Categories
ଆଜିର ଖବର ଜାତୀୟ ଖବର

ବସ୍ ଏବଂ ଲୋରୀ ମଧ୍ୟରେ ମୁହାଁମୁହିଁ ଧକ୍କା: ୭ ମୃତ, ତିନି ଗୁରୁତର

ବେଙ୍ଗାଲୁରୁ: କର୍ଣ୍ଣାଟକର ହୁବଲିରେ ଏକ ବସ୍ ଏବଂ ଲୋରି ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଯାହା ଫଳରେ ୭ ଜଣଙ୍କର ମୃତ୍ୟୁ ଘଟିଥିବା ବେଳେ ୨୬ ଜଣ ଆହତ ହୋଇଛନ୍ତି। ସେଥିମଧ୍ୟରୁ ତିନିଜଣଙ୍କ ଅବସ୍ଥା ଗୁରୁତର ରହିଛି। ମହାରାଷ୍ଟ୍ରକୁ ସଂଯୋଗ କରୁଥିବା ଜାତୀୟ ରାଜପଥରେ ଏହି ସାଂଘାତିକ ଦୁର୍ଘଟଣା ଘଟିଛି। ଆହତମାନଙ୍କୁ ହୁବଲିର କିମସ୍ ହସ୍ପିଟାଲରେ ଚିକିତ୍ସା କରାଯାଉଛି। ଉଭୟ ଗାଡିର ଡ୍ରାଇଭର ଘଟଣାସ୍ଥଳରେ ମୃତ୍ୟୁ ବରଣ କରିଛନ୍ତି। ଏହି ଯାତ୍ରୀବାହୀ ବସ୍ କୋଲହାପୁରରୁ ବାଙ୍ଗାଲୋର ଯାଉଥିଲା। ରାତିରେ ଧରୱାଡ ଆଡକୁ ଯାଉଥିବା ଏକ ଲୋରୀ ସହିତ ବସ୍ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଏହି ମାମଲାରେ ଏଫ୍ଆଇଆର୍ ପଞ୍ଜିକୃତ ହୋଇଛି।

Categories
ଆଜିର ଖବର ରାଜ୍ୟ ଖବର

ଯାତ୍ରୀବାହୀ ଅଟୋ ରିକ୍ସା ସହ ଟ୍ରକ୍ ମୁହାଁମୁହିଁ ଧକ୍କା: ମହିଳା ମୃତ, ତିନି ଆହତ

ନୟାଗଡ/ରଣପୁର: ନୟାଗଡ ଜିଲ୍ଲାରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଯାଇଛି। ଗୋଟିଏ ଯାତ୍ରୀବାହୀ ଅଟୋ ରିକ୍ସା ସହ ଟ୍ରକ୍ ମୁହାଁ ମୁହିଁ ଧକ୍କା ହୋଇଛି। ଘଟଣାସ୍ଥଳରେ ଜଣେ ମହିଳାଙ୍କ ମୃତ୍ୟୁ ହୋଇଥିବା ବେଳେ ତିନି ଜଣ ଆହତ ହୋଇଛନ୍ତି। ନୟାଗଡ଼ ଜିଲ୍ଲା ଲୋଧାଚୁଆ ନିକଟସ୍ଥ ବଜ୍ରକୋଟ ଠାରେ ଏଭଳି ଏକ ଅଭାବନୀୟ ଘଟଣା ଘଟିଯାଇଛି।

ସୂଚନା ଅନୁଯାୟୀ, ଓଡ଼ଗାଁରୁ ଅଟୋ ରିକ୍ସା ଯୋଗେ ଗୋଟିଏ ପରିଵାରର ଲୋକ ଏକ ବାହାଘର ଉତ୍ସବରେ ଯୋଗ ଦେବା ପାଇଁ ଟାଙ୍ଗୀ ଥାନା କୁହୁଡ଼ି ଯାଉଥିଲେ। କିନ୍ତୁ ରଣପୁର ବ୍ଲକ୍ ଅନ୍ତର୍ଗତ ବାଜ୍ରକୋଟ ଗାଁ ନିକଟରେ ସେମାନଙ୍କ ଅଟୋଟି ଗୋଟିଏ ଟ୍ରକ୍ ସହ ମୁହାଁମୁହିଁ ଧକ୍କା ହୋଇଥିଲା। ସାମ୍ନାରୁ ଧକ୍କାଦେବା ଫଳରେ ଅଟୋରୁ ଜଣେ ମହିଳା  ଛିଟିକି ଯାଇ ଟ୍ରକ୍ ଚକା ତଳେ ପଡିଯାଇଥିଲେ। ଫଳରେ ମହିଳାଙ୍କ ଦେହରୁ ହାତ ଅଲଗା ହେବା ସହ ମୁଣ୍ଡରେ ଶକ୍ତ ଆଘାତ ଲାଗିଥିଲା। ଯାହା ଦ୍ୱାରା ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ଏଥିରେ ତିନିଜଣ ଆହତ ହୋଇଥିଲେ। ସମସ୍ତ ଆହତଙ୍କୁ ରଣପୁର ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି।

Categories
ଆଜିର ଖବର ଜାତୀୟ ଖବର

ଆକାଶରେ ଦୁଇଟି ଇଣ୍ଡିଗୋ ବିମାନ ମୁହାଁମୁହିଁ ଧକ୍କାରୁ ଅଳ୍ପକେ ବର୍ତ୍ତିବା ଘଟଣା: ତଦନ୍ତ କରିବ ଡିଜିସିଏ

ନୂଆଦିଲ୍ଲୀ: ଆକାଶରେ ଦୁଇଟି ଇଣ୍ଡିଗୋ ବିମାନ ମଧ୍ୟରେ ଧକ୍କା ହେବାରୁ ଅଳ୍ପକେ ରକ୍ଷା ପାଇଯାଇଛନ୍ତି। ତେବେ ଏହି ମାମଲାର ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ତଦନ୍ତ କରିବ। ଗୁରୁତର ସୁରକ୍ଷା ଉଲ୍ଲଂଘନ ଘଟଣାର ସୂଚନା ଦେଶର ବିମାନ ଚଳାଚଳ ନିୟନ୍ତ୍ରକ ଡିଜିସିଏକୁ ଦିଆଯାଇଛି ଏବଂ ନିର୍ଦ୍ଦେଶକ ଜେନେରାଲ ଅରୁଣ କୁମାରଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇଛି। ଅରୁଣ କୁମାର କହିଛନ୍ତି, ‘ଆମେ ଅନୁସନ୍ଧାନ କରୁଛୁ ଏବଂ ଦୋଷୀ ସାବ୍ୟସ୍ତ ହୋଇଥିବା ଲୋକଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଇଣ୍ଡିଗୋ ଏୟାରଲାଇନ୍ସ ଏହି ଘଟଣା ସମ୍ପର୍କରେ କିଛି କହିବାକୁ ମନା କରି ଦେଇଛି।

ଅଧିକାରୀଙ୍କ କହିବାନୁସାରେ, ବାଙ୍ଗାଲୋରରୁ କୋଲକାତା ଏବଂ ଭୁବନେଶ୍ୱର ପର୍ଯ୍ୟନ୍ତ ଦୁଇଟି ଇଣ୍ଡିଗୋ ବିମାନ ଉଡ଼ାଣରେ ସମାନ ଧରଣର ଆକାଶ ମାର୍ଗରେ ଥିବାରୁ ରାଡାର ଅପରେଟର ଏବଂ ଏଟିସି ଅଧିକାରୀଙ୍କ ମଧ୍ୟରେ ଯୋଗାଯୋଗ ଏବଂ ଅବହେଳା ପ୍ରକାଶ ପାଇଥିଲା। ଡିଜିସିଏ ଅଧିକାରୀମାନେ କହିଛନ୍ତି, ‘ଜାନୁୟାରୀ ୭ ତାରିଖ ୨୦୨୨ ରେ, ଦୁଇଟି ଇଣ୍ଡିଗୋ ବିମାନ ୬ଇ ୪୫୫ (ବେଙ୍ଗାଲୁରୁ-କୋଲକାତା) ଏବଂ ୬ଇ ୨୪୬ (ବାଙ୍ଗାଲୋର-ଭୁବନେଶ୍ୱର) ବାଙ୍ଗାଲୋର ବିମାନବନ୍ଦରରେ’ ବ୍ରିଚ ଅଫ ସେପାରେସନରେ ସାମିଲ ଥିଲା।

Categories
ଆଜିର ଖବର ରାଜ୍ୟ ଖବର

ପେଟ୍ରୋଲ ପମ୍ପ ସମ୍ମୁଖରେ ତିନୋଟି ଟ୍ରକ୍ ମୁହାଁମୁହିଁ ଧକ୍କା, ଚାଳକ ଗୁରୁତର

କନ୍ଦର୍ପ ବେହେରା
ରେଢ଼ାଖୋଲ: ଆଜି ଭୋର ୩ ଟା ସମୟରେ ରେଢ଼ାଖୋଲ ଏଚ୍ ପି ପେଟ୍ରୋଲ ପମ୍ପ ପାଖରେ ୩ଟି ଟ୍ରକ୍ ମଧ୍ୟରେ ମୁହାଁ ମୁହିଁ ଧକ୍କା ହେବା ଫଳରେ ଟ୍ରକ୍ ଚାଳକ ଗୁରୁତର ଥିବା ଖବର ହସ୍ତଗତ ହୋଇଛି।

ପ୍ରକାଶ ଯେ, ସମ୍ବଲପୁର କଟକ ୫୫ ନଂ ଜାତୀୟ ରାଜପଥର ରେଢ଼ାଖୋଲ ସହର ନିକଟ ଏଚପି ପେଟ୍ରୋଲ ପମ୍ପ ସମ୍ମୁଖରେ ଭୋର ପାଖାପାଖି ୩ ଟା ସମୟରେ ତିନୋଟି ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଫଳରେ ଏକ କୋଇଲା ବୋଝେଇ ଟ୍ରକର ଚାଳକ ଗୁରୁତର ଆହତ ହୋଇଥିବା ଜଣା ପଡ଼ିଛି। ତାଙ୍କୁ ବୁର୍ଲା ଡାକ୍ତର ଖାନାକୁ ସ୍ଥାନାନ୍ତର କରାଯାଇଥିବା ସୂଚନା ମଳିଛି।

କୋଇଲା ବୋଝେଇ ଟ୍ରକ ସହ ବିପରୀତ ଦିଗରୁ ଏକ ଟ୍ୟାଙ୍କର ଗାଡି ମୁହାଁମୁହିଁ ଧକ୍କା ହୋଇଥିବା ବେଳେ ଏଚପି ପେଟ୍ରୋଲ ପମ୍ପରୁ ଆସୁଥିବା ଏକ କ୍ଷୀର ବୋଝେଇ ଗାଡ଼ି ମଧ୍ୟ ଉକ୍ତ ଟ୍ରକ ମାନଙ୍କ ସହ ମୁହାଁମୁହିଁ ଧକ୍କା ହୋଇଥିଲା। ଫଳରେ ଜାତୀୟ ରାଜପଥ ଦୀର୍ଘ ସମୟ ଧରି ଅବରୋଧ ହୋଇରହିଥିଲା।

ଘଟଣା ସ୍ଥଳରେ ରେଢ଼ାଖୋଲ ପୋଲିସ ପହଞ୍ଚି ରାସ୍ତାରୁ ଗାଡି ହଟାଇବା ପରେ ଗାଡ଼ି ଚଳାଚଳ ସ୍ବାଭାବିକ ହୋଇଥିଲା। ପୋଲିସ୍ ଆହତଙ୍କୁ ଉଦ୍ଧାର କରି ବୁର୍ଲା ପଠାଇଥିବା ଜଣାପଡ଼ିଛି। ପୋଲିସ୍ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।

Categories
ଆଜିର ଖବର ରାଜ୍ୟ ଖବର

ଟାଙ୍ଗୀ: ବାଇକ୍ ସହ ସ୍କୁଟିର ମୁହାଁମୁହିଁ ଧକ୍କା, ଶିକ୍ଷକଙ୍କ ପ୍ରାଣହାନୀ, ଜଣେ ଗୁରୁତର

ସୀତାରାମ ଅଗ୍ରୱାଲ

ଟାଙ୍ଗୀ: ବାଇକ୍ ସହ ସ୍କୁଟିର ମୁହାଁମୁହିଁ ଧକ୍କା ହେବାରୁ ଜଣେ ଶିକ୍ଷକଙ୍କ ମୃତ୍ୟୁ ହୋଇଛି। ଏହାସହ ଜଣେ ଯୁବକ ଗୁରୁତର ହୋଇଛନ୍ତି। ଖୋର୍ଦ୍ଧା ଜିଲ୍ଲା ବଡପାରି ଛକ ନିକଟରେ ଏହି ଦୁର୍ଘଟଣା ଘଟିଯାଇଛି।

ସୂଚନା ଅନୁଯାୟୀ, ନୟାଗଡ ଜିଲ୍ଲା ଚାନ୍ଦପୁର ଥାନା ଅନ୍ତର୍ଗତ ବୃନ୍ଦାବନ ବିହାରୀ ପୁର ଗ୍ରାମର ସନ୍ତୋଷ କୁମାର ରାଉତରାୟ (୩୮) ରଣପୁର ବ୍ଲକ ଚଂପାପେଡି ପ୍ରାଥମିକ ବିଦ୍ୟାଳୟରେ ଶିକ୍ଷକ ଭାବେ କାର୍ଯ୍ୟ କରିଆସୁଥିଲେ। ସେ ନିଜ ସ୍କୁଟିରେ ଟାଙ୍ଗୀରୁ ଭୋଜି ଖାଇ ନିଜ ଗାଁକୁ ଫେରୁଥିବା ବେଳେ ଏକ ଦ୍ରୁତ ଗାମୀ ବାଇକ୍ ତାଙ୍କ ଗାଡିକୁ ଧକ୍କା ଦେଇଥିଲା। ଫଳରେ ସ୍କୁଟି ଆରୋହୀ ସହ ବାଇକ୍ ଆରୋହୀ ଉଭୟ ଗୁରୁତର ଭାବେ ଆହତ ହୋଇଥିଲେ। ଉଭୟଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲେ।

ତେବେ ମେଡିକାଲରେ ଶିକ୍ଷକ ସନ୍ତୋଷ କୁମାର ରାଉତରାୟଙ୍କୁ ଡାକ୍ତର ମୃତ ଘୋଷଣା କରିଥିଲେ। ଏବଂ ବାଇକ ଆରୋହୀଜଣଙ୍କ ଗୁରୁତର ଥିବାରୁ ତାଙ୍କୁ ଭୁବନଶ୍ୱର ସ୍ଥାନାନ୍ତର କରାଯାଇଥିଲା। ଗୁରୁତର ଯୁବକଜଣଙ୍କ ଟାଙ୍ଗୀ ମାନପୁର ପାଟଣାର ରାଜ କୁମାର ବେହରା ବୋଲି ଜଣା ପଡିଛି। ଏହି ଘଟଣାରେ କେସ ନମ୍ବର ୪୮୦/୨୧ ରେ ଏକ ମାମଲା ରୁଜୁ କରାଯାଇ ଟାଙ୍ଗୀ ପୋଲିସ୍ ତଦନ୍ତ ଆରମ୍ଭ କରିଛି।

Categories
ଆଜିର ଖବର ଜାତୀୟ ଖବର

ବସ୍-ଟ୍ରକ୍ ମଧ୍ୟରେ ମୁହାଁମୁହିଁ ଧକ୍କା: ୬ ମୃତ, ୨୨ ଆହତ

ବାଡମେର୍: ରାଜସ୍ଥାନର ବାଡମେର୍ ଜିଲ୍ଲାରେ ଏକ ସଡ଼କ ଦୁର୍ଘଟଣାରେ ୬ ଜଣଙ୍କର ମୃତ୍ୟୁ ଘଟିଥିବା ବେଳେ ୨୨ ଜଣ ଆହତ ହୋଇଛନ୍ତି। ଜିଲ୍ଲା ପୋଲିସ ଅଧୀକ୍ଷକ ଦୀପକ ଭାର୍ଗବଙ୍କ କହିବାନୁସାରେ, ଏକ ବସ୍ ଏବଂ ଅନ୍ୟ ଏକ ଗାଡି ମଧ୍ୟରେ ଧକ୍କା ହେବାରୁ ଏହି ଦୁର୍ଘଟଣା ଘଟିଛି। ମୁହାଁମୁହିଁ ଧକ୍କା ହେବା ପରେ ବସ୍‌ରେ ନିଆଁ ଲାଗିଯିବା ସହ ୬ ଜଣ ଯାତ୍ରୀଙ୍କର ମୃତ୍ୟୁ ଘଟିଥିବା ବେଳେ ୨୨ ଜଣ ଆହତ ହୋଇଥିଲେ।

ଏହି ଦୁର୍ଘଟଣାକୁ ଅନୁଧ୍ୟାନ କରି ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ଟୁଇଟ୍ କରି କହିଛନ୍ତି, ବାଡମେର୍ ରେ ବସ୍-ଟ୍ରକ୍ ଦୁର୍ଘଟଣା ସଂପର୍କରେ ବାଡମେର୍ ଜିଲ୍ଲା ମାଜିଷ୍ଟ୍ରେଟଙ୍କ ସହ ଫୋନ୍ ଯୋଗେ କଥା ହେବା ପରେ ତାଙ୍କୁ ରିଲିଫ ଓ ଉଦ୍ଧାର କାର୍ଯ୍ୟ ସମ୍ପର୍କରେ ନିର୍ଦ୍ଦେଶ ଦିଆଯାଇଛି। ଆହତମାନଙ୍କୁ ସର୍ବୋତ୍ତମ ଚିକିତ୍ସା ନିଶ୍ଚିତ ଦିଆଯିବ।

Categories
ଆଜିର ଖବର ଜାତୀୟ ଖବର

ବସ୍ ଏବଂ ଟ୍ରକ୍ ମଧ୍ୟରେ ମୁହାଁମୁହିଁ ଧକ୍କା: ୧୩ ମୃତ୍ୟୁ, ୩୦ ରୁ ଉର୍ଦ୍ଧ୍ଵ ଆହତ

ଲକ୍ଷ୍ନୌ: ଉତ୍ତରପ୍ରଦେଶର ବାରବାଙ୍କି ଜିଲ୍ଲାରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଡବଲ ଡେକର ବସ୍ ଏବଂ ଟ୍ରକ୍ ମଧ୍ୟରେ ଭୀଷଣ ଧକ୍କା ହୋଇଛି। ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ ଏଥିରେ ୧୩ ଜଣଙ୍କର ମୃତ୍ୟୁ ଘଟିଛି। ଏହା ବ୍ୟତୀତ ୩୦ ରୁ ଅଧିକ ଲୋକ ଆହତ ହୋଇଛନ୍ତି।

ଖବର ଅନୁଯାୟୀ, ଡବଲ ଡେକର ବସ୍ ଦିଲ୍ଲୀରୁ ଗୋଣ୍ଡା-ବହରାଇଚକୁ ଯାଉଥିଲା। ଉଭୟ ଗାଡି ଭୁଲ ଦିଗରୁ ଆସୁଥିବା ବେଳେ ମୁହାଁମୁହିଁ ଧକ୍କା ହୋଇଥିଲା। ଦୁର୍ଘଟଣା ପରେ ଲୋକଙ୍କ ଚିତ୍କାର ଶୁଣିବାକୁ ମିଳିଥିଲା। ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ଉଦ୍ଧାର କରିଥିଲା। ପୋଲିସ ଆହତ ଏବଂ ମୃତଦେହକୁ ଜିଲ୍ଲା ଡାକ୍ତରଖାନାକୁ ପଠାଇଛି। ଆହତମାନଙ୍କୁ ନିଜେ ଜିଲ୍ଲା ଡାକ୍ତରଖାନାରେ ଚିକିତ୍ସା କରାଯାଉଛି।

ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି। ପୀଡ଼ିତାଙ୍କୁ ସମସ୍ତ ସମ୍ଭାବ୍ୟ ସହାୟତା ଯୋଗାଇବାକୁ ସେ ସଂପୃକ୍ତ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏଥିସହ ମୁଖ୍ୟମନ୍ତ୍ରୀ ମୃତକଙ୍କ ସମ୍ପର୍କୀୟଙ୍କୁ ୨ ଲକ୍ଷ ଟଙ୍କା ଏବଂ ଆହତମାନଙ୍କୁ ୫୦ ହଜାର ଟଙ୍କା କ୍ଷତିପୂରଣ ଘୋଷଣା କରିଛନ୍ତି।

Categories
ଆଜିର ଖବର ରାଜ୍ୟ ଖବର

ବରହମପୁରା ଛକ ନିକଟରେ ୨ କାର ମୁହାଁମୁହିଁ ଧକ୍କା ଜଣେ ମୃତ ୫ ଆହତ

କନ୍ଦର୍ପ ବେହେରା
ରେଢ଼ାଖୋଲ: ସମ୍ବଲପୁର – କଟକ ୫୫ ନମ୍ବର ଜାତୀୟ ରାଜପଥର ଚାରମାଳ ଥାନା ଅନ୍ତର୍ଗତ ବରହପୁରା ଛକ ନିକଟରରେ ଦୁଇ କାର ମୁହାଁମୁହିଁ ଧକ୍କା ହେବାରୁ ଘଟଣା ସ୍ଥଳରେ ଜଣେ ମହିଳାଙ୍କ ମୃତ୍ୟୁ ହୋଇ ଥିବା ବେଳେ ୫ ଜଣ ଆହତ ହୋଇଛନ୍ତି।

ସୂଚନା ଯୋଗ୍ୟ ଯେ ସମ୍ବଲପୁର କଟକ ୫୫ ନଂ ଜାତୀୟ ରାଜପଥ ଚାରମାଳ ଥାନା ଅନ୍ତର୍ଗତ ବରହମପୁରା ଛକ ଠାରେ ବୌଦ୍ଧରୁ ସମ୍ବଲପୁର ଅଭିମୁଖେ ଯାଉଥିବା ଇନୋଭା ଗାଡ଼ି ନଂ ଓଡ଼ି ୦୫ ଏଏସ ୪୪୬୬ ବିଶିଷ୍ଟ ଗାଡି ବିପରୀତ ଦିଗରୁ ଆସୁଥିବା ବେଲପାହାଡ଼ରୁ ରେଢ଼ାଖୋଲ ସହର ନିକଟସ୍ଥ ଡିମିରିକୁଦାକୁ ଆସୁଥିବା ମାରୁତି ୮୦୦ କାର ସହ ମୁହାଁମୁହିଁ ଧକ୍କା ହେବା ଫଳରେ ବେଲପାହାଡ଼ ସ୍କୁଲ ପଡ଼ାର ମୋନରମା ଦାସ(୪୫) ଙ୍କ ମୃତ୍ୟୁ ହୋଇଯାଇଛି। ଏଥିରେ ରୁପେଶ ଦାସ, ଅଜିତ ଦାସ, ପାଲ ଦାସ, ଧୀର ଦାସ, ଓ ଇନୋଭା ଗାଡ଼ି ର ଡ୍ରାଇଭର ଚନ୍ଦନ ମହାନ୍ତି ଆହତ ହୋଇ ଚାରମାଳ ଗୋଷ୍ଟି ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛନ୍ତି।

ଚାରମାଳ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ମୃତ ମୋନରମା ଦାସଙ୍କୁ ରେଢ଼ାଖୋଲ ଡାକ୍ତରଖାନାକୁ ଆଣି ଶବ ବ୍ୟବଚ୍ଛେଦ କରି ପରିବାର ଲୋକ ଙ୍କୁ ହସ୍ତାନ୍ତର କରାଯାଇଛି।

Categories
ଆଜିର ଖବର ରାଜ୍ୟ ଖବର

କୁଜଙ୍ଗ ପଥୁରିଆ ଛକ ନିକଟରେ ଦୁଇଟି ପିକଅପ୍ ଭ୍ୟାନ୍ ମୁହାଁମୁହିଁ ଧକ୍କା: ଜଣଙ୍କର ମୃତ୍ୟୁ

ରମେଶ ମହାନ୍ତି
ଜଗତସିଂହପୁର: କଟକ-ପାରାଦ୍ୱିପ ମୁଖ୍ୟ ରାସ୍ତାର କୁଜଙ୍ଗ ପଥୁରିଆ ଛକ ନିକଟରେ ଆଜି ସକାଳୁ ଦୁଇଟି ପିକଅପ୍ ଭ୍ୟାନ୍ ମୁହାଁମୁହିଁ ଧକ୍କା ହେବା ଫଳରେ ଜଣଙ୍କର ମୃତ୍ୟୁ ହୋଇଥିବା ଜଣାପଡ଼ିଛି।

ସୂଚନାନୁଯାୟୀ ଆଜି ସକାଳୁ ପାରାଦ୍ବୀପ ଅଭିମୁଖେ ଆସୁଥିବା ଏକ ପାଉଁରୁଟି ବୋଝେଇ ପିକଅପ୍ ଭ୍ୟାନ୍ ସହ କଟକ ଅଭିମୁଖେ ଯାଉଥିବା ଏକ କୋଇଲା ବୋଝେଇ ପାକଅପ୍ ଭ୍ୟାନ୍ ସହ ମୁହାଁମୁହିଁ ଧକ୍କା ହୋଇଥିଲା। ଘଟଣାସ୍ଥଳରେ ପାଉଁରୁଟି ବୋଝେଇ ପିକଅପ୍ ଭ୍ୟାନ୍ ଡ୍ରାଇଭରର ମୃତ୍ୟୁ ହୋଇଥିବା ବେଳେ କୋଇଲା ବୋଝେଇ ପିକଅପ୍ ଭ୍ୟାନର ଡ୍ରାଇଭର୍ ଘଟଣା ସ୍ଥଳରୁ ଫେରାର୍ ହୋଇଯାଇଥିବା ଜଣାପଡ଼ିଛି। ମୃତ ଡ୍ରାଇଭରର ଘର ପାରାଦ୍ବୀପ ଲକ୍ ଥାନା ଅଞ୍ଚଳର ନରେନ୍ଦ୍ରପୁର ଗ୍ରାମରେ ହୋଇଥିବା ବେଳେ ସେ ରବିନ୍ଦ୍ର ମଲ୍ଲିକଙ୍କ ପୁଅ ବାଦଲ ମଲ୍ଲିକ ବୋଲି ଥାନା ପକ୍ଷରୁ ସୂଚନା ମିଳିଛି।

ଖବର ପାଇ କୁଜଙ୍ଗ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଥିବା ଜଣାପଡିଛି।

Categories
ଆଜିର ଖବର ରାଜ୍ୟ ଖବର

ଟାଙ୍ଗୀ ବାଇପାସ୍ ରେ ପ୍ରବାସୀଙ୍କୁ ନେଇ ଆସୁଥିବା ବସ୍ ଏବଂ ଟ୍ରକ ମଧ୍ୟରେ ମୁହାଁମୁହିଁ ଧକ୍କା: ଜଣେ ମୃତ

ସୀତାରାମ ଅଗ୍ରୱାଲ

ଟାଙ୍ଗୀ: ଖୋର୍ଦ୍ଧା ଜିଲ୍ଲା ୧୬ ନମ୍ବର ଜାତୀୟ ରାଜପଥରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଯାଇଛି। ପ୍ରବାସୀଙ୍କୁ ନେଇ ଆସୁଥିବା ବସ୍ ଏବଂ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଫଳରେ ଟ୍ରକ ଚାଳକଙ୍କ ମୃତ୍ୟୁ ହୋଇଥିବା ବେଳେ କିଛି ପ୍ରବାସୀ ଆହତ ହୋଇଥିବା ସୂଚନା ରହିଛି।

ସୂଚନା ଅନୁଯାୟୀ, ଆଜି ସକାଳେ କେରଳରୁ ଏକ ବସ୍ ଯୋଗେ ଓଡିଆ ପ୍ରବାସୀ ନିଜ ଗାଁକୁ ଫେରୁଥିଲେ। ହେଲେ ଟାଙ୍ଗୀ ବାଇପାସ୍ ନିକଟରେ ରାସ୍ତା କାମ ଚାଲୁଥିବାରୁ ରାସ୍ତାର ଗୋଟିଏ ପାର୍ଶ୍ଵରେ ଗାଡି ଚଳାଚଳ ଚାଲୁଥିଲା। ସେହି ସମୟରେ ପ୍ରବାସୀଙ୍କୁ ନେଇ ଆସୁଥିବା ବସ୍ ଏବଂ ଟ୍ରକ ମଧ୍ୟରେ ମୁହାଁ ମୁହିଁ ଧକ୍କା ହୋଇଥିଲା। ଧକ୍କା ଏତେ ଜୋର୍ ଥିଲା ଯେ ବସ୍ ଟି ଡିଭାଇଡର ଡେଇଁ ୪୦ ଫୁଟ ପଛକୁ ଚାଲିଯାଇଥିଲା। କିନ୍ତୁ ଟ୍ରକ ଚାଳକଙ୍କ ଏହି ଦୁର୍ଘଟଣାରେ ମୃତ୍ୟୁ ହୋଇଥିଲା। ବସ୍ ରେ ଥିବା କିଛି ପ୍ରବାସୀ ଆହତ ମଧ୍ୟ ହୋଇଥିବା ସୂଚନା ରହିଛି। ବସ୍ ରେ ଆସୁଥିବା ପ୍ରବାସୀମାନେ କଟକ ଏବଂ କେନ୍ଦ୍ରାପଡା ଜିଲ୍ଲାର ବୋଲି ଜଣା ପଡ଼ିଛି।

ତେବେ ଟାଙ୍ଗୀ ପୋଲିସ ଘଟଣାସ୍ଥଳରେ ପହଞ୍ଚି ବସ୍ ଯାତ୍ରୀମାନଙ୍କୁ ଉଦ୍ଧାର କରିବା ସହ ଅନ୍ୟ ଏକ ବସ୍ ଯୋଗେ ସେମାନଙ୍କୁ ଘରକୁ ପଠାଇଦେଇଛି। ହେଲେ ମୃତ ଟ୍ରକ ଚାଳକଙ୍କ ପରିଚୟ ମିଳିପାରିନାହିଁ। ପୋଲିସ ଏନେଇ ତଦନ୍ତ ଜାରି ରଖିଥିବା ବେଳେ ଟାଙ୍ଗୀ ଏବଂ ବାଲୁଗାଁ ଅଗ୍ନିଶମ ବାହିନୀଙ୍କ ସହଯୋଗରେ ଚାଳକଙ୍କ ମୃତ ଦେହକୁ ଟ୍ରକ କ୍ୟାବିନରୁ ବାହାର କରାଯାଇଛି।

Categories
ଆଜିର ଖବର ଜାତୀୟ ଖବର

ବସ ଏବଂ ଟ୍ରକ ମଧ୍ୟରେ ମୁହାଁମୁହିଁ ଧକ୍କା: ୭ ମୃତ୍ୟୁ, ୨୫ ରୁ ଉର୍ଦ୍ଧ୍ଵ ଆହାତ

ମୁରାଦାବାଦ: ଉତ୍ତରପ୍ରଦେଶ ମୁରାଦାବାଦରେ ଏକ ବଧ ଧରଣର ଦୁର୍ଘଟଣା ଘଟିଯାଇଛି। ବସ ଏବଂ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହୋଇ ୭ ଜଣଙ୍କର ମୃତ୍ୟୁ ହୋଇଥିବା ବେଳେ ୨୫ ରୁ ଉର୍ଦ୍ଧ୍ଵ ଲୋକ ଆହତ ହୋଇଛନ୍ତି। ମୁରାଦାବାଦ-ଆଗ୍ରା ଜାତୀୟ ରାଜପଥରେ ଏହି ଦୁର୍ଘଟଣା ହୋଇଥିବା ଜଣାପଡିଛି। କୁହୁଡି କାରଣରୁ ଏଭଳି ଦୁର୍ଘଟଣା ଘଟିଥିବା ଅନୁମାନ କରାଯାଉଛି।

ଜାନୁୟାରୀ ଅନ୍ତିମ ସମୟରେ ମଧ୍ୟ କୁହୁଡି ଏବଂ ଥଣ୍ଡା କମ ହେବାରେ ନାଁ ନେଉନାହିଁ। ଉତ୍ତର ଭାରତରେ ଶୀତଲହରି ଜାରି ରହିଛି। କୁହୁଡି ଯୋଗୁଁ ଭିଜିବିଲିଟି କମ ଥିବାରୁ ଟ୍ରେନ ଉପରେ ମଧ୍ୟ ଏହାର ପ୍ରଭାବ ପଡୁଛି। ଏଠାରେ ତାପମାତ୍ରା ସାମାନ୍ୟ ଠାରୁ କମ ତାପାମାତ୍ରା ରେକର୍ଡ ହୋଇଛି।

Categories
ଆଜିର ଖବର ରାଜ୍ୟ ଖବର

ହାଇଓ୍ବା ଓ ବାଇକ୍‌ ମୁହାଁମୁହିଁ ଧକ୍କା: ଗୋଟିଏ ପରିବାରର ତିନିଜଣ ସଦସ୍ୟ ଗୁରୁତର

ସୀତାରାମ ଅଗ୍ରଓ୍ବାଲ

ଟାଙ୍ଗୀ: ହାଇଓ୍ବା ଓ ବାଇକ୍‌ ମୁହାଁମୁହିଁ ଧକ୍କା ହେବା ଫଳରେ ଗୋଟିଏ ପରିବାରର ତିନିଜଣ ସଦସ୍ୟ ଗୁରୁତର ହୋଇଛନ୍ତି। ଚାନ୍ଦପୁର ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥରେ ହାଇଓ୍ବା ଓ ବାଇକ୍‌ ମୁହାଁମୁହିଁ ଧକ୍କା ହୋଇଥିଲା।

ମିଳିଥିବା ସୂଚନା ଅନୁସାରେ ହାଇୱା ଟ୍ରକଟି ଭୁବନେଶ୍ୱରରୁ ବ୍ରହ୍ମପୁର ଅଭିମୁଖେ ଯାଉଥିବା ବେଳେ ରଂଗ ରୁଟ୍‌ରେ ଆସୁଥିବା ଏକ ବାଇକ୍‌ ସହ ମୁହାଁମୁହିଁ ଧକ୍କା ହୋଇଥିଲା। ବାଇକ୍‌ ଚାଳକ ନିଜ ପତ୍ନୀ ଓ ପୁଅ କୁ ନେଇକି ଆସୁଥିବା ବେଳେ ହାଇଓ୍ବା ସହ ମୁହାଁ ମୁହିଁ ଧକ୍କା ହୋଇଥିଲା। ଫଳରେ ଟ୍ରକ ଟି ପୁଅର ଗୋଡ଼ରେ ଚଢ଼ି ଯିବାରୁ ସମ୍ପୂର୍ଣ୍ଣ ପାଦ ଖଣ୍ଡ ବିଖଣ୍ଡ ହୋଇଯାଇଥିଲା। ଏହି ଘଟଣା ସମ୍ପର୍କରେ ସ୍ଥାନୀୟ ଯୁବକ ଅଗ୍ନିଶମ ବିଭାଗକୁ ଜଣାଇଥିଲେ।

ଘଟଣା ସ୍ଥଳରେ ଅଗ୍ନିଶମ ବିଭାଗ ପହଞ୍ଚି ଗୁରୁତରଙ୍କୁ ଉଦ୍ଧାର କରି ଟାଙ୍ଗୀ ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ପୁଅର ସ୍ବାସ୍ଥ୍ୟବସ୍ଥା ଗୁରୁତର ହେବାରୁ ଭୁବନେଶ୍ୱରକୁ ସ୍ଥାନାନ୍ତର କରାଯାଇଛି।

ଅପରପକ୍ଷେ ଟ୍ରକ ଡ୍ରାଇଭରଜଣକ ଦୁର୍ଘଟଣାସ୍ଥଳରୁ ଫେରାର୍‌ ହେଉଥିବାବେଳେ ଗ୍ରାମବାସୀ ଅଟକ ରଖି ପୋଲିସକୁ ଜିମା ଦେଇଛନ୍ତି। ଘଟଣା ସ୍ଥଳରେ ଚାନ୍ଦପୁର ପୋଲିସ ପହଞ୍ଚି ହାଇୱା ଓ ବାଇକଟିକୁ ଜବତ କରି ତଦନ୍ତ ଚଳାଇଛି। ଦୁର୍ଘଟଣାରେ ଗୁରୁତର ହୋଇଥିବା ବାଇକ ଚାଳକ ପ୍ରଫୁଲ୍ଲ ରାଉତ ବୟସ( ୪୫)ପତ୍ନୀ ପ୍ରମିଳା ରାଉତ ବୟସ (୩୫)ଓ ପୁଅ ଗଣେଶ ରାଉତ ବୟସ(୧୧)ଘର ନୟାଗଡ଼ ଜିଲ୍ଲା ବାଉଁଶଗଡ଼ ବୋଲି ଜଣାପଡିଛି।

Categories
ଆଜିର ଖବର ରାଜ୍ୟ ଖବର

ବାଲୁଗାଁ ବଜାରରେ ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କା: ଚାରି ଗୁରୁତର

ସୀତାରାମ ଅଗ୍ରୱାଲ

ବାଲୁଗାଁ: ଆଜି ସଂଧ୍ୟାରେ ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଲୁଗାଁ ବଜାରରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଯେଉଁଥିରେ ଚାରି ଜଣ ଗୁରୁତର ଆହତ ହୋଇଛନ୍ତି।

ସୂଚନା ମୁତାବକ ଆଜି ସଂଧ୍ୟା ପାଖାପାଖି ୬.୩୦ ଘଟିକା ସମୟରେ ଏକ ନାଲି ରଙ୍ଗର ନୂଆ ଗ୍ଲାମର ମୋଟର ସାଇକେଲ ଯୋଗେ ଗଂଜାମ ଜିଲ୍ଲା ପଥରା ଗ୍ରାମର ବୃନ୍ଦାବନ ବୈଦ୍ୟ (୩୨) ତାଙ୍କ ଭଉଣୀ ସୁନେଲି ବୈଦ୍ୟ ଏବଂ ଝିଅ ଶ୍ରୀୟା ବୈଦ୍ୟଙ୍କୁ ନେଇ ବାଲୁଗାଁରୁ କାମ ସାରି ନିଜ ଘରକୁ ଫେରୁଥିବାବେଳେ ବାଲୁଗାଁ ବଜାର ହୋଣ୍ଡା ସୋ ରୁମ ନିକଟରେ ଏକ ବୁଲେଟ ଗାଡ଼ି ସହ ତାଙ୍କର ମୁହାଁମୁହିଁ ଧକ୍କା ହୋଇଥିଲା। ବୁଲେଟ ଚାଳକ ହେଲେ ଗଞ୍ଜାମ ଜିଲ୍ଲା କହେଁଇପୁରର ମହେଶ ସେଠି (୩୨)।  ଦୁର୍ଘଟଣା ଏତେ ଜୋରରେ ହୋଇଥିଲା ଯେ, ଘଟଣାସ୍ଥଳରେ ସମସ୍ତ ଚାରିଜଣ ସଡ଼କରେ ଛିଟିକି ପଡ଼ିଥିଲେ।

ଖବର ପାଇ ବାଲୁଗାଁ ଦମକଳ ବାହିନୀ ସଙ୍ଗେସଙ୍ଗେ ଘଟଣାସ୍ଥଳରେ ପହଁଚି ଚାରିଜଣଙ୍କୁ ଗୁରୁତର ଭାବେ ଉଦ୍ଧାର କରି ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତରିତ କରିଛି। ହେଲେ ମିଳିଥିବା ସୂଚନା ଅନୁଯାୟୀ ବୁଲେଟ ଚାଳକଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ଭୁବନେଶ୍ୱର ସ୍ଥିତ କ୍ୟାପିଟାଲ ହସ୍ପିଟାଲ ସ୍ଥାନାନ୍ତରିତ କରାଯାଇଛି।

Categories
ଆଜିର ଖବର ରାଜ୍ୟ ଖବର

ବାଲୁଗାଁ ପେଟ୍ରୋଲ ପମ୍ପ ସମ୍ମୁଖରେ ଦୁଇଟି ବାଇକ ମଧ୍ୟରେ ମୁହାଁମୁହିଁ ଧକ୍କା: ଦୁଇ ଗୁରୁତର

 ସୀତାରାମ ଅଗ୍ରୱାଲ

ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁ ପେଟ୍ରୋଲ ପମ୍ପ ସମ୍ମୁଖରେ ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କା ହେବାଫଳରେ ଦୁଇ ଜଣ ବାଇକ ଚାଳକ ଗୁରୁତର ଆହତ ହୋଇଛନ୍ତି।

ସୂଚନା ମୁତାବକ ଆଜି ରାତି ୧୦ ଘଟିକା ସମୟରେ ବାଲୁଗାଁ ଇଣ୍ଡିଆନ ଅଏଲ ପେଟ୍ରୋଲ ପମ୍ପ ସମ୍ମୁଖରେ ଦ୍ରୁତଗତିରେ ଆସୁଥିବା ଦୁଇ ଗୋଟି ବାଇକ ମୁହାଁମୁହିଁ ଧକ୍କା ହୋଇଥିଲେ। ଫଳରେ ଉଭୟ ବାଇକ ଚାଳକ ଗୁରୁତର ଆହତ ହୋଇଛନ୍ତି। ଜଣଙ୍କର ଗ୍ରାମ ବାଲୁଗାଁ ବିଦ୍ୟାଧରପୁର ସାହି ହୋଇଥିବାସ୍ଥଳେ ଅନ୍ୟ ଜଣେ ମଠପାଟଣାର ବୋଲି ଜଣାପଡିଛି।

ତେବେ ଖବର ପାଇ ବାଲୁଗାଁ ଅଗ୍ନିଶମ ଅଧିକାରୀ ନିତ୍ୟାନନ୍ଦ ଜେନା ଘଟଣାସ୍ଥଳରେ ପହଁଚି ଉଭୟଙ୍କୁ ଉଦ୍ଧାରକରି ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଛନ୍ତି।  ସେମାନଙ୍କ ଅବସ୍ଥା ସଙ୍କଟାପନ୍ନ ଥିବାରୁ ଉଭୟଙ୍କୁ ଭୁବନେଶ୍ୱର ସ୍ଥାନାନ୍ତରିତ କରିବା ପାଇଁ ପ୍ରକ୍ରିୟା ଜାରି ରହିଥିବାର ସୂଚନା ମିଳିଛି।