ବାଣପୁର( ସୀତାରାମ ଅଗ୍ରୱାଲ): ଚିଲିକା ନିର୍ବାଚନମଣ୍ଡଳିରେ ଦୀର୍ଘ ଦିନର ବିରତି ପରେ ପୁଣି ସଂଗଠନ ଆରମ୍ଭ କଲେ ବାହୁବଳୀ ବିଧାୟକ ପ୍ରଶାନ୍ତ ଜଗଦେବ। ବିଜେଡିରୁ ନିଲମ୍ବିତ ହୋଇଥିବା ବିଧାୟକ ଜଗଦେବଙ୍କ ଗତବର୍ଷ ଜୁଲାଇରେ ସୁପ୍ରିମକୋର୍ଟ କଟକଣା ସରିବା ସତ୍ବେ ସେ ଚିଲିକା ନିର୍ବାଚନମଣ୍ଡଳି ମାଟି ମାଡୁ ନ ଥିଲେ।
ଦଳୀୟ ତାଗିଦ ଲାଗି ନିଜ ନିର୍ବାଚନମଣ୍ଡଳିର ବିଜେଡି ନେତାମାନେ ଜଗଦେବଙ୍କ ଠାରୁ ଦୁରେଇଯାଇଥିଲେ। ତେବେ ଆଜି ହଠାତ ବିଧାୟକ ଜଗଦେବ ବାଲୁଗାଁ ଓ ବାଣପୁର ଅଞ୍ଚଳରେ ଡେରା ପକାଇଥିବା ଦେଖିବାକୁ ମିଳିଛି। ଉଭୟ ଅଞ୍ଚଳର ଏକାଧିକ ଅନୁଗାମୀଙ୍କ ଘରକୁ ଯାଇ ସେମାନଙ୍କ ସହିତ ମିଶି ଦୁଃଖସୁଖ ହୋଇଥିଲେ।
ତତସହିତ ସେ ଚା ଖଟିରେ ମଧ୍ୟ ଯୋଗ ଦେଇ ଲୋକଙ୍କ ସହିତ ପୁନଃସଂପର୍କ ସ୍ଥାପନ କରିଥିଲେ। ବାଲୁଗାଁର ଜଣେ ବିଜେଡି ନେତାଙ୍କ ମୃତ୍ୟୁ ପରେ ତାଙ୍କ ଘରକୁ ଏବଂ ବାଣପୁର ଅଲାଈଡିହ ଗ୍ରାମର ଜଣେ ବିଜେଡି ନେତାଙ୍କ ପୁତ୍ର ବିୟୋଗରେ ତାଙ୍କ ଘରକୁ ଯାଇ ବିଧାୟକ ଜଗଦେବ ଉଭୟ ପରିବାରକୁ ସାନ୍ତ୍ୱନା ଦେଇଥିଲେ।
ତେବେ ବିଜେଡିରୁ ନିଲମ୍ବିତ ହେବାପରେ ତାଙ୍କଠାରୁ ସ୍ଥାନୀୟ ନେତା ଦୂରେଇ ଯାଇଥିବା ବେଳେ ଆଜି ବିଧାୟକଙ୍କ ଗସ୍ତ ସମୟରେ ଏକାଧିକ ନେତାଙ୍କୁ ଦେଖିବାକୁ ମିଳିଥିଲା। ତେବେ ଯାହା ଅନୁମେୟ ହେଉଛି ବିଧାୟକ ଜଗଦେବ ପୁଣି ଥରେ ଚିଲିକାରୁ ଲଢ଼ିବା ପାଇଁ ଇଛା ପ୍ରକାଶ କରିଛନ୍ତି। ସେ ଜିଲ୍ଲାର ବିଭିନ୍ନ ନିର୍ବାଚନମଣ୍ଡଳିରେ ପୁନଶ୍ଚ ସଂଗଠନ ସଜାଡ଼ିବା ଆରମ୍ଭ କରିଦେଲେଣି।
ତେବେ ବିଧାୟକ ଜଗଦେବଙ୍କୁ ବିଜେଡି ପୁନଶ୍ଚ ଟିକେଟ ଦେବା ଆଶା କ୍ଷୀଣ ଥିବା ବେଳେ ସେ ପୁଣି ଚିଲିକାରେ ସଂଗଠନ ଆରମ୍ଭ କରିବା ନେଇ ବିଭିନ୍ନ ମହଲରେ ଆଶ୍ଚର୍ଯ୍ୟ ପ୍ରକଟ କରାଯାଇଛି। ତେବେ ଏ ନେଇ ବିଧାୟକ ଜଗଦେବଙ୍କୁ ଯୋଗାଯୋଗ କରିବାରୁ ତାଙ୍କ ଶରୀର ଅସୁସ୍ଥ ଥିବାରୁ ସେ ନିର୍ବାଚନ ମଣ୍ଡଳି ଆସିପାରୁ ନ ଥିଲେ। ତେବେ ବର୍ତ୍ତମାନ ସେ ପୁଣି ଚିଲିକାରେ ସଂଗଠନ ଆରମ୍ଭ କରିବେ ବୋଲି ଦୃଢତାର ସହ କହିଛନ୍ତି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଦର୍ଶରେ ସେ ସଦାବେଳେ ଅନୁପ୍ରାଣିତ ଏବଂ ସଂଗଠନ ତାଙ୍କରି ଆଶୀର୍ବାଦରୁ ଜାରି ରଖିବେ ବୋଲି ଜଗଦ୍ଦେବ କହିଛନ୍ତି। ତେବେ ଟିକେଟ ପୁଣି ବିଜେଡିରୁ ସେ ପାଇବେକି ନାହିଁ ପଚାରିବାରୁ କିଛି କହିନଥିଲେ। ତେବେ ଚିଲିକା ନିର୍ବାଚନ ମଣ୍ଡଳୀରେ ସଂଗଠନ ଜାରି ରହିବ ବୋଲି କହିଛନ୍ତି।
ଦୀର୍ଘଦିନର ନିରବତା ପରେ ସେ ହଠାତ ଚିଲିକାରେ ବୁଲିବା ନେଇ ରାଜନୀତି ସରଗରମ ହୋଇପଡିଛି। ବିଜେଡିର ନିର୍ବାଚିତ ପ୍ରତିନିଧିମାନଙ୍କୁ ତାଙ୍କଠାରୁ ଦୂରେଇ ରହିବା ପାଇଁ ନିର୍ଦ୍ଦେଶ ସତ୍ବେ ବହୁ ଟାଣୁଆ କର୍ମି ଆଜି ତାଙ୍କ ସହିତ ସାମିଲ ହେବାକୁ ନେଇ ବିଭିନ୍ନ ମହଲରେ ଚର୍ଚ୍ଚା ଆରମ୍ଭ ହୋଇଯାଇଛି।
