ଲୋକାର୍ପିତ ହେଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ, ଜାଣନ୍ତୁ ଏହା ପଛରେ ଥିବା ତିନି ମୁଖ୍ୟ ବିନ୍ଧାଣୀଙ୍କ କଥା

ଭୁବନେଶ୍ବର: ଲୋକାର୍ପିତ ହେଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ। ଦୀର୍ଘ ୪ ବର୍ଷର ପରିଶ୍ରମ ପରେ ଶେଷରେ ପୂର୍ଣ୍ଣ ରୂପରେଖ ନେଲା ଏହି ପ୍ରକଳ୍ପ। ଯେଉଁଥିରେ ପ୍ରାୟ ଆଠଶହ କୋଟି ଟଙ୍କା ଖର୍ଚ୍ଚ କରାଯାଇଛି। ପୂର୍ବରୁ ଯେଉଁମାନେ ପୁରୀ ଯାଇଥିବେ ଏବଂ ଯଦି ବର୍ତ୍ତମାନ ଯିବେ, ତେବେ ଦେଖିବେ କଣ ରହିଛି ପାର୍ଥକ୍ୟ। କଣ ମିଳୁଛି ଅନୁଭବ।

ତେବେ ଏହା ପଛରେ ବା ଏହାର ପରିକଳ୍ପନା କରିବାରେ ମୁଖ୍ୟତଃ ତିନି ଜଣଙ୍କର ପ୍ରମୁଖ ଭୂମିକା ରହିଛି। କାରଣ ସେମାନଙ୍କର ସହଯୋଗ ବା ମନବୋଳ ନ ଥିଲେ ଏତେ ବଡ ପ୍ରକଳ୍ପ ପରିକଳ୍ପନା କରିବା ବା ସମ୍ଭବ କରାଇବା ସହଜ ହୋଇ ନ ଥାଆନ୍ତା। ସେହି ତିନିଜଣ ହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଗଜପତି ଦିବ୍ୟସିଂହ ଦେବ ଏବଂ ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ।

ପରିକ୍ରମା ପ୍ରକଳ୍ପର ମୁଖ୍ୟ ବିନ୍ଧାଣୀ ନବୀନ ପଟ୍ଟନାୟକ

ଏହି ବୃହତ ପରିକ୍ରମା ପ୍ରକଳ୍ପର ମୁଖ୍ୟ ବିନ୍ଧାଣୀ ହେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। କାରଣ ସେ ହିଁ ଏହି ପ୍ରକଳ୍ପର ପରିକଳ୍ପନା କରିଥିଲେ। ଏହି ଶ୍ରୀମନ୍ଦିର କିପରି ଭକ୍ତଙ୍କୁ ବହୁତ ସୁବିଧା ପ୍ରଦାନ କରିବ ସେ ନେଇ ସେ ଚିନ୍ତିତ ଥିଲେ। ଆଉ ତାହାରି ରୂପରେଖ ହେଉଛି ଏହି ଶ୍ରୀମନ୍ଦିର ପରିକ୍ରମା ପ୍ରକଳ୍ପ।

୨୦୨୦ ମସିହା ଜାନୁୟାରୀ ୧୬ ତାରିଖରେ ମୁଖ୍ୟମନ୍ତ୍ରୀ ପୁରୀ ଗସ୍ତ କରି ଏହି ପରିକ୍ରମା ପ୍ରକଳ୍ପର ପୁରୀ ନକ୍ସାକୁ ଅନୁଧ୍ୟାନ କରି ଅନୁମୋଦନ ପ୍ରଦାନ କରିଥିଲେ। ସେହି ଅନୁସାରେ ପ୍ରକଳ୍ପର ଶୁଭାରମ୍ଭ କରିବା ପାଇଁ ଆରମ୍ଭ ହେଲା ଯୋଜନା। ୨୦୨୧ ମସିହା ନଭେମ୍ବର ୨୪ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପ୍ରକଳ୍ପର ଭୂମିପୂଜନ କରିଥିଲେ।

ପରିକ୍ରମା ପ୍ରକଳ୍ପର ପ୍ରମୁଖ ବିନ୍ଧାଣୀ ଗଜପତି ଦିବ୍ୟସିଂହ ଦେବ

ଏହି ପ୍ରକଳ୍ପର ଅନ୍ୟତମ ପ୍ରମୁଖ ବିନ୍ଧାଣୀ ହେଉଛନ୍ତି ଗଜପତି ଦିବ୍ୟସିଂହ ଦେବ। ଯାହାଙ୍କର ବିନା ସହଯୋଗରେ ଏତେବଡ ପ୍ରକଳ୍ପ ହେବା ସମ୍ଭବ ହୋଇ ନ ଥାଆନ୍ତି। ଜଗନ୍ନାଥଙ୍କର ଆଦ୍ୟ ସେବକ ହେଉଛନ୍ତି ଗଜପତି ମହାରାଜା। ତାଙ୍କର ଅନୁମୋଦନ ଏବଂ ପରାମର୍ଶ କ୍ରମେ ନିର୍ମାଣ ହୋଇପାରିଛି ଏହି ପରିକ୍ରମା ପ୍ରକଳ୍ପ।

ଗଜପତି ମହାରାଜା ହେଉଛନ୍ତି ଶ୍ରୀମନ୍ଦିର ପରିଚାଳନା କମିଟର ମୁଖ୍ୟ। ଏହି କାର୍ଯ୍ୟଟି ସଂପୂର୍ଣ୍ଣ ଶ୍ରୀମନ୍ଦିର ପରିଚାଳନା କମିଟର ପ୍ରତ୍ୟେକ୍ଷ ତତ୍ବାବଧାନରେ ନିର୍ମାଣ ଚାଲିଥିଲା। ସେଥିପାଇଁ ଗଜପତି ମହାରାଜା କମିଟର ମୁଖ୍ୟ ଭାବେ ଏହି ପ୍ରକଳ୍ପର ମୁଖ୍ୟ ପୁରୋଧା ମଧ୍ୟ ଥିଲେ। ସେହିପରି ଗଜପତି ମହାରାଜା କର୍ତ୍ତା ସାଜି ପ୍ରକଳ୍ପର ସମସ୍ତ ପୂଜାବିଧି କାର୍ଯ୍ୟ ସଂପର୍ଣ୍ଣ କରିଥିଲେ।

ପରିକ୍ରମା ପ୍ରକଳ୍ପର ପ୍ରଧାନ ବିନ୍ଧାଣୀ କାର୍ତ୍ତିକ ପାଣ୍ଡିଆନ

ଏହି ପ୍ରକଳ୍ପର ପ୍ରକୃତ ତଥା ପ୍ରଧାନ ବିନ୍ଧାଣୀ ଥିଲେ 5ଟି ତଥା ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ। ପ୍ରକଳ୍ପର ରୂପରେଖ ପ୍ରସ୍ତୁତଠାରୁ ଆରମ୍ଭ କରି ଡିଜାଇନିଂ ଏବଂ ନିର୍ମାଣ କାର୍ଯ୍ୟ ପାଣ୍ଡିଆନଙ୍କ ଦ୍ବାରା ତଦାରଖ କରାଯାଇଥିଲା। କାରଣ ତାଙ୍କର ତୀକ୍ଷ୍ମ ବୁଦ୍ଧି ଯୋଗୁଁ ଆଜି ଏହି ପ୍ରକଳ୍ପ ବିଶ୍ବ ଦରବାରରେ ସୁପ୍ରତିଷ୍ଠିତ ହୋଇପାରିଛି।

ଦୀର୍ଘ ୪ ବର୍ଷ ଧରି ଚାଲିଥିବା ଏହି ପ୍ରକଳ୍ପକୁ ତଦାରଖ କରିବା ପାଇଁ ପାଣ୍ଡିଆନ ପ୍ରତି ଶନିବାର ଦିନ ପୁରୀ ଗସ୍ତ କରୁଥିଲେ। ସେ ପ୍ରଥମେ ଶ୍ରୀଜୀୟୁଙ୍କୁ ଦର୍ଶନ କରିବା ସହିତ ମନ୍ଦିର ଚାରିପଡେ ବୁଲି ଏହି କାର୍ଯ୍ୟର ସମୀକ୍ଷା କରୁଥିଲେ।

ତେବେ ପାଣ୍ଡିଆନଙ୍କ ବଡ ପଦକ୍ଷେପ ହେଉଛି ଶ୍ରୀମନ୍ଦିର ଚାରିପଟୁ ବିଭିନ୍ନ ନିର୍ମାଣକୁ ହଟାଇବା। ପ୍ରାଚୀନ ଯୁଗରୁ ରହିଥିବା ଏହି ମଠ ଏବଂ ଘରକୁ ବିନା କୌଣସି ବାଧାବିଘ୍ନରେ ତାହାକୁ ଭାଙ୍ଗିବାରେ ସକ୍ଷମ ହୋଇଥିଲେ ପାଣ୍ଡିଆନ।