ସୀତାରାମ ଅଗ୍ରୱାଲ
ଚିଲିକା: କରୋନା ମହାମାରୀ ଯୋଗୁଁ ଦୀର୍ଘ ଦୁଇ ବର୍ଷ ହେଲା ବହୁ ପ୍ରସିଦ୍ଧ ଚିଲିକା ବୋଇତ ବନ୍ଦାଣ ମହୋତ୍ସବ ସ୍ଥଗିତ ଥିବା ବେଳେ ଚଳିତ ବର୍ଷ କିନ୍ତୁ ଏହା ଧୁମଧାମରେ ପାଳନ ହେବ। ବାଲୁଗାଁ ଏନଏସି ର ନବ ନିର୍ବାଚିତ ଅଧ୍ୟକ୍ଷା ସୁକାନ୍ତି ପାଇକରାୟଙ୍କ ଉଦ୍ୟମକ୍ରମେ ଏହାକୁ ଆସନ୍ତାକାଲି ବୃହତ ଆକାରରେ ପାଳନ କରାଯିବ।
ତେବେ ଆସନ୍ତାକାଲି ଅପରାହ୍ନ ୪ ଘଟିକାରୁ ଉକ୍ତ ମହୋତ୍ସବର ଶୁଭାରମ୍ଭ ହେଉଥିବା ବେଳେ ଏହି ମହୋତ୍ସବରେ ସାଂସଦ, ରାଜ୍ୟର ମନ୍ତ୍ରୀ ଯୋଗଦେବାର କାର୍ଯ୍ୟକ୍ରମ ରହିଛି। ଏତଦବ୍ୟତୀତ ଚଳିତ ବର୍ଷ ବାଲୁଗାଁ ବୋଇତ ବନ୍ଦାଣ ମହୋତ୍ସବରେ ଓଡ଼ିଶାର ବହୁ ଖ୍ୟାତନାମା ସିନେ ତାରକା, ହାସ୍ୟ ଅଭିନେତା ଏବଂ କଣ୍ଠଶିଳ୍ପୀ ଯୋଗଦେବେ ବୋଲି ଚିଲିକା ବୋଇତ ବନ୍ଦାଣ ମହୋତ୍ସବ କମିଟି ପକ୍ଷରୁ ସୂଚନା ମିଳିଛି।
ମିଳିଥିବା ସୂଚନା ଅନୁଯାୟୀ, ଏହି ମହୋତ୍ସବରେ ଓଲିଉଡ ଅଭିନେତ୍ରୀ ଏଲିନା ସାମନ୍ତରାୟ ଯୋଗ ଦେଉଥିବା ବେଳେ ହାସ୍ୟ ଅଭିନେତାମାନଙ୍କ ମଧ୍ୟରେ ଶଙ୍କର, ରାଜୁ ଦାସ, ସୁନୀଲ, ଚିତ, ଆଲେକ୍ସ, ଚାନ୍ଦିନୀ ପ୍ରମୁଖ ଯୋଗ ଦେଉଛନ୍ତି। ସେହିଭଳି କଣ୍ଠଶିଳ୍ପୀ ହ୍ୟୁମାନ ସାଗର, ସ୍ମିତା ପଣ୍ଡା, ଅଙ୍କିତା ପାତ୍ର, ଆଙ୍କର ବବୁଲ ଏବଂ ଗୁନୁ ବାବା ପ୍ରମୁଖ ଯୋଗ ଦେଇ ମହୋତ୍ସବକୁ ଅଧିକ ରଙ୍ଗୀନ କରିବେ।
