କେଦାର ମିଶ୍ର
ବୈଜୟନ୍ତ ପଣ୍ଡା କେଉଁ ଦଳକୁ ଯିବେ ତାକୁ ନେଇ ଚର୍ଚ୍ଚା କରିବାକୁ ଏବେ ଆଉ ଗଣମାଧ୍ୟମର ଆଗ୍ରହ ନାହିଁ। ବୈଚାରିକ ଦୃଷ୍ଟିରୁ ବିଜେପି ତାଙ୍କ ଲାଗି ହୁଏତ ସ୍ଵାଭାବିକ ପସନ୍ଦ ହୋଇଥାନ୍ତା, ହେଲେ ବିଜେପି ନେତୃତ୍ୱ ତାଙ୍କୁ ଡାକିବାକୁ କୁନ୍ଥ କୁନ୍ଥ ହେଉଛନ୍ତି। ଡିସେମ୍ବର ୨୪ ରେ ବୈଜୟନ୍ତ ଖୁର୍ଦ୍ଧା ଠାରେ ପ୍ରଧାନମନ୍ତ୍ରୀଙ୍କ ଉପସ୍ଥିତିରେ ବିଜେପିରେ ଯୋଗଦେବେ ବୋଲି ଏକ ଖବର ଶୁଣିବାକୁ ମିଳୁଥିଲା, ଯାହାକୁ ରାଜ୍ୟ ବିଜେପି ସଭାପତି ଖଣ୍ଡନ କରିଥିଲେ। ପ୍ରଧାନମନ୍ତ୍ରୀ ଆସିଲେ ଓ ଗଲେ, କିନ୍ତୁ ବୈଜୟନ୍ତଙ୍କ ଲାଗି ବିଜେପିର କବାଟ ସେମିତି ପୂର୍ବ ପରି ବନ୍ଦ ରହିଲା। ଇତି ମଧ୍ୟରେ ବୈଜୟନ୍ତ ନିଜର ଲେଖା ମାଧ୍ୟମରେ ଓ ସୋସିଆଲ ମିଡିଆ ଜରିଆରେ ବିଜେପିର ସବୁ ନୀତିକୁ ସମର୍ଥନ କରି ଚାଲିଛନ୍ତି। ଏପରିକି ରିଜର୍ଭ ବ୍ୟାଙ୍କର ସ୍ଵାଧୀନତା ସଙ୍କୁଚିତ କରିବାରେ ସରକାରୀ ପକ୍ଷକୁ ବୈଜୟନ୍ତ ସମର୍ଥନ କରି ଏକ ସ୍ତମ୍ଭ ରଚନା କରିଛନ୍ତି। ତଥାପି କେଉଁ ଅଜ୍ଞାତ କାରଣରୁ କେଜାଣି ବୈଜୟନ୍ତଙ୍କଠାରୁ ବିଜେପି ସତର୍କ ଦୂରତା ଅବଲମ୍ବନ କରୁଛି।
ତେବେ ୨୪ ତାରିଖ ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଖୁର୍ଦ୍ଧା ଭାଷଣରେ ନବୀନ ଓ ବିଜେଡି ସରକାର ପ୍ରତି ନରମ ଆଭିମୁଖ୍ୟ ପ୍ରଦର୍ଶନ କରିବା ପରେ ବୈଜୟନ୍ତଙ୍କର ବୋଧେ ବିଜେପି ପ୍ରତି ମୋହଭଙ୍ଗ ଘଟିଛି। ୨୪ ତାରିଖ ସନ୍ଧ୍ୟାରେ ସି-ଭୋଟର ସଂସ୍ଥା ତରଫରୁ କରାଯାଇଥିବା ଜନମତ ସର୍ବେକ୍ଷଣରେ ଲୋକସଭା ନିର୍ବାଚନରେ ଓଡିଶାରୁ ବିଜେପି ୧୫ ଟି ଆସନ ପାଇବା ବୋଲି କୁହାଯାଇଥିଲା। ସ୍ଵାଭାବିକ ଭାବରେ ଏହି ଖବର କୁ କେହି ବିଶ୍ବାସକୁ ନେଇନଥିଲେ। ଛୋଟ ଛୋଟ ନବୀନ ବିରୋଧୀ ଖବର କୁ ବଡ କରି ଦେଖାଉଥିବା ବୈଜୟନ୍ତଙ୍କ ଓଟିଭି, ଏହି ସର୍ବେକ୍ଷଣକୁ ଏକପ୍ରକାର ଆଡେଇ ଯାଇଥିଲା। ତେବେ ଏହି ଖବରର ପ୍ରତିକ୍ରିୟାରେ ବୈଜୟନ୍ତ ଏକ ପିନଡ ଟୁଇଟ କରିଥିଲେ, ଯାହାକି ଏବେ ସବୁଠୁ ଚର୍ଚ୍ଚାର ବିଷୟ ହୋଇଛି।
ଏବିପି ନ୍ୟୁଜର ଟୁଇଟ ଥିଲା, “ମୋଦୀ କୁହୁକକୁ ଆଶ୍ରା କରି ୨୦୧୯ ଲୋକସଭା ନିର୍ବାଚନରେ ଓଡିଶାରେ ବିଜେପି ବେଶ ଲାଭ ପାଇବାକୁ ଯାଉଛି- ଏବିପି ସର୍ବେକ୍ଷଣ”। ଏହାର ଉତ୍ତରରେ ବୈଜୟନ୍ତ ଲେଖିଥିଲେ- “ଏହା ଏକ ଅହଙ୍କାରୀ କଳନା, ସତରେ ଏମିତି ହେବ କି? ଯଦି ବା ସେମିତି କିଛି ସମ୍ଭାବନା ଅଛି ତାହା ଅଟୋ ପାଇଲଟ ମୋଡରେ ସମ୍ଭବ ହେବନାହିଁ। ସରକାର ବିରୋଧରେ ଲଢିବାକୁ ବିରୋଧିର ଶକ୍ତ କଲିଜା ଥିବା ଜରୁରୀ। ଓଡିଶାରେ ଖାଲି ଦୁର୍ନୀତି ହେଉଛି ଓ ଅପରାଧ ବଢିଛି ବୋଲି କହିଲେ ହେବନାହିଁ, ସେଥିଲାଗି କାମ କରିବାକୁ ପଡିବ। “
ଏହି ଟୁଇଟକୁ ସ୍ଵତନ୍ତ୍ର ଭାବରେ ପିନ କରି ରଖିବା ପଛରେ ବୈଜୟନ୍ତଙ୍କ ରାଜନୈତିକ ଉଦ୍ଦେଶ୍ୟ ଅତ୍ୟନ୍ତ ସ୍ପଷ୍ଟ। ସେ ସିଧା ସିଧା ଓଡିଶାରେ ବିଜେପିର ବିଜୟ ସମ୍ଭାବନାକୁ ଅମୂଳକ ବୋଲି କହୁଛନ୍ତି। ତା ସହିତ ନବୀନଙ୍କ ବିରୋଧରେ ଲଢିବାକୁ ବିଜେପିର କଲିଜା ନାହିଁ ବୋଲି ମଧ୍ୟ ସେ ସୂଚନା ଦେଇଛନ୍ତି। ନବୀନଙ୍କ ଲୋକପ୍ରିୟତା ବିଷୟରେ ବୈଜୟନ୍ତଙ୍କ ଆକଳନ ବାସ୍ତବ ତଥ୍ୟ ଉପରେ ହିଁ ପର୍ଯବସିତ। ତେବେ ହଠାତ ବୈଜୟନ୍ତଙ୍କ ଏ ପ୍ରକାର ପଟ୍ଟ ପରିବର୍ତ୍ତନର କାରଣ କଣ? ବିଜେପି ଓ କଂଗ୍ରେସର ନବୀନ ବିରୋଧୀ ଆଭିମୁଖ୍ୟରେ ଶିଥିଳତା ତାଙ୍କୁ ବ୍ୟଥିତ କରିଛି କି? ବିଭିନ୍ନ ବାଟ ଦେଇ ବିଜେପିରେ ପ୍ରବେଶ କରିବାକୁ ଚେଷ୍ଟା କରି ବିଫଳ ହେବାପରେ ବୈଜୟନ୍ତ ଏବେ ବିଜେପି ଉପରେ ଅଲଗା ପ୍ରକାର ଚାପ ପ୍ରୟୋଗ କରିବାର ଚେଷ୍ଟା କରୁଛନ୍ତି କି?
ପ୍ରଶ୍ନ ଅନେକ, ଏହାର ଉତ୍ତର ମଧ୍ୟ ବହୁମୂଖୀ। ତେବେ ସବୁ ପ୍ରକାର ପରୀକ୍ଷା ନିରୀକ୍ଷା ପରେ ବୈଜୟନ୍ତ ପୁଣି ଥରେ ବିଜେଡି କୁ ଫେରି ଆସିବାକୁ ବ୍ୟାକୁଳ ବୋଲି ତାଙ୍କର ଜଣେ ପୁରୁଣା ସହଯୋଗୀ କହିଛନ୍ତି। ହେଲେ ତାଙ୍କୁ ବିଜେଡି ନେତୃତ୍ୱ ପୁଣିଥରେ ଗ୍ରହଣ କରିବ ତ? ୟା ପୂର୍ବରୁ ଲୋକସଭା ନିର୍ବାଚନ ଲଢିବାର ସମ୍ଭାବନା ବିଷୟରେ ମଧ୍ୟ ବୈଜୟନ୍ତ ଗୋଲ ମୋଲ ଉତ୍ତର ରଖିଥିଲେ। ସେ ହୁଏତ ପରିବର୍ତ୍ତିତ ପରିସ୍ଥିତିରେ କିଛି ସମୟ ଚୁପ ରହି ୨୦୧୯ ନିର୍ବାଚନ ପରେ ନିଜର ଗତିପଥ ବଦଳାଇ ପାରନ୍ତି।
ତେବେ ବାକି ଯାହା ହେଉନା କାହିଁକି, ବୈଜୟନ୍ତ ପରିଶେଷରେ ନବୀନକୁ ଅଜେୟ ନେତା ବୋଲି ମାନିବା, ଏବେ ବିଜେଡି କୁ ଆଶ୍ଚର୍ୟ କରିଛି।