Categories
ବିଶେଷ ଖବର

‘ଭାରତ ଡ୍ରୋନ ମହୋତ୍ସବ ୨୦୨୨’କୁ ଉଦଘାଟନ କଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭାରତର ସବୁଠୁ ବଡ଼ ଡ୍ରୋନ ଉତ୍ସବ- ଭାରତ ଡ୍ରୋନ ମହୋତ୍ସବ ୨୦୨୨କୁ ଉଦଘାଟନ କରିଛନ୍ତି। ସେ ମଧ୍ୟ କିଷାନ ଡ୍ରୋନ ପାଇଲଟଙ୍କ ସହ ଆଲୋଚନା କରିଥିଲେ, ମୁକ୍ତାକାଶ ଡ୍ରୋନ ପ୍ରଦର୍ଶନୀ ଦେଖିଥିଲେ ଏବଂ ଡ୍ରୋନ ପ୍ରଦର୍ଶନୀ କେନ୍ଦ୍ର ଠାରେ ଷ୍ଟାର୍ଟଅପ ଗୁଡ଼ିକର ପ୍ରତିନିଧିମାନଙ୍କ ସହିତ କଥା ହୋଇଥିଲେ। କେନ୍ଦ୍ର ମନ୍ତ୍ରୀ ନରେନ୍ଦ୍ର ସିଂ ତୋମର, ଗିରିରାଜ ସିଂ, ଜ୍ୟୋତିରାଦିତ୍ୟ ସିନ୍ଧିଆ, ଅଶ୍ବିନୀ ବୈଷ୍ଣବ, ମନସୁଖ ମାଣ୍ଡଭିୟ, ଭୂପେନ୍ଦ୍ର ଯାଦବଙ୍କ ସମେତ ବହୁ ରାଷ୍ଟ୍ରମନ୍ତ୍ରୀ ଏବଂ ଡ୍ରୋନ ଉଦ୍ୟୋଗ ଜଗତର ନେତୃବୃନ୍ଦ ତଥା ଉଦ୍ୟୋଗୀମାନେ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ଏହି ଉପଲକ୍ଷେ ପ୍ରଧାନମନ୍ତ୍ରୀ ୧୫୦ଟି ଡ୍ରୋନ ପାଇଲଟ୍‌ ପ୍ରମାଣପତ୍ର ପ୍ରଦାନ କରିଥିଲେ।

ସମବେତ ଜନତାଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଡ୍ରୋନ କ୍ଷେତ୍ର ପ୍ରତି ତାଙ୍କର ବିଶେଷ ଆଗ୍ରହ  ରହିଛି। ଏହି କ୍ଷେତ୍ର ତାଙ୍କୁ ରୋମାଞ୍ଚିତ କରିଥାଏ ବୋଲି ସେ କହିଥିଲେ। ଡ୍ରୋନ ପ୍ରଦର୍ଶନୀ ଆୟୋଜନ କରାଯିବା ଏବଂ ଏହି କ୍ଷେତ୍ରରେ ଉଦ୍ୟମୀ ଓ ଉଦ୍ଭାବକଙ୍କ ଉତ୍ସାହକୁ ଦେଖି ସେ ଗଭୀର ଭାବେ ପ୍ରଭାବିତ ହୋଇଥିବା ପ୍ରଧାନମନ୍ତ୍ରୀ କହିଥିଲେ। ଚାଷୀ ଓ ଯୁବ ଇଞ୍ଜିନିୟରମାନଙ୍କ ସହିତ ନିଜର ଆଲୋଚନା ବିଷୟରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ। ସେ କହିଥିଲେ ଯେ, ଡ୍ରୋନ କ୍ଷେତ୍ରରେ ଉତ୍ସାହ ଓ ଆଗ୍ରହ ସ୍ପଷ୍ଟ ଭାବେ ଦେଖିବାକୁ ମିଳୁଛି। ଏହି କ୍ଷେତ୍ରରେ ଭାରତର ସାମର୍ଥ୍ୟ ଦିନେ ଦେଶକୁ ଏକ ଅଗ୍ରଣୀ ସ୍ଥାନରେ ପହଞ୍ଚାଇବ। ନିଯୁକ୍ତି ସୁଯୋଗ ସୃଷ୍ଟି କରିବା ଲାଗି ଏହି କ୍ଷେତ୍ରରେ ଅପାର ସମ୍ଭାବନା ରହିଛି ବୋଲି ପ୍ରଧାନମନ୍ତ୍ରୀ କହିଥିଲେ।

ଆଜକୁ ଠିକ୍ ୮ ବର୍ଷ ତଳେ ଏକ ନୂଆ ଆରମ୍ଭ ହୋଇଥିବା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ‘‘ଠିକ୍‌ ୮ ବର୍ଷ ତଳେ, ସର୍ବନିମ୍ନ ସରକାର-ସର୍ବାଧିକ ପ୍ରଶାସନର ମାର୍ଗକୁ ଅନୁସରଣ କରି ଆମେ ଭାରତରେ ଉତ୍ତମ ପ୍ରଶାସନର ନୂତନ ମନ୍ତ୍ରକୁ କାର୍ଯ୍ୟକାରୀ କରିବା ଆରମ୍ଭ କରିଥିଲୁ। ଆମେ ସହଜ ଜୀବନ ଧାରଣ (ଇଜ୍‌ ଅଫ ଲିଭିଂ) ଏବଂ ବ୍ୟବସାୟିକ ସୁଗମତା (ଇଜ୍‌ ଅଫ ଡୁଇଂ ବିଜନେସ)କୁ ଆମର ପ୍ରାଥମିକତା ଭାବେ ଗ୍ରହଣ କରିଛୁ। ସବକା ସାଥ୍‌ ସବକା ବିକାଶ ମାର୍ଗରେ ଅଗ୍ରସର ହୋଇ ଆମେ ଦେଶର ପ୍ରତ୍ୟେକ ନାଗରିକଙ୍କ ନିକଟରେ ମୌଳିକ ସୁବିଧା ଏବଂ କଲ୍ୟାଣକାରୀ ଯୋଜନା ଗୁଡ଼ିକୁ ପହଞ୍ଚାଇବା ଲାଗି ନିରନ୍ତର କାର୍ଯ୍ୟ କରୁଛୁ।’’ ପ୍ରଧାନମନ୍ତ୍ରୀ ବିଶେଷ ଭାବେ ଉଲ୍ଲେଖ କରି କହିଥିଲେ ଯେ, ପୂର୍ବ ସରକାରଙ୍କ ସମୟରେ ପ୍ରଯୁକ୍ତିକୁ ସମସ୍ୟାର ଏକ ଅଂଶବିଶେଷ ଭାବେ ବିଚାର କରାଯାଉଥିଲା ଏବଂ ଏହାକୁ ଗରିବ ବିରୋଧୀ ବୋଲି ଦର୍ଶାଇବାକୁ ଉଦ୍ୟମ କରାଯାଉଥିଲା। ଏହି କାରଣରୁ, ୨୦୧୪ ପୂର୍ବରୁ ପ୍ରଶାସନରେ ପ୍ରଯୁକ୍ତିର ବ୍ୟବହାରକୁ ନେଇ ଉଦାସୀନତା ଦେଖିବାକୁ ମିଳୁଥିଲା। ତେଣୁ ପ୍ରଯୁକ୍ତିକୁ ପ୍ରଶାସନର ଅଂଶବିଶେଷ କରିବାକୁ ନେଇ ଉପଯୁକ୍ତ ପରିବେଶ ସୃଷ୍ଟି ହୋଇପାରୁନଥିଲା।

ଏହି କାରଣରୁ ଗରିବ, ବଞ୍ଚିତ ଓ ମଧ୍ୟବିତ୍ତ ଜନସାଧାରଣଙ୍କୁ ଅଧିକ ସମସ୍ୟାର ସମ୍ମୁଖିନ ହେବାକୁ ପଡ଼ୁଥିଲା । ମୌଳିକ ସେବା ଉପଲବ୍ଧତା କ୍ଷେତ୍ରରେ ରହିଥିବା ଜଟିଳତା ଲୋକଙ୍କ ମନରେ ଅଭାବ ଓ ଭୟର ଭାବନା ସୃଷ୍ଟି କରୁଥିଲା ବୋଲି ପ୍ରଧାନମନ୍ତ୍ରୀ କହିଥିଲେ । ସେ କହିଥିଲେ ଯେ ସମୟ ସହ ତାଳ ଦେଇ ଆମେ ବଦଳି ପାରିଲେ ପ୍ରଗତି ସମ୍ଭବ ହୋଇପାରିବ। ପ୍ରଧାନମନ୍ତ୍ରୀ ଆହୁରି କହିଥିଲେ ଯେ, ପରିପୂର୍ଣ୍ଣତା ସଂକଳ୍ପକୁ ଆଗେଇ ନେବା ଏବଂ ଅନ୍ତିମ ସୋପାନରେ ସେବା ପହଞ୍ଚାଇବାରେ ପ୍ରଯୁକ୍ତି ବ୍ୟାପକ ଭାବେ ସହାୟକ ହୋଇଛି। ଏହି ଗତିରେ ଅଗ୍ରସର ହେଲେ ଆମେ ଅନ୍ତ୍ୟୋଦୟ ଲକ୍ଷ୍ୟ ହାସଲ କରିପାରିବା। ଜନ ଧନ, ଆଧାର, ମୋବାଇଲ (ଜେଏଏମ) ତ୍ରୟକୁ ବ୍ୟବହାର କରି ଆମେ ସମାଜର ଗରିବ ବର୍ଗଙ୍କୁ ସେମାନଙ୍କର ହକ୍‌ ଦେବାରେ ସକ୍ଷମ ହୋଇପାରିବା। ବିଗତ ୮ ବର୍ଷର ଅଭିଜ୍ଞତା ମୋର ଏହି ବିଶ୍ବାସକୁ ଦୃଢ଼ କରିଥାଏ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ। ଶ୍ରୀ ମୋଦୀ ଜୋର ଦେଇ କହିଥିଲେ ଯେ, ଦେଶରେ ନୂଆ ସାମର୍ଥ୍ୟ, ଗତି ଓ ବ୍ୟାପକତା ହାସଲ କରିବା ଲାଗି ଆମେ ପ୍ରଯୁକ୍ତିକୁ ଏକ ଗୁରୁତ୍ବପୂର୍ଣ୍ଣ ମାଧ୍ୟମ ଭାବେ ବ୍ୟବହାର କରିଛୁ। ପ୍ରଧାନମନ୍ତ୍ରୀ ସୂଚନା ଦେଇ କହିଥିଲେ ଯେ, ଦେଶରେ ବିକଶିତ ହୋଇଥିବା ସୁଦୃଢ଼ ୟୁପିଆଇ ବ୍ୟବସ୍ଥା ସହାୟତାରେ, ଲକ୍ଷାଧିକ କୋଟି ଟଙ୍କା ସିଧାସଳଖ ଗରିବଙ୍କ ବ୍ୟାଙ୍କ ଆକାଉଣ୍ଟକୁ ସ୍ଥାନାନ୍ତର କରାଯାଉଛି। ମହିଳା, ଚାଷୀ ଓ ଛାତ୍ରଛାତ୍ରୀମାନେ ଏବେ ସରକାରଙ୍କ ଠାରୁ ସିଧାସଳଖ ସହାୟତା ପାଇପାରୁଛନ୍ତି।

ଡ୍ରୋନ ପ୍ରଯୁକ୍ତି କିଭଳି ଭାବେ ବୃହତ ବିପ୍ଳବ ଆଣିପାରିଛି ତାହା ଦର୍ଶାଇବାକୁ ଯାଇ ପ୍ରଧାନମନ୍ତ୍ରୀ ଏହି ଅବସରରେ ପିଏମ ସ୍ବନିଧି ଯୋଜନାର ଉଦାହରଣ ଦେଇଥିଲେ। ଏହି ଯୋଜନା ଅଧୀନରେ ପ୍ରଥମ ଥର ଲାଗି, ଦେଶର ଗାଁମାନଙ୍କରେ ଥିବା ସବୁ ସମ୍ପତ୍ତିର ଡିଜିଟାଲ ମ୍ୟାପିଂ କରାଯାଉଛି ଏବଂ ଲୋକମାନଙ୍କୁ ଡିଜିଟାଲ ସମ୍ପତ୍ତି କାର୍ଡ ବିତରଣ କରାଯାଉଛି । ପ୍ରଧାନମନ୍ତ୍ରୀ କହିଥିଲେ ଯେ, ଉତ୍ତମ ପ୍ରଶାସନ ଓ ସହଜ ଜୀବନ ଧାରଣ ପାଇଁ ଆମ ପ୍ରତିବଦ୍ଧତା ଦିଗରେ ଅଗ୍ରସର ହେବାର ଆଉ ଏକ ମାଧ୍ୟମ ହେଉଛି ଡ୍ରୋନ ପ୍ରଯୁକ୍ତିର ପ୍ରୋତ୍ସାହନ। ଡ୍ରୋନ ମାଧ୍ୟମରେ ଆମେ ଏକ ସ୍ମାର୍ଟ ଉପକରଣ ପାଇପାରିଛୁ, ଯାହା ଜନସାଧାରଣଙ୍କ ଜୀବନରେ ଏକ ଗୁରୁତ୍ବପୂର୍ଣ୍ଣ ଅଂଶବିଶେଷ ହେବାକୁ ଯାଉଛି ବୋଲି ସେ କହିଥିଲେ।

ପ୍ରତିରକ୍ଷା, ବିପର୍ଯ୍ୟୟ ପ୍ରଶମନ, କୃଷି, ପର୍ଯ୍ୟଟନ, ଚଳଚ୍ଚିତ୍ର ଓ ମନୋରଞ୍ଜନ କ୍ଷେତ୍ରରେ ପ୍ରଧାନମନ୍ତ୍ରୀ ଡ୍ରୋନ ପ୍ରଯୁକ୍ତିର ଗୁରୁତ୍ବ ଉପରେ ଆଲୋକପାତ କରିଥିଲେ । ସେ କହିଥିଲେ, ଆଗାମୀ ଦିନରେ ନିଶ୍ଚିତ ଭାବେ ଡ୍ରୋନ ପ୍ରଯୁକ୍ତିର ବ୍ୟବହାର ବୃଦ୍ଧି ପାଇବ । ପ୍ରଗତି ସମୀକ୍ଷା ଏବଂ କେଦାରନାଥ ପ୍ରକଳ୍ପର ଉଦାହରଣ ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ଡ୍ରୋନ ପ୍ରଯୁକ୍ତିର ବ୍ୟବହାର ତାଙ୍କ ପାଇଁ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେବାକୁ ସହଜ କରିଛି ।

ପ୍ରଧାନମନ୍ତ୍ରୀ କହିଥିଲେ ଯେ, ଡ୍ରୋନ ପ୍ରଯୁକ୍ତି ଚାଷୀଙ୍କ ସଶକ୍ତିକରଣ ଏବଂ ସେମାନଙ୍କ ଜୀବନକୁ ଆଧୁନିକ କରିବା କ୍ଷେତ୍ରରେ ଏକ ପ୍ରମୁଖ ଭୂମିକା ନିର୍ବାହ କରିବ। ଏବେ ଗାଁ ମାନଙ୍କରେ ସଡ଼କ, ବିଦ୍ୟୁତ ସଂଯୋଗ, ଅପ୍ଟିକାଲ ଫାଇବର ଓ ଡିଜିଟାଲ ପ୍ରଯୁକ୍ତିର ସୁବିଧା ପହଞ୍ଚି ପାରିଛି। ତଥାପି, କେତେକ ସ୍ଥାନରେ ପୁରୁଣା ପଦ୍ଧତିରେ କୃଷି କାର୍ଯ୍ୟ ହେଉଛି। ଏସବୁ ଅନେକ ବାଧା ସୃଷ୍ଟି କରିବା ସହିତ ଫସଲ ଉତ୍ପାଦକତା କମାଉଛି ଏବଂ ଅଧିକ ନଷ୍ଟର କାରଣ ହେଉଛି। ଜମି ଜମା ରେକର୍ଡ ରଖିବା ଠାରୁ ଆରମ୍ଭ କରି ବନ୍ୟା ଓ ମରୁଡ଼ି ସହାୟତା ଭଳି ସଂଖ୍ୟାଧିକ କାର୍ଯ୍ୟ ପାଇଁ ରାଜସ୍ବ ବିଭାଗ ଉପରେ କ୍ରମାଗତ ନିର୍ଭରଶୀଳତା ସମ୍ପର୍କରେ ସେ ଆଲୋଚନା କରିଥିଲେ। ଏସବୁ ସମସ୍ୟାର ସମାଧାନ କରିବା କ୍ଷେତ୍ରରେ ଡ୍ରୋନ ଏକ ପ୍ରଭାବୀ ମାଧ୍ୟମ ଭାବେ ଉଭା ହୋଇଛି । ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ ଯେ, ଦେଶରେ କୃଷି କ୍ଷେତ୍ରରେ ସହାୟତା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରାଯାଇଛି । ଏହାଦ୍ବାରା ପ୍ରଯୁକ୍ତି ଆଉ ଚାଷୀମାନଙ୍କୁ ଭୟଭୀତ କରୁନାହିଁ।

ପ୍ରଧାନମନ୍ତ୍ରୀ କହିଥିଲେ ଯେ ପୂର୍ବରୁ, ପ୍ରଯୁକ୍ତି ଏବଂ ଏହାର ଉଦ୍ଭାବନ କେବଳ ସମାଜର ଆଭିଜାତ୍ୟ ବର୍ଗଙ୍କ ପାଇଁ ଉଦ୍ଦିଷ୍ଟ ଥିଲା। ଆଜି ଆମେ ପ୍ରଥମେ ଜନସାଧାରଣଙ୍କ ନିକଟରେ ପ୍ରଯୁକ୍ତି ପହଞ୍ଚାଉଛୁ। କିଛି ମାସ ପୂର୍ବରୁ, ଡ୍ରୋନ ଉପରେ ଅନେକ ଗୁଡ଼ିଏ କଟକଣା ରହିଥିଲା। ଖୁବ୍‌ କମ ସମୟ ମଧ୍ୟରେ ଆମେ ଅଧିକାଂଶ କଟକଣାକୁ ଉଚ୍ଛେଦ କରିଛୁ। ପିଏଲଆଇ ଭଳି ଯୋଜନା ମାଧ୍ୟମରେ ଏକ ଦୃଢ଼ ଡ୍ରୋନ ଉତ୍ପାଦନ ଇକୋସିଷ୍ଟମ ବିକଶିତ କରିବା ଦିଗରେ ଆମେ ଅଗ୍ରସର ହେଉଛୁ ବୋଲି ସେ କହିଥିଲେ। ଜନସାଧାରଣଙ୍କ ନିକଟରେ ପ୍ରଯୁକ୍ତିର ସୁବିଧା ପହଞ୍ଚି ପାରିଲେ, ଏହାକୁ ଉପଯୋଗ କରିବାର ସମ୍ଭାବନା ମଧ୍ୟ ବୃଦ୍ଧି ପାଇଥାଏ।

Categories
ବିଶେଷ ଖବର

ଆଜି ସମଗ୍ର ବିଶ୍ୱ ବୁଝୁଛି ଯେ ଭାରତର ଅର୍ଥ ‘ବ୍ୟବସାୟ’: ପ୍ରଧାନମନ୍ତ୍ରୀ

ହାଇଦ୍ରାବାଦ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଇଏସବି ହାଇଦ୍ରାବାଦର ୨୦ବର୍ଷ ପୂର୍ତ୍ତି ତଥା ପିଜିପି କ୍ଲାସ ୨୦୨୨ର ସମାବର୍ତ୍ତନ ସମାରୋହରେ ଅଂଶଗ୍ରହଣ କରିଛନ୍ତି।

ପ୍ରାରମ୍ଭରେ, ଏହି ପ୍ରତିଷ୍ଠାନକୁ ବର୍ତ୍ତମାନର ଗରିମାମୟ ସ୍ଥାନରେ ପହଞ୍ଚାଇବା ଲାଗି ଯେଉଁମାନଙ୍କର ମହତ୍ବପୂର୍ଣ୍ଣ ଅବଦାନ ରହିଛି ସେମାନଙ୍କ ଉଦ୍ଦେଶ୍ୟରେ ପ୍ରଧାନମନ୍ତ୍ରୀ  ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ୨୦୦୧ ମସିହାରେ ଏହି ପ୍ରତିଷ୍ଠାନକୁ ଦେଶ ଉଦ୍ଦେଶ୍ୟରେ ଲୋକାର୍ପଣ କରିଥିବା ନେଇ ସେ ସ୍ମୃତିଚାରଣ କରିଥିଲେ। ତା’ପର ଠାରୁ ୫୦ହଜାରରୁ ଅଧିକ ବ୍ୟବସାୟ ପରିଚାଳକ ଆଇଏସବିରୁ ଉତ୍ତୀର୍ଣ୍ଣ ହୋଇ ସାରିଛନ୍ତି। ଆଜି ଏସିଆର  ଏକ ପ୍ରମୁଖ ପେସାଦାର ବ୍ୟବସାସ ପରିଚାଳନା ଶିକ୍ଷାନୁଷ୍ଠାନ ଭାବେ ଆଇଏସବି ପରିଚିତ ହୋଇଛି।

ଆଇଏସବିରୁ ଉତ୍ତୀର୍ଣ୍ଣ ପେସାଦାରମାନେ ଦେଶର ବଡ ବଡ କମ୍ପାନୀଗୁଡିକରେ ନେତୃତ୍ବ ନେବା ସହ ବ୍ୟବସାୟକୁ ଗତି ଦେଇଛନ୍ତି। ଏଠାରେ ବିଦ୍ୟାର୍ଥୀମାନେ ଶହ ଶହ ଷ୍ଟାର୍ଟ ଅପ୍ ସ୍ଥାପନ କରିବା ସହିତ ୟୁନିକର୍ଣ୍ଣ ସୃଷ୍ଟିରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। “ଏହା ଆଇଏସପିର ସଫଳତା ଏବଂ ସମଗ୍ର ଦେଶ ପାଇଁ ଗର୍ବ ଓ ଗୌରବ” ବୋଲି ସେ କହିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ଭାରତ ଆଜି ଜି-୨୦ ଦେଶମାନଙ୍କ ମଧ୍ୟରେ ସବୁଠାରୁ ଦ୍ରୁତ ଆର୍ଥିକ ଅଭିବୃଦ୍ଧି ସମ୍ପନ୍ନ ରାଷ୍ଟ୍ର ମାନ୍ୟତା ପାଇଛି। ସ୍ମାର୍ଟଫୋନ ଡାଟା ବ୍ୟବହାରକାରୀଙ୍କ ମଧ୍ୟରେ ଭାରତର ସ୍ଥାନ ପ୍ରଥମ। ଆମେ ଯଦି ଇଣ୍ଟରନେଟ ବ୍ୟବହାରକାରୀଙ୍କ ସଂଖ୍ୟା ଦେଖିବା, ତେବେ ସେଥିରେ ଭାରତ ଦ୍ୱିତୀୟ ସ୍ଥାନରେ ରହିଛି। ବୈଶ୍ୱିକ ପାଇକାରୀ ସୂଚୀରେ ମଧ୍ୟ ଭାରତ ଦ୍ୱିତୀୟ ସ୍ଥାନରେ ରହିଛି। ବିଶ୍ୱର ତୃତୀୟ ବୃହତ୍ତମ ଷ୍ଟାର୍ଟଅପ୍ ଇକୋସିଷ୍ଟମ ଭାରତରେ ରହିଛି। ବିଶ୍ୱର ତୃତୀୟ ବୃହତମ ଖାଉଟି ବଜାର ମଧ୍ୟ ଭାରତରେ  ରହିଛି। ଭାରତ ଆଜି ଅଭିବୃଦ୍ଧିର କେନ୍ଦ୍ରସ୍ଥଳୀ ହେବାକୁ ଯାଉଛି। ଗତବର୍ଷ ସର୍ବାଧିକ ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ ଭାରତରେ ହିଁ ହୋଇଥିଲା। ଆଜି ଭାରତର ଅର୍ଥ ‘ବ୍ୟବସାୟ’ – ଏକଥା ସାରା ବିଶ୍ୱ  ବୁଝିବା ଆରମ୍ଭ କରିଛି।

ପ୍ରଧାନମନ୍ତ୍ରୀ କହିଥିଲେ ଯେ ଆଜି ଅନେକ ସମୟରେ ଭାରତୀୟ ସମାଧାନ ସୂତ୍ର ବିଶ୍ୱରେ ତ୍ୱରାନ୍ୱିତ ହେଉଛି। ତେଣୁ “ଆଜିର ଏହି ଗୁରୁତ୍ୱପୂର୍ଣ୍ଣ ଦିବସରେ ମୁଁ ଚାହୁଁଛି ଯେ ଆପଣମାନେ ନିଜର ବ୍ୟକ୍ତିଗତ ଲକ୍ଷ୍ୟକୁ ଦେଶର ଲକ୍ଷ୍ୟ ସହ ଯୋଡ଼ନ୍ତୁ’’ ସେ କହିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ଦେଶରେ ସଂସ୍କାରର ଆବଶ୍ୟକତା ସବୁବେଳେ ଅନୁଭୂତ ହେଉଥିଲେ ମଧ୍ୟ ଏଥିପାଇଁ ରାଜନୀତିକ ଇଚ୍ଛାଶକ୍ତିର ଅଭାବ ରହିଥିଲା । ଗତ ତିନି ଦଶନ୍ଧି ଧରି ନିରବଚ୍ଛିନ୍ନ ରାଜନୈତିକ ଅସ୍ଥିରତା କାରଣରୁ ଦେଶ ବହୁଦିନ ଧରି ରାଜନୈତିକ ଇଚ୍ଛାଶକ୍ତିର ଅଭାବ ଦେଖି ଆସିଛି ଏହି କାରଣରୁ ଦେଶ ସଂସ୍କାରଠାରୁ ଦୂରେଇ ରହିବା ସହ ବଡ ନିଷ୍ପତ୍ତି ନେଇପାରିନାହିଁ ।

୨୦୧୪ ପରଠାରୁ ଆମ ଦେଶ ରାଜନୈତିକ ଇଚ୍ଛାଶକ୍ତି  ଓ ସଂସ୍କାର ମଧ୍ୟ ଦେଖୁଛି । ସଂସ୍କାର କାର୍ଯ୍ୟକ୍ଷମ ସଂକଳ୍ପ ଓ ଦୃଢ ରାଜନୈତିକ ଇଚ୍ଛାଶକ୍ତି ସହିତ ନିଆଗଲେ ଏହାର ବିପୁଳ ଜନସମର୍ଥନ ମଧ୍ୟ ମିଳିବ ନିଶ୍ଚିତ । ସେ ଜନସାଧାରଣଙ୍କ ମଧ୍ୟରେ ଡିଜିଟାଲ ଦେଣନେଣର ଉଦାହରଣ ଦେଇଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ସ୍ୱାସ୍ଥ୍ୟକ୍ଷେତ୍ରର ଶକ୍ତି ଓ ନମନୀୟତା ବୈଶ୍ୱିକ ମହାମାରୀ କାଳରେ ପ୍ରମାଣିତ ହୋଇସାରିଛି । କୋଭିଡ ଟିକା ନେଇ ଉଦ୍‌ବେଗ ପ୍ରକାଶ ପାଇଥିଲା ଯେ ବିଦେଶୀ ଟିକା ଉପଲବ୍ଧ ହେବ କି ନାହିଁ । ମାତ୍ର ଭାରତ ନିଜସ୍ୱ ଟିକା ବିକଶିତ କଲା । ଅନେକ ଟିକା ଉପଲବ୍ଧ ହେବା ସହ ଦେଶରେ ୧୯୦କୋଟି ଟିକା ପ୍ରଦାନ କରାଯାଇ ସାରିଲାଣି  । ବିଶ୍ୱର ଶହେରୁ ଅଧିକ ଦେଶକୁ ଭାରତ ଟିକା ପଠାଇ ସାରିଛି। ପ୍ରଧାନମନ୍ତ୍ରୀ ଦେଶରେ ସ୍ୱାସ୍ଥ୍ୟ ଶିକ୍ଷାର ସମ୍ପ୍ରସାରଣ ସମ୍ପର୍କରେ ମଧ୍ୟ କହିଥିଲେ ।

ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ ଯେ ସଂସ୍କାର ପ୍ରକ୍ରିୟାରେ ଅମଲାତନ୍ତ୍ରର ବଳିଷ୍ଠ ଅବଦାନ ରହିଛି । ସରକାରୀ ଯୋଜନାର ସଫଳତା ପାଇଁ ପ୍ରଧାନମନ୍ତ୍ରୀ ଜନସାଧାରଣଙ୍କ ସହଯୋଗକୁ ଶ୍ରେୟ ଦେଇଥିଲେ । ଯେତେବେଳେ ଜନସାଧାରଣଙ୍କ ସହଯୋଗ ମିଳେ ସେତେବେଳେ ଉତ୍ତମ ଫଳାଫଳ ସୁନିଶ୍ଚିତ । ବର୍ତ୍ତମାନର ବ୍ୟବସ୍ଥାରେ ସରକାର ସଂସ୍କାର ଆଣୁଛନ୍ତି, ଅମଲାତନ୍ତ୍ର ଦକ୍ଷ ପ୍ରଦର୍ଶନ କରୁଛି ଏବଂ ଜନଭାଗିଦାରୀ ଯୋଗୁ ବ୍ୟାପକ ପରିବର୍ତ୍ତନ ଆସିଛି । ସଂସ୍କାରର ଏହି ପଦ୍ଧତିକୁ ଭଲଭାବେ ଅନୁଧ୍ୟାନ କରି କାର୍ଯ୍ୟ କରିବାକୁ ସେ ଆଇଏସବି ବିଦ୍ୟାର୍ଥୀଙ୍କୁ ପରାମର୍ଶ ଦେଇଥିଲେ ।

୨୦୧୪ ପରେ ଆମର ଖେଳାଳୀମାନଙ୍କ ଆତ୍ମବିଶ୍ୱାସ ଯୋଗୁଁ ଅପୂର୍ବ ସଫଳତା ହାସଲ ହୋଇଛି ବୋଲି କହିଥିଲେ । ଯେତେବେଳେ ପ୍ରକୃତ ପ୍ରତିଭା ଚିହ୍ନଟ ହେବ, ସେତେବେଳେ ଆତ୍ମବିଶ୍ୱାସ ଆସିବ ।   ପ୍ରକୃତ ପ୍ରତିଭା ଚିହ୍ନଟ, ଚୟନରେ ସ୍ବଚ୍ଛତା ଓ ଉନ୍ନତ ତାଲିମ ତଥା ପ୍ରତିଯୋଗିତା ଭିତ୍ତିଭୂମି ମଧ୍ୟ ଆବଶ୍ୟକ ବୋଲି ସେ କହିଥିଲେ । ଖେଲୋ ଇଣ୍ଡିଆ ଓ ଟିଓପିଏସ ଭଳି ଯୋଜନା ଯୋଗୁଁ ଯେଉଁ ଅବସ୍ଥାନ୍ତର ‌କ୍ରୀଡା କ୍ଷେତ୍ରରେ ଆସିଛି ଯାହା ସମସ୍ତଙ୍କ ଆଖିଆଗରେ ଅଛି ବୋଲି ସେ କହିଥିଲେ । ସେହିପରି ଆକାଂକ୍ଷୀ ଜିଲ୍ଲା କାର୍ଯ୍ୟକ୍ରମ ସାର୍ବଜନୀନ ନୀତିରେ ଦକ୍ଷତା ଉତ୍ପାଦକତା ଓ ପ୍ରୋତ୍ସାହନ ଆଣିଥିବା ଅନ୍ୟ ଏକ ଉଦାହାରଣ ବୋଲି ସେ କହିଥିଲେ ।

ସେ କହିଥିଲେ ଯେ ବ୍ୟାବସାୟିକ ଦୃଶ୍ୟପଟରେ ପରିବର୍ତ୍ତନ ଘଟି ଆନୁଷ୍ଠାନିକ, ଅଣ ଆନୁଷ୍ଠାନିକ, କ୍ଷୁଦ୍ର ଓ ବୃହତ ବ୍ୟବସାୟ ସେମାନଙ୍କ କାୟା ବିସ୍ତାର କରି କୋଟି କୋଟି ଲୋକଙ୍କୁ କର୍ମନିଯୁକ୍ତି ଦେଉଛନ୍ତି । ଛୋଟ ବ୍ୟବସାୟଗୁଡିକର ଅଭିବୃଦ୍ଧି ନିମନ୍ତେ ଅଧିକ ସୁଯୋଗ ଦେବା ପାଇଁ ସେ ଗୁରୁତ୍ୱାରୋପ କରିଥିଲେ । ନୂତନ ସ୍ଥାନୀୟ ଓ ବୈଶ୍ୱିକ ବଜାର ସହ  ସେମାନଙ୍କୁ ଯୋଡିବା ନେଇ ସାହାଯ୍ୟ କରିବାକୁ ସୋ କହିଥିଲେ । ସେମାନଙ୍କ ଅପୂର୍ବ ଦକ୍ଷତା ଥିବା ଦର୍ଶାଇ ଭବିଷ୍ୟତରେ ଭାରତକୁ ପ୍ରସ୍ତୁତ କରିବାକୁ ଆମକୁ ଦେଶର ଆତ୍ମ ନିର୍ଭରଶୀଳ ହେବା ସୁନିଶ୍ଚିତ କରିବାକୁ ପଡିବ ବୋଲି ପ୍ରଧାନମନ୍ତ୍ରୀ କହିଥିଲେ । ଆଇଏସବି ଭଳି ପ୍ରତିଷ୍ଠାନର ବିଦ୍ୟାର୍ଥୀମାନଙ୍କ ବିରାଟ ଭୂମିକା ରହିଥିବା ସେ ଦେଖୁଥିବାର ପ୍ରକାଶ କରିଥିଲେ । “ଆପଣ ସମସ୍ତ ବୃତ୍ତିଗତ ବ୍ୟବସାୟିକ ବିଶେଷଜ୍ଞମାନଙ୍କ ଏ ଦିଗରେ ବଡ ଭୂମିକା ରହିଛି । ଏହା ଆପଣ ଓ ଦେଶ ପାଇଁ ସେବାର ଏକ ମହାନ୍ ଦୃଷ୍ଟାନ୍ତ ହେବ” ବୋଲି କହି ସେ ଅଭିଭାଷଣ ସମାପ୍ତ କରିଥିଲେ ।

Categories
ଜାତୀୟ ଖବର ବିଶେଷ ଖବର

ତେଲଙ୍ଗାନାରେ ଆସିବ ବିଜେପି ସରକାର, ନିଜ ଅଭିଭାଷଣରେ ଏପରି ଦାବୀ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି

ହାଇଦ୍ରାବାଦ:  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓଙ୍କ ଉପରେ ବର୍ଷିଛନ୍ତି। ସେ କହିଛନ୍ତି ଯେ ଆସନ୍ତା ବିଧାନସଭା ନିର୍ବାଚନରେ ତେଲଙ୍ଗାନାରେ ଭାରତୀୟ ଜନତା ପାର୍ଟି ସରକାର ଗଠନ କରିବ। ଇଣ୍ଡିଆନ୍ ସ୍କୁଲ୍ ଅଫ୍ ବିଜିନେସ୍ (ଆଇଏସବି) ର 20 ତମ ବାର୍ଷିକ କାର୍ଯ୍ୟରେ ଯୋଗଦେବାକୁ ଏଠାରେ ଉପସ୍ଥିତ ଥିବା ଶ୍ରୀ ମୋଦୀଙ୍କୁ ବେଗମପେଟ୍ ବିମାନବନ୍ଦରରେ ସ୍ବାଗତ କରାଯାଇଥିଲା। ଏହି ସମୟରେ ରାଜ୍ୟ ବିଜେପି ନେତା ତଥା କର୍ମୀଙ୍କୁ ସମ୍ବୋଧିତ କରିବାବେଳେ ମୋଦୀ କହିଛନ୍ତି ଯେ ବର୍ତ୍ତମାନ ରାଜ୍ୟରେ ବିଜେପି ତରଙ୍ଗ ଦେଖାଯାଉଛି।

ସେ କହିଛନ୍ତି ଯେ ରାଜ୍ୟବାସୀ ତାଙ୍କୁ ସମ୍ମାନ କରନ୍ତି ଏବଂ ତାଙ୍କର ପ୍ରେମ ଏବଂ ସମର୍ଥନ ହେଉଛି ତାଙ୍କର ବଡ ଶକ୍ତି। ସେ ରାଜ୍ୟର ଯୁବକମାନଙ୍କ ସହିତ ରାଜ୍ୟର ବିକାଶ ପାଇଁ ଲଢେଇ କରିବାକୁ ପ୍ରସ୍ତୁତ ଅଛନ୍ତି। ପାରିବାରିକ ରାଜନୀତିକୁ ସମାଲୋଚନା କରି ମୋଦୀ କହିଛନ୍ତି ଯେ ଏହା ଗଣତନ୍ତ୍ରର ସବୁଠାରୁ ବଡ ଶତ୍ରୁ। ସେ କହିଛନ୍ତି ଯେ ଯେତେବେଳେ ବିକାଶ ଆରମ୍ଭ ହୁଏ, ସେତେବେଳେ ପାରିବାରିକତାର ରାଜନୀତି ଶେଷ ହୁଏ।

ଦକ୍ଷିଣ ରାଜ୍ୟ ତେଲେଙ୍ଗାନାରେ ‘ବିକାଶ’ ଚାହୁଁଛି ବିଜେପି। ତେଲେଙ୍ଗାନା ମୁଖ୍ୟମନ୍ତ୍ରୀଙ୍କୁ ତୀବ୍ର ସମାଲୋଚନା କରିବା ସହ ସେ କହିଛନ୍ତି ଯେ ‘ପାରିବାରିକ ରାଜନୀତି ଯେତେବେଳେ ସରକାରକୁ ଆସେ ସେତେବେଳେ ଦଳ କେବଳ ନିଜ ବିକାଶ ବିଷୟରେ ଚିନ୍ତା କରେ। ଏହି ଦଳ ଗରିବ ଲୋକଙ୍କ ବିଷୟରେ ଚିନ୍ତା କରନ୍ତି ନାହିଁ। ସେ କହିଛନ୍ତି ଯେ ପାରିବାରିକ ଦଳମାନେ ନିଜକୁ କ୍ଷମତାରେ ରଖିବା ଏବଂ ଲୁଟିବା ଉପରେ ଧ୍ୟାନ ଦିଅନ୍ତି।

“ଏହି ଲୋକମାନଙ୍କର ବିକାଶ ପ୍ରତି ଆଗ୍ରହ ନାହିଁ। ତେଲେଙ୍ଗାନାକୁ ‘ଟେକ୍ନୋଲୋଜି କେନ୍ଦ୍ର’ ଭାବରେ ବିକାଶ କରିବାକୁ ବିଜେପି ଚାହୁଁଛି। ସେ କହିଛନ୍ତି ଯେ ଆମେ ତେଲେଙ୍ଗାନାକୁ ଏକ ଉଚ୍ଚ ସ୍ତରକୁ ନେବାକୁ ଚାହୁଁଛୁ। ସେ କହିଛନ୍ତି, ‘ବର୍ତ୍ତମାନ ପରିବାରବାଦ ସରକାର ଗରିବଙ୍କ ବିଷୟରେ ଚିନ୍ତା କରନ୍ତି ନାହିଁ। ତେଲେଙ୍ଗାନାର ଲୋକମାନେ ଦେଖୁଛନ୍ତି ଯଦି ଗୋଟିଏ ପରିବାର କ୍ଷମତାରେ ରହେ ତେବେ କେତେ ଦୁର୍ନୀତିଗ୍ରସ୍ତ ହୋଇପାରେ।

ସେ କହିଛନ୍ତି, ‘ତେଲେଙ୍ଗାନା ଆନ୍ଦୋଳନ ବଳିଦାନରେ ପରିପୂର୍ଣ୍ଣ ଥିଲା। ହେଲେ ଏହି ବଳିଦାନ ଦିଆଯାଇନଥିଲା ଯେ, ଗୋଟିଏ ପରିବାର ତେଲେଙ୍ଗାନାର ସ୍ୱପ୍ନକୁ ଚୂର୍ଣ୍ଣ କରି ରଖନ୍ତି। ପାରିବାରିକତା ଭାରତର ଏକମାତ୍ର ରାଜନୈତିକ ସମସ୍ୟା ନୁହେଁ, ପାରିବାରିକତା ଏବଂ ଏଭଳି ଏକ ଦଳ ଯିଏ ଗଣତନ୍ତ୍ର ଏବଂ ଦେଶ ଯୁବକମାନଙ୍କର ସବୁଠାରୁ ବଡ଼ ଶତ୍ରୁ ।

ସେ କହିଛନ୍ତି ଯେ ତେଲେଙ୍ଗାନାରେ ବିଜେପି କ୍ଷମତାକୁ ଆସିବ। ତେଲେଙ୍ଗାନା ଗଠନ ପାଇଁ ହଜାର ହଜାର ଲୋକଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି ସେ କହିଛନ୍ତି ଯେ କେବଳ ଗୋଟିଏ ପରିବାର ପାଇଁ ରାଜ୍ୟ ତିଆରି କରାଯାଇ ନାହିଁ। ସେ କହିଛନ୍ତି ଯେ ଦଳ ଏହାର ମୌଳିକ ମନ୍ତ୍ର ‘ସାବକା ସାଥ, ସାବକା ବିକାଶ’ ଅନୁସରଣ କରୁଛି। ଗତ କିଛି ମାସ ମଧ୍ୟରେ ଏହା ଦ୍ୱିତୀୟ ଥର ପାଇଁ ମୋଦୀ ରାଜ୍ୟ ଗସ୍ତ କରିଛନ୍ତି। ହେଲେ ତେଲଙ୍ଗାନା ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓ ପ୍ରଧାନମନ୍ତ୍ରୀଙ୍କୁ ଭେଟିନାହାଁନ୍ତି।

Categories
ଅନ୍ତରାଷ୍ଟ୍ରୀୟ ଆଜିର ଖବର

ଆଜି ରାତିରେ ଆମେରିକା ରାଷ୍ଟ୍ରପତିଙ୍କ ସହିତ କଥା ହେବେ ପ୍ରଧାନମନ୍ତ୍ରୀ ମୋଦୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ରାତିରେ ଆମେରିକାର ରାଷ୍ଟ୍ରପତି ଜୋ ବିଡେନଙ୍କ ସହ ଏକ ଭର୍ଚୁଆଲ ବୈଠକ କରିବେ। ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ ଦୁଇ ନେତା ଚାଲିଥିବା ଦ୍ୱିପାକ୍ଷିକ ସହଯୋଗର ସମୀକ୍ଷା କରିବେ।

ଏଥିସହିତ ଦକ୍ଷିଣ ଏସିଆ, ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳ ତଥା ପାରସ୍ପରିକ ସ୍ୱାର୍ଥର ବିଶ୍ବ ସ୍ତରୀୟ ପ୍ରସଙ୍ଗ ଉପରେ ମତ ବିନିମୟ କରିବେ। ଦ୍ୱିପାକ୍ଷିକ ବିସ୍ତୃତ ଗ୍ଲୋବାଲ୍ ଷ୍ଟ୍ରାଟେଜିକ୍ ଭାଗିଦାରୀକୁ ଆହୁରି ଦୃଢ କରିବା ଲକ୍ଷ୍ୟରେ ଭର୍ଚୁଆଲ୍ ମିଟିଂ ଉଭୟ ପକ୍ଷକୁ ସେମାନଙ୍କର ନିୟମିତ ଏବଂ ଉଚ୍ଚ ସ୍ତରୀୟ ଯୋଗଦାନ ଜାରି ରଖିବାକୁ ସକ୍ଷମ କରିବ।

Categories
ବିଶେଷ ଖବର ରାଜ୍ୟ ଖବର

ପ୍ରଧାନମନ୍ତ୍ରୀଙ୍କୁ ଭେଟିଲେ ସାଂସଦ ଅପରାଜିତା ଷଡଙ୍ଗୀ, ରାଜ୍ୟ ରାଜନୀତିରେ ଜୋରଦାର ଚର୍ଚ୍ଚା

ଭୁବନେଶ୍ବର: ଗତକାଲି ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଛନ୍ତି। ସେ ଓଡିଶାର ବିକାଶ ପ୍ରସଂଗରେ ଆଲୋଚନା କରିଛନ୍ତି। ଏଥିସହିତ ବିଭିନ୍ନ ପ୍ରସଂଗରେ ସେ ପ୍ରଧାନମନ୍ତ୍ରୀଙ୍କ ଉପଦେଶକୁ ମଧ୍ୟ ଗ୍ରହଣ କରିଛନ୍ତି। ପୂର୍ବରୁ ସେ ପ୍ରଧାନମନ୍ତ୍ରୀଙ୍କୁ ଭେଟି ନିଜର ରିପୋର୍ଟ କାର୍ଡ ପ୍ରଦାନ କରିଥିଲେ।

ତେବେ ଏହାକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଜୋର ଧରିଛି। କାରଣ ବର୍ତ୍ତମାନ ରାଜ୍ୟ ବିଜେପିର ଦିଲ୍ଲୀ ଗସ୍ତ ରାଜନୀତି ଚାଲିଛି। ଦିନେ ରାଜ୍ୟ ନେତୃବର୍ଗ ରାଷ୍ଟ୍ରୀୟ ସଭାପତିଙ୍କୁ ସାକ୍ଷାତ କରିଥିବା ବେଳେ, ଆଉଦିନେ ବିଧାୟକମାନେ କେନ୍ଦ୍ରମନ୍ତ୍ରୀଙ୍କୁ ସାକ୍ଷାତ କରିଛନ୍ତି। ଏପରି ପରିସ୍ଥିତିରେ ଅପରାଜିତା ପ୍ରଧାନମନ୍ତ୍ରୀଙ୍କୁ ଭେଟିବା ବିଜେପି ରାଜନୀତିରେ ଏକ ନୂଆ ମୋଡ ସୃଷ୍ଟି ହୋଇଛି।

ତେବେ ପ୍ରଧାନମନ୍ତ୍ରୀଙ୍କ ସହିତ ଅପରାଜିତା ରାଜ୍ୟ ବିଜେପି ରାଜନୀତି ଉପରେ କଥା ହୋଇଛନ୍ତି କି ନାହିଁ ସେ ସଂପର୍କରେ କିଛି କହି ନାହାଁନ୍ତି। ହେଲେ ବର୍ତ୍ତମାନ ପଞ୍ଚାୟତ ଓ ପୌର ନିର୍ବାଚନରେ ବିଜେପିର ପ୍ରଦର୍ଶନ ଉପରେ ନିଶ୍ଚିତ ଆଲୋଚନା କରିଥିବେ। ଏପରିକି ରାଜ୍ୟ ନେତୃତ୍ବ କିପରି ଦୃବଳ ଥିଲା ତାହା ମଧ୍ୟ ଅବଗତ କରାଇଥିବେ।

ନିକଟରେ ବିଜେପି ସଭାପତି ସମୀର ମହାନ୍ତିଙ୍କ ନେତୃତ୍ବରେ ଏକ ଦଳ ନୂଆଦିଲ୍ଲୀ ଗସ୍ତ କରି ରାଷ୍ଟ୍ରୀୟ ସଭାପତିଙ୍କୁ ସାକ୍ଷାତ କରିଛନ୍ତି। ଏଥିରେ ସେମାନେ କଣ କଥା ହେଲେ ତାହା କେହି କହି ନ ଥିଲେ ମଧ୍ୟ ଅପରାଜିତାଙ୍କ ବିରୋଧରେ ସ୍ବର ଉତ୍ତୋଳନ କରିଛନ୍ତି ବୋଲି କୁହାଯାଉଛି।

ଏହି ଦଳ ପରବର୍ତ୍ତି ସମୟରେ ମନ୍ତ୍ରୀ ଅଶ୍ବନୀ ବୈଷ୍ଣବ, ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ମନ୍ତ୍ରୀ ବିଶେଶ୍ବର ଟୁଡୁଙ୍କୁ ମଧ୍ୟ ସାକ୍ଷାତ କରିଥିଲେ। ସେମାନେ ଅପରାଜିତାଙ୍କ ବିରୋଧରେ ଏକ ଅନ୍ଦୋଳନ କରୁଛନ୍ତି ବୋଲି ସାଧାରଣରେ ଚର୍ଚ୍ଚା ହୋଇଛି।

ଏହାପରେ ପୁଣି ବିଧାୟକ ଦଳ ଏକାଠି ହୋଇ କେନ୍ଦ୍ରୀୟ ମନ୍ତ୍ରୀଙ୍କୁ ସାକ୍ଷାତ କରିବା ଏହି ଚର୍ଚ୍ଚାକୁ ଆହୁରି ଖୋରାକ ଯୋଗାଇଲା। ସେମାନେ ମଧ୍ୟ ସିଧା ଅପରାଜିତାଙ୍କ ବିରୋଧରେ କହିବାକୁ ପଛେଇଲେ ନାହିଁ। ଅପରାଜିତାଙ୍କ କହିଥିବା ରାଜ୍ୟ ନେତୃତ୍ବ ଦୁର୍ବଳ ବୋଲି କଥାକୁ ସେମାନେ ବିରୋଧ କରିଥିଲେ।

ଏ ସବୁ ଘଣ୍ଟାଚକଟା ଭିତରେ ଅପରାଜିତା ସିଧା ପ୍ରଧାନମନ୍ତ୍ରୀଙ୍କୁ ଭେଟି ଆଲୋଚନା କରିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏପରିକି ଅନେକ ବିଜେପି ନେତା ଏହି ଭେଟଘାଟକୁ ନେଇ ଛାନିଆ ମଧ୍ୟ ହୋଇପଡିଛନ୍ତି।

Categories
ବିଶେଷ ଖବର

ୟୁକ୍ରେନ ଘଟଣାରେ ଶାନ୍ତି ପ୍ରୟାସ ପାଇଁ ପ୍ରଧାନମନ୍ତ୍ରୀ ମୋଦୀଙ୍କୁ ପ୍ରଶଂସା କଲେ ଆମେରିକା ସାଂସଦ

ନୂଆଦିଲ୍ଲୀ: ୟୁକ୍ରେନ ଘଟଣାରେ ଆମେରିକା ଏବଂ ଋଷ ମଧ୍ୟରେ ଶାନ୍ତି ସ୍ଥାପନ ପାଇଁ ଉଦ୍ୟମ କରିଥିବାରୁ ଆମେରିକାର ଜଣେ ବରିଷ୍ଠ ସାଂସଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରିଛନ୍ତି। ଏଥିସହ ତାଙ୍କ ଉଦ୍ୟମ ଯୋଗୁଁ ଏହି ଅଞ୍ଚଳରେ ଶାନ୍ତି ଫେରାଇ ଆଣିବାରେ ସହାୟକ ହେବ ବୋଲି ଆଶା ପ୍ରକଟ କରିଛନ୍ତି। ମୋଦି ଶୁକ୍ରବାର ଦିନ ଋଷର ବୈଦେଶିକ ମନ୍ତ୍ରୀ ସର୍ଗେ ଲାଭ୍ରୋଭଙ୍କୁ କହିଥିଲେ ଯେ, ୟୁକ୍ରେନ ସଙ୍କଟର ସମାଧାନ ପାଇଁ ଶାନ୍ତି ପ୍ରୟାସରେ ଭାରତ ଯେକୌଣସି ଉପାୟରେ ସହଯୋଗ କରିବାକୁ ପ୍ରସ୍ତୁତ ଏବଂ ହିଂସାକୁ ତୁରନ୍ତ ବନ୍ଦ କରିବାକୁ ସେ ଆହ୍ଵାନ ଦେଇଥିଲେ।

ଆମେରିକାର କଂଗ୍ରେସ ସଦସ୍ୟ କାରୋଲିନ ମାଲୋନି ଏକ ସାକ୍ଷାତକାରରେ କହିଛନ୍ତି ଯେ, ମୁଁ ଭାବୁଛି ବର୍ତ୍ତମାନ ସେ (ମୋଦୀ) ୟୁକ୍ରେନ ଘଟଣାରେ ଋଷ ଏବଂ ଆମେରିକା ମଧ୍ୟରେ ଶାନ୍ତି ସ୍ଥାପନ କରିବାକୁ ଚେଷ୍ଟା କରୁଛନ୍ତି। ମୁଁ ଭାବୁଛି ଏହା ଅତ୍ୟନ୍ତ ସକରାତ୍ମକ ଉଦ୍ଦେଶ୍ୟ।

ସଦନର ଶକ୍ତିଶାଳୀ ‘ତଦାରଖ କମିଟି’ର ଚେୟାରମ୍ୟାନ୍ ମାଲୋନି (୭୬) ଆମେରିକାର ସଂସଦ (କଂଗ୍ରେସ) ର ଅନ୍ୟତମ ବରିଷ୍ଠ ଡେମୋକ୍ରାଟ୍ ଅଟନ୍ତି। ସେ ୧୯୯୩ ରୁ ଆମେରିକାର ଲୋକସଭାକୁ ନିର୍ବାଚିତ ହୋଇଥିଲେ। ମାଲୋନି ଭାରତ ଏବଂ ଭାରତୀୟ- ଆମେରିକୀୟଙ୍କ ବନ୍ଧୁ। ଦୀପାବଳିର ମହୋତ୍ସବକୁ ଫେଡେରାଲ୍ ଛୁଟିଦିନ ଘୋଷଣା କରିବା ଏବଂ ମହାତ୍ମା ଗାନ୍ଧୀଙ୍କୁ ଆମେରିକା ସଂସଦର ସମ୍ମାନଜନକ ସ୍ୱର୍ଣ୍ଣ ପଦକ ଦେବା ପାଇଁ ସେ ଦୁଇଟି ବିଲ୍ ପାସ୍ କରିବାକୁ ଚେଷ୍ଟା କରୁଛନ୍ତି।

ରାଷ୍ଟ୍ରପତି ଜୋ ବାଇଡେନ ଶେଷରେ ତାଙ୍କର ଦୁଇଟି ବିଲରେ ଦସ୍ତଖତ କରିବେ ବୋଲି ମାଲୋନି ବିଶ୍ୱାସ ପ୍ରକାଶ କରିଛନ୍ତି। ସେ କହିଛନ୍ତି ଯେ, ଗୁରୁତ୍ୱପୂର୍ଣ୍ଣ କଥା ହେଉଛି ପ୍ରଧାନମନ୍ତ୍ରୀ ମୋଦୀ ଶାନ୍ତି ପାଇଁ ଉଦ୍ୟମ କରୁଛନ୍ତି। ସେ କହିଥିଲେ ଯେ, ଗୋଟିଏ କଥା ସତ ଯେ ଯଦି ଆପଣ ଚେଷ୍ଟା ନକରନ୍ତି, ତେବେ ଆପଣ କଦାପି ସଫଳ ହେବେ ନାହିଁ। ଆପଣଙ୍କୁ ଚେଷ୍ଟା ଜାରି ରଖିବାକୁ ପଡିବ। ମୁଁ ଆଶା କରୁଛି ଯେ ୟୁକ୍ରେନ, ଋଷ ଏବଂ ବିଶ୍ଵ ମଧ୍ୟରେ ଶାନ୍ତି ପାଇଁ କାର୍ଯ୍ୟ କରୁଥିବା ବ୍ୟକ୍ତିଙ୍କ ଉଦ୍ୟମ ସହାୟକ ହେବ।

ନ୍ୟୁୟର୍କର ସାଂସଦ ମାଲୋନି କହିଛନ୍ତି ଯେ, ଏହା ଅତ୍ୟନ୍ତ ବିପଜ୍ଜନକ ସମୟ କାରଣ ଆମେ ସମସ୍ତେ ତୃତୀୟ ବିଶ୍ୱଯୁଦ୍ଧର ଭାର ବହନ କରିପାରିବୁ ନାହିଁ। ଆମେ ପରମାଣୁ ଶକ୍ତି ସମ୍ପନ୍ନ ଅଟେ। ଆମେ ଏହି ବିପଦକୁ ନେଇ ପାରିବୁ ନାହିଁ। ଆମକୁ ଏକ ଆପୋଷ ବୁଝାମଣା କରିବାକୁ ପଡିବ। ବର୍ତ୍ତମାନ ଲୋକମାନେ ଅତ୍ୟଧିକ ଯନ୍ତ୍ରଣା ଭୋଗୁଛନ୍ତି। ମୁଁ ରାଷ୍ଟ୍ରପତି ବାଇଡେନଙ୍କ ପାଇଁ ଗର୍ବିତ।

Categories
ବିଶେଷ ଖବର

ପଞ୍ଚମ ବିମଷ୍ଟେକ ଶିଖର ସମ୍ମିଳନୀରେ ଭାଗ ନେଲେ ପ୍ରଧାନମନ୍ତ୍ରୀ ମୋଦୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ପଞ୍ଚମ ବିମଷ୍ଟେକ (ବଙ୍ଗୋପସାଗର ବହୁକ୍ଷେତ୍ରୀୟ ବୈଷୟିକ ଏବଂ ଆର୍ଥିକ ସହଯୋଗ ପଦକ୍ଷେପ) ସମ୍ମିଳନୀରେ ଆଭାସି ମାଧ୍ୟମରେ ଅଂଶ ଗ୍ରହଣ କରିଛନ୍ତି। ବର୍ତ୍ତମାନ ଶ୍ରୀଲଙ୍କା ବିମଷ୍ଟେକର ଅଧ୍ୟକ୍ଷ ରହିଛି।

ପଞ୍ଚମ ବିମଷ୍ଟେକ ଶିଖର ସମ୍ମିଳନୀ ଆରମ୍ଭ ପୂର୍ବରୁ ବରିଷ୍ଠ ଅଧିକାରୀ ଓ ବିଦେଶ ମନ୍ତ୍ରୀସ୍ତରୀୟ ବୈଠକ ଗତ ୨୮ ଓ ୨୯ ତାରିଖ ଦୁଇ ଦିନ ଧରି ହାଇବ୍ରିଡ ମୋଡରେ କଲମ୍ବୋଠାରେ ଅନୁଷ୍ଠିତ ହୋଇଥିଲା। ଶିଖର ସମ୍ମିଳନୀର ବାର୍ତ୍ତାଥିଲା “ଏକ ନମନୀୟ ଅଞ୍ଚଳ ଅଭିମୁଖେ, ସମୃଦ୍ଧ ଅର୍ଥନୀତି ଓ ସୁସ୍ଥ ଜନସାଧାରଣ”। ସଦସ୍ୟ ଦେଶଗୁଡିକ ମଧ୍ୟରେ ସହଯୋଗ ବୃଦ୍ଧି ସହ କୋଭିଡ-୧୯ ବୈଶ୍ୱିକ ମହାମାରୀ କାଳରେ ବିଭିନ୍ନ ଆର୍ଥିକ ଓ ବିକାଶମୂଳକ କାର୍ଯ୍ୟର ମିଳିମିଶି କାର୍ଯ୍ୟକ୍ରମ। ଶିଖର ସମ୍ମିଳନୀର ମୁଖ୍ୟ ନିର୍ଯ୍ୟାସ ହେଉଛି ବିମଷ୍ଟେକ ସନନ୍ଦର ରାଜିନାମା ଯେଉଁଥିରେ ବଙ୍ଗୋପସାଗର ଉପରେ ନିର୍ଭରଶୀଳ ତଟବର୍ତ୍ତୀ ଦେଶଗୁଡିକର ସହଯୋଗ ଭିତ୍ତିରେ କାର୍ଯ୍ୟକ୍ରମ ଗ୍ରହଣ।

ଶିଖର ବୈଠକ ବିମଷ୍ଟେକ ସଦସ୍ୟ ରାଷ୍ଟ୍ରଗୁଡିକ ମଧ୍ୟରେ ପାରସ୍ପାରିକ ସହଯୋଗ ନେଇ ଉଲ୍ଲେଖନୀୟ ପ୍ରଗତି ଘଟିଛି। ପରିବହନ ସଂଯୋଗ ପାଇଁ ଦେଶମାନଙ୍କ ମାଷ୍ଟର ପ୍ଲାନ ଓ ଭବିଷ୍ୟତ ମାର୍ଗଦର୍ଶିକା ନେଇ ମଧ୍ୟ ଆଲୋଚନା ହୋଇଛି।

ଏଥିରେ ପ୍ରଧାନମନ୍ତ୍ରୀ ବିମଷ୍ଟେକ କ୍ରମବର୍ଦ୍ଧିଷ୍ଣୁ ଆଞ୍ଚଳିକ ଯୋଗାଯୋଗ ଓ ସୁରକ୍ଷା ବ୍ୟତୀତ ଅନେକ ପ୍ରସ୍ତାବ ମଧ୍ୟ ଦେଇଛନ୍ତି। ପ୍ରଧାନମନ୍ତ୍ରୀ ସହଯୋଗୀ ନେତୃବୃନ୍ଦଙ୍କୁ ବଙ୍ଗୋପସାଗରକୁ ସଂଯୋଗର ସେତୁ, ସମୃଦ୍ଧି ଓ ସୁରକ୍ଷା ପ୍ରାଚୀରରେ ରୂପାନ୍ତରିତ କରିବାକୁ ଆହ୍ୱାନ ଦେଇଛନ୍ତି।

ପ୍ରଧାନମନ୍ତ୍ରୀ ଓ ଅନ୍ୟାନ୍ୟ ନେତୃବୃନ୍ଦଙ୍କ ଉପସ୍ଥିତିରେ ସହଯୋଗ ଉପରେ ଆଧାରିତ ତିନୋଟି ବିମଷ୍ଟେକ ରାଜିନାମା ମଧ୍ୟ ସ୍ୱାକ୍ଷରିତ ହୋଇଛି। ସେଗୁଡିକ ହେଲା – ଫୌଜଦାରୀ ବ୍ୟାପାରରେ ପାରସ୍ପରିକ ଆଇନ ସହାୟତା ନେଇ ବିମଷ୍ଟେକ ଅଧିବେଶନ, କୂଟନୀତିକ ତାଲିମ ନେଇ ପାରସ୍ପରିକ ସହଯୋଗ ସମ୍ପର୍କିତ ବିମଷ୍ଟେକ ବୁଝାମଣାପତ୍ର ଓ ବିମଷ୍ଟେକ ବୈଷୟିକ ଜ୍ଞାନ ବିନିମୟ ସଂକ୍ରାନ୍ତ ବୁଝାମଣା ପତ୍ର।

Categories
ବିଶେଷ ଖବର ସଂସ୍କୃତି

ଅଷ୍ଟ୍ରେଲିଆରୁ ଭାରତ ଆସିଲା ୨୯ ଟି ପ୍ରାଚୀନ ମୂର୍ତ୍ତି: ଯାଞ୍ଚ କରୁଛନ୍ତି ପ୍ରଧାନମନ୍ତ୍ରୀ, ଦେଖନ୍ତୁ ଫଟୋ

ନୂଆଦିଲ୍ଲୀ: ଭଗବାନ ଶିବ, ପ୍ରଭୁ ବିଷ୍ଣୁ ଏବଂ ଜୈନ ପରମ୍ପରା ଇତ୍ୟାଦି ସହ ଜଡିତ ୨୯ ଟି ପ୍ରାଚୀନତା ଭାରତକୁ ଫେରାଇ ଦେଇଛି। ଯାହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯାଞ୍ଚ କରିଛନ୍ତି। ଏହି ପ୍ରାଚୀନତାଗୁଡ଼ିକ ବିଭିନ୍ନ ସମୟ ଅବଧି ସହିତ ଜଡିତ, ଯାହା ମଧ୍ୟରୁ କେତେକ ଖ୍ରୀଷ୍ଟପୂର୍ବ ୯-୧୦ ଶତାବ୍ଦୀରୁ ଆରମ୍ଭ ହୋଇଥିଲା। ସରକାରୀ ସୂତ୍ର ସୋମବାର ଏହି ସୂଚନା ଦେଇଛି।

ସୂତ୍ରରୁ ପ୍ରକାଶ ଯେ ଏକ ଐତିହାସିକ ପଦକ୍ଷେପ ଗ୍ରହଣ କରି ଅଷ୍ଟ୍ରେଲିଆ ୨୯ ଟି ପ୍ରାଚୀନତାକୁ ଭାରତକୁ ଫେରାଇ ଦେଇଛି। ଏହି ପ୍ରାଚୀନତାଗୁଡ଼ିକ ‘ଶିବ ଏବଂ ତାଙ୍କ ଶିଷ୍ୟ’, ‘ଶକ୍ତିର ଉପାସନା’, ‘ଭଗବାନ ବିଷ୍ଣୁ ଏବଂ ତାଙ୍କର ରୂପ’, ଜୈନ ପରମ୍ପରା, ଚିତ୍ର ଏବଂ ଅଳଙ୍କାର ବସ୍ତୁଗୁଡ଼ିକ ମଧ୍ୟରୁ ୬ ଟି ବର୍ଗର ଅଟେ। ଏଥିସହିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଷ୍ଟ୍ରେଲିଆରୁ ଆସିଥିବା ଏହି ପ୍ରାଚୀନତା ଯାଞ୍ଚ କରିଛନ୍ତି।

ସୂତ୍ରରୁ ପ୍ରକାଶ ଯେ, ଏଗୁଡ଼ିକ ମୁଖ୍ଯତଃ ବାଲୁକା ପଥର, ମାର୍ବଲ, କାଂଶ୍ୟ, ପିତ୍ତଳ ଏବଂ କାଗଜରେ ନିର୍ମିତ ଚିତ୍ର ଭଳି ବିଭିନ୍ନ ପ୍ରକାରର ସାମଗ୍ରୀରେ ନିର୍ମିତ ମୂର୍ତ୍ତି ଅଟେ। ଏହି ପ୍ରାଚୀନତା ରାଜସ୍ଥାନ, ଗୁଜୁରାଟ, ମଧ୍ୟପ୍ରଦେଶ, ଉତ୍ତରପ୍ରଦେଶ, ତାମିଲନାଡୁ, ତେଲେଙ୍ଗାନା ଏବଂ ପଶ୍ଚିମବଙ୍ଗର ଅଟେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ତାଙ୍କ ଅଷ୍ଟ୍ରେଲୀୟ ପ୍ରତିପକ୍ଷ ସ୍କଟ ମୋରିସନଙ୍କ ସହ ଅନଲାଇନ୍ ବାର୍ତ୍ତାଳାପ କରିବେ।

Categories
ଆଜିର ଖବର ଜାତୀୟ ଖବର

ମନ୍ତ୍ରୀଙ୍କ ଝିଅ ବାହାଘରରେ ଯୋଗ ଦେଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କର ଜଣେ କ୍ୟାବିନେଟ ମନ୍ତ୍ରୀଙ୍କ ଝିଅ ବାହା ଘରରେ ଯୋଗ ଦେଇଛନ୍ତି। ସାଧାରଣତଃ ପୁଅଝିଅ ବାହାଘରରେ ପ୍ରଧାନମନ୍ତ୍ରୀ ଯୋଗ ଦେବାର ସମ୍ଭବ ହୋଇ ନ ଥାଏ। ହେଲେ ତାଙ୍କର କ୍ୟାବିନେଟ ମନ୍ତ୍ରୀ ଭୂପେନ୍ଦ୍ର ଯାଦବଙ୍କ ଝିଅ ବାହାଘରରେ ଯୋଗ ଦେଇଥିଲେ।

ଭୂପେନ୍ଦ୍ର ବର୍ତ୍ତମାନ ମୋଦି ମନ୍ତ୍ରୀ ମଣ୍ଡଳରେ ଜଙ୍ଗଲ, ପରିବେଷ, ଶ୍ରମ ଓ ନିଯୁକ୍ତି ମନ୍ତ୍ରୀ ଅଛନ୍ତି। ତାଙ୍କର ଝିଅ ଶୋଭାଙ୍କର ଶୁକ୍ରବାରରେ ବାହାଘର ଥିଲା। ସେଥିପାଇଁ ନୂଆଦିଲ୍ଲୀରେ ଏକ ବଡ ଆୟୋଜନ କରାଯାଇଥିଲା। ଏଥିରେ ପ୍ରଧାନମନ୍ତ୍ରୀ ଯୋଗ ଦେଇଥିଲେ। ଏଥିସହିତ ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡା ମଧ୍ୟ ବରକନ୍ୟାଙ୍କୁ ଆର୍ଶିବାଦ ଦେବା ପାଇଁ ଯାଇଥିଲେ।

Categories
ବିଶେଷ ଖବର

ପିଏମ ମୋଦୀଙ୍କ ସୁରକ୍ଷାକୁ ନେଇ କିରଣ ବେଦୀଙ୍କ ପ୍ରଶ୍ନ, ସେଠାରେ ଆକ୍ରମଣ କରିବାର ଯୋଜନା ଥିଲା କି?

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସୁରକ୍ଷାକୁ ନେଇ ଚର୍ଚ୍ଚା ଜୋର ଧରିଛି। ପୂର୍ବତନ ଆଇପିଏସ୍ ଅଧିକାରୀ କିରଣ ବେଦୀ ପଞ୍ଜାବର ବରିଷ୍ଠ ଅଧିକାରୀଙ୍କ ଅନୁପସ୍ଥିତିକୁ ନେଇ ପ୍ରଶ୍ନ ଉଠାଇଛନ୍ତି। ଜାନୁୟାରୀ ୫ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଫିରୋଜପୁର ଗସ୍ତ ସମୟରେ ପଞ୍ଜାବରେ ସୁରକ୍ଷା ଅଭାବ ସମ୍ପର୍କରେ ପୂର୍ବତନ ଆଇପିଏସ ଅଧିକାରୀ କିରଣ ବେଦୀ କହିଛନ୍ତି ଯେ, ସେହି ସମୟରେ ରାଜ୍ୟର ଡିଜିପି, ମୁଖ୍ୟ ସଚିବ, ଗୃହ ସଚିବ ଏବଂ ଡିଏମ ଅନୁପସ୍ଥିତ ଥିଲେ। ରାଜ୍ୟ ଅଧିକାରୀଙ୍କ ଅନୁପସ୍ଥିତିକୁ ନେଇ କିରଣ ବେଦୀ ପ୍ରଶ୍ନ କରିଛନ୍ତି ଯେ, ସେଠାରେ କୌଣସି ଆକ୍ରମଣ ଯୋଜନା ଥିଲା କି? ସେ କହିଛନ୍ତି ଯେ, ବ୍ରିଜ ନିକଟରେ ଅଟକି ରହିବା ଅତ୍ୟନ୍ତ ବିପଜ୍ଜନକ ହୋଇପାରେ। ବ୍ରିଜ୍ ତଳେ ଯେକେହି ବୋମା ଲଗାଇପାରିଥାନ୍ତେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସୁରକ୍ଷା ବିଫଳତାକୁ ନେଇ ପୂର୍ବତନ ଆଇପିଏସ୍ କିରଣ ବେଦୀ କହିଛନ୍ତି ଯେ, ଏହି ବ୍ରିଜ ଉପରେ ପ୍ରଧାନମନ୍ତ୍ରୀ ଅଟକିବା ଅତ୍ୟନ୍ତ ବିପଜ୍ଜନକ ଥିଲା। କାରଣ ବ୍ରିଜଟି ସହଜରେ ବୋମା ଦ୍ୱାରା ଉଡିଯାଇପାରେ। ସେ କହିଛନ୍ତି ଯେ, ସୁରକ୍ଷା ବିଫଳତାର ସବୁଠାରୁ ବଡ କାରଣ ହେଉଛି ଡିଜିପିଙ୍କ ସମେତ ବହୁ ବରିଷ୍ଠ ଅଧିକାରୀଙ୍କ ଅନୁପସ୍ଥିତି। ଏହା ଏକ ଯୋଜନାବଦ୍ଧ ଆକ୍ରମଣର ମାମଲା ହୋଇପାରେ।

Categories
ଆଜିର ଖବର ଜାତୀୟ ଖବର

ଆଜି ବାଜା ବଜାଇଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଭିତରେ ଥିବା ଭିଡିଓ କୁ କ୍ଲିକ କରନ୍ତୁ

ନୂଆଦିଲ୍ଲୀ: ଆଜି ମଣିପୁର ଓ ଅରୁଣାଚଳ ପ୍ରଦେଶ ଗସ୍ତରେ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସେଠାରେ ସେ 22 ଟି ବିଭିନ୍ନ ପ୍ରକଳ୍ପର ଶୁଭ ଉଦଘାଟନ କରିଛନ୍ତି। ଯାହାର ମୁଲ୍ୟ ହେବ ପ୍ରାୟ 4800 କୋଟି ଟଙ୍କା। ତେବେ ମୋଦୀଙ୍କ ଗସ୍ତକୁ ନଜଜରେ ରଖ ମଣିପୁରରେ ତାଙ୍କୁ ସ୍ବାଗତ ସମ୍ବର୍ଦ୍ଧନା ପ୍ରଦାନ କରାଯାଇଥିଲା। ଏହି ସ୍ବାଗତ ସମ୍ବର୍ଦ୍ଧନା ପୁରା ମଣିପୁର ସଂସ୍କୃତି ଓ ନୃତ୍ୟ ମାଧ୍ୟମରେ କରାଯାଇଥିଲା।

ତେବେ ଏ ସବୁ ଦେଖି ପ୍ରଧାନମନ୍ତ୍ରୀ ଖୁସି ହୋଇଯାଇଥିଲେ। ସେଠାରେ ଯନ୍ତ୍ର ସଂଗୀତ ଉପସ୍ଥାପନା କରୁଥିବା କଳାକାରଙ୍କଠାରୁ ବାଦ୍ୟ ଯନ୍ତ୍ର ଆଣି ବଜାଇଥିଲେ। ସମସ୍ତ କଳାକାରଙ୍କ ଏପରି କଳା ନୌପୁଣ୍ୟତାକୁ ସେ ବେଶ୍ ପ୍ରଶଂସା ମଧ୍ୟ କରିଥିଲେ।

Categories
ଆଜିର ଖବର ଜାତୀୟ ଖବର

ପ୍ରଧାନମନ୍ତ୍ରୀଙ୍କ ବିଦେଶ ଗସ୍ତକୁ ତୁରନ୍ତ କରାଗଲା ବାତିଲ, ଜାଣନ୍ତୁ କାରଣ କଣ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁଣି ଥରେ ବିଦେଶ ଗସ୍ତରେ ଯାଇଥାଆନ୍ତେ। ଏଥର ସେ ଜାନୁୟାରୀ 6 ତାରିଖରୁ ୟୁଏଇ ଏବଂ କୁଏତ ଗସ୍ତ କରିଥାଆନ୍ତେ। ଏହି ଗସ୍ତ କାଳରେ ସେ ଅନେକ ବୈଠକ କରି ଦେଶକୁ ପୁଂଜି ବିନିଯୋଗ ଉପରେ ଆଲୋଚନା କରିଥାଆନ୍ତେ।

ହେଲେ ପ୍ରଧାନମନ୍ତ୍ରୀଙ୍କ ଏହି ବିଦେଶ ଗସ୍ତକୁ ତୁରନ୍ତ ବାତିଲ କରାଯାଇଛି। ଏହାର କାରଣ ହେଲା ବିଦେଶରେ ଓମିକ୍ରମ ଭ୍ୟାରିଆଣ୍ଟ ବୃଦ୍ଧି। ତଥ୍ୟ ଅନୁସାରେ ବିଦେଶରେ ବର୍ତ୍ତମାନ ଏହି ନୂଆ ପ୍ରଜାତିର କରୋନାକୁ ନେଇ ଆତଙ୍କ ଖେଳିବାରେ ଲାଗିଛି। ଏପରି ପରିସ୍ଥିତିରେ ମୋଦି ବିଦେଶ ଯିବା ଉଚିତ ନୁହେଁ ବୋଲି ବିବେଚନା କରି ତାଙ୍କ ଗସ୍ତକୁ ବାତିଲ କରାଯାଇଛି।

Categories
ଆଜିର ଖବର ଜାତୀୟ ଖବର

କାନପୁର ମେଟ୍ରୋର ନୂତନ ସେକ୍ସନକୁ ଉଦଘାଟନ କଲେ ପ୍ରଧାନମନ୍ତ୍ରୀ ମୋଦୀ, ମୁଖ୍ୟମନ୍ତ୍ରୀଙ୍କ ସହ କଲେ ଯାତ୍ରା

ନୂଆଦିଲ୍ଲୀ: କାନପୁର ମେଟ୍ରୋ ପ୍ରକଳ୍ପର ନୂତନ ବିଭାଗକୁ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦଘାଟନ କରିଛନ୍ତି। ଏହା ୧୧ ହଜାର କୋଟି ଟଙ୍କାର ପ୍ରକଳ୍ପ। ଉଦଘାଟନ କରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି କାନପୁର ମେଟ୍ରୋରେ ଯାତ୍ରା କରିଛନ୍ତି। ଏହି ଅବସରରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ତାଙ୍କ ସହ ଥିଲେ, ସେ ଆଇଆଇଟି ମେଟ୍ରୋ ଷ୍ଟେସନରୁ ଗୀତା ନଗର ଷ୍ଟେସନକୁ ଯାତ୍ରା କରିଥିଲେ। ଏହି ବିଭାଗଟି ଆଇଆଇଟି କାନପୁରରୁ ମୋତି ହ୍ରଦ ପର୍ଯ୍ୟନ୍ତ ପ୍ରାୟ ୯ କିଲୋମିଟର ଲମ୍ବା। ପିଏମଓ ଅନୁଯାୟୀ, କାନପୁରରେ ମେଟ୍ରୋ ପ୍ରକଳ୍ପର ମୋଟ ଲମ୍ବ ୩୨ କିଲୋମିଟର ଏବଂ ଏହା ୧୧ ହଜାର କୋଟି ଟଙ୍କା ବ୍ୟୟରେ ପ୍ରସ୍ତୁତ ହେଉଛି।

କାନପୁର ଗସ୍ତ ସମୟରେ ପ୍ରଧାନମନ୍ତ୍ରୀ ୩୫୬ କିଲୋମିଟର ଲମ୍ବା ପାଇପଲାଇନ ପ୍ରକଳ୍ପ ମଧ୍ୟ ଆରମ୍ଭ କରିବେ। ବିନା-ପନକୀ ପାଇପଲାଇନ ପ୍ରକଳ୍ପର କ୍ଷମତା ବାର୍ଷିକ ପ୍ରାୟ ୩.୪୫ ନିୟୁତ ମେଟ୍ରିକ ଟନ୍ ଅଟେ। ମଧ୍ୟପ୍ରଦେଶର ବିନା ରିଫାଇନାରୀ ଠାରୁ କାନପୁରର ପନକୀ ପର୍ଯ୍ୟନ୍ତ ଏହି ପ୍ରକଳ୍ପ ପାଇଁ ୧୫ ହଜାର କୋଟି ଟଙ୍କା ଖର୍ଚ୍ଚ ହେବ।

Categories
ବିଶେଷ ଖବର ବ୍ୟବସାୟ

ବିଭିନ୍ନ କଂପାନୀର ସିଇଓଙ୍କ ସହିତ ଆଲୋଚନା କଲେ ପ୍ରଧାନମନ୍ତ୍ରୀ, ଜାଣନ୍ତୁ କଣ ହେଲେ କଥା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଲୋକ କଲ୍ୟାଣ ମାର୍ଗ ଠାରେ ବିଭିନ୍ନ କ୍ଷେତ୍ରର ଶିଳ୍ପ ଉଦ୍ୟୋଗ କମ୍ପାନୀଗୁଡ଼ିକର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀମାନଙ୍କ ସହିତ ଆଲୋଚନା କରିଛନ୍ତି। ଆଗାମୀ ସାଧାରଣ ବଜେଟ ପୂର୍ବରୁ ଦ୍ୱିତୀୟ ଥର ପାଇଁ ପ୍ରଧାନମନ୍ତ୍ରୀ ଏପରି ଆଲୋଚନା କରିଛନ୍ତି।

କୋଭିଡ ମହାମାରୀର ମୁକାବିଲା ସମୟରେ ଦେଶ ଅନ୍ତର୍ନିହିତ ସାମର୍ଥ୍ୟ ପ୍ରଦର୍ଶନ କରିଥିଲା ବୋଲି ପ୍ରଧାନମନ୍ତ୍ରୀ କହିଥିଲେ। ମତାମତ ଓ ପରାମର୍ଶ ପାଇଁ ସେ ଉଦ୍ୟୋଗ ଜଗତର ନେତୃବୃନ୍ଦଙ୍କୁ ପ୍ରଶଂସା କରିଥିଲେ ଏବଂ ପିଏଲଆଇ ଯୋଜନା ଭଳି ନୀତିର ଭରପୂର ଲାଭ ଉଠାଇବା ପାଇଁ ସେମାନଙ୍କୁ ଆହ୍ୱାନ କରିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ, ଅଲିମ୍ପିକ୍ସରେ ଭାରତ ଯେପରି ପୋଡିୟମ ସଫଳତା ଅର୍ଜନ କରିବାକୁ ଲକ୍ଷ୍ୟ ରଖିଛି, ସେହିପରି ଭାବେ ବିଶ୍ୱର ପ୍ରତ୍ୟେକ କ୍ଷେତ୍ରରେ ଆମର ଉଦ୍ୟୋଗ ଶୀର୍ଷ ପାଞ୍ଚଟି ସ୍ଥାନରେ ରହୁ ବୋଲି ସାରା ଦେଶ ଚାହୁଁଛି ।

ଆମ ସମସ୍ତଙ୍କୁ ଏହି ଲକ୍ଷ୍ୟ ହାସଲ ଦିଗରେ ମିଳିତ ଭାବେ ଅଗ୍ରସର ହେବାକୁ ପଡ଼ିବ ବୋଲି ଶ୍ରୀ ମୋଦୀ କହିଥିଲେ। ସେ କହିଥିଲେ ଯେ କୃଷି ଏବଂ ଖାଦ୍ୟ ପ୍ରକ୍ରିୟାକରଣ ଭଳି କ୍ଷେତ୍ରରେ କର୍ପୋରେଟ ଉଦ୍ୟୋଗଗୁଡ଼ିକ ଅଧିକ ନିବେଶ କରିବା ଉଚିତ୍‌। ସେ ପ୍ରାକୃତିକ ଚାଷ ପ୍ରତି ଧ୍ୟାନ ଦେବା ଉପରେ ଜୋର ଦେଇଥିଲେ। ସରକାରଙ୍କ ନୀତିଗତ ସ୍ଥିରତା ଉପରେ ଆଲୋକପାତ କରି ସେ କହିଥିଲେ ଯେ ଦେଶର ଆର୍ଥିକ ପ୍ରଗତିକୁ ପ୍ରୋତ୍ସାହିତ କରିବା ଲାଗି ଲଗାତାର ପଦକ୍ଷେପ ଗ୍ରହଣ କରିବା ପାଇଁ ସରକାର ଦୃଢ଼ ସଂକଳ୍ପବଦ୍ଧ। ଅନୁପାଳନ ବୋଝ ହ୍ରାସ କରିବା କ୍ଷେତ୍ରରେ ସରକାର କାର୍ଯ୍ୟ କରୁଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ। ଯେଉଁ କ୍ଷେତ୍ରରେ ଅନାବଶ୍ୟକ ଅନୁପାଳନ ବୋଝ ରହିଛି ତାହା ପ୍ରତ୍ୟାହାର କରିବା ଲାଗି ପ୍ରଧାନମନ୍ତ୍ରୀ ଉଦ୍ୟୋଗ ଜଗତର ପ୍ରତିନିଧିମାନଙ୍କ ଠାରୁ ପରାମର୍ଶ ଲୋଡ଼ିଥିଲେ।

ଉଦ୍ୟୋଗ ଜଗତର ପ୍ରତିନିଧିମାନେ ପ୍ରଧାନମନ୍ତ୍ରୀଙ୍କୁ ସେମାନଙ୍କର ମତାମତ ଦେଇଥିଲେ।  ଘରୋଇ କ୍ଷେତ୍ର ପ୍ରତି ଭରସା ରଖିଥିବାରୁ ସେମାନେ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଥିଲେ।  ସେମାନେ କହିଥିଲେ ଯେ ପ୍ରଧାନମନ୍ତ୍ରୀଙ୍କର ସଫଳ ନେତୃତ୍ୱ କାରଣରୁ କୋଭିଡ ମହାମାରୀ କାଳରେ ସମୟୋଚିତ ହସ୍ତକ୍ଷେପ ଓ ଯୁଗାନ୍ତକାରୀ ସଂସ୍କାର ଅଣାଯାଇଛି ଯାହାଫଳରେ ଦେଶର ଅର୍ଥବ୍ୟବସ୍ଥା ବର୍ତ୍ତମାନ ସୁଧାର ପଥରେ ଦ୍ରୁତ ଗତିରେ ଅଗ୍ରସର ହେଉଛି।

ପ୍ରଧାନମନ୍ତ୍ରୀଙ୍କ ଆତ୍ମନିର୍ଭର ଭାରତ ସଂକଳ୍ପ ଦିଗରେ ଯୋଗଦାନ ପାଇଁ ସେମାନେ ପ୍ରତିବଦ୍ଧତା ବ୍ୟକ୍ତ କରିଥିଲେ। ସରକାରଙ୍କ ଦ୍ୱାରା ଗ୍ରହଣ କରାଯାଇଥିବା ପିଏମ ଗତିଶକ୍ତି, ଆଇବିସି ଭଳି ବିଭିନ୍ନ ପଦକ୍ଷେପକୁ ସେମାନେ ପ୍ରଶଂସା କରିଥିଲେ। ଦେଶରେ ବ୍ୟବସାୟିକ ସୁଗମତାକୁ ଆହୁରି ପ୍ରୋତ୍ସାହିତ କରିବା ଲାଗି ଆବଶ୍ୟକ ପଦକ୍ଷେପ ସମ୍ପର୍କରେ ମଧ୍ୟ ସେମାନେ ଆଲୋଚନା କରିଥିଲେ। ସିଓପି 26 ପ୍ରତି ଭାରତର ପ୍ରତିବଦ୍ଧତା ଏବଂ ଏଥିରେ ଧାର୍ଯ୍ୟ ଲକ୍ଷ୍ୟ ହାସଲ ପାଇଁ ଉଦ୍ୟୋଗ ଜଗତ କିଭଳି ଯୋଗଦାନ ଦେଇପାରିବେ ସେ ସମ୍ପର୍କରେ ମଧ୍ୟ ସେମାନେ ଆଲୋକପାତ କରିଥିଲେ।

ଶ୍ରୀ ଟିଭି ନରେନ୍ଦ୍ରନ କହିଥିଲେ ଯେ ସରକାରଙ୍କ ସମୟୋଚିତ ପଦକ୍ଷେପ କାରଣରୁ କୋଭିଡ ମହାମାରୀ ପରେ ଦେଶର ଅର୍ଥବ୍ୟବସ୍ଥାରେ ଇଂରାଜୀ ଅକ୍ଷର ‘V’ ଆକୃତିର ସୁଧାର ଆସିପାରିଛି। ଖାଦ୍ୟ ପ୍ରକ୍ରିୟାକରଣ ଉଦ୍ୟୋଗକୁ ଆହୁରି ପ୍ରୋତ୍ସାହିତ କରିବା ଲାଗି ଶ୍ରୀ ସଞ୍ଜୀବ ପୁରୀ ପରାମର୍ଶ ଦେଇଥିଲେ। ସ୍ୱଚ୍ଛ ଭାରତ, ଷ୍ଟାର୍ଟଅପ୍‌ ଇଣ୍ଡିଆ ଆଦି ସରଳ କିନ୍ତୁ ସୁନ୍ଦର ଭାବେ ପ୍ରସ୍ତୁତ ହୋଇଥିବା ସଂସ୍କାର ଜରିଆରେ ପ୍ରଧାନମନ୍ତ୍ରୀ ଯୁଗାନ୍ତକାରୀ ପରିବର୍ତ୍ତନ ଆଣିବାରେ ସଫଳ ହୋଇଥିବା ଶ୍ରୀ ଉଦୟ କୋଟକ କହିଥିଲେ। ଶ୍ରୀ ଶେଷଗିରି ରାଓ ସ୍କାର୍ପେଜ ନୀତିକୁ କିଭଳି ବିସ୍ତୃତ କରାଯାଇପାରିବ ସେ ସମ୍ପର୍କରେ ଆଲୋଚନା କରିଥିଲେ।

ଭାରତକୁ ଏକ ବିଶାଳ ଉତ୍ପାଦନ କେନ୍ଦ୍ରରେ ପରିଣତ କରିବା ଲାଗି ପ୍ରଧାନମନ୍ତ୍ରୀଙ୍କ ସଂକଳ୍ପକୁ ସାକାର କରିବା ପ୍ରତି ଶ୍ରୀ କେନିଚି ଆୟୁକାୱା ପ୍ରତିବଦ୍ଧତା ବ୍ୟକ୍ତ କରିଥିଲେ। ସିଓପି 26ରେ ପ୍ରଧାନମନ୍ତ୍ରୀଙ୍କ ପଞ୍ଚାମୃତ ପ୍ରତିବଦ୍ଧତା ସମ୍ପର୍କରେ ଶ୍ରୀ ବୀନିତ ମିତ୍ତଲ ଆଲୋଚନା କରିଥିଲେ। ଶ୍ରୀ ସୁମନ୍ତ ସିହ୍ନା କହିଥିଲେ ଯେ ଗ୍ଲାସଗୋରେ ପ୍ରଧାନମନ୍ତ୍ରୀଙ୍କ ନେତୃତ୍ୱକୁ ବିଶ୍ୱ ସମୁଦାୟର ସଦସ୍ୟମାନେ ପ୍ରଶଂସା କରିଥିଲେ। ଶ୍ରୀ ପ୍ରୀତା ରେଡ୍ଡୀ ସ୍ୱାସ୍ଥ୍ୟ କ୍ଷେତ୍ରରେ ମାନବ ସମ୍ବଳର ପ୍ରୋତ୍ସାହନ ପାଇଁ ପଦକ୍ଷେପ ବିଷୟରେ ଆଲୋଚନା କରିଥିଲେ। ଆର୍ଟିଫିସିଆଲ ଇଣ୍ଟେଲିଜେନ୍ସ ଓ ମେସିନ ଲର୍ଣ୍ଣିଂ ଭଳି ଉଦୀୟମାନ ପ୍ରଯୁକ୍ତି ଉପରେ ଧ୍ୟାନ ଦେବାର ଆବଶ୍ୟକତା ରହିଛି ବୋଲି ଶ୍ରୀ ରିତେଶ ଅଗ୍ରୱାଲ କହିଥିଲେ।

Categories
ଜାତୀୟ ଖବର ବିଶେଷ ଖବର

ସର୍ବଭାରତୀୟ ମେୟର ସମ୍ମିଳନୀ ପ୍ରଧାନମନ୍ତ୍ରୀଙ୍କ ଦ୍ୱାରା ଉଦ୍‌‌ଘାଟିତ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭିଡିଓ କନ୍‌ଫରେନ୍ସିଂ ଜରିଆରେ ସର୍ବଭାରତୀୟ ମେୟର ସମ୍ମିଳନୀକୁ ଉଦ୍‌ଘାଟନ କରିଛନ୍ତି। ଅନ୍ୟମାନଙ୍କ ମଧ୍ୟରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ କେନ୍ଦ୍ରମନ୍ତ୍ରୀ ହରଦୀପ ସିଂ ପୁରୀ ଏହି ଅବସରରେ ଉପସ୍ଥିତ ଥିଲେ।

ସମବେତ ଜନତାଙ୍କୁ ଉଦ୍‌ବୋଧନ ଦେଇ ପ୍ରଧାନମନ୍ତ୍ରୀ ନିକଟରେ ପ୍ରାଚୀନ ବାରଣାସୀଠାରେ ହୋଇଥିବା କାର୍ଯ୍ୟ ସମ୍ପର୍କରେ କହିଥିଲେ। କାଶୀର ବିକାଶ କିପରି ସମଗ୍ର ଭାରତରେ ମାର୍ଗଦର୍ଶକ ହୋଇପାରିବ ସେ ଦେଇଥିବା ନିଜର ମନ୍ତବ୍ୟକୁ ଦୋହରାଇଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ଆମ ଦେଶର ଅଧିକାଂଶ ମହାନଗରୀ ପାରମ୍ପରିକ କୌଶଳରେ ବିକଶିତ ହୋଇଛି। ଏହି ଆଧୁନିକୀକରଣ ଯୁଗରେ ଏହି ସବୁ ସହରଗୁଡିକରେ କୀର୍ତ୍ତି ରାଜି ମଧ୍ୟ ସମାନଭାବେ ଗୁରୁତ୍ୱପୂର୍ଣ୍ଣ। ସେ କହିଥିଲେ ଯେ ସହରଗୁଡିକ ଆମକୁ ଆମର ଐତିହ୍ୟର ସଂରକ୍ଷଣ ଓ ସ୍ଥାନୀୟ କୌଶଳ ଶିଖିବାର ସାହାଯ୍ୟ କରିବ।

ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନର ପରିପାଟି ଭାଙ୍ଗିଦେବା ବଡ କଥା ନୁହେଁ, ବରଂ ପୁର୍ନବିନ୍ୟାସ ଓ ସଂରକ୍ଷଣ ଉପରେ ଗୁରୁତ୍ୱ ଦେବା ଆବଶ୍ୟକ। ଆଧୁନିକ ଯୁଗର ଆବଶ୍ୟକତା ଅନୁସାରେ ଏଗୁଡିକ କରାଯିବା ଦରକାର।

ପ୍ରଧାନମନ୍ତ୍ରୀ ସହରମାନଙ୍କ ମଧ୍ୟରେ ସ୍ୱଚ୍ଛତା ପାଇଁ ସୁସ୍ଥ ପ୍ରତିଯୋଗିତା ନିମନ୍ତେ ଆହ୍ୱାନ ଜଣାଇଥିଲେ ଓ କହିଥିଲେ ଯେ ଏଥିରେ ଆଚମ୍ବିତ ମଧ୍ୟ ହେବାରେ ନାହିଁ ଯେ ସହରଗୁଡିକ ଉଭୟ ଶ୍ରେଷ୍ଠ ପ୍ରଦର୍ଶନ ଓ ସ୍ୱଚ୍ଛତା ଉଭୟ ପାଇଁ ନିଜ ନିଜ ମଧ୍ୟରେ ଭବିଷ୍ୟତରେ ପ୍ରତିଦ୍ୱନ୍ଦ୍ୱିତା କରିବେ। ସେ ମଧ୍ୟ ପରିସ୍କାର ଓ ପରିଚ୍ଛନ୍ନତା ସହ ସହରଗୁଡିକର ସୌନ୍ଦର୍ଯ୍ୟକରଣ ଉପରେ ଗୁରୁତ୍ୱ  ଆରୋପ କରିଥିଲେ। ସେ ମେୟରମାନଙ୍କୁ ନିଜ ନିଜ ସହରର ୱାର୍ଡଗୁଡିକ ମଧ୍ୟରେ ସୁସ୍ଥ ପ୍ରତିଯୋଗିତା ପାଇଁ ନିବେଦନ କରିଥିଲେ।

ସେ ମଧ୍ୟ ମେୟରମାନଙ୍କୁ ଆଜାଦୀ କା ଅମ୍ରିତ ମହୋତ୍ସବ ଅବସରରେ ସ୍ୱାଧୀନତା ସଂଗ୍ରାମ ବିଷୟବସ୍ତୁ ଥାଇ ରଙ୍ଗୋଲୀ ପ୍ରତିଯୋଗିତା, ସ୍ୱାଧୀନତା ସଂଗ୍ରାମ ଉପରେ ସଙ୍ଗୀତ ପ୍ରତିଯୋଗିତା, ନାନାବାୟା ଗୀତ ପ୍ରତିଯୋଗିତା ଇତ୍ୟାଦି କାର୍ଯ୍ୟକ୍ରମ ଯାହା ସେ ମନ୍ କୀ ବାତ ଓ ତାଙ୍କ ଭାଷଣ ମାଧ୍ୟମରେ ପରାମର୍ଶ  ଦେଇଛନ୍ତି ତାହା କରିବାକୁ ପରାମର୍ଶ ଦେଇଥିଲେ। ପ୍ରଧାନମନ୍ତ୍ରୀ ମେୟରମାନଙ୍କ ସହରର ଜନ୍ମଦିବସ ଖୋଜି ବାହାର କରି ତାହା ପାଳନ କରିବାକୁ କହିଥିଲେ। ନଦୀଗୁଡିକର ଗୌରମମୟ ଐତହ୍ୟିକୁ ସୁଦୂର ପ୍ରସାରୀ କଲେ, ଲୋକମାନେ ଏହା ଦ୍ୱାରା ଗର୍ବିତ ହେବା ସହ ତାହାକୁ ସଫାସୁତୁରା ମଧ୍ୟ ରଖିବେ।  “ନଦୀଗୁଡିକ ସହରୀ ଜୀବନର କେନ୍ଦ୍ରବିନ୍ଦୁ କରାଯିବା ଦରକାର। ଏହା ହେଲେ ଯାଇ ତାହା ଆପଣମାନଙ୍କ ସହରକୁ ନୂଆ ଜୀବନ ଦେବ” ବୋଲି କହିଥିଲେ। ଏକକ ବ୍ୟବହାରକ୍ଷମ ପ୍ଲାଷ୍ଟିକ ବ୍ୟବହାର ବନ୍ଦ କରିବା ପାଇଁ ଅଭିଯାନ ଶକ୍ତିଶାଳୀ କରିବା ପାଇଁ ସେ ମେୟରମାନଙ୍କୁ  କହିଥିଲେ। ବଜ୍ୟବସ୍ତୁରୁ ଧନ ସୃଷ୍ଟି କରିବା ପାଇଁ ପନ୍ଥା ଖୋଜିବା ପାଇଁ ସେ ମେୟରମାନଙ୍କୁ କହିବା ସହ ଆମର ସହରଗୁଡିକ ସ୍ୱଚ୍ଛ ଓ ସୁସ୍ଥ ହେବା ଦରକାର ଓ ସେ ଦିଗରେ ଆମର ଉଦ୍ୟମ ହେବା ଉଚିତ ବୋଲି ସେ କହିଥିଲେ।

ରାସ୍ତା ଓ ଘରେ ଏଲଇଡି ବଲର ବହୁଳ ପ୍ରୟୋଗ ଉପରେ ସେ ମେୟରମାନଙ୍କୁ କହିଥିଲେ। ଏହାକୁ ଏକ ଅଭିଯାନଭାବେ ଗ୍ରହଣ କରିବାକୁ ସେ ପରାମର୍ଶ ଦେଇଥିଲେ।

ସେ କହିଥିଲେ ଯେ ଆମେ ସବୁବେଳେ ପ୍ରଚଳିତ ଯୋଜନାଗୁଡିକୁ  ନୂତନ ବ୍ୟବହାର ପାଇଁ  ନେଇ ଆଗକୁ ବଢିବା ଦରକାର। ଆଜାଦୀ କା ଅମ୍ରିତ ମହୋତ୍ସବ କାଳରେ ସହରର ସମରଶିକ୍ଷାର୍ଥୀମାନଙ୍କୁ ନେଇ ପ୍ରତିମୂତ୍ତି ଗୁଡିକୁ ସଫାସୁତୁରା କାର୍ଯ୍ୟ କରିବା ସହ ମହାନ୍ ବ୍ୟକ୍ତିମାନଙ୍କ ଉପରେ ତର୍କ ପ୍ରତିଯୋଗିତା କରିବାକୁ ମେୟରମାନଙ୍କୁ କହିଥିଲେ। ମେୟରମାନେ ସହରରେ ସ୍ଥାନ ଚିହ୍ନଟ କରି କୀର୍ତ୍ତିରାଜି ସ୍ଥାପନ ପିପିପି ମୋଡରେ କରିବାକୁ ପରାମର୍ଶ ଦେଇଥିଲେ। ସହରୀ ଜୀବନର ବିଭିନ୍ନ ସମସ୍ୟାକୁ ନେଇ ଜନସାଧାରଣଙ୍କୁ ସୁହାଇଲା ଭଳି କାର୍ଯ୍ୟ କରିବାକୁ କହିଥିଲେ। ସାଧାରଣ ପରିବହନ ବ୍ୟବସ୍ଥାର ସଦୁପଯୋଗ ନେଇ ସେ ପରାମର୍ଶ ଦେଇ ଦେବାସହ ମେୟରମାନେ ସୁଗମ୍ୟ ଭାରତ ଅଭିଯାନ ଅନୁସାରେ ସହରଗୁଡିକୁ ଦିବ୍ୟାଙ୍ଗମାନଙ୍କ ସୁବିଧା ପାଇଁ ଉପଯୋଗ କରିବାକୁ  ମଧ୍ୟ କହିଥିଲେ।

ସେ କହିଥିଲେ “ଆମର ସହରଗୁଡିକ ଆମ ଅର୍ଥନୀତିର ମୂଳପିଣ୍ଡ। ଆମ ସହରଗୁଡିକୁ ଅର୍ଥନୀତିକ ବ୍ୟବସ୍ଥାର ପେଣ୍ଠସ୍ଥଳ କରିବାକୁ ହେବ।” ସେ ସେମାନଙ୍କୁ ସାମଗ୍ରୀକ ବ୍ୟବସ୍ଥା ଦ୍ୱାରା ସମସ୍ତ ସୁବିଧା ଏପରି ବିକଶିତ ହେବ ଯାହା ଆର୍ଥିକ କାର୍ଯ୍ୟକଳାପଗୁଡିକୁ ପ୍ରୋତ୍ସାହିତ କରିବ ବୋଲି କହିଥିଲେ।

ଏମଏସ୍‌ଏମଇକୁ ବିକାଶର ମଡେଲ ଭାବେ ଗ୍ରହଣ କରିବା ଉପରେ ପ୍ରଧାନମନ୍ତ୍ରୀ ଦୃଢ ଯୁକ୍ତି ବାଢିଥିଲେ। “ରାସ୍ତାକଡ ବିକ୍ରେତାମାନେ ଆମ ଯାତ୍ରାର ସହଯାତ୍ରୀ। ସବୁବେଳେ ଆମେ ସେମାନଙ୍କ ସମସ୍ୟା ପ୍ରତି ଧ୍ୟାନ ଦେବା ଆବଶ୍ୟକ। ସେମାନଙ୍କ ପାଇଁ ଆମେ ପିଏମ୍ ସ୍ୱନିଧି ଯୋଜନା ପ୍ରବର୍ତ୍ତନ କରିଛୁ। ଏହି ଯୋଜନା ଖୁବ ଭଲ। ଆପଣମାନଙ୍କ ସହରରେ ଏହାର ତାଲିକା ବନାଇ ସେମାନଙ୍କୁ ମୋବାଇଲ ଫୋନ ଦେଣନେଣ ପାଇଁ ଶିକ୍ଷା ଦିଅନ୍ତୁ। ଏଗୁଡିକ ବ୍ୟାଙ୍କ ଅର୍ଥ ପ୍ରଦାନ ଦିଗରେ ବେଶ୍ ସହାୟକ ହେବ” ବୋଲି ପ୍ରଧାନମନ୍ତ୍ରୀ କହିଥିଲେ। ବୈଶ୍ୱିକ ମହାମାରୀ କାଳରେ ସେମାନଙ୍କ ଗୁରୁତ୍ୱ ବେଶ୍ ଉପଲବ୍ଧ ହୋଇଥିଲା।

କାଶୀର ବିକାଶ ଲାଗି ମେୟରମାନଙ୍କୁ ପ୍ରସ୍ତାବ ଦେବା ପାଇଁ ପ୍ରଧାନମନ୍ତ୍ରୀ ଅନୁରୋଧ କରିଥିଲେ। “ମୁଁ ଆପଣମାନଙ୍କ ପ୍ରସ୍ତାବ ପାଇଁ କୃତଜ୍ଞ ରହିବି ଓ ମୁଁ ଆପଣମାନଙ୍କ ପ୍ରଥମ ବିଦ୍ୟାର୍ଥୀ ହେବି। ପ୍ରଧାନମନ୍ତ୍ରୀ କହିଥିଲେ ଯେ ସର୍ଦ୍ଦାର ପଟେଲ ଅହମ୍ମଦାବାଦର ପ୍ରଥମ ମେୟର ଥିଲେ ଓ ଦେଶବାସୀ ତାଙ୍କୁ ଏବେ ବି ମନେ ରଖିଛନ୍ତି। ମେୟର ପଦବୀ ଏକ ଅର୍ଥପୂର୍ଣ୍ଣ ରାଜନୀତିକ ପେଶା ପାଇଁ ଉତ୍ତମ ସୋପାନ ଯାହାଦ୍ୱାରା ଆପଣ ଦେଶବାସୀଙ୍କ ସେବା କରିପାରିବେ ବୋଲି ପ୍ରଧାନମନ୍ତ୍ରୀ କହିଥିଲେ।

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ପ୍ରଧାନମନ୍ତ୍ରୀ ମୋଦୀଙ୍କ ଗୁରୁତ୍ୱପୂର୍ଣ୍ଣ ବୈଠକ, ନୂତନ ଷ୍ଟ୍ରେନ୍ ଓମିକ୍ରନର ସଂକ୍ରମଣ ଉପରେ ହେଉଛି ସମୀକ୍ଷା

ନୂଆଦିଲ୍ଲୀ: ଦକ୍ଷିଣ ଆଫ୍ରିକାରେ କରୋନା ଭାଇରସର ଏକ ନୂତନ ରୂପ ଚିହ୍ନଟ ହେବା ଏବଂ ବିଶ୍ୱବ୍ୟାପି ଆଶଙ୍କାରେ ରହିଛନ୍ତି। ଏହାକୁ ଦେଖି ଜେନେଭାରେ ବିଶ୍ୱ ବାଣିଜ୍ୟ ସଂଗଠନ (ଡବ୍ଲ୍ୟୁଟିଓ) ମନ୍ତ୍ରୀସ୍ତରୀୟ ସମ୍ମିଳନୀକୁ ସ୍ଥଗିତ ରଖାଯାଇଛି। ସେହିଭଳି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକ କରୁଛନ୍ତି।

ଏସବୁ ମଧ୍ୟରେ ଦକ୍ଷିଣ ଆଫ୍ରିକାରେ କୋଭିଡ -୧୯ ର ଏକ ନୂତନ ରୂପ ଆସିବା ଅନେକ ଦେଶର ଚିନ୍ତା ବଢାଇ ଦେଇଛି ଏବଂ ସେମାନେ ପ୍ରତିଷେଧକ ବ୍ୟବସ୍ଥା ଗ୍ରହଣ କରିବା ଆରମ୍ଭ କରିଛନ୍ତି। ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ର ଏକ କମିଟି କରୋନା ଭାଇରସର ଏହି ନୂତନ ରୂପକୁ ‘ଓମିକ୍ରନ୍’ ନାମିତ କରିଛି ଏବଂ ଏହାକୁ ‘ଅତ୍ୟଧିକ ସଂକ୍ରାମକ ଚିନ୍ତାଜନକ ସ୍ୱରୂପ’ ବୋଲି କହିଛି।

କରୋନା ଭୂତାଣୁର ଏହି ନୂତନ ରୂପ ଦେଖାଯିବା ପରେ ଆମେରିକା, ବ୍ରିଟେନ, କାନାଡା, ଋଷ ଏବଂ ଅନ୍ୟାନ୍ୟ ଦେଶ ଆଫ୍ରିକୀୟ ଦେଶରୁ ଲୋକଙ୍କ ଗତିବିଧି ଉପରେ ପ୍ରତିବନ୍ଧକ ଲଗାଇଛନ୍ତି।

Categories
ଜୀବନ ଶୈଳୀ ବିଶେଷ ଖବର

ଲଗାତାର ପଞ୍ଚମ ଥର ପାଇଁ ଦେଶର ସବୁଠୁ ସ୍ଵଚ୍ଛ ସହର ହେଲା ଇନ୍ଦୋର, ବାରାଣାସୀକୁ ମିଳିଲା ଏହି ପୁରଷ୍କାର

ନୂଆଦିଲ୍ଲୀ: ‘ସ୍ବଚ୍ଛ ସର୍ବେକ୍ଷଣ-୨୦୨୧’ର ବିଜେତା ଘୋଷିତ ହୋଇଛି। ମଧ୍ୟପ୍ରଦେଶର ଇନ୍ଦୋର ସହର କ୍ରମାଗତ ପଞ୍ଚମ ଥର ପାଇଁ ପ୍ରଥମ ସ୍ଥାନରେ ରହିଛି। ରାଷ୍ଟ୍ରପତି ରାମ ନାଥ କୋବିନ୍ଦ ଆଜି ବିଜେତାମାନଙ୍କୁ ସମ୍ମାନିତ କରିଛନ୍ତି। ସ୍ଵଚ୍ଛ ସର୍ବେକ୍ଷଣ-୨୦୨୧ ରେ ସୁରଟ (ଗୁଜୁରାଟ) ଦୁଇ ନମ୍ବରରେ ଏବଂ ବିଜୟୱାଡା (ଆନ୍ଧ୍ରପ୍ରଦେଶ) ତୃତୀୟ ସ୍ଥାନରେ ରହିଛି। ଏଥି ସହିତ, ୟୁପିର ବାରାଣାସୀ ସ୍ୱଚ୍ଛ ଗଙ୍ଗା ସହରର ଆଖ୍ୟା ପାଇଛି। ସ୍ଵଚ୍ଛ ଭାରତ ମିଶନ-ସହରୀ ୨.୦ ଅଧୀନରେ ଭାରତକୁ ଅଳିଆ ମୁକ୍ତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ଅନୁଯାୟୀ, ଏହି କାର୍ଯ୍ୟରେ ଆବର୍ଜନାମୁକ୍ତ ସହର ବର୍ଗରେ ସାର୍ଟିଫିକେଟ୍ ପ୍ରାପ୍ତ ସହରଗୁଡିକ ସମ୍ମାନିତ କରାଯାଇଛି।

ଏହି କାର୍ଯ୍ୟକ୍ରମରେ ଗୃହ ଓ ସହରାଞ୍ଚଳ ମନ୍ତ୍ରଣାଳୟର ‘ସଫାଇମିତ୍ର ସୁରକ୍ଷା ଚ୍ୟାଲେଞ୍ଜ’ ଉଦ୍ୟମରେ ସର୍ବୋତ୍ତମ ପ୍ରଦର୍ଶନ କରୁଥିବା ସହରଗୁଡ଼ିକୁ ସ୍ୱୀକୃତି ପ୍ରଦାନ କରୁଥିବାବେଳେ ସଫାଇ କର୍ମଚାରୀଙ୍କ ଅବଦାନକୁ ପ୍ରଶଂସା କରାଯାଇଛି। ଏଥର ୪୩୨୦ ସହରକୁ ସ୍ଵଚ୍ଛ ସର୍ବେକ୍ଷଣରେ ଅନ୍ତର୍ଭୁକ୍ତ କରାଯାଇଛି, ଯାହାକି ବିଶ୍ୱର ସବୁଠୁ ବଡ ସ୍ୱଚ୍ଛତା ସର୍ବେକ୍ଷଣ ଅଟେ।

୨୦୧୬ ମସିହାରେ ଏହି ପଦକ୍ଷେପ ଆରମ୍ଭରେ କେବଳ ୭୩ ଟି ପ୍ରମୁଖ ସହରକୁ ଏହି ସର୍ବେକ୍ଷଣରେ ଅନ୍ତର୍ଭୁକ୍ତ କରାଯାଇଥିଲା। ଚଳିତ ବର୍ଷର ସର୍ବେକ୍ଷଣର ସଫଳତାକୁ ଏଥର ନାଗରିକଙ୍କଠାରୁ ପ୍ରାପ୍ତ ଫିଡବ୍ୟାକ୍ ଆଧାରରେ ବିଚାର କରାଯାଇଥାଏ। ଏଥର ପାଞ୍ଚ କୋଟିରୁ ଅଧିକ ଫିଡବ୍ୟାକ୍ ଆସିଥିଲା। ଗତ ବର୍ଷ ଏହି ସଂଖ୍ୟା ୧.୮୭ କୋଟି ଥିଲା।

‘ସ୍ବଚ୍ଛ ସର୍ବେକ୍ଷଣ-୨୦୨୧’ ବିଷୟରେ ମନ୍ତ୍ରଣାଳୟ କହିଛି ଯେ, ଭୂମି ସ୍ତରରେ ରାଜ୍ୟ ତଥା ସହରଗୁଡିକର ପ୍ରଦର୍ଶନରେ ବିଶେଷ ଉନ୍ନତି ହୋଇଛି। ଉଦାହରଣ ସ୍ୱରୂପ, ୬ ଟି ରାଜ୍ୟ ଏବଂ ୬ ଟି କେନ୍ଦ୍ରଶାସିତ ଅଞ୍ଚଳ ତୃଣମୂଳ ସ୍ତରରେ କାର୍ଯ୍ୟଦକ୍ଷତାକୁ ପାଞ୍ଚରୁ ୨୫ ପ୍ରତିଶତକୁ ଉନ୍ନତ କରିଛି ବୋଲି ଏଥିରେ କୁହାଯାଇଛି।

Categories
ଆଜିର ଖବର ରାଜ୍ୟ ଖବର

ଗଣତନ୍ତ୍ରର ବିଜୟ, ଅହଂକାରର ପରାଜୟ: କଂଗ୍ରେସ

ଭୁବନେଶ୍ୱର: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରି କହିଛନ୍ତି ଯେ, ତାଙ୍କ ସରକାର ଯେଉଁ ତିନୋଟି କୃଷି ଆଇନକୁ ପାରିତ କରିଥିଲା ସେ ସମସ୍ତ କୃଷି ଆଇନକୁ ଆସନ୍ତା ଶୀତକାଳୀନ ଅଧିବେଶନରେ ସଂସଦରେ ରୁଦ୍ଧ କରାଯିବ। ଆଜକୁ ଦୀର୍ଘ ୧୩ ମାସ କାଳ ଧରି କୃଷକମାନେ ଏହି କଳା କୃଷି ଆଇନ ବିରୋଧରେ ଶାନ୍ତିପୂର୍ଣ୍ଣ ଭାବରେ ଆନ୍ଦୋଳନ ଜାରି ରଖିଛନ୍ତି। ସାରା ଭାରତବର୍ଷର ଅନ୍ନଦାତା ଏ ଆଇନକୁ ରୁଦ୍ଧ ବା ଆଇନର ପରିବର୍ତ୍ତନ କରିବା ପାଇଁ ବାରମ୍ବାର ମୋଦି ସରକାରଙ୍କର ଦୃଷ୍ଟି ଆକର୍ଷଣ କରିଥିଲେ।

ଆଜି ପ୍ରଦେଶ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଅଖିଳ ଭାରତ କଂଗ୍ରେସ କମିଟିର ସାଧାରଣ ସଂପାଦକ ଡଃ ଏ ଚେଲ୍ଲା କୁମାର ସାମ୍ବାଦିକମାନଙ୍କୁ ଉଦ୍‌ବୋଧନ ଦେଇ କହିଥିଲେ ଯେ, ଭାରତ ବର୍ଷର ନରେନ୍ଦ୍ର ମୋଦି ସରକାର ଯେଉଁ କଳା କୃଷି ଆଇନ ପ୍ରଣୟନ କରିଥିଲେ ତାହା ଆଜି ସେ ନିଜେ ଏବଂ ତାଙ୍କ ସରକାର ଏ ଆଇନକୁ ରୁଦ୍ଧ କରିବାର ଘୋଷଣା କରିଛନ୍ତି। ଏଥିରୁ ସ୍ପଷ୍ଟ ପ୍ରମାଣିତ ଭାରତବର୍ଷର କୋଟି କୋଟି କୃଷକ ଯେଉଁ ଆନ୍ଦୋଳନ ଜାରି ରଖିଥିଲେ ତାହା ନ୍ୟାୟ ସଂଗତ ଓ କୃଷକ ବିରୋଧି ଥିଲା ବୋଲି ଏଥିରୁ ସ୍ପଷ୍ଟ ପ୍ରମାଣି । ଏହି ବିଜୟ ଭାରତ ବର୍ଷର କୃଷକଙ୍କର ବିଜୟ, ଗଣତନ୍ତ୍ରର ବିଜୟ, ସତ୍ୟର ବିଜୟ ଓ ଅହଂକାରର ପରାଜୟ ବୋଲି ସେ କହିଥିଲେ।

ପ୍ରଦେଶ କଂଗ୍ରେସ କମିଟିର ସଭାପତି ନିରଞ୍ଜନ ପଟ୍ଟନାୟକ ସାମ୍ବାଦିକ ମାନଙ୍କୁ ଉଦ୍‌ବୋଧନ ଦେଇ କହିଥିଲେ ଯେ, ଆଜି ଯେଉଁ ୭୦୦ ରୁ ଅଧିକ କୃଷକ ମୃତ୍ୟୁବରଣ କଲେ। ସେମାନଙ୍କ ପଛପଟୁରୁ ଗାଡ଼ି ଚଢ଼ାଇ ଓ ଟ୍ରାକ୍ଟର ଚଢ଼ାଇ ମାରିଦିଆଗଲା ଏବଂ ତାଙ୍କ ନାଁରେ ବିଭିନ୍ନ ଆତଙ୍କବାଦ ଆଇନ ବଳରେ ଯେଉଁ କେସ ଦାୟର ହୋଇଛି, ସେଥିପାଇଁ ନରେନ୍ଦ୍ର ମୋଦି ଦାୟୀ ରହିବେ କି ନାହିଁ ବୋଲି ପ୍ରଶ୍ନ ପଚାରିଛନ୍ତି। ଆଜି ଯଦି ସରକାର ନିଷ୍ପତ୍ତି ନେଇପାରିଲେ ତାହାହେଲେ କାହଁକି କୃଷକମାନଙ୍କୁ ଆତଙ୍କବାଦୀ ବୋଲି ଚିତ୍ରଣ କରାଯାଇଥିଲା। ଅହଂକାର ଓ ସଂଖ୍ୟାର କେବେ ଜୟ ହୋଇ ନାହିଁ, ଗଣତନ୍ତ୍ରର ଜୟହିଁ ହୋଇଛି।

ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଅଖିଳ ଭାରତ କଂଗ୍ରେସ କମିଟିର ସଂପାଦକ ଜି ରୁଦ୍ର ରାଜୁ, ପିସିସି ମିଡିଆ ସେଲର ଅଧ୍ୟକ୍ଷ ଗଣେଶ୍ୱର ବେହେରା, ଯଜ୍ଞେଶ୍ୱର ବାବୁ ଏବଂ ବରିଷ୍ଠ ମୁଖପାତ୍ର ତଥା ସେବାଦଳ ଅଧ୍ୟକ୍ଷ ଡ. ଆର୍ଯ୍ୟ କୁମାର ଜ୍ଞାନେନ୍ଦ୍ର ଉପସ୍ଥିତ ଥିଲେ।

Categories
ଆଜିର ଖବର ଜାତୀୟ ଖବର

ସିଡନୀ ଡାଏଲଗରେ ଦୀକ୍ଷାନ୍ତ ଭାଷଣ ଦେବେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତାକାଲି (୧୮.୧୧.୨୦୨୧)ସକାଳ ୯ଟା ବେଳେ ସିଡନୀ ଡାଏଲଗରେ ଦୀକ୍ଷାନ୍ତ ଭାଷଣ ପ୍ରଦାନ କରିବେ। ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ପ୍ରାରମ୍ଭିକ ଭାଷଣ ପରେ ପ୍ରଧାନମନ୍ତ୍ରୀ ଶ୍ରୀ ମୋଦୀ ଭାରତର ପ୍ରଯୁକ୍ତି ଉଦ୍ଭାବନ ଓ ବିପ୍ଳବ ଉପରେ ଉଦ୍ବୋଧନ ଦେବେ।

ସିଡନୀ ଡାଏଲଗ୍ ନଭେମ୍ବର ୧୭ରୁ ୧୯ ମଧ୍ୟରେ ଆୟୋଜିତ ହେଉଛି ଅଷ୍ଟ୍ରେଲିୟ ରଣନୀତିକ ପ୍ରତିଷ୍ଠାନ ପକ୍ଷରୁ ଏହି ପଦକ୍ଷପ ନିଆଯାଉଛି। ଏଥିରେ ଦୁନିଆକୁ ଆସୁଥିବା ନୂତନ ନୂତନ ପ୍ରଯୁକ୍ତିବିଦ୍ୟା ଓ ଏହାର ଆହ୍ୱାନଗୁଡିକୁ ନେଇ ସରକାରୀ, ରାଜନୈତିକ ଓ ବ୍ୟାବସାୟିକ ବିଶେଷଜ୍ଞମାନେ ଆଲୋଚନା କରିବାର କାର୍ଯ୍ୟକ୍ରମ ରହିଛି। ଏଥିରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ୍ ମରିସନ ଓ ପୂର୍ବତନ ଜାପାନ ପ୍ରଧାନମନ୍ତ୍ରୀ ସିଞ୍ଜୋ ଆବେ ମଧ୍ୟ ଦୀକ୍ଷାନ୍ତ ଭାଷଣ ପ୍ରଦାନ କରିବାର କାର୍ଯ୍ୟକ୍ରମ ରହିଛି।

Categories
ଅନ୍ତରାଷ୍ଟ୍ରୀୟ ବିଶେଷ ଖବର

ଯୁକ୍ତରାଷ୍ଟ୍ର କଂଗ୍ରେସ ପ୍ରତିନିଧି ଦଳ ସହ ପ୍ରଧାନମନ୍ତ୍ରୀ ମୋଦିଙ୍କ ବୈଠକ

ନୂଆଦିଲ୍ଲୀ: ସିନେଟ୍‌ର ଜନ କର୍ଣ୍ଣୟନଙ୍କ ନେତୃତ୍ୱରେ ଭାରତ ଆସିଥିବା ଯୁକ୍ତରାଷ୍ଟ୍ର କଂଗ୍ରେସ ପ୍ରତିନିଧି ଦଳ ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି । ଏଥିରେ ଅନ୍ୟମାନଙ୍କ ମଧ୍ୟରେ ସିନେଟର ମାଇକେଲ କାର୍ପୋ, ସିନେଟର ଥମାସ ଟ୍ୟୁବରଭିଲେ, ସିନେଟର ମାଇକେଲ ଲୀ, କଂଗ୍ରେସମ୍ୟାନ ଟନ୍ ଗଞ୍ଜାଲେସ୍‌ ଏବଂ କଂଗ୍ରେସ ମ୍ୟାନ ଜନ କେଭିନ ଏଲିଜେ ସିନିୟର ମଧ୍ୟ ଅନ୍ତର୍ଭୁକ୍ତ । ସିନେଟ୍‌ର ଜନ କର୍ଣ୍ଣୟନ ହେଉଛନ୍ତି ଭାରତ ଓ ଆମେରିକୀୟ ଭାରତୀୟ ସିନେଟ୍‌ର ବୃହତ ଗୋଷ୍ଠୀ ମଧ୍ୟରେ ଥିବା ଏକ କ୍ଷୁଦ୍ରଗୋଷ୍ଠୀର ପ୍ରତିଷ୍ଠାତା।

ଭାରତରେ ଜନସଂଖ୍ୟା ଜନିତ ବିବିଧତା ସତ୍ୱେ କୋଭିଡ-୧୯ ପରିସ୍ଥିତିରେ ଚମତ୍କାର ପରିଚାଳନା ନେଇ କଂଗ୍ରେସ ପ୍ରତିନିଧି ଦଳ ସନ୍ତୋଷବ୍ୟକ୍ତ କରିଥିଲେ। ଶତାବ୍ଦୀର ସବୁଠାରୁ ଭୟଙ୍କର ମହାମାରୀକୁ ଗଣତାନ୍ତ୍ରିକ ମୂଲ୍ୟବୋଧ ଉପରେ ପର୍ଯ୍ୟବସିତ ଜନତାଙ୍କ ଭାଗିଦାରିତା ଓ ସହଯୋଗ ଯୋଗୁଁ ମୁକାବିଲା କରାଯାଇପାରିଲା ବୋଲି ପ୍ରଧାନମନ୍ତ୍ରୀ କହିଥିଲେ।

ଉଭୟ ଦେଶର ସ୍ୱାର୍ଥ ସମ୍ବଳିତ ଆଞ୍ଚଳିକ ବିଷୟ ଉପରେ ମଧ୍ୟ ଅବାଧ ଆଲୋଚନା ହୋଇଥିଲା। ଏଥିରେ ଦକ୍ଷିଣ ଏସିଆ ଓ ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳ ସମସ୍ୟା ମଧ୍ୟ ରହିଛି। ପ୍ରଧାନମନ୍ତ୍ରୀ ଓ ପରିଦର୍ଶନକାରୀ ପ୍ରତିନିଧି ଦଳ ବୈଶ୍ୱିକ ଶାନ୍ତି ଓ ସ୍ଥିରତା ଦୃଷ୍ଟିରୁ ରଣନୀତିକ ସହଯୋଗ ବୃଦ୍ଧି ପାଇଁ ଆବଶ୍ୟକ ପଦକ୍ଷେପ ସହ ନେବା ଉପରେ ସହମତ ହୋଇଥିଲେ।

ପ୍ରଧାନମନ୍ତ୍ରୀ ସାଂପ୍ରତିକ ବୈଶ୍ୱିକ ସମସ୍ୟା ଯଥା ଆତଙ୍କବାଦ, ଜଳବାୟୁ ପରିବର୍ତ୍ତନ, ବୈଷୟିକ ଜ୍ଞାନ ଯୁକ୍ତ ଯନ୍ତ୍ରପାତି ଯୋଗାଣ ବ୍ୟବସ୍ଥା ଦିଗରେ ସହଯୋଗ  ନେଇ ମତବିନିମୟ କରିଥିଲେ।

Categories
ଜାତୀୟ ଖବର ବିଶେଷ ଖବର

‘ମନ କି ବାତ୍’ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଆପଣଙ୍କ କଥା କହିବାକୁ ଚାହୁଁଛନ୍ତି କି? କରନ୍ତୁ ଏହି କାମ

ନୂଆଦିଲ୍ଲୀ: ପ୍ରତିମାସର ଶେଷ ରବିବାରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ଏକ ଲୋକପ୍ରିୟ କାର୍ଯ୍ୟକ୍ରମ ହେଉଛି ‘ମନ କି ବାତ୍’। ଏହା ଅଲ ଇଣ୍ଡିଆ ରେଡିଓରେ ପ୍ରସାରଣ କରାଯାଇଥାଏ। ଚଳିତ ମାସ ଶେଷ ରବିବାରରେ ଅର୍ଥାତ ନଭେମ୍ବର 28 ତାରିଖରେ ମଧ୍ୟ ଏହି କାର୍ଯ୍ୟକ୍ରମ ପ୍ରସାରରଣ କରାଯିବ। ତେବେ ଏଥର ଏହି ‘ମନ କି ବାତ୍’ କାର୍ଯ୍ୟକ୍ରମ ଟିକିଏ ଭିନ୍ନ କରାଯିବାକୁ ପ୍ରୟାସ କରାଯାଇଛି।

ଏଥର ‘ମନ କି ବାତ୍’ କାର୍ଯ୍ୟକ୍ରମରେ ଲୋକଙ୍କ କଥା ପ୍ରଧାନମନ୍ତ୍ରୀ କହିବେ ବୋଲି ଏକ ନୂଆ ପଦକ୍ଷେପ ଗ୍ରହଣ କରାଯାଇଛି। ପଦକ୍ଷେପ ଅନୁସାରେ ଆପଣ ଆପଣଙ୍କର କୌଣସି ଅଭିନବ ଯୋଜନା ରହିଛି ତେବେ ତାହାକୁ ଆପଣ ପ୍ରଧାନମନ୍ତ୍ରୀଙ୍କ ପାଖକୁ ପଠାଇ ପାରିବେ। ଏଥିସହିତ ବିଭିନ୍ନ ପ୍ରସ୍ତାବ ମଧ୍ୟ ଦେଇପାରିବେ ଯାହାକୁ ପ୍ରଧାନମନ୍ତ୍ରୀ ତାଙ୍କ ‘ମନ କି ବାତ୍’ ରେ ଆପଣଙ୍କ ନାମ ସହିତ କହିବେ।

ତେବେ ସେଥିପାଇଁ ଆପଣଙ୍କୁ କଣ କରିବାକୁ ପଡିବ ତାହା ଜାଣିବା ନିହାତି ଆବଶ୍ୟକ। ପ୍ରଥମ କଥା ହେଲା ଆପଣଙ୍କ ଯୋଜନା ବା ପ୍ରସ୍ତାବ ଅଭିନବ ହୋଇଥିବା ଆବଶ୍ୟକ। ଯାହା ସାଧାରଣ ଘଟଣାଠାରୁ ନିଶ୍ଚିତ ଅଲଗା ହେବା ଆବଶ୍ୟକ। ସେହିପରି କିଛି ଭିନ୍ନଭିନ୍ନ ପ୍ରସ୍ତାବ ମଧ୍ୟ ପଠାଇପାରିବେ, ଯାହା ଦ୍ବାରା ଅନ୍ୟମାନେ ପ୍ରେରଣା ହାସଲ କରିବେ। ଏସବୁ ପ୍ରସ୍ତାବ ଆପଣ ନଭେମ୍ବର 26 ତାରିଖ ସୁଦ୍ଧା ପଠାଇବା ଆବଶ୍ୟକ। ଫଳରେ ନଭେମ୍ବର 28 ତାରିଖରେ ତାହା ପ୍ରସାରଣ ହେବ।

ଏହି ପ୍ରସ୍ତାବ ପଠାଇବାକୁ ହେଲେ ଆପଣ ଏହି ଲିଙ୍କକୁ କ୍ଲିକ କରନ୍ତୁ- https://www.mygov.in/group-issue/inviting-ideas-mann-ki-baat-prime-minister-narendra-modi-28th-november-2021/

କ୍ଲିକ କରିବା ପରେ ସେଥିରେ ଥିବା ବିଭିନ୍ନ ଟେବୁଲ ପୁରଣ କରି ପଠାନ୍ତୁ। ଯଦି ଏହି ଲିଙ୍କ୍ କିଲ୍କ ହେଉ ନାହିଁ ତେବେ ସିଧା mygovindia ୱେବସାଇଟକୁ ଯାଇ ଆପଣ ଆପଣଙ୍କର ପ୍ରସ୍ତାବ ପଠାଇପାରିବେ। ସେହିପରି ଆପଣ ମଧ୍ୟ namo ଆପକୁ ଡାଉନଲୋଡ କରି ମଧ୍ୟ ପ୍ରସ୍ତାବ ପଠାଇପାରିବେ। ନଚେତ ଆପଣ ଆପଣଙ୍କର ମେସଜ ରେକର୍ଡ କରି PMonAIR କୁ ମଧ୍ୟ ପଠାଇପାରିବେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଭିନ୍ନ ସମୟରେ ଗ୍ରାମାଞ୍ଚଳରେ ଥିବା ପ୍ରତିଭାମାନଙ୍କ ସଂପର୍କରେ ତାଙ୍କର ମନ କି ବାତ କାର୍ଯ୍ୟକ୍ରମରେ ସ୍ଥାନିତ କରିଥାନ୍ତି। ସେମାନଙ୍କ କାର୍ଯ୍ୟକୁ ପ୍ରଶଂସା ମଧ୍ୟ କରନ୍ତି। ଯାହାର ଉଦ୍ଦେଶ୍ୟ ହେଲା ଯେ, ଏଥିରେ ଅନ୍ୟମାନେ ପ୍ରେରଣା ହାସଲ କରନ୍ତୁ। ସେଥିପାଇଁ ଆସନ୍ତା ଶେଷ ରବିବାରରେ ଏହି ମନ କି ବାତ୍ ଏହିପରି ଭିନ୍ନ ଧରଣର କରିବାକୁ ନିଷ୍ପତି କରାଯାଇ ପ୍ରସ୍ତାବ ଆହ୍ବାନ କରାଯାଇଛି।