ଭୁବନେଶ୍ୱର: ରାଜଧାନୀରେ ପୁଣି ଥରେ ଦ୍ରୁତଗାମୀ ଟ୍ରକ୍ର ଆତଙ୍କ। ରବିବାର ବିଳମ୍ବିତ ରାତିରେ ଲକ୍ଷ୍ମୀସାଗର ଦୁର୍ଗାପୂଜା ମଣ୍ଡପ ନିକଟରେ ଏକ ବେପରୁଆ ଟ୍ରକ୍ ସ୍କୁଟିକୁ ଧକ୍କା ଦେଇ ପ୍ରାୟ ୨୦୦ ମିଟର ପର୍ଯ୍ୟନ୍ତ ଘୋଷାରି ନେଇଥିଲା। ଧକ୍କାରେ ସ୍କୁଟି ଆରୋହୀ ଛିଟ୍କି ପଡ଼ି ଅଳ୍ପକେ ମୃତ୍ୟୁମୁଖରୁ ବର୍ତ୍ତିଯାଇଛନ୍ତି।
ଗୁରୁତର ଆହତ ନୃସିଂହ ସାହୁଙ୍କୁ ପିସିଆର୍ ଭ୍ୟାନ୍ ଉଦ୍ଧାର କରି କ୍ୟାପିଟାଲ୍ ହସ୍ପିଟାଲରେ ଭର୍ତ୍ତି କରିଛି। ଏପଟେ ଦୁର୍ଘଟଣା ଘଟାଇ ଫେରାର ହେବାକୁ ଉଦ୍ୟମ କରୁଥିବା ଟ୍ରକ୍କୁ ସ୍ଥାନୀୟ ଲୋକେ ପିଛା କରି ଅଟକାଇଥିଲେ। ଉତ୍ତ୍ୟକ୍ତ ଲୋକେ ଚାଳକଙ୍କୁ ଧରି ପୁଲିସ ଜିମା ଦେବା ସହ ଟ୍ରକ୍ରେ ଭଙ୍ଗାରୁଜା କରିଥିଲେ।
ପୁଲିସ ଟ୍ରକ୍ ଚାଳକ ସହଦେବ ପଣ୍ଡାଙ୍କୁ ଅଟକ ରଖିବା ସହ ଟ୍ରକ୍କୁ ଜବତ କରିଛି। ଘଟଣା ପରେ ସ୍ଥାନୀୟ ଲୋକେ ପ୍ରାୟ ୧୫ ମିନିଟ୍ ଧରି ରାସ୍ତାରୋକ କରି ବେପରୁଆ ଭାରୀଯାନ ଚଳାଚଳ ବିରୋଧରେ ପ୍ରତିବାଦ କରିଥିଲେ।
ଏବେ ଭୁବନେଶ୍ବରରେ ଚିନ୍ତା ବଢ଼ାଉଛି ‘ହିଟ୍ ଆଣ୍ଡ୍ ରନ୍’ ଘଟଣା। ଗତ ଏକ ମାସ ମଧ୍ୟରେ ରାଜଧାନୀ ଓ ଆଖପାଖ ଅଞ୍ଚଳରେ ୧୦ରୁ ଅଧିକ ହିଟ୍ ଆଣ୍ଡ୍ ରନ୍ ମାମଲା ସାମ୍ନାକୁ ଆସିଥିବାବେଳେ, ବେପରୁଆ ଟ୍ରକ୍ ଚଳାଚଳକୁ ନେଇ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ତୀବ୍ର ହେଉଛି।