ମାନସ ପୂର୍ଣ୍ଣ ଆଚାର୍ଯ୍ୟ
ଆସିକା: ଘରୋଇ କଳିକୁ କେନ୍ଦ୍ର କରି ସରପଞ୍ଚ ସ୍ଵାମୀଙ୍କ ଆତ୍ମହତ୍ୟା ଅଭିଯୋଗ ହୋଇଛି। ସୂଚନା ମୁତାବକ ଗତକାଲି ରାତି ୯ ସମୟରେ ଆସିକା ବ୍ଳକ ହରିଡ଼ାପଦର ସରପଞ୍ଚ ଜୟନ୍ତୀ ବେହେରାଙ୍କ ସ୍ଵାମୀ ରମେଶ ବେହେରା ଗାଁ ଭଡା ଘରେ ଚେତାଶୂନ୍ୟ ଅବସ୍ଥାରେ ପଡିରହିଥିଲେ। ଗ୍ରାମର କିଛି ଯୁବକ ୧୦୮ ଆମ୍ବୁଲାନ୍ସ ଯୋଗେ ଆସିକା ଉପଖଣ୍ଡ ଚିକିତ୍ସାଳୟକୁ ଆଣିଥିଲେ। ସେଠାରେ ତାଙ୍କର ପ୍ରାଥମିକ ଚିକିତ୍ସା କରିଥିଲେ। ରମେଶ କୀଟନାଶକ ଔଷଧ ଖାଇଥିବା ଯୋଗୁଁ ତାଙ୍କ ଅବସ୍ଥା ଗୁରୁତର ହୋଇଥିଲା। ଯାହାପରେ ତାଙ୍କୁ ବ୍ରହ୍ମପୁର ପଠାଯାଇଥିଲା। ବ୍ରହ୍ମପୁର ବଡମେଡିକାଲରେ ରାତ୍ର ୧.୨୦ ମିନଟ ସମୟରେ ତାଙ୍କର ମୃତ୍ୟୁ ହୋଇଥିବା ଡାକ୍ତର କହିଥିଲେ।
ପ୍ରକାଶ ଥାଉକି ମୃତ ରମେଶଙ୍କ ଶବ ନିକଟରେ ସ୍ତ୍ରୀ ଜୟନ୍ତୀ ବେହେରା ଓ ତାଙ୍କ ପରିବାର ଲୋକଙ୍କ ସମେତ ତାଙ୍କ ଭାଇ ବିଦେଶୀ ବେହେରା ଓ ଗ୍ରାମବାସୀ ପହଞ୍ଚି ଥିଲେ। ରମେଶଙ୍କ ଆତ୍ମହତ୍ୟାକୁ କେନ୍ଦ୍ରକରି ବହୁସମୟ ସରପଞ୍ଚ ଓ ତାଙ୍କ ଦିଅର ମଧ୍ୟରେ କଥା କଟାକଟି ହୋଇଥଲା। ଶେଷରେ ସରପଞ୍ଚଙ୍କ ଦିଅର ଘରୋଇକଳୀଙ୍କୁ କେନ୍ଦ୍ରକରି ମୋ ଭାଇ ଘରଭଡାରେ ରହି ଆତ୍ମହତ୍ୟା କରିଥିବା କାରଣ ଦର୍ଶାଇ ବ୍ରହ୍ମପୁର ବୈଦ୍ୟନାଥପୁର ଥାନାରେ ଲିଖତ ଅଭିଯୋଗ କରିଥିଲେ।
ଅଭିଯୋଗକୁ ଭିତ୍ତିକରି ଥାନା ପକ୍ଷରୁ ଅପମୃତ୍ୟୁ ମାମଲା ୪୯୩/୨୩ ରୁଜୁ କରି ଶବ ଜବତ କରିବା ସହ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି।
ପ୍ରକାଶ ଥାଉକି ସ୍ଵାମୀ ସ୍ତ୍ରୀଙ୍କ ମଧ୍ୟରେ ମନମାଳିନ୍ୟ ରହିଆସିଥିଲା। ସ୍ଵାମୀ ସ୍ତ୍ରୀଙ୍କ ମନମାଳିନ୍ୟରେ ସ୍ଵାମୀ ଜଣକ ଦୀର୍ଘ ବର୍ଷ ହେଲା ଭଡାଘରେ ରହି ଆସୁଥିଲେ। ଶେଷରେ ଏହି ପାରିବାରିକ କଳହ ଉଗ୍ରରୂପ ନେଇଥିଲା। ପରିଣାମ ସ୍ୱରୂପ ସ୍ଵାମୀ ଆତ୍ମହତ୍ୟା କରିଥିଲେ।
ଅନ୍ୟପଟେ ଏହି ଆତ୍ମହତ୍ୟା ପରକୀୟାପ୍ରୀତିକୁ ନେଇ ଘଟିଥିବା ଅଞ୍ଚଳରେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି।