Tag: ରାଜ୍ୟସଭା

ନୂଆଦିଲ୍ଲୀ: ରାଜ୍ୟସଭାରେ ଆଜି ଐତିହାସିକ ନଦୀବନ୍ଧ ନିରାପତ୍ତା ବିଲ୍‍ (୨୦୧୯) ଗୃହୀତ ହୋଇଛି । ଏହା ଫଳରେ ଦେଶରେ ନଦୀ ସୁରକ୍ଷା ଆଇନ ପ୍ରଣୀତ ହେବା ନିମନ୍ତେ ଥିବା ସମସ୍ତ ପଥ ପରିଷ୍କାର ହୋଇଛି । କେନ୍ଦ୍ର ଜଳଶକ୍ତି ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ ଏହି ବିଲ୍‍କୁ ଡିସେମ୍ବର ୧, ୨୦୨୧ ତାରିଖ ଦିନ ରାଜ୍ୟସଭାରେ ଉପସ୍ଥାପନ କରିଥିଲେ । ଲୋକସଭାରେ ନଦୀବନ୍ଧ ନିରାପତ୍ତା ବିଲ୍‍ (୨୦୧୯) ୨୦୧୯ ମସିହା ଅଗଷ୍ଟ ୨ ତାରିଖ ଦିନ ଗୃହୀତ ହୋଇଥିଲା ।

ଚୀନ୍‍ ଏବଂ ଆମେରିକା ପରେ ଭାରତ ହେଉଛି ବିଶ୍ୱର ତୃତୀୟ ସର୍ବାଧିକ ନଦୀବନ୍ଧ ସମ୍ପନ୍ନ ରାଷ୍ଟ୍ର । ଦେଶରେ ପ୍ରାୟ ୫,୭୦୦ ବିରାଟ ନଦୀବନ୍ଧ ରହିଛି ଏବଂ ସେଥିମଧ୍ୟରୁ ୮୦%ରୁ ଅଧିକ ନଦୀବନ୍ଧର ବୟସ ୨୫ ବର୍ଷରୁ ଅଧିକ ପୁରୁଣା । ପ୍ରାୟ ୨୨୭ଟି ନଦୀବନ୍ଧର ବୟସ ୧୦୦ ବର୍ଷରୁ ସୁଦ୍ଧା ଅଧିକ ଏବଂ ସେଗୁଡ଼ିକ ଏଯାବତ୍‍ କାର୍ଯ୍ୟକ୍ଷମ ରହିଆସିଛନ୍ତି । ଯଦ୍ୟପି ଭାରତର ନଦୀବନ୍ଧ ସୁରକ୍ଷା କାର୍ଯ୍ୟକ୍ରମର ମର୍ଯ୍ୟାଦା ବିଶ୍ୱର ଅନ୍ୟ ଯେକୌଣସି ଉନ୍ନତ ରାଷ୍ଟ୍ରଙ୍କ ସହିତ ସମାନ, ତଥାପି ଅପ୍ରତ୍ୟାଶିତ ନଦୀବନ୍ଧ ବିଫଳତା ଏବଂ ସେଗୁଡ଼ିକର ଦୁର୍ବଳ ରକ୍ଷଣାବେକ୍ଷଣ ଚିନ୍ତାର ବିଷୟ ପାଲଟିଥିଲା ।

ନଦୀବନ୍ଧ ନିରାପତ୍ତା ବିଲ୍‍ରେ ଦେଶର ବୃହତ୍‍ ନଦୀବନ୍ଧଗୁଡ଼ିକର ଉପରେ ତୀକ୍ଷ୍ଣ ନଜର ରଖିବା, ନିରୀକ୍ଷଣ, ସେଗୁଡ଼ିକୁ କାର୍ଯ୍ୟକ୍ଷମ ରଖିବା ଏବଂ ରକ୍ଷଣାବେକ୍ଷଣ ନିମନ୍ତେ ବ୍ୟାପକ ପ୍ରାବଧାନ ରହିଛି ଯଦ୍ୱାରା ଯେକୌଣସି ପ୍ରକାର ନଦୀବନ୍ଧ ବିଫଳତା ଓ ତଦ୍‍ଜନିତ ବିପର୍ଯ୍ୟୟକୁ ପ୍ରତିହତ କରାଯାଇପାରିବ । ଏହି ବିଲ୍‍ରେ ଉଭୟ କେନ୍ଦ୍ର ଓ ରାଜ୍ୟ ସ୍ତରରେ ଆନୁଷ୍ଠାନିକ ବ୍ୟବସ୍ଥା ରହିବ ଯଦ୍ୱାରା ଢ଼ାଂଚାଗତ ଓ ଅଣ-ଢାଂଚାଗତ ବ୍ୟବସ୍ଥା ଯାହାକି ନଦୀବନ୍ଧଗୁଡ଼ିକ ନିରାପଦ ଭାବେ କାର୍ଯ୍ୟକ୍ଷମ ରଖିବା ନିମନ୍ତେ ଆବଶ୍ୟକ ତାହା ସୁନିଶ୍ଚିତ କରାଯାଇପାରିବ ।

ଏହି ବିଲ୍‍ରେ ଥିବା ପ୍ରାବଧାନ ଅନୁସାରେ, ଦେଶରେ ଏକ ରାଷ୍ଟ୍ରୀୟ ନଦୀବନ୍ଧ ନିରାପତ୍ତା କମିଟି (ଏନସିଡିଏସ) ଗଠନ କରାଯିବ ଯାହାକି ନଦୀବନ୍ଧ ନିରାପତ୍ତା ସଂକ୍ରାନ୍ତ ସମାନ ନୀତି, ପ୍ରୋଟୋକଲ ଏବଂ ବିଧିବିଧାନର ବିକାଶ ନିମନ୍ତେ ସହାୟତା ଯୋଗାଇଦେବ । ଏହି ବିଲ୍‍ରେ ଥିବା ବ୍ୟବସ୍ଥା ଅନୁସାରେ ଏକ ରାଷ୍ଟ୍ରୀୟ ନଦୀବନ୍ଧ ନିରାପତ୍ତା ପ୍ରାଧିକରଣ (ଏନଡିଏସଏ) ନାମକ ନିୟନ୍ତ୍ରକ ସଂସ୍ଥା ଗଠନ କରାଯିବ ।

ଏହି ସଂସ୍ଥା ଦେଶବ୍ୟାପୀ ନଦୀବନ୍ଧ ସୁରକ୍ଷା ନୀତି ଓ ମାନ ପ୍ରବର୍ତ୍ତନକୁ ସୁନିଶ୍ଚିତ କରିବ । ରାଜ୍ୟ ସ୍ତରରେ ଏହି ବିଲ୍‍ରେ ଥିବା ବ୍ୟବସ୍ଥା ଅନୁସାରେ ନଦୀବନ୍ଧ ନିରାପତ୍ତା (ଏସସିଡିଏସ) ଉପରେ ଏକ ରାଜ୍ୟସ୍ତରୀୟ କମିଟି ଗଠିତ ହେବ ଏବଂ ରାଜ୍ୟ ନଦୀବନ୍ଧ ନିରାପତ୍ତା ସଂସ୍ଥା (ଏସଡିଏସଓ)ମାନ ମଧ୍ୟ ଗଠନ କରାଯିବ ।

ନଦୀବନ୍ଧ ନିରାପତ୍ତା ବିଲ୍‍ ବ୍ୟାପକ ଭାବେ, ନଦୀବନ୍ଧ ସଂପର୍କୀତ ସମସ୍ତ ପ୍ରକାର ଜଟିଳ ନିରାପତ୍ତା ଆଶଙ୍କା ଯଥା ଜଳବାୟୁ ପରିବର୍ତ୍ତନର ବିପଦ ଯୋଗୁ ସୃଷ୍ଟି ହେବାଭଳି ସମସ୍ୟାକୁ ଦୂର କରିବ । ଏହି ବିଲ୍‍ରେ ନଦୀବନ୍ଧଗୁଡ଼ିକର ନିୟମିତ ଯାଞ୍ଚ ଏବଂ ସେଗୁଡ଼ିକର ବର୍ଗୀକରଣ କରାଯିବାର ପ୍ରାବଧାନ ମଧ୍ୟ ରହିଛି । ସେହିଭଳି ସ୍ୱାଧୀନ ବିଶେଷଜ୍ଞ ପାନେଲ ଦ୍ୱାରା ନଦୀବନ୍ଧଗୁଡ଼ିକର ନିରାପତ୍ତା ସଂକ୍ରାନ୍ତ ପ୍ରସଙ୍ଗମାନଙ୍କର ବ୍ୟାପକ ସମୀକ୍ଷା କରାଯାଇ ତାହା ଉପରେ ଜରୁରି କାର୍ଯ୍ୟଯୋଜନା ପ୍ରସ୍ତୁତ କରାଯିବା ନିମନ୍ତେ ବ୍ୟବସ୍ଥା ରହିଛି ।

ସେହିଭଳି ଜରୁରି ବନ୍ୟା ଚେତାବନୀ ବ୍ୟବସ୍ଥା ମଧ୍ୟ କରାଯିବ ଯଦ୍ୱାରା ନଦୀ ଉପତ୍ୟକାର ତଳିଆ ଅଞ୍ଚଳରେ ବସବାସ କରୁଥିବା ଜନସାଧାରଣଙ୍କ ନିରାପତ୍ତାକୁ ସୁନିଶ୍ଚିତ କରାଯାଇପାରିବ । ଏହି ବିଲ୍‍ ମାଧ୍ୟମରେ ନଦୀବନ୍ଧ ନିୟନ୍ତ୍ରକମାନଙ୍କୁ ଉପଯୁକ୍ତ ସମୟରେ ସେଗୁଡ଼ିକର ମରାମତି ଓ ରକ୍ଷଣାବେକ୍ଷଣ ନିମନ୍ତେ ନିମନ୍ତେ ଆବଶ୍ୟକ ଅର୍ଥ ଯୋଗାଇଦେବେ ଯଦ୍ୱାରା ନଦୀବନ୍ଧ ଢାଂଚା ଏବଂ ଏଥି ସହିତ ସଂପର୍କୀତ ଯନ୍ତ୍ରପାତିର ବ୍ୟବସ୍ଥା କରାଯାଇପାରିବ ।

ଏହି ବିଲ୍‍ ନଦୀବନ୍ଧ ନିରାପତ୍ତା ଉପରେ ସାମଗ୍ରିକ ଭାବେ ଦୃଷ୍ଟି ପ୍ରଦାନ କରେ ଏବଂ କେବଳ ଏହାର ଢାଂଚାଗତ ଦିଗ ପ୍ରତି ଦୃଷ୍ଟି ପ୍ରଦାନ କରେନାହିଁ ଅପରନ୍ତୁ ଉପଯୁକ୍ତ ତଥା କଠୋର ଅପରେସନ୍‍ ଏବଂ ମେଣ୍ଟେନାନ୍ସ ପ୍ରୋଟୋକଲ ମାଧ୍ୟମରେ ଏହାର ସକ୍ରିୟ କାର୍ଯ୍ୟକାରୀତା ଏବଂ ରକ୍ଷଣାବେକ୍ଷଣ ପାଇଁ ମଧ୍ୟ ସୁଯୋଗ ପ୍ରଦାନ କରେ । ଏହି ବିଲରେ ଦଣ୍ଡବିଧାନର ମଧ୍ୟ ବ୍ୟବସ୍ଥା କରାଯାଇଛି ଯାହାକି କୌଣସି ପ୍ରକାର ଅପରାଧ ପାଇଁ ଦଣ୍ଡବିଧାନ କରାଯାଇପାରିବ ଏବଂ ତାହା ପ୍ରଚଳିତ ବ୍ୟବସ୍ଥା ଅନୁସାରେ କାର୍ଯ୍ୟକାରୀ କରାଯିବ ।

ଏହି ବିଲ୍ ଏଥି ନିମନ୍ତେ ଏକ ବ୍ୟାପକ ଆନୁଷ୍ଠାନିକ ଢାଂଚା ସ୍ଥାପନ ନିମନ୍ତେ ଏକ ନିର୍ଦ୍ଦିଷ୍ଟ ସମୟସୂଚୀର ବ୍ୟବସ୍ଥା ରହିଛି ଯାହାକି ଉଭୟ କେନ୍ଦ୍ର ଏବଂ ରାଜ୍ୟମାନଙ୍କ ସହାୟତାରେ ସମ୍ପାଦନ କରାଯିବ । ଏଥିରେ ନଦୀବନ୍ଧ କର୍ତ୍ତୃପକ୍ଷଙ୍କ ଦ୍ୱାରା ନିର୍ଦ୍ଦିଷ୍ଟ ସମୟସୀମା ମଧ୍ୟରେ ବାଧ୍ୟତାମୂଳକ ଭାବେ ନଦୀବନ୍ଧ ନିରାପତ୍ତା କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ବ୍ୟାପକ ପ୍ରାବଧାନ କରାଯାଇଛି । ଏହି ବିଲ୍‍ ସଂସଦରେ ଗୃହୀତ ହେବା ଦ୍ୱାରା ଦେଶରେ ନଦୀବନଧ ନିରାପତ୍ତା ଏବଂ ଜଳସଂପଦ ପରିଚାଳନା କ୍ଷେତ୍ରରେ ଏକ ନୂତନ ଯୁଗର ଅୟମାରମ୍ଭ ହେଲା ବୋଲି ବିବେଚନା କରାଯାଉଛି ।

ନୂଆଦିଲ୍ଲୀ: ଲୋକସଭା ଦ୍ଵାରା ପାରିତ ହେବା ପରେ ଓବିସି ସଂରକ୍ଷଣ ସଂଶୋଧନ ବିଲ୍ ମଧ୍ୟ ଆଜି ରାଜ୍ୟସଭାରେ ପାରିତ ହୋଇଛି। ରାଜ୍ୟସଭାରେ ମୌସୁମୀ ଅଧିବେଶନର ଏହା ପ୍ରଥମ ଦିନ ଥିଲା, ଯାହା ଏକ ବିଲ୍ ଉପରେ ଏତେ ଲମ୍ବା ଆଲୋଚନା ହୋଇଥିଲା। ଏହି ବିଲ୍ ଉପରେ ଆଲୋଚନା ବେଳେ ପ୍ରାୟ ସମସ୍ତ ଦଳ ସର୍ବସମ୍ମତି କ୍ରମେ ଏହି ବିଲକୁ ସମର୍ଥନ କରିଥିଲେ।

ରାଜ୍ୟସଭାରେ ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରୀ ବିରେନ୍ଦ୍ର କୁମାରଙ୍କ ପ୍ରସ୍ତାବରୁ ଓବିସି ବିଲ୍ ଉପରେ ଆଲୋଚନା ଆରମ୍ଭ ହୋଇଥିଲା। କିଛି ସମୟ ପରେ କଂଗ୍ରେସ ସାଂସଦ ଅଭିଷେକ ମନୁ ସିଂଘଭି ଏହି ବିଲକୁ ସମର୍ଥନ କରୁଥିବାବେଳେ ଏହି ବିଲକୁ ଅର୍ଥହୀନ ବୋଲି କହିଥିଲେ। ଅଭିଷେକ ମନୁ ସିଂଘଭି କହିଛନ୍ତି ଯେ, ଓବିସି ବିଲ୍ ମାଧ୍ୟମରେ ରାଜ୍ୟମାନଙ୍କୁ କେନ୍ଦ୍ର ସରକାର ଏକ କାଗଜପତ୍ର ହସ୍ତାନ୍ତର କରୁଛନ୍ତି। ଏହା ଅର୍ଥହୀନ, କାରଣ ଦେଶର ୮୦ ପ୍ରତିଶତ ରାଜ୍ୟରେ ସଂରକ୍ଷଣ ସୀମା ୫୦ ପ୍ରତିଶତ ଅତିକ୍ରମ କରିସାରିଛି। ଏବେ ଓବିସିର ଏକ ନୂଆ ତାଲିକା ପ୍ରସ୍ତୁତ କରି ରାଜ୍ୟ କ’ଣ କରିବ? ଏହା ଏକ ପାତ୍ର ଯାହା ଖାଲି ଅଛି। ନାଗାଲାଣ୍ଡ, ମିଜୋରାମରେ ୮୦ ପ୍ରତିଶତ ସଂରକ୍ଷଣ, ମହାରାଷ୍ଟ୍ରରେ ୬୫ ପ୍ରତିଶତ ସଂରକ୍ଷଣ ଅଛି, ସେହିପରି ଅନ୍ୟ ରାଜ୍ୟରେ ମଧ୍ୟ ସଂରକ୍ଷଣ ରହିଛି।

ଆପ ସାଂସଦ ସଞ୍ଜୟ ସିଂ କହିଛନ୍ତି ଯେ, ମୁଁ ଏହି ବିଲକୁ ସମର୍ଥନ କରୁଛି। ଏହା ହେଉଛି ସେହି ବିଜେପି ଯାହାର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଶାସନ କାଳରେ ୧୮ ହଜାର ପଛୁଆ ବର୍ଗର ଲୋକଙ୍କ ଚାକିରୀ ଖାଇଯାଇଥିଲା। ୟୁପିରେ ଦଲିତଙ୍କ ଅବସ୍ଥା ହେତୁ ହାଥ୍ରାସ ଘଟଣା ଘଟିଛି, ବାଲିଆରେ ଏସଡିଏମ ସମ୍ମୁଖରେ ଜୟ ପ୍ରକାଶ ପାଲଙ୍କୁ ହତ୍ୟା କରାଯାଇଥିଲା। ୫୦ ପ୍ରତିଶତ ସଂରକ୍ଷଣ ସୀମା ବୃଦ୍ଧି କରିବାକୁ ଏକ ବିଲ୍ ଆଣନ୍ତୁ, ନଚେତ୍ ଏହି ଓବିସି ବିଲ୍ କେବଳ ଏକ ମିଥ୍ୟା କଥା।

କେରଳର ସିପିଆଇ ସାଂସଦ ବିନୟ ବିଶ୍ୱମ କହିଛନ୍ତି ଯେ, ମୁଁ ଏହି ବିଲକୁ ସମର୍ଥନ କରୁଛି। ଏହା ଏକ ଜରୁରୀ ବିଲ୍। ଭିପି ସିଂଙ୍କ ସରକାରକୁ ଛୋଟ ଦେଖାଇବା କାମ ଏହି ବିଜେପିର ଲୋକମାନେ କରିଥିଲେ ଏବଂ ଆଜି ଏଠାରେ ସୁଶୀଲ ମୋଦୀ ଭି.ପି ସିଂଙ୍କ ଉଦ୍ଧେଶ୍ୟରେ କ୍ରେଡିଟ୍ ନେବାକୁ ଚାହୁଁଛି। ବିଜେପିକୁ କେବଳ ମିଛ କହିବା ଆସେ। ସେମାନେ ହିନ୍ଦୁ ସମାଜକୁ ବିଭାଜନ କରିବାର କାର୍ଯ୍ୟ କରିଛନ୍ତି। ଏବଂ ବର୍ତ୍ତମାନ ଜନସାଧାରଣଙ୍କୁ ପ୍ରତାରଣା କରୁଛି। ମୋଦୀ ସରକାର ଦଳିତଙ୍କୁ ହତ୍ୟା କରୁଛନ୍ତି। ମୁଁ ଏହି ବିଲକୁ ସମର୍ଥନ କରୁଛି ଏବଂ ସରକାରଙ୍କ ରାଜନୀତିକୁ ବିରୋଧ କରୁଛି।

ତେବେ ଏହାକୁ ନେଇ ସାମାଜିକ ମନ୍ତ୍ରୀ ଉତ୍ତର ରଖିଥିଲେ। ଓବିସି ବିଲ୍ ଉପରେ ହୋଇଥିବା ଆଲୋଚନାକୁ ଜବାବ ଦେଇ ସାମାଜିକ ନ୍ୟାୟ ମନ୍ତ୍ରୀ ବିରେନ୍ଦ୍ର କୁମାର କହିଛନ୍ତି ଯେ, ସଂରକ୍ଷଣର ୫୦ ପ୍ରତିଶତ ସୀମା ବୃଦ୍ଧି ଉପରେ ଆଲୋଚନା ହେବା ଉଚିତ କାରଣ ଏହି ନିୟମ ୩୦ ବର୍ଷ ପୂର୍ବେ ଲାଗୁ ହୋଇଥିଲା ଏବଂ ବର୍ତ୍ତମାନ ପରିସ୍ଥିତି ବଦଳିଛି। ଏହା କହି ସରକାର ପ୍ରକୃତରେ ବିରୋଧୀଙ୍କ ଚାହିଦାକୁ ସମର୍ଥନ କରିବାକୁ ସୂଚାଇ ଦେଇଛନ୍ତି। କଂଗ୍ରେସ ସମେତ ସମସ୍ତ ବିରୋଧୀ ଦଳ ଏହି ବିଲ୍ ଉପରେ ଆଲୋଚନା ବେଳେ କହିଥିଲେ ଯେ ସଂରକ୍ଷଣର ସୀମା ବୃଦ୍ଧି ନକଲେ ଓବିସି ବିଲ୍ ର କୌଣସି ମୂଲ୍ୟ ରହିବ ନାହିଁ।

ବିରେନ୍ଦ୍ର କୁମାର ତାଙ୍କ ଉତ୍ତରରେ କହିଛନ୍ତି ଯେ, ପୁରା ସଦନ ସମର୍ଥନରେ ମୁଁ ବହୁତ ଖୁସି। ଆମ ସରକାର ସାମାଜିକ ନ୍ୟାୟ ପାଇଁ ପ୍ରତିବଦ୍ଧ। ଓବିସି ବର୍ଗ ପାଇଁ ଆମ ସରକାର ନେଇଥିବା ପଦକ୍ଷେପ ଏହା ଦର୍ଶାଉଛି। ଏହି ନିଷ୍ପତ୍ତି ରାଜ୍ୟ ସରକାର, ହାଇକୋର୍ଟ ଦ୍ଵାରା ସମ୍ବିଧାନ ୧୦୨ କୁ ସମର୍ଥନ କରୁଥିବାବେଳେ ଏହି ସଂଶୋଧନ ସମ୍ବିଧାନର ମୌଳିକ ଗଠନକୁ କ୍ଷତି ପହଞ୍ଚାଇ ପାରିବ ନାହିଁ ଏବଂ ଜାତୀୟ ପଛୁଆ ଆୟୋଗ ଏବଂ ଓବିସି କମିଶନଙ୍କ ଅନୁଯାୟୀ ନିଷ୍ପତ୍ତି ନିଆଯିବ ବୋଲି କହିଛନ୍ତି।

ନୂଆଦିଲ୍ଲୀ, ନିର୍ଦ୍ଦିଷ୍ଟ କିଛି ଲୋକଙ୍କ ଫୋନ ତଥ୍ୟ ଚୋରି ଲାଗି ସ୍ପାଏୱେର୍ ପେଗାସସର କଥିତ ଉପଯୋଗ” ନେଇ ଗଣମାଧ୍ୟମରେ ୧୮ ଜୁଲାଇ ୨୦୨୧ରେ ପ୍ରକାଶ ପାଇଥିବା ଖବର ସଂକ୍ରାନ୍ତରେ ଆଇଟି ମନ୍ତ୍ରୀ ଅଶ୍ବିନୀ ବୈଷ୍ଣବ ରାଜ୍ୟସଭାରେ ଦେଇଥିବା ବିବୃତି ଦେଇଛନ୍ତି।

ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ମନ୍ତ୍ରୀ ଅଶ୍ବିନୀ ବୈଷ୍ଣବ “ନିର୍ଦ୍ଦିଷ୍ଟ କିଛି ଲୋକଙ୍କ ଫୋନ ତଥ୍ୟ ଚୋରି ଲାଗି ସ୍ପାଏୱେର୍ ପେଗାସସର କଥିତ ଉପଯୋଗ ନେଇ ଗଣମାଧ୍ୟମରେ ୧୮ ଜୁଲାଇ ୨୦୨୧ରେ ପ୍ରକାଶ ପାଇଥିବା ଖବର ସଂକ୍ରାନ୍ତରେ ଆଜି ରାଜ୍ୟସଭାରେ ଯାହା ବିବୃତି ରଖିଲେ ତାହାର ଅବିକଳ ଓଡିଆ ରୂପାନ୍ତର ହେଲା..

“ମାନନୀୟ ଅଧ୍ୟକ୍ଷ ମହୋଦୟ,

ମୁଁ କିଛି ଲୋକମାନଙ୍କର ଫୋନ ତଥ୍ୟ ଚୋରି ଲାଗି ସ୍ପାଏୱେର୍ ପେଗାସସର ଦୁରୂପଯୋଗ ସହ ଜଡ଼ିତ ଖବର ସଂକ୍ରାନ୍ତର ବିବୃତି ଦେବା ଲାଗି ଛିଡ଼ା ହୋଇଛି। ୧୮ ଜୁଲାଇ, ୨୦୨୧ରେ ଏକ ୱେବ ପୋର୍ଟାଲରେ ଅତ୍ୟନ୍ତ ଚାଞ୍ଚଲ୍ୟକର ଖବର ପ୍ରକାଶ ପାଇଥିଲା। ଏହି ଖବର ମାଧ୍ୟମରେ ଅନେକଗୁଡ଼ିଏ ଗମ୍ଭୀର ଅଭିଯୋଗ ଅଣାଯାଇଛି।

ମାନନୀୟ ଅଧ୍ୟକ୍ଷ ମହୋଦୟ,

ଗଣମାଧ୍ୟମରେ ଏହି ଖବର ସଂସଦର ମୌସୁମୀ ଅଧିବେଶନ ଆରମ୍ଭ ହେବାର ଗୋଟିଏ ଦିନ ପୂର୍ବରୁ ଆସିଛି। ଏହାକୁ କେବଳ ମାତ୍ର ଏକ ସଂଯୋଗ ବୋଲି କୁହାଯାଇପାରିବ ନାହିଁ। ପୂର୍ବରୁ ମଧ୍ୟ ଏପରି ଭାବେ ପେଗାସସ ସ୍ପାଏୱେରର ହ୍ବାଟ୍ସଆପରେ ଦୂରୁପଯୋଗ ସଂକ୍ରାନ୍ତରେ ଦାବି କରାଯାଇଥିଲା। ଏହି ଦାବିର କୌଣସି ତଥ୍ୟାତ୍ମକ ଆଧାର ନଥିଲା ଏବଂ ସର୍ବୋଚ୍ଚ ନ୍ୟାୟାଳୟଙ୍କ ସମେତ ସମସ୍ତ ସ୍ଥାନରେ ସମ୍ପୃକ୍ତ ପକ୍ଷ ଏହାକୁ ଖାରଜ କରି ଦେଇଥିଲେ। ୧୮ଜୁଲାଇ ୨୦୨୧ରେ ଏ ସଂକ୍ରାନ୍ତରେ ପ୍ରକାଶ ପାଇଥିବା ଖବର ଭାରତର ଗଣତନ୍ତ୍ର ଏବଂ ଏହାର ସୁଦୃଢ଼ ସଂସ୍ଥାଗୁଡ଼ିକର ଗରିମାକୁ କ୍ଷତିଗ୍ରସ୍ତ କରିବା ଉଦ୍ଦେଶ୍ୟରେ ପ୍ରକାଶିତ କରାଯାଇଛି।

ଏହି ଖବରକୁ ବିସ୍ତୃତ ଭାବେ ପଢ଼ିନଥିବା ଲୋକମାନଙ୍କୁ ଆମେ ଦୋଷ ଦେଇପାରିବା ନାହିଁ। ମୁଁ ସଦନର ସମସ୍ତ ସମ୍ମାନିତ ସଦସ୍ୟମାନଙ୍କୁ ଅନୁରୋଧ କରିବାକୁ ଚାହୁଁଛି ଯେ ଏହି ପ୍ରସଙ୍ଗରେ ସମସ୍ତ ତଥ୍ୟ ଓ ତର୍କକୁ ସେମାନେ ଗଭୀର ଭାବେ ଯାଞ୍ଚ କରନ୍ତୁ। ଏହି ଖବରର ଆଧାରରେ ଏକ ଡାଟାବେସ ରହିଛି ଯାହା ପାଖରେ କଥିତ ଭାବେ ୫୦ ହଜାର ଫୋନ ନମ୍ବରରୁ ଲିକ୍ ହୋଇଥିବା ଡାଟା ରହିଛି। ଅଭିଯୋଗ କରାଯାଉଛି ଯେ ଏହି ଫୋନ ନମ୍ବରଗୁଡ଼ିକ ଯେଉଁ ବ୍ୟକ୍ତିମାନଙ୍କର, ସେମାନଙ୍କ ଉପରେ ନଜର ରଖାଯାଉଛି। କିନ୍ତୁ ରିପୋର୍ଟରେ ଏହା କୁହାଯାଇଛି ଯେ :

ଡାଟାବେସ୍ ଫୋନ ନମ୍ବର ମିଳିବା ଫଳରେ ଫୋନ ପେଗାସସ ସ୍ପାଇୱେର ଦ୍ବାରା ପ୍ରଭାବିତ ହୋଇଛି କିମ୍ବା ଏହା ଉପରେ କୌଣସି ସାଇବର ଆକ୍ରମଣ ହୋଇଛି ବୋଲି ପ୍ରମାଣିତ ହେଉ ନାହିଁ।

କୌଣସି ଫୋନର ବୈଷୟିକ ବିଶ୍ଳେଷଣ କରାନଯାଇ ସେଥିରେ ସାଇବର ଆକ୍ରମଣର ପ୍ରୟାସ ସଫଳ ହୋଇଛି କି ନାହିଁ କହିବା ଠିକ୍ ହେବ ନାହିଁ।

ସେଥିପାଇଁ ଏହି ରିପୋର୍ଟ ସ୍ବତଃ ଏହା ପ୍ରମାଣିତ କରୁଛି ଯେ ଡାଟା ବେସ୍ରେ ଫୋନ ନମ୍ବର ମିଳିବାର ଅର୍ଥ ସେମାନଙ୍କ ଉପରେ କୌଣସି ପ୍ରକାରର ଗୁପ୍ତ ନଜର ଯେ ରଖାଯାଇଛି ତାହା ପ୍ରମାଣିତ କରୁନାହିଁ।

ମାନନୀୟ ଅଧ୍ୟକ୍ଷ ମହୋଦୟ,

ଏ ସଂକ୍ରାନ୍ତରେ ଏହି ଜ୍ଞାନକୌଶଳର ମାଲିକାନା ଥିବା ଏନଏସଓର ବୟାନ ଉପରେ ମଧ୍ୟ ଧ୍ୟାନ ଦିଆଯିବା ଆବଶ୍ୟକ। ଏହି ସଂସ୍ଥା ପକ୍ଷରୁ କୁହାଯାଇଛି ଯେ :

ଏନଏସଓ ଗ୍ରୁପ୍ ଏହା ବିଶ୍ବାସ କରିଥାଏ ଯେ ଆପଣମାନେ କରିଥିବା ଦାବି-ଏଚଏଲଆର ଲୁକଅପ୍ ସର୍ଭିସେସ ଭଳି ମୌଳିକ ସୂଚନାରୁ ତଥ୍ୟ ଲିକ୍ ହେବା-ଏକ ତ୍ରୁଟିପୂର୍ଣ୍ଣ ବ୍ୟାଖ୍ୟା ଉପରେ ଆଧାରିତ। ସୂଚୀଭୁକ୍ତ ଉପଭୋକ୍ତାମାନେ ପେଗାସସ୍ କିମ୍ବା ଏନଏସଓର ଅନ୍ୟ କୌଣସି ଉତ୍ପାଦର ଶିକାର ହେବା ସହିତ ଏହାର କୌଣସି ସମ୍ପର୍କ ନାହିଁ।

ଏହି ସେବା ଯେକୌଣସି ବ୍ୟକ୍ତିଙ୍କୁ ଯେକୌଣସି ସମୟରେ ଉପଲବ୍ଧ, ଯାହାର ସାଧାରଣ ପ୍ରୟୋଗ ସରକାରୀ ସଂସ୍ଥା ଏବଂ ଘରୋଇ କମ୍ପାନୀଗୁଡ଼ିକ ସାରା ବିଶ୍ବରେ କରୁଛନ୍ତି। ଗୋପନୀୟ ଭାବେ ନଜର ରଖାଯିବା କିମ୍ବା ଏନଏସଓ ସହିତ ନିଶ୍ଚିତ ଭାବେ ଏହି ତଥ୍ୟର କୌଣସି ସମ୍ପର୍କ ନାହିଁ। ତେଣୁ ଗୁପ୍ତ ଭାବେ ନଜର ରଖାଯିବା ଲାଗି ଏହି ତଥ୍ୟ ଉପଯୋଗ କରାଯିବା ଦାବି ସମ୍ପୂର୍ଣ୍ଣ ଭାବେ ଆଧାରହୀନ ଅଟେ।

ଏନଏସଓ ପକ୍ଷରୁ ଏହା ମଧ୍ୟ କୁହାଯାଇଛି ଯେ ଯେଉଁ ଦେଶଗୁଡ଼ିକର ନାମ ପେଗାସସର ଉପଭୋକ୍ତା ସୂଚୀରେ ଦର୍ଶାଯାଇଛି, ସେଗୁଡ଼ିକ ସମ୍ପୂର୍ଣ୍ଣ ଭାବେ ଭୁଲ ଏବଂ ଏଗୁଡ଼ିକ ମଧ୍ୟରୁ ଅନେକ ଦେଶ ସେମାନଙ୍କର ଉପଭୋକ୍ତା ନୁହନ୍ତି। ଏଥିରେ ଏହା ମଧ୍ୟ କୁହାଯାଇଛି ଯେ ଏହାର ଅଧିକାଂଶ ଉପଭୋକ୍ତା ହେଉଛନ୍ତି ପାଶ୍ଚାତ୍ୟ ରାଷ୍ଟ୍ର।

ତେଣୁ ଏହା ସ୍ପଷ୍ଟ ଯେ ଏନଏସଓ ପକ୍ଷରୁ ପ୍ରକାଶିତ ଖବରରେ କରାଯାଇଥିବା ଦାବିଗୁଡ଼ିକୁ ଖଣ୍ଡନ କରାଯାଇଛି।

ମାନନୀୟ ଅଧ୍ୟକ୍ଷ ମହୋଦୟ,

ଭାରତରେ ଗୁପ୍ତ ନଜର ରଖାଯିବା ସଂକ୍ରାନ୍ତରେ ଏକ ନିର୍ଦ୍ଧାରିତ ପ୍ରୋଟୋକଲ ରହିଛି। ବିରୋଧୀ ଦଳରେ ଥିବା ମୋର ସହଯୋଗୀ ଏବଂ ଯେଉଁମାନେ ଅନେକ ବର୍ଷ ଧରି ସରକାରରେ ଥିଲେ, ସେମାନେ ନିଶ୍ଚିତ ଭାବେ ଏହି ପ୍ରୋଟୋକଲ ସମ୍ପର୍କରେ ସୂଚନା ପାଇଥିବେ। ସେମାନେ ଅନେକ ବର୍ଷ ଧରି ସରକାରରେ ଥିଲେ, ସେଥିପାଇଁ ସେମାନେ ଏହା ଜାଣିଥିବେ ଯେ କୌଣସି ପ୍ରକାରରେ କାହା ଉପରେ ନଜର ରଖାଯିବା, ଆଇନଗତ ନିୟନ୍ତ୍ରଣ ବିନା ସମ୍ଭବ ନୁହେଁ।

ଭାରତରେ ଏକ ନିର୍ଦ୍ଧାରିତ ପ୍ରକ୍ରିୟା ରହିଛି, ଯାହା ମାଧ୍ୟମରେ ଇଲେକ୍ଟ୍ରୋନିକ୍ସ ବାର୍ତ୍ତାଗୁଡ଼ିକୁ ଆଇନଗତ ଭାବେ ପ୍ରତିରୋଧ (ଇଣ୍ଟରସେପ୍ସନ) କରାଯାଇଥାଏ ଏବଂ ଏହା କେବଳ ଜାତୀୟ ସୁରକ୍ଷା ଭଳି କାରଣ, ବିଶେଷ କରି କୌଣସି ସାର୍ବଜନୀନ ବିପତ୍ତି କିମ୍ବା ଜନ ସୁରକ୍ଷା ବିଷୟରେ, ରାଜ୍ୟ କିମ୍ବା କେନ୍ଦ୍ର ସରକାରଙ୍କ ସଂସ୍ଥା ଦ୍ବାରା କରାଯାଇଥାଏ।

ଇଲେକ୍ଟ୍ରୋନିକ୍ସ ବାର୍ତ୍ତାଗୁଡ଼ିକର ଆଇନଗତ ପ୍ରତିରୋଧ ଅନୁରୋଧ ଭାରତୀୟ ଟେଲିଗ୍ରାଫ ଆଇନ, ୧୮୮୫ର ଧାରା ୫(୨) ଏବଂ ସୂଚନା ପ୍ରଯୁକ୍ତି ଆଇନ, ୨୦୦୦ର ଧାରା ୬୯ ଅନ୍ତର୍ଗତ କରାଯାଇଥାଏ। ନଜର ରଖାଯିବା କିମ୍ବା ପ୍ରତିରୋଧର ସମସ୍ତ ମାମଲା କ୍ଷମତାପ୍ରାପ୍ତ ଅଧିକାରୀଙ୍କ ଦ୍ବାରା ଅନୁମୋଦିତ କରାଯାଇଥାଏ। ଆଇଟି (ପ୍ରୋସିଜ୍ୟୋର ଆଣ୍ଡ ସେଫ୍ଗାର୍ଡସ ଫର ଇଣ୍ଟରସେପ୍ସନ, ମନିଟରିଂ ଆଣ୍ଡ ଡିକ୍ରିପ୍ସନ ଅଫ ଇନଫରମେସନ) ନିୟମାବଳୀ, ୨୦୦୯ ବଳରେ ଏହି କ୍ଷମତା ରାଜ୍ୟ ସରକାରଙ୍କ କ୍ଷମତାପ୍ରାପ୍ତ ଅଧିକାରୀମାନଙ୍କୁ ମଧ୍ୟ ପ୍ରଦାନ କରାଯାଇଛି।

କ୍ୟାବିନେଟ ସଚିବଙ୍କ ଅଧ୍ୟକ୍ଷତାରେ ଏକ ସମୀକ୍ଷା ସମିତି ରୂପରେ ଏଠାରେ ନିରୀକ୍ଷଣର ଏକ ନିର୍ଦ୍ଧାରିତ ବ୍ୟବସ୍ଥା ରହିଛି। ରାଜ୍ୟ ସରକାରଙ୍କ ସ୍ତରରେ ଏପରି ବିଷୟର ନିରୀକ୍ଷଣ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଗଠନ କରାଯାଇଥିବା ସମିତି କରିଥାଏ। ଯେଉଁ ଲୋକମାନେ ଏପରି ଘଟଣାରେ ପୀଡ଼ିତ, ସେମାନଙ୍କୁ ନ୍ୟାୟ ଦେବା ଲାଗି ଆଇନଗତ ବ୍ୟବସ୍ଥା ରହିଛି।
ସେହିପରି କୌଣସି ପ୍ରକାରରେ କାହା ଉପରେ ନଜର ରଖାଯିବା କିମ୍ବା ପ୍ରତିରୋଧ କରାଯିବା କାର‌୍ୟ୍ୟ ଆଇନଗତ ପ୍ରକ୍ରିୟା ମାଧ୍ୟମରେ କରାଇବା ଲାଗି ଏହି ପ୍ରକ୍ରିୟାରେ ବ୍ୟବସ୍ଥା ରହିଛି। ଏହି ବ୍ୟବସ୍ଥା ଏବଂ ସଂସ୍ଥାଗୁଡ଼ିକ ସମୟର ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି।
ମାନନୀୟ ଅଧ୍ୟକ୍ଷ ମହୋଦୟ, ଶେଷରେ, ମୁଁ କହିବାକୁ ଚାହୁଁଛି ଯେ :

● ଏହି ରିପୋର୍ଟର ପ୍ରକାଶକ କହିଛନ୍ତି ଯେ, ରିପୋର୍ଟରେ ଦିଆଯାଇଥିବା ଫୋନ ନମ୍ବର ଉପରେ ନଜର ରଖାଯାଉଥିଲା ବୋଲି କୁହାଯାଇପାରିବ ନାହିଁ।
● ଯେଉଁ କମ୍ପାନୀର ଜ୍ଞାନକୌଶଳକୁ କଥିତ ଭାବେ ଦୁରୂପଯୋଗ କରାଯାଉଥିବା କୁହାଯାଉଛି, ସେହି କମ୍ପାନୀ ମଧ୍ୟ ଏହି ଦାବିକୁ ସ୍ପଷ୍ଟ ଭାବେ ଖାରଜ କରିଛି।
● ଦୀର୍ଘ ସମୟ ଧରି ଦେଶରେ ପ୍ରତିଷ୍ଠିତ ଆଇନଗତ ପ୍ରକ୍ରିୟା ଏହା ସୁନିଶ୍ଚିତ କରୁଛି ଯେ କୌଣସି ପ୍ରକାରର ବେଆଇନ ନଜର ରଖାଯିବା ସମ୍ଭବ ନୁହେଁ।

ମାନନୀୟ ଅଧ୍ୟକ୍ଷ ମହୋଦୟ,

ଏହି ବିଷୟକୁ ତର୍କସଙ୍ଗତ ଦୃଷ୍ଟିକୋଣରୁ ଦେଖିଲେ ଏହା ଜଣାପଡ଼ୁଛି ଯେ ଏପରି ଚାଞ୍ଚଲ୍ୟକର ବିଷୟର କୌଣସି ସତ୍ୟତା ନାହିଁ।
ଧନ୍ୟବାଦ, ମାନନୀୟ ଅଧ୍ୟକ୍ଷ ମହୋଦୟ।”

ନୂଆଦିଲ୍ଲୀ, ପେଗାସସ ଗୁପ୍ତଚର ମାମଲା ଏବଂ ଅନ୍ୟାନ୍ୟ ପ୍ରସଙ୍ଗକୁ ନେଇ କ୍ରମାଗତ ଦ୍ୱିତୀୟ ଦିନ ପାଇଁ ଆଜି ସଂସଦର ଉଭୟ ଗୃହରେ ହଟ୍ଟଗୋଳ ସୃଷ୍ଟି ହୋଇଥିଲା। ବିରୋଧୀଙ୍କ ହୋହାଲ୍ଲା ଯୋଗୁଁ ଲୋକସଭା କାର୍ଯ୍ୟ ଅନେକ ଥର ବ୍ୟାହତ ହୋଇଥିଲା ଏବଂ ଶେଷରେ ଦିନ ପାଇଁ ଗୃହକୁ ମୁଲତବୀ ରଖାଯାଇଥିଲା। ରାଜ୍ୟସଭାର କାର୍ଯ୍ୟ ମଧ୍ୟ ବାରମ୍ବାର ବାଧାପ୍ରାପ୍ତ ହୋଇଥିଲା।

ଲୋକସଭା ଦୁଇଥର ସ୍ଥଗିତ ହୋଇ ଆରମ୍ଭ ହେବା ମାତ୍ରେ ପେଗାସସ୍ ଗୁପ୍ତଚର ମାମଲା ତଥା ଅନ୍ୟାନ୍ୟ ପ୍ରସଙ୍ଗରେ ଆଲୋଚନା ଦାବି କରି କଂଗ୍ରେସ ସମେତ ଟିଏମସି, ଡିଏମକେ ଏବଂ ଅନ୍ୟ ଦଳର ସଦସ୍ୟମାନେ ବାଚସ୍ପତିଙ୍କ ପୋଡିୟମ ଉପରକୁ ଚଢିବାକୁ ଚେଷ୍ଠା କରିଥିଲେ।

ବାଚସ୍ପତି ଶାନ୍ତି ବଜାୟ ରଖିବାକୁ ସଦସ୍ୟମାନଙ୍କୁ ନିବେଦନ କରିଥିଲେ ମଧ୍ୟ ସେମାନେ ବିରୋଧ ଜାରି ରଖିଥିଲେ। ଫଳରେ ଗୃହ କାର୍ଯ୍ୟ ଦିନକ ପାଇଁ ସ୍ଥଗିତ ରଖାଯାଇଥିଲା। ୱାଇଏସଆର କଂଗ୍ରେସ ସଦସ୍ୟ ବିଶାଖାପାଟନମ୍ ଇସ୍ପାତ କାରଖାନାର ଘରୋଇକରଣକୁ ବିରୋଧ କରିଥିଲେ ଏବଂ ଆନ୍ଧ୍ରପ୍ରଦେଶ ପାଇଁ ସ୍ୱତନ୍ତ୍ର ମାନ୍ୟତା ଦାବି କରିଥିଲେ।

ରାଜ୍ୟସଭାର କାର୍ଯ୍ୟ ମଧ୍ୟ ଦୁଇଥର ବ୍ୟାହତ ହୋଇଥିଲା। ଅପରାହ୍ନ 1 ଟାରେ ପୁଣିଥରେ ଆଲୋଚନା ଆରମ୍ଭ ହେବା ମାତ୍ରେ ୱାଇଏସର କଂଗ୍ରେସ ସଦସ୍ୟମାନେ ଆନ୍ଧ୍ରପ୍ରଦେଶ ପାଇଁ ସ୍ୱତନ୍ତ୍ର ଷ୍ଟାଟସ ମାନ୍ୟତା ଦାବି କରି ବାଚସ୍ପତିଙ୍କ ପୋଡିୟମ ନିକଟରେ ପହଞ୍ଚିଥିଲେ। ଗୃହର ନେତା ପୀୟୁଷ ଗୋୟଲ ସମଗ୍ର ବିଶ୍ୱକୁ ପ୍ରଭାବିତ କରୁଥିବା କୋଭିଡ ମହାମାରୀ ଉପରେ ଗୃହରେ ଆଲୋଚନା କରିବାକୁ ସଦସ୍ୟମାନଙ୍କୁ ନିବେଦନ କରିଥିଲେ।

ବିରୋଧୀ ଦଳର ହଟ୍ଟଗୋଳ ମଧ୍ୟରେ ଗୃହରେ କୋଭିଡଙ୍କ ଉପରେ ଆଲୋଚନା ଆରମ୍ଭ ହୋଇଥିଲା। ୱାଇଏସଆର କଂଗ୍ରେସର ସଦସ୍ୟମାନେ ଶାନ୍ତ ହୋଇନଥିଲେ ଏବଂ ହୋହାଲ୍ଲା ଜାରି ରଖିଥିଲେ। ଫଳରେ ବାଚସ୍ପଚି ଗୃହ କାର୍ଯ୍ୟକୁ ଅପରାହ୍ନ 2.45 ପର୍ଯ୍ୟନ୍ତ ମୁଲତବୀ ରଖିଥିଲେ।

ଏହାପୂର୍ବରୁ, ଯେତେବେଳେ ମଧ୍ୟାହ୍ନ 12 ଟାରେ ପ୍ରଥମ ମୁଲତବୀ ପରେ ରାଜ୍ୟସଭା ଆରମ୍ଭ ହୋଇଥିଲା, ସେତେବେଳେ ପେଗାସସ୍ ଗୁପ୍ତଚର କାର୍ଯ୍ୟ ତଥା ଅନ୍ୟାନ୍ୟ ପ୍ରସଙ୍ଗରେ କଂଗ୍ରେସ, ଟିଏମସି , ଡିଏମକେ ଏବଂ ଅନ୍ୟ ଦଳର ସଦସ୍ୟମାନେ ପୁନର୍ବାର ଗୃହର ମଧ୍ୟଭାଗକୁ ଆସିଥିଲେ। ରାଷ୍ଟ୍ରୀୟ ଜନତା ଦଳ, ଶିବସେନା, ବାମପନ୍ଥୀ ତଥା ଅନ୍ୟ ବିରୋଧୀ ଦଳର ସଦସ୍ୟମାନେ ମଧ୍ୟ ତାଙ୍କୁ ସମର୍ଥନ କରିଥିଲେ।

ଡେପୁଟି ଚେୟାରମ୍ୟାନ୍ ବାରମ୍ବାର ଗୃହରେ ଶୃଙ୍ଖଳା ବଜାୟ ରଖିବାକୁ କହିଥିଲେ ମଧ୍ୟ କୌଣସି ସୁଫଳ ମିଳିନଥିଲା। ପରେ ଗୃହର କାର୍ଯ୍ୟକୁ ଦିନ 1 ଟା ପର୍ଯ୍ୟନ୍ତ ମୁଲତବୀ ରଖାଯାଇଥିଲା।

ରାଜ୍ୟସଭା ଅଧ୍ୟକ୍ଷ ଏମ ଭେଙ୍କୟା ନାଇଡୁ ସକାଳେ ବିରୋଧୀଙ୍କ ମୁଲତବୀ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ। ସେ କହିଥିଲେ ଯେ ଗତକାଲି 17 ଟି ମୁଲତବୀ ପ୍ରସ୍ତାବ ଆସିଛି ଏବଂ ଆଜି ମଧ୍ୟ 15 ଟି ପ୍ରସ୍ତାବ ଆସିଛି। ଏକାସାଙ୍ଗରେ ଏତେଗୁଡିଏ ପ୍ରସ୍ତାବକୁ କିପରି ଅନୁମତି ଦିଆଯାଇପାରିବ ବୋଲି ସେ ପ୍ରଶ୍ନ କରିଥିଲେ।

କଂଗ୍ରେସ ନେତା ଆନନ୍ଦ ଶର୍ମା କହିଛନ୍ତି ଯେ ଏହି ପ୍ରସଙ୍ଗ ଜାତୀୟ ସୁରକ୍ଷା ସହ ଜଡିତ ଏବଂ ଏହାକୁ ଗୃହରେ ଉଠାଇବାକୁ ଦିଆଯାଉ। ତେବେ ଦିନ ତମାମ ହଟ୍ଟଗୋଳ ଯୋଗୁଁ ଗୃହକାର୍ଯ୍ୟ ଠିକରେ ଚାଲିପାରି ନ ଥିଲା।

ନୂଆଦିଲ୍ଲୀ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟସଭାରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଉତ୍ତର ରଖିଛନ୍ତି । ଆଲୋଚନାରେ ଅଂଶଗ୍ରହଣ କରିବା ସହ ନିଜ ନିଜ ବକ୍ତବ୍ୟ ରଖିବା ନେଇ ସେ ରାଜ୍ୟସଭା ସଦସ୍ୟମାନଙ୍କୁ ଧନ୍ୟବାଦ ମଧ୍ୟ ଅର୍ପଣ କରିଛନ୍ତି । ବିଶ୍ୱ ସମ୍ମୁଖୀନ ହେଉଥିବା କଠିନ ସମସ୍ୟା ରାଷ୍ଟ୍ରପତିଙ୍କ ଅଭିଭାଷଣ ଯୋଗୁଁ ଆଶ୍ୱସ୍ତ ହୋଇଥିବା ପ୍ରଧାନମନ୍ତ୍ରୀ କହିଛନ୍ତି ।

ସେ କହିଛନ୍ତି ଯେ ଆଜି ଭାରତ ସୁଯୋଗର ଏକ ଭୂମି ପାଲଟିଛି ଓ ସାରା ବିଶ୍ୱର ଆଖି ଭାରତ ଉପରେ ରହିଛି । ଭାରତଠାରୁ ଅନେକ ଆଶା କରାଯାଉଥିଲା ଓ ଭରସା ଥିଲା ଯେ ଭାରତ ବିଶ୍ୱର ଉନ୍ନତି ପାଇଁ ନିଶ୍ଚୟ କିଛି କରିବ । ଭାରତ ସ୍ୱାଧୀନତାର ୭୫ବର୍ଷ ପୂର୍ତ୍ତିପାଳନ କରିବାକୁ ଯାଉଛି ଓ ଆମେ ଏହି ଆଶା ଭରସାକୁ ସାକାର କଲେ ୨୦୪୭ରେ ଯେତେବେଳେ ଦେଶ ସ୍ୱାଧୀନତାର ଶତବାର୍ଷିକୀ ପାଳନ କରିବ ତାହା ପ୍ରତିପାଦିତ ହେବ ।

ପ୍ରଧାନମନ୍ତ୍ରୀ କହିଛନ୍ତି ଯେ କୋଭିଡ ମହାମାରୀର ମୁକାବିଲା କୌଣସି ଦଳ ବା ବ୍ୟକ୍ତିର ସଫଳତା ନୁହେଁ ଏହା ସମଗ୍ର ଦେଶର ସଫଳତା ଓ ପୁରାଦେଶ ଏହାକୁ ଉତ୍ସବ ମନେକରି ପାଳନ କରିବା ଉଚିତ । ଯେତେବେଳେ ବସନ୍ତ ଓ ପୋଲିଓର ଭୟ ଥିଲା ଦେଶ ତାହାର ମୁକାବିଲା କରିଛି । କେହି ଜାଣି ନଥିଲେ ଭାରତ କେବେ ଟୀକା ଉଦ୍‌ଭାବନ କରିବ ଓ କେତେ ଲୋକ ଟୀକା ପାଇବେ । ଆଜି ଆମ ଦେଶ ସାରା ବିଶ୍ୱ ପାଇଁ ଟୀକା ପ୍ରସ୍ତୁତ କରୁଛି ଓ ଆମେ ବିଶ୍ୱର ବୃହତ୍ତମ ଟୀକାକରଣ ଅଭିଯାନ ମଧ୍ୟ ହାତକୁ ନେଇଛୁ । ଏହା ଆମର ଆତ୍ମବିଶ୍ୱାସ ବୃଦ୍ଧି କରିଛି । ଆମର ସଂଘୀୟ ଢାଂଚା ଓ ସମନ୍ୱୟ ସଂଘୀୟ ବ୍ୟବସ୍ଥାକୁ କୋଭିଡ-୧୯ ନୂତନ ଶକ୍ତି ଯୋଗାଇଛି ।

ଭାରତୟ ଗଣତନ୍ତ୍ର ପ୍ରତି ସମାଲୋଚନା ଉପରେ ମନ୍ତବ୍ୟ ଦେଇ ମୋଦି କହିଛନ୍ତି ଯେ ଭାରତ ଗଣତନ୍ତ୍ର ପାଶ୍ଚାତ୍ୟ ନୁହେଁ ବରଂ ଏକ ମାନବିକ ଅନୁଷ୍ଠାନ । ଭାରତୀୟ ଜାତୀୟତାବାଦ ଉପରେ ଚାରିଆଡୁ ହେଉଥିବା ଷଣ୍ଢୁଆଶୀ ଆକ୍ରମଣ ସମ୍ପର୍କରେ ଦେଶବାସୀଙ୍କୁ ସତର୍କ କରାଇବା ନିହାତି ଆବଶ୍ୟକ । ନେତାଜୀ ସୁଭାଷ ବୋଷଙ୍କ ଉକ୍ତିକୁ ଉଦ୍ଧାର କରି ପ୍ରଧାନମନ୍ତୀ କହିଛନ୍ତି ଯେ, ଭାରତୀୟ ଜାତୀୟତାବୋଧ ସଂକୀର୍ଣ୍ଣ ନୁହେଁ କି ସ୍ୱାର୍ଥନ୍ୱେଷୀ ବା ଉଗ୍ର, ଏହା ସତ୍ୟମ, ଶିବମ୍ ସୁନ୍ଦରମ୍ ଦର୍ଶନ ଉପରେ ପର‌୍ୟ୍ୟବସିତ । “ଭାରତ କେବଳ ବିଶ୍ୱର ବୃହତ୍ତମ ଗଣତନ୍ତ୍ର ନୁହେଁ, ଏହା ଗଣତନ୍ତ୍ର\”ର ଜନନୀ ଓ ତାହା ହିଁ ଆମର ବୈଶିଷ୍ଟ୍ୟ । ଆମ ଦେଶର ମନୋଭାବ ଗଣତାନ୍ତ୍ରିକ” ବୋଲି ପ୍ରଧାନମନ୍ତ୍ରୀ କହିଛନ୍ତି ।

ମୋଦି କହିଛନ୍ତି ଯେତେବେଳେ କରୋନା ବୈଶ୍ୱିକ ମହାମାରୀ ଯୋଗୁଁ ବିଭିନ୍ନ ଦେଶ ବିଦେଶୀ ପୁଞ୍ଜିନିବେଶରୁ ବଞ୍ଚିତ ଥିଲେ ସେତେବେଳେ ଭାରତରେ ରେକର୍ଡ ର୍ପରିମାଣର ନିବେଶ ହୋଇଥିଲା । ବୈଦେଶିକ ମୁଦ୍ରା କ୍ଷେତ୍ରରେ ଉନ୍ନତ ପ୍ରଦର୍ଶନ, ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶ, ଇଣ୍ଟରନେଟର ବିସ୍ତାର ଓ ଡିଜିଟାଲ କାର୍ଯ୍ୟଦକ୍ଷତା, ଆର୍ଥିକ ଅନ୍ତଭୁର୍କ୍ତୀକରଣ, ଶୌଚାଳୟର ବହୁଳ ନିର୍ମାଣ, କମ୍ ବ୍ୟୟସାପେକ୍ଷ ଆବାସ, ନିଶୁଳ୍କ ଚିକିତ୍ସା ସେବା, ଶୌଚାଳୟର ବହୁଳ ନିର୍ମାଣ, ବ୍ୟୟସାପେକ୍ଷ ଆବାସ, ନିଃଶୁଳ୍କ ଚିକିତ୍ସା ସେବା, ଏଲପିଜି ବିତରଣ ଇତ୍ୟାଦି କ୍ଷେତ୍ରରେ ଦକ୍ଷ ପଦକ୍ଷେପ ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ। ସମ୍ମୁଖରେ ଆହ୍ୱାନ ଅଛି, ଆମକୁ ନିଷ୍ପତ୍ତି ନେବାକୁ ପଡିବ । ଆମେ ସମାଧାନ ବା ସମସ୍ୟାର ଅଂଶବିଶେଷ ହେବା ବୋଲି ମୋଦି କହିଛନ୍ତି ।

ପ୍ରଧାନମନ୍ତ୍ରୀ ଗୃହକୁ ଜଣାଇଛନ୍ତି ଯେ କୃଷକମାନଙ୍କୁ ସଶକ୍ତ କରିବା ଲକ୍ଷ୍ୟ ନେଇ ୨୦୧୪ ମସିହାଠାରୁ ସରକାର କୃଷି କ୍ଷେତ୍ରରେ ଅନେକ ପରିବର୍ତ୍ତନ ଆଣିଛନ୍ତି । ଚାଷୀମାନଙ୍କୁ ସୁହାଇବା ଭଳି ଫସଲବୀମା କ୍ଷେତ୍ରରେ ପରିବର୍ତ୍ତନ ଅଣାଯାଇଛି । ପ୍ରଧାନମନ୍ତ୍ରୀ କିଶାନ ଯୋଜନା ମଧ୍ୟ ପ୍ରବର୍ତ୍ତିତ ହୋଇଛି । କ୍ଷୁଦ୍ର ଚାଷୀମାନଙ୍କ ନିମନ୍ତେ ସରକାର କାର‌୍ୟ୍ୟ କରୁଥିବା ନେଇ ଶ୍ରୀ ମୋଦି ଗୁରୁତ୍ୱାରୋପ କରିଛନ୍ତି । ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଅଧୀନରେ ଚାଷୀ ୯୦ହଜାର କୋଟିରୁ ଅଧିକ ବୀମା ରାଶି ପାଇଛନ୍ତି ।

ଛାତ୍ରଛାତ୍ରୀମାନେ କିଶାନ କ୍ରେଡିଟ୍‌କାର୍ଡ, ମୃତ୍ତିକା ସ୍ୱାସ୍ଥ୍ୟ କାର୍ଡ ଓ ସମ୍ମାନନିଧି ଜରିଆରେ ମଧ୍ୟ ଉପକୃତ ହୋଇଛନ୍ତି । ଯେତେବେଳ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା ଅଧୀନରେ ସଡକ ଯୋଗାଯୋଗ ସୁଗମ ହେଲା, କୃଷକମାନେ ସେମାନଙ୍କ ଉତ୍ପାଦିତ ସାମଗ୍ରୀ ଦୂରସ୍ଥାନକୁ ନେଇ ପାରିଲେ । କିଶାନ ରେଳ ଓ କିଶାନ ଉଡାଣ ପାଇଁ ମଧ୍ୟ ଉଦ୍ୟମ ହେଉଛି । ବର୍ତ୍ତମାନ କ୍ଷୁଦ୍ର ଓ ନାମମାତ୍ର ଚାଷୀଙ୍କ ଜୀବନମାନର ଉନ୍ନତି ଆଣିବା ପାଇଁ ସମୟ ଆସିଛି ବୋଲି ପ୍ରଧାନମନ୍ତ୍ରୀ କହିଛନ୍ତି । ଦୁଗ୍ଧ ଉତ୍ପାଦନ କ୍ଷେତ୍ରଭଳି ଘରୋଇ ବା ସମବାୟ କ୍ଷେତ୍ରରେ କାମ କରିବାକୁ ସେମାନଙ୍କୁ କାହିଁକି ସ୍ୱାଧୀନତା ନ ମିଳିବ ବୋଲି ପ୍ରଧାନମନ୍ତ୍ରୀ ପ୍ରଶ୍ନ କରିଥିଲେ ।

କୃଷି ସମସ୍ୟା ସମାଧାନ ହେବା ଉଚିତ ଓ ଏ ଦିଗରେ କାର‌୍ୟ୍ୟ ଆବଶ୍ୟକତା ରହିଛି । କୃଷକମାନଙ୍କ କଲ୍ୟାଣ ପାଇଁ ସବୁ ଦଳ ଆଗେଇ ଆସିବାକୁ ସେ ଆମନ୍ତ୍ରଣ ଜଣାଇଥିଲେ । ଗଝଚ ଉପରେ ନିଜର ଦୃଢୋକ୍ତିକୁ ଦୋହରାଇ ପ୍ରଧାନମନ୍ତ୍ରୀ କହିଛନ୍ତି ଯେ, “ଗଝଚ ଥିଲା, ଗଝଚ ଅଛି ଓ ଭବିଷ୍ୟତରେ ମଧ୍ୟ ରହିବ । ଗରୀବଙ୍କ ନିମନ୍ତେ କମ୍ ବ୍ୟୟସାପେକ୍ଷ ରାସନ ମଧ୍ୟ ରହିବ । ମଣ୍ଡିଗୁଡିକର ଆଧୁନିକକରଣ ହେବ ।” କୃଷକମାନଙ୍କ ଲାଗି ଆମକୁ ରାଜନୀତିକ ବିଚାରଧାରାର ଉର୍ଦ୍ଧ୍ୱରେ ରହିବାକୁ ପଡିବ ସେ କହିଛନ୍ତି ।

ଦେଶକୁ ଅସ୍ଥିରତା ଆଡକୁ ଠେଲିଦେବାକୁ ଚେଷ୍ଟା କରୁଥିବା ଶକ୍ତି ବିରୁଦ୍ଧରେ ସାବଧାନ ରହିବାକୁ ପ୍ରଧାନମନ୍ତ୍ରୀ ସତର୍କ କରାଇ ଦେଇଛନ୍ତି । ସେ କହିଛନ୍ତି ଦେଶ ଶିଖ୍‌ମାନଙ୍କ ଅବଦାନ ପାଇଁ ଗର୍ବିତ । ଏହି ସଂପ୍ରଦାୟ ଦେଶ ପାଇଁ ବହୁତ କିଛି କରିଛି । ଗୁରୁସାହିବଙ୍କ ଶବ୍ଦାବଳୀ ଓ ନୀତିବାଣୀ ଖୁବ୍ ମୂଲ୍ୟବାନ । ସହର ଓ ଗ୍ରାମାଞ୍ଚଳ ମଧ୍ୟରେ ଯେଉଁ ବ୍ୟବଧାନ ରହିଛି ତାହା ଦୂର ହେବା ଦରକାର ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଯୁବ ଶକ୍ତିର ଗୁରୁତ୍ୱ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଯୁବଗୋଷ୍ଠୀକୁ ସଶକ୍ତ କଲେ ଦେଶର ଭବିଷ୍ୟତ ଉଜ୍ଜ୍ୱଳ ହେବ । ସେହିପରି ଜାତୀୟ ଶିକ୍ଷା ନୀତିର ଗ୍ରହଣୀୟତାକୁ ନେଇ ଖୁସି ପ୍ରକଟ କରିଥିଲେ ।

ଦେଶର ଆର୍ଥିକ ଅଭିବୃଦ୍ଧିର ପୁନରୁଥାନ ଓ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ପାଇଁ ଗଝଗଋର ଭୂମିକା ଗୁରୁତ୍ୱପୂର୍ଣ୍ଣ ବୋଲି ପ୍ରଧାନମନ୍ତ୍ରୀ କହିଛନ୍ତି । ସେଥିପାଇଁ କରୋନା ମହାମାରୀ କାଳରେ ଏଥିପାଇଁ ସ୍ୱତନ୍ତ୍ର ପ୍ୟାକେଜ ଦିଆଯାଇଛି ।

ସବ୍‌‌କାସାଥ, ସବ୍‌କା ବିକାଶ ଓ ସବ୍‌କା ବିଶ୍ୱାସ ଚିନ୍ତାଧାରା ଉପରେ ମତ ରଖି ପ୍ରଧାନମନ୍ତ୍ରୀ ଉତ୍ତର ପୂର୍ବାଞ୍ଚଳ ନକ୍ସଲ ଉପଦ୍ରୁତ ଅଞ୍ଚଳରେ ନିଆଯାଇଥିବା ପଦକ୍ଷେପଗୁଡିକର ଦୃଷ୍ଟାନ୍ତ ଦେଇଥିଲେ । ସେ କହିଥିଲେ ଯେ ସେସବୁ ଅଞ୍ଚଳରେ ପରିସ୍ଥିତିର ଉନ୍ନତ ଘଟିବା ସହ । ନୂତନ ସୁଯୋଗ ମଧ୍ୟ ସୃଷ୍ଟି ହେଉଛି । ଆଗାମୀ ଦିନରେ ଦେଶର ବିକାଶରେ ପୂର୍ବାଞ୍ଚଳ ଏକ ପ୍ରମୁଖ ଭୂମିକା ଗ୍ରହଣ କରିବ ବୋଲି ପ୍ରଧାନମନ୍ତ୍ରୀ ଆଶାବ୍ୟକ୍ତ କରିଛନ୍ତି ।