ସେମାନେ ଦଶ ଅବତରା ଏବଂ ପରେ ଅର୍ଦ୍ଧନାରୀଶ୍ୱର ଏବଂ ଶଙ୍କରାଭରଣ ପଲ୍ଲବୀ ଉପସ୍ଥାପନ କରିଥିଲେ। ଭୁବନେଶ୍ବରର ମୁକ୍ତେଶ୍ବର ମନ୍ଦିର ପ୍ରାଙ୍ଗଣରେ ହେଉଥିବା ଏହି ଉତ୍ସବ ଆଜି ସଂଧ୍ୟାରେ ଶେଷ ହେବ।