ରଣପୁର: ରଣପୁର ଥାନା ଅନ୍ତର୍ଗତ ବଳଭଦ୍ରପୁର ଗ୍ରାମର ଦେବରାଜ ସାହୁଙ୍କ ଝିଅ ସତ୍ୟଭାମା ସାହୁଙ୍କର ଆଜି ସନ୍ଦେହଜନକ ଭାବେ ମୃତ୍ୟୁ ହୋଇଥିବା ଜଣାଯାଇଛି। ସେ ପରିବାର ଛାଡି ଦୀର୍ଘ ଦିନ ଧରି ରଣପୁର ଓମ ଶାନ୍ତି ଆଶ୍ରମରେ ରହୁଥିଲେ। ଏପରିକି ରଣପୁର ଓ ଗୌରାଙ୍ଗପୁରର ଏକ ଭଡା ଘରେ ଚାଲିଥିବା ଓମ ଶାନ୍ତି ଆଶ୍ରମକୁ ଦେଖାଶୁଣା କରିଆସୁଥିଲେ।
ଆଜି ସକାଳ ୧୧ଟା ବେଳେ ତାଙ୍କ ପରିବାର ଲୋକେ ଫୋନ୍ ଯୋଗେ ତାଙ୍କର ସାଥୀ ଠାରୁ ଖବର ପାଇଲେ ଯେ, “ତୁମ ଝିଅ ବିଷ ପିଇ ଆତ୍ମହତ୍ୟା ଉଦ୍ୟମ କରିଛି। ତାକୁ ଆମେ ରଣପୁର ଡାକ୍ତରଖାନାକୁ ଆଣିଛୁ, ଜଲଦି ଆସ”। ସେଠାରେ ଡାକ୍ତର ସତ୍ୟଭାମାଙ୍କୁ ଡାକ୍ତରୀ ପରୀକ୍ଷା କରି ମୃତ ଘୋଷଣା କରିଥିଲେ।
ଖବର ପାଇ ସେମାନେ ଡାକ୍ତରଖାନାରେ ପହଂଚିବା ପରେ ଝିଅର ମୃତ୍ୟୁ ଘଟିଥିବା ଜାଣିବା ପରେ ତାଙ୍କ ଝିଅକୁ ମାରି ଦେଇଥିବା ସନ୍ଦେହ କରି ରଣପୁର ଥାନାରେ ଏକ ଲିଖିତ ଅଭିଯୋଗ ଦେଇଥିବା ଜଣାଯାଇଛି। ପରେ ପୋଲିସ୍ ପହଂଚି ଶବକୁ ଜବତ କରିବା ସହ ଶବ ବ୍ୟବଚ୍ଛେଦ କରାଇ ତଦନ୍ତ ଜାରି ରଖିଥିବା ଜଣାଯାଇଛି।