ଇସଲାମାବାଦ୍/ଜେନିଭା: ଦୀର୍ଘ ୭୦ ବର୍ଷର ବ୍ୟବଧାନ ପରେ ପାକିସ୍ତାନକୁ ମିଳିବାକୁ ଯାଉଛି ଏକ ବଡ଼ ଗ୍ଲୋବାଲ୍ ଦାୟିତ୍ୱ। ୨୦୨୭ ମସିହାରେ ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) ଏବଂ ବିଶ୍ୱ ବ୍ୟାଙ୍କ ଗ୍ରୁପ୍ର ‘ବୋର୍ଡ ଅଫ୍ ଗଭର୍ଣ୍ଣର୍ସ’ର ଅଧ୍ୟକ୍ଷତା କରିବ ପାକିସ୍ତାନ। ୧୯୫୩ ମସିହା ପରେ ପ୍ରଥମ ଥର ପାଇଁ ପାକିସ୍ତାନ ଏହି ଗୁରୁତ୍ୱପୂର୍ଣ୍ଣ ପଦବୀ ଗ୍ରହଣ କରିବାକୁ ଯାଉଥିବା ନେଇ ପାକିସ୍ତାନ ଅର୍ଥନୈତିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ବ୍ୟାଙ୍କକ୍ଠାରେ ଅନୁଷ୍ଠିତ ୨୦୨୬ ଡବ୍ଲ୍ୟୁବିଜି-ଆଇଏମ୍ଏଫ୍ର ବାର୍ଷିକ ବୈଠକର ପୂର୍ଣ୍ଣାଙ୍ଗ ଅଧିବେଶନରେ ଏହି ଆନୁଷ୍ଠାନିକ ଘୋଷଣା କରାଯାଇଛି। ଏଥିରେ ବିଶ୍ୱ ବ୍ୟାଙ୍କରେ ପାକିସ୍ତାନର ଗଭର୍ଣ୍ଣର ଥିବା ଅର୍ଥନୈତିକ ବ୍ୟାପାର ମନ୍ତ୍ରୀ ଆହାଦ୍ ଖାନ୍ ଚୀମାଙ୍କୁ ଆଗାମୀ ଅଧ୍ୟକ୍ଷ ଭାବେ ମନୋନୀତ କରାଯାଇଛି। ଅକ୍ଟୋବର ୧୨ ରୁ ୧୮ ପର୍ଯ୍ୟନ୍ତ ଚାଲିଥିବା ଏହି ବାର୍ଷିକ ବୈଠକରେ ୧୯୧ଟି ଦେଶର ୧୫,୦୦୦ରୁ ଅଧିକ ପ୍ରତିନିଧି ଅଂଶଗ୍ରହଣ କରିଛନ୍ତି।
ଏହି ନିଯୁକ୍ତିକୁ ଏକ “ଐତିହାସିକ ମାଇଲଖୁଣ୍ଟ” ଭାବେ ବର୍ଣ୍ଣନା କରି ପାକିସ୍ତାନ ସରକାର କହିଛନ୍ତି ଯେ, ଏହା ଦ୍ୱାରା ପାକିସ୍ତାନ ବିଶ୍ୱ ଅର୍ଥନୈତିକ ଏବଂ ବିକାଶମୂଳକ ଆଲୋଚନାରେ ଆଗଧାଡ଼ିର ଭୂମିକା ଗ୍ରହଣ କରିପାରିବ। ତେବେ ଅନ୍ୟପଟେ, ପାକିସ୍ତାନ ନିଜର ଆର୍ଥିକ ସଂକଟରୁ ବର୍ତ୍ତିବା ପାଇଁ ଆଇଏମ୍ଏଫ୍ର ୭ ବିଲିୟନ୍ ଡଲାରର ‘ଏକ୍ସଟେଣ୍ଡେଡ୍ ଫଣ୍ଡ ଫାସିଲିଟି’ ଏବଂ ୧.୪ ବିଲିୟନ୍ ଡଲାରର ‘ରେଜିଲିଏନ୍ସ ଆଣ୍ଡ ସଷ୍ଟେନାବିଲିଟି ଫାସିଲିଟି’ ସହାୟତା ଉପରେ ସମ୍ପୂର୍ଣ୍ଣ ନିର୍ଭରଶୀଳ ଥିବା ସମୟରେ ଏହି ଦାୟିତ୍ୱ ମିଳିବା ଚର୍ଚ୍ଚାର ବିଷୟ ପାଲଟିଛି।