କୋଲକୋତା: ଜଣେ ଯୁବକ ଫେସବୁକରେ ବନ୍ଧୁତା ସ୍ଥାପନ କରି ଯୁବତୀଙ୍କୁ ପ୍ରେମ ନିବେଦନ କରିଥିଲେ। ଯୁବତୀଜଣଙ୍କ ବିବାହ ପାଇଁ ରାଜି ନହେବାରୁ ସମ୍ପୃକ୍ତ ଯୁବକଜଣଙ୍କ ଆତ୍ମହତ୍ୟାର ଧମକ ଦେଇ ବିବାହ କରିଥିଲେ। କିନ୍ତୁ ବିବାହ ପରେ ଯୁବକଜଣଙ୍କ ପତ୍ନୀଙ୍କ ସୁନା ଅଳଙ୍କାର ସହିତ ନଗଦ ଟଙ୍କା ଧରି ଫେରାର ହୋଇଥିବା ଅଭିଯୋଗ ହୋଇଛି।
ସୂଚନା ଅନୁଯାୟୀ, ଉତ୍ତରପ୍ରଦେଶର ଅଭିଷେକ ଆର୍ଯ୍ୟା ନାମକ ଜଣେ ଯୁବକ କୋଲକୋତାର ଦୀପାଲି (ଛଦ୍ମ ନାମ) ନାମକ ଜଣେ ଯୁବତୀଙ୍କ ମଧ୍ୟରେ ଫେସବୁକ ମାଧ୍ୟମରେ ବନ୍ଧୁତା ସ୍ଥାପନ ହୋଇଥିଲା। ପରେ ଅଭିଷେକ ପ୍ରେମ ନିବେଦନ କରିଥିଲେ। ଏପରିକି ଦୀପାଲି ବିବାହ ନକଲେ ବ୍ଲେଡ଼ ଦ୍ଵାରା ଗଳା କାଟି ଆତ୍ମହତ୍ୟା କରିବେ ବୋଲି ଅଭିଷେକ ଧମକ ଦେଇଥିଲେ। ଏହା ପରେ ତାଙ୍କର ବିବାହ ହୋଇଥିଲା।
କିନ୍ତୁ ବିବାହ ପରେ ଅଭିଷେକ ତାଙ୍କ ପତ୍ନୀଙ୍କ ସୁନା ଅଳଙ୍କାର ଏବଂ ନଗଦ ଟଙ୍କା ନେଇ ଫେରାର ହୋଇଯାଇଥିବା ଥାନାରେ ଅଭିଯୋଗ କରିଛନ୍ତି। ଏପରି ଘଟଣା ପରେ ମହିଳାଜଣଙ୍କ ପତିଙ୍କ ଘର ଉତ୍ତରପ୍ରଦେଶ ଯାଇଥିଲେ। କିନ୍ତୁ ଅଭିଷେକଙ୍କ ଘର ବନ୍ଦ ଥିବାରୁ ଦୀପାଲୀ ଫତେପୁର ପୋଲିସ ଥାନାରେ ଏନେଇ ଅଭିଯୋଗ କରିଛନ୍ତି। ପୋଲିସ ଶୀଘ୍ର ଏହା ଉପରେ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ବୋଲି ଦୀପାଲିଙ୍କୁ ପ୍ରତୁଶ୍ରୁତି ଦେଇଛି। (ଏଜେନ୍ସି)