Tag: ଭାରତ ସରକାର

ନୂଆଦିଲ୍ଲୀ: ଚୀନ୍ ଏବଂ ପାକିସ୍ଥାନ ସହ ତିକ୍ତତା ମଧ୍ୟରେ ଭାରତ ସରକାର ପ୍ରତିରକ୍ଷା ବଜେଟକୁ ପ୍ରାୟ ୭୦ ହଜାର କୋଟି ଟଙ୍କା ବୃଦ୍ଧି କରିଛନ୍ତି। ୨୦୨୩-୨୪ ପାଇଁ ସରକାର ପ୍ରତିରକ୍ଷା ମନ୍ତ୍ରଣାଳୟକୁ ୫.୯୪ ଲକ୍ଷ କୋଟି ଟଙ୍କା ପ୍ରଦାନ କରିଛନ୍ତି। ଅଧିକାଂଶ ବଜେଟ୍ ଯବାନମାନଙ୍କ ପାଇଁ ଆବଶ୍ୟକ ମୌଳିକ ଉନ୍ନତି ପାଇଁ ବ୍ୟବହୃତ ହେବ।

୨୦୨୨-୨୩ ରେ ପ୍ରତିରକ୍ଷା ବଜେଟ୍ କ’ଣ ଥିଲା?:

୨୦୨୨-୨୩ ଆର୍ଥିକ ବର୍ଷରେ ଭାରତ ସରକାର ସୁରକ୍ଷା ବଜେଟକୁ ୯.୮୬ ପ୍ରତିଶତ ବୃଦ୍ଧି କରିଛନ୍ତି। ୨୦୨୨ ର ବଜେଟରେ ସେନା କର୍ମଚାରୀଙ୍କ ଦରମା ଏବଂ ଅନ୍ୟାନ୍ୟ ପ୍ରତିରକ୍ଷା ଖର୍ଚ୍ଚ ବୃଦ୍ଧି ପାଇଁ ସରକାର ୪୭ ହଜାର କୋଟି ଟଙ୍କା ବୃଦ୍ଧି କରିଥିଲେ। ୨୦୨୨-୨୩ ରେ ପ୍ରତିରକ୍ଷା ବଜେଟ୍ ଥିଲା ୫.୨୫ ଲକ୍ଷ କୋଟି ଟଙ୍କା।

୫ ବର୍ଷରେ ପ୍ରତିରକ୍ଷା ବଜେଟ୍ କେବେ ଏବଂ କେତେ ବୃଦ୍ଧି ପାଇଲା?:

୨୦୧୯- ୨୦ ରେ ୪.୩୧ ଲକ୍ଷ କୋଟି ଟଙ୍କା।

୨୦୨୦-୨୧ ରେ ୪.୭୧ ଲକ୍ଷ କୋଟି ଟଙ୍କା।

୨୦୨୧-୨୨ ରେ ୪.୭୮ ଲକ୍ଷ କୋଟି ଟଙ୍କା।

୨୦୨୨-୨୩ ରେ ୫.୨୫ ଲକ୍ଷ କୋଟି ଟଙ୍କା।

ବଜେଟ୍ କାଟକୁ ତାଗିଦ୍ କଲା ସଂସଦୀୟ କମିଟି:

ମେ ୨୦୨୨ ରେ ସଂସଦର ପ୍ରତିରକ୍ଷା କମିଟି ଏକ ରିପୋର୍ଟ ଜାରି କରିଥିଲା। ରିପୋର୍ଟରେ କୁହାଯାଇଛି ଯେ, ୧୯୬୨ ପରେ ସରକାର ୨୦୨୨ ମସିହାରେ ସର୍ବନିମ୍ନ ପ୍ରତିରକ୍ଷା ବଜେଟ୍ ବଜାୟ ରଖିଛନ୍ତି।

ଚିନ୍ତା ପ୍ରକଟ କରି କମିଟି କହିଛି ଯେ, ଭାରତୀୟ ସେନା ଦୁଇଟି ମୋର୍ଚ୍ଚାରେ ଯୁଦ୍ଧ କରୁଛି। ଏଭଳି ପରିସ୍ଥିତିରେ ବଜେଟ୍ କାଟିବା ବୁଝିବା ବାହାରେ।

ସାମରିକ ଗବେଷଣା ପାଇଁ ଭାରତ ୧% ରୁ କମ୍ ଖର୍ଚ୍ଚ:

ସଂସଦର ପ୍ରତିରକ୍ଷା କମିଟି ଅନୁଯାୟୀ ମୋଟ ବଜେଟର ୧ ପ୍ରତିଶତରୁ କମ୍ ଭାରତରେ ସାମରିକ ତଥା ଆନୁଷଙ୍ଗିକ ଅନୁସନ୍ଧାନ କାର୍ଯ୍ୟରେ ଖର୍ଚ୍ଚ ହୋଇଛି। ଅନ୍ୟପକ୍ଷରେ, ଶତ୍ରୁ ଦେଶ ଚୀନ୍ ସୁରକ୍ଷା ସମ୍ବନ୍ଧୀୟ ଅନୁସନ୍ଧାନ ପାଇଁ ମୋଟ ପ୍ରତିରକ୍ଷା ବଜେଟର ୨୦% ଖର୍ଚ୍ଚ କରିଥାଏ।

ନୂଆଦିଲ୍ଲୀ/ଭୁବନେଶ୍ୱର: ପର୍ଯ୍ୟଟନ କେବଳ ମନୋରଞ୍ଜନ, ସଂସ୍କୃତି ଏବଂ ଐତିହ୍ୟକୁ ଜାଣିବାର ବିଷୟ ନୁହେଁ ବରଂ ପର୍ଯ୍ୟଟନ ଏକ ଅର୍ଥନୈତିକ ପ୍ରସଙ୍ଗ। ପର୍ଯ୍ୟଟନ ମାଧ୍ୟମରେ ଆମ ଦେଶର ଆର୍ଥିକ ଶକ୍ତି ଆହୁରି ମଜଭୂତ୍ ହେବ ବୋଲି ମଙ୍ଗଳବାର ନୂଆଦିଲ୍ଲୀ ଠାରେ ଐତିହାସିକ ଲାଲକିଲ୍ଲାର ପ୍ରାଙ୍ଗଣରେ ‘ଭାରତ ପର୍ବ ୨୦୨୩’ର ଉଦଯାପନୀ ସମାରୋହରେ ଯୋଗଦେଇ କହିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।

ଭାରତ ସରକାରଙ୍କ ସଂସ୍କୃତି ଓ ପର୍ଯ୍ୟଟନ ମନ୍ତ୍ରଣାଳୟ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଶ୍ରୀ ପ୍ରଧାନ କହିଛନ୍ତି ଯେ ଭାରତ ପର୍ବ ଲୋକଙ୍କ ଉତ୍ସାହ ଓ ଦେଶ ପ୍ରତି ଲୋକଙ୍କର ଥିବା ଶ୍ରଦ୍ଧାକୁ ପ୍ରତିଫଳିତ କରୁଛି। ଦେଶର ସାଂସ୍କୃତିକ ଓ ପର୍ଯ୍ୟଟନକୁ ଉଲ୍ଲେଖ କରିବାକୁ ଯାଇ ମାନ୍ୟବର ରାଷ୍ଟ୍ରପତି ଦ୍ରୌପଦୀ ମୁର୍ମୁ ସଂସଦରେ ଅନେକ ବିଷୟରେ ନିଜ ଅଭିଭାଷଣରେ ପ୍ରଦାନ କରିଛନ୍ତି। ଦେଶରେ ରାମ ମନ୍ଦିର ନିର୍ମାଣ ହେଉଛି, କାଶୀ ବିଶ୍ୱନାଥ କୋରିଡର ହୋଇଛି, ମହାକାଳଲୋକ ନୂଆ ରୂପ ନେଇଛି। ଦେଶର ଅନେକ ପ୍ରାନ୍ତରେ ଐତିହ୍ୟ କ୍ଷେତ୍ରରେ ନୂଆ ରୂପ ଆସିଛି। କରୋନାର ପରବର୍ତ୍ତୀ ପର୍ଯ୍ୟାୟରେ ଦେଶର ସାଧାରଣ ନାଗରିକମାନେ ଏହି ପର୍ଯ୍ୟଟନ ସୁବିଧାର ଆନନ୍ଦ ନେଉଛନ୍ତି। ଭାରତର ସାଂସ୍କୃତିକ ଐତିହ୍ୟକୁ ଆଜି ଅଭିଭାଷଣରେ ଉଲ୍ଲେଖ କରି ଦେଶର ଗୌରବ ବଢାଇଥିବାରୁ ରାଷ୍ଟ୍ରପତିଙ୍କୁ ଶ୍ରୀ ପ୍ରଧାନ ଧନ୍ୟବାଦ ଜଣାଇଛନ୍ତି।

ଭାରତ ପର୍ବର ସଫଳତା ପାଇଁ ପର୍ଯ୍ୟଟନ ବିଭାଗକୁ ଅଭିନନ୍ଦନ ଜଣାଇବା ସହ ଭାରତ ପର୍ବରେ ବିକ୍ରି ହେଉଥିବା ସ୍ୱଦେଶୀ ସାମଗ୍ରୀକୁ କିଣିବା ପାଇଁ ଲୋକଙ୍କୁ ପରାମର୍ଶ ଦେଇଥିଲେ ଶ୍ରୀ ପ୍ରଧାନ। ସେ କହିଥିଲେ ଲୋକମାନେ ଆମର ସ୍ୱଦେଶୀ ସାମଗ୍ରୀ କିଣିଲେ ଭାରତର କଳା ବଞ୍ଚିବ ଓ ଗରିବ ଘରେ ସମ୍ପନ୍ନତା ପହଞ୍ଚିବ। ଭାରତର କୁଶଳୀ କାରିଗରୀ, ବୁଣାକାର ମଧ୍ୟ ଆମ ଅର୍ଥନୀତିର ଆଉ ଏକ ମେରୁଦଣ୍ଡ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଭାରତ ସରକାର ଦେଶକୁ ନୂଆ ରୂପ ଓ ଆର୍ଥିକ ଶକ୍ତି ବନାଇବା ପାଇଁ କାର୍ଯ୍ୟ କରୁଛନ୍ତି ବୋଲି ସେ କହିଛନ୍ତି।

ଭୁବନେଶ୍ୱର: ଦେଶରେ ନିଯୁକ୍ତି ଆଶାୟୀ ପ୍ରତିଭାବାନ ଯୁବକ ଯୁବତୀମାନଙ୍କୁ ସରକାରୀ ଚାକିରି ଦେବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବରେ ଭାରତ ସରକାର ବିଭିନ୍ନ ସ୍ଥାନରେ ରୋଜଗାର ମେଳା ଆୟୋଜନ କରୁଛନ୍ତି। ଆସନ୍ତାକାଲି, ୨୦ ଜାନୁଆରୀ ୨୦୨୩ରେ ଓଡ଼ିଶାରେ ଚଳିତ ବର୍ଷର ପ୍ରଥମ ରୋଜଗାର ମେଳା ଅନୁଷ୍ଠିତ ହେବ। କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଭୁବନେଶ୍ୱରରେ ଆୟୋଜିତ ହେବାକୁ ଥିବା ରୋଜଗାର ମେଳାରେ ଯୋଗ୍ୟ ମନୋନୀତ ପ୍ରାର୍ଥୀମାନଙ୍କୁ ସରକାରୀ ଚାକିରିର ନିଯୁକ୍ତିପତ୍ର ବାଣ୍ଟିବେ। ଏମାନଙ୍କୁ ଭାରତ ସରକାରଙ୍କ ବିଭିନ୍ନ ମନ୍ତ୍ରଣାଳୟ ଓ ବିଭାଗରେ ନିଯୁକ୍ତି ମିଳିବ। ଭୁବନେଶ୍ୱର ଆଚାର୍ଯ୍ୟ ବିହାରସ୍ଥିତ ସିଏସଆଇଆର-ଖଣିଜ ଏବଂ ବସ୍ତୁ ପ୍ରଯୁକ୍ତି ପ୍ରତିଷ୍ଠାନ (ଆଇଏମଏମଟି)ରେ ଏହି ରୋଜଗାର ମେଳା ଅନୁଷ୍ଠିତ ହେବ।

ସୂଚନାଯୋଗ୍ୟ ଯେ, ଦେଶର ୧୦ ଲକ୍ଷରୁ ଅଧିକ ଲୋକଙ୍କୁ ଚାକିରି ଦେବା ଲାଗି ଗତ ଅକ୍ଟୋବର ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରୋଜଗାର ମେଳାର ଶୁଭାରମ୍ଭ କରିଥିଲେ। ପର୍ଯ୍ୟାୟକ୍ରମେ ଦେଶର ବିଭିନ୍ନ ସହରରେ ରୋଜଗାର ମେଳାମାନ ଆୟୋଜନ କରାଯାଉଛି। ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ, ଭାରତ ସରକାରଙ୍କ ସମସ୍ତ ମନ୍ତ୍ରଣାଳୟ ଏବଂ ବିଭାଗ ଖାଲି ରହିଥିବା ଅନୁମୋଦିତ ପଦବୀ ପୂରଣ କରିବା ଲାଗି ମିଶନ ମୋଡରେ କାମ କରୁଛନ୍ତି।

ନୂଆଦିଲ୍ଲୀ: ଆର୍ଥିକ ବ୍ୟାପାର ସଂକ୍ରାନ୍ତ କ୍ୟାବିନେଟ ସମିତି (ସିସିଇଏ) ଏକ କେନ୍ଦ୍ରୀୟ କ୍ଷେତ୍ରର ଯୋଜନା ଭାବେ ‘ପ୍ରସାରଣ ଭିତ୍ତିଭୂମି ଓ ନେଟୱର୍କ ବିକାଶ (ବ୍ରଡକାଷ୍ଟିଂ ଇନଫ୍ରାଷ୍ଟ୍ରକ୍ଚର ଏଣ୍ଡ ଟେନୱର୍କ ଡେଭଲପମେଣ୍ଟ-ବିଆଇଏନଡି)’କୁ ଅନୁମୋଦନ କରିଛି। ଏ ସଂକ୍ରାନ୍ତରେ ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ଦିଆଯାଇଥିବା ପ୍ରସ୍ତାବକୁ ମଞ୍ଜୁର କରାଯାଇଛି। ଏହି ଯୋଜନା ମାଧ୍ୟମରେ ପ୍ରସାର ଭାରତୀ- ଅର୍ଥାତ୍‌ ଅଲ ଇଣ୍ଡିଆ ରେଡିଓ (ଏଆଇଆର) ଏବଂ ଦୂରଦର୍ଶନ (ଡିଡି) ପାଇଁ ଭିତ୍ତିଭୂମି ବିକାଶ କରାଯିବ। ଯୋଜନାରେ ମୋଟ୍‌ ୨୫୩୯.୬୧ କୋଟି ଟଙ୍କା ଖର୍ଚ୍ଚ ହେବ।  ପ୍ରସାର ଭାରତୀର ପ୍ରସାରଣ ଭିତ୍ତିଭୂମି ସମ୍ପ୍ରସାରଣ ଓ ଉନ୍ନତିକରଣ, ବିଷୟବସ୍ତୁ ବିକାଶ ଓ ସଂଗଠନର ସିଭିଲ କାର୍ଯ୍ୟ ଆଦି ପାଇଁ ଆର୍ଥିକ ସହାୟତା ଯୋଗାଇ ଦେବା ଲାଗି ମନ୍ତ୍ରଣାଳୟ ଦ୍ବାରା ବ୍ରଡକାଷ୍ଟିଂ ଇନଫ୍ରାଷ୍ଟ୍ରକ୍ଚର ଏଣ୍ଡ ଟେନୱର୍କ ଡେଭଲପମେଣ୍ଟ (ବିଆଇଏନଡି) ଯୋଜନାର ପରିକଳ୍ପନା କରାଯାଇଛି।

ପ୍ରସାର ଭାରତୀ ହେଉଛି ଦେଶର ସାର୍ବଜନୀନ ବା ଲୋକ ସେବା ପ୍ରସାରଣକାରୀ ସଂଗଠନ। ଏହି ସଂଗଠନ ଦୂରଦର୍ଶନ ଓ ଆକାଶବାଣୀ ମାଧ୍ୟମରେ ଦେଶର ଦୂର ସୁଦୂରବର୍ତ୍ତୀ କ୍ଷେତ୍ରରେ ଲୋକମାନଙ୍କୁ ଶିକ୍ଷା, ସୂଚନା, ମନୋରଞ୍ଜନ ଓ ସହଭାଗିତାର ସବୁଠୁ ବଡ଼ ସାଧନ ଯୋଗାଇ ଦେଉଛି। ପ୍ରସାର ଭାରତୀ କୋଭିଡ ମହାମାରୀ ସମୟରେ ସାର୍ବଜନୀନ ସ୍ବାସ୍ଥ୍ୟ ବାର୍ତ୍ତାର ପ୍ରସାରଣ ଓ ଜନସାଧାରଣଙ୍କୁ ସଚେତନ କରିବା ଦିଗରେ ମହତ୍ବପୂର୍ଣ୍ଣ ଭୂମିକା ନିର୍ବାହ କରିଥିଲା।

ବିଆଇଏନଡି ଯୋଜନା ଏହି ସାର୍ବଜନୀନ ପ୍ରସାରଣକାରୀ ସଂଗଠନକୁ ଉନ୍ନତ ମୌଳିକ ଭିତ୍ତିଭୂମି ସହିତ ନିଜସ୍ବ ସୁବିଧାକୁ ବ୍ୟାପକ ଭାବେ ଉନ୍ନତିକରଣ କରିବା ଲାଗି ସକ୍ଷମ କରିବ। ଫଳରେ ବାମପନ୍ଥୀ ଉଗ୍ରବାଦ ପ୍ରଭାବିତ କ୍ଷେତ୍ର, ସୀମାବର୍ତ୍ତୀ ଓ ରଣନୈତିକ କ୍ଷେତ୍ରରେ ଏହାର ପ୍ରସାରଣ ବୃଦ୍ଧି ପାଇବ। ଶ୍ରୋତା ଓ ଦର୍ଶକମାନେ ଉଚ୍ଚ ଗୁଣବତ୍ତାଯୁକ୍ତ କଣ୍ଟେଣ୍ଟ ବା ବିଷୟବସ୍ତୁ ପାଇପାରିବେ। ଏହି ଯୋଜନାର ଆଉ ଏକ ପ୍ରାଥମିକତା ଆଧାରିତ କ୍ଷେତ୍ର ହେଉଛି – ଘରୋଇ ଓ ଅନ୍ତର୍ଜାତୀୟ ଉଭୟ ଦର୍ଶକଙ୍କ ପାଇଁ ଉଚ୍ଚ ଗୁଣବତ୍ତାଯୁକ୍ତ କଣ୍ଟେଣ୍ଟ ବିକଶିତ କରିବା ଏବଂ ଅଧିକ ଘରୋଇ ଚ୍ୟାନେଲକୁ ସାମିଲ କରିବା ଲାଗି ଡିଟିଏଚ ପ୍ଲାଟଫର୍ମର କ୍ଷମତା ବିକାଶ। ଏହାଦ୍ବାରା ଦର୍ଶକଙ୍କ ପାଇଁ ବିବିଧ ବିଷୟବସ୍ତୁ ଓ କାର୍ଯ୍ୟକ୍ରମର ଉପଲବ୍ଧତା ସୁନିଶ୍ଚିତ ହୋଇପାରିବ। ଓଭି ଭ୍ୟାନ୍‌ କ୍ରୟ ଏବଂ ଡିଡି ଓ ଆକାଶବାଣୀ ଷ୍ଟୁଡିଓକୁ ଏଚଡି ସ୍ତରରେ ପ୍ରସ୍ତୁତ କରିବା ଲାଗି ଡିଜିଟାଲ ଉନ୍ନତିକରଣକୁ ମଧ୍ୟ ଏହି ପରିଯୋଜନାର ଅଂଶବିଶେଷ ଭାବେ ସାମିଲ କରାଯିବ।

ବର୍ତ୍ତମାନ, ଦୂରଦର୍ଶନ ୨୮ଟି ଆଞ୍ଚଳିକ ଚାନେଲ ସହିତ ୩୬ଟି ଟିଭି ଚାନେଲ ପରିଚାଳନା କରୁଛି ଏବଂ ଅଲ ଇଣ୍ଡିଆ ରେଡିଓ ୫୦୦ରୁ ଅଧିକ ପ୍ରସାରଣ କେନ୍ଦ୍ର ପରିଚାଳନା କରିଥାଏ। ଏହି ଯୋଜନା ଦେଶରେ ଏଆଇଆର ଏଫଏମ ଟ୍ରାନ୍ସମିଟର କଭରେଜକୁ ଭୌଗଳିକ କ୍ଷେତ୍ର ଅନୁସାରେ ୫୯ ପ୍ରତିଶତରୁ ବଢ଼ାଇ ୬୬ ପ୍ରତିଶତ ଏବଂ ଜନସଂଖ୍ୟା ହିସାବରେ ୬୮ ପ୍ରତିଶତରୁ ବଢ଼ାଇ ୮୦ ପ୍ରତିଶତ କରି ଦେବ। ଏହି ଯୋଜନାରେ ଦୂରବର୍ତ୍ତୀ, ଜନଜାତୀୟ, ବାମପନ୍ଥୀ ଉଗ୍ରବାଦ (ଏଲଡବ୍ଲୁଇ) ପ୍ରଭାବିତ, ସୀମାବର୍ତ୍ତୀ କ୍ଷେତ୍ର ଓ ଆକାଂକ୍ଷୀ ଜିଲ୍ଲାରେ ରହୁଥିବା ଲୋକମାନଙ୍କୁ ୮ ଲକ୍ଷ ଡିଡି ଫ୍ରି ଡିଶ ଡିଟିଏଚ ସେଟଅପ ବକ୍ସ (ଡିଟିବି) ନିଃଶୁଳ୍କ ବିତରଣ କରାଯିବାକୁ ପରିକଳ୍ପନା କରାଯାଇଛି।

ସାର୍ବଜନୀନ ପ୍ରସାରଣ ପରିଧିକୁ ବଢ଼ାଇବା ବ୍ୟତୀତ, ପ୍ରସାରଣ ଉପକରଣ ଯୋଗାଣ ଓ ପ୍ରତିଷ୍ଠା ସହ ଜଡ଼ିତ ନିର୍ମାଣ ଓ ସେବା ମାଧ୍ୟମରେ ପରୋକ୍ଷ ରୋଜଗାର ସୃଷ୍ଟି ହେବାର ସମ୍ଭାବନା ରହିଛି। ଟିଭି/ରେଡିଓ ପ୍ରଯୋଜନା, ଟ୍ରାନ୍ସମିଶନ ଓ ଆନୁସଙ୍ଗିକ ମିଡିଆ ସହ ଜଡ଼ିତ ସେବା ସମେତ ବିଭିନ୍ନ ବିଷୟବସ୍ତୁ ଓ କାର୍ଯ୍ୟକ୍ରମ ପ୍ରସ୍ତୁତି କ୍ଷେତ୍ରରେ ଅଭିଜ୍ଞ ବ୍ୟକ୍ତିଙ୍କ ନିମନ୍ତେ ପରୋକ୍ଷ ରୋଜଗାର ସୃଷ୍ଟି ହେବାର ଯଥେଷ୍ଟ ସମ୍ଭାବନା ରହିଛି। ଏହାବ୍ୟତୀତ, ଡିଡି ଫ୍ରି ଡିଶର ପ୍ରସାର ବିସ୍ତାର ପ୍ରକଳ୍ପ ଜରିଆରେ ଡିଡି ଫ୍ରି’ ଡିଶ ଡିଟିଏଚ ବକ୍ସ ନିର୍ମାଣରେ ମଧ୍ୟ ରୋଜଗାର ସୁଯୋଗ ସୃଷ୍ଟି ହେବ ବୋଲି ଆଶା କରାଯାଉଛି।

ଭାରତ ସରକାର ଦୂରଦର୍ଶନ ଓ ଆକାଶବାଣୀ (ପ୍ରସାରଣ ଭାରତୀ)ର ମୌଳିକ ଭିତ୍ତିଭୂମି ଓ ସେବାର ବିକାଶ, ଆଧୁନିକୀକରଣ ଓ ଦୃଢ଼ତା ପ୍ରତି ନିଜର ପ୍ରତିବଦ୍ଧତାକୁ ଦୋହରାଉଛନ୍ତି ଏବଂ ଏହା ଏକ ନିରନ୍ତର ପ୍ରକ୍ରିୟା ଅଟେ।

ନୂଆଦିଲ୍ଲୀ: କେନ୍ଦ୍ର ମନ୍ତ୍ରୀ ଅନୁରାଗ ସିଂ ଠାକୁର କହିଛନ୍ତି ଯେ, ଭାରତ ସରକାର ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ଗ୍ରହଣ କରିଛନ୍ତି। ସରକାରଙ୍କ ଆତଙ୍କବାଦ ମୁକାବିଲା ସମ୍ପର୍କରେ କେନ୍ଦ୍ର ମନ୍ତ୍ରୀ ଶ୍ରୀ ଠାକୁର ନିଜ ବାସଭବନରେ ଗଣମାଧ୍ୟମକୁ ବିସ୍ତୃତ ସୂଚନା ଦେଇଥିଲେ। ସେ କହିଥିଲେ ଯେ, ସରକାର ଗୋଟିଏ ପଟେ ବେଆଇନ କାର୍ଯ୍ୟକଳାପ ନିଷେଧ ଆଇନ (ୟୁଏପିଏ)କୁ ସୁଦୃଢ଼ କରିବା ଲାଗି ଆଇନଗତ ଦିଗରେ କାର୍ଯ୍ୟ କରିଛନ୍ତି। ଅନ୍ୟପଟେ ଜାତୀୟ ଯାଞ୍ଚ ଏଜେନ୍ସି (ସଂଶୋଧନ) ଆଇନ ପ୍ରଚଳନ କରିବା ଜରିଆରେ ଜାତୀୟ ଯାଞ୍ଚ ଏଜେନ୍ସି (ଏନଆଇଏ)କୁ ଏକ ବାସ୍ତବ ସଂଘୀୟ ଢାଞ୍ଚା ପ୍ରଦାନ କରିଛନ୍ତି । ଏସବୁ ସାମୂହିକ ପ୍ରୟାସ ଆତଙ୍କବାଦର ଇକୋସିଷ୍ଟମକୁ ଦୁର୍ବଳ କରୁଛି ।

କେନ୍ଦ୍ର ମନ୍ତ୍ରୀ କହିଥିଲେ ଯେ ଅନ୍ତର୍ଜାତୀୟ ମଞ୍ଚରେ ଭାରତ ସବୁବେଳେ ଆତଙ୍କବାଦ ବିରୋଧରେ ନିଜର ଚିନ୍ତା ବ୍ୟକ୍ତ କରି ଆସିଛି । ଅନ୍ତର୍ଜାତୀୟ ସମ୍ମିଳନୀ ଓ ବୈଠକରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆତଙ୍କବାଦ ବିରୋଧରେ ବିଶ୍ବକୁ ଏକଜୁଟ ହେବା ପାଇଁ ଆହ୍ବାନ କରି ଆସିଛନ୍ତି । ନିକଟରେ ଭାରତରେ ଇଣ୍ଟରପୋଲର ୯୦ତମ ସାଧାରଣ ସଭା ଅନୁଷ୍ଠିତ ହୋଇଥିଲା। ଏଥିରେ ସାରା ବିଶ୍ବରୁ ୨୦୦୦ରୁ ଅଧିକ ବିଦେଶୀ ଅତିଥି ଯୋଗ ଦେଇଥିଲେ। ଏହି ଅବସରରେ ‘ଆତଙ୍କବାଦ ବିରୋଧରେ ବିଶ୍ବସ୍ତରୀୟ କାର୍ଯ୍ୟାନୁଷ୍ଠାନ’ ପାଇଁ ଘୋଷଣା କରାଯାଇଥିଲା ବୋଲି ଶ୍ରୀ ଠାକୁର କହିଥିଲେ ।

ସେ ଆହୁରି କହିଥିଲେ ଯେ, ସର୍ଜିକାଲ ଷ୍ଟ୍ରାଇକ୍‌ ଠାରୁ ଆରମ୍ଭ କରି ବାଲାକୋଟ୍‌ ଏୟାରଷ୍ଟ୍ରାଇକ୍‌ ପର୍ଯ୍ୟନ୍ତ ଆତଙ୍କବାଦ ବିରୋଧରେ ସରକାରଙ୍କ ଦୃଢ଼ ସଂକଳ୍ପ ବାରମ୍ବାର ପ୍ରକାଶିତ ହୋଇଛି । ସେନାବାହିନୀର କାର୍ଯ୍ୟାନୁଷ୍ଠାନ ଯୋଗୁ ଜମ୍ମୁ ଓ କଶ୍ମୀରରେ ଆତଙ୍କବାଦୀ କାର୍ଯ୍ୟକଳାପ ୧୬୮% ହ୍ରାସ ପାଇଛି । ଅନୁରୂପ ଭାବେ ଆତଙ୍କବାଦକୁ ପାଣ୍ଠି ଯୋଗାଣ ମାମଲାରେ ୯୪% ଦଣ୍ଡବିଧାନ ହୋଇଛି ବୋଲି ଶ୍ରୀ ଠାକୁର କହିଥିଲେ ।

ଉତ୍ତରପୂର୍ବାଞ୍ଚଳରେ ଶାନ୍ତି ପ୍ରତିଷ୍ଠା ଲାଗି ସରକାରଙ୍କ ପଦକ୍ଷେପ ସମ୍ପର୍କରେ ସୂଚନା ଦେଇ ଶ୍ରୀ ଠାକୁର କହିଥିଲେ ଯେ ୨୦୧୪ ପରଠାରୁ ଉତ୍ତର ପୂର୍ବ ଭାରତରେ ଶାନ୍ତିର ସୂର୍ଯ୍ୟୋଦୟ ହୋଇଛି। ଏହି କ୍ଷେତ୍ରରେ ହିଂସାତ୍ମକ ଘଟଣାରେ ୮୦% ହ୍ରାସ ଦେଖିବାକୁ ମିଳିଛି ଏବଂ ନାଗରିକଙ୍କ ମୃତ୍ୟୁ ସଂଖ୍ୟା ୮୯ ପ୍ରତିଶତ ହ୍ରାସ ପାଇଛି । ଏଥିସହିତ ୨୦୧୪ ପରଠାରୁ ଏବେ ସୁଦ୍ଧା ୬ ହଜାରରୁ ଅଧିକ ଆତଙ୍କବାଦୀ ଆତ୍ମସମର୍ପଣ କରି ସାରିଛନ୍ତି । ବାମପନ୍ଥୀ ଉଗ୍ରବାଦ ବିରୋଧରେ ସରକାରଙ୍କ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ କାରଣରୁ ଦେଶରେ ହିଂସା ଘଟଣାରେ ୨୬୫ ପ୍ରତିଶତ ହ୍ରାସ ଦେଖିବାକୁ ମିଳିଛି ।

ସରକାର କେବଳ ସଶସ୍ତ୍ର କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି, ବରଂ ଏହା ଠାରୁ ଊର୍ଦ୍ଧ୍ବକୁ ଯାଇ ଦୀର୍ଘସ୍ଥାୟୀ କ୍ଷେତ୍ରୀୟ ଶାନ୍ତି ପ୍ରତିଷ୍ଠା ଲାଗି କାର୍ଯ୍ୟ କରିଛନ୍ତି । ସରକାରଙ୍କ ଦ୍ବାରା ସ୍ବାକ୍ଷରିତ ହୋଇଥିବା ଶାନ୍ତି ରାଜିନାମା ଏହାର ଏକ ଉଦାହରଣ ବୋଲି ଶ୍ରୀ ଠାକୁର କହିଥିଲେ । ଏହି ଅବସରରେ ସେ କହିଥିଲେ ଯେ ମୋଦୀ ସରକାରଙ୍କ ସମୟରେ – ଜାନୁଆରୀ ୨୦୨୦ରେ ବୋଡୋ ଶାନ୍ତି ରାଜିନାମା, ଜାନୁଆରୀ ୨୦୨୦ରେ ବ୍ରୁ-ରିୟାଙ୍ଗ ଶାନ୍ତି ରାଜିନାମା, ଏନଏଲଏଫଟି-ତ୍ରିପୁରୀ ରାଜିନାମା ଅଗଷ୍ଟ ୨୦୧୯, କାର୍ବି ଅଙ୍ଗଲଙ୍ଗ ରାଜିନାମା ସେପ୍ଟେମ୍ବର ୨୦୨୧, ଆସାମ-ମେଘାଳୟ ଆନ୍ତଃରାଜ୍ୟ ସୀମା ରାଜିନାମା ମାର୍ଚ୍ଚ ୨୦୨୨ ଆଦି ଶାନ୍ତି ଚୁକ୍ତି ସ୍ବାକ୍ଷରିତ ହୋଇଥିଲା।

ଏହି ଅବସରରେ ସଶସ୍ତ୍ର ସେନା ସ୍ବତନ୍ତ୍ର କ୍ଷମତା ଆଇନ ବିଷୟରେ ସୂଚନା ଦେଇ କେନ୍ଦ୍ର ମନ୍ତ୍ରୀ କହିଥିଲେ ଯେ ପୂର୍ବରୁ ଏହି ଆଇନ ଉଚ୍ଛେଦ ନେଇ କେବଳ ଆଲୋଚନା ହେଉଥିଲା। କିନ୍ତୁ ବର୍ତ୍ତମାନର ସରକାର ଏଏଫଏସପିଏକୁ ଉତ୍ତର ପୂର୍ବାଞ୍ଚଳର ଅଧିକାଂଶ ଭାଗ ଏବଂ ତ୍ରିପୁରା ଓ ମେଘାଳୟରୁ ସମ୍ପୂର୍ଣ୍ଣ ପ୍ରତ୍ୟାହାର କରି ନେଇଛନ୍ତି । ବର୍ତ୍ତମାନ ଅରୁଣାଚଳ ପ୍ରଦେଶରେ ଏହି ଆଇନ କେବଳ ୩ଟି ଜିଲ୍ଲାରେ ଲାଗୁ ହୋଇଛି । ଆସାମର ୬୦ ପ୍ରତିଶତ ଅଞ୍ଚଳ ଏଏଫଏସପିଏ ମୁକ୍ତ ହୋଇସାରିଛି । ୬ଟି ଜିଲ୍ଲା ଅଧୀନରେ ଆସୁଥିବା ୧୫ଟି ପୁଲିସ ଷ୍ଟେସନକୁ ଅଶାନ୍ତ କ୍ଷେତ୍ର ବର୍ଗରୁ ବାହାରକୁ ନିଆଯାଇସାରିଛି । ୭ଟି ଜିଲ୍ଲାର ୧୫ଟି ପୁଲିସ ଥାନା କ୍ଷେତ୍ରରୁ ବିବାଦୀୟ କ୍ଷେତ୍ର ବିଜ୍ଞପ୍ତି ପ୍ରତ୍ୟାହାର କରି ନିଆଯାଇଥିବା କେନ୍ଦ୍ର ମନ୍ତ୍ରୀ ସୂଚନା ଦେଇଥିଲେ ।

ଗତ ଆଠ ବର୍ଷ ମଧ୍ୟରେ ସରକାରଙ୍କ ଉଦ୍ଧାର କାର୍ଯ୍ୟ ବିଷୟରେ ମଧ୍ୟ କେନ୍ଦ୍ରମନ୍ତ୍ରୀ ସୂଚନା ଦେଇଥିଲେ । ସେ କହିଥିଲେ ଯେ ବିପଦରେ ପଡ଼ିଥିବା ଭାରତୀୟ ନାଗରିକଙ୍କୁ ଉଦ୍ଧାର କରିବା ଲାଗି ସରକାର ସର୍ବୋଚ୍ଚ ପ୍ରାଥମିକତା ଦେଇ ଆସିଛନ୍ତି । ସାରା ବିଶ୍ବରେ ଭାରତ ଉଦ୍ଧାର କାର୍ଯ୍ୟ କ୍ଷେତ୍ରରେ ଅଗ୍ରଣୀ ଭୂମିକା ନେଇଥିଲା। ଏ ସମ୍ପର୍କରେ ଶ୍ରୀ ଠାକୁର କହିଥିଲେ ଯେ, ଅପରେସନ ଗଙ୍ଗା ଅଧୀନରେ ଫେବୃଆରୀ-ମାର୍ଚ୍ଚ ୨୦୨୨ରେ ୨୨,୫୦୦ ନାଗରିକଙ୍କୁ ଯୁଦ୍ଧଗ୍ରସ୍ତ ୟୁକ୍ରେନରୁ ଉଦ୍ଧାର କରାଯାଇଥିଲା। ଅପରେସନ ଦେବୀ ଶକ୍ତି ମାଧ୍ୟମରେ ଆଫଗାନିସ୍ତାନରେ ଫସିଥିବା ୬୭୦ ଭାରତୀୟ ନାଗରିକଙ୍କୁ ଉଦ୍ଧାର କରାଯାଇଥିଲା। ଉଦ୍ଧାର କାର୍ଯ୍ୟର ସବୁଠୁ ବଡ଼ ସଫଳତା ହେଉଛି କୋଭିଡ ୧୯ ସଂକଟ ସମୟରେ ବନ୍ଦେ ଭାରତ ମିଶନ ଜରିଆରେ ୨୦୨୧-୨୨ରେ ୧.୮୩ କୋଟି ନାଗରିକଙ୍କୁ ଉଦ୍ଧାର କରି ଅଣାଯାଇଥିଲା। କୋଭିଡ ସଂକ୍ରମଣ ଆରମ୍ଭ ହୋଇଥିବା ଉହାନ ସହରରୁ ଭାରତ ୬୫୪ ଜଣଙ୍କୁ ଉଦ୍ଧାର କରିଥିଲା।

କେବଳ ଭାରତୀୟ ନୁହନ୍ତି, ବରଂ ବିଦେଶୀ ନାଗରିକଙ୍କୁ ମଧ୍ୟ ଭାରତ ସରକାର ସହାୟତା ଯୋଗାଇ ଦେଇଛନ୍ତି । ୨୦୧୬ରେ ଅପରେସନ ସଙ୍କଟମୋଚନ ଜରିଆରେ ଦକ୍ଷିଣ ସୁଦାନରୁ ୨ ଜଣ ନେପାଳୀ ନାଗରିକଙ୍କ ସମେତ ୧୫୫ ଜଣଙ୍କୁ ଉଦ୍ଧାର କରାଯାଇଥିଲା। ଅପରେସନ ମୈତ୍ରୀ ଜରିଆରେ ନେପାଳରୁ ୫ହଜାର ଭାରତୀୟ ଏବଂ ୧୭୦ ଜଣ ବିଦେଶୀ ନାଗରିକଙ୍କୁ ଉଦ୍ଧାର କରାଯାଇଥିଲା। ଅପରେସନ ରାହତ ଅଧୀନରେ ୟେମେନରୁ ୬,୧୭୦ ଜଣ ଲୋକଙ୍କୁ ଉଦ୍ଧାର କରାଯାଇଥିଲା। ଏମାନଙ୍କ ମଧ୍ୟରେ ୧୯୬୨ ଜଣ ଭାରତୀୟ ନାଗରିକ ଥିଲେ ।

କେନ୍ଦ୍ର ମନ୍ତ୍ରୀ କହିଥିଲେ ଯେ ଏସବୁ ପ୍ରୟାସ ବିଶ୍ବରେ ଭାରତ ପାଇଁ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଛି । ଭାରତ ଏଭଳି ଏକ ରାଷ୍ଟ୍ର ଯାହା ସଙ୍କଟ ସମୟରେ ଅନ୍ୟ ଦେଶକୁ ସହାୟତା କରୁଛି ଏବଂ ଆତଙ୍କବାଦ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ଅନ୍ୟପଟେ ପଡ଼ୋଶୀ ଦେଶ କେବଳ ଆତଙ୍କବାଦକୁ ଆଶ୍ରୟ ଦେବା ସହିତ ହିଂସାର ମୂଲ୍ୟବୋଧକୁ ପ୍ରସାରିତ କରୁଛି ।

ନୂଆଦିଲ୍ଲୀ: ସିଓପି ୨୭ ସମ୍ମିଳନୀ ଅବସରରେ ୟୁଏନ୍‌ଏଫ୍‌ସିସିସି ପାଭିଲିୟନରେ କ୍ଷୁଦ୍ର ଦ୍ୱୀପାଞ୍ଚଳ ବିକାଶଶୀଳ ରାଷ୍ଟ୍ର (ଏସ୍‌ଆଇଡିଏସ୍‌)ରେ ଦୀର୍ଘସ୍ଥାୟୀ ଭିତ୍ତିଭୂମି ଢାଞ୍ଚାକୁ ତ୍ୱରାନ୍ୱିତ କରିବା ଉପରେ ଏକ ଅଧିବେଶନ ଅନୁଷ୍ଠିତ ହୋଇଥିଲା। ଭାରତ ସରକାରଙ୍କ କେନ୍ଦ୍ର ପରିବେଶ ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପିନ୍ଦର ଯାଦବ, ମରିସସ୍ ସରକାରଙ୍କର ପରିବେଶ, କଠିନ ବର୍ଜ୍ୟବସ୍ତୁ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ କବିଦାସ ରମାନୋ, ଜାମାଇକା ସରକାରଙ୍କ ଆର୍ଥିକ ଅଭିବୃଦ୍ଧି ଏବଂ କର୍ମନିଯୁକ୍ତି ସୃଷ୍ଟି ମନ୍ତ୍ରଣାଳୟର ସିନେଟର ମେଥ୍ୟୁ ସମୁଦା ଏବଂ ଏଓଏସ୍‌ଆଇଏସ୍ ଏବଂ ଫିଜିର ପ୍ରତିନିଧିମାନେ ଏହି ଅଧିବେଶନରେ ଅଂଶ ଗ୍ରହଣ କରିଥିଲେ।

ଏହି ଅଧିବେଶନର କାର୍ଯ୍ୟସୂଚୀ ଥିଲା ଆଇଆରଆଇଏସ୍ ଦୃଷ୍ଟିକୋଣକୁ ଉପସ୍ଥାପନ କରିବା ଏବଂ ପ୍ରଥମ ‘ପ୍ରସ୍ତାବ ପାଇଁ ଆହ୍ୱାନ’ ସମ୍ପର୍କରେ ଘୋଷଣା କରିବା। ଏହି ଅଧିବେଶନରେ ଆଇଆରଆଇଏସ୍ ଦୃଷ୍ଟିକୋଣ ୨୦୨୨ – ୨୦୩୦ ଉପରେ ଧ୍ୟାନ କେନ୍ଦ୍ରିତ ହୋଇଥିଲା ଏବଂ ମୁଖ୍ୟ ସକ୍ଷମ କାରକ ଗୁଡିକ ଉପରେ ଆଲୋକପାତ କରାଯାଇଥିଲା, ଯାହାକି ପ୍ରଥମ ‘ପ୍ରସ୍ତାବ ପାଇଁ ଆହ୍ୱାନ’ ଅଧୀନରେ ଆଇଆରଆଇଏସ୍ ପ୍ରକଳ୍ପ ଗୁଡିକର କାର୍ଯ୍ୟାନ୍ୱୟନର ସୁବିଧା ପ୍ରଦାନ କରିବ। ଆଇଆରଆଇଏସ୍ ପ୍ରଥମ ପଦକ୍ଷେପ ହେବ, ଯାହା ଗତ ସପ୍ତାହରେ ସିଓପି ୨୭ ରେ ବିପର୍ଯ୍ୟୟ ପ୍ରଶମନ ଭିତ୍ତିଭୂମି (ସିଡିଆର୍‌ଆଇ) ଦ୍ୱାରା ଆରମ୍ଭ ହୋଇଥିବା ଭିତ୍ତିଭୂମି ଦୀର୍ଘସ୍ଥାୟିତ୍ବ ତ୍ୱରାନ୍ୱିତକରଣ ପାଣ୍ଠି (ଆଇଆରଏଏଫ୍‌) ମାଧ୍ୟମରେ ଆରମ୍ଭ ହେବ।

ନିଜର ବକ୍ତବ୍ୟରେ ଶ୍ରୀ ଭୂପିନ୍ଦର ଯାଦବ କହିଥିଲେ ଯେ, “ବିଶ୍ୱବାସୀଙ୍କ ନିକଟରେ ‘ସହନଶୀଳ ଦ୍ୱୀପାଞ୍ଚଳ ରାଷ୍ଟ୍ର ଗୁଡ଼ିକଙ୍କ ପାଇଁ ଭିତ୍ତିଭୂମି’ (ଇନ୍‌ଫ୍ରାଷ୍ଟ୍ରକଚର ଫର ରେଜିଲିଏଣ୍ଟ ଆଇଲ୍ୟାଣ୍ଡ୍ ଷ୍ଟେଟସ୍‌’ (ଆଇଆରଆଇଏସ୍‌)ର ଦର୍ଶନକୁ ଉପସ୍ଥାପନ କରିବା ଏବଂ ଆଇଆରଆଇଏସ୍ ଅଧୀନରେ ପ୍ରକଳ୍ପ ଗୁଡିକ ଆରମ୍ଭ ପାଇଁ ପ୍ରଥମ ‘ପ୍ରସ୍ତାବ ପାଇଁ ଆହ୍ୱାନ’ ଘୋଷଣା କରିବା ନିମନ୍ତେ ଆପଣ ମାନଙ୍କ ସମସ୍ତଙ୍କ ସହିତ ଯୋଡି ହୋଇ ରହିବା ଯୋଗୁଁ ମୁଁ ଆନନ୍ଦ ଅନୁଭବ କରୁଛି।

ସେ ଆହୁରି କହିଥିଲେ ଯେ, ‘‘ଆପଣମାନେ ସମସ୍ତେ ଜାଣନ୍ତି ଯେ, ଆଇଆରଆଇଏସ୍ ହେଉଛି ଏକ ପ୍ରମୁଖ ରଣନୀତିକ ପଦକ୍ଷେପ ଯାହାକି ଏସ୍‌ଆଇଡିଏସ୍ ନିମନ୍ତେ ନମନୀୟତା ଏବଂ ଜଳବାୟୁ ଅନୁକୂଳନ ସମାଧାନ ପାଇବା ତଥା ବିତରଣ କରିବା ପାଇଁ ଏକ ଉପକରଣ ଭାବରେ ଡିଜାଇନ୍ କରାଯାଇଛି। ଏସବୁ ଦ୍ବୀପ ରାଷ୍ଟ୍ର ସବୁଠୁ ବିପଦ ପ୍ରବଣ ତଥା ଦୁର୍ବଳ ଦେଶ ମାନଙ୍କ ମଧ୍ୟରେ ଅଛନ୍ତି।

ସହ – ନିର୍ମାଣ ଏବଂ ପରିପକ୍ୱତାର ପ୍ରମୁଖ ମାର୍ଗଦର୍ଶିକା ଉପରେ ଆଧାରିତ, ଆଇଆରଆଇଏସ୍‌କୁ ଭାରତ, ବ୍ରିଟେନ, ଅଷ୍ଟ୍ରେଲିଆ, ଜାମାଇକା, ମରିସସ୍ ଏବଂ ଫିଜି ଦ୍ୱାରା ସିଓପି ୨୬ ରେ ବିଶ୍ୱ ନେତୃବୃନ୍ଦ ସମ୍ମିଳନୀ (ୱର୍ଲ୍ଡ ଲିଡର୍ସ ସମ୍ମିଟ୍‌) ରେ ଆରମ୍ଭ କରା ଯାଇଥିଲା। ଏହା ସିଆଇଡିଏସ୍‌ର ସ୍ଥିର ସମାଧାନ ଉପରେ କ୍ରସ୍ ଲର୍ଣ୍ଣିଂ, ଭାଗିଦାରୀତା ଏବଂ ସହଯୋଗର ସୁବିଧା ପାଇଁ ଏକ ମିଳିତ ମଞ୍ଚ।

ଭାଇ ଓ ଭଉଣୀମାନେ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର ଏକ ପରିବର୍ତ୍ତନଶୀଳ ଜଳବାୟୁ ବ୍ୟବସ୍ଥାରେ ସିଆଇଡିଏସ୍‌ର ସ୍ୱାର୍ଥ ରକ୍ଷା କରିବାକୁ ଦୃଢ଼ ଭାବରେ ପ୍ରତିବଦ୍ଧ ଅଟନ୍ତି।

ଆଜି , ଆମେ ଜାଣିଛେ ଯେ ଅନ୍ୟ ସମସ୍ତ ପରିବେଶିଗତ ସମସ୍ୟା ମଧ୍ୟରେ ଜଳବାୟୁ ପରିବର୍ତ୍ତନ ହେଉଛି ସର୍ବାଧିକ ଗୁରୁତ୍ୱପୂର୍ଣ୍ଣ ଆହ୍ୱାନ। ସଞ୍ଚୟୀ  ନିର୍ଗମନ ଉପରେ ନିୟନ୍ତ୍ରଣ ବିନା, ଅନ୍ୟ ପରିବେଶ ଆହ୍ୱାନ ଗୁଡିକ ସହିତ ସଫଳତା, ଯଦିଓ ସେଗୁଡିକ ହାସଲ କରା ଯାଇପାରେ , ତଥାପି ତାହା ସ୍ଥାୟୀ ମୂଲ୍ୟ ବହନ କରିବ ନାହିଁ।

ଜଳବାୟୁ ପରିବର୍ତ୍ତନ ଉପରେ ଉଭୟ ଘରୋଇ ସ୍ତରରେ କାର୍ଯ୍ୟ କରିବା ନିମନ୍ତେ ଏବଂ ବହୁପକ୍ଷୀୟ ସହଯୋଗ ପାଇଁ ଭାରତ ପ୍ରତିବଦ୍ଧ ଅଟେ। ପୃଥିବୀର ସୁରକ୍ଷା ପାଇଁ ଆହ୍ୱାନରେ ଆମେ ସମସ୍ତ ବିଶ୍ୱ ସ୍ତରୀୟ ପରିବେଶ ସମସ୍ୟା ଗୁଡିକ ସହିତ ଲଢ଼େଇ ଜାରି ରଖିବୁ। କିନ୍ତୁ ବିଶ୍ୱ ତାପନ (ଗ୍ଲୋବାଲ ୱାର୍ମିଂ) ଆମକୁ ଚେତାବନୀ ଦେଇଛି ଯେ, କାହାରିକୁ ପଛରେ ଛାଡ଼ିନଦେଇ ସମାନତା ଏବଂ ଆନ୍ତର୍ଜାତିକ ସହଯୋଗ ମାଧ୍ୟମରେ ସଫଳତା ମିଳିପାରିବ। ଯେଉଁଠାରେ ସେହି ସର୍ବାଧିକ ଭାଗ୍ୟବାନ ଲୋକମାନେ ନିଶ୍ଚିତ ରୂପେ ନେତୃତ୍ୱ ନେବା ଜରୁରି। କୌଣସି ରାଷ୍ଟ୍ର ଏକୁଟିଆ ଏହି ଯାତ୍ରା କରି ପାରିବ ନାହିଁ । ସଠିକ୍ ବୁଝାମଣା, ସଠିକ୍ ବିଚାର ଏବଂ ସହଯୋଗିତା ମୂଳକ କାର୍ଯ୍ୟ – ଏଗୁଡିକ ପରବର୍ତ୍ତୀ ନିର୍ଣ୍ଣାୟକ ଅର୍ଦ୍ଧ ଶତାବ୍ଦୀ ପାଇଁ ଆମର ପଥ ସ୍ଥିର କରିବା ଆବଶ୍ୟକ।

ବନ୍ଧୁଗଣ,

ଆଇପିସିସିର ଏଆର୍‌ ୬ ରିପୋର୍ଟ ଗୁଡିକ ଆମକୁ ସ୍ପଷ୍ଟ ଭାବରେ ଏହା ସୂଚିତ କରୁଛି ଯେ, ଉତ୍ତାପ ବୃଦ୍ଧି ପାଇଁ ଅଙ୍ଗାରକାମ୍ଳ ଦାୟୀ। ଆଇପିସିସି ରିପୋର୍ଟ ଏବଂ ଅନ୍ୟାନ୍ୟ ସର୍ବୋତ୍ତମ ଉପଲବ୍ଧ ବିଜ୍ଞାନ ମଧ୍ୟ ଏହା ଦର୍ଶାଏ ଯେ, ଜଳବାୟୁ ପରିବର୍ତ୍ତନ ପ୍ରତି ଅତ୍ୟଧିକ ସମ୍ବେଦନଶୀଳ ଥିବା ଦେଶମାନଙ୍କ ମଧ୍ୟରେ ଭାରତ ଅନ୍ତର୍ଭୁକ୍ତ। ଏହି କାରଣରୁ  ଦ୍ୱୀପପୁଞ୍ଜ ଦେଶ ଏବଂ ଅନ୍ୟ ଦେଶମାନଙ୍କର ସ୍ଥିତି ପ୍ରତି ଆମେ ଅତ୍ୟନ୍ତ ସହାନୁଭୂତିଶୀଳ। ଭାରତ, ୭୫୦୦ କିଲୋମିଟରରୁ ଅଧିକ ବେଳାଭୂମି ଏବଂ ଏହାର ଆଖପାଖ ସମୁଦ୍ରରେ ୧୦୦୦ରୁ ଅଧିକ ଦ୍ୱୀପପୁଞ୍ଜ ରହିଛି। ଜୀବନ ଓ ଜୀବିକା ପାଇଁ ବହୁ ଲୋକସମୁଦ୍ର ଉପରେ ନିର୍ଭରଶୀଳ। ତଟୀୟ ଇଲାକାରେ ବାସ କରୁଥିବା ଏକ ବିପୁଳ ଜନସଂଖ୍ୟା ସମେତ ଭାରତ ମଧ୍ୟ ପରିବେଶ ଦୃଷ୍ଟିକୋଣରୁ ବିଶ୍ୱ ସ୍ତରରେ ଏକ ଅତ୍ୟନ୍ତ ଅସୁରକ୍ଷିତ ଦେଶ। କେବଳ ଏକ ଉଦାହରଣ ଦେବାକୁ ଯାଇ କୁହା ଯାଇପାରେ ଯେ ୧୯୯୫ – ୨୦୨୦ ମଧ୍ୟରେ ଭାରତ ୧୦୫୮ଟି ଜଳବାୟୁ ବିପର୍ଯ୍ୟୟର ସାମ୍ନା କରିଛି। ମୁଣ୍ଡପିଛା ନିର୍ଗମନକୁ ବିଚାରକୁ ନେଇ ତୁଳନା ପାଇଁ ଭାରତର ନିର୍ଗମନ ଆଜି ମଧ୍ୟ ବିଶ୍ୱର ହାରାହାରି ଏକ ତୃତୀୟାଂଶ ଅଟେ। ଯଦି ସମଗ୍ର ବିଶ୍ୱ ଭାରତ ପରି ମୁଣ୍ଡପିଛା ସ୍ତରରେ ନିର୍ଗମନ କରେ ତା’ହେଲେ ଉପଲବ୍ଧ ସର୍ବୋତ୍ତମ ବିଜ୍ଞାନ ଏହା ସୂଚିତ କରିଥାଏ ଯେ  କୌଣସି ଜଳବାୟୁ ସଙ୍କଟ ହେବ ନାହିଁ।

ମୁଁ ନିଶ୍ଚିତ ଯେ, ଆଜିର ବୈଠକ ଆଇଆରଆଇଏସ୍ ପ୍ରକଳ୍ପ ଗୁଡିକୁ କାର୍ଯ୍ୟକାରୀ କରିବାର ଦୀର୍ଘମିଆଦୀ ଦୃଷ୍ଟିକୋଣ ଉପରେ ଧ୍ୟାନ କେନ୍ଦ୍ରିତ କରିବ । ଏଠାରେ ସ୍ଥିର ହୋଇଥିବା ଦୃଷ୍ଟିକୋଣ ଏସ୍‌ଆଇଡିଏସ୍ ପାଇଁ ଉତ୍ସ ଏବଂ କ୍ଷମତାକୁ ଏକତ୍ର କରି ସେମାନଙ୍କର ସବୁଠାରୁ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ଆହ୍ୱାନର ସମାଧାନ କରିବା ପାଇଁ ଏକ ସୁଯୋଗ ପ୍ରଦାନ କରିବାରେ ସାହାଯ୍ୟ କରିବ ।

ଭାଇ ଓ ଭଉଣୀମାନେ

ଆଇଆରଆଇଏସ୍ ମାଧ୍ୟମରେ ଭାରତ ବସୁଧୈବ କୁଟୁମ୍ବକମ୍ ବା ବିଶ୍ୱ ଏକ ପରିବାର – ଦର୍ଶନକୁ କାର୍ଯ୍ୟକାରୀ କରୁଛି । ସମସ୍ତଙ୍କ ପାଇଁ ଏକ ଉନ୍ନତ ତଥା ନିରାପଦ ଗ୍ରହ ସୃଷ୍ଟି କରିବା ନିମନ୍ତେ ସହଭାଗୀ ମାନଙ୍କ ସହ ଜଳବାୟୁ ପରିବର୍ତ୍ତନ ରୂପକ ସମସ୍ୟାର ସମାଧାନ କରିବାକୁ ପ୍ରତିବଦ୍ଧତା ପ୍ରଦର୍ଶନ କରୁଛି ।

ପରିଶେଷରେ, ଆଇଆର୍‌ଆଇଏସ୍‌ର ମୂଳ କଥାକୁ ପ୍ରଭାବଶାଳୀ ଢଙ୍ଗରେ ବ୍ୟକ୍ତ କରିଥିବା ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ବକ୍ତବ୍ୟକୁ ଉଦ୍ଧାର କରି ମୁଁ ନିଜର ବକ୍ତବ୍ୟ ଶେଷ କରିବାକୁ ଚାହେଁ ।

ସେ ଯାହା କହିଛନ୍ତି, ମୁଁ ସେଥିରୁ କିଛି କହୁଛି –

“ସିଡିଆର୍‌ଆଇ କିମ୍ବା ଆଇଆର୍‌ଆଇଏସ୍ କେବଳ ଭିତ୍ତିଭୂମି ଢାଞ୍ଚାର ବିଷୟ ନୁହେଁ, ଏହା ମାନବ କଲ୍ୟାଣର ସବୁଠାରୁ ସମ୍ବେଦନଶୀଳ ଦାୟିତ୍ୱର ଏକ ଅଂଶ ଅଟେ । ଏହା ମାନବ ଜାତି ପ୍ରତି ଆମ ସମସ୍ତଙ୍କର ସାମୂହିକ ଦାୟିତ୍ୱ ଅଟେ । ଏହା, ଏକ ପ୍ରକାର ଦେଖିବାକୁ ଗଲେ, ଆମର ପାପ ପାଇଁ ଏକ ସାଧାରଣ ପ୍ରାୟଶ୍ଚିତ ଅଟେ ।’

ସିଡିଆର୍‌ଆଇ ଏବଂ ଆଇଆର୍‌ଆଇଏସ୍ ବିଷୟରେ

ନ୍ୟୁୟର୍କରେ ସେପ୍ଟେମ୍ବର ୨୦୧୯ ରେ ମାନନୀୟ ପ୍ରଧାନମନ୍ତ୍ରୀଙ୍କ ଦ୍ୱାରା ବିପର୍ଯ୍ୟୟ ସହନଶୀଳ ଭିତ୍ତିଭୂମି (ସିଡିଆର୍‌ଆଇ) ନିମନ୍ତେ ମେଣ୍ଟ ଆରମ୍ଭ କରା ଯାଇଥିଲା । ସ୍ଥାୟୀ ବିକାଶକୁ ସମର୍ଥନ କରି ଜଳବାୟୁ ଏବଂ ବିପର୍ଯ୍ୟୟ ବିପଦକୁ ନୂତନ ତଥା ବିଦ୍ୟମାନ ଭିତ୍ତିଭୂମି ପ୍ରଣାଳୀର ସହନଶୀଳତାକୁ ପ୍ରୋତ୍ସାହିତ କରିବା ଏହାର ଲକ୍ଷ୍ୟ ରହିଛି । ମୌଳିକ ସେବା ଗୁଡିକରେ ସର୍ବଭାରତୀୟ ପ୍ରବେଶକୁ ବ୍ୟାପକ କରିବା, ସମୃଦ୍ଧି ଏବଂ ସଠିକ୍ କାର୍ଯ୍ୟକୁ ସକ୍ଷମ କରିବା ପାଇଁ ସ୍ଥାୟୀ ବିକାଶ ଲକ୍ଷ୍ୟ ଗୁଡିକର ଆବଶ୍ୟକତା ପ୍ରତି ପ୍ରତିକ୍ରିୟା ପ୍ରକାଶ କରିବାକୁ ସିଡିଆର୍‌ଆଇ ନମନୀୟ ଭିତ୍ତିଭୂମିର ଦ୍ରୁତ ବିକାଶକୁ ପ୍ରୋତ୍ସାହିତ କରେ ।

ଭାରତ ସରକାର ଏହାର ଡିଜାଇନ୍ ପର୍ଯ୍ୟାୟ ପରେ ଆଇଆର୍‌ଆଇଏସ୍‌ର ସୃଷ୍ଟି ଏବଂ କାର୍ଯ୍ୟକାରିତା କ୍ଷେତ୍ରରେ ମେଣ୍ଟକୁ ସମର୍ଥନ କରିଛନ୍ତି ।

ଆଇଆର୍‌ଆଇଏସ୍ ମାଧ୍ୟମରେ, ଭାରତ ସରକାର ଲକ୍ଷ୍ୟ ରଖିଛନ୍ତି ଯେ, ସାରା ବିଶ୍ୱରେ ଏସ୍‌ଆଇଡିଏସ୍‌କୁ ବିପର୍ଯ୍ୟୟ ଏବଂ ଜଳବାୟୁ ବିପଦକୁ ସମାଧାନ କରିବାରେ ନିଜର ନୂତନ ତଥା ବିଦ୍ୟମାନ ଭିତ୍ତିଭୂମିକୁ ସ୍ଥାୟୀ କରିବାରେ ସହାୟତା ପ୍ରଦାନ କରିବେ ।

ଆଇଆର୍‌ଆଇଏସ୍ ବିଷୟରେ ଅଧିକ ସୂଚନା ପାଇଁ ଏଠାରେ କ୍ଲିକ୍ କରନ୍ତୁ ।

ନୂଆଦିଲ୍ଲୀ: କେନ୍ଦ୍ର ମତ୍ସ୍ୟ, ପଶୁସମ୍ପଦ ଓ ଦୁଗ୍ଧ ଏବଂ ସୂଚନା ଓ ପ୍ରସାରଣ ରାଷ୍ଟ୍ରମନ୍ତ୍ରୀ ଡକ୍ଟର ଏଲ.ମୁରୁଗାନ ପିଆଇବିର ବୈଦ୍ୟୁତିକ କାର୍ ଚଳାଚଳକୁ ପତାକା ଦେଖାଇ ଶୁଭାରମ୍ଭ କରିଛନ୍ତି।

ଏହି ଅବସରରେ ଡକ୍ଟର ଏଲ୍ ମୁରୁଗାନ୍ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ଦର୍ଶନରୁ ପ୍ରେରଣା ନେଇ ଭାରତ ସରକାର ଦେଶରେ ବୈଦ୍ୟୁତିକ ଯାନ ବ୍ୟବହାରକୁ ପ୍ରୋତ୍ସାହିତ କରିବା ଏବଂ ଏହାକୁ ମୁଖ୍ୟ ସ୍ରୋତରେ ବ୍ୟବହାର କରିବା ପାଇଁ ଅନେକ ଆଭିମୁଖ୍ୟ ଗ୍ରହଣ କରିଛନ୍ତି।

ଡକ୍ଟର ଏଲ୍ ମୁରୁଗାନ୍ କହିଛନ୍ତି ଯେ ବୈଦ୍ୟୁତିକ କାରଗୁଡିକର ଚାହିଦାକୁ ଆହୁରି ବୃଦ୍ଧି ପାଇଁ ଭାରତ ସରକାର ଲକ୍ଷ୍ୟ ରଖିଛନ୍ତି। ୨୦୨୩ ସୁଦ୍ଧା କେନ୍ଦ୍ର ସରକାରଙ୍କ ଅଧୀନରେ ଥିବା ସମସ୍ତ ବିଭାଗ ଦ୍ୱାରା ଖରିଦ ହେଉଥିବା କିମ୍ବା ଭଡାରେ ଆସୁଥିବା କାର ମଧ୍ୟରୁ ଅତିକମରେ ଏକ ତୃତୀୟାଂଶ ବୈଦ୍ୟୁତିକ କାର ହେବ। ସେହି ଲକ୍ଷ୍ୟ ଅନୁଯାୟୀ ଆଜି ୧୪ ଟି କାର ବଦଳାଇଥିବାରୁ ସେ ପତ୍ର ସୂଚନା କାର୍ଯ୍ୟାଳୟକୁ ପ୍ରଶଂସା କରିଥିଲେ।

ଭୁବନେଶ୍ବର: ଭାରତ ସରକାରଙ୍କ କୃଷି ଏବଂ କୃଷକ କଲ୍ୟାଣ ମନ୍ତ୍ରଣାଳୟ ଅଧୀନ ଭାରତୀୟ କୃଷି ଗବେଷଣା ପରିଷଦ (ଆଇସିଏଆର)ର ଆଞ୍ଚଳିକ କମିଟି-୨ର ୨୬ତମ ବୈଠକ ଅନୁଷ୍ଠିତ ହୋଇଯାଇଛି। କଟକସ୍ଥିତ ଆଇସିଏଆର-ଜାତୀୟ ଧାନ ଗବେଷଣା ପ୍ରତିଷ୍ଠାନ ଠାରେ ଶୁକ୍ରବାର ଅନୁଷ୍ଠିତ ଏହି ବୈଠକରେ ପଶ୍ଚିମବଙ୍ଗ, ଓଡ଼ିଶା, ତେଲଙ୍ଗାନା, ଆନ୍ଧ୍ରପ୍ରଦେଶ ଏବଂ କେନ୍ଦ୍ର ଶାସିତ ପ୍ରଦେଶ ଆଣ୍ଡାମାନ ଓ ନିକୋବାର ଦ୍ବୀପସମୂହର ପ୍ରତିନିଧିମାନେ ଅଂଶଗ୍ରହଣ କରିଥିଲେ।

ଭର୍ଚୁଆଲ ମାଧ୍ୟମରେ ବୈଠକର ଉଦଘାଟନୀ ଅଧିବେଶନକୁ ସମ୍ବୋଧିତ କରି କେନ୍ଦ୍ର କୃଷି ଏବଂ କୃଷକ କଲ୍ୟାଣ ରାଷ୍ଟ୍ର ମନ୍ତ୍ରୀ ଶ୍ରୀ କୈଳାସ ଚୌଧୁରୀ କହିଥିଲେ ଯେ, କୃଷି କ୍ଷେତ୍ରରେ ଆମର ଗବେଷଣା ଓ ବିକାଶ କାର୍ଯ୍ୟକୁ ଆହୁରି ତ୍ବରାନ୍ବିତ କରିବାର ଆବଶ୍ୟକତା ରହିଛି ଏବଂ ଏହାର ଫଳାଫଳକୁ ତୃଣମୂଳସ୍ତରରେ କୃଷକଙ୍କ ନିକଟରେ ପହଞ୍ଚାଇବା ଜରୁରି। ଚାଷୀଙ୍କ ଆୟ ବୃଦ୍ଧି କରିବାକୁ ହେଲେ, ଋଣ ବୋଝ କମାଇବାର ଆବଶ୍ୟକତା ରହିଛି। ଏଥିସହିତ ସେମାନଙ୍କୁ ବିହନ, ବଜାର ସୁବିଧା ଯୋଗାଇ ଦେବା ସହ ପଣ୍ୟାଗାର ବ୍ୟବସ୍ଥା କରିବା ମଧ୍ୟ ଜରୁରି। କେନ୍ଦ୍ର ସରକାର ସବୁବେଳେ ସହାୟତା ଦେବା ଲାଗି ପ୍ରସ୍ତୁତ ଅଛନ୍ତି, ତେବେ ରାଜ୍ୟ ସରକାର କ୍ଷେତ୍ରୀୟ ସ୍ତରରେ ସକ୍ରିୟ ଭାବେ କାର୍ଯ୍ୟ କରିବାର ଆବଶ୍ୟକତା ରହିଛି ବୋଲି କେନ୍ଦ୍ର ମନ୍ତ୍ରୀ କହିଥିଲେ।

ପ୍ରାକୃତିକ କୃଷି ଉପରେ ଗୁରୁତ୍ବାରୋପ କରି କେନ୍ଦ୍ର ମନ୍ତ୍ରୀ କହିଥିଲେ ଯେ, ରାସାୟନିକ, ସାର ଆଧାରିତ କୃଷି ଠାରୁ ଦୂରେଇ ଯିବା ବର୍ତ୍ତମାନ ସମୟର ଆବଶ୍ୟକତା। ଚାଷୀମାନଙ୍କୁ ଉନ୍ନତ ଜ୍ଞାନକୌଶଳର ସୁବିଧା ଯୋଗାଇ ଦେବା ଆବଶ୍ୟକ। ଏଥିପାଇଁ କେବଳ ଗବେଷଣା ଯଥେଷ୍ଟ ନୁହେଁ, ଗବେଷଣାରୁ ମିଳୁଥିବା ଅନ୍ତିମ ଉତ୍ପାଦକୁ ଚାଷୀଙ୍କ ନିକଟରେ ପହଞ୍ଚାଇବା ଜରୁରି ବୋଲି ସେ କହିଥିଲେ।

କେନ୍ଦ୍ର ମନ୍ତ୍ରୀ କହିଥିଲେ ଯେ ଆତ୍ମନିର୍ଭର ଭାରତ ନିର୍ମାଣ କରିବାକୁ ହେଲେ କୃଷି କ୍ଷେତ୍ରରେ ଆତ୍ମନିର୍ଭରଶୀଳ ହେବାର ଆବଶ୍ୟକତା ରହିଛି। ଏହି ବୈଠକରେ ଅଂଶଗ୍ରହଣ କରିଥିବା ଅଂଶୀଦାରମାନଙ୍କୁ କେନ୍ଦ୍ର ମନ୍ତ୍ରୀ ଅଭିନନ୍ଦନ ଜଣାଇବା ସହିତ ବୈଠକର ଫଳାଫଳ କୃଷି କ୍ଷେତ୍ରର ବିକାଶ ଦିଗରେ ଦୀର୍ଘସ୍ଥାୟୀ ପ୍ରଭାବ ପକାଇବ ବୋଲି ସେ ଆଶା କରିଥିଲେ।

ସେ ଜୋର ଦେଇ କହିଥିଲେ ଯେ, ପ୍ରଗତି ଅନୁଧ୍ୟାନ କରିବା ଲାଗି ଏଭଳି ସମୀକ୍ଷା ଜରୁରି, କିନ୍ତୁ ନିର୍ଦ୍ଦିଷ୍ଟ ସମସ୍ୟାର ସମାଧାନ ପାଇଁ ଯୋଜନା ପ୍ରସ୍ତୁତି କରିବାର ଆବଶ୍ୟକତା ରହିଛି। ଓଡ଼ିଶା, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ ଏବଂ ତେଲଙ୍ଗାନା ଭଳି ରାଜ୍ୟମାନେ ଅଧିକ ମାତ୍ରାରେ ପ୍ରତିକୂଳ ପାଣିପାଗ ପରିସ୍ଥିତିର ସମ୍ମୁଖିନ ହେଉଛନ୍ତି। ତେଣୁ, ଚାଷୀଙ୍କ ପାଇଁ ଜଳବାୟୁ ଅନୁକୂଳ ସ୍ମାର୍ଟ ପ୍ରଯୁକ୍ତି ବିକଶିତ କରାଯିବାର ଆବଶ୍ୟକତା ରହିଛି । ସେ ବିଶେଷ ଜୋର ଦେଇ କହିଥିଲେ ଯେ କୃଷି କାର୍ଯ୍ୟକଳାପକୁ ଏକ ବାଣିଜ୍ୟିକ ଉଦ୍ୟୋଗ ଭାବେ ଗ୍ରହଣ କରାନଯିବା ପର୍ଯ୍ୟନ୍ତ, ଏହାର ସମ୍ପୂର୍ଣ୍ଣ ସମ୍ଭାବ୍ୟ ଲାଭ ଏବଂ ଲାଭଜନକ ପ୍ରତିଫଳ ମିଳିପାରିବ ନାହିଁ।

କୃଷି ଗବେଷଣା ଓ ଶିକ୍ଷା ବିଭାଗର ସଚିବ ତଥା ଆଇସିଏଆର ମହାନିର୍ଦ୍ଦେଶକ ଡକ୍ଟର ହିମାଂଶୁ ପାଠକ ଏହି କାର୍ଯ୍ୟକ୍ରମର ଉଦ୍ଦେଶ୍ୟ ଉପରେ ଆଲୋକପାତ କରି କହିଥିଲେ ଯେ, କୋଭିଡ – ୧୯ ମହାମାରୀ ସତ୍ତ୍ବେ ଭାରତର କୃଷି ଏବଂ ପ୍ରକ୍ରିୟାକୃତ ଖାଦ୍ୟ ସାମଗ୍ରୀ ରପ୍ତାନି ପୂର୍ବ ବର୍ଷ ତୁଳନାରେ ୧୩% ବୃଦ୍ଧି ପାଇଛି। ତେବେ ଖାଦ୍ୟ ପ୍ରକ୍ରିୟାକରଣର ସ୍ତର ଏବଂ ମୂଲ୍ୟ ସମ୍ବର୍ଦ୍ଧନ କମ ରହିବା କାରଣରୁ ବିଶ୍ବ ଖାଦ୍ୟ ସାମଗ୍ରୀ ରପ୍ତାନିରେ ଭାରତର ଯୋଗଦାନ ମାତ୍ର ୩% ରହିଛି। ଆହୁରି ପ୍ରକ୍ରିୟାକରଣର ସେତେଟା ସୁବିଧା ନଥିବା କାରଣରୁ ଭାରତର ଖାଦ୍ୟ ରପ୍ତାନି ପରିସର ମଧ୍ୟରେ କେବଳ ଧାନ, ଗହମ, ଚିନି, ମାଛ ଆଦି ପ୍ରମୁଖ ଉତ୍ପାଦ ସାମିଲ ରହିଛି। ମାଟିର ଖରାପ ଗୁଣବତ୍ତା, ଖରାପ ସାର ଉପଯୋଗ, ରୋଗ ପୋକ ସଂଗ୍ରମଣ ଏବଂ ମୌସୁମୀ ବର୍ଷା ଉପରେ ଅତ୍ୟଧିକ ନିର୍ଭରଶୀଳତା କାରଣରୁ ଏହି ଅଞ୍ଚଳରେ ଫସଲ ଉତ୍ପାଦନ କମ୍‌ ରହିଥିବା ନେଇ ସେ ଚିନ୍ତାବ୍ୟକ୍ତ କରିଥିଲେ।

ଉଦଘାଟନୀ କାର୍ଯ୍ୟକ୍ରମରେ ଆଇସିଏଆର ଅତିରିକ୍ତ ମହାନିର୍ଦ୍ଦେଶକ (ସିସିଏବଂଏଫଏଫସି) ଅତିଥିମାନଙ୍କୁ ସ୍ବାଗତ କରିଥିଲେ। କଟକ ଆଇସିଏଆର-ଏନଆରଆରଆଇର ନିର୍ଦ୍ଦେଶକ ଏବଂ ଆରସିଏମ-୨ର ସଦସ୍ୟ ସଚିବ ଧନ୍ୟବାଦ ଦେଇଥିଲେ। ଉଦଘାଟନୀ ଅଧିବେଶନ ଶେଷ ହେବା ପରେ ବୈଷୟିକ ଅଧିବେଶନରେ ରାଜ୍ୟୱାରୀ ସମସ୍ୟା ଏବଂ ଗବେଷଣା ଆବଶ୍ୟକତା/ବିକାଶ ପ୍ରସଙ୍ଗରେ ଆଲୋଚନା ହୋଇଥିଲା। ପୂର୍ବ ବୈଠକରେ ଆଲୋଚନା ପାଇଁ ଉପସ୍ଥାପନ ହୋଇଥିବା ପ୍ରସଙ୍ଗଗୁଡ଼ିକ ଉପରେ କାର୍ଯ୍ୟ ପ୍ରଗତି ରିପୋର୍ଟ (ଏଟିଆର) ଚୂଡ଼ାନ୍ତ କରାଯାଇଥିଲା। ଏହି କ୍ଷେତ୍ରରେ ପଶୁ ସମ୍ପଦ, ଦୁଗ୍ଧ ଉତ୍ପାଦ, ମତ୍ସ୍ୟଚାଷ, ପ୍ରାକୃତିକ ସମ୍ବଳ ପରିଚାଳନା ଓ ମାନବ ସମ୍ବଳ ବିକାଶ ସମେତ କୃଷି ବିକାଶ ପାଇଁ ଏକ କାର୍ଯ୍ୟଖସଡ଼ା ପ୍ରସ୍ତୁତି ଉପରେ ଆଲୋଚନା କରାଯାଇଥିଲା। କୃଷି ଓ ଆନୁସଙ୍ଗିକ କ୍ଷେତ୍ରରେ ରାଜ୍ୟ ସହ ଜଡ଼ିତ ନିର୍ଦ୍ଦିଷ୍ଟ ସମସ୍ୟାକୁ ଚିହ୍ନଟ କରିବା ଏବଂ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ସମ୍ପୃକ୍ତ ରାଜ୍ୟର ଜାତୀୟ କୃଷି ଗବେଷଣା ପ୍ରଣାଳୀ (ଏନଏସଆରଏସ)ର ସଫଳତା ଓ ଉପଲବ୍ଧି ଜରିଆରେ ଅନୁକୂଳ ସମାଧାନ ଯୋଗାଇ ଦେବା ଦିଗରେ ଏହି ବୈଠକ ସହାୟକ ହୋଇପାରିବ।

ସୂଚନାଯୋଗ୍ୟ ଯେ, କୃଷି-ଜଳବାୟୁ କ୍ଷେତ୍ର ଆଧାରରେ ଆଇସିଏଆର ପକ୍ଷରୁ ଆଠଟି ଆଞ୍ଚଳିକ କମିଟି ପ୍ରତିଷ୍ଠା କରାଯାଇଛି। ବର୍ତ୍ତମାନ କୃଷି, ପଶୁପାଳନ, ମତ୍ସ୍ୟଚାଷ କ୍ଷେତ୍ରରେ ଜାରି ରହିଥିବା ଗବେଷଣା ଓ ପ୍ରଶିକ୍ଷଣ ପଦକ୍ଷେପରେ ରହିଥିବା ବଡ଼ ଶୂନ୍ୟସ୍ଥାନକୁ ଅନୁଧ୍ୟାନ କରିବା, ପ୍ରାଥମିକତାଗୁଡ଼ିକୁ ଚିହ୍ନଟ କରିବା ଏବଂ ଆସନ୍ତା ଦୁଇ ବର୍ଷ ପାଇଁ ଦେଶର ବିଭିନ୍ନ କୃଷି-ପାଣିପାଗ କ୍ଷେତ୍ରରେ ଗବେଷଣା ଓ ସମ୍ପ୍ରସାରିତ ଶିକ୍ଷା ପରିସରର ଏଜେଣ୍ଡା ସମ୍ପର୍କରେ ନିଷ୍ପତ୍ତି ନେବା ଲାଗି ଗବେଷକ ଓ ରାଜ୍ୟ ସରକାରଙ୍କ ବିଭିନ୍ନ ସଂସ୍ଥାକୁ ଆଞ୍ଚଳିକ କମିଟି ଏକ ମଞ୍ଚ ଯୋଗାଇ ଦେଇଥାଏ। ପ୍ରତି ଦୁଇ ବର୍ଷରେ ଥରେ ଆଞ୍ଚଳିକ କମିଟିର ନିୟମିତ ବୈଠକ ଆୟୋଜନ କରାଯାଇଥାଏ। ଏଥିରେ କୃଷି ପ୍ରଯୁକ୍ତି ଆକଳନ, ପରିଶୋଧନ ଏବଂ ହସ୍ତାନ୍ତର କ୍ଷେତ୍ରରେ ଜାତୀୟ ପ୍ରାସଙ୍ଗିକତା ଆଧାରିତ ଗବେଷଣା ଏଜେଣ୍ଡା ଉପରେ ଆଲୋଚନା କରାଯାଇଥାଏ।

ନୂଆ ଦିଲ୍ଲୀ: ଶ୍ରମ ଓ ନିଯୁକ୍ତି ମନ୍ତ୍ରଣାଳୟ (ଏମଓଏଲଇ), ଭାରତ ସରକାରଙ୍କ ଜାତୀୟ କ୍ୟାରିୟର ସେବା (ଏନସିଏସ) ପୋର୍ଟାଲ, ମାନ୍ୟବର ପ୍ରଧାନମନ୍ତ୍ରୀଙ୍କ ଦ୍ବାରା ଜୁଲାଇ 2015 ରେ ଶୁଭାରମ୍ଭ କରାଯାଇଛି। ଏନସିଏସ୍ ହେଉଛି ଏକ ଜବ୍ ପ୍ଲାଟଫର୍ମ ଯାହାକି ଚାକିରୀ ଖୋଜୁଥିବା ପ୍ରାର୍ଥୀମାନଙ୍କୁ ସମ୍ଭାବ୍ୟ ନିଯୁକ୍ତିଦାତାଙ୍କ  ସହିତ ସଂଯୁକ୍ତ କରାଇ ବିଭିନ୍ନ ପ୍ରକାର ନିଯୁକ୍ତି ସେବା ପ୍ରଦାନ କରିବାରେ ସହାୟତା କରିଥାଏ। କ୍ୟାରିୟର କାଉନସେଲିଂ, ଧନ୍ଦାମୂଳକ ମାର୍ଗଦର୍ଶନ ଏବଂ କ୍ୟାରିୟର ଦକ୍ଷତା ତାଲିମ ମାଧ୍ୟମରେ ଏନସିଏସ ପ୍ରାର୍ଥୀଙ୍କ ବ୍ୟକ୍ତିତ୍ୱର ବିକାଶରେ ମଧ୍ୟ ସହାୟତା କରିଥାଏ।

26 ସେପ୍ଟେମ୍ବର 2022 ସୁଦ୍ଧା, ଏନସିଏସ୍ ପୋର୍ଟାଲରେ ସକ୍ରିୟ ଶୂନ୍ୟ ସ୍ଥାନ ଗୁଡିକ 4,82,264 ର ସର୍ବକାଳୀନ ସର୍ବୋଚ୍ଚ ସ୍ତରରେ ପହଞ୍ଚିଛି ଯାହା ବିଭିନ୍ନ କ୍ଷେତ୍ରରେ ରହିଛି ଓ ଏହା ଦେଶରେ ନିଯୁକ୍ତି ବୃଦ୍ଧି ପାଇଥିବା ସୁଚାଉଛି। ପୂର୍ବ ସର୍ବକାଳୀନ ସର୍ବାଧିକ ସକ୍ରିୟ ଶୂନ୍ୟ ସ୍ଥାନ ଗୁଡିକ 3,20,917 ଥିଲା ଯାହା ଜୁନ୍, 2019 ରେ ରେକର୍ଡ କରାଯାଇଥିଲା। ସର୍ବାଧିକ ନିଯୁକ୍ତି ପ୍ରଦାନ କରୁଥିବା 5 ଟି ଗୁରୁତ୍ବପୂର୍ଣ୍ଣ କ୍ଷେତ୍ର ହେଉଛି – ଅର୍ଥ ଏବଂ ବୀମା, ଅପରେସନ୍ସ ଏବଂ ସପୋର୍ଟ, ହୋଟେଲ / ଖାଦ୍ୟ ସେବା ଏବଂ କ୍ୟାଟରିଂ, ସ୍ୱାସ୍ଥ୍ୟ କ୍ଷେତ୍ର ଏବଂ ଆଇଟି ଏବଂ ଯୋଗାଯୋଗ। ଏହାର ଆରମ୍ଭରୁ ଏନସିଏସ୍ ପୋର୍ଟାଲ ମାଧ୍ୟମରେ ପରିଚାଳିତ କରାଯାଇଥିବା ଶୂନ୍ୟ ସ୍ଥାନ ସଂଖ୍ୟା 1.09 କୋଟିରୁ ଅଧିକ ରହିଛି।

ଆର୍ଥିକ ବର୍ଷ 2022-23 ମଧ୍ୟ ଏନସିଏସ୍ ପୋର୍ଟାଲରୁ ସର୍ଟଲିଷ୍ଟ ହୋଇଥିବା ପ୍ରାର୍ଥୀଙ୍କ ସଂଖ୍ୟାରେ ବୃଦ୍ଧି ଘଟିଛି | ଏପ୍ରିଲ୍ 2021 ରୁ ସେପ୍ଟେମ୍ବର 2021 ମଧ୍ୟରେ ସର୍ଟଲିଷ୍ଟ ପ୍ରାର୍ଥୀମାନଙ୍କ ସଂଖ୍ୟା 1,90,335 ରହିଥିଲା। 1 ଏପ୍ରିଲ 2022 ରୁ 26 ସେପ୍ଟେମ୍ବର 2022 ପର୍ଯ୍ୟନ୍ତ ଏହି ସଂଖ୍ୟା 25 ଲକ୍ଷ ଅତିକ୍ରମ କରିସାରିଛି।

ମାନ୍ୟବର ଅର୍ଥମନ୍ତ୍ରୀଙ୍କ ଦ୍ବାରା 2022-23 ବଜେଟ୍ ଘୋଷଣା ସହିତ; ଏନସିଏସ୍ ପୋର୍ଟାଲରେ ବର୍ତ୍ତମାନ ଇଶ୍ରମ ସହିତ ଏପିଆଇ- ଆଧାରିତ ଇଣ୍ଟିଗ୍ରେସନ ରହିଛି ଯାହା ଅଣସଂଗଠିତ ଶ୍ରମିକମାନଙ୍କୁ ଏନସିଏସ୍ ପୋର୍ଟାଲରେ ଚାକିରୀ ଖୋଜୁଥିବା ତଥା ଉଦ୍ୟମ ପଞ୍ଜୀକୃତ ଏମଏସଏମଇ ଗୁଡ଼ିକର ପଞ୍ଜୀକରଣ ପାଇଁ ଉଦ୍ୟମ ପୋର୍ଟାଲରେ ପଞ୍ଜିକରଣ କରିବାକୁ ସହଜ କରିଥାଏ ଯାହା ଦ୍ବାରା ସେମାନଙ୍କ ଶୂନ୍ୟ ସ୍ଥାନକୁ ଏନସିଏସ୍ ପୋର୍ଟାଲରେ ନିଯୁକ୍ତିଦାତା ଭାବରେ ସହଜରେ ପଞ୍ଜୀକୃତ କରିପାରିବେ। ଏନସିଏସ୍ ପୋର୍ଟାଲରେ ଚାକିରୀ ଖୋଜୁଥିବା ଏସଆଇପି ର ସାର୍ଟିଫାଏଡ୍ କୁଶଳୀ ପ୍ରାର୍ଥୀଙ୍କ ପଞ୍ଜୀକରଣ ପାଇଁ ସ୍କିଲ୍ ଇଣ୍ଡିଆ ପୋର୍ଟାଲ୍ (ଏସଆଇପି) ସହିତ ଏନସିଏସ୍ ର ଇଣ୍ଟିଗ୍ରେସନ ରହିଛି। ଏନସିଏସ୍ ଏବଂ ଉଦ୍ୟମ ପୋର୍ଟାଲଗୁଡିକ ମଧ୍ୟରେ ଲିଙ୍କେଜ ମାଧ୍ୟମରେ ଆଜି ପର୍ଯ୍ୟନ୍ତ ଏନସିଏସ୍ ପୋର୍ଟାଲରେ 39,000 ରୁ ଅଧିକ ଏମଏସଏମଇର ପଞ୍ଜୀକରଣ ହୋଇପାରିଛି। ସମୁଦାୟ  ଇଶ୍ରମ ପଞ୍ଜୀକରଣକାରୀ ଯେଉଁମାନେ ଏନସିଏସ୍ ପୋର୍ଟାଲରେ ପଞ୍ଜୀକୃତ ହୋଇଛନ୍ତି ସେମାନଙ୍କ ସଂଖ୍ୟା  9.72 ଲକ୍ଷ ରହିଛି। ଏହା ସହିତ, ପିଏମକେଭିୱାଇ (ସ୍କିଲ ଇଣ୍ଡିଆ ପୋର୍ଟାଲ) ର ମୋଟ 41.52 ଲକ୍ଷ ସାର୍ଟିଫିକେଟ୍ ତଥ୍ୟ ଏନସିଏସ୍ ପୋର୍ଟାଲ ସହିତ ସେୟାର ହୋଇଛି।