Tag: ନବୀନ ପଟ୍ଟନାୟକ

ଭୁବନେଶ୍ବର: ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଶ୍ରୀ ଭି.କେ. ପାଣ୍ଡିଆନ ଆଜି ପୁରୀ ଜିଲ୍ଲାର ସୁଆଣ୍ଡୋସ୍ଥିତ ଗୋପବନ୍ଧୁଙ୍କ ଜନ୍ମପୀଠର ପରିଦର୍ଶନ କରି ଏହାର ପୁନଃବିକାଶ କାର୍ଯ୍ୟ ତଦାରଖ କରିଥିଲେ। ଆଗାମୀ ୨୩ ତାରିଖରେ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜନ୍ମସ୍ଥାନ ସୁଆଣ୍ଡୋର ପୁନଃବିକଶିତ ଜନ୍ମ ପୀଠର ଲୋକାର୍ପଣ କରିବେ ମୁଖ୍ୟମନ୍ତ୍ରୀ।

ଉତ୍କଳମଣି ଙ୍କ ଗାଁ ଶିବ ମନ୍ଦିର ଲୋକେଶ୍ୱର ଶିବ ମନ୍ଦିର ଜରାଜୀର୍ଣ୍ଣ ଅବସ୍ଥାରେ ଥିଲା.
ସୁଆଣ୍ଡୋ ବାସୀଙ୍କ ଅନୁରୋଧ କ୍ରମେ ଲୋକେଶ୍ୱର ମନ୍ଦିରର ପୁନଃନିର୍ମାଣ କାର୍ଯ୍ୟ ରାଜ୍ୟ ସରକାରଙ୍କ ପକ୍ଷରୁ ସମ୍ପନ୍ନ କରାଯାଇଛି. ଏହାର ପ୍ରତିଷ୍ଠା ଉତ୍ସବ ଆଜି ଅନୁଷ୍ଠିତ ହୋଇଥିଲା ଏବଂ ଏଥିରେ ଶ୍ରୀ ପାଣ୍ଡିଆନ ଯୋଗ ଦେଇ ପୂର୍ଣ୍ଣାହୁତିରେ ମଧ୍ୟ ଅଂଶଗ୍ରହଣ କରିଥିଲେ।

ପରେ ଶ୍ରୀ ପାଣ୍ଡିଆନ ଉତ୍କଳମଣିଙ୍କ ଷଠୀଘର, ଢିଙ୍କିଶାଳ ଆଦିର ସଂରକ୍ଷଣ କାର୍ଯ୍ୟ ପରିଦର୍ଶନ କରିବା ସହିତ ଗାଁ ପୋଖରୀର ପୁର୍ନରୁଦ୍ଧାର କାର୍ଯ୍ୟ ତଥା ସଂଗ୍ରହାଳୟ କାର୍ଯ୍ୟ ବୁଲି ଦେଖିଥିଲେ ଏବଂ କାର୍ଯ୍ୟର ଅଗ୍ରଗତିରେ ସନ୍ତୋଷ ପ୍ରକାଶ କରିଥିଲେ।

ସେବା ଓ ସଂଗ୍ରାମର ପ୍ରତୀକ ଉତ୍କଳମଣି ଓଡିଆ ଜନମାନସର ଅଦ୍ବିତୀୟ ନେତା । ଦେଶ ପାଇଁ, ଜାତି ପାଇଁ ତାଙ୍କର ତ୍ୟାଗ ଆଜି ତାଙ୍କୁ ଅମର କରି ରଖିଛି। ଗୋପବନ୍ଧୁଙ୍କ ଜନ୍ମସ୍ଥାନ ଏବଂ ସୁଆଣ୍ଡୋ ର ବିକାଶ କାର୍ଯ୍ୟ ପଣ୍ଡିତ ଗୋପବନ୍ଧୁଙ୍କ ପରିବାର ତଥା ସୁଆଣ୍ଡୋ ଜନସାଧାରଣଙ୍କ ସହଯୋଗରେ ରାଜ୍ୟ ସରକାରଙ୍କ ପକ୍ଷରୁ କରାଯାଇଛି।

ଭୁବନେଶ୍ବର: ନବୀନ ପଟ୍ଟନାୟକ ଜିନ୍ଦାବାଦ……, ନବୀନ ପଟ୍ଟନାୟକ ସ୍ବାଗତଂ…………, କୋରାପଟକୁ ସ୍ବାଗତଂ……..। ଏହିପରି ନାରା ଦେଲେ କଂଗ୍ରେସ ବିଧାୟକ ତାରାପ୍ରସାଦ ବାହିନୀ ପତି। ଯଦି ବିଜେଡି ନେତା ବା ବିଧାୟକଙ୍କ ମୁହଁରେ ଏହା ହୋଇଥାଆନ୍ତା ତେବେ ତାହା କୌଣସି ବଡ କଥା ନୁହେଁ। ହେଲେ ବିରୋଧୀ ଦଳର ବିଧାୟକ ତାରାଙ୍କ ମୁହଁରେ ନବୀନ ଜିନ୍ଦାବାଦକୁ କେହି ସହଜରେ ଗ୍ରହଣ କରିପାରୁ ନାହାଁନ୍ତି।

ଆଜି କୋରାପୁଟ ଜୟପୁରସ୍ଥିତ ବିକ୍ରମ ଦେବ କଲେଜର ପ୍ଲାଟିନିୟମ ଜୁବୁଲି ଉତ୍ସବ ଥିଲା। ଏହି ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇଥିଲେ। ତାରା ସ୍ଥାନୀୟ ବିଧାୟକ ତଥା କଲେଜ କମିଟ ସଭାପତି ଭାବେ ସେହି ସଭାର ଆୟୋଜକ ଭାବେ ମଞ୍ଚରେ ବସିଥିଲେ। ହେଲେ ସେ ଯେତେବେଳେ ଭାଷଣ ଦେଲେ ସେତେବେଳେ ‘ନବୀନ ପଟ୍ଟନାୟକ ଜିନ୍ଦାବାଦ’ ବଡ ପାଟିରେ କହିବା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା।

କେବଳ ସେତିକି ନୁହେଁ, ତାରାଙ୍କର ବିଜେଡି ପ୍ରତି ଆହୁରି ବହୁ ଭକ୍ତି ଭାବ ସେହି ମଞ୍ଚରେ ଉକୁଟି ଉଠିଥିଲା। ତାହା ହେଲେ ସେ ସେହି ଭାଷଣରେ ବବି ବାବୁଙ୍କ ମଧ୍ୟ ଧନ୍ୟବାଦ ଦେବାକୁ ଭୁଲି ନ ଥିଲେ। ସେ ମଞ୍ଚ ଉପରେ ବସି ନ ଥିଲେ ମଧ୍ୟ ତାଙ୍କୁ ଧନ୍ୟବାଦ ଦେବା ଏବଂ ତାଙ୍କ ନାମ ବାରମ୍ବାର ନେବାକୁ ମଧ୍ୟ ଭୁଲି ନ ଥିଲେ ତାରାପ୍ରସାଦ। ଯାହାକୁ ନେଇ ତାରାଙ୍କ ରାଜନୈତିକ ଭବିଷ୍ୟତ ନେଇ ଏକ ସନ୍ଦେହ ସୃଷ୍ଟି ହୋଇଛି।

ଜିନ୍ଦାବାଦ କରିବା ସହ ଏହି ବୈଠକରେ ତାରାପ୍ରସାଦ ନବୀନ ପଟ୍ଟନାୟକଙ୍କୁ ଯେପରି ପ୍ରସଂଶା କଲେ ତାହା ହୁଏତ କୌଣସି ବିଜେଡି ମନ୍ତ୍ରୀଙ୍କଠାରୁ ଇଣା ନୁହେଁ। ସେଠାରେ ବିଜେଡି ମନ୍ତ୍ରୀ ବିଧାୟକମାନେ ମଧ୍ୟ ମଞ୍ଚରେ ଥିଲେ ଆଉ ଭାଷଣ ମଧ୍ୟ ଦେଇଥିଲେ। ହେଲେ ତାରାପ୍ରସାଦଙ୍କ ପ୍ରଶଂସା ସବୁଠାରୁ ଅଧିକ ତଥା ଶକ୍ତିଶାଳୀ ଥିଲା। ସେ ଯେପରି ଯାତ୍ରା ଡାଇଲଗ ପରି କହୁଥିଲେ ତାହା ସମସ୍ତଙ୍କ ପ୍ରଶଂସାଠାରୁ ବଳେଇ ଯାଇଥିଲା।

ଯେତେବେଳେ ମୁଖ୍ୟମନ୍ତ୍ରୀ ମଞ୍ଚ ଉପରକୁ ଆସିଲେ ସେତେବେଳେ ତାରାପ୍ରସାଦ ତାଙ୍କୁ ଏକ ଉତ୍ତରୀୟ ଦେଇ ସ୍ବାଗତ କରିଥିଲେ। ସେତିକିରେ ରହିଥିଲେ କେହି ଆଲୋଚନା କରି ନ ଥାଆନ୍ତେ। ହେଲେ ମୁଖ୍ୟମନ୍ତ୍ରୀଙ୍କ ପଛରେ ଥିବା 5ଟି ସଚିବ ଭି କେ ପାଣ୍ଡିଆନଙ୍କୁ ମଧ୍ୟ ସେ ଏକ ଉତ୍ତରୀୟ ଦେଇ ସ୍ବାଗତ କଲେ। ଯାହା ପୂର୍ବରୁ କେହି କେବେ କରି ନ ଥିଲେ। ତେଣୁ ତାରାଙ୍କ ଏପରି ବ୍ୟବହାର ତାଙ୍କ ସମର୍ଥକ ତଥା ବିଜେଡି କର୍ମିଙ୍କ ମହଲରେ ବେଶ ଆଲୋଚନାର କେନ୍ଦ୍ର ବିନ୍ଦୁ ପାଲଟିଛି।

ବିଗତ ବର୍ଷରେ ସ୍ବର୍ଗତ ନବ ଦାସ ଯେତେବେଳେ କଂଗ୍ରେସରେ ଥିଲେ ସେତେବେଳେ ଝାରସୁଗୁଡା ସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜିନ୍ଦାବାଦ ମଧ୍ୟ ସେ କରିଥିଲେ। ସେ ମଧ୍ୟ ନବୀନଙ୍କୁ ସେତେବେଳେ ପ୍ରଶଂସାରେ ପୋତି ଦେଇଥିଲେ। ପରବର୍ତ୍ତି ସମୟରେ ସେ ବିଜେଡିରେ ଯୋଗ ଦେଇଥିଲେ। ଏବେ ଠିକ୍ ସେହିପରି ବିଧାୟକ ତାରା ବାହିନୀପତିଙ୍କ କ୍ଷେତ୍ରରେ ସେପରି ହେବାର ସମ୍ଭାବନା ସୃଷ୍ଟି ହୋଇଛି।

ତାରା ବିଜେଡି ମୁହାଁ ହେବାର ସମ୍ଭାବନା ଅଧିକ ରହିଛି। କାରଣ ସେ ବର୍ତ୍ତମାନର କଂଗ୍ରେସକୁ ନେଇ ଖୁସି ନାହାଁନ୍ତି। କଂଗ୍ରେସରେ ସେ ସଭାପତି ହେବାର ଆଶା ରଖିଥିଲେ, ଯାହା ହୋଇପାରିଲା ନାହିଁ। ଏପରିକି ଅବିଭକ୍ତ କୋରାପୁଟର କଂଗ୍ରେସ ସଂଗଠନକୁ ନେଇ ତାରା ମଧ୍ୟ ସନ୍ତୁଷ୍ଠ ନାହାଁନ୍ତି। ଦଳ ତାଙ୍କୁ ଯେପରି ଗୁରୁତ୍ବ ଦେବା କଥା ତାହା ଦେଉ ନାହିଁ ବୋଲି ସେ ଅନୁଭବ କରି ସାରିଲେଣି। ଫଳରେ ସେ ଏବେ ବିଜେଡି ମୁହାଁ ହେଉଛନ୍ତି ବୋଲି ଏହି ସଭାରୁ ସ୍ପଷ୍ଟ ପ୍ରତିୟମାନ ହୋଇଛି।

ଜୟପୁର: ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କୋରାପୁଟ ଗସ୍ତରେ ଯାଇ ଜୟପୁରର ବିକ୍ରମଦେବ କଲେଜର ପ୍ଲାଟିନିୟମ ଜୁବୁଲି ସମାରୋହରେ ଯୋଗ ଦେଇଥିଲେ। ଏଥିରେ କୋରାପୁଟ ଜିଲ୍ଲାର ସମସ୍ତ ବିଧାୟକଙ୍କ ସହିତ କଂଗ୍ରେସ ବିଧାୟକ ତାରା ବାହିନୀପତି ମଧ୍ୟ ଯୋଗ ଦେଇଥିଲେ।

ଏହି ସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସମସ୍ତ ଅତିଥି ଏବଂ ଛାତ୍ରଛାତ୍ରୀ ଜୟ ଜୟକାର କରିଥିଲେ। କାରଣ ଥିଲା ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିକ୍ରମ ଦେବ କଲେଜକୁ ବିଶ୍ବବିଦ୍ୟାଳୟ ମାନ୍ୟତା ପ୍ରଦାନ କରିସାରିଥିଲେ। ଫଳରେ ଏହି ଉତ୍ସବ ବେଶ ଉତ୍ସବ ମୁଖର ହୋଇ ଉଠିଥିଲା।

ନବୀନଙ୍କ ଏପରି ପଦକ୍ଷେପକୁ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ପ୍ରଶଂସା ନ କରି ରହିପାରିଲେ ନାହିଁ। ସେ ନବୀନ ପଟ୍ଟନାୟକ, 5ଟି ସଚିବ ଭି କେ ପାଣ୍ଡିଆନ, କୋରାପୁଟର ସମସ୍ତ ବିଧାୟକ, ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କୁ ସେ ପ୍ରଶଂସାରେ ପୋତି ପକାଇଲେ। ଏପରିକି ସଭା ସ୍ଥଳରେ ସେ ନବୀନ ପଟ୍ଟନାୟକ ସ୍ବାଗତଂ..ସ୍ବାଗତଂ ସହିତ ନବୀନ ପଟ୍ଟନାୟକ ଜିନ୍ଦାବାଦ ବୋଲି କହିଲେ। ଏହାକୁ ନବୀନ ବେଶ ଖୁସିର ସହିତ ଉପଭୋଗ କରିଥିଲେ।

ତେବେ ତାରାବାହିନୀ ପତି ସେହି ସଭାରେ ମୁଖ୍ୟମନ୍ତ୍ରୀଙ୍କ ଏହି ପଦକ୍ଷେପକୁ ପ୍ରଶଂସା ସହିତ ଛୋଟ ଅନୁରୋଧଟିଏ ମଧ୍ୟ କରିଥିଲେ। ତାହା ଥିଲା ଯେ, ବିକ୍ରମ ଦେବ କଲେଜରେ ଏକ ଅଡିଟୋରିୟମ ନାହିଁ। ତାହା କିପରି ହେବ ମୁଖ୍ୟମନ୍ତ୍ରୀ ପଦକ୍ଷେପ ନିଅନ୍ତୁ ବୋଲି ସେ ସେହି ସଭାରେ ନବୀନଙ୍କୁ ଅନୁରୋଧ କଲେ। ଏଥିସହିତ ସହିତ କୋରାପୁଟର ପର୍ଯ୍ୟଟନ, ଶିକ୍ଷା ସ୍ବାସ୍ଥ୍ୟ ଉପରେ ଅନେକ ସମସ୍ୟା ସଂପର୍କରେ ମଧ୍ୟ ସେ ଅବଗତ କରାଇଥିଲେ।

ହେଲେ ସେହି ସଭାରେ ନବୀନ ପଟ୍ଟନାୟକଙ୍କ ପକ୍ଷରୁ 5ଟି ସଚିବ ଭି କେ ପାଣ୍ଡିଆନ ଏକ ଘୋଷଣା କରିଥିଲେ। ସେ କହିଥିଲେ ଯେ, ଏହି କଲେଜରେ ଏକ ବଡ ଅଡିଟୋରିୟମ ନିର୍ମାଣ ପାଇଁ ମୁଖ୍ୟମନ୍ତ୍ରୀ ଅନୁମତି ଦେଇ ସାରିଛନ୍ତି। ସେତିକି ନୁହେଁ ସେହି ଅନୁମତି ପତ୍ର ମଧ୍ୟ ସେ ସାଥୀରେ ନେଇ ଆସିଛନ୍ତି। ଏହାପରେ ମୁଖ୍ୟମନ୍ତ୍ରୀ ସେହି ଅନୁମତି ପତ୍ରକୁ ସଭାରେ ଦେଖାଇଥିଲେ।

ଏହି ଅଡିଟୋରିୟମ ପାଇଁ ତିନି କୋଟି ବ୍ୟୟ ଅଟକଳ ରଖାଯାଇଛି ବୋଲି ପାଣ୍ଡିଆନ କହିଥିଲେ। ଏହି ଅନୁମତି ପତ୍ର ଜିଲ୍ଲାପାଳ ଗ୍ରହଣ କରିବା ପାଇଁ ଅନୁରୋଧ କରୁଛି। ଏହାପରେ ମୁଖ୍ୟମନ୍ତ୍ରୀ ସେହି ଅନୁମତ୍ରକୁ ଜିଲ୍ଲାପାଳଙ୍କୁ ପ୍ରଦାନ କରିଥିଲେ। ଏପରି ପରିସ୍ଥିତି ଦେଖି ଖାଲି ତାରାବାହିନୀ ପତି ନୁହଁନ୍ତି ସମସ୍ତେ ଆଶ୍ଚର୍ଯ୍ୟ ହୋଇପଡିଥିଲେ। ଛାତ୍ରଛାତ୍ରୀ ସମସ୍ତେ ନବୀନ ପଟ୍ଟନାୟକ ଜିନ୍ଦାବାଦ ଧ୍ବନୀରେ ପରିବେଶକୁ ପ୍ରକମ୍ପିତ କରିଥିଲେ।

ଭୁବନେଶ୍ବର: ଜୟପୁରର ପ୍ରସିଦ୍ଧ ଉଚ୍ଚଶିକ୍ଷାନୁଷ୍ଠାନ ବିକ୍ରମଦେବ ମହାବିଦ୍ୟାଳୟକୁ ବିଶ୍ବବିଦ୍ୟାଳୟ ମାନ୍ୟତା ପ୍ରଦାନ ସଂକ୍ରାନ୍ତୀୟ ପ୍ରସ୍ତାବ କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି। ଅବିଭକ୍ତ କୋରାପୁଟ ଜିଲ୍ଲାର ବୁଦ୍ଧିଜୀବୀ ତଥା ଛାତ୍ରଛାତ୍ରୀ ମାନଙ୍କର ବହୁ ଦିନର ଦାବୀ ଆଜି ପୂରଣ ହୋଇଛି ବୋଲି ପ୍ରକାଶ କରି ମୁଖ୍ୟମନ୍ତ୍ରୀ ଖୁସି ବ୍ୟକ୍ତ କରିଛନ୍ତି।

ବିକ୍ରମ ଦେବ ମହାବିଦ୍ୟାଳୟ ଅବିଭକ୍ତ କୋରାପୁଟ ଜିଲ୍ଲାର ଉଚ୍ଚଶିକ୍ଷା କ୍ଷେତ୍ରରେ ଉଲ୍ଲେଖନୀୟ ଭୂମିକା ଗ୍ରହଣ କରିଆସିଛି। ଚଳିତ ବର୍ଷ ଏହି ମହାବିଦ୍ୟାଳୟ ତାର ୭୫ ବର୍ଷ ପୂର୍ତ୍ତି ପାଳନ କରୁଛି। ବିକ୍ରମଦେବ ମହାବିଦ୍ୟାଳୟ ୧୯୪୭ ମସିହାରେ ସ୍ଥାପିତ ହୋଇଥିଲା। ଏହି ମହାବିଦ୍ୟାଳୟରେ ଏବେ ୧୬ଟି ପୋଷ୍ଟ ଗ୍ରାଜୁଏଟ ପ୍ରୋଗ୍ରାମ, ୧୭ ଟି ଅଣ୍ଡର ଗ୍ରାଜୁଏଟ ପ୍ରୋଗ୍ରାମ, ସହିତ ବିବିଏ, ବିସିଏ, ଓ ବିଇଡି ପାଠ୍ୟକ୍ରମ ଜାରି ରହିଛି।

ବର୍ତ୍ତମାନ ଚାରି ହଜାର ଛାତ୍ରଛାତ୍ରୀ ଏଠାରେ ଅଧ୍ୟୟନ କରୁଛନ୍ତି। ଅବିଭକ୍ତ କୋରାପୁଟ ଜିଲ୍ଲାର ସମସ୍ତ କଲେଜ ବ୍ରହ୍ମପୁର ବିଶ୍ୱବିଦ୍ୟାଳୟ ସହ ଅନୁବନ୍ଧିତ ହୋଇଛି। ବର୍ତ୍ତମାନ ଏହି ନୂଆ ବିଶ୍ୱବିଦ୍ୟାଳୟ ହେବା ଦ୍ଵାରା କୋରାପୁଟ, ରାୟଗଡା ନବରଙ୍ଗପୁର ଓ ମାଲକାନଗିରି ଜିଲ୍ଲାର ହାଜର ହଜାର ଛାତ୍ରଛାତ୍ରୀ ଉପକୃତ ହେବେ। ଦକ୍ଷିଣ ଓଡିଶା ରେ ଉଚ୍ଚ ଶିକ୍ଷା କ୍ଷେତ୍ରରେ ଏହା ଏକ ମାଇଲଷ୍ଟୋନ ହେବ ବୋଲି ମୁଖ୍ୟମନ୍ତ୍ରୀ ଆଶାବ୍ୟକ୍ତ କରିଛନ୍ତି।

ଭୁବନେଶ୍ବର: କୃଷି ଯାନ୍ତ୍ରିକୀକରଣ ବର୍ତ୍ତମାନ ସମୟର ଆବଶ୍ୟକତା ବୋଲି ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ କହିଛନ୍ତି। ସମ୍ବଲପୁରଠାରେ ପଶ୍ଚିମ ଓଡ଼ିଶା ଉନ୍ନୟନ ପରିଷଦ ଏବଂ କୃଷି ଓ କୃଷକ ସଶକ୍ତିକରଣ ବିଭାଗର ମିଳିତ ଆନୁକୂଲ୍ୟରେ ଆୟୋଜିତ ପଶ୍ଚିମ ଓଡ଼ିଶା କୃଷିମେଳାର ଉଦ୍‌ଘାଟନୀ ଉତ୍ସବରେ ଭିଡ଼ିଓ ବାର୍ତ୍ତାରେ କୃଷକମାନଙ୍କୁ ଉଦ୍‌ବୋଧନ ଦେଇ ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟ ସରକାର କୃଷି ଓ କୃଷକ ସମାଜର ସର୍ବାଙ୍ଗୀନ ଉନ୍ନତି ନିମନ୍ତେ ସଂପୂର୍ଣ୍ଣ ପ୍ରତିବଦ୍ଧ ଏବଂ ଏହା ରାଜ୍ୟ ସରକାରଙ୍କ ସର୍ବୋଚ୍ଚ ପ୍ରାଥମିକତା ।

ଏହି ଲକ୍ଷ୍ୟକୁ ହାସଲ କରିବା ପାଇଁ ରାଜ୍ୟ ସରକାର ‘କାଳିଆ’ ଓ ‘ବଳରାମ’ ଯୋଜନା ଏବଂ ମଲେଟ୍‌ ମିଶନ ପରି ଯୋଜନା ପ୍ରଣୟନ କରିଛନ୍ତି । ମୁଖ୍ୟମନ୍ତ୍ରୀ କୃଷକମାନଙ୍କର ଉଦ୍ୟମକୁ ପ୍ରଶଂସା କରି କହିଛନ୍ତି ଯେ ସେମାନଙ୍କର ମୂଲ୍ୟବାନ ଅବଦାନ ଯୋଗୁ ଓଡ଼ିଶାକୁ ନିୟମିତ ବ୍ୟବଧାନରେ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଅନେକ ପୁରସ୍କାର ମିଳିଛି ।

ଏହି ଅବସରରେ କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀସଂପଦ ବିକାଶ ମନ୍ତ୍ରୀ ଶ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ କହିଛନ୍ତି ଯେ ରାଜ୍ୟ ସରକାରଙ୍କ ପକ୍ଷରୁ କୃଷି ପ୍ରତି ଦୃଷ୍ଟିଭଙ୍ଗୀ କେନ୍ଦ୍ରୀଭୂତ କରାଯାଇଛି । ବିଗତ ୨୦ ବର୍ଷରେ ରାଜ୍ୟ କୃଷି ଉତ୍ପାଦନରେ ଉଲ୍ଲେଖନୀୟ ସଫଳତା ହାସଲ କରିଛି । ରାଜ୍ୟ ମାଛ, ପ୍ରାଣୀପାଳନ ଓ ଅଣ୍ଡା ଉତ୍ପାଦନରେ ପ୍ରାୟ ଆତ୍ମନିର୍ଭର ହୋଇପାରିଛି । ୨୦୦୦-୦୧ରେ ଖାଦ୍ୟଶସ୍ୟ ଉତ୍ପାଦନ ୫୫.୩୫ ଲକ୍ଷ ମେଟି୍ରକ୍‌ ଟନରୁ ୧୬୦ ପ୍ରତିଶତ ବୃଦ୍ଧି ପାଇ ୨୦୨-୨୧ ବର୍ଷରେ ୧୩୦.୨୯ ଲକ୍ଷ ମେଟି୍ରକ୍‌ ଟନରେ ପହଞ୍ଚିଛି ।

ସେହିପରି ତୈଳବୀଜ ୫୮ ପ୍ରତିଶତ, ଡାଲିଜାତୀୟ ଶସ୍ୟ ୬୬ ପ୍ରତିଶତ ଏବଂ ପନିପରିବା ଉତ୍ପାଦନ ୬୭ ପ୍ରତିଶତ ବୃଦ୍ଧି ପାଇଛି । ମାଛ ଉତ୍ପାଦନ ଗତ ୨୦ ବର୍ଷରେ ୯ ଲକ୍ଷ ୯୦ ହଜାର ମେଟି୍ରକ୍‌ ଟନକୁ ବୃଦ୍ଧି ପାଇଛି । ଦେଶରେ ମାଛ ଉତ୍ପାଦନରେ ଓଡ଼ିଶା ଚତୁର୍ଥ ସ୍ଥାନରେ ରହିଛି ବୋଲି ଶ୍ରୀ ସ୍ୱାଇଁ କହିଛନ୍ତି । ରାଜ୍ୟ ସରକାର ଚାଷ ଜମି ଉପରେ ବନ୍ୟାର ପ୍ରଭାବକୁ ହ୍ରାସ କରିବା ପାଇଁ ୨୦୦ କୋଟି ଟଙ୍କାର ପ୍ରକଳ୍ପ କାର୍ଯ୍ୟକାରୀ କରୁଛନ୍ତି ଏବଂ ପଶ୍ଚିମ ଓଡ଼ିଶା ଏଥିରୁ ବହୁଳ ଭାବେ ଲାଭବାନ ହେବ ବୋଲି ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି ।

ଉତ୍ସବରେ ପଶ୍ଚିମ ଓଡ଼ିଶା ବିକାଶ ପରିଷଦର ଅଧ୍ୟକ୍ଷ ଶ୍ରୀ ଅସିତ କୁମାର ତି୍ରପାଠୀ କହିଛନ୍ତି ଯେ ବିଭିନ୍ନ ସ୍ଥାନରେ କୃଷକ ମେଳା ଆୟୋଜନ କରାଯିବା ପାଇଁ ଯୋଜନା ପ୍ରସ୍ତୁତ କରାଯାଇଛି । ମାନ୍ୟବର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ପ୍ରଥମ କୃଷି ମେଳା ସମ୍ବଲପୁରଠାରେ ଆୟୋଜିତ ହେଉଛି ।

ରାଜ୍ୟ ଅର୍ଥନୀତିର ୨୦ ପ୍ରତିଶତ କୃଷି କ୍ଷେତ୍ରର ଅବଦାନ । ଜନସଂଖ୍ୟାର ଅର୍ଦ୍ଧାଧିକ ଲୋକ କୃଷି ଉପରେ ନିର୍ଭରଶୀଳ । କୃଷକମାନଙ୍କର ଆୟବୃଦ୍ଧି ନିମନ୍ତେ ରାଜ୍ୟ ସରକାରଙ୍କ ପ୍ରତିବଦ୍ଧତା ରହିଛି । କୃଷକମାନେ ସେମାନଙ୍କ ଉତ୍ପାଦିତ ଦ୍ରବ୍ୟକୁ ଅଧିକ ବ୍ୟବସାୟିକରଣ ଏବଂ ବଜାର ସଂଯୋଗ ଉପରେ ଧ୍ୟାନ ଦେବା ଆବଶ୍ୟକ ବୋଲି ଶ୍ରୀ ତି୍ରପାଠୀ କହିଥିଲେ ।

ଏଥି ସହିତ ସେମାନେ କୃଷି କ୍ଷେତ୍ରରେ ଉଦ୍ୟମିତାକୁ ଆପଣାଇବାର ଆବଶ୍ୟକତା ରହିଛି । କୃଷକ ସମାଜର ଅନେକ ଯୁବକ କୃଷି ବ୍ୟବସାୟ ପ୍ରତି ଆଗ୍ରହ ପ୍ରଦର୍ଶନ କରୁଛନ୍ତି । ରାଜ୍ୟ ସରକାର ଯନ୍ତ୍ରପାତି କ୍ରୟରେ ୭୫ ପ୍ରତିଶତ ସବ୍‌ସିଡ଼ି ପ୍ରଦାନ କରୁଥିବା ପରିପ୍ରେକ୍ଷୀରେ ଚାଷୀମାନେ ଏହି ଯୋଜନାର ଲାଭ ଉଠାଇବା ପାଇଁ ସେ ଆହ୍ୱାନ ଦେଇଛନ୍ତି ।

ଉଦ୍‌ଘାଟନୀ ଉତ୍ସବରେ ଅନ୍ୟମାନଙ୍କ ମଧ୍ୟରେ କୃଷି ଓ ଖାଦ୍ୟ ଉତ୍ପାଦନ ନିର୍ଦ୍ଦେଶାଳୟର ନିର୍ଦ୍ଦେଶକ ଶ୍ରୀ ପ୍ରେମଚନ୍ଦ୍ର ଚୌଧାରୀ, ସମ୍ବଲପୁର ଜିଲ୍ଲାପାଳ ଅନନ୍ୟା ଦାସ, କୁଚିଣ୍ଡା ବିଧାୟକ ଶ୍ରୀ କିଶୋର ଚନ୍ଦ୍ର ନାୟକ, ଜିଲ୍ଲା ପରିଷଦର ଅଧ୍ୟକ୍ଷ ଶ୍ରୀମତୀ କୁମୁଦିନୀ ନାୟକଙ୍କ ସମେତ ବହୁ ଚାଷୀ ଏବଂ ଶିଳ୍ପାନୁଷ୍ଠାନର ପ୍ରତିନିଧି ଯୋଗଦେଇଥିଲେ ।

କୃଷି ମେଳାରେ କୃଷି ଯନ୍ତ୍ରପାତି, ମିଲେଟସ୍‌, ହସ୍ତତନ୍ତ, ହସ୍ତଶିଳ୍ପର ୧୦୦ରୁ ଊଦ୍ଧ୍ୱର୍ ଷ୍ଟଲ ଖୋଲାଯାଇଛି । ଏଥି ସହିତ ଭାରି ଯନ୍ତ୍ରପାତିର କାର୍ଯ୍ୟକାରିତାର ଲାଇଭ ପ୍ରଦର୍ଶନ କରାଯାଉଛି । ଉତ୍ସବରେ ପଶ୍ଚିମ ଓଡ଼ିଶାର ୫ ଜଣ ଅଗ୍ରଣୀ ଚାଷୀଙ୍କୁ କୃଷି କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ ଯୋଗୁଁ ସମ୍ବର୍ଦ୍ଧିତ କରାଯାଇଥିଲା । ଏହି ଅବସରରେ କୃଷି ମନ୍ତ୍ରୀ ଶ୍ରୀ ସ୍ୱାଇଁ ଅଗ୍ରଣୀ ଚାଷୀଙ୍କୁ କମ୍ବାଇନ୍‌ ହାରଭେଷ୍ଟର, ଟ୍ରାକଫର ଏବଂ ମୁଢ଼ି ତିଆରି ମେସିନ୍‌ର ଚାବି ହସ୍ତାନ୍ତର କରିଥିଲେ ।

ଏହି ଉପଲକ୍ଷେ ଆୟୋଜିତ ୫ ଦିନିଆ କର୍ମଶାଳାରେ ଧାନଭିତ୍ତିକ ଫସଲ ପଦ୍ଧତିର ପୁନରୁଦ୍ଧାର, ଉଦ୍ୟାନ କୃଷି ମାଧ୍ୟମରେ ଚାଷୀଙ୍କ ଆୟବୃଦ୍ଧି, ଜଳବାୟୁ ସହନଶୀଳ କୃଷିକାର୍ଯ୍ୟ, କୃଷିଜାତ ଦ୍ରବ୍ୟର ରପ୍ତାନୀକୁ ପ୍ରୋତ୍ସାହନ, ମତ୍ସ୍ୟଚାଷ ଦ୍ୱାରା ଆୟବୃଦ୍ଧି, ପ୍ରାଣୀପାଳନ ମାଧ୍ୟମରେ ଆୟବୃଦ୍ଧି, ଏଗ୍ରିବିଜିନେସ୍‌-ସମୃଦ୍ଧ କୃଷି ଉଦ୍ୟୋଗ ଆଦି ସ୍ଥାନ ପାଇଛି ।

କୃଷି ଯାନ୍ତ୍ରିକୀକରଣରେ ମହିଳାମାନଙ୍କର ଅଂଶଗ୍ରହଣ, କେଜ କଲଚର ଓ ବାୟୋଫ୍ଲକ୍‌ ମାଧ୍ୟମରେ ମତ୍ସ୍ୟଚାଷ, ସମନ୍ୱିତ କୃଷି ବ୍ୟବସ୍ଥା, ଅନ୍ତର୍ଜାତୀୟ ମିଲେଟ୍‌ ବର୍ଷ, ମିଲେଟ୍‌ ଚାଷର ଉପକାରିତା ଓ ସୁବିଧାସୁଯୋଗ, ଅଣଋତୁରେ ପନିପରିବା ଚାଷ ଏବଂ ବିଦେଶୀ ଫଳ ଚାଷର ସମସ୍ୟା ଓ ସମ୍ଭାବନା, ଅଣୁ ଜଳସେଚନ ଏବଂ ସଂରକ୍ଷିତ ଚାଷର ଉପଯୋଗିତା ଓ ଆହ୍ୱାନ ଆଦି ପ୍ରସଙ୍ଗରେ କୃଷକମାନଙ୍କୁ ପ୍ରଶିକ୍ଷଣ ପ୍ରଦାନ କରାଯିବ ।

ଭୁବନେଶ୍ୱର: ଆଜି ‘ବରିଷ୍ଠ ନାଗରିକ ତୀର୍ଥଯାତ୍ରା ଯୋଜନା’ରେ ଭୁବନେଶ୍ୱର ଠାରୁ ଆଲ୍ଲାବାଦ (ପ୍ରୟାଗରାଜ)-ବାରଣାସୀ ଅଭିମୁଖୀ ସ୍ୱତନ୍ତ୍ର ଟ୍ରେନ୍ ଯାତ୍ରାର ଶୁଭାରମ୍ଭ ହୋଇଛି । ଆଧ୍ୟାତ୍ମିକ ଯାତ୍ରାର ଦିବ୍ୟ ଅନୁଭବ ଲକ୍ଷ୍ୟ ନେଇ ଯାତ୍ରା କରୁଥିବା ଏହି ତୀର୍ଥଯାତ୍ରା ଟ୍ରେନ୍ ଯାତ୍ରାର ଶୁଭାରମ୍ଭ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକ ଯୋଗଦେଇ ଭିଡିଓ ବାର୍ତ୍ତା ମାଧ୍ୟମରେ ଯାତ୍ରା କରୁଥିବା ସମସ୍ତ ତୀର୍ଥଯାତ୍ରୀଙ୍କୁ ଶୁଭେଚ୍ଛା ବାର୍ତ୍ତା ଦେଇଥିଲେ ।

ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ କହିଥିଲେ ଯେ, କରୋନା ଯୋଗୁଁ ଗତ ୨ବର୍ଷରୁ ଋର୍ଦ୍ଧ୍ୱ ଧରି ବନ୍ଦ ଥିବା ବରିଷ୍ଠ ନାଗରିକମାନଙ୍କ ପାଇଁ ତୀର୍ଥଯାତ୍ରା ପୁଣି ଆରମ୍ଭ ହୋଇଛି । ଚଳିତ ବର୍ଷ ଆମେ ୭୦୦୦ ବରିଷ୍ଠ ନାଗରିକଙ୍କ ପାଇଁ ତୀର୍ଥଯାତ୍ରା ବ୍ୟବସ୍ଥା କରିଛୁ । ପ୍ରୟାଗରାଜ-ବାରଣାସୀକୁ ଯାଉଥିବା ଏହି ତୀର୍ଥଯାତ୍ରୀମାନେ ଭଗବାନ ବିଶ୍ୱନାଥଙ୍କ ଦର୍ଶନ କରି ନିଜ ପାଇଁ, ପରିବାର ପାଇଁ ଓ ଓଡିଶା ପାଇଁ ବାବାଙ୍କର ଆଶୀର୍ବାଦ ନେଇ ଆସିବେ ବୋଲି କହିଥିଲେ । ବରିଷ୍ଠ ନାଗରିକଙ୍କ ପାଇଁ ଯିବା,ଆସିବା, ରହିବା, ଖାଇବା, ସ୍ୱାସ୍ଥ୍ୟସେବା ଓ ସବୁ ପ୍ରକାର ସୁବିଧା ସରକାର କରିଥିବା ମୁଖ୍ୟମନ୍ତ୍ରୀ ପ୍ରକାଶ କରି ସେମାନଙ୍କର ଯାତ୍ରାର ଶୁଭ ମନାସି ଥିଲେ ।

ବରିଷ୍ଠ ନାଗରିକ ତୀର୍ଥଯାତ୍ରା ସ୍ୱତନ୍ତ୍ର ଟ୍ରେନ୍ ଭୁବନେଶ୍ୱର ରେଳ ଷ୍ଟେସନର ୧ ନମ୍ବର ପ୍ଲାଟଫର୍ମରୁ ଆଦି ନିର୍ଦ୍ଧାରିତ ଦିନ ୧୨.୪୫ ମିନିଟ୍ ସମୟରେ ଛାଡିଥିଲା । ଏହି ଯାତ୍ରାରେ ଆଜି ବରିଷ୍ଠ ନାଗରିକ ଓ ସେମାନଙ୍କ ପାଇଁ ସୁରକ୍ଷା ଅଧିକାରୀମାନଙ୍କୁ ମିଶାଇ ମୋଟ ୯୮୨ ଜଣ ଯାତ୍ରୀଆଲ୍ଲାବାଦ( ପ୍ରୟାଗରାଜ) ଏବଂ ବାରଣାସୀକୁ ଯାତ୍ରାକରିଛନ୍ତି । ଏହି ଯୋଜନାରେ ଚୟନ କରାଯାଇଥିବା ଖୋର୍ଦ୍ଧା, ନୟାଗଡ, ପୁରୀ,କଟକ, ଜଗତସିଂହପୁର, କେନ୍ଦ୍ରାପଡା ଓ ଢେଙ୍କାନାଳ ଆଦି ୭ ଟି ଜିଲ୍ଲାରୁ ବରିଷ୍ଠ ନାଗରିକମାନେ ଏହି ତୀର୍ଥଯାତ୍ରୀମାନେ ସାମିଲ ହୋଇଛନ୍ତି ।

ଏହି ପରିପ୍ରେକ୍ଷୀରେ ଭୁବନେଶ୍ୱର ରେଳ ଷ୍ଟେସନରେ ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା । ସ୍ୱତନ୍ତ୍ର ଟ୍ରେନ୍ କୁ ଆକର୍ଷଣୀୟ ଭାବରେ ସଜ୍ଜିତ କରାଯାଇଥିଲା। ଏଠାରେ ସଂପୃକ୍ତ ବିଭିନ୍ନ ଜିଲ୍ଲାରୁ ମନ୍ତ୍ରୀ, ବିଧାୟକ ଓ ଅନ୍ୟ ଅତିଥି ମାନେ ଯୋଗଦେଇଥିଲେ। ନିମନ୍ତ୍ରିତ ଅତିଥିମାନେ ରେଳ ବଗି ନିକଟରେ ଫିତାକାଟି ଏବଂ ପତାକା ହଲାଇ ଯାତ୍ରାର ଶୁଭାରମ୍ଭ କରିଥିଲେ । ଏହି ଉପଲକ୍ଷେ ଏଠାରେ ଆୟୋଜିତ ସଭାରେ ମୁଖ୍ୟମନ୍ତ୍ରୀଙ୍କ ଭିଡିଓ ଯୋଗେ ଶୁଭେଚ୍ଛା ବାର୍ତ୍ତା ପ୍ରଦର୍ଶନ କରାଜିଥିଲା ।

କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ରାଜ୍ୟ ଭିନ୍ନକ୍ଷମ ସଶକ୍ତିକରଣ, ବିଜ୍ଞାନ ଓ ପ୍ରଯୁକ୍ତିବିଦ୍ୟା ଓ ସାଧାରଣ ଉଦ୍ୟୋଗ ମନ୍ତ୍ରୀ ଶ୍ରୀ ଅଶୋକ ଚନ୍ଦ୍ର ପଣ୍ଡା, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ଶ୍ରୀ ସମୀର ରଞ୍ଜନ ଦାସ, ରାଜ୍ୟ କ୍ରୀଡା, ଯୁବସେବା, ଇକେକ୍ଟ୍ରୋନିକ୍ସ ଓ ଆଇଟି ମନ୍ତ୍ରୀ ଶ୍ରୀ ତୁଷାର କାନ୍ତି ବେହେରା, ସରକାରୀ ମୁଖ୍ୟ ସଚେତକ ତଥା ବିଧାୟକ ଶ୍ରୀ ପ୍ରଶାନ୍ତ କୁମାର ମୁଦୁଲି,ବିଧାୟକ ଶ୍ରୀ ଶଶୀଭୂଷଣ ବେହେରା, ବିଧାୟକ ଶ୍ରୀ ସୁରେଶ କୁମାର ରାଉତରାୟ, ବିଧାୟକ ଶ୍ରୀ ଅନନ୍ତ ନାରାୟଣ ଜେନା, ବିଧାୟକ ଶ୍ରୀ ଅରବିନ୍ଦ ଢାଲି, ବିଧାୟକ ଶ୍ରୀ ସମ୍ବିତ ରାଉତରାୟ ଯୋଗଦେଇଥିଲେ।

ସେହିପରି ବିଧାୟକ ଶ୍ରୀ ସୁଶାନ୍ତ କୁମାର ରାଉତ, ଭୁବନେଶ୍ୱର ମହାନଗର ନିଗମ ମେୟର ଶ୍ରୀମତୀ ସୁଲୋଚନା ଦାସ, ଓଡିଶା ପର‌୍ୟ୍ୟଟନ ଉନ୍ନୟନ ନିଗମ ଲିଃ.ର ଅଧ୍ୟକ୍ଷ ଡଃ ଲେନିନ୍ ମହାନ୍ତି, ବରିଷ୍ଟ ନାଗରିକ ତୀର୍ଥଯାତ୍ରା ଯୋଜନା କାର‌୍ୟ୍ୟକ୍ରମର ଉପଦେଷ୍ଟା ଶ୍ରୀ ଦୁର୍ଗା ପ୍ରସାଦ ସାମନ୍ତରାୟ ପ୍ରମୁଖ ଯୋଗଦେଇ ରାଜ୍ୟ ବରିଷ୍ଠ ନାଗରିକ ତୀର୍ଥଯାତ୍ରା ଯୋଜନା ରାଜ୍ୟ ସରକାରଙ୍କ ଏକ ଯୁଗାନ୍ତକାରୀ ଯୋଜନା ବୋଲି ଅଭିହିତ କରିବା ସହ ସମସ୍ତ ତୀର୍ଥଯାତ୍ରୀଙ୍କୁ ସେମାନଙ୍କର ଯାତ୍ରାର ଶୁଭେଚ୍ଛା ଜ୍ଞାପନ କରିଥିଲେ ।

ମନ୍ତ୍ରୀ ଶ୍ରୀ ଅଶୋକ ଚନ୍ଦ୍ର ପଣ୍ଡା କହିଥିଲେ ଯେ, ମୁଖ୍ୟମନ୍ତ୍ରୀଙ୍କ ଦିଗଦର୍ଶନରେ ସମାଜର ସବୁବର୍ଗର ଜନସାଧାରଣଙ୍କ ପାଇଁ ଯୋଜନା ପ୍ରଣୟନ କରାଯାଇଛି ଏବଂ ସବୁସ୍ତରରେ ଯୋଜନର ସୁଫଳ ପହଁଚିବା ପାଇଁ ପ୍ରୟାସ ଜାରି ରହିଛି । ଗଣଶିକ୍ଷା ମନ୍ତ୍ରୀ ଶ୍ରୀ ଦାସ ରାଜ୍ୟ ସରକାରଙ୍କ ଏହି ଯୋଜନା ଅନ୍ୟ ରାଜ୍ୟରେ ଅନୁକରଣୀୟ ହୋଇଥିବା କହିଥିଲେ । ଅନ୍ୟମାନଙ୍କ ମଧ୍ୟରେ ରାଜ୍ୟ ପର‌୍ୟ୍ୟଟନ ବିଭାଗ ନିର୍ଦ୍ଦେଶକ ଶ୍ରୀ ସଚ୍ଚିନ୍ ରାମଚନ୍ଦ୍ର ଯାଦବ ଏବଂ ଖୋର୍ଦ୍ଧା ଜିଲ୍ଲାପାଳ ଶ୍ରୀ କେ.ସୁଦର୍ଶନ ଚକ୍ରବର୍ତ୍ତୀ ଅତିଥି ଭାବେ ଉପସ୍ଥିତ ଥିଲେ ।

ଭୂବନେଶ୍ୱର ଅତିରିକ୍ତ ଜିଲ୍ଲାପାଳ ଶ୍ରୀ ପ୍ରଫୁଲ୍ଲ କୁମାର ସ୍ୱାଇଁ, ଉପ ଜିଲ୍ଲାପାଳ ଶ୍ରୀ ଦେବବ୍ରତ ସାହୁ, ଭୁବନେଶ୍ୱର ବ୍ଲକ ବିଡିଓ ଶ୍ରୀ ସମ୍ପଦ କୁମାର ଦଳାଇଙ୍କ ସମେତ ଖୋର୍ଦ୍ଧା ଜିଲ୍ଲାର ସମସ୍ତ ବିଡିଓ, ତହସିଲଦାର, ପୌରପାଳିକା ନିର୍ବାହୀ ଅଧିକାରୀଓ ବିଭିନ୍ନ ସରକାରୀ ବିଭାଗୀୟ ଅଧିକାରୀ ଓ କର୍ମଚାରୀମାନେ ବରିଷ୍ଠ ନାଗରିକମାନଙ୍କର ସାମୟିକ ରହଣୀ ଓ ଯାତ୍ରାର ସୁବ୍ୟବସ୍ଥା କରିଥିଲେ ।

ତୀର୍ଥଯାତ୍ରାର ଶୁଭାରମ୍ଭ ପରିପ୍ରେକ୍ଷୀରେ ଆଜି ତୀର୍ଥଯାତ୍ରା କରିଥିବା ବରିଷ୍ଠ ନାଗରିକ ରବୀନ୍ଦ୍ର ନାଥ ନାୟକ, ଗେଲ୍ଲି ସାହୁ, ରାଜକିଶୋର ବରାଳ, ସ୍ୱର୍ଣ୍ଣଲତା ନାୟକ, ପ୍ରଦୀପ କେଇଙ୍କୁ ପ୍ରତୀକାତ୍ମକ ଭାବେ ଡମି ରେଳ ଟିକେଟ୍ ପ୍ରଦାନ କରାଯାଇଥିଲା । ବିଶିଷ୍ଟ ଉପସ୍ଥାପକ ଡଃ ମୃତ୍ୟୃଞ୍ଜୟ ରଥ କାର‌୍ୟ୍ୟକ୍ରମ ସଂଯୋଜନା କରିଥିବା ବେଳେ ଭୁବନେଶ୍ୱର ବ୍ଲକ ଶିକ୍ଷା ଅଧିକାରୀ ଶ୍ରୀମତୀ ପ୍ରଜ୍ଞା ପାରମିତା ଜେନା ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।

ଗତକାଲି ବିଭିନ୍ନ ଜିଲ୍ଲାରୁ ଆସିଥିବା ତୀର୍ଥଯାତ୍ରୀମାନଙ୍କୁ ଉତ୍କଳ ବିଶ୍ୱବିଦ୍ୟାଳୟ, ବାଣୀବିହାର ସ୍ଥିତ ଛାତ୍ରାବାସ ନଂ-୭ ଏଚଆରଡିସି ସେଣ୍ଟର, ବିଜୁପଟ୍ଟନାୟକ ସ୍ପୋର୍ଟସ୍ ଷ୍ଟାଡିୟମ, ୟୁନିଟ୍-୩ ସରକାରୀ ବାଳକ ବିଦ୍ୟାଳୟ, ଭାରତ ସ୍କାଉଟ୍ ଓ ଗାଇଡ୍ ସ୍କୁଲ ଆଦି ୫ ଟି ସ୍ଥାନରେ ବରିଷ୍ଠ ନାଗରିକମାନଙ୍କ ପାଇଁ ଅସ୍ଥାୟୀ ରହଣି ବ୍ୟବସ୍ଥା କରାଯାଇଥିଲା ଓ ସଂଧ୍ୟାରେ ସବୁ କେନ୍ଦ୍ରରେ ସେମାନଙ୍କ ପାଇଁ ଆଧ୍ୟାତ୍ମିକ ଭଜନ କାର‌୍ୟ୍ୟକ୍ରମ ପରିବେଷଣ କରାଯାଇଥିଲା ।

ସ୍ୱତନ୍ତ୍ର ବସ୍ ଯୋଗେ ଗତକାଲି ବରିଷ୍ଠ ନାଗରିକମାନଙ୍କୁ ବିଭିନ୍ନ ଜିଲ୍ଲାରୁ ଭୁବନେଶ୍ୱର ଅଣାଯିବା ସହିତ ସେମାନଙ୍କର ପଂଜୀକରଣ, ପରିଚୟ ପତ୍ର ଓ ରେଳ ଟିକେଟ୍ ପ୍ରଦାନ କରାଯାଇଥିଲା । ଆଜି ସକାଳୁ ସମସ୍ତ ତୀର୍ଥଯାତ୍ରୀଙ୍କୁ ରେଳଷ୍ଟେସନକୁ ଅଣାଯିବାବେଳେ ପାରମ୍ପରିକ ବାଦ୍ୟ ଓ ଶଙ୍ଖ ଧ୍ୱନିରେ ସ୍ୱାଗତ କରାଯାଇଥିଲା ।

ଖୋର୍ଦ୍ଧା ଜିଲ୍ଲାପାଳଙ୍କ ପ୍ରତ୍ୟକ୍ଷ ତତ୍ୱାବଧାନରେ , ରାଜ୍ୟ ପର‌୍ୟ୍ୟଟନ ବିଭାଗ ଏବଂ ରାଜ୍ୟ ସରକାରଙ୍କ ସଂପୃକ୍ତ ବିଭିନ୍ନ ବିଭାଗର ରାଜ୍ୟ, ଜିଲ୍ଲା ,ଉପଖଣ୍ଡ ତଥା ବ୍ଲକସ୍ତରୀୟ ଅଧିକାରୀ ଓ କର୍ମଚାରୀ ତଥା ରେଳ ବିଭାଗ(ଆଇଆରସିଟିସି)ର ସହଯୋଗରେ ଏହି ଯାତ୍ରାର ଶୁଭାରମ୍ଭ ସୁଚାରୁରୂପେ ସଂପାଦିତ ହୋଇଛି ।

ପ୍ରକାଶ ଥାଉକି, ମୁଖ୍ୟମନ୍ତ୍ରୀ ଦେଶର ପ୍ରମୁଖ ତୀର୍ଥସ୍ଥାନ ଭ୍ରମଣ କରିବା ପାଇଁ ବରିଷ୍ଠ ନାଗରିକମାନଙ୍କୁ ସୁଯୋଗ ଦେବା ଉଦ୍ଦେଶ୍ୟରେ ବରିଷ୍ଠ ନାଗରିକ ତୀର୍ଥଯାତ୍ରା ଯୋଜନା ୨୦୧୬ ମସିହା ଜୁଲାଇ ୨୫ ତାରିଖରୁ ଆରମ୍ଭ କରି ଏହାକୁ କାର୍ଯ୍ୟକାରୀ କରୁଛନ୍ତି ।

ଏହି ଯୋଜନାରେ ଅଦ୍ୟାବଧି ୧୫ଟି ତୀର୍ଥଯାତ୍ରାର ଆୟୋଜନ କରାଯାଇଥିବା ବେଳେ ବିଭିନ୍ନ ଜିଲ୍ଲାରୁ ୧୪,୫୦୦ଜଣ ବରିଷ୍ଠ ନାଗରିକ ବିଭିନ୍ନ ପର‌୍ୟ୍ୟାୟରେ ମଦୁରାଇ, ରାମେଶ୍ୱରମ, ପ୍ରୟୋଗରାଜ,ବାରଣାସୀ,ହରିଦ୍ୱାର, ଆଗ୍ରା, ମଥୁରା,ବୃନ୍ଦାବନ,ଋଷିକେଶ, ଆଜମେର, ନାଗାପଟ୍ଟିନମ୍, ତିରୁପତି, ବାଲାଜୀ, ଭେଲୋର, ଶିରିଡି, ନାସିକ, ତ୍ରୟୋମ୍ବକେଶ୍ୱର, ଭେଲନକାଟୀ, ତାଞ୍ଜାବୁର,ଦକ୍ଷିଣେଶ୍ୱରକାଳୀ,କୋଲକାତା, କାମାକ୍ଷା ଆଦି ବିଭିନ୍ନ ତୀର୍ଥସ୍ଥାନ ଭ୍ରମଣର ସୁଯୋଗ ପାଇଛନ୍ତି ଏବଂ ପ୍ରତିଥର ହାରାହାରି ୧୦୦୦ ଜଣ ତୀର୍ଥଯାତ୍ରୀ ତୀର୍ଥଯାତ୍ରାର ସୁଯୋଗ ପାଉଛନ୍ତି ।