Categories
ଆଞ୍ଚଳିକ

ଆମେରିକାରେ ବୈଜ୍ଞାନିକ ଦିଲ୍ଲୀରେ ବାହାଘର, ଓଡ଼ିଶାରେ ଭୋଜି

କନ୍ଦର୍ପ ବେହେରା
ରେଢ଼ାଖୋଲ: ରେଢ଼ାଖୋଲ ନାକଟିଦେଉଳ ମାଟିର ବୈଜ୍ଞାନିକ ଧିରେନ୍ କୁମାର ପ୍ରଧାନ ବିବାହ ବନ୍ଧନରେ ବାନ୍ଧିହୋଇଛନ୍ତି।

ଯୁବବୈଜ୍ଞାନିକ ଧିରେନ୍ କୁମାର ପ୍ରଧାନ ବିହାରର ଭାଗଲପୁର ବାସିନ୍ଦା ଶାଳିନୀ ସିଂଙ୍କୁ ଦିଲ୍ଲୀର ଏକ ହୋଟେଲରେ ବୈଦିକ ରୀତିନୀତିରେ ବିବାହ ହୋଇଛନ୍ତି। ଉଭୟଙ୍କ ବାହା ଘରରେ ଓଡ଼ିଶା ତଥା ବାହାର ରାଜ୍ୟର ବହୁ ପ୍ରତିଷ୍ଠିତ ବ୍ୟକ୍ତି ବିଶେଷ ଯୋଗ ଦେଇ ଉଭୟଙ୍କୁ ଆର୍ଶିବାଦ ଦେଇଛନ୍ତି।

ଏହି ବିବାହ ଉତ୍ସବରେ ବହୁ ସାମ୍ବାଦିକ, ରାଜନୈତିକ ବ୍ୟକ୍ତି ମଧ୍ୟ ଯୋଗଦେଇଥିଲେ। ଉଭୟ ଆମେରିକାରେ ରହୁଛନ୍ତି। ବୈଜ୍ଞାନିକ ଧିରେନ୍ କୁମାର ପ୍ରଧାନ ଆମେରିକାର “ଓଆକ୍ ରାଇଡ଼୍ ନ୍ୟାଶନାଲ୍ ଲାବରେଟୋରିରେ” ବୈଜ୍ଞାନିକ ଭାବରେ କାର୍ଯ୍ୟକରୁଥିବା ବେଳେ ନବବିବାହିତା ପତ୍ନୀ ଆମେରିକାର “ପେନ୍ସିଲ୍ ଭାନିଆ ଷ୍ଟେଟ୍ ୟୁନିଭର୍ ସିଟିରେ” ବୈଜ୍ଞାନିକ ଭାବରେ କାର୍ଯ୍ୟରତ।

ବୈଜ୍ଞାନିକ ଧିରେନ୍ ପ୍ରଧାନଙ୍କ ଠାରୁ ତାଙ୍କ ପତ୍ନୀ ୧ ହଜାର କିମି ଦୂରରେ କାର୍ଯ୍ୟରତ ଥିବା ପ୍ରକାଶ କରିଛନ୍ତି।

Categories
ଅପରାଧ ଆଜିର ଖବର ରାଜ୍ୟ ଖବର

୨୪୦ ବଣ୍ଡଲ୍ କେନ୍ଦୁପତ୍ର ସହ ମିନିଟ୍ରକ୍ ଜବତ, ୩ ଅଟକ

କନ୍ଦର୍ପ ବେହେରା
ରେଢ଼ାଖୋଲ: ଗତକାଲି ବିଳମ୍ବିତ ରାତିରେ ଚୋରାରେ କେନ୍ଦୁପତ୍ର ଚାଲାଣ ହେଉଥିବା ବେଳେ ନାକଟିଦେଉଳ ବ୍ଲକ୍ ଅଫିସ୍ ପାଖରୁ ଏକ ମିନି ଟ୍ରକ୍ ସହ ୨୪୦ ବଣ୍ଡଲ୍ କେନ୍ଦୁପତ୍ର ବନବିଭାଗ ଜବତ କରିଛି। ଏଥିରେ ସମ୍ପୃକ୍ତ ଥିବା ୩ ଜଣ ଯୁବକଙ୍କୁ ବନବିଭାଗ ଅଟକ ରଖିଛି।

ବନବିଭାଗ ସୂତ୍ରରୁ ପ୍ରକାଶ ଯେ, ଗତକାଲି ରାତିରେ ଡଇଁଚା ପଟୁ ଏକ ମିନି ଟ୍ରକ୍ ରେ କେନ୍ଦୁପତ୍ର ଆସୁଥିବାର ଖବର ମିଳିଥିଲା। ତେଣୁ ବ୍ଲକ୍ ଛକରେ ବନବିଭାଗ ଛକି ରହିଥିଲେ।  ଅଶୋକ ଲେଲ୍ୟାଣ୍ଡ କଂପାନୀର ଏକ ମିନି ଟ୍ରକ୍ କୁ ବନବିଭାଗ ଅଟକାଇଥିଲେ। ଟ୍ରକ୍ ରେ ଚୋରାରେ କେନ୍ଦୁପତ୍ର ଚାଲାଣ ହେଉଥିବା ବନବିଭାଗ ଜାଣିପାରିଥିଲା। ଗାଡ଼ିରୁ ୩ ଜଣଙ୍କୁ ବନବିଭାଗ ଅଟକ ରଖିଥିଲା। ଅଟକ ଯୁବକମାନେ ହେଲେ ନିମେଇଁ ସାହୁ ( ୨୩), ସୁଧୀର କିସାନ୍ (୩୧) ଏବଂ ସୁଶୀଲ ସାହୁ (୨୧)। ସେମାନେ ସମସ୍ତେ ରିଆମାଳ ଥାନା ତେଲିମୁଣ୍ଡା ଗ୍ରାମର ବୋଲି ବନବିଭାଗ କହିଛି।

ରେଢ଼ାଖୋଲ ଡିଏଫ୍ଓ ଙ୍କ ନିର୍ଦ୍ଦେଶ କ୍ରମେ ରେଞ୍ଜ ଅଧିକାରୀ ଅଶ୍ବିନୀ ବେହେରା, ଫରେଷ୍ଟର ଅନୀଲ୍ କିସାନ୍ ,ଫରେଷ୍ଟଗାର୍ଡ ମନିସ୍ ହରୋ ସାମିଲ୍ ହୋଇଥିଲେ। ଆସନ୍ତାକାଲି ଚୋରା ବେପାରୀମାନଙ୍କୁ ଆସନ୍ତାକାଲି କୋର୍ଟ ଚାଲାଣ କରାଯିବ ବୋଲି ବନବିଭାଗ କହିଛି।

Categories
ଆଞ୍ଚଳିକ

ନାକଟିଦେଉଳ ପଂଚାୟତ ସମିତିର ପ୍ରଥମ ବୈଠକ

କନ୍ଦର୍ପ ବେହେରା
ରେଢାଖୋଲ: ଆଜି ନାକଟିଦେଉଳ ପଂଚାୟତ ସମିତିର ପ୍ରଥମ ବୈଠକ ବ୍ଲକ୍ ଅଧ୍ୟକ୍ଷା ସ୍ୱରୂପାରାଣୀ ସାହୁଙ୍କ ସଭାପତିତ୍ୱରେ ବ୍ଲକ୍ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ଏହି ସଭାରେ ନାକଟିଦେଉଳ ବିଡିଓ ନିବେକାନନ୍ଦ ସାହୁ, ଅତିରିକ୍ତ ତହସିଲ୍‌ଦାର୍, ଜିଲ୍ଲା ପରିଷଦ ଜୋନ୍ ୨ ର ପ୍ରିୟମ୍ବଦା ସାହୁ, ସାଂସଦ ପତିନିଧି ପ୍ରମୋଦ ସାହୁ, ବିଧାୟକ ପ୍ରତିନିଧି ନିଳାମ୍ବର ସାହୁ ବ୍ଲକ୍ ଉପାଧ୍ୟକ୍ଷ ଜିତେନ୍ଦ୍ର କୁମାର ପ୍ରଧାନ ତଥା ୧୪ ଟି ପଂଚାୟତର ସମିତି ସଭ୍ୟସଭ୍ୟା ଉପସ୍ଥିତ ଥିବା ବେଳେ ବ୍ଲକ୍ ର ବହୁ ପଦାଧିକାରୀ ଯୋଗ ଦେଇଥିଲେ।

ବିଧାୟକ ପ୍ରତିନିଧି ନିଳାମ୍ବର ସାହୁ ବିନା ପଂଚାୟତ ପ୍ରତିନିଧି ଓ ବିନା ରିଜୋଲସେନ୍ ରେ କୈାଣସି କାମର ଫାଇଲ୍ ନ ଖୋଲିବା ପାଇଁ ସଭାରେ ଦୃଷ୍ଟି ଆକର୍ଷଣ କରିଥିଲେ। ସାଂସଦ ପ୍ରତିନିଧି ପ୍ରମୋଦ ସାହୁ ବ୍ଲକ୍ ସମ୍ମୁଖ ଭାଗରେ ଥିବା ସରକାରୀ ଜାଗାକୁ ଚିହ୍ନଟ କରିବାକୁ ଅତିରିକ୍ତ ତହସିଲ୍‌ଦାରଙ୍କ ଦୃଷ୍ଟି ଆକର୍ଷଣ କରିଥିଲେ।

ବ୍ଲକର ୧୪ ଟି ପଂଚାୟତରେ ପିଇବା ପାଣି ସମସ୍ୟା ଉପରେ ଆଲୋଚନା କରିବା ସହ ନାକଟିଦେଉଳ ଡାକ୍ତରଖାନକୁ ଆସିଥିବା ଘର ତିଆରିପାଇଁ ୪୦ ଡିସିମିଲ୍ ସ୍ଥାନ ଚିହ୍ନଟ କରିବାକୁ ଡାକ୍ତର ଅମୂଲ୍ୟ ରତ୍ନ ମହନ୍ତ ଅଧ୍ୟକ୍ଷାଙ୍କୁ ଦୃଷ୍ଟି ଆକର୍ଷଣ କରିଥିଲେ। ପ୍ରଥମ ବୈଠକରେ ଆର୍ .ଡି, ପିଡବ୍ଲୁଡି, ବନବିଭାଗ, ଇଲେକ୍ଟ୍ରିବିଭାଗର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।

ନବନିର୍ବାଚିତ ପ୍ରତିନିଧିମାନଙ୍କର ଏହା ପ୍ରଥମ ବୈଠକ ହୋଇଥିବାରୁ ମନରେ ଉତ୍ସାହ ମଧ୍ୟ ଭରି ରହିଥିଲା। ସମିତି ସଭ୍ୟ/ସଭ୍ୟା ମାନେ ନିଜ ଅଂଚଳର ସମସ୍ୟା ସଂପର୍କରେ ସଭାରେ ଉପସ୍ଥାପନ କରିଥିଲେ।

Categories
ଅପରାଧ ଆଜିର ଖବର ରାଜ୍ୟ ଖବର

କିସିଣ୍ଡାରେ ଚୋରାରେ ମହୁଲ କାରବାର: ୪୨୫ ବସ୍ତା ମହୁଲ ଫୁଲ ଜବତ, ୨ ଗାଡି ସହ ୭ ଗିରଫ

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ଅଂଚଳରେ ମହୁଲ ଫୁଲ ଚୋରା ବେପାରିମାନଙ୍କର ପ୍ରାଦୁର୍ଭାବ ବଢିବାରେ ଲାଗିଛି। ଏ ପର୍ଯ୍ୟନ୍ତ ଚାଷୀ ମହୁଲ ଫୁଲ ବିକ୍ରି କରିପାରି ନଥିବା ବେଳେ ଦଲାଲିମାନେ କମ୍ ଦରରେ ଚାଷୀମାନଙ୍କଠାରୁ ମହୁଲ ଫୁଲ କିଣି ଚଢା ଦରରେ ବାହାର ରାଜ୍ୟରେ ବିକ୍ରି କରି ଲାଭ ବାନ୍ ହେଉଛନ୍ତି। ହେଲେ ଆଜି ରାତିରେ କିସିଣ୍ଡା ପୋଲିସ୍ କୁ ବଡ ସଫଳତା ମିଳିଛି। କିସିଣ୍ଡା ପୋଲସ୍‌ ଗତ ରାତି ପ୍ରାୟ ୧୨.୩୦ ସମୟରେ କିସିଣ୍ଡା ଥାନା ଉପରମୁଣ୍ଡା ଗ୍ରାମରୁ ୨ ଟି ଗାଡି ସାହାଯ୍ୟରେ ମହୁଲ ଫୁଲ ଲୋଡ୍ ହୋଇ ବାହାରକୁ ଚାଲାଣ କରିବାକୁ ଉଦ୍ୟମ କରୁଥିବା ବେଳେ ଗାଡି ସହ ଏହାର ମୁଖ୍ୟ ନାୟକ ତଥା ତାର ସହଯୋଗୀମାନଙ୍କୁ ପୋଲିସ୍ ଗିରଫ କରିଛି।

ପ୍ରକାଶ ଯେ, କିସିଣ୍ଡା ପୋଲିସ୍ ଗତକାଲି ରାତିରେ ବଳମ୍, ବଲାସିଂଘା, ଉପରମୁଣ୍ଡା ଗ୍ରାମରେ ପେଟ୍ରୋଲିଙ୍ଗ କରୁଥିବା ବେଳେ ଉପରମୁଣ୍ଡା ଗ୍ରାମରେ ମହୁଲ ଫୁଲ ୨ ଟି ଗାଡିରେ ଲୋଡ ହେଉଥିବା କୈାଣସି ସୂତରୁ ଖବର ପାଇ ଚଢଉ କରିଥିଲା। ଚଢଉ ସମୟରେ ୨ ଟି ଚାରି ଚକିଆ ଗାଡିକୁ ପୋଲିସ୍ ଜବତ କରି କିସିଣ୍ଡା ଥାନାକୁ ନେଇଯାଇଥିଲା। ଏଥରେ ସଂପୃକ୍ତି ଥିବା ମୁଖ୍ୟ ଦଲାଲି ବିଦ୍ୟାଧର ସାହୁ ସମେତ ଡିଲେଶ୍ୱର ରାଉଳ, ପ୍ରାଣବନ୍ଧୁ ବନଛୋର, ଦୁଆରୁ ରାଉଳ, ସୁବଳ ରାଉଳ, ଧବଳେଶ୍ୱର ପୁଲେଇ, ନରେନ୍ଦ୍ର ପ୍ରଧାନକୁ ପୋଲିସ୍ ଗିରଫ କରିଛି।

ଚାଷୀ ମାନଙ୍କ ଠାରୁ କମ୍ ଦରରେ ମହୁଲ କିଣି ଚଢା ଦରରେ ବିକ୍ରି କରୁଥିବା ମୁଖ୍ୟ ଦଲାଲି ବିଦ୍ୟାଧର ସାହୁ ଏହି ବେପାରର ମୁଖ୍ୟ ପୁରୋଧା ବୋଲି ଜଣା ପଡିଛି। ସେ ସବୁ ସମୟରେ ଏମିତି ଅନୈତିକ ଭାବରେ ଚୋରାରେ ଜଙ୍ଗଲଜାତ ଦ୍ରବ୍ୟ ଚାଷୀମାନଙ୍କ ଠାରୁ କିଛି ଚଢା ଦରରେ ବିକ୍ରି କରିଥାଏ ବୋଲି ପୋଲିସ୍ ପ୍ରକାଶ କରିଛି।

ପୋଲିସ୍ କୁ ଦଲାଲି ମହୁଲ ଫୁଲ କିଣୁଥିବାର କୌଣସି କାଗଜ ପତ୍ର ଦେଖାଇ ପାରି ନ ଥିଲା। ଜବତ ଟ୍ରକ୍ ଓଡି-୧୫-ଆର୍ ୩୫୯୫ ରେ ୪୦୦ ବସ୍ତା, ଏବଂ ପିକ୍ ଅପ୍ ଭ୍ୟାନ୍ ଓଡି ୧୫-ଏଚ୍ ୩୮୩୦ ରୁ ୨୦ ବସ୍ତା କୁ ଜବତ କରାଯାଇଛି। କିସିଣ୍ଡା ଥାନା କେସ୍ ନଂ ୟୁ/ଏସ୍‌-୩୭୯/୪୧୧/୩୪ଆଇପିସି/୫୨(ଏ)(ଆଇଆଇ)୬୨ ଓଡିଶା ଏକ୍ସ ସାଇଜ୍ ଆଇନ୍ ବଳରେ ମାମଲା ରୁଜୁ କରାଯାଇଥିବା ବେଳେ ସେମାନଙ୍କୁ ଆଜି କୋର୍ଟ ଚାଲାଣ କରାଯାଇଥିବା କିସିଣ୍ଡା ପୋଲିସ୍ ଏକ ପ୍ରେସ୍ ବିଜ୍ଞପ୍ତିରେ ଜଣାଇଛି।

ସମ୍ବଲପୁର ଏସ୍.ପି ଙ୍କ ନିର୍ଦ୍ଦେଶ କ୍ରମେ କିସିଣ୍ଡା ଥାନାଧିକାରୀ ପ୍ରଶାନ୍ତ କୁମାର ସାମଲ୍,ଏସ୍ ଆଇ ସନତ କୁମାର ମାନଡଙ୍ଗି, ଏସ୍‌ଆଇ କଷ୍ଟୁ ଚରଣ ବେହେରା ସଦଳେବଳେ ଚଢଉରେ ସାମିଲ୍ ହୋଇଥିଲେ।

Categories
ଆଞ୍ଚଳିକ

ନାକଟିଦେଉଳରେ ଆୟୁଷ୍ମାନ ଭାରତ ସ୍ୱାସ୍ଥ୍ୟମେଳା ଅନୁଷ୍ଠିତ, ୮୯୨ ଜଣ ରୋଗୀ ସ୍ୱାସ୍ଥ୍ୟ ପରୀକ୍ଷା

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ମହାବିଦ୍ୟାଳୟ ପରିସରରେ ଆୟୁଷ୍ମାନ ଭାରତ ସ୍ୱାସ୍ଥ୍ୟମେଳା ଅନୁଷ୍ଠିତ ହୋଇଯାଇଛି। ଏହି ସ୍ୱାସ୍ଥ୍ୟମେଳାରେ ବିଶେଷଜ୍ଞ ଡାକ୍ତରଙ୍କ ଦ୍ୱାରା ସ୍ୱାସ୍ଥ୍ୟ ପରୀକ୍ଷା କରାଯାଇ ମାଗଣା ଚିକିତ୍ସା ଓ ଔଷଧ ବଂଟନ କରାଯାଇଥିଲା। ଏଥିରେ ବିଶେଷଜ୍ଞ ଡାକ୍ତରଙ୍କ ଦ୍ୱାରା ସ୍ତ୍ରୀ ଓ ପ୍ରସୂତି ସେବା, ଶିଶୁ ରୋଗ ଚିକିତ୍ସା, ଭେଷଜ ଚିକିତ୍ସା, ଦାନ୍ତ ରୋଗ ଚିକିତ୍ସା, ଆୟୁଷ ଚିକିତ୍ସା, ଯୋଗ, ମଧୁମେହ ନିରୁପଣ, ରକ୍ତଚାପ ନିରୂପଣ, ମୁଖ ଗହ୍ୱର ଓ କର୍କଟ ନିରୂପଣ, ସ୍ୱାସ୍ଥ୍ୟ ପରାମର୍ଶ ସେବା, କୋଭିଡ ପରୀକ୍ଷା ଓ ଟିକାକରଣ, ମାଗଣା ରୋଗ ନିର୍ଣ୍ଣୟ ,ମାଗଣା ଔଷଧ ପ୍ରଦାନ କରାଯାଇଥିଲା।

ଏହି ଶିବିରକୁ ନାକଟିଦେଉଳ ବ୍ଲକ ଅଧ୍ୟକ୍ଷା ସ୍ୱରୁପାରାଣୀ ସାହୁ, ଜୋନ ୨ ଜିଲ୍ଲା ପରିଷଦ ସଭ୍ୟା ଟିକେଶ୍ୱରୀ ମେହେର, ନାକଟିଦେଉଳ ସରପଂଚ ଜିତେନ୍ଦ୍ରିୟ ସାହୁ, ଯୁକ୍ତ ୨ ଅଧ୍ୟକ୍ଷ କନ୍ଦର୍ପ ରାଉଳ, ଯୁକ୍ତ ୩ ଅଧ୍ୟକ୍ଷ ସୁଧିର କୁମାର ସାହୁ, ପ୍ରମୁଖ ଅତିଥି ଭାବେ ଯୋଗ ଦେଇ ସ୍ୱାସ୍ଥ୍ୟ ଶିବିରକୁ ଉଦ୍‌ଘାଟନ କରିଥିଲେ। ଡ. ଅଜୟ କୁମାର ରାଉତ, ଡ. ରାମକୃଷ୍ଣ ପତି, ଡ. ଶରତ ଚନ୍ଦ୍ର ଘରାଇ, ଡ. ଚିନ୍ମୟ କର, ଡ. ଲିଲିବାଳା ବେହେରା, ଡ. ସ୍ୱବନିକା କୟାରକୁର ପ୍ରମୁଖ ବିଶେଷଜ୍ଞ ଡାକ୍ତର ରୋଗୀଙ୍କ ସ୍ୱାସ୍ଥ୍ୟ ପରୀକ୍ଷା କରିଥିଲେ। ନାକଟିଦେଉଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଡ. ଅମୁଲ୍ୟ ରତ୍ନ ମହନ୍ତ ଶିବିର ପରିଚାଳନା କରିଥିବା ବେଳେ ବ୍ଲକ କାର୍ଯ୍ୟକ୍ରମ ପରିଚାଳକ ମଧୁସୁଦନ ପୋଢ ସହଯୋଗ କରିଥିଲେ।

ଅନ୍ୟମାନଙ୍କ ମଧ୍ୟରେ ନାକଟିଦେଉଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର କର୍ମଚାରୀ ଓ ସ୍ୱାସ୍ଥ୍ୟ କର୍ମୀମାନେ ଉପସ୍ଥିତ ଥିଲେ। ଏହି ଶିବିରରେ ୮୯୨ ଜଣ ରୋଗୀ ସ୍ୱାସ୍ଥ୍ୟ ପରୀକ୍ଷା କରିବା ସହ ସେମାନଙ୍କୁ ମାଗଣାରେ ଔଷଧ ବଂଟନ କରାଯାଇଥିଲା।

Categories
ଅପରାଧ ଆଜିର ଖବର ରାଜ୍ୟ ଖବର

ଇଣ୍ଡିଗୋ କାର ସହ ୭୯ କେଜି ଗଞ୍ଜେଇ ଜବତ, ଡ୍ରାଇଭର ଫେରାର୍‌

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ଅଂଚଳରେ ଦିନକୁ ଦିନ ଗଞ୍ଜେଇ ଚୋରା ବେପାରିମାନେ ପୋଲିସ୍‌କୁ ଚକମା ଦେଇ ଅନାୟାସରେ ଗଞ୍ଜେଇ ବେପାର କରୁଛନ୍ତି। ପୋଲିସ୍ ସେମାନଙ୍କୁ ଧରିବାରେ ବିଫଳ ହେଉଥିଲେ ମଧ୍ୟ କିଛି ମାତ୍ରାରେ ସେମାନଙ୍କୁ ଧରିବାରେ ସଫଳ ହେଉଛି। ଅତୀତରେ ବହୁ ବେପାରୀ ନାକଟିଦେଉଳ ଅଂଚଳରୁ ଧରାପଡି ଜେଲର ଚାରି କାନ୍ଥ ଭିତରେ ରହିଛନ୍ତି। ବର୍ଷ ବର୍ଷ ଧରି କେସ୍ ଚାଲିଛି।

ପୋଲିସର ମାତ୍ରାଧିକ ଚଢାଉ ହେଉଥିଲେ ମଧ୍ୟ ଗଞ୍ଜେଇ ବେପାରିମାନେ ଚୋରା କାରବାରରେ ଲିପ୍ତ ରହୁଛନ୍ତି। ଗତକାଲି ସଂଧ୍ୟାରେ ରେଢାଖୋଲରୁ ନାକଟିଦେଉଳ ଅଭିମୁଖେ ଏକ ଧଳା ଇଣ୍ଡିଗୋ କାର୍ (ଓଡି ୦୨ ଡି ୪୫୭୪) ରେ ଚୋରାରେ ଗଞ୍ଜେଇ ଅନୁଗୁଳ ଅଂଚଳକୁ ଆସୁଥିବାର ନାକଟିଦେଉଳ ଥାନାଧିକାରୀ ସୂଚନା ପାଇ ସଦଳବଳେ ଚରଡପଶି ନିକଟରେ ରାସ୍ତାକୁ ବନ୍ଦ କରିଦେଇଥିଲେ। ପୋଲିସ୍ ଥିବାର ଜାଣି ପାରି ଗଞ୍ଜେଇ ବେପାରୀ ଚରଡପଶି ନିକଟରୁ ଗାଡିକୁ ପଛକୁ କରି ଶିମିଳିପାଳ ଛକରୁ କୁଡାନାଳି ରାସ୍ତା ପଟକୁ ଦୃତ ଗତିରେ ଫେରାର୍ ହୋଇଯାଇଥିଲା।

ପୋଲିସ୍ କାର୍ କୁ ପିଛା କରି ଥିଲା। ପୋଲିସ୍ ଆସୁଥିବା ଜାଣି ଜାମୁଜୋରି ପଂଚାୟତର କୁଡାନାଳି ନିକଟ କୋଇଲିପଦା ନିକଟସ୍ଥ ଜଙ୍ଗଲରେ କାରକୁ ଛାଡି ଡ୍ରାଇଭର ଫେରାର୍ ହେବାରେ ସକ୍ଷମ ହୋଇଥିଲା। ପୋଲିସ୍ ପହଂଚିଲା ବେଳକୁ ଡ୍ରାଇଭର ନ ଥିଲା।

ପୋଲିସ୍ କାରରେ ଥିବା ଏକ ବସ୍ତାରେ ୭୯ କେଜି ଗଞ୍ଜେଇ ଜବତ କରିବା ସହ କାରକୁ ନାକଟିଦେଉଳ ଥାନାକୁ ଆଣିଥିଲା। କାରର୍ ଓରିଜିନାଲ୍ ଆର୍ ସି ବହି ଏବଂ ଇନସୁରାନସ୍ ଥିବାର ଜାଣିବାକୁ ପାଇଥିଲା।

ନାକଟିଦେଉଳ ଥାନାଧିକାରୀ ଆମ ପ୍ରତିନିଧିଙ୍କୁ ସୂଚନା ଦେଇଛନ୍ତି ଯେ, କାର୍ ର ମାଲିକ ଅନୁଗୋଳ ଜିଲ୍ଲାର ବୋଲି ଖବର ପାଇଛନ୍ତି ଏବଂ ଗାଡିର ମାଲିକକୁ ଥାନାକୁ ଅଣାଯିବ ଓ ଏହାର ଅନୁସନ୍ଧାନ କରାଯିବ ବୋଲି ପ୍ରକାଶ କରିଛନ୍ତି।

ନାକଟିଦେଉଳ ଥାନା କେସ୍ ନଂ ୭୦-ତା୮/୪/୨୦୨୨ ୟୁ/ଏସ୍ ୨୦(ବି) (ଆଇଆଇ)(ସି) ଏନ୍‌ଡିପିଏସ୍ ଆକ୍ଟ ରେ କେସ୍ ରୁଜୁ ହୋଇଥିବା ନାକଟିଦେଉଳ ଥାନାଧିକାରୀ ବିଭୂତି ଭୂଷଣ ଦଳାଇ ପ୍ରକାଶ କରିଛନ୍ତି।

Categories
ଆଜିର ଖବର ରାଜ୍ୟ ଖବର

ବିଧାୟକ ରୋହିତଙ୍କୁ ଶକ୍ତ ଝଟ୍‌କା: ଅଧ୍ୟକ୍ଷ ପଦ ହାତେଇ ନେଲେ ସୁଦେଇଙ୍କ ପୁତ୍ରବଧୂ

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ପଂଚାୟତ ସମିତିର ଅଧ୍ୟକ୍ଷ ପଦ ପାଇଁ ଆଜି ବ୍ଲକ୍ କାର୍ଯ୍ୟାଳୟ ଠାରେ ନିର୍ବାଚନ ଅନୁଷ୍ଠିତ ହୋଇଥିଲା। ନିର୍ବାଚନରେ ପୁର୍ବତନ ବ୍ଲକ୍ ଅଧ୍ୟକ୍ଷ ସୁ୍‌ଦର୍ଶନ ସାହୁ (ସୁଦେଇ)ଙ୍କ ପୁତ୍ର ବଧୂ ସ୍ୱରୁପାରାଣୀ ସାହୁ ୧୦ ଖଣ୍ଡ ଭୋଟରେ ବିଜୟୀ ହୋଇଛନ୍ତି। ସାହେବୀର ସମିତିସଭ୍ୟା ବିଳାସିନୀ ପ୍ରଧାନ ନାମାଙ୍କନ ପତ୍ର ଦାଖଲ କରିଥିବା ବେଳେ ତାଙ୍କୁ ମାତ୍ର ୩ ଖଣ୍ଡ ଭୋଟ ମିଳି ସେ ପରାଜିତ ହୋଇଥିଲେ। ତାଙ୍କୁ ରୋହିତ ପୂଝାରୀ ସମର୍ଥନ କରୁଥିଲେ ମଧ୍ୟ ସାଂସଦ ପ୍ରସନ୍ନ ଆଚାର୍ଯ୍ୟଙ୍କ ସମର୍ଥିତ ତଥା ନାକଟିଦେଉଳ ପଂଚାୟତ ସମିତିର ପୂର୍ବତନ ଅଧ୍ୟକ୍ଷ ସୁଦର୍ଶନ ସାହୁଙ୍କ ପୁତ୍ରବଧୂ ବିଜୟୀ ହୋଇଥିଲେ।

ଜାମୁଜୋରୀର ସମିତିସଭ୍ୟା ତଥା ବିଜେଡି ସମର୍ଥିତ ସ୍ୱର୍ଣଲତା ପ୍ରଧାନ ଭୋଟ ଦେବାକୁ ଆସି ନ ଥିଲେ। ସେ ପଟେ ରେଢାଖୋଲ ବିଧାୟକ ରୋହିତ ପୂଝାରୀଙ୍କ ସମର୍ଥିତ ପ୍ରାର୍ଥୀ ପରାଜୟ ବରଣ କରିଥିବା ବେଳେ ସାଂସଦ ପ୍ରସନ୍ନ ଆଚାର୍ଯ୍ୟ, ବିଜେଡିର ପ୍ରମୋଦ ରଥ, ଆସଫ୍ ଅଲ୍ଲୀ ଖାଁ ଙ୍କ ସମର୍ଥିତ ପ୍ରାଥୀନୀ ସ୍ୱରୁପାରାଣୀ ସାହୁ ବିଜୟୀ ହୋଇଥିଲେ।

ବିଜେଡି ର ଦୁଇ ଗୋଷ୍ଠି ମଧ୍ୟରେ ଅନ୍ତଃକନ୍ଦଳ ଯୋଗୁଁ ରୋହିତ ପୂଝାରୀ ସମର୍ଥୀତ ପ୍ରାର୍ଥୀ ଅଧ୍ୟକ୍ଷା ପଦରୁ ପରାଜିତ ହୋଇଯାଇଥିଲେ। ବିଜୟୀ ଅଧ୍ୟକ୍ଷା ସ୍ୱରୁପାରାଣୀ ସାହୁ ଙ୍କୁ ସ୍ୱାଗତ କରିବା ପାଇଁ ନାକଟିଦେଉଳ ବ୍ଲକ୍ କାର୍ଯ୍ୟାଳୟରେ ନାହିଁ ନ ଥିବା ଭିଡ ଦେଖିବାକୁ ମିଳିଥିଲା।

ବିଜେପିର ଗୋବିନ୍ଦ ଅଗ୍ରଓାଲ , ବିଜେଡିର ପ୍ରମୋଦ ରଥ ତଥା ବହୁ ବରିଷ୍ଠ ନେତା ନାକଟିଦେଉଳରେ ଦେଖିବାକୁ ମିଳିଥିଲା। ରୋହିତ ଗୋଷ୍ଠି ମାନଙ୍କ ମଧ୍ୟରେ ଅସନ୍ତୋଷ ମଧ୍ୟ ଦେଖିବାକୁ ମିଳିଥିଲା।

Categories
ଆଜିର ଖବର ରାଜ୍ୟ ଖବର

ନାକଟିଦେଉଳ କିସିଣ୍ଡା କୁଲାଡେରା ଜଙ୍ଗଲରେ ଚିକିତ୍ସା ଅଭାବରୁ ହାତୀର ମୃତ୍ୟୁ ଆଶଙ୍କା

କନ୍ଦର୍ପ ବେହେରା
ରେଢାଖୋଲ: ଆଜି ବାମରା ବନଖଣ୍ଡ କିସିଣ୍ଡା କୁୁଲାଡେରା ଜଙ୍ଗଲରେ ଏକ ଅସୁସ୍ଥ ହାତୀର ମୃତ୍ୟୁ ହୋଇଥିବା ସୂଚନା ମିଳୁଛି।

ବେସରକାରୀ ସୂତ୍ରରୁ ହସ୍ତଗତ ହୋଇଥିବା ସୂଚନାରୁ ଯାହା ଜଣା ପଡିଛି କିଛି ଦିନ ହେଲା କୁଲାଡେରା ଜଙ୍ଗଲରେ ଏକ ଅଣ୍ଡିରା ହାତୀ ଅସୁସ୍ଥ ହୋଇପଡିଥିଲା। ହାତୀଟିର ଗୋଡରେ ଆଘାତ ଲାଗିଥିବା ବିଶ୍ୱସ୍ତ ସୂତ୍ରରୁ ଜଣା ପଡିଛି। ଅସୁସ୍ଥ ହାତୀ ପାଖକୁ ମଧ୍ୟ ବନବିଭାଗ ଯାଇଛି। ହେଲେ ତାର ଚିକିତ୍ସାରେ ବନ ବିଭାଗ ଅବହେଳା କରିଥିବାରୁ ହାତୀଟିର ମୃତ୍ୟୁ ହୋଇଥିବା ଅନୁମାନ କରାଯାଉଛି। କିଛି ଦିନ ହେଲା କେବଳ କୁଲାଡେରା ଜଙ୍ଗଲରେ ହିଁ ଅସୁସ୍ଥ ହାତୀଟି ରହିଥିଲା। ତାର ଗୋଡରେ ଆଘାତ ଲାଗିଥିବନାରୁ ସେ ବେଶି ବାଟ ଯାଇ ପାରୁ ନ ଥିଲା।

ଯାହା ସୂଚନା ଆମ ପ୍ରତିନିଧିଙ୍କୁ ମିଳିଛି ହାତୀଟିର ଗୋଡରେ ଆଘାତ ଲାଗିଥାଉ ବା କୌଣସି ରୋଗ ହୋଇଥାଉ ହାତୀଟି ଭଲ ଭାବରେ ଚଲାବୁଲା କରିପାରୁ ନ ଥିଲା। ବନବିଭାଗ ଆହତ ଥିବା ସମୟରେ ଜଙ୍ଗଲରେ ଦେଖିଛି ହେଲେ ଚିକିତ୍ସା କରିବାରେ ଅବହେଳା କରିଥିଲା। ଯଦି ହାତୀଟିର ଚିକିତ୍ସା ବନବିଭାଗ କରିଥାନ୍ତା ନିଶ୍ଚୟ ବଂଚି ଯାଇଥାନ୍ତା। କିସିଣ୍ଡା ଫରେଷ୍ଟର ଅନୁ ମାଡାମଙ୍କୁ ଫୋନ୍ କରିଥିଲେ ମଧ୍ୟ ଫୋନ୍ ସୁଇଚ୍ ଅଫ୍ ଥିବା ବେଳେ ଜନୈକ ଫରେଷ୍ଟଗାର୍ଡଙ୍କୁ ଫୋନ୍ କରିବାରୁ ସେ ଫୋନ୍ ଟି କାଟିଦେଇଥିଲେ। ଯା’ ଫଳରେ ହାତୀଟିର ମୃତ୍ୟୁକୁ ନେଇ ଦ୍ୱନ୍ଦ ସୃଷ୍ଟି ହୋଇଛି। ବନବିଭାଗ ଗଣ ମାଧ୍ୟମ ପ୍ରତିନିଧିମାନଙ୍କୁ ସୂଚନା ଦେବାରେ ମଧ୍ୟ କୁଣ୍ଠା ବୋଧ କରୁଛନ୍ତି।

ଏକ ବିଶ୍ୱସ୍ତ ସୂତ୍ରରୁ ଜଣା ପଡିଛି ଯେ, ଆଉ ଦୁଇଟି ହାତୀ ମା ଓ ଛୁଆ ମଧ୍ୟ ଅସୁସ୍ଥ ହୋଇ ସେଇ ନିକଟସ୍ଥ ଏକ ଜଙ୍ଗଲରେ ଥିବାର ଅନୁମାନ କରାଯାଉଛି। ସେ ହାତୀମାନଙ୍କୁ ଠାବ କରି ଚିକିତ୍ସା କରିବାକୁ ବନ ବିଭାଗ ଦୃଷ୍ଟିଦେବା ଜରୁରି ହୋଇପଡିଛି। ହାତୀଟି ମୃତ୍ୟୁବରଣ କରିଥିଲେ ମଧ୍ୟ ଏ ପର୍ଯ୍ୟନ୍ତ ଗଣମାଧ୍ୟମ ପ୍ରତିନିଧିଙ୍କୁ ଏବାବଦରେ ବନବିଭାଗ ପକ୍ଷରୁ ସୂଚନା ଦିଆଯାଇ ନାହିଁ।

Categories
ଆଜିର ଖବର ରାଜ୍ୟ ଖବର

ନାକଟିଦେଉଳରୁ ଭୁବନେଶ୍ୱରକୁ ସରକାରୀ ବସ୍ ସେବା ଆରମ୍ଭ

କନ୍ଦର୍ପ ବେହେରା
ରେଢାଖୋଲ: ଆଜି ଠାରୁ ନାକଟିଦେଉଳରୁ ଭୂବନେଶ୍ୱରକୁ ଏକ ସରକାରୀ ବସ୍ ଚାଲିବା ଆରମ୍ଭ ହୋଇଥିବାରୁ ଅଂଚଳବାସୀ ମଧ୍ୟରେ ଆନନ୍ଦ ଖେଳିଯାଇଛି।

ମାନ୍ୟବର ମୂଖ୍ୟମନ୍ତ୍ରୀ ଓ ବିଧାୟକଙ୍କ ଉଦ୍ୟମରେ ଏହି ସରକାରୀ ବସ୍ ସେବା ଆରମ୍ଭ ହୋଇଛି। ନାକଟିଦେଉଳ ବାସୀଙ୍କର ଗମନା ଗମନକୁ ଆଖିଆଗରେ ରଖି ମାନ୍ୟବର ବିଧାୟକ ଇଂ ରୋହିତ ପୂଝାରୀଙ୍କ ଉଦ୍ୟମକୁ ଅଂଚଳବାସୀ ପ୍ରଶଂସା କରିଛନ୍ତି। ଭବିଷ୍ୟତରେ ଏହା କିସିଣ୍ଡାରୁ ରୁ ଭୂବନେଶ୍ୱରକୁ ଯିବାକୁ ଦାବୀ ହେଉଛି। ଏହି ବସ୍ ସେବା ଯୋଗୁଁ ନାକଟିଦେଉଳର ବାସିନ୍ଦା ମାନେ ସିଧା ସଳଖ ରାଜଧାନୀ ସହ ଯୋଡି ହେବେ। ସକାଳ ୪.୩୦ ରୁ ନାକଟିଦେଉଳରୁ ଛାଡିବ ଏବଂ ସଂଧ୍ୟା ୪.୩୦ ରେ ଭୂବନେଶ୍ୱରରୁ ଛାଡିବ ବୋଲି ଜଣା ପଡିଛି।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ରେଢାଖୋଲ ଓ ନାକଟିଦେଉଳରେ ବିଜେପି ପକ୍ଷରୁ ମୁଖ୍ୟମନ୍ତ୍ରୀଙ୍କ ବିରୁଦ୍ଧରେ ଏଫ୍‌ଆଇଆର୍‌

କନ୍ଦର୍ପ ବେହେରା
ରେଢାଖୋଲ: ଆଜି ରେଢାଖୋଲ ଓ ନାକଟିଦେଉଳ ବ୍ଲକ୍ ବିଜେପି ପକ୍ଷରୁ ରାଜ୍ୟ ସରକାରଙ୍କ ବିରୁଦ୍ଧରେ ଥାନାରେ ଏକ ଏତଲା ଦେଇଥିବା ଜଣା ପଡିଛି। ପ୍ରଧାନମନ୍ତ୍ରୀ ଆବାସ ଯୋଜନା ପ୍ରଧାନମନ୍ତ୍ରୀଙ୍କର ଏକ ଯୋଜନା। କେନ୍ଦ୍ରସରକାର ଦେଇଥିବା ଏହି ଯୋଜନାକୁ ରାଜ୍ୟ ସରକାର ବିଜ୍ଜୁ ପକ୍କାଘର ନାମରେ ସରକାରୀ କର୍ମଚାରୀଙ୍କୁ ନିୟୋଜିତ କରି ଦଳୀୟ ପ୍ରଚାର କରୁଥିବା ଓ ବିଜ୍ଜୁ ପକ୍କାଘର ନାମରେ ଓଡିଶା ସରକାରଙ୍କ ଏକ ଷ୍ଟିକର ଘରେ ଲଗାଇବା ଘଟଣାକୁ ବିଜେପି ଦୃଢ ନିନ୍ଦା କରିବା ସହ ଏହାକୁ ବିରୋଧ କରିଛି।

ଆଜି ରେଢାଖୋଲ ଓ ନାକଟିଦେଉଳ ବ୍ଲକ୍ ରେ ବିକ୍ଷୋଭ ସହ ବିଜ୍ଜୁ ପକ୍କାଘର ଷ୍ଟିକରକୁ ଚିରି ଦିଆଯାଇଥିଲା। ନବୀନ ପଟ୍ଟନାୟକଙ୍କ ନାମରେ ଆଇପିସି ର ୪୨୦ ଧାରା ଅନୁଯାୟୀ କେସ୍ ରୁଜୁ କରାଯାଇଥିଲା।

ରେଢାଖୋଲ ବିଜେପି ସଭାପତି ରାମାନୁଜ ମହାପାତ୍ର, ଅମର କୁମାର ସିଂ, ନରେନ୍ଦ୍ର କୁମାର ମଲ୍ଲୀକ, ରାଜେନ୍ଦ୍ର ପ୍ରସାଦ ବୈଠାରୁ ସାଂସଦ ପ୍ରତିନିଧି ଶିବରାମ ସାହୁ ପ୍ରମୁଖ ଯୋଗଦେଇଥିଲେ। ଠିକ୍ ସେହିପରି ନାକଟିଦେଉଳରେ ପ୍ରମୋଦ ସାହୁ, ପୂର୍ଣ୍ଣ ଗଡତିଆ, ଗୋବିନ୍ଦ ଅଗ୍ରଓାଲା, ନେତ୍ରାନନ୍ଦ ରାଉଳ, ଜିତେନ୍ଦ୍ର ସାହୁ, ଜଜେ୍ଞଶ୍ୱର ସାହୁ, ଅବନୀ ରାଉତ ପ୍ରମୁଖ ବିକ୍ଷୋଭରେ ଯୋଗଦେଇଥିଲେ।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ବିଦ୍ୟୁତ୍ ତାର ବୋଝେଇ ଟ୍ରକ୍ ଓଲଟି ଡ୍ରାଇଭର ଆହତ

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ଥାନା ଜାମୁଜୋରି ନିକଟରେ ଗତକାଲି ବିଳମ୍ବିତ ରାତିରେ ଏକ ବିଦ୍ୟୁତ ତାର ବୋଝେଇ ଟ୍ରକ ଓଲଟି ପଡିବା ଫଳରେ ଡ୍ରାଇଭର ଆହତ ହୋଇ ନାକଟିଦେଉଳ ଡାକ୍ତରଖାନାରେ ଚିକିତ୍ସାଧିନ ଥିବା ଖବର ହସ୍ତଗତ ହୋଇଛି।

ପ୍ରକାଶ ଯେ, ନାକଟିଦେଉଳ ଥାନା ଜାମୁଜୋରି ନିକଟସ୍ଥ ଖଳବଳା ନାଳ ନିକଟରେ ରାତି ୧୧ ଟା ରେ ବିଦ୍ୟୁତ ବୋଝେଇ ଟ୍ରକଟି ଭାରସାମ୍ୟ ହରାଇ ଓଲଟି ପଡିଥିଲା। ଯା ଫଳରେ ଡ୍ରାଇଭର ଆହତ ହୋଇ ଅଳ୍ପକେ ବଂଚିଯାଇଥିଲେ। ତାକୁ ନାକଟିଦେଉଳ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଘଟଣା ସ୍ଥଳରେ ନାକଟିଦେଉଳ ଥାନାଧିକାରୀ ପହଂଚି ଏକ କେସ୍ ରୁଜୁ କରିଥିବା ଜଣା ପଡିଛି। ଡ୍ରାଇଭର ଧର୍ମା ମହାପାତ୍ରର ଘର ବାଟଗାଁ ପଂଚାୟତର କୁଞାମୁରା ଗ୍ରାମର ବୋଲି ଜଣାପଡିଛି।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ହାତୀ ଆକ୍ରମଣରେ ଆହତବ୍ୟକ୍ତି ବୁର୍ଲାଡାକ୍ତରଖାନାରେ ମୃତ: କ୍ଷତିପୂରଣ ଦାବୀରେ ଜାମୁଜୋରୀରେ ରାସ୍ତାରୋକ

କନ୍ଦର୍ପ ବେହେରା
ରେଢାଖୋଲ: ଗତ ୨୭ ତାରିଖରେ ନାକଟିଦେଉଳ ରେଞ୍ଜ ଜାମୁଜୋରୀ ପଂଚାୟତର ବିନ୍ଦୁପୁର ଗ୍ରାମରେ ଜନୈକ ବ୍ୟକ୍ତିଙ୍କୁ ହାତୀ ମାରି ଦେବା ପରେ ତାକୁ ବୁର୍ଲା ଡାକ୍ତରଖାନାକୁ ନିଆଯାଇଥିଲା। ଚିକିତ୍ସାଧିନ ଥିବା ସମୟରେ ଆଜି ସକାଳୁ ତାର ମୃତ୍ୟୁ ହୋଇଥିବା ଖବର ହସ୍ତଗତ ହୋଇଥିଲା। ମୃତ ବ୍ୟକ୍ତିର ପରିବାରକୁ କ୍ଷତିପୂରଣ ଦାବୀରେ ଶବ ରଖି ଜାମୁଜୋରୀ ଗ୍ରାମପଂଚାୟତ ପାଖରେ ମୂଖ୍ୟରାସ୍ତା ନିକଟରେ ଗ୍ରାମବାସୀ ରାସ୍ତାରୋକ କରିଥିଲେ। ଖବର ପାଇ ନାକଟିଦେଉଳ ଥାନାଧୀକାରୀ ଇସ୍‌ମାଇଲ ଏକ୍କା, ରେଞ୍ଜ ଅଫିସର ଅଶ୍ୱିନୀ କୁମାର ବେହେରା, ଜିଲ୍ଲାପରିଷଦ ସଭ୍ୟ ପ୍ରମୋଦ କୁମାର ସାହୁ, ଜାମୁଜୋରୀ ସରପଂଚ ଅଜୀତ କୁମାରେ ପ୍ରଧାନ ଘଟଣା ସ୍ଥଳକୁ ଯାଇଥିଲେ। ଲୋକମାନଙ୍କୁ ବୁଝାସୁଝା କରିବା ପରେ ଓ ପ୍ରଶାସନ ପ୍ରତିଶୃତି ଦେବା ପରେ ଅପରାହ୍ନ ୪ଟା ୩୦ରେ ଗ୍ରାମବାସୀ ଆନ୍ଦୋଳନରୁ ଓହରି ଯାଇଥିଲେ। ମୃତ ବ୍ୟକ୍ତି ଜଣଙ୍କ ଓାର୍ଡମେମ୍ବର ଥିଲେ ବୋଲି ଜଣା ପଡିଛି।

ପ୍ରକାଶ ଯେ ଏକ ମାସ ତଳେ ନାକଟିଦେଉଳ ରେଞ୍ଜ ଅଧିନସ୍ଥ ବାଟଗାଁ ପଂଚାୟତ ହିନ୍ତସରା ଗ୍ରାମର ପ୍ରମିଳା ଦେହୁରୀ(୬୨) ନାମକ ମହିଳା ଜମିକୁ ହାତୀ ମାରି ଦେଇଥିଲା। ସୂଚନା ଯୋଗ୍ୟ ଯେ,ଏଇ କିଛି ଦିନ ତଳେ ୨୩/୫/୨୦୨୦ ରେ ମଧ୍ୟ ନାକ୍‌ଟିଦେଉଳ ରେଞ୍ଜ ଅଧିନସ୍ଥ ବାଟଗାଁ ପଂଚାୟତର ଭେଠିଆବେନି ଗ୍ରାମର ମହିଳା ପତ୍ର ତୋଳାଳି ଦମୟନ୍ତୀ ଦେହୁରୀ(୬୫)ଙ୍କୁ ହାତୀ ଦଳିଦେଇଥିଲା। ୨୦୧୪ ରେ ଚଡଚଡି ଗ୍ରାମରେ ବୃଦ୍ଧା ଜଣଙ୍କୁ, ୨୦୧୫ ରେ ଅଙ୍ଗାବିରା ଗ୍ରାମରେ ଜଣେ ଯୁବକକୁ, ୨୦୧୬ ରେ ପ୍ରତାପପୁର ଗ୍ରାମରେ ଜଣେ ବୃଦ୍ଧଙ୍କୁ, ୨୦୧୯ ରେ ବିନ୍ଧପୁର ଗ୍ରାମରେ ଜଣେ ବୃଦ୍ଧା, ୨୦୧୯ ରେ ଡାହିମାଳ ଗ୍ରାମରେ ମଧ୍ୟ ଜଣେ ବୃଦ୍ଧ ଙ୍କୁ ହାତୀ ମାରିଦେଇଥିଲ। ଏମିତି ବାରମ୍ବାର ରେଢାଖୋଲ ସବଡିଭିଜନରେ ହାତୀ ହାବୁଡରେ ପଡି ବହୁ ଧନ ଜୀବନ ଯାଉଥିବାର ନଜିର ରହିଛି। ଦିନକୁ ଦିନ ଜଙ୍ଗଲ ଧ୍ୱଂସ ପାଇବା ଫଳରେ ହାତୀମାନେ ଗାଁ ଆଡକୁ ମାଡି ଆସୁଛନ୍ତି। ନିକଟରେ ରେଢାଖୋଲ ହେମାମୁରା ଗ୍ରାମରେ ମଧ୍ୟ ଜଣେ ମହିଳାକୁ ହାତୀ ଦଳିଦେଇଥିଲା। ୬ବର୍ଷ ମଧ୍ୟରେ ନାକଟିଦେଉଳ ବ୍ଲକରେ ୮ ଜଣଙ୍କୁ ହାତୀ ମାରି ଦେଇଥିବା ଜଣା ପଡିଛି।