ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଏନଏସି କୁ ୫୦ ବର୍ଷ ପୂର୍ତ୍ତି ହୋଇଥିବା ବେଳେ ଜଳବନ୍ଦୀ ସମସ୍ୟା ପାଇଁ ସଦାବେଳେ ଏହା ସମାଲୋଚିତ ହୋଇଆସୁଛି। ଏନଏସି ଦେଇ ଯାଇଥିବା ମୁଖ୍ୟ ରାସ୍ତା ପୂର୍ତ୍ତ ବିଭାଗ ଅଧୀନରେ ଥିବା ବେଳେ ଏଠାରେ ଡ୍ରେନେଜ ବ୍ୟବସ୍ଥା ନଥିବାରୁ ସ୍ୱଳ୍ପ ବର୍ଷାରେ ଆଣ୍ଠୁଏ ପାଣି ଜମି ରହୁଛି।
ତେବେ ଏ ସମସ୍ୟା ନେଇ ବାରମ୍ବାର ବିଭିନ୍ନ ଗଣମାଧ୍ୟମରେ ଖବର ପ୍ରକାଶନ ପରେ ଗତବର୍ଷ ଦୋଳ ବେଦି ଛକରୁ ପଲଟନ ପଡିଆ ପର୍ଯ୍ୟନ୍ତ ଏକ ସ୍ଥାୟୀ ଡ୍ରେନ ନିର୍ମାଣ ପାଇଁ ପୂର୍ତ୍ତ ବିଭାଗକୁ ନିର୍ଦେଶ ଦେଇଥିଲେ ଜିଲ୍ଲାପାଳ। କିନ୍ତୁ ଅଦ୍ୟାବଧି ତାହା ମଧ୍ୟ ହୋଇପାରି ନାହିଁ। ଉକ୍ତ ଡ୍ରେନେଜ ନିର୍ମାଣ ପାଇଁ ବ୍ୟୟ ଅଟକଳ ସରକାରଙ୍କ ପକ୍ଷରେ ଅନୁମୋଦନ ପାଇଁ ପଡ଼ି ରହିଥିବା ଜଣାପଡିଛି।
ଏହି ପରିପ୍ରେକ୍ଷୀରେ କେବଳ ବିଧାରପୁର ଛକରେ ଜମୁଥିବା ବର୍ଷା ଜଳ ନିଷ୍କାସନ ପାଇଁ ପ୍ରଶାସନ ଅଣ୍ଟା ଭିଡିଛି। ବିଧାରପୁର ଛକଠାରୁ ସାନ କେନାଲ(୨୨୦ମିଟର) ପର୍ଯ୍ୟନ୍ତ ରାସ୍ତା ପାର୍ଶ୍ୱରେ ଚାରି ଫୁଟର ଅସ୍ଥାୟୀ ଡ୍ରେନ ନିର୍ମାଣ ପାଇଁ ଆଜି ଜବରଦଖଲ ଉଛେଦ ଅଭିଯାନ ଜାରି ରହିଥିଲା। ପୂର୍ତ୍ତବିଭାଗର ଅନୁରୋଧ କ୍ରମେ ତହସିଲଦାର ଓ ସ୍ଥାନୀୟ ଆଇଆଇସିଙ୍କ ଉପସ୍ଥିତିରେ ବ୍ୟାପକ ଫୋର୍ସ ମୁତୟନ କରାଯାଇ ଉକ୍ତ ଜବରଦଖଲ ଉଛେଦ କରାଯାଇ ଥିଲା।
ତେବେ ଏହାକୁ ନେଇ ଭିନ୍ନ ପ୍ରତିକ୍ରିୟା ପ୍ରକାଶ ପାଇଛି। ବିଗତ ଦୁଇ ବର୍ଷ ତଳେ ସମାନ ସମସ୍ୟାକୁ ଏଡାଇବା ପାଇଁ ପୂର୍ତ୍ତବିଭାଗ ପକ୍ଷରୁ ପାଖପାଖି ୫ ଲକ୍ଷ ଟଙ୍କା ବ୍ୟୟରେ ବିଧାରପୁର ଛକରେ ଏକ ଅସ୍ଥାୟୀ ଡ୍ରେନ ନିର୍ମାଣ କରାଯାଇଥିଲା ଯାହାକି ମାତ୍ର ଏକ ମାସ ପରେ ପୁନଶ୍ଚ ଜବରଦଖଲ ହୋଇଯାଇଥିଲା।
ତେଣୁ ବାରମ୍ବାର ପକ୍କା ଡ୍ରେନ ନିର୍ମାଣ ନକରି କେବଳ ତାଳିପକା ଡ୍ରେନ ନିର୍ମାଣ ଫଳରେ ସରକାରଙ୍କ ତହବିଲରୁ ଲକ୍ଷ ଲକ୍ଷ ଟଙ୍କା ବ୍ୟର୍ଥ ବ୍ୟୟ ହେଉଛି। ବିଧାରପୁର ଛକକୁ ବାଦ ଦେଲେ ମଧ୍ୟ ସହରର ଥାନା, ପୁରୁଣା ଏନଏସି କାର୍ଯ୍ୟାଳୟ ସମ୍ମୁଖ , ମେଡିକାଲ ଛକ, ନୂତନ ଏନଏସି କାର୍ଯ୍ୟାଳୟ ସମ୍ମୁଖ , ଗାଲୁଆ ଛକ, ଚିଆଙ୍କ ସାହି ଛକ ଆଦି ସ୍ଥାନରେ ବରାବର ବର୍ଷା ଜଳ ଜମି ରହୁଛି।
ତେବେ ଉକ୍ତ ସ୍ଥାନରେ ମଧ୍ୟ ଡ୍ରେନେଜ ସୁବିଧା କରାନଗଲେ ବାଣପୁର ସହର ପୁନଶ୍ଚ ଜଳମଗ୍ନ ହେବ l ଏହି ପରିପ୍ରେକ୍ଷୀରେ ବାଣପୁର ଏନଏସି ମୁଖ୍ୟ ରାସ୍ତା ସମେତ ୱାର୍ଡ ୱାରୀ ପକ୍କା ଡ୍ରେନେଜ ନିର୍ମାଣ ପାଇଁ ସାଧାରଣରେ ଦୃଢ଼ ଦାବି ହେଉଛି।
