ନୂଆଦିଲ୍ଲୀ : ଆମେରିକାର ମଧ୍ୟବର୍ତ୍ତୀକାଳୀନ ନିର୍ବାଚନ ଫଳାଫଳ ଆସିବା ସହ ରାଜନୈତିକ ଚିତ୍ର ସ୍ପଷ୍ଟ ହେବାରେ ଲାଗିଛି। ଏହାରି ମଧ୍ୟରେ ଫ୍ଲୋରିଡାରୁ ଆସିଛି ଏକ ବଡ଼ ଖବର। ଫଳାଫଳର ପ୍ରାଥମିକ ଟ୍ରେଣ୍ଡ ଅନୁସାରେ
ଭାରତୀୟ ବଂଶୋଦ୍ଭବ ପିଆ ଡାଣ୍ଡିଆ ବିଜୟୀ ହୋଇ ଆମେରିକାର ରାଜନୈତିକ ମଞ୍ଚରେ ନିଜ ଉପସ୍ଥିତି ଜାହିର କରିଛନ୍ତି। ସେ ଡେମୋକ୍ରାଟିକ୍ ପାର୍ଟି ପକ୍ଷରୁ ନିର୍ବାଚନ ଲଢ଼ିଥିଲେ। ତାଙ୍କର ଏହି ବିଜୟକୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ରିପବ୍ଲିକାନ୍ ପାର୍ଟି ପାଇଁ ଏକ ବଡ଼ ଝଟ୍କା ଭାବେ ଦେଖାଯାଉଛି।
ଏହି ନିର୍ବାଚନରେ ପିଆ ଡାଣ୍ଡିଆ ରିପବ୍ଲିକାନ୍ ପାର୍ଟିର ପ୍ରାର୍ଥୀ କାସି ଆସ୍କରଙ୍କୁ ପରାସ୍ତ କରିଛନ୍ତି। ଫ୍ଲୋରିଡା ଭଳି ରାଜନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ରାଜ୍ୟରେ ଡେମୋକ୍ରାଟିକ୍ ପ୍ରାର୍ଥୀଙ୍କ ଏହି ସଫଳତା ଦଳୀୟ ଶିବିରରେ ଉତ୍ସାହ ଭରିଛି। ଅନ୍ୟପକ୍ଷରେ ରିପବ୍ଲିକାନ୍ ଶିବିର ପାଇଁ ଏହା ଏକ ନିରାଶାଜନକ ଫଳାଫଳ। ପିଆଙ୍କ ବିଜୟ କେବଳ ଏକ ନିର୍ବାଚନୀ ସଫଳତା ନୁହେଁ, ବରଂ ଆମେରିକାର ରାଜନୀତିରେ ଭାରତୀୟ ବଂଶୋଦ୍ଭବଙ୍କ ବଢ଼ୁଥିବା ପ୍ରଭାବର ଆଉ ଏକ ଉଦାହରଣ ବୋଲି ଆଲୋଚନା ହେଉଛି। ତେବେ ଏହି ଫଳାଫଳ ଟ୍ରମ୍ପଙ୍କ ରାଜନୈତିକ ରଣନୀତି ଓ ରିପବ୍ଲିକାନ୍ ପାର୍ଟିର ଆଗାମୀ ପଦକ୍ଷେପ ଉପରେ କି ପ୍ରଭାବ ପକାଇବ, ତାହା ଏବେ ଚର୍ଚ୍ଚାର ବିଷୟ। ଆମେରିକାର ମଧ୍ୟବର୍ତ୍ତୀକାଳୀନ ନିର୍ବାଚନର ଅନ୍ୟ ଫଳାଫଳ ସାମ୍ନାକୁ ଆସିବା ସହ ଟ୍ରମ୍ପଙ୍କ ଦଳର ସ୍ଥିତି ନେଇ ଅଧିକ ସ୍ପଷ୍ଟତା ମିଳିବ। ଫ୍ଲୋରିଡାରେ ପିଆ ଡାଣ୍ଡିଆଙ୍କ ବିଜୟ ଏହି ନିର୍ବାଚନର ଏକ ଚର୍ଚ୍ଚିତ ଘଟଣା ହୋଇ ରହିବ।