ଭୁବନେଶ୍ବର: ଧିରେ ଧିରେ ବିଜେଡିର ଗୋଷ୍ଠୀ କନ୍ଦଳ ଏକ ସାଂଘାତିକ ସ୍ଥିତି ଆଡକୁ ଗତି କରିବାରେ ଲାଗିଛି। କାରଣ ଦିନକୁ ଦିନ ଦଳର ବରିଷ୍ଠ ନେତାମାନେ ଯେପରି ବିବୃତି ଦେବାରେ ଲାଗିଛନ୍ତି ତାହା ଦଳର କନ୍ଦଳକୁ ସ୍ପଷ୍ଟ ସୂଚାଇ ଦେଉଛି। ତେବେ ପୂର୍ବରୁ ନେତାମାନେ ଦଳର ଆଭିମୁଖ୍ୟ ନେଇ ଅସନ୍ତୋଷ ଜାହିରୀ କରି ଭି କେ ପାଣ୍ଡିଆନଙ୍କୁ ଟାର୍ଗେଟ କରୁଥିଲେ।
ହେଲେ ବର୍ତ୍ତମାନ ପାଣ୍ଡିଆନଙ୍କ ସହ ନେତାମାନେ ସିଧା ଦଳର ସୁପ୍ରିମୋଙ୍କୁ ମଧ୍ୟ ଟାର୍ଗେଟ କଲେଣି। ଯାହାର ଜ୍ବଳନ୍ତ ଉଦାହର ହେଉଛି ପୂର୍ବତ୍ତନ ମନ୍ତ୍ରୀ ପ୍ରଫୁଲ ମଲ୍ଲିକଙ୍କୁ ମନ୍ତବ୍ୟ। ପ୍ରଫୁଲ ସିଧା ସୁପ୍ରିମୋ ନବୀନ ପଟ୍ଟନାୟକଙ୍କୁ ପଦେ ଶୁଣେଇ ଦେଇଛନ୍ତି। ସେ କହିଛନ୍ତି ଯେ, ଆମେ ହୋଟେଲରେ ବୈଠକ କଲେ କେହି ମନା କରିପାରିବେ ନାହିଁ। ସେ ନାଲି ଆଖିକୁ ଆମେ ଡରିବୁ ନାହିଁ। ଆମ ଇଚ୍ଛା ଆମେ ଯେଉଁଠି ଚାହିଁବୁ ସେଠି ବସିବୁ। ଏଥିପାଇଁ କାହାର ଅନୁମତି ନେବା ଆବଶ୍ୟକ ନାହିଁ।
ହୋଟେଲରେ କେତେକ ବିଜେଡି ନେତା ମେଳି କରିଥିବାରୁ ତାହାକୁ ନାପସନ୍ଦ କରିଥିଲେ ନବୀନ ପଟ୍ଟନାୟକ। ସେ ଗଣମାଧ୍ୟମକୁ କହିଥିଲେ ଯେ, ବିଜେଡି ନେତାଙ୍କର ବୈଠକ କରିବା ପାଇଁ ଦଳୀୟ କାର୍ଯ୍ୟାଳୟ ଶଙ୍ଖ ଭବନ ରହିଛି। ସେଠାରେ ବୈଠକ କରନ୍ତୁ। ବାହାରେ ସଭା କରିବା ଠିକ ନୁହେଁ ବୋଲି ନବୀନ କହିଥିଲେ। ଯାହାର ଯବାବ ଦେଇଛନ୍ତି ପ୍ରଫୁଲ ମଲ୍ଲିକ। ଏହା ସିଧା ନବୀନଙ୍କୁ ଧମକ ବୋଲି କୁହାଯିବ।
ପ୍ରଫୁଲ କହିଛନ୍ତି ଯେ, ଯେତେବେଳ ଦଳୀୟ ବୈଠକ ହେବ କିମ୍ବା କମିଟ ବୈଠକ ହେବ ସେତେବେଳେ ଆମେ ପାର୍ଟି ଅଫିସରେ ବସିବୁ। ଅନ୍ୟ ସମୟରେ କାହିଁକି ପାର୍ଟି ଅଫିସରେ ବସିବୁ ବୋଲି ସେ ପ୍ରଶ୍ନ କରିଛନ୍ତି। ସେ କହିଛନ୍ତି ଯେ, ଆମର ବୟସ ହେଲାଣି, ଆମେ କେଉଁଠି ବସି ହସଖୁସି କରିବୁ ସେଥିରେ କେହି ଆମକୁ ବାରଣ କରିପାରିବେ ନାହିଁ ବୋଲି ରୋକଠୋକ ଶୁଣାଇ ଦେଇଛନ୍ତି।
ଫଳରେ ପାଣ୍ଡିଆନ ପାଇଁ ବର୍ତ୍ତମାନ ନବୀନ ଟାର୍ଗେଟକୁ ଆସି ଗଲେଣି। ଯାହା କେବେ ଘଟି ନ ଥିଲା। ଯଦି ଏହି ପରି ନବୀନଙ୍କୁ ଆଉ କିଛି ନେତା ଟାର୍ଗେଟ କରିବେ ତେବେ ତାହା ଏକ ସାଂଘାତିକ ଘଟଣା ହେବ। କାରଣ ଦଳର ସୁପ୍ରିମୋଙ୍କୁ ନେତାମାନେ ଟାର୍ଗେଟ କରିବା ନିଶ୍ଚିତ ଏକ ବଡ ଘଟଣା। ଅନୁମାନ କରିହେଉଛି ଯେ, ନେତାମାନେ ଦୀର୍ଘ ବର୍ଷ ଧରି ସହି ସହି ଆସିଲେଣି। ତେଣୁ ଆଉ ନବୀନଙ୍କ ପାଣ୍ଡିଆନ ପ୍ରୀତିଙ୍କୁ ଆଉ ବିଜେଡି ନେତା ହଜମ କରିବା ପରିସ୍ଥିତିରେ ନାହାଁନ୍ତି ବୋଲି ସ୍ପଷ୍ଟ ହୋଇଛି।
ସେହିପରି ପାଣ୍ଡିଆନ ପ୍ରସଂଗରେ ମଧ୍ୟ ପ୍ରଫୁଲ ଛାଡି ନାହାଁନ୍ତି। ସେ କହିଛନ୍ତି ଯେ, ପାଣ୍ଡିଆନ ସନ୍ୟାସୀ ହୋଇଥିଲେ ମଧ୍ୟ ବର୍ତ୍ତମାନ ଦଳୀୟ କାର୍ଯ୍ୟରେ ମୁଣ୍ଡ ଖେଳାଉଛନ୍ତି। ଯଦି ସେ ସେପରି କାର୍ଯ୍ୟ କରୁ ନାହାଁନ୍ତି ତେବେ ମିଡିଆ ଆଗରେ ପାଣ୍ଡିଆନ ପ୍ରକାଶ କରନ୍ତୁ ବୋଲି ପ୍ରଫୁଲ କହିଛନ୍ତି। ସେ ୱାକଫ ବିଲ୍ କୁ ନେଇ କହିଛନ୍ତି ଦଳ ଯେପରି ନିଷ୍ପତି ନେଲା ତାହା ଏକ ଅନ୍ତଃର୍ଘାତୀ କାମ। ଏପରି କାମକୁ ଲୋକେ କେବେ କ୍ଷମା ଦେବେ ନାହିଁ ବୋଲି ପ୍ରଫୁଲ କହିଛନ୍ତି। ଏପରି ପରିସ୍ଥିତିରେ ବିଜେଡି ଭବିଷ୍ୟତ କଣ ହେବ ତାହାକୁ ନେଇ ସନ୍ଦେହ ସୃଷ୍ଟି ହେଲାଣି।