ନୂଆଦିଲ୍ଲୀ: ଓଡ଼ିଶା ଛାତ୍ର ସଂସଦ ନିର୍ବାଚନରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP) ର ପ୍ରଚଣ୍ଡ ବିଜୟକୁ ନେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଖୁସି ପ୍ରକାଶ କରିଛନ୍ତି। ସେ ଆଜି ଏକ୍ସରେ ପୋଷ୍ଟ କରି ABVP କାର୍ଯ୍ୟକର୍ତ୍ତାଙ୍କୁ କୃତଜ୍ଞତା ଜଣାଇଛନ୍ତି।
ଅମିତ ଶାହ ଲେଖିଛନ୍ତି ଯେ, “ପ୍ରଥମେ ପଞ୍ଜାବ ବିଶ୍ୱବିଦ୍ୟାଳୟ, ତା’ପରେ ଦିଲ୍ଲୀ ବିଶ୍ୱବିଦ୍ୟାଳୟ ଏବଂ ଏବେ ଓଡ଼ିଶାର ୧୩ ବିଶ୍ୱବିଦ୍ୟାଳୟରେ ABVP କୁ ମିଳିଥିବା ଏହି ଚମତ୍କାର ବିଜୟ ସ୍ପଷ୍ଟ ସନ୍ଦେଶ ଦେଉଛି ଯେ, ଦେଶର ଯୁବ ଶକ୍ତି ମିଥ୍ୟା, ଭ୍ରମ ଓ ଅରାଜକତା ସୃଷ୍ଟି କରୁଥିବା ଶକ୍ତି ସହ ନୁହେଁ, ବରଂ ‘ରାଷ୍ଟ୍ର ପ୍ରଥମ’ ବିଚାରଧାରା ସହ ମଜବୁତ ଭାବେ ଠିଆ ହୋଇଛି।”
ସେ ଏହି ବିଜୟକୁ ଦେଶବିରୋଧୀ ଶକ୍ତି ବିରୋଧରେ ଯୁବକମାନଙ୍କ କଡ଼ା ଜବାବ ବୋଲି କହିଛନ୍ତି।
ଫଳାଫଳ ବିବରଣୀ:
– ଓଡ଼ିଶା ଛାତ୍ର ସଂସଦ ନିର୍ବାଚନରେ ABVP ର ପ୍ରଦର୍ଶନ ବେଶ୍ ଦମଦାର ରହିଛି।
– ୧୧ ଟିରେ ସାଧାରଣ ସମ୍ପାଦକ ପଦରେ ବିଜୟ
– ୬ ଟି ବିଶ୍ୱବିଦ୍ୟାଳୟରେ କ୍ଲିନ୍ ସୁଇପ୍।
ଜିତିବା ପରେ ABVP ପକ୍ଷରୁ କୁହାଯାଇଛି ଯେ, ଓଡ଼ିଶାର ଛାତ୍ରଙ୍କ ଜନାଦେଶ ସ୍ପଷ୍ଟ – ସେମାନେ ABVP ସହ ଅଛନ୍ତି। ଛାତ୍ରଛାତ୍ରୀମାନେ ଛାତ୍ର ନେତୃତ୍ୱ ଓ ସେବା ପ୍ରତି ABVP ର ପ୍ରତିବଦ୍ଧତା ଉପରେ ଭରସା ଜଣାଇଛନ୍ତି।
ନିର୍ବାଚନ ପ୍ରକ୍ରିୟା:
ଉଚ୍ଚ ଶିକ୍ଷା ବିଭାଗ ଅନୁସାରେ ଗୁରୁବାର ମୋଟ ୩୩୨ଟି ଉଚ୍ଚ ଶିକ୍ଷାନୁଷ୍ଠାନରେ ଭୋଟ୍ ଗ୍ରହଣ ହୋଇଥିଲା। ଏଥିରେ ପାଖାପାଖି ୩୨୦ଟି କଲେଜ ଓ ୧୩ଟି ବିଶ୍ୱବିଦ୍ୟାଳୟ ସାମିଲ ଥିଲେ।
ମୋଟ ୬,୬୯୬ ଜଣ ପ୍ରାର୍ଥୀ ନିର୍ବାଚନ ଲଢ଼ିଥିଲେ – କଲେଜରୁ ୬,୩୫୮ ଓ ବିଶ୍ୱବିଦ୍ୟାଳୟରୁ ୩୩୮ ଜଣ ପ୍ରତିଦ୍ୱନ୍ଦିତା କରୁଥିଲେ। ସାମାନ୍ୟ ବିଶୃଙ୍ଖଳାକୁ ଛାଡ଼ିଦେଲେ ସାରା ରାଜ୍ୟରେ ଭୋଟ୍ ଗ୍ରହଣ ମୋଟାମୋଟି ଶାନ୍ତିପୂର୍ଣ୍ଣ ଭାବେ ସରିଥିଲା।