ଭୁବନେଶ୍ବର: ସମସ୍ତେ ଯାହା ଆଶା କରୁଥିଲେ ତାହା ହିଁ ହେଲା। ନବୀନ ପଟ୍ଟନାୟକ ଏବଂ ତାଙ୍କ ସରକାରଙ୍କୁ ପ୍ରଶଂସାରେ ପୋତି ଦେଲେ ଗୃହମନ୍ତ୍ରୀ ଅମିତ ସାହା। ଓଡିଶା ଗସ୍ତରେ ଆସିଥିବା ସାହା, ଆଜି ଲୋକସଭା ଭବନ ପ୍ରେକ୍ଷାଳୟରେ ଏକ କାର୍ଯ୍ୟକ୍ରମରେ ଯୋଗଦେଇ ଥିଲେ। ସେହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଉପସ୍ଥିତ ଥିଲେ। ଏଥିସହିତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଉପସ୍ଥିତ ଥିଲେ।
ବିଜେପିର ଚାଣକ୍ୟ ବୋଲି କୁହାଯାଉଥିବା ଅମିତ ସାହା ନବୀନଙ୍କୁ ପ୍ରଶଂସା ଉପରେ ପ୍ରଶଂସା କରିଥିଲେ। ଥରେ ନୁହେଁ ଦୁଇଥର ସେ ନବୀନ ପଟ୍ଟନାୟକଙ୍କୁ ବହୁତ ଧନ୍ୟବାଦ ବୋଲି କହିଥିଲେ। ପ୍ରଥମେ ସେ ନକ୍ସଲ ମୁକାବିଲା ଉପରେ ଭାଷଣ ରଖିଥିଲେ। ସେଥିରେ ସେ ନବୀନ ସରକାର କରିଥିବା ପଦକ୍ଷେପ ଏବଂ ସହଯୋଗ ପାଇଁ ପ୍ରଶଂସା କରିଥିଲେ।
ସେ କହିଥିଲେ ଯେ, କେନ୍ଦ୍ର ସହିତ ମିଶି ରାଜ୍ୟ ସରକାର ନକ୍ସଲ ମୁକାବିଲା କରିଛନ୍ତି। ଆଉ ଏଥିରେ ସଫଳ ମଧ୍ୟ ପାଇଛୁ। ବର୍ତ୍ତମାନ ନକ୍ସଲ ହିଂସା ବହୁ ମାତ୍ରାରେ ହ୍ରାସ ପାଇଛି ବୋଲି ସାହା କହିଥିଲେ। ତେବେ ବିପର୍ଯ୍ୟୟ ମୁକାବିଲା କରିବାରେ ନବୀନ ପଟ୍ଟନାୟକଙ୍କୁ ବାରମ୍ବାର ପ୍ରଶଂସା କରିଥିଲେ ସାହା। ଏହି ମଞ୍ଚରେ ଥିବା ଧର୍ମେନ୍ଦ୍ର ପ୍ରଧାନ ମଧ୍ୟ ସାହାଙ୍କ ଏପରି ପ୍ରଶଂସାକୁ ଶୁଣୁଥିଲେ ଆଉ ମୁହଁ ତଳକୁ କରୁଥିଲେ।
ସେ କହିଥିଲେ ଯେ, ବିପର୍ଯ୍ୟୟ ମୁକାବିଲା କରିବାରେ ନବୀନ ପଟ୍ଟନାୟକ ଯେପରି କାର୍ଯ୍ୟ କରିଛନ୍ତି ତାହା ଆଜି ସାରା ଦେଶକୁ ସେ ଏକ ରାସ୍ତା ଦେଖାଇଛନ୍ତି। ପୂର୍ବେ ଓଡିଶାରେ ବାତ୍ୟା ହେଲେ ହଜାର ହଜାର ଲୋକଙ୍କର ଜୀବନ ଯାଉଥିଲା। ହେଲେ ନବୀନବାବୁଙ୍କ ସମୟରେ ତାହା ବର୍ତ୍ତମାନ ଶୂନକୁ ଖସିଆସିଲା। ସେଥିପାଇଁ ମୁଁ ନବୀନ ପଟ୍ଟନାୟକଙ୍କୁ ଏବଂ ତାଙ୍କ ସରକାରଙ୍କୁ ପୁଣି ଥରେ ଧନ୍ୟବାଦ ଦେଉଛି ବୋଲି ସାହା କହିଥିଲେ।
ତେବେ ସବୁଠାରୁ ମଜଦାର କଥା ହେଲା ଯେ, ଜାତୀୟ ରାଜପଥ ପ୍ରକଳ୍ପ ଉଦଘାଟନ। ଏହି ସମୟରେ ଅମିତ ସାହାଙ୍କୁ ରିମୋଟ ଟିପି ପ୍ରକଳ୍ପ ଉଦଘାଟନ କରିବା ପାଇଁ ଅନୁରୋଧ କରାଯାଇଥିଲା। ହେଲେ ଅମିତ ସାହା ପାଖରେ ବସିଥିବା ନବୀନ ପଟ୍ଟନାୟକଙ୍କ ପାଖକୁ ଆସି ରିର୍ମୋଟ ଟିପିବା ପାଇଁ ତାଙ୍କ ହାତକୁ ଭିଡି ଆଣିଥିଲେ। ଉଭୟ ଅମିତ ସାହା ଏବଂ ନବୀନ ପଟ୍ଟନାୟକ ରିର୍ମୋଟ ଟିପି ପ୍ରକଳ୍ପ ଉଦଘାଟନ କରିଥିଲେ। ଧର୍ମେନ୍ଦ୍ର ଦୂରରେ ବସି ଏହାକୁ ଉପଭୋଗ କରୁଥିଲେ।
ଏହି କାର୍ଯ୍ୟକ୍ରମକୁ ସମସ୍ତ ଟିଭି ଚ୍ୟାନଲରେ ସିଧା ପ୍ରସାରଣ କରାଯାଉଥିଲା। ବିଜେପି ନେତାଙ୍କଠାରୁ ଆରମ୍ଭ କରି କର୍ମିମାନେ ଅମିତ ସାହାଙ୍କ ଭାଷଣ ଶୁଣୁଥିଲେ। କାରଣ ଅମିତ ସାହା ଆସିଲେ ନବୀନଙ୍କ ଉପରେ କଣ କହିବେ ସେ ନେଇ ସେମାନେ ଅପେକ୍ଷା କରିଥିଲେ। ହେଲେ ସାହା ଏହି ବାଣୀ ଶୁଣିବା ପରେ ସେମାନଙ୍କୁ ମୁଣ୍ଡବିନ୍ଧା ଆରମ୍ଭ ହୋଇଯାଇଛି।
