Tag: ବାଣପୁର

ବାଣପୁର: ବାଣପୁର ବ୍ଲକ ନରେନ୍ଦ୍ରପୁର ପଞ୍ଚାୟତ ଉପେନ୍ଦ୍ର ବିଦ୍ୟାପୀଠ ଓ ଭବାନୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ମିଳିତ ସହଯୋଗରେ ପୁରସ୍କାର ବିତରଣ ଉସôବ ମହାସମାରୋହରେ ଅନୁଷ୍ଠିତ ହୋଇଯାଇଛି। ଏଥିରେ ଆଇନ, ଅବକାରୀ ଓ ପୂର୍ତ୍ତ ବିଭାଗ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ମୁଖ୍ୟ ଅତିଥି ଭାବେ ଯୋଗଦେଇ ଛାତ୍ର ଛାତ୍ରୀମେନେ ପ୍ରତିଦିନ ପିତାମାତା, ଗୁରୁ ଓ ଈଶ୍ୱରଙ୍କୁ ଭକ୍ତି କଲେ ବିଦ୍ୟାଲାଭ ସଫଳ ହେବ ବୋଲି ପରାମର୍ଶ ଦେଇଥିଲେ । ତତ୍ସହିତ ବିଦ୍ୟାଳୟ ଗୃହ ନିର୍ମାଣ, ଖେଳ ପଡିଆ ଉନ୍ନତି କରଣ ସମାଧାନ ସହ ଆଗାମୀ ଦିନରେ ବ୍ଲକ ଗ୍ରାଣ୍ଟ ସ୍କୁଲ ଶବ୍ଦ ରବିବ ନାହିଁ ବୋଲି ମତବ୍ୟକ୍ତ କରିଥିଲେ।

ମୁଖ୍ୟ ବକ୍ତା ଭାବେ କିଟ୍ ଓ କିସ୍ ବିଶ୍ୱବିଦ୍ୟାଳୟର ସଦସ୍ୟ ତଥା “ବିଶ୍ୱମୁକ୍ତି” ସଂପାଦକ ପ୍ରଫେସର ଶଶାଙ୍କ ଚୁଡାମଣି ଯୋଗଦେଇ ଓଡିଆ ଅସ୍ମିତା ଉପରେ ବକ୍ତବ୍ୟ ରଖିଥିଲେ। ବିଶିଷ୍ଟ ଅତିଥି ରୂପେ ଖୋର୍ଦ୍ଧା ବିଧାୟକ ପ୍ରସାନ୍ତ କୁମାର ଜଗଦେ୍ଦବ, ସରପଞ୍ଚ ସବିତା ଦାସ, ସମିତି ସଭ୍ୟ କନ୍ଦର୍ପ ଜେନା, ଦୁଇ ବିଦ୍ୟାଳୟର ସଭାପତି ପ୍ରକାଶ ଦାସ ଏବଂ ପବିତ୍ର କୁମାର ବରାଳ ଯୋଗ ଦେଇଥିଲେ।

ସଭା ଆରମ୍ଭ ପୂର୍ବରୁ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ବିଦ୍ୟାଳୟ ରୂପାନ୍ତ୍ରିକରଣ ଦ୍ୱାରା ନୂତନ ଶ୍ରେଣୀ ଗୃହ, ବିଷୁଦ୍ଧ ପିଇବା ପାଣି, ବିଜ୍ଞାନ ଗୃହ ଓ ଲାଇବ୍ରେରି ଉଦ୍ଘାଟନ କରିଥିଲେ। ଦୁଇ ପ୍ରଧାନ ଶିକ୍ଷକ ଦିଲ୍ଲୀପ ଶ୍ରୀଚନ୍ଦନ ଏବଂ ମମତା ମହାପାତ୍ର ବିରବରଣୀ ପାଠ କରିଥିବା ବେଳେ ମଞ୍ଚ ସଂଯୋଜକ ରୂପେ ବରିଷ୍ଠ ଶିଷକ ଶିଶିର କୁମାର ଦାସ ସଭା ପରିଚାଳନା କରିଥିଲେ। ବିଭିନ୍ନ ପ୍ରତିଯୋଗିତାରେ ଅଂଶ ଗ୍ରହଣ କରିଥିବା ଛାତ୍ର ଛାତ୍ରୀ ମାନଙ୍କୁ ମାନପତ୍ର ସହ ପୁରସ୍କାର ବଣ୍ଟନ କରାଗଲା ପରେ ମହେଶ୍ୱର ଜେନାଙ୍କ ଦ୍ୱାରା ପାଇକା ଆଖଡା, ଲେଜିମ୍, ପିରାମିଡ୍ ଆଦି ନୂତନ ସାଂସ୍କୃତିକ କାର୍ଯ୍ୟକ୍ରମ ପରିବେଶଣ କରାଯାଇଥିଲା।

ବାଣପୁର: ଆଜି ବାଣପୁର ଶାଳିଆ ଜଳ ସେଚନ ଉପଖଣ୍ଡରେ ମୁଖ୍ୟ କେନାଲର ବିଭିନ୍ନ ସ୍ଥାନରେ ୧୪ କୋଟି ଟଙ୍କାର ପ୍ରକଳ୍ପକୁ ଶିଳାନ୍ୟାସ କରିଛନ୍ତି ଆଇନ ମନ୍ତ୍ରୀ ତଥା ଚିଲିକା ବିଧାୟକ ପୃଥ୍ୱୀରାଜ ହରିଚନ୍ଦନ। ଶାଳିଆ ଜଳସେଚନ ଅଧୀନରେ ଥିବା କେନାଲ ରାସ୍ତା ବାଣପୁରର ବିଭିନ୍ନ ଗ୍ରାମକୁ ସଂଯୋଗ କରୁଥିବା ବେଳେ ଦୀର୍ଘଦିନ ଧରି ମରାମତି ହୋଇପାରି ନଥିବାରୁ ଜନ ଅସନ୍ତୋଷ ଦେଖାଯାଇଥିଲା। ଏହାକୁ ପ୍ରାଥମିକତା ଦେଇ ଶ୍ରୀଯୁକ୍ତ ହରିଚନ୍ଦନ ଶାଳିଆ ଜଳସେଚନ ପ୍ରକଳ୍ପର ମାମୁଁ ଭଣଜା ଡିଷ୍ଟ୍ରିବ୍ୟୁଟାରିର ବାମପାର୍ଶ୍ୱ ବନ୍ଧ ସେବା ରାସ୍ତା ନିମନ୍ତେ, ୩୩. ୫୨ଲକ୍ଷ, ମୁଖ୍ୟ କେନାଲର ଆର.ଡ଼ି ଶୂନ୍ୟରାସ୍ତା ଠାରୁ ୪୯୪୨ ମିଟରରେ ବଣ୍ଟନ ପ୍ରଣାଳୀ ଓ ସୁରକ୍ଷା ପ୍ରାଚୀର ଉନ୍ନତି କରଣ ନିମନ୍ତେ ୧୧କୋଟି ୪୫ଲକ୍ଷ, ସାହସପୁର ଡିଷ୍ଟ୍ରିବ୍ୟୁଟାରୀର ୪କି. ମି ପର୍ଯ୍ୟନ୍ତ ୯୮. ୨୩ଲକ୍ଷ, ଆର.ଡି ରୋଡ ଠାରୁ ୪୯୪୨ ମି. ପର୍ଯ୍ୟନ୍ତ ସେବା ରାସ୍ତାର ଉନ୍ନତି କରଣ ନିମନ୍ତେ ୧୨୭. ୮୮ଲକ୍ଷ ଟଙ୍କାର ପ୍ରକଳ୍ପ ଜଳସେଚନ ବିଭାଗ ତରଫରୁ ଅନୁମୋଦନ ଲାଭ କରିଥିଲା।

ଆଜି ସମସ୍ତ ପ୍ରକଳ୍ପକୁ ନଡ଼ିଆ ଫଟାଇ ଭିତ୍ତିପ୍ରସ୍ତର ସ୍ଥାପନ କରିଥିଲେ ଆଇନ ମନ୍ତ୍ରୀ ଶ୍ରୀଯୁକ୍ତ ହରିଚନ୍ଦନ।

ଉକ୍ତ ଭିତ୍ତିପ୍ରସ୍ତର କାର୍ଯ୍ୟକ୍ରମରେ ବାଣପୁର ବ୍ଲକ ଅଧକ୍ଷ ଅମରେନ୍ଦ୍ର ରଣସିଂହ, ଜିଲ୍ଲା ପରିଷଦ ଉପାଧ୍ୟକ୍ଷ ଗୋପୀନାଥ ମହାରଣା, ନନ୍ଦପୁର ସରପଞ୍ଚ ପୁଷ୍ପମିତ୍ର ଖୁଣ୍ଟିଆ, ଭେଟେଶ୍ୱର ସରପଞ୍ଚ ସାବିତ୍ରୀ ଭୋଳ, ଭବାନୀପୁର ସରପଞ୍ଚ କାର୍ତ୍ତିକ ବାରିକ, ଦାମିଆ ସରପଞ୍ଚ ବୀଣାପାଣି ଷଣ୍ଢ, ସମିତି ସଭ୍ୟା ମାନି ଶବର ପ୍ରମୁଖ ଉପସ୍ଥିତ ଥିଲେ।

ତେବେ ଶାଳିଆ ଡ୍ୟାମ ତଳ ଅଂଚଳରେ ସଂଯୋଗ କରୁଥିବା କେନାଲ ରାସ୍ତାର ମରାମତି ପ୍ରକଳ୍ପକୁ ନେଇ ସ୍ଥାନୀୟ ଅଧିବାସୀ ମାନ୍ୟବର ମନ୍ତ୍ରୀଙ୍କ ଉପରେ ଖୁସିବ୍ୟକ୍ତ କରିଥିଲେ।  ଚିଲିକାର ଉନ୍ନତିକରଣ ନିମନ୍ତେ ଆଗକୁ ବହୁ ପ୍ରତିକ୍ଷିତ କାର୍ଯ୍ୟକ୍ରମ ହାତକୁ ନିଆଯିବ ବୋଲି ଶ୍ରୀଯୁକ୍ତ ହରିଚନ୍ଦନ ଗଣମାଧ୍ୟମକୁ ପ୍ରକାଶ କରିଥିଲେ।

ଜଳସେଚନ ବିଭାଗ ଅଧିକ୍ଷଣ ଯନ୍ତ୍ରୀ ପ୍ରିୟବ୍ରତ ବେହେରା, ସହକାରୀ ଯନ୍ତ୍ରୀ ସୁରେନ୍ଦ୍ର ସାହୁ,କନିଷ୍ଠ ଯନ୍ତ୍ରୀ ମନୋଜ ସାହୁ କାର୍ଯ୍ୟକ୍ରମକୁ ପରିଚାଳନା କରିଥିଲେ।

ବାଣପୁର: ବାଣପୁର ସ୍ଥାନୀୟ ପରିଡ଼ା ପାଠାଗାର ଶୁଭମଙ୍ଗଳ କଲ୍ୟାଣ ମଣ୍ଡପ ସଭାଗୃହରେ, ଖୋର୍ଦ୍ଧା ଭାଷା ସୁରକ୍ଷା ସମ୍ମିଳନୀ ଆନୁକୁଲ୍ୟରେ ଐତିହାସିକ ଓ ଗବେଷକ ମଦନ ମୋହନ ମହାପାତ୍ରଙ୍କ ପ୍ରଣୀତ ଶିଳାଲେଖ ଓ ତାମ୍ରପଟ୍ଟାରେ ଐତିହାସିକ ବଙ୍କାଡ଼ଗଡ଼ ଓ ବାଣପୁର ଐତିହ୍ୟ ପୁସ୍ତକ ପାଠ୍ୟାର୍ପଣ।

ଶ୍ରୀ ଦକ୍ଷେଶ୍ୱର-ଭଗବତୀନ୍ୟାସ ପରିଷଦର ପ୍ରାକ୍ତନ ସଭାପତି ଲଳିତମୋହନ ପଟ୍ଟନାୟକଙ୍କ ସଭାପତିତ୍ବ ରେ ମୁଖ୍ୟ ଅତିଥି ଭାବେ ଖୋର୍ଦ୍ଧା ଆମ ଭାଷା ସୁରକ୍ଷା ସମ୍ମିଳନୀ ର ସଭାପତି ଐତିହାସିକ ସତ୍ୟବାଦୀ ବଳିୟାରସିଂ ବହିଟିକୁ ସମୀକ୍ଷା କରିଥିଲେ। ସେ କହିଲେ , ପ୍ରାମାଣିକ ତଥ୍ୟ, ଶିଳାଲେଖ ଓ ତାମ୍ର ଶାସନ ଆଧାରରେ ପ୍ରାଚୀନ କଙ୍ଗୋଦ ମଣ୍ତଳ ବଙ୍କାଡ଼ଗଡ଼ର ଶୈଳୋଭବ ଶାସନର ଐତିହ୍ୟ ଓଡ଼ିଶା ଇତିହାସ, ଓଡ଼ିଆ ଭାଷା ଓ ସଂସ୍କୃତିର ଜୀବନ୍ତ ଦର୍ପଣ ଅଟେ। ପ୍ରଭୁ ଦକ୍ଷେଶ୍ୱର-ଭଗବତୀ ଓ ବୀରଜାଇ ସଂସ୍କୃତି ଓ ପରମ୍ପରା ଅନନ୍ୟ ଅଟେ।

ଲେଖକ ଶ୍ରୀ ମହାପାତ୍ରଙ୍କ ସମେତ ନାଟ୍ୟକାର ଜିତେନ୍ଦ୍ର ପଟ୍ଟନାୟକ, କବି ରଙ୍କନାଥ ସେଠୀ, ସାହିତ୍ୟିକ ପୁରୁଷୋତ୍ତମ ମହାପାତ୍ର, ବାଲୁଗାଁ ମହାବଦ୍ୟାଳୟର ଅଧ୍ୟକ୍ଷ, ଡ଼ଃ. ଲକ୍ଷ୍ମୀଧର ସୁବୁଦ୍ଧି ପ୍ରମୁଖ ମାଞ୍ଚାସୀନ ଥିଲେ। କାର୍ଯ୍ୟକ୍ରମକୁ କବି ଗୋପୀନାଥ ଦାଶ ଓ ସାମ୍ବାଦିକ ଦିଗମ୍ବର ବିଶ୍ଵାଳ ସଂଯୋଜନା କରିଥିଲେ। ଅଞ୍ଚଳର ବହୁ ବୁଦ୍ଧଜୀବି ଓ ଲେଖକ ଯୋଗ ଦେଇଥିଲେ।

ଶେଷରେ ପାଠାଗାରର ଅଧିକ୍ଷକ ଗୋଲକ ବିହାରୀ ପରିଡ଼ା ଧନ୍ୟବାଦ ଦେଇଥିଲେ।

ବାଣପୁର: ବାଣପୁର ତାଲୁକ ଆଇନ ସେବା ସମିତି ଆନୁକୂଲ୍ୟରେ ଆଜି ବାଣପୁର କୋର୍ଟ ପରିସରରେ ଚତୁର୍ଥ ରାଷ୍ଟ୍ରୀୟ ଲୋକ ଅଦାଲତ ଅନୁଷ୍ଠିତ ହୋଇଯାଇଛି। ତାଲୁକ ଆଇନ ସେବା ସମିତି ଅଧ୍ୟକ୍ଷ ତଥା ବରିଷ୍ଠ ଦେୱାନୀ ବିଚାରପତି ଅମରେଶ ମହାପାତ୍ର ଏବଂ ପ୍ରଥମ ଶ୍ରେଣୀ ବିଚାର ବିଭାଗୀୟ ବିଚାରପତି ସ୍ନାତକୀ ଦାସ ମିଳିତ ଭାବେ ଏହି ରାଷ୍ଟ୍ରୀୟ ଲୋକ ଅଦାଲତରେ ଯୋଗଦେଇ ବିଭିନ୍ନ ବିଚାରଧୀନ ମାମଲାର ଫଇସଲା କରିଥିଲେ।

ତତସହିତ ବିଭିନ୍ନ ବ୍ୟାଙ୍କର ପ୍ରାକ ବିବାଦୀୟ ମକଦ୍ଦମା ଗୁଡିକୁ ମଧ୍ୟ ଆପୋଷ ବୁଝାମଣା ମାଧ୍ୟମରେ ସମାଧାନ କରାଯାଇଥିଲା। ଉକ୍ତ ଲୋକ ଅଦାଲତରେ ସମୁଦାୟ ୧୧୫ ଗୋଟି ମାମଲା ବିଚାରପାଇଁ ପଞ୍ଜିକୃତ ହୋଇଥିବାବେଳେ ତନ୍ମଧ୍ୟରୁ ୩୪ ଗୋଟି ମାମଲାର ଫଇସଲା ହୋଇଥିଲା। ଏଥିରୁ ୧୧ ଲକ୍ଷ ୮୪ହଜାର ୪୨୩ ଟଙ୍କା ଆଦାୟ କରାଯାଇଥଲା।

ଉକ୍ତ ଲୋକ ଅଦାଲତରେ ବାଣପୁର ଓ ବାଲୁଗାଁର ବିଭିନ୍ନ ବ୍ୟାଙ୍କର ଅଧିକାରୀମାନେ ଅନାଦେୟ ଋଣ ଆଦାୟ ଲାଗି ମାମଲା ପରିଚାଳନାରେ ସହଯୋଗ କରିଥିଲେ। ବାଣପୁର ଓକିଲ ସଂଘର ସମସ୍ତ ସଦସ୍ୟ ଏବଂ ଅଦାଲତ କର୍ମଚାରୀମାନେ ଲୋକ ଅଦାଲତ ପରିଚାଳନାରେ ସହାୟତା କରିଥିଲେ।

ବାଣପୁର: ବାଣପୁର ତାଲୁକ ଆଇନ ସେବା ସମିତି ଆନୁକୂଲ୍ୟରେ ଆଜି ସ୍ଥାନୀୟ ସରସ୍ବତୀ ଶିଶୁ ବିଦ୍ୟା ମନ୍ଦିର ପରିସରରେ ମାନବାଧିକାର ଦିବସ ପାଳିତ ହୋଇଯାଇଛି। ଏହି ଅବସରରେ ଏକ ଆଇନ ସଚେତନତା ସଭାର ଆୟୋଜନ ହୋଇଥିଲା। ତାଲୁକ ଆଇନ ସେବା ସମିତି ଅଧ୍ୟକ୍ଷ ତଥା ବରିଷ୍ଠ ଦେୱାନୀ ବିଚାରପତି ଅମରେଶ ମହାପାତ୍ର ଉକ୍ତ ସଭାରେ ଅଧ୍ୟକ୍ଷତା କରିଥିବାବେଳେ ବରିଷ୍ଠ ଆଇନଜୀବୀ ଶ୍ୟାମସୁନ୍ଦର ମିଶ୍ର, ବିପ୍ଳବ କୁମାର ମୁଦୁଲି, ବାଣପୁର ଓକିଲ ସଂଘ ସମ୍ପାଦକ ରଞ୍ଜନ କୁମାର ବେଦମତ୍ତା, ଫ୍ରଣ୍ଟ ଅଫିସ ରିଟେନର ପଦ୍ମଜା ପଟ୍ଟନାୟକ, ଆଇନଜୀବୀ ସୀତାରାମ ଅଗ୍ରୱାଲ ଓ କାମେଶ୍ୱର ଆଚାରୀ ପ୍ରମୁଖ ଅତିଥିଭାବେ ଯୋଗ ଦେଇଥିଲେ।

ଏହି ଅବସରରେ ମୁଖ୍ୟ ଅତିଥି ବିଚାରପତି ଶ୍ରୀ ମହାପାତ୍ର ବିଦ୍ୟାଳୟର ଛାତ୍ରଛାତ୍ରୀ ଙ୍କୁ ମାନବାଧିକାର ଦିବସ ପାଳନର ତାତ୍ପର୍ଯ୍ୟ ବିଷୟରେ ବୁଝାଇଥିଲେ। ମନୁଷ୍ୟ ଟି ମନୁଷ୍ୟ ପରି ବଞ୍ଚିବା ଅଧିକାର, ଶିକ୍ଷାଗତ ଅଧିକାର, ସମାନତା ଅଧିକାର, ବଞ୍ଚିବା ପାଇଁ ଜଳ ଓ ସ୍ୱାସ୍ଥ୍ୟଗତ ଅଧିକାର,ନିଃଶୁଳ୍କ ଆଇନସେବା ଅଧିକାର ଏବଂ ବିଚାରଧୀନ ବନ୍ଦୀ ତ୍ୱରିତ ନ୍ୟାୟ ପାଇବା ପାଇଁ ତାହାର ଅଧିକାର ଥିବା ବିଚାରପତି ଶ୍ରୀ ମହାପାତ୍ର ତାଙ୍କ ବକ୍ତବ୍ୟରେ ଉଲ୍ଲେଖ କରିଥିଲେ।

ତେବେ ମୁଖ୍ୟ ଅତିଥିଙ୍କ ଠାରୁ ମାନବାଧିକାର ବିଷୟରେ ବହୁମୂଲ୍ୟ ତଥ୍ୟ ଗ୍ରହଣ କରି ଛାତ୍ରଛାତ୍ରୀ ମାନେ ବେଶ ଖୁସି ଅନୁଭବ କରିଥିଲେ। ବରିଷ୍ଠ ଆଇନଜୀବୀ ଶ୍ରୀ ମୁଦୁଲି ତାଙ୍କ ଅଭିଭାଷଣରେ ଛାତ୍ରଛାତ୍ରୀ ମାନେ ଦାଇତ୍ୱବାନ ହେବା ସହ କିପରି ବିଭିନ୍ନ ଆଇନଗତ ଅଧିକାର ବିଷୟରେ ସଚେତନ ହେବେ ସେ ବିଷୟରେ ଉଲ୍ଲେଖ କରିଥିଲେ।

ପରିଶେଷରେ ବିଦ୍ୟାଳୟ ପ୍ରଧାନଆଚାର୍ଯ୍ୟ ଅବିନାଶ ପଟ୍ଟନାୟକ ଧନ୍ୟବାଦ ପ୍ରଦାନ କରିଥିଲେ।

ବାଣପୁର: ଗମ୍ଭାରୀମୁଣ୍ଡା ସ୍ଥିତ ପତିତପାବନ ବାଣୀ ମନ୍ଦିରର ୧୯୯୪ ବ୍ୟାଚ୍ ର ଛାତ୍ରଛାତ୍ରୀ ମାନଙ୍କ ସମୂହ ପ୍ରଚ଼େଷ୍ଟାରେ ଦ୍ବିତୀୟ ବାର୍ଷିକ ବନ୍ଧୁ ମିଳନ କାର୍ଯ୍ୟକ୍ରମ ୮ ଡ଼ିସେମ୍ବର ୨୦୨୪ ମସିହା ରବିବାର ଦିନ ପଙ୍କାଳ ସ୍ଥିତ ଷଷ୍ଢା ଡ୍ୟାମ୍ ଠାରେ ଅନୁଷ୍ଠିତ ହୋଇଯାଇଅଛି। ଏହି ଅବସରରେ ବନ୍ଧୁମାନେ ବିଦ୍ୟାଳୟ ଜୀବନର ଅଭୁଲା କାହାଣୀ ମନେ ପକାଇବା ସହ ବଣଭୋଜି କରି ଆନନ୍ଦ ଉଲ୍ଲାସର ସହ ବିଶେଷ ମୂହୁର୍ତ୍ତ ଅତିବାହିତ କରିଥିଲେ। ଏକ ସବୁଜ ସୁନ୍ଦର ପରିବେଶ ପାଇଁ ବୃକ୍ଷରୋପଣ ଜରୁରୀ, ଏହାକୁ ଦୃଷ୍ଟିରେ ରଖି ସମସ୍ତେ ବୃକ୍ଷରୋପଣ କରିଥିଲେ।

ବାଣପୁର: ଓଡ଼ିଶାର ପ୍ରସିଦ୍ଧ ଶକ୍ତିପିଠ ବାଣପୁରସ୍ଥିତ ମା’ ଭଗବତୀ ମନ୍ଦିରରେ ଭକ୍ତମାନେ ମୌଳିକ ସୁବିଧାରୁ ବଞ୍ଚିତ ହେଉଥିବା ଅଭିଯୋଗ ହେଉଛି। ମନ୍ଦିରର ଉନ୍ନତିକରଣ କାର୍ଯ୍ୟ ନିମନ୍ତେ ବାଣପୁର ଏନଏସି ପକ୍ଷରୁ ନିର୍ମିତ ଶୌଚାଳୟ କୁ ଭାଙ୍ଗିଦିଆଯାଇଥିବା ବେଳେ ଉକ୍ତ ସ୍ଥାନରେ ଏନଏସି ପକ୍ଷରୁ ଏକ ଭ୍ରାମ୍ୟମାଣ ଶୌଚାଳୟର ବ୍ୟବସ୍ଥା ହୋଇଛି।

ତେବେ ରକ୍ଷଣାବେକ୍ଷଣର ଅଭାବରୁ ଉକ୍ତ ଶୌଚାଳୟଟି କୌଣସି କାମକୁ ଆସୁନାହିଁ। ଫଳରେ ରାଜ୍ୟର କୋଣ ଅନୁକୋଣରୁ ପ୍ରତ୍ୟହ ଆସୁଥିବା ହଜାର ହଜାର ଭକ୍ତ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ତେବେ ଉକ୍ତ ଘଟଣାକୁ ଏନଏସି ଗମ୍ଭୀରତାର ସହ ନେଉନଥିବାରୁ ରାଜ୍ୟର ଉକ୍ତ ପ୍ରମୁଖ ଆଧ୍ୟାତ୍ମିକ ପିଠର ଛବି ସର୍ବସାଧାରଣରେ ମଳିନ ହେଉଛି।

ଭ୍ରାମ୍ୟମାଣ ଶୌଚାଳୟରେ ଧୂଳିର ଆସ୍ତର ଜମିରହିଥିବା ସହ ଅଳିଆ ଆବର୍ଜନା ପଡିରହିଥିବା ଦେଖିବାକୁ ମିଳିଛି। ଏପରିକି ଏନଏସି ପକ୍ଷରୁ କୌଣସି କର୍ମଚାରୀକୁ ଏହାର ତଦାରଖ ପାଇଁ ମୁତୟନ କରାଯାଇନାହିଁ। ଫଳରେ ପୁରୁଷ ଭକ୍ତମାନେ ବାଧ୍ୟହୋଇ ରାସ୍ତା ପାର୍ଶ୍ୱରେ ପରିସ୍ରା କରୁଥିବା ବେଳେ ମହିଳା ଭକ୍ତମାନେ ଲୋକଲଜ୍ୟା ଭୟରେ ନିରୁପାୟ ହୋଇ ଫେରୁଥିବାର ଦେଖିବାକୁ ମିଳିଛି। ତେବେ ଏପରି ସମ୍ବେଦନଶୀଳ ସମସ୍ୟା ପ୍ରତି ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ଓ ଏନଏସି କାର୍ଯ୍ୟନିର୍ବାହୀ ଅଧିକାରିଣୀ ଧ୍ୟାନ ଦେଉନାହାନ୍ତି ଯାହାକି ଜନସାଧାରଣଙ୍କୁ ଆଶ୍ଚର୍ଯ୍ୟ କରିଛି।

ତେବେ ଏ ନେଇ ଏଣ୍ଡାଓମେଣ୍ଟ ସଭାପତି ତଥା ବାଣପୁର ତହସିଲଦାର ଟି. ପଦ୍ମନାଭ ଦୋରାଙ୍କୁ ଯୋଗାଯୋଗ କରାଯିବାରୁ ସେ ଉକ୍ତ ସମସ୍ୟା ପ୍ରତି ତୁରନ୍ତ ଦୃଷ୍ଟି ଦେବେ ବୋଲି କହିଛନ୍ତି। ଯଥାଶୀଘ୍ର ମା’ ଭଗବତୀ ମନ୍ଦିର ନିକଟରେ ଭକ୍ତଙ୍କ ପାଇଁ ଭ୍ରାମ୍ୟମାଣ ଶୌଚାଳୟକୁ ପୂର୍ଣ୍ଣ କାର୍ଯ୍ୟକ୍ଷମ ସହ ଏନଏସି ପକ୍ଷରୁ ତାହାର ନିୟମିତ ତଦାରଖ ପାଇଁ ସାଧାରଣରେ ଦୃଢ଼ ଦାବି ହେଉଛି।

ବାଣପୁର: ଅନ୍ତର୍ଜାତୀୟ ଦିବ୍ୟାଙ୍ଗ ଦିବସ ଅବସରରେ ଆଜି ବାଣପୁର ତାଲୁକ ଆଇନ ସେବା ସମିତି ପକ୍ଷରୁ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପରିସରରେ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଆଇନ ସେବା ସମିତି ଅଧ୍ୟକ୍ଷ ତଥା ବରିଷ୍ଠ ଦେୱାନୀ ବିଚାରପତି ଅମରେଶ ମହାପାତ୍ର ଉକ୍ତ କାର୍ଯ୍ୟକ୍ରମରେ ଅଧ୍ୟକ୍ଷତା କରିଥିବା ବେଳେ ପ୍ରଥମ ଶ୍ରେଣୀ ବିଚାର ବିଭାଗୀୟ ବିଚାରପତି ସ୍ନାତକୀ ଦାସ, ମେଡିକାଲ ଅଧିକାରୀ ଡ଼ା ରମାକାନ୍ତ ନାୟକ, ଡ଼ା ପ୍ରଦୀପ୍ତ କୁମାର ନାୟକ ଅତିଥିଭାବେ ଯୋଗ ଦେଇଥିଲେ।

ଏହି ଅବସରରେ ବିଚାରପତି ଶ୍ରୀ ମହାପାତ୍ର ଦିବ୍ୟାଙ୍ଗ ମାନଙ୍କ ପାଇଁ ଥିବା ସ୍ଵତନ୍ତ୍ର ଆଇନ ବିଷୟ ରେ ଆଲୋଚନା କରିବା ସହିତ ଦିବ୍ୟାଙ୍ଗମାନେ ଆଇନ ସେବା ପ୍ରାଧିକରଣ ଅଧିନିୟମ ଅନୁଯାୟୀ ମାଗଣା ଆଇନ ସେବା ପାଇବା ପାଇଁ ହକଦାର ବୋଲି ମତ ପ୍ରକାଶ କରିଥିଲେ। ଦିବ୍ୟାଙ୍ଗ ମାନଙ୍କୁ ଉପଯୁକ୍ତ ସମ୍ମାନ ଦିଆଯିବା ସହ ସମାନ ଅଧିକାର ଦିଆଯିବ।  ଶିକ୍ଷାନୁଷ୍ଠାନ ରେ ସମାନ ସୁବିଧା ସୁଯୋଗ ଦିଆଯିବା ସହ ବିଭିନ୍ନ ସରକାରୀ ଯୋଜନାରେ ଅନ୍ତର୍ଭୁକ୍ତ କରାଯିବାର ପ୍ରାବଧାନ ଥିବା ଅତିଥିମାନେ କହିଥିଲେ।

ବାଣପୁର: ବାଣପୁର ନିକଟସ୍ଥ ବେତୁଲି ଗ୍ରାମରେ ଚାଲିଥିବା ଅଷ୍ଟପ୍ରହରୀ ନାମଯଜ୍ଞ ଆଜି ଶେଷ ହୋଇଛି। ଆଜି ଭୋରରୁ ନାମଜପ ଶେଷ ହେବା ପରେ ନଗର କୀର୍ତ୍ତନ ପରିବେଷଣ କରାଯାଇଥିଲା। ଏଥିରେ ଗ୍ରାମ କଳାକାରମାନେ ବିଭିନ୍ନ ବେଶ ହୋଇ ନଗର ପରିକ୍ରମା କରିଥିଲେ। ଏହାପରେ କଳସ ବିସର୍ଜନ କରାଯାଇଥିଲା। ଏହି ଉପଲକ୍ଷେ ବେତୁଲି ଗ୍ରାମ ତରଫରୁ ହଜାର ହଜାର ଭକ୍ତଙ୍କୁ ପ୍ରସାଦ ସେବନ ବ୍ୟବସ୍ଥା କରାଯାଇଥିଲା।

ଗତ ଶନିବାରଠାରୁ ଏହି ଅଷ୍ଟପ୍ରହରୀ ନାମ ଯଜ୍ଞ ଆରମ୍ଭ କରାଯାଇଥିଲା। ସେଦିନ ଅଧିବାସ କରାଯାଇ ଭୋରରୁ ନାମ ଧରାଯାଇଥିଲା। ଏଥିରେ ବେତୁଲି ଗ୍ରାମର ସଙ୍କୀର୍ତ୍ତନ ଦଳ ସହିତ ମୋଟ ୫ ଟି ଦଳ ନାମ ସଂକୀର୍ତ୍ତିନ ପରିବେଷଣ କରିଥିଲେ। ବେତୁଲି ଗ୍ରାମରେ ଦୀର୍ଘ ବର୍ଷ ଧରି ଏହି ଅଷ୍ଟପ୍ରହରୀ ନାମଯଜ୍ଞ କରାଯାଇ ଆସୁଛି।

ବାଣପୁର: ଆଜି ସକାଳ ୦୮ ଘଟିକା ସମୟରେ ଗୋଦାବରୀଶ ମହାବିଦ୍ୟାଳୟର ରୋଭରର୍ସ, ରେଞ୍ଜର୍ସ ମାନେ ମହାବିଦ୍ୟାଳୟର ଫାଟକ ଠାରୁ ଏଡସ ସଚେତନତା ସାଇକେଲ ରାଲି ଆରମ୍ଭ କରି କୋଶରଡା ଗ୍ରାମରେ ପହଞ୍ଚି ବସ୍ତ୍ର ବଣ୍ଟନ କରି ୧୧.୦୦ ଘଟିକା ସମୟରେ ଫେରିଥିଲେ।

ସୂଚନାଯୋଗ୍ୟ ଯେ, ମହାବିଦ୍ୟାଳୟର ରୋଭର ଓ ରେଞ୍ଜରମାନେ ପ୍ରାୟ ୦୧ ମାସ ଧରି ମହାବିଦ୍ୟାଳୟରେ ଏକ ବସ୍ତ୍ର ବ୍ୟାଙ୍କ କରି ପୁରୁଣା ବସ୍ତ୍ର ସଂଗ୍ରହ କରିଥିଲେ। ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତା, ମହାବିଦ୍ୟାଳୟର ରୋଭର ଲିଡର ଆଦିତ୍ୟ ସାରଥୀ ବେଦମତ୍ତା, ରେଞ୍ଜର ଲିଡର ଉତ୍କଳିକା ପାଢ଼ୀ ଓ ସମାଜ ସେବୀ  ବୈରାଗୀ ଚରଣ ବଳଙ୍କ ନେତୃତ୍ୱରେ ଏହି କାର୍ଯ୍ୟକ୍ରମ ପରିଚାଳିତ ହୋଇଥିଲା।

ଏଥିରେ ପୁରାତନ ରୋଭର ମିଥୁନ ତରାଇ, ସୁନିଲ୍ କୁମାର ସ୍ବାଇଁ, ସୌମ୍ୟ ରଞ୍ଜନ ହରିଚନ୍ଦନ, ତୋଫାନ ବେହେରା, ଓମ୍ ପ୍ରକାଶ ମହଲା ବର୍ତ୍ତମାନ ରୋଭର ଲିଡର ତୁଷାର କାନ୍ତ ମଲ୍ଲିକ, ରେଞ୍ଜର ଲିଡର ଚିନ୍ମୟୀ ମିଶ୍ର ,୪୦ ରୋଭର୍ସ ଓ ରେଞ୍ଜର୍ସ ,୧୦୦ ରୁ ଉର୍ଦ୍ଧ୍ବ ଗ୍ରାମର ମହିଳା, ପୁରୁଷ, ଛୋଟପିଲା ଯୋଗ ଦେଇଥିଲେ। ପିଲାମାନଙ୍କ ପାଇଁ କ୍ରୀଡା, ସାଂସ୍କୃତିକ କାର୍ଯ୍ୟକ୍ରମ ଏବଂ ଖାଦ୍ୟର ଆୟୋଜନ ହୋଇଥିଲା।

ବାଣପୁର: ବାଣପୁର ଥାନା ଅନ୍ତର୍ଗତ ଗୋପୀନାଥପୁର ଗ୍ରାମର ସାଗର ପ୍ରଧାନଙ୍କ ମୃତ୍ୟୁ ହୋଇଛି l ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ଏନେଇ ବାଣପୁର ମେଡିକାଲରୁ ସୂଚନା ପାଇ ପୋଲିସ କେସ ନମ୍ବର 21/24 ରେ ଏକ ଅପମୃତ୍ୟୁ ମାମଲା ରୁଜୁ କରିଛି l

ସୂଚନା ମୁତାବକ ସାଗରଙ୍କୁ ଗୁରୁତର ଅବସ୍ଥାରେ ତାଙ୍କ ପରିବାରବର୍ଗ ବାଣପୁର ମେଡିକାଲକୁ ଗତକାଲି ରାତିରେ ଆଣିଥିବା ବେଳେ ଡାକ୍ତର ତାଙ୍କୁ ଭୁବନେଶ୍ୱର ଏମ୍ସ ମେଡିକାଲ ସ୍ଥାନାନ୍ତର କରିଥିଲେ l ତେବେ ବାଟରେ ସାଗରଙ୍କ ସ୍ୱାସ୍ଥ୍ୟରେ ଅବନତି ଘଟିଥିଲା ଏବଂ ତାଙ୍କ ଶରୀର କାମ କରିବା ବନ୍ଦ କରିଦେଇଥିଲା l ପରିବାରବର୍ଗ ପୁନଶ୍ଚ ତାଙ୍କୁ ବାଣପୁର ମେଡିକାଲ ଆଣିଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ l

ତେବେ ସାଗରଙ୍କ ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ପୋଲିସ ଶବ ବ୍ୟବଚ୍ଛେଦ କରି ପରିବାରବର୍ଗଙ୍କୁ ଶରୀର ହସ୍ତାନ୍ତର କରିଛି l ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡିବ ବୋଲି ପୋଲିସ କହିଛି l

ବାଣପୁର: ଗୋଦାବରୀଶ ମହାବିଦ୍ୟାଳୟ ବାଣପୁରରେ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ତରଫରୁ ଜୋନ ସ୍ତରୀୟ ଖୋ ଖୋ ଟୁର୍ଣ୍ଣାମେଣ୍ଟ ଆୟୋଜିତ ହୋଇଯାଇଛି। ଆଜିର ଖେଳରେ ମାଳି ସାହି, କିସ୍, ଇଟାମାଟି, ହଳଦିଆ ସମେତ ଗୋଦାବରୀଶ ଉଚ୍ଚ ମାଧ୍ୟମିକ ବିଦ୍ୟାଳୟ ଯୋଗଦେଇଥିବା ବେଳେ କିସ୍ ଉଚ୍ଚ ମାଧ୍ୟମିକ ବିଦ୍ୟାଳୟ ବିଜୟୀ ଓ ହଳଦିଆ ମହାବିଦ୍ୟାଳୟ ରନର୍ସ ଅପ୍ ପାଇଥିଲେ ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତା ଏହାକୁ ଉଦଘାଟନ କରିଥିବାବେଳେ ବାଣପୁର ପଞ୍ଚାୟତ ସମିତିର ଅଧ୍ୟକ୍ଷ ଅମରେନ୍ଦ୍ର ରଣସିଂହ, ଆଇନ ମନ୍ତ୍ରୀଙ୍କ ପ୍ରତିନିଧି ଜିତେନ୍ଦ୍ର ଭୋଳ ଯୋଗଦେଇ ପୁରସ୍କାର ବିତରଣ କରିଥିଲେ।କ୍ରୀଡା ଶିକ୍ଷାକ ବୈରାଗୀ ଚରଣ ବଳ, ଉପସଭାପତି ପୁଳିନ ବିହାରୀ ଜେନା, କ୍ୟାପଟେନ ଗୁରୁ କିଶୋର ନାୟକ, ପ୍ରଶାସନିକ ଅଧିକାରୀ ଡ଼ ଏସ ପି ଏନ୍ ଏସ ବର୍ମା, ଡ ସୁଜାତା ମିଶ୍ର, +୨ ଭାରପ୍ରାପ୍ତ ଅଧ୍ୟକ୍ଷ ଲକ୍ଷ୍ମୀ ପ୍ରସାଦ ମିଶ୍ର, ଅଧ୍ୟାପକ ଆଦିତ୍ୟ ସାରଥୀ ବେଡାମତ୍ତା, ଅଧ୍ୟାପକ ଅଜୟ କୁମାର ଦାସ, ଅଧ୍ୟାପିକା ଉର୍ବଶୀ ସ୍ୱାଇଁ, ଅନୀତା ଗୌଡ଼ ଓ ଅନ୍ୟମାନେ ବିଭିନ୍ନ ଦାୟିତ୍ଵ ତୁଲାଇଥିବାବେଲେ ରଞ୍ଜନ କୁମାର ବାରିକ କାହ୍ନୁ ଚରଣ ବାରିକ ଶାନ୍ତନୁ ମୁଦୁଲି ପ୍ରମୁଖ ସହଯୋଗ କରିଥିଲେ।