ଭୁବନେଶ୍ବର: ଗତ ନଭେମ୍ବର ମାସ ଶେଷ ସପ୍ତାହରେ ଭାରତୀୟ ରେଳବାଇ “ଭାରତ ଗୌରବ ଟ୍ରେନ୍” ନୀତି ପ୍ରାରମ୍ଭ କରିଛି। “ଭାରତ ଗୌରବ ଟ୍ରେନ୍” ନାମକ ବିଷୟବସ୍ତୁ ଆଧାରିତ ଟୁରିଷ୍ଟ ସର୍କିଟ୍ ଟ୍ରେନ୍ ଚଳାଇ ଭାରତର ସମୃଦ୍ଧ ସାଂସ୍କୃତିକ, ଐତିହ୍ୟ ଏବଂ ଭବ୍ୟ ଐତିହାସିକ ସ୍ଥାନଗୁଡିକ ଭାରତ ତଥା ବିଶ୍ୱର ଲୋକଙ୍କୁ ପ୍ରଦର୍ଶନ କରିବା ଏହି ନୀତିର ଉଦ୍ଦେଶ୍ୟ ଅଟେ।
ପୂର୍ବତଟ ରେଳପଥ ପକ୍ଷରୁ ଡିସେମ୍ବର ୭ ତାରିଖ ଦିନ (ମଙ୍ଗଳବାର) ଆଭାସୀ ମାଧ୍ୟମରେ ଏହି ସମ୍ବନ୍ଧୀୟ ଏକ ବୈଠକ ଆୟୋଜିତ ହୋଇଯାଇଅଛି ଯେଉଁଠାରେ ଓଡିଶା ଏବଂ ଆନ୍ଧ୍ରପ୍ରଦେଶର ଟୁର୍ ଆଣ୍ଡ ଟ୍ରାଭେଲ ଅପରେଟରମାନେ ଅଂଶଗ୍ରହଣ କରିଥିଲେ। ପୂର୍ବତଟ ରେଳପଥ ମୁଖ୍ୟ ବାଣିଜ୍ୟିକ ପ୍ରବନ୍ଧକ (ପାସେଞ୍ଜର ମାର୍କେଟିଂ) ପି ସି ସାହୁ ଏହି ଟ୍ରେନ ସମ୍ବନ୍ଧୀୟ ବୈଶିଷ୍ଟ୍ୟକୁ ସଂକ୍ଷେପରେ ବର୍ଣ୍ଣନା କରିଥିଲେ। ପୂର୍ବତଟ ରେଳପଥର ମୁଖ୍ୟ ଯାତ୍ରୀ ଯାତାୟାତ ପ୍ରବନ୍ଧକ ଜେ.ପି.ମିଶ୍ର ଏବଂ ଉପ ମୁଖ୍ୟ ଯାନ୍ତ୍ରିକ (ମେକାନିକାଲ) ଯନ୍ତ୍ରୀ (କୋଚିଂ) ଏହି ବୈଠକରେ ମଧ୍ୟ ଯୋଗ ଦେଇଥିଲେ।
“ଏହି ଯୋଜନା ଅଧୀନରେ ପଞ୍ଜୀକୃତ ସେବା ପ୍ରଦାନକାରୀଙ୍କୁ ଭାରତ ଗୌରବ ଟ୍ରେନ୍ ଚଳାଚଳ ପାଇଁ ଭାରତୀୟ ରେଳବାଇ ଦ୍ୱାରା “ବ୍ୟବହାର କରିବାର ଅଧିକାର” ଆଦର୍ଶ ଅଧୀନରେ ରେକ୍ ପ୍ରଦାନ କରାଯିବ। ବିଷୟବସ୍ତୁ, ଟୁର୍ ପ୍ୟାକେଜ୍ ଏବଂ ମୂଲ୍ୟ ସ୍ଥିର କରିବାକୁ ସେବା ପ୍ରଦାନକାରୀଙ୍କର ନମନୀୟତା ରହିବ ଏବଂ ରେଳ ଭ୍ରମଣ, ହୋଟେଲ ରହଣି, ଦର୍ଶନୀୟ ସ୍ଥାନ ସମେତ ପର୍ଯ୍ୟଟକଙ୍କୁ ସମସ୍ତ ପ୍ରକାର ଦେୟ ଅନ୍ତର୍ଭୂକ୍ତ ପ୍ୟାକେଜ୍ ପ୍ରଦାନ କରିବାର ସ୍ୱାଧୀନତା ମଧ୍ୟ ରହିବ।
ଆଗ୍ରହୀ ସେବା ପ୍ରଦାନକାରୀ “ଭାରତ ଗୌରବ ଟ୍ରେନ୍” ଅଧୀନରେ www.indianrailways.gov.in ଅନଲାଇନ୍ ପଞ୍ଜିକରଣ ପ୍ରୟୋଗ କରିପାରିବେ। ଘରୋଇ ଅପରେଟରମାନଙ୍କୁ ସର୍ବନିମ୍ନ ଦୁଇ ବର୍ଷ ଏବଂ କୋଚଗୁଡିକର ଅବଶିଷ୍ଟ କୋଡାଲ୍ ଲାଇଫ୍ ପର୍ଯ୍ୟନ୍ତ କୋଚ୍ ପ୍ରଦାନ କରାଯିବ। “ଭାରତ ଗୌରବ” ଟ୍ରେନରେ ସର୍ବନିମ୍ନ ୧୪ ଟି କୋଚ୍ ଏବଂ ୨ ଟି SLR (ସିଟିଂ-କମ-ଲଗେଜ୍ କୋଚ୍) ସହିତ ସର୍ବାଧିକ ୨୦ ଟି କୋଚ୍ ରହିବ। ସେବା ପ୍ରଦାନକାରୀମାନେ ଟ୍ରେନର ଭିତର ଓ ବାହ୍ୟକୁ ସଜାଇ ପାରିବେ ଏବଂ ଟ୍ରେନର ତୃତୀୟ ପକ୍ଷ ବିଜ୍ଞାପନ ଏବଂ ବ୍ରାଣ୍ଡିଂରୁ ରୋଜଗାର ମଧ୍ୟ କରିପାରିବେ। ସେବା ପ୍ରଦାନକାରୀ ମାନେ ମଧ୍ୟ ଲଗେଜ୍ ପରିବହନ ପାଇଁ ଟ୍ରେନର SLR ଅଂଶ ବ୍ୟବହାର କରିପାରିବେ। ପ୍ରତ୍ୟେକ ଭାରତ ଗୌରବ ଟ୍ରେନ୍ ଏକ ସ୍ୱତନ୍ତ୍ର ନମ୍ବର ରହିବ ଏବଂ ଅନ୍ୟ ମେଲ୍/ଏକ୍ସପ୍ରେସ ଟ୍ରେନ୍ ସହିତ ସମାନତା ଦିଆଯିବ।
ସେବା ପ୍ରଦାନକାରୀ ଏବଂ ଟୁର୍ ଅପରେଟରଙ୍କ ସମସ୍ୟାର ତୁରନ୍ତ ସମାଧାନ ପାଇଁ ପୂର୍ବତଟ ରେଳପଥ ପକ୍ଷରୁ ଏକ ଗ୍ରାହକ ସହାୟତା ୟୁନିଟ୍ ମଧ୍ୟ ସ୍ଥାପନା କରାଯାଇଅଛି।