Tag: ବାଣପୁର ଏନଏସି

ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ବାଣପୁର ଏନଏସି କାର୍ଯ୍ୟାଳୟରେ ସୂଚନା ଅଧିକାର ଆଇନକୁ ଉଲ୍ଲଂଘନ କରାଯାଉଛି। ଏହି ଆଇନକୁ କାର୍ଯ୍ୟନିର୍ବାହୀ ଅଧିକାରିଣୀ ଠିକ ଭାବରେ ଅନୁପାଳନ କରୁନାହାନ୍ତି। ସୂଚନା ଅଧିକାର କର୍ମୀଙ୍କୁ ନିର୍ଦ୍ଧାରିତ ସମୟ ସୀମା ଭିତରେ ସୂଚନା ପ୍ରଦାନ କରିନଥିବାରୁ ବାଧ୍ୟ ହୋଇ ଆବେଦନକାରି ରାଜ୍ୟ ସୂଚନା କମିଶନଙ୍କ ଦ୍ୱାରସ୍ତ ହୋଇଛନ୍ତି। ଏଭଳି ଘଟଣା ଘଟିଛି ବାଣପୁର ଅଞ୍ଚଳର ଆଇନଜୀବୀ ଓ ସୂଚନା ଅଧିକାର କର୍ମୀ ସୀତାରାମ ଅଗ୍ରୱାଲଙ୍କ କ୍ଷେତ୍ରରେ।

ଆବେଦନକାରୀ ଶ୍ରୀ ଅଗ୍ରୱାଲ ଚଳିତ ବର୍ଷ ଜୁଲାଇ ମାସ ୧୦ ତାରିଖ ଏବଂ ୧୬ ତାରିଖରେ ବାଣପୁର ଏନଏସି ରେ ହୋଇଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟର ତଥ୍ୟ ହାସଲ ପାଇଁ ପୃଥକ ପୃଥକ ଭାବେ ଦୁଇ ଗୋଟି ଆରଟିଆଇ ଫର୍ମରେ ଆବେଦନ କରିଥିଲେ।ଆବେଦନପତ୍ର ଗ୍ରହଣର ୩୦ଦିନ ଭିତରେ ଆବେଦନକାରୀଙ୍କୁ ସୂଚନା ପ୍ରଦାନ କରିବାର ବିଧି ରହିଛି। ଏହି ନିୟମକୁ କାର୍ଯ୍ୟାଳୟ ପକ୍ଷରୁ ଠିକ୍‌ ଭାବରେ ପାଳନ କରା ନ ଯିବାରୁ ଆବେଦନକାରୀ ପ୍ରଥମ ଅଭିଯୋଗ ଗ୍ରହଣକାରୀ ଅଧିକାରୀ ତଥା ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରିଣୀ କାଦମ୍ବିନୀ ଜେନାଙ୍କ ନିକଟରେ ଚଳିତ ମାସ ଅଗଷ୍ଟ ୨୦ ତାରିଖରେ ଅଭିଯୋଗ କରିଥିଲେ।

ତେବେ ଅଭିଯୋଗପତ୍ର ଗ୍ରହଣର ୩୦ ଦିନ ଭିତରେ ଆବେଦନକାରୀଙ୍କୁ ପ୍ରଥମ ଅପିଲେଟ ଅଥରିଟି ସୂଚନା ପ୍ରଦାନ କରିବାର ବିଧି ରହିଛି। କିନ୍ତୁ ଅଦ୍ୟାବଧି ସୂଚନା ଅଧିକାର କର୍ମୀ ଶ୍ରୀ ଅଗ୍ରୱାଲଙ୍କୁ ବାଣପୁର ଏନଏସି ତଥ୍ୟ ପ୍ରଦାନ କରିନାହିଁ। ଏ ନେଇ ବିଭିନ୍ନ ଗଣମାଧ୍ୟମରେ ନିକଟରେ ଖବର ପ୍ରକାଶ ହେବା ସତ୍ୱେ ଆବେଦନକାରୀଙ୍କୁ ସୂଚନା ମିଳିନାହିଁ। ତେବେ ଏହା ପଛରେ କାର୍ଯ୍ୟନିର୍ବାହୀ ଅଧିକାରିଣୀଙ୍କ କଣ ଉଦ୍ଦେଶ୍ୟ ରହିଛି ତାହା ସନ୍ଦେହଘେରରେ।

ପରିଶେଷରେ ଆବେଦନକରି ଶ୍ରୀ ଅଗ୍ରୱାଲ ଦ୍ଵିତୀୟ ଅପିଲେଟ ଅଥରିଟି ତଥା ରାଜ୍ୟ ସୂଚନା କମିଶନଙ୍କ ଦ୍ୱାରସ୍ତ ହୋଇଛନ୍ତି ଏବଂ ତାଙ୍କ ନିକଟରେ ଶେଷ ଅପିଲ କରିଥିବା ଜଣାପଡିଛି।  ତତସହିତ ବାଣପୁର ଏନଏସି କାର୍ଯ୍ୟାଳୟରେ ସୂଚନା ଅଧିକାର କର୍ମୀଙ୍କ ସାମ୍ବିଧାନିକ ଅଧିକାର କ୍ଷୁର୍ଣ୍ଣ ହେଉଥିବାରୁ କ୍ଷୋଭ ପ୍ରକାଶ କରିଛନ୍ତି ଆବେଦନକାରି ଶ୍ରୀ ଅଗ୍ରୱାଲ। ଖୋର୍ଦ୍ଧା ଜିଲ୍ଲାପାଳ ଏବଂ ଗୃହ ଓ ନଗର ଉନ୍ନୟନ ବିଭାଗ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଏନଏସି ରେ ଡେଙ୍ଗୁ ରୋଗ ବ୍ୟାପିବାର ଆଶଙ୍କା ବଢ଼ିବାରେ ଲାଗିଛି। ସହରରେ ଏନଏସି ପକ୍ଷରୁ ଡେଙ୍ଗୁ ନିୟନ୍ତ୍ରଣ ପାଇଁ କୌଣସି ପଦକ୍ଷେପ ନିଆଯାଉନଥିବା ଅଭିଯୋଗ ହେଉଛି। ସହରରେ ଡ୍ରେନେଜ ବ୍ୟବସ୍ଥା ଅଦ୍ୟାବଧି ସମ୍ପୂର୍ଣ୍ଣ ହୋଇନଥିବାରୁ ଅନେକ ସ୍ଥାନରେ ବର୍ଷା ଜଳ ଜମିରହୁଛି। ଫଳରେ ଡେଙ୍ଗୁ ବ୍ୟାପିବାର ଯଥେଷ୍ଟ ସମ୍ଭାବନା ରହୁଛି।

ଅପରପକ୍ଷରେ ଏହାର ପ୍ରତିକାର ପାଇଁ ରାଜ୍ୟ ସରକାର ଏକାଧିକ ପଦକ୍ଷେପ ନେଉଥିବା ବେଳେ ବାଣପୁର ଏନଏସିରେ ସର୍ବନିମ୍ନ ପଦକ୍ଷେପ ମଧ୍ୟ ନିଆଯାଉନାହିଁ। ଜଳମଗ୍ନ ସ୍ଥାନରେ ବ୍ଲିଚିଙ୍ଗ ପକାଇବା, ଫିନାଇଲ ପକାଇବା, ମଶା ତେଲ ଏବଂ ମଶା ଧୂଆଁ ଇତ୍ୟାଦି ବାଣପୁର ଏନଏସି ରେ ଦେଖିବାକୁ ମିଳୁନାହିଁ। ଫଳରେ ସହରବାସୀ ଭବିଷ୍ୟତରେ ଡେଙ୍ଗୁ ରୋଗର ଶିକାର ଯେ ନହେବେ ତାହା କିଏ କହିବ?

ସହରର ମୁଖ୍ୟ ରାସ୍ତା ଯେପରି ମେଡିକାଲ ଛକ, ଥାନା ସମ୍ମୁଖ, ଗାଲୁଆ ଛକ, ଏନଏସି ଅଫିସ ସମ୍ମୁଖ, ବିଧାରପୁର ଛକ, ଚିଆଁକ ସାହି ଛକ ଆଦି ଅଞ୍ଚଳ ବର୍ଷତମାମ ଜଳବନ୍ଦୀ ହୋଇ ରହୁଥିବା ବେଳେ ଉକ୍ତ ସ୍ଥାନ ଗୁଡିକରେ ଏନଏସି ପକ୍ଷରୁ ବିଶୋଧନ କରାଯାଉନାହିଁ।

ଅନୁରୂପ ଭାବେ ମା’ ଭଗବତୀ ମନ୍ଦିର ସମ୍ମୁଖ ଏବଂ ଚତୁଃପାର୍ଶ୍ୱ , ଦାଶରଥିପୁର, ଶ୍ରୀନିବାସପୁର, ଅଚ୍ୟୁତରାଜପୁର ଆଦି ଅଞ୍ଚଳରେ ମଧ୍ୟ ଜନଗହଳି ଲାଗି ରହୁଥିବା ବେଳେ ଏନଏସି ପକ୍ଷରୁ ବିଶୋଧନ ପାଇଁ କୌଣସି ପଦକ୍ଷେପ ନିଆଯାଉନାହିଁ। ଫଳରେ ବର୍ଷା ଦିନ ଥିବାରୁ ଜନସାଧାରଣ ମାନେ ଡେଙ୍ଗୁ ରୋଗର ଶିକାର ହୋଇପାରନ୍ତି ଯାହାକି ସହଜରେ ଅନୁମେୟ।

ତେବେ ଆଶ୍ଚର୍ଯ୍ୟର ବିଷୟ ଦୀର୍ଘ ୫୧ ବର୍ଷର ବାଣପୁର ଏନଏସି ରେ ମଶା ତେଲ ଏବଂ ମଶା ଧୂଆଁ ବ୍ୟବସ୍ଥା ଅଦ୍ୟାବଧି ହେଉନାହିଁ ଯାହାକି ସହରବାସୀଙ୍କୁ ମର୍ମାହତ କରିଛି। ତୁରନ୍ତ ବିଭାଗୀୟ ଅଧିକାରୀ ଏ ଦିଗରେ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଏନଏସି ରେ ଆଜି ଏକ ଅଭାବନୀୟ ଘଟଣା ଘଟିଛି। ଏନଏସି ର ଦୁଇ ନମ୍ବର ୱାର୍ଡ ଦାଶରଥିପୁର ଗ୍ରାମ ରାସ୍ତାରେ ପାନୀୟ ଜଳ ପାଇପ ଫାଟି କୃତ୍ରିମ ପାର୍କର ଭ୍ରମ ସୃଷ୍ଟି ହୋଇଛି।

ଉକ୍ତ ରାସ୍ତା ଦେଇ ବାଣପୁର ସବ ଜେଲ, ଭବାନୀପୁର ପଞ୍ଚାୟତ, ଶନି ମନ୍ଦିରକୁ ଏକାଧିକ ଗ୍ରାମବାସୀ ଯାତାୟାତ କରୁଥିବା ବେଳେ ଆଜି ସକାଳେ ଉକ୍ତ ରାସ୍ତା ପାଣିରେ ଉବୁଟୁବୁ ହେଉଥିବା ଦେଖିବାକୁ ମିଳିଛି। ତେବେ ଦୀର୍ଘ ସମୟ ଧରି ହଜାର ହଜାର ଲିଟର ପାନୀୟ ଜଳ ନଷ୍ଟ ହୋଇଛି।

ଗୋଟିଏ ପକ୍ଷରେ ସରକାର ଜଳ ହିଁ ଜୀବନ ନାରା ଦେଉଥିବା ବେଳେ ଅପରପକ୍ଷରେ ଏପରି ପାନୀୟ ଜଳ ଅପବ୍ୟୟ ସ୍ଥାନୀୟ ପ୍ରଶାସନର ଅନ୍ତରିକତା କୁ ପଦାରେ ପକାଇଛି।

ତେବେ ଏ ଦୃଶ୍ୟ କିଛି ନୂଆ ନୁହେଁ। ବାଣପୁର ଏନଏସି ର ପ୍ରତି ୱାର୍ଡରେ ନିତିଦିନ ଏହିପରି ଛୋଟ ମୋଟ ଦୃଶ୍ୟ ଦେଖିବାକୁ ମିଳିଛି। ଜନ ସ୍ୱାସ୍ଥ୍ୟ ବିଭାଗ ଦ୍ୱାରା ପ୍ରତି ଘରେ ପିଇବା ପାଣି ପାଇଁ ମୁଖ୍ୟ ରାସ୍ତାକୁ ଖୋଳି ଟ୍ୟାପ କନେକ୍ସନ ଦିଆଯାଇଥିବା ବେଳେ ରକ୍ଷଣାବେକ୍ଷଣ ଅଭାବ ଏବଂ ଦୁର୍ବଳ ଭିତ୍ତିଭୂମି ଲାଗି ଏପରି ବାରମ୍ବାର ଘଟଣା ଘଟୁଛି ଏବଂ ହଜାର ହଜାର ପାନୀୟ ଜଳ ଅପଚୟ ହେଉଛି।

ସହରର ବିଷରପାଟଣା, ଥାନା ରୋଡ, କଲେଜ ଛକ ଆଦି ସ୍ଥାନରେ ପ୍ରତିଦିନ ପାନୀୟ ଜଳ ଅପବ୍ୟୟ ହେଉଛି। ଅନୁରୂପଭାବେ ବାଣପୁର ଏନଏସି ରେ ଡ୍ରେନେଜ ବ୍ୟବସ୍ଥା ନଥିବାରୁ ଏକାଧିକ ୱାର୍ଡ ଉକ୍ତ କାରଣରୁ ଜଳମଗ୍ନ ହୋଇ ରହୁଛି। ଏନଏସି କର୍ତ୍ତୃପକ୍ଷ ଏବଂ ଜନସ୍ୱାସ୍ଥ୍ୟ ବିଭାଗ ଉକ୍ତ ସମସ୍ୟାପ୍ରତି ଦୃଷ୍ଟିଦେବା ସହ ଏହାର ସ୍ଥାୟୀ ସମାଧାନ ପାଇଁ ସାଧାରଣରେ ଦାବି ହେଉଛି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଏନଏସି ରେ ନୂତନ କାର୍ଯ୍ୟନିର୍ବାହୀ ଅଧିକାରିଣୀ ଭାବେ ବରିଷ୍ଠ ପ୍ରଶାସିକା କାଦମ୍ବିନୀ ଜେନା କାର୍ଯ୍ୟରେ ଯୋଗଦେଇଛନ୍ତି। ଶ୍ରୀମତୀ ଜେନା ଏହା ପୁର୍ବରୁ ଅନୁଗୁଳ ଜିଲ୍ଲା ଆଠମଲ୍ଲିକ ଏନଏସି କାର୍ଯ୍ୟନିର୍ବାହୀ ଅଧିକାରିଣୀରେ ଭାବେ ଦୀର୍ଘ ବର୍ଷ ଧରି କାର୍ଯ୍ୟ କରିଥିଲେ। ବିଭିନ୍ନ ଏନଏସିରେ ପ୍ରଶାସିକା ଭାବେ ତାଙ୍କର ଦୀର୍ଘ ବର୍ଷର ଅଭିଜ୍ଞତା ରହିଥିବା ବେଳେ ବାଣପୁର ପରି ଗୁରୁତ୍ୱପୂର୍ଣ ଏନଏସିରେ ଉନ୍ନୟନ କାର୍ଯ୍ୟ କରିବାରେ ତାହା ସହାୟକ ହେବ ବୋଲି ଆଶା କରାଯାଉଛି।

ଆଜି ଅସ୍ଥାୟୀ କାର୍ଯ୍ୟନିର୍ବାହୀ ଅଧିକାରି ବାଣପୁର ବିଡ଼ିଓଙ୍କ ଠାରୁ ଦାୟିତ୍ୱ ଗ୍ରହଣ କରିବାପରେ ଏନଏସି ଅଧ୍ୟକ୍ଷଙ୍କ ସମେତ ସମସ୍ତ କର୍ମଚାରୀ ମାନେ ତାଙ୍କୁ ସ୍ୱାଗତ ଜଣାଇଥିଲେ। ତେବେ ସରକାରଙ୍କ ମୁକ୍ତା ଯୋଜନା ସମେତ ସମସ୍ତ ସହରାଞ୍ଚଳ ଉନ୍ନୟନ ଯୋଜନାଗୁଡିକ କିପରି ଏନଏସିରେ ସଠିକ ଭାବେ ଲାଗୁ କରିହେବ ତାହା ଉପରେ ଗୁରୁତ୍ୱ ଦେବେ ବୋଲି କହିଛନ୍ତି ନୂତନ କାର୍ଯ୍ୟନିର୍ବାହୀ ଅଧିକାରିଣୀ ଶ୍ରୀମତି ଜେନା।

ସୀତାରାମ ଅଗ୍ରୱାଲ

ବାଣପୁର: ଆଜି ଖୋର୍ଦ୍ଧା ଜିଲ୍ଲା ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତିଙ୍କୁ ବିଦାୟକାଳିନ ସମ୍ବର୍ଦ୍ଧନା ଜ୍ଞାପନ କରାଯାଇଛି। ନିକଟରେ ଶ୍ରୀ ମହାନ୍ତିଙ୍କ ଅନୁଗୁଳ ଜିଲ୍ଲା ଆଠମଲ୍ଲିକ ଏନଏସି କାର୍ଯ୍ୟନିର୍ବାହୀ ଅଧିକାରୀ ଭାବେ ବଦଳି ହୋଇଥିଲା। ବେଙ୍ଗରାଜପଲ୍ଲି ଠାରେ ଏ ନେଇ ଏକ ସଭାର ଆୟୋଜନ ଏନଏସି ପକ୍ଷରୁ କରାଯାଇଥିଲା।

ଉକ୍ତ ବିଦାୟକାଳୀନ ସଭାରେ ଅଧ୍ୟକ୍ଷ ମିଟୁ ନାୟକ, ଉପାଧ୍ୟକ୍ଷା ପ୍ରାଚୀପ୍ରଭା ସ୍ୱାଇଁ , ବିଡ଼ିଓ ଶୀତଲ ଅଗ୍ରୱାଲ, ସମସ୍ତ କାଉନସିଲର ଏବଂ ଏନଏସି କର୍ମଚାରୀ ମାନେ ଉପସ୍ଥିତ ଥିଲେ। ଉପସ୍ଥିତ ଅଧିକାରୀମାନେ ଶ୍ରୀ ମହାନ୍ତିଙ୍କ ସହ କାର୍ଯ୍ୟ କରିଥିବା ସୁଖଦ ସମୟ ଗୁଡିକ ମନେ ପକାଇବା ସହ ତାଙ୍କ ପ୍ରଶଂସା କରିଥିଲେ।

କରୋନା ପରବର୍ତ୍ତୀ ସମୟରେ ଶ୍ରୀ ମହାନ୍ତି ନୂତନ ଭାବେ ବାଣପୁର ଏନଏସି ଦାୟିତ୍ୱ ନେଇଥିଲେ। ଏବଂ ଦୀର୍ଘ ଦୁଇ ବର୍ଷରୁ ଉର୍ଦ୍ଧ ସମୟ ଉକ୍ତ ଦାୟିତ୍ୱରେ ରହି ଏନଏସି ରେ ବହୁ ଉନ୍ନତିମୂଳକ କାର୍ଯ୍ୟ କରିଥିବାର ଅଧ୍ୟକ୍ଷ ଶ୍ରୀ ନାୟକ କହିଥିଲେ। ସମସ୍ତଙ୍କୁ ସାଥିରେ ନେଇ ଉନ୍ନୟନ କାର୍ଯ୍ୟ ଜାରି ରଖିବାର ଉଚ୍ଚ ମନୋବୃତ୍ତି ଶ୍ରୀ ମହାନ୍ତିଙ୍କ ପାଖେ ଥିବା ସମସ୍ତ କର୍ମଚାରୀମାନେ ପରିପ୍ରକାଶ କରିଥିଲେ। ସଭାଶେଷରେ ତାଙ୍କୁ ଉତ୍ତରୀୟ ଓ ମାନପତ୍ର ପ୍ରଦାନ କରାଯାଇ ବିଦାୟ ଦିଆଯାଇଥିଲା।

ସୀତାରାମ ଅଗ୍ରୱାଲ

ବାଣପୁର: ଆସନ୍ତାକାଲି ବାହୁଡା଼ଯାତ୍ରା ଅବସରରେ ଖୋର୍ଦ୍ଧା ଜିଲ୍ଲା ବାଣପୁରସ୍ଥିତ ଚରଣ ଚକାଦେବ ଓ ରଙ୍କନାଥ ଦେବଙ୍କ ବାହୁଡା଼ ଯାତ୍ରା କିପରି ଶୃଙ୍ଖଳିତ ଭାବରେ ସମାପନ ହେବ ଏ ସମ୍ବନ୍ଧରେ ଏକ ପ୍ରସ୍ତୁତି ବୈଠକ ଆଜି ଅନୁଷ୍ଠିତ ହୋଇଯାଇଛି। ବାଣପୁର ଏନଏସି ସଭାଗୃହରେ ଅଧ୍ୟକ୍ଷ ମିଟୁ ନାୟକଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଯାଇଛି।

ଉକ୍ତ ବୈଠକରେ କାର୍ଯ୍ୟନିବାହି ଅଧିକାରୀ ଅବିନାଶ ମହାନ୍ତି, ଆଇଆଇସି ଜୟପ୍ରକାଶ ପରିଡ଼ା ଏବଂ ବିଭିନ୍ନ ବିଭାଗର ଅଧିକାରୀ ଓ ସାମ୍ବାଦିକ ମାନେ ଯୋଗ ଦେଇଥିଲେ।  ବାଣପୁରରେ ଦୁଇ ଗୋଟି ସ୍ଥାନରେ ରଥଯାତ୍ରା ହେଉଥିବାରୁ ଉଭୟ ସ୍ଥାନରେ ବାହୁଡା଼ ଯାତ୍ରା ପାଇଁ ସମୟ ନିର୍ଦ୍ଧାରିତ ହୋଇଛି। ଦିନ ୨.୩୦ ମିନିଟରେ ଚରଣ ଚକାଦେବଙ୍କର ଏବଂ ୩.୩୦ ମିନିଟରେ ରଙ୍କନାଥ ଦେବଙ୍କ ରଥ ଟଣା ଆରମ୍ଭ ହେବ ବୋଲି ଉକ୍ତ ବୈଠକରେ ନିଷ୍ପତି ହୋଇଛି।

ସନ୍ଧ୍ୟା ପୁର୍ବରୁ ଉଭୟ ସ୍ଥାନରେ ରଥ ମନ୍ଦିର ନିକଟରେ ପହଞ୍ଚିବା ଲକ୍ଷ୍ୟ ରଖାଯାଇଛି।  ରଥଯାତ୍ରା ପରି ବାହୁଡ଼ାଯାତ୍ରାରେ ମଧ୍ୟ ସ୍ଵେଚ୍ଛାସେବୀ ନିୟୋଜିତ ହେବେ ବୋଲି ନିଷ୍ପତି ନିଆଯାଇଛି।

ଅନୁରୂପ ଭାବେ ଶୃଙ୍ଖଳିତ ବାହୁଡ଼ାଯାତ୍ରାକୁ ଗୁରୁତ୍ୱ ଦେଇଛନ୍ତି ଆଇଆଇସି ଶ୍ରୀ ପରିଡ଼ା।  ପରିଶେଷରେ କାର୍ଯ୍ୟନିବାହି ଅଧିକାରୀ ଶ୍ରୀ ମହାନ୍ତି ଧନ୍ୟବାଦ ଅର୍ପଣ କରି ବୈଠକ ସାଙ୍ଗ କରିଥିଲେ।

ସୀତାରାମ ଅଗ୍ରୱାଲ

ବାଣପୁର: ଆଜି ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଏନଏସି ରେ ଏକ ଦକ୍ଷତା ବିକାଶ ଶିବିର ଅନୁଷ୍ଠିତ ହୋଇଯାଇଛି। ଅଧ୍ୟକ୍ଷ ମିଟୁ ନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ଶିବିରରେ କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତି, ସମସ୍ତ କାଉନସିଲର, ମିଶନ ଶକ୍ତି ମହିଳା ଗ୍ରୁପ ଏବଂ ପୌର କର୍ମଚାରୀମାନେ ଯୋଗ ଦେଇଥିଲେ। ଏଥି ନିମନ୍ତେ ରାଜ୍ୟ ସରକାରଙ୍କ ଅର୍ବାନ ମ୍ୟାନେଜମେଣ୍ଟ ସେଣ୍ଟରରୁ ସର୍ବେଶ୍ୱର ସିଂ ସାହୁ, ଜାଗ୍ରିତି ସିଂ ଏବଂ ମଧୁସ୍ମିତା ସାହୁ ଆଦି ଅଧିକାରୀ ମାନେ ସମସ୍ତଙ୍କୁ ଦକ୍ଷତା ବିକାଶ ପ୍ରଶିକ୍ଷଣ ପ୍ରଦାନ କରିଥିଲେ। ବିଶେଷକରି ମୁକ୍ତା ଯୋଜନାର ସଫଳ ରୂପାୟନକୁ ଉକ୍ତ ଶିବିରରେ ପ୍ରାଧାନ୍ୟ ଦିଆଯାଇଥିଲା।

ମୁକ୍ତା ଯୋଜନାରେ ଆସୁଥିବା ଉନ୍ନୟନ ପ୍ରକଳ୍ପଗୁଡିକୁ କିପରି ନିର୍ଦ୍ଧାରିତ ସମୟସୀମା ମଧ୍ୟରେ ଶେଷ କରାଯିବ ତାହା ଉପରେ ଗୁରୁତ୍ୱ ଦିଆଯାଇଥିଲା। ସମସ୍ତ ପନ୍ଦର ଗୋଟି ୱାର୍ଡରୁ ପନ୍ଦର ଗୋଟି ମିଶନ ଶକ୍ତି ଗ୍ରୁପ ଉକ୍ତ ଶିବିରରେ ଭାଗ ନେଇଥିଲେ। ମୁକ୍ତା ଯୋଜନା ଦ୍ୱାରା କିପରି ମହିଳା ମାନେ ସ୍ୱାବଲମ୍ବୀ ହୋଇପାରୁଛନ୍ତି, ତାହାର ବିଶେଷ ପ୍ରଶିକ୍ଷଣ ଉକ୍ତ ଶିବିରରେ ପ୍ରଦାନ କରାଯାଇଥଲା।

ଉକ୍ତ କାର୍ଯ୍ୟକ୍ରମକୁ ‘ମୁକ୍ତା’ ସଂଯୋଜକ ମାନସ ରଞ୍ଜନ ତ୍ରିପାଠୀ ପରିଚାଳନା କରିଥିବା ବେଳେ ଗୁରୁଗୋବିନ୍ଦ ପ୍ରଧାନ ଏବଂ ତନ୍ମୟ ବିହାରୀ ସହଯୋଗ କରିଥିଲେ।

ସୀତାରାମ ଅଗ୍ରୱାଲ

ବାଣପୁର: ଆଉ ଦୁଇ ଦିନ ପରେ ବିଶ୍ଵପ୍ରସିଦ୍ଧ ରଥଯାତ୍ରା। ପୁରୀ ସମେତ ବିଶ୍ୱର କୋଣ ଅନୁକୋଣରେ ପାଳନ ହେବ ମହାପ୍ରଭୁ ଜଗନ୍ନାଥଙ୍କ ପବିତ୍ର ରଥଯାତ୍ରା। ଏହି ପରିପ୍ରେକ୍ଷୀରେ ଖୋର୍ଦ୍ଧା ଜିଲ୍ଲା ବାଣପୁରରେ ମଧ୍ୟ ଧୁମଧାମରେ ପାଳନ ହେବ ରଥଯାତ୍ରା।

ବାଣପୁରରେ ଶ୍ରୀ ରଙ୍କନାଥ ଦେବ ଏବଂ ଶ୍ରୀ ଚରଣ ଚକାଦେବଙ୍କ ପିଠରେ ରଥଯାତ୍ରା ଅନୁଷ୍ଠିତ ହେବ। ଏଥି ନିମନ୍ତେ ଆଜି ସ୍ଥାନୀୟ ପ୍ରଶାସନ ପକ୍ଷରୁ ବାଣପୁର ଏନଏସି ସଭାଗୃହରେ ଏକ ପ୍ରସ୍ତୁତି ଓ ସମନ୍ୱୟ ବୈଠକ ଅନୁଷ୍ଠିତ ହୋଇଯାଇଛି। ଏନଏସି ଅଧ୍ୟକ୍ଷ ମିଟୁ ନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ବୈଠକରେ କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତିଙ୍କ ସମେତ ବାଣପୁରର ବିଭିନ୍ନ ବ୍ୟବସାୟୀ ସଂଘର ପ୍ରତିନିଧି ଓ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ।

ପୁର୍ବରୁ ଅନୁଷ୍ଠିତ ହୋଇଥିବା ପ୍ରଥମ ପ୍ରସ୍ତୁତି ବୈଠକରେ ଆଇନ ଶୃଙ୍ଖଳା, ସ୍ଵେଚ୍ଛାସେବୀ ପରିଚାଳନା ଆଦି ବିଷୟରେ ବିସ୍ତୃତ ଆଲୋଚନା ହୋଇଥିବା ବେଳେ ଆଜିର ବୈଠକରେ ସମସ୍ତ ବ୍ୟବସାୟୀ ସଂଘ ଏବଂ ଗଣମାଧ୍ୟମ ପ୍ରତିନିଧିଙ୍କ ସହଯୋଗ ଲୋଡ଼ିଥିଲା ପ୍ରଶାସନ।

ତେବେ ଚଳିତ ବର୍ଷ ବାଣପୁର ରଥଯାତ୍ରାକୁ ଧୁମଧାମରେ ଏବଂ ଆକର୍ଷଣୀୟ ଭାବେ ପାଳନ କରାଯିବ ବୋଲି ସୂଚନା ଦେଇଛନ୍ତି ଅଧ୍ୟକ୍ଷ ଶ୍ରୀ ନାୟକ। ଏଥି ନିମନ୍ତେ ସ୍ଵେଚ୍ଛାସେବୀମାନଙ୍କ ପାଇଁ ପ୍ରଥମ ଥର ପାଇଁ ଡ୍ରେସ କୋଡ଼ ଏବଂ ଆଇ କାର୍ଡ ବ୍ୟବସ୍ଥା କରାଯାଇଛି। ଉକ୍ତ ଆଇ କାର୍ଡ ଓ ଟି ସାର୍ଟ ସ୍ଥାନୀୟ ଆଇଆଇସି ପ୍ରଦାନ କରିବେ।

ବିଭିନ୍ନ ଅନୁଷ୍ଠାନର ସ୍ଵେଚ୍ଛାସେବୀଙ୍କ ସମେତ ଏନସିସି ଛାତ୍ରଛାତ୍ରୀ, ଆରଏସଏସ କର୍ମକର୍ତ୍ତା ରଥ ଟାଣିବା ଦାୟିତ୍ୱରେ ରହିବାକୁ ଥିବା ବେଳେ ମହିଳା ଭକ୍ତମାନେ ଦେବି ସୁଭଦ୍ରାଙ୍କ ରଥ ଟାଣିବେ। ତତସହିତ ବିଭିନ୍ନ ସେବାକାର୍ଯ୍ୟ ଯଥା ପିଇବା ପାଣି, ଦହି ପଣା, ଲେମ୍ବୁ ପାଣି ଆଦିର ବ୍ୟବସ୍ଥା ସ୍ଵେଚ୍ଛାସେବୀ ଏବଂ ଏନଏସି ପ୍ରଶାସନ ଦ୍ୱାରା କରାଯିବ। ପୂର୍ବପରି ବିଭିନ୍ନ ବ୍ୟବସାୟୀ ସଂଘ ନିଜ ନିଜର ସେବା କାର୍ଯ୍ୟ ଜାରି ରଖିବେ।

ରଥ ଟଣା ସମୟରେ ଯେପରି କିଛି ଅଘଟଣ ନଘଟେ ସେଥି ନିମନ୍ତେ ବାଲୁଗାଁ ଏସଡ଼ିପିଓ ଙ୍କ ତତ୍ୱାବଧାନରେ ଏକ ପ୍ଲାଟୁନ ଫୋର୍ସ ମୁତୟନ ହେବେ। ରଥ ଟଣା ପୁର୍ବରୁ ସମସ୍ତ ସ୍ଵେଚ୍ଛାସେବୀଙ୍କୁ ଏସଡିପିଓ କିଛି ପ୍ରଶିକ୍ଷଣ କୌଶଳ ପ୍ରଦାନ କରିବେ। କହିବାକୁ ଗଲେ ବାଣପୁରରେ ଚଳିତ ରଥଯାତ୍ରା କିପରି ଶୃଙ୍ଖଳିତ ଭାବେ ସମ୍ପନ୍ନ ହେବ ତାହା ଉପରେ ବେଶ ସଜାଗ ଅଛି ପ୍ରଶାସନ। ରଥ ଟଣା ସମୟରେ ସମସ୍ତ ବଜାର ବନ୍ଦ ରହିବ।

ଅନୁରୂପ ଭାବେ ଏନଏସି ଅଧ୍ୟକ୍ଷ ଶ୍ରୀ ନାୟକ ରଥଯାତ୍ରାକୁ ଆକର୍ଷଣୀୟ ଏବଂ ଆଧ୍ୟାତ୍ମିକ ପରିବେଶ ସୃଷ୍ଟି କରିବା ପାଇଁ ରଥଟଣା ପଥକୁ ଚିତ୍ରଣ କରାଯିବ ବୋଲି କହିଛନ୍ତି। ବିଶରପାଟଣା ସ୍ଥିତ ‘ଆଇ ଲଭ ବାଣପୁର’ ସେଲ୍ଫି ପଇଣ୍ଟ ଠାରୁ ମା’ ଭଗବତୀ ମନ୍ଦିର ପର୍ଯ୍ୟନ୍ତ ମୁଖ୍ୟ ରାସ୍ତା ଏବଂ ଶ୍ରୀ ଚକାଦେବଙ୍କ ଗୁଣ୍ଡିଚା ଘର ରାସ୍ତାକୁ ବିଭିନ୍ନ ଝୋଟି ଓ ଚିତାରେ ଚିତ୍ରିତ କରାଯିବ। ଏଥି ନିମନ୍ତେ ସ୍ୱତନ୍ତ୍ର ଚିତ୍ରକାର ନିୟୋଜିତ ହେବେ। ଏହାଦ୍ୱାରା ଭକ୍ତମାନଙ୍କ ମଧ୍ୟରେ ଆଧ୍ୟାତ୍ମିକ ଭାବ ସୃଷ୍ଟି ହେବା ସହ ରଥଯାତ୍ରା ଟି ଆକର୍ଷଣୀୟ ହେବ।

ରଥଯାତ୍ରା ସମୟରେ ମେଡିକାଲ ଓ ବିଦ୍ୟୁତ ବିଭାଗକୁ ସତର୍କ ରହିବା ପାଇଁ ନିର୍ଦ୍ଦେଶ ଦିଆଯାଇଛି। ବାଣପୁର ତହସିଲଦାର ସମସ୍ତ କାର୍ଯ୍ୟକୁ ତଦାରଖ କରିବେ। ପରିଶେଷରେ ଚଳିତ ରଥଯାତ୍ରାକୁ ସଫଳ କରିବା ପାଇଁ ଏନଏସି ଅଧ୍ୟକ୍ଷ ମିଟୁ ନାୟକ ସମସ୍ତଙ୍କର ସହଯୋଗ ଲୋଡ଼ିଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଏନଏସି ଅନ୍ତର୍ଗତ ଦାଶରଥୀପୁର ଗ୍ରାମ ହରିଜନ ସାହିରେ ଗତକାଲି ଏକ ଜମି ବିବାଦକୁ କେନ୍ଦ୍ରକରି ଗୋଷ୍ଠୀ ସଂଘର୍ଷ ହୋଇଥିଲା। ଫଳରେ ଉକ୍ତ ସଂଘର୍ଷରେ ଦୁଇ ଜଣ ଆହତ ହୋଇଥିଲେ। ଏ ନେଇ ଉଭୟ ପକ୍ଷଙ୍କ ଦ୍ୱାରା ଦୁଇ ଗୋଟି ପୃଥକ ପୃଥକ ଏତଲା ଦିଆଯାଇଥିବା ବେଳେ ପୋଲିସ ଉଭୟ ପକ୍ଷଙ୍କ ବିରୋଧରେ କେସ ନମ୍ବର ୧୨୮/୨୩ ଏବଂ ୧୨୯/୨୩ ରେ ଦୁଇ ଗୋଟି ମାମଲା ରୁଜୁ କରି ତନାଘନା ଜାରି ରଖିଥିଲା। ଏପରିକି ଗ୍ରାମରେ ଆଇନ ଶୃଙ୍ଖଳା ଦୃଷ୍ଟିରୁ ଫୋର୍ସ ମୁତୟନ କରାଯାଇଥିଲା।

ତେବେ ଆଜି କାର୍ଯ୍ୟାନୁଷ୍ଠାନ ସ୍ୱରୂପ ପୋଲିସ ଉଭୟ ଗୋଷ୍ଠୀର ୧୮ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି। ତନ୍ମଧ୍ୟରୁ ୯ ମହିଳା ଓ ୯ ପୁରୁଷ ଅଭିଯୁକ୍ତ ଅଛନ୍ତି।  ତେବେ ଗିରଫଦାରି ଆହୁରି ବୃଦ୍ଧି ପାଇବ ବୋଲି ଆଇଆଇସି ଜୟପ୍ରକାଶ ପରିଡ଼ା କହିଛନ୍ତି।  ପୋଲିସ ଅନ୍ୟ ଅଭିଯୁକ୍ତ ମାନଙ୍କୁ ଖୋଜୁଥିବା ବେଳେ ଗିରଫ ଭୟରେ ସେମାନେ ଫେରାର ହୋଇଯାଇଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଗ୍ରୀଷ୍ମ ପ୍ରବାହକୁ ଆଖି ଆଗରେ ରଖି ଜନ ସାଧାରଣ ଯେପରି ଅଂଶୁଘାତର ଶିକାର ନ ହୁଅନ୍ତି ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ସାରା ଓଡ଼ିଶାରେ ସହରାଞ୍ଚଳ ଓ ଗ୍ରାମାଞ୍ଚଳରେ ଜଳ ବିତରଣ କେନ୍ଦ୍ର ଖୋଲି ନାଗରିକମାନଙ୍କୁ ପାନୀୟ ଜଳ ପ୍ରଦାନ କରିବାକୁ ସରକାରୀ ସ୍ତରରେ ନିର୍ଦେଶ ଅଛି।

ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଜିଲ୍ଲା ବାଣପୁର ଏନଏସିରେ ପୃଥକ ପୃଥକ ଭାବେ ସାତ ଗୋଟି ସ୍ଥାନରେ ପାନୀୟ ଜଳ ବିତରଣ କେନ୍ଦ୍ର ଖୋଲାଯାଇଛି। ଏହାକୁ ଏନଏସି ଅଧ୍ୟକ୍ଷ ମିଟୁ ନାୟକ ଏବଂ କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତି ମିଳିତ ଭାବେ ଉଦଘାଟନ କରିଥିଲେ। ଉକ୍ତ ଜଳଛତ୍ର କେନ୍ଦ୍ର ଖୋଲିବା ଦ୍ୱାରା ବହୁ ପଥଚାରି ଉପକୃତ ହେବେ ବୋଲି ଆଶା କରାଯାଇଛି।

ଉକ୍ତ ଉଦଘାଟନ କାର୍ଯ୍ୟକ୍ରମରେ ଏନଏସି ଉପାଧ୍ୟକ୍ଷ, ଯୁବ ସଂଗଠକ ମନୋଜ ବାରିକି, ସତ୍ୟନାରାୟଣ ପ୍ରଧାନ ଆଦି ଉପସ୍ଥିତ ଥିଲେ।

ସୀତାରାମ ଅଗ୍ରୱାଲ

ବାଣପୁର: ଆଜି ଖୋର୍ଦ୍ଧା ଜିଲ୍ଲା ବାଣପୁର ଏନଏସିରେ ପାଳିତ ହୋଇଯାଇଛି ଓଡ଼ିଶାର ପୂର୍ବତନ ମୁଖମନ୍ତ୍ରୀ ତଥା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୨୫ ତମ ଶ୍ରାଦ୍ଧବାର୍ଷିକୀ। ପୂର୍ବାହ୍ନରେ ଏନଏସି ଅଧ୍ୟକ୍ଷ ମିଟୁ ନାୟକ ଦଳୀୟ କର୍ମୀଙ୍କ ସହ ମେଡିକାଲ ଛକ ନିକଟରେ ଥିବା ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଛନ୍ତି। ଏହି ଅବସରରେ ତାଙ୍କ ଅମର ଆତ୍ମର ସଦଗତି ନିମନ୍ତେ ଦୁଇ ମିନିଟ ନିରବ ପ୍ରାର୍ଥନା କରାଯାଇଥିଲା। ଏହାପରେ ଅଧ୍ୟକ୍ଷ ଶ୍ରୀ ନାୟକ ବାଣପୁର ମେଡିକାଲ ପରିଦର୍ଶନ କରି ରୋଗୀଙ୍କୁ ଭେଟିବା ସହ ସେମାନଙ୍କୁ ଫଳ ଏବଂ ମିଷ୍ଟାନ୍ନ ବଣ୍ଟନ କରିଥିଲେ। ଉକ୍ତ କାର୍ଯ୍ୟକ୍ରମରେ ବାଣପୁର ଏନଏସିର ବହୁ ବିଜେଡି କର୍ମୀମାନେ ସାମିଲ ଥିଲେ।