ଭୁବନେଶ୍ବର: ବେଦାନ୍ତ ଲାଞ୍ଜିଗଡ କଂପାନୀର ରେଡ ମଡ ପଣ୍ଡ ଭୁଷୁଡି ପଡିବା ବିବାଦ ଧିରଧିରେ ଘନେଇବାରେ ଲାଗିଛି। ବାରମ୍ବାର କାହିଁକି ବେଦାନ୍ତ କଂପାନୀରେ ଏପରି ଘଟୁଛି ତାହାର ଏକ ବିଚାରବିଭାଗୀୟ ତଦନ୍ତ ଦାବି କରିଛନ୍ତି କଂଗ୍ରେସ ବିଧାୟକ ସାଗର ଦାସ। ଏ ନେଇ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ସେ ଏକ ଚିଠି ଲେଖିଛନ୍ତି।
ଏହି ଚିଠିରେ ସେ ଚାରିଟି ଦାବୀ ମୁଖ୍ୟମନ୍ତ୍ରୀଙ୍କ ପାଖରେ କରିଛନ୍ତି। ପ୍ରଥମତଃ ଏହି ଘଟଣାଟି ବିଚାର ବିଭାଗୀୟ ତଦନ୍ତ କରାଯାଉ। କାରଣ ସ୍ଥାନୀୟ ଅଧିବାସୀଙ୍କ ହଇରାଣ କରିବାରେ ଏହା ଏକ ଚକ୍ରାନ୍ତ ହୋଇଥିବାର ସନ୍ଦେହ କରାଯାଉଛି। ସେହିପରି କ୍ଷତିଗସ୍ତ ଲୋକଙ୍କୁ ତୁରନ୍ତ ସର୍ବାଧିକ କ୍ଷତି ପୂରଣ ପ୍ରଦାନ କରାଯାଉ। ଏଥିସହିତ ବର୍ତ୍ତମାନ ନାଲିପାଣି ମାଡି ଯେଉଁ କ୍ଷତି ହୋଇଛି ତାହାର ପୁନଃଉଦ୍ଧାର କରାଯାଉ ବୋଲି ସେ ଉଲ୍ଲେଖ କରିଛନ୍ତି।
ଅନ୍ୟପକ୍ଷରେ ସେ ଲେଖିଛନ୍ତି ଯେ, ବେଦାନ୍ତ କର୍ତ୍ତୁପକ୍ଷଙ୍କ ମନମୁଖୀ ଶାସନ ଯୋଗୁଁ ଏପରି ଘଟଣା ଘଟୁଥିବାର ଅନୁମାନ କରାଯାଉଛି। ତେଣୁ କଣ ପାଇଁ ଏହି ରେଡ ମଡ ପଣ୍ଡ ଭୁଷୁଡିଲା ତାହାର ତଦନ୍ତ କରାଯାଉ ଏବଂ ଏଥିପାଇଁ କେଉଁ ଅଧିକାରୀ ଦାୟୀ ତାହା ପ୍ରକାଶ କରାଯାଉ। ଏଥିସହିତ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସେ ଚିଠିରେ ଉଲ୍ଲେଖ କରିଛନ୍ତି।
