ଭୁବନେଶ୍ବର: ସରିଲା ପଦମପୁର ଉପନିର୍ବାଚନର ପ୍ରଚାର। ହେଲେ ଏହି ନିର୍ବାଚନ ଓଡିଶା ରାଜନୈତିକ ଇତିହାସରେ ରଚନା କଲା ବହୁ ନୂଆ ଇତିହାସ, ନୂଆ ଦୃଷ୍ଟାନ୍ତ। ଯାହା କେବେ କୌଣସି ଉପନିର୍ବାଚନରେ ଏପରି ଘଟି ନ ଥିଲା। ଏହି ଉପନିର୍ବାଚନରେ ଉଭୟ ବିଜେଡି ଓ ବିଜେପି ଯେପରି ଟକ୍କରା ଟକ୍କରି ହେଲେ ତାହା କେବେ ଦେଖାଯାଇ ନ ଥିଲା।
ଗତ ବିଧାନସଭା ନିର୍ବାଚନ ପରେ ପ୍ରାୟ ଛଅଟି ଉପନିର୍ବାଚନ ହୋଇଯାଇଛି। ହେଲେ ସେଥିରେ ଏପରି କିଛି ନାଟକବାଜୀ ଦେଖିବାକୁ ମିଳି ନ ଥିଲା ଯାହା ପଦ୍ମପୁରରେ ଘଟିଲା। ମୁଖ୍ୟତଃ ନିକଟରେ ଧାମନଗର ଉପନିର୍ବାଚନରେ ବିଜେପି ଜିତିବା ପରେ ତାଙ୍କର ଆଶା ଆହୁରି ବଢିଗଲା। ଯାହାର ଘୋ ଘା ଏହି ପଦମପୁର ଉପନିର୍ବାଚନରେ ପ୍ରତିଫଳିତ ହେଲା।
ଏହି ଉପନିର୍ବାଚନ ପୂର୍ବରୁ ଦୁଇଟି ପ୍ରସଂଗ ନେଇ ସାରା ଓଡିଶା ପଡିଲା ଉଠିଲା। ତାହା ହେଲା ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଏବଂ ପଦମପୁରକୁ ରେଳ ସଂଯୋଗ। ଏହାକୁ ନେଇ ଉଭୟ ବିଜେଡି ବିଜେପି କାଦୁଅ ଫିଙ୍ଗାଫିଙ୍ଗି ହେଲେ। ନିର୍ବାଚନ ପ୍ରଚାରର ଶେଷ ପର୍ଯ୍ୟନ୍ତ ଏହି ଦୁଇ ପ୍ରସଂଗ ତାଜା ହୋଇ ରହିଥିଲା। ସେହି ଚାଷୀ ପ୍ରସଂଗ ନେଇ ରାଜଧାନୀରେ ମଧ୍ୟ ବିଜେପି ଗର୍ଜନ କଲା। ଏହାଥିଲା ଏପରି ଏକ ଉପନିର୍ବାଚନ ଯାହା ରାଜ୍ୟ କାହିଁକି ଜାତୀୟ ରାଜନୀତିକୁ ମଧ୍ୟ ଚଳଚଞ୍ଚଳ କରିଦେଇ ଥିଲା।
ସେହିପରି ଏହି ପ୍ରସଂଗର ଉତ୍ତର ଦେବା ପାଇଁ ପ୍ରଥମ ଥର ବିଜେପି ଦୁଇ ଜଣ ଟାଣୁଆ କେନ୍ଦ୍ରମନ୍ତ୍ରୀଙ୍କୁ ମଇଦାନକୁ ଓହ୍ଲାଇବାକୁ ପଡିଥିଲା। ସେମାନେ ହେଲେ କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର ଏବଂ ଅଶ୍ବନୀ ବୈଷ୍ଣବ। ପୂର୍ବରୁ ଉପନିର୍ବାଚରେ ବିଜେପି କେବେ ଏପରି କରି ନ ଥିଲା। ସେହିପରି ଧାମନଗରେ ନିରବ ଥିବା ବୈଜୟନ୍ତ ପଣ୍ଡା ଏବଂ ଅପରାଜିତା ଷଡଙ୍ଗୀ ଏହି ଉପ ନିର୍ବାଚନରେ ପ୍ରଚାର କରିବାକୁ ସୁଯୋଗ ପାଇଥିଲେ।
ଅନ୍ୟପକ୍ଷରେ ଧାମନଗରରେ ପ୍ରଥମ ଥର ପାଇଁ ପରାଜୟ ପରେ ବିଜେଡି ମଧ୍ୟ ତାହାର କଳବଳ କୌଶଳକୁ ପଦମପୁରରେ ଲଗାଇ ଦେଇଥିଲା। କୌଣସି ଉପନିର୍ବାଚନରେ ମୁଖ୍ୟମନ୍ତ୍ରୀ ସିଧା ପ୍ରଚାରରେ ସାମିଲ ହୋଇ ନ ଥିଲେ। ଭର୍ଚୁୟାଲି ଉପନିର୍ବାଚନ ପ୍ରଚାର କରିଥିଲେ। ହେଲେ ପଦମପୁରରେ ଖୋଦ ମୁଖ୍ୟମନ୍ତ୍ରୀଙ୍କୁ ମଇଦାନକୁ ଓହ୍ଲାଇବାକୁ ପଡିଥିଲା।
ତେବେ ବିଜେଡି ଏହି ଉପନିର୍ବାଚନରେ ନିଜର ପ୍ରସଂଗ ଉଠାଇବା ଅପେକ୍ଷା ବିଜେପିକୁ ପ୍ରତିରୋଧ କରିବାରେ ବେଶୀ ସମୟ ନେବାକୁ ବାଧ୍ୟ ହୋଇଥିଲା। କାରଣ ବିଜେପି ତରଫରୁ ଚାଷୀ ଓ ରେଳ ପ୍ରସଂଗରେ ଯେପରି ମନ୍ତବ୍ୟ ଦିଆଗଲା ତାହାକୁ ବିଜେଡି ସ୍ପଷ୍ଟ କରଣ ଦେଇ ମିଛ ବୋଲି ପ୍ରମାଣିତ କରିବାରେ ଅଧିକ ସମୟ ଦେବାକୁ ପଡିଥିଲା।
ସେହିପରି ବିଭିନ୍ନ ସମୟରେ ମୁହଁ ଘୋଡାଇ ଟଙ୍କା ବାଣ୍ଟିବା, ଅମିତା ଶାହାଙ୍କ ମିଛ ଭିଡିଓ ଭାଇରାଲ କରିବା, ବର୍ଷା ବରିହାଙ୍କ ନାମରେ ବିଭିନ୍ନ ଅପମାନ ସୂଚକ ମନ୍ତବ୍ୟ ଦେବା, ଧର୍ମେନ୍ଦ୍ର ପ୍ରଧାନଙ୍କ ରାଜା ସ୍ବାଇଁଙ୍କୁ ବାଡାଇବା ପାଇଁ କହିବା, ସୁଶାନ୍ତ ସିଂଙ୍କୁ ସାମାଜିକ ଗଣମାଧ୍ୟମରେ ହତ୍ୟା କରିବା ପାଇଁ ଧମକ ଦେବା ପ୍ରଭୃତି ପ୍ରସଂଗ ବିଜେଡି ସଫଳତାର ସହ ମୁକାବିଲା କରିବାରେ ସଫଳ ହୋଇଛି।
ତେବେ ଏହି ନିର୍ବାଚନରେ ସବୁଠାରୁ ଯେଉଁ ରୋଚକ ସ୍ଥିତି ଦେଖାଦେଇଥିଲା ତାହା ହେଲା ସକାଳେ ଆଇଟି ରେଡ୍, ସଂଧ୍ୟାରେ ଜିଏସଟି ରେଡ୍। ନିର୍ବାଚନ ପକ୍ରିୟା ଚାଲିଥିବା ବେଳେ ଉଭୟ କେନ୍ଦ୍ର ସରକାର ଏବଂ ରାଜ୍ୟ ସରକାରଙ୍କ ଏପରି ପଦକ୍ଷେପ ପ୍ରଥମ ଥର ପାଇଁ ଦେଖିବାକୁ ମିଳିଥିଲା। ପ୍ରଥମେ କେନ୍ଦ୍ର ସରକାରଙ୍କ ଆଇଟି ବିଭାଗ ବିଜେଡି ଘରେ ରେଡ କଲା। ଏହାପରେ ପରେ ସଂଧ୍ୟାରେ ରାଜ୍ୟ ସରକାରଙ୍କ ଜିଏସଟି ବିଜେପି ନେତାଙ୍କ ଘରେ ରେଡ କଲା। ଯେସାକୁ ତେସା ନ୍ୟାୟରେ ବିଜେଡି ଏସବୁକୁ ବେଶ ସାବଧାନତାର ସହ ମୁକାବିଲା କରିଥିଲା।
ସେଥିପାଇଁ ପଦମପୁର ଉପନିର୍ବାଚନ ଏସବୁ ଘଟଣା ପାଇଁ ଓଡିଶା ରାଜନୈତିକ ଇତିହାସରେ ଏକ ଭିନ୍ନ ଦୃଷ୍ଟାନ୍ତ ସୃଷ୍ଟି କରିଛି।
