Tag: ବାଣପୁର

ସୀତାରାମ ଅଗ୍ରୱାଲ

ବାଣପୁର: ଅଲ ଓଡିଶା ଅଙ୍ଗନବାଡି ଲେଡ଼ିଜ ୱାର୍କର୍ସ ଆସୋସିଏସନ ପକ୍ଷରୁ ଖୋର୍ଦ୍ଧା ଜିଲ୍ଲା ବାଣପୁରଠାରେ ଏକ ବିଶାଳ ପଦଯାତ୍ରା କରାଯାଇଛି। ଆଜି ମଧ୍ୟାହ୍ନରେ ବାଣପୁର ବ୍ଲକର ପାଖାପାଖି ୫୦୦ ଜଣ ଅଙ୍ଗନବାଡି କର୍ମୀ ଓ ସହକର୍ମୀ ମାନେ ମା’ ଭଗବତୀଙ୍କ ମନ୍ଦିର ସମ୍ମୁଖରେ ଏକତ୍ରିତ ହୋଇ ଏକ ବିରାଟ ପଦଯାତ୍ରା ଆରମ୍ଭ କରିଥିଲେ।

ଉକ୍ତ ପଦଯାତ୍ରାଟି ବାଣପୁର ସହର ପରିକ୍ରମା କରି ଶେଷରେ ବ୍ଲକ କାର୍ଯ୍ୟାଳୟ ନିକଟରେ ପହଞ୍ଚିଥିଲା। ପରିଶେଷରେ ସଂଗଠନର କର୍ମକର୍ତ୍ତାମାନେ ମାନ୍ୟବର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ବାର ଦଫା ସମ୍ବଳିତ ଦାବିପତ୍ର ବାଣପୁର ବିଡ଼ିଓ ପ୍ରଦ୍ୟୁମ୍ନ ନାୟକଙ୍କୁ ହସ୍ତାନ୍ତର କରିଥିଲେ।

ଉକ୍ତ ଦାବିପତ୍ରରେ ଅଙ୍ଗନବାଡି କର୍ମୀ ଓ ସହକର୍ମୀଙ୍କୁ ସରକାରୀ କର୍ମଚାରୀ ଘୋଷଣା, ଅବସରକାଳୀନ ସହାୟତା ରାଶି ପ୍ରଦାନ, ଗ୍ରୀଷ୍ମ ଅବକାଶ ଲାଗୁ କରିବା, ରନ୍ଧନ ଗ୍ୟାସ ଚୁଲା ଓ ସିଲିଣ୍ଡର ପ୍ରଦାନ ଭଳି ବିଭିନ୍ନ ଦାବି ବିଷୟରେ ଉଲ୍ଲେଖ ଅଛି।

ଉକ୍ତ କାର୍ଯ୍ୟକ୍ରମକୁ ସଂଗଠନର ବାଣପୁର ବ୍ଲକ ସଭାନେତ୍ରୀ ରାଜଲକ୍ଷ୍ମୀ ଦାସ, ସମ୍ପାଦିକା ଉର୍ବଶୀ ପ୍ରଧାନ, ଉପ ସଭାନେତ୍ରୀ ଶିବାନୀ ବାରିକ ପ୍ରମୁଖ ପରିଚାଳନା କରିଥିଲେ।

ସୀତାରାମ ଅଗ୍ରୱାଲ

ବାଣପୁର: ଆଜି ପୂର୍ବାହ୍ନରେ ୫-ଟି ସଚିବ ଭି କାର୍ତ୍ତିକେୟନ ପାଣ୍ଡିଆନ ଏକ ଭରଚୁଆଲ ବୈଠକ ମାଧ୍ୟମରେ ଖୋର୍ଦ୍ଧା ଜିଲ୍ଲା ବାଣପୁର ଏନଏସି ର ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଛନ୍ତି। ଉକ୍ତ ବୈଠକରେ ୫-ଟି ଅନ୍ତର୍ଗତ ‘ମୁକ୍ତା’ ଯୋଜନା ମାଧ୍ୟମରେ ବାଣପୁର ଏନଏସି ର ରୂପାନ୍ତରିକରଣ ପାଇଁ ନିବେଦନ କରାଯାଇଥିଲା। ଏକାଧିକ ଉନ୍ନୟନମୂଳକ ପ୍ରକଳ୍ପ ଗୁଡିକର ରୂପାନ୍ତରିକରଣ ଲାଗି ମୋଟ ୩ କୋଟି ୧୩ ଲକ୍ଷ ଟଙ୍କାର ଅନୁମୋଦନ ପାଇଁ ୫-ଟି ସଚିବଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ନିବେଦନ କରାଯାଇଥିଲା।

ପ୍ରକଳ୍ପ ଗୁଡ଼ିକ ମଧ୍ୟରେ ନୂତନ ରାସ୍ତା, ଜଳାଶୟ, ମୁକ୍ତାକାଶ ବ୍ୟାୟାମଶାଳା, ଡ୍ରେନ, ଭେଣ୍ଡିଂ ଜୋନ ଓ ପାର୍କ ଆଦି ସାମିଲ ଥିବାର ଜଣାପଡିଛି। ଉକ୍ତ ଭରଚୁଆଲ ବୈଠକରେ ଖୋର୍ଦ୍ଧା ଜିଲ୍ଲା ବିଜେଡି ପର୍ଯ୍ୟବେକ୍ଷିକା ପ୍ରମିଳା ମଲ୍ଲିକ, ଏନଏସି ପ୍ରଶାସକ ତଥା ଉପଜିଲ୍ଲାପାଳ ଆଇଏଏସ ଗୌରବ ଶିବାଜୀ ଇଶାଲୱର, ଅତିରିକ୍ତ ଜିଲ୍ଲାପାଳ ମନୋଜ ପାଢ଼ୀ ଏବଂ ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତି ଆଦି ଉପସ୍ଥିତ ଥିଲେ।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଏନଏସି ଅଞ୍ଚଳରେ ଦିନକୁ ଦିନ ଅମାନିଆ ଗାଡ଼ିଚାଳକଙ୍କ ପ୍ରାଦୁର୍ଭାବ ବଢ଼ିବାରେ ଲାଗିଛି। ବେଧଡ଼କ ଭାବେ ଅନେକ ଗାଡିଚାଳକ ସହରରେ କ୍ଷିପ୍ର ଗତିରେ ବାଇକ ଚଲାଉଥିବା ବେଳେ ଏଥିପ୍ରତି ପୋଲିସର ନିଘା ନାହିଁ। ଏପରିକି ଅନଭିଜ୍ଞ ବାଇକ ଚାଳକଙ୍କ ଲାଗି ସହରରେ ସଦାବେଳେ ଛୋଟ ବଡ଼ ଦୁର୍ଘଟଣା ଲାଗିରହୁଛି। ଉକ୍ତ ଅମାନିଆ ଗାଡ଼ିଚାଳକଙ୍କ ଲାଗି ସହରରେ ଯାତାୟାତ କରୁଥିବା ଅନେକ ନିରୀହ ଲୋକ ନାନାଦି ପ୍ରକାରର ହଇରାଣ ହରକତ ହେଉଛନ୍ତି।

ସହରରେ ବସବାସ କରୁଥିବା ତଥା ସହରକୁ ଆସୁଥିବା ବରିଷ୍ଠ ନାଗରିକ, ଛାତ୍ରଛାତ୍ରୀ ଓ ପର୍ଯ୍ୟଟକମାନେ ଉକ୍ତ ଅମାନିଆ ଚାଳକଙ୍କ ଲାଗି ନିଜକୁ ଅସୁରକ୍ଷିତ ମନେ କରୁଛନ୍ତି। ବାଇକ ଗୁଡିକରୁ ସାଇଲେନ୍ସର ପାଇପ କାଢି ବାଇକ ଚଲାଇବା ହେଉ ଅବା ବିକୃତ ହର୍ନ ଲଗାଇ ବାଇକ ଚଲାଇବା ହେଉ ସବୁଥିରେ ଉକ୍ତ ଅସାମାଜିକ ଯୁବକମାନେ ମାହିର।

ସ୍କୁଲ ଓ କଲେଜ ଅଞ୍ଚଳରେ ବାଇକର ସର୍ବନିମ୍ନ ଗତି ୨୦ ଏବଂ ବଜାରରେ ୩୦ କିମି ପ୍ରତି ଘଣ୍ଟା ନିୟମ ରହିଥିବା ବେଳେ ବାଣପୁର ବଜାରରେ ଉକ୍ତ ଅମାନିଆଙ୍କ ଗାଡ଼ି ସ୍ପିଡ଼ ୬୦ ରୁ ଅଧିକ ରହୁଛି। ଯାହାଫଳରେ ବଜାରରେ ଯାତାୟାତ କରୁଥିବା ଜନସାଧାରଣମାନେ ଦୁର୍ଘଟଣାର ଶିକାର ହେଉଛନ୍ତି। ସେହିପରି ଯୁବତୀମାନଙ୍କୁ କେତେକ ରୋଡ଼ ରୋମିଓ ଅସଦାଚରଣ ଉଦ୍ଦେଶ୍ୟରେ ଏପରି ବାଇକ ଚଳାଉଥିବା ଦେଖିବାକୁ ମିଳୁଛି। ଏପରିକି ଖୋଦ ବାଣପୁର ଥାନା ଦେଇ ପ୍ରତିଦିନ ଏପରି ଅମାନିଆ ମାନେ ବୁଲୁଥିବା ବେଳେ ପୋଲିସ ନିଦାବିଷ୍ଣୁ ପାଲଟିଛି।

ଖୋର୍ଦ୍ଧା ଜିଲ୍ଲାରେ ବାଣପୁରର ସ୍ଥାନ ସ୍ୱତନ୍ତ୍ର। ରାଜ୍ୟର ପ୍ରସିଦ୍ଧ ଶକ୍ତିପୀଠ ମା’ ଭଗବତୀ ମନ୍ଦିର ଏଠାରେ ଅବସ୍ଥିତ। ଉଭୟ ବ୍ଲକ ଏବଂ ଏନଏସିକୁ ନେଇ ଗଠିତ ବାଣପୁର ତହସିଲ।  ବାଣପୁର ଏନଏସି ଜିଲ୍ଲାର ଏକ ପୁରୁଣା ସହର ହୋଇଥିବାବେଳେ ଏଠାକାର ରାସ୍ତା ଘାଟ ତଥା ଦୋକାନ ବଜାର ପ୍ରାୟତଃ ଅଣଓସାର। ତେବେ ୧୫ ଟି ୱାର୍ଡ ବିଶିଷ୍ଟ ଉକ୍ତ ସହରର ଜନସଂଖ୍ୟା ବର୍ତ୍ତମାନ ୨୦ ହଜାରରୁ ଉର୍ଦ୍ଧ୍ଵ ହୋଇଥିବାବେଳେ ବ୍ଲକର ଜନସଂଖ୍ୟା ଏକ ଲକ୍ଷରୁ ଉର୍ଦ୍ଧ୍ଵ ହେବ।

ସମୟ ଅନୁଯାୟୀ ସହରର ଆୟତନ ବୃଦ୍ଧିପାଉଥିବା ବେଳେ ବାଣିଜ୍ୟ ବେପାର ନିମନ୍ତେ ଦୋକାନ ବଜାର ସଂଖ୍ୟା ମଧ୍ୟ ବୃଦ୍ଧିପାଇବାରେ ଲାଗିଛି। ହେଲେ ସହରର ଦୋକାନ ବଜାର ଉପରେ ନିର୍ଭର ରହୁଛନ୍ତି ଉଭୟ ଏନଏସି ଓ ପଞ୍ଚାୟତବାସି। ତେବେ ସହରରେ ଟ୍ରାଫିକ ବ୍ୟବସ୍ଥା ସମ୍ପୂର୍ଣ ବିପର୍ଯ୍ୟସ୍ତ। ଏଠାରେ ଟ୍ରାଫିକ କଣ୍ଟ୍ରୋଲ ପାଇଁ ପୋଲିସ କୌଣସି ପଦକ୍ଷେପ ନେଉନାହିଁ। ସହରର କଲେଜ ଛକରୁ ପଲଟନ ପଡିଆ ଯାଏଁ ଅହରହ ଟ୍ରାଫିକ ସମସ୍ୟା ଲାଗିରହୁଛି। ଘଣ୍ଟା ଘଣ୍ଟା ଧରି ଜନସାଧାରଣଙ୍କୁ ତେଲ ପୋଡି ରାସ୍ତାରେ ଅପେକ୍ଷା କରିବାକୁ ପଡୁଛି।

ତେବେ ଏହାକୁ ସରଳିକରଣ କରିବା ଦିଗରେ ପୋଲିସର ଉଦାସୀନତା ସାଧାରଣରେ ପ୍ରଶ୍ନବାଚୀ ସୃଷ୍ଟିକରିଛି। ବୁଦ୍ଧିଜୀବୀମାନଙ୍କ ମତ ହେଲା କି ସହର ମଧ୍ୟରେ ଭାରୀଯାନ ଗୁଡିକର ପ୍ରବେଶ ପଥ ଏବଂ ଏକ ନିର୍ଦ୍ଦିଷ୍ଟ ସମୟ ସାରଣୀ ପୋଲିସ ନିର୍ଦ୍ଧାରଣ କରୁ।  ଯାହାଦ୍ୱାରା ଉକ୍ତ ସମସ୍ୟାର ସମାଧାନ ହୋଇପାରିବ।

ଅନୁରୂପ ଭାବେ ଯେହେତୁ ବାଣପୁର ଏକ ଯୋଜନାଭୁକ୍ତ ସହର ନୁହଁ, ଏଠାରେ ରାସ୍ତା ଘାଟ ସବୁ ଅଣ ଓସାରିଆ ତେଣୁ ଏନଏସି ର ବିଭିନ୍ନ ବଜାର ଅଞ୍ଚଳରେ ଗାଡ଼ି ପାର୍କିଂ ନିମନ୍ତେ ନିର୍ଦ୍ଦିଷ୍ଟ ସ୍ଥାନ ଚି଼ହ୍ନଟ କରୁ ପୋଲିସ। ବର୍ତ୍ତମାନ ଶୀତଋତୁ ଆରମ୍ଭ ହୋଇଯାଇଥିବାବେଳେ ରାଜ୍ୟର କୋଣଅନୁକୋଣରୁ ପ୍ରତିଦିନ ଶହ ଶହ ପର୍ଯ୍ୟଟକ ବାଣପୁର ଆସୁଛନ୍ତି ଏବଂ ଆଗକୁ ଉକ୍ତ ସଂଖ୍ୟା ବଢିବାକୁ ଥିବାବେଳେ ସହରର ଟ୍ରାଫିକ ବ୍ୟବସ୍ଥା ସଜାଡ଼ିବା ଏବଂ ଅମାନିଆ ଗାଡ଼ିଚାଳକଙ୍କୁ ସାବାଡ଼ କରିବା ବାଣପୁର ପୋଲିସ ପାଇଁ ବଡ଼ ଚ୍ୟାଲେଞ୍ଜ ର ବିଷୟ ପାଲଟିଛି।

ନଚେତ ସରକାରଙ୍କ ‘ଅତିଥି ଦେବୋ ଭବ’ ଉକ୍ତି ବାଣପୁରରେ ବୁମେରାଙ୍ଗ ପାଲଟିବ ଏଥିରେ କୌଣସି ସନ୍ଦେହ ନାହିଁ। ତେବେ ବାଲୁଗାଁ ଏସଡିପିଓ, ବାଣପୁର ତହସିଲଦାର, ବାଣପୁର ଆଇଆଇସି ଏବଂ ଏନଏସି କାର୍ଯ୍ୟନିର୍ବାହୀ ଅଧିକାରୀ ମିଳିତଭାବେ ଉକ୍ତ ଗୁରୁସମସ୍ୟାର ସମାଧାନ କରିବା ଦିଗରେ ଧ୍ୟାନ ଦେବାକୁ ସାଧାରଣରେ ଦାବି ହେଉଛି।

ସୀତାରାମ ଅଗ୍ରୱାଲ

ଚିଲିକା: ରାଜ୍ୟରେ ପୌର ନିର୍ବାଚନ ପ୍ରକ୍ରିୟା ଆରମ୍ଭ ହୋଇଛି। ପୌରାଞ୍ଚଳର ଓ୍ଵାର୍ଡ ପୁନର୍ଗଠନ ଓ ସଂରକ୍ଷଣର ଚିଠା ବିଜ୍ଞପ୍ତି ଜାରି ହୋଇଛି। ଜିଲ୍ଲା ସ୍ତରରେ ଜିଲ୍ଲାପାଳମାନେ ଏହି ତାଲିକା ପ୍ରକାଶ କରିଛନ୍ତି। ଚିଠା ସଂରକ୍ଷଣ ତାଲିକା ଉପରେ ଲୋକମାନେ ସେମାନଙ୍କ ଆପତ୍ତି ଅଭିଯୋଗ ୧୮ ତାରିଖ ସୁଦ୍ଧା ଜଣାଇବେ। ଜିଲ୍ଲାପାଳମାନେ ତାହାର ବିଚାର କରି ନଭେମ୍ବର ୨୯ ତାରିଖରେ ସୀମା ପୁନଃନିର୍ଦ୍ଧାରଣ ଓ ସଂରକ୍ଷଣର ଚୂଡାନ୍ତ ବିଜ୍ଞପ୍ତି ଜାରି କରିବେ।

ନଭେମ୍ବର ୨୯ରୁ ଡିସେମ୍ବର ୧୨ ତାରିଖ ମଧ୍ୟରେ ସାଧାରଣ ଲୋକ ଜିଲ୍ଲାପାଳଙ୍କ ଏହି ବିଜ୍ଞପ୍ତି ଉପରେ ଅଭିଯୋଗ ଜଣାଇବେ। ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଓ ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦର ଓ୍ଵାର୍ଡ ପୁନର୍ଗଠନ ଓ ସଂରକ୍ଷଣର ଚିଠା ବିଜ୍ଞପ୍ତି ଜାରି ହୋଇଛି।

ସୁତରାଂ ୧୧ ୱାର୍ଡ ବିଶିଷ୍ଟ ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦରେ ଅନୁସୂଚିତ ଜାତି ପାଇଁ ୨ ନଂ, ଅନୁସୂଚିତ ଜାତି ମହିଳା ପାଇଁ ୬ନଂ, ଅନୁସୂଚିତ ଜନଜାତି ମହିଳା ପାଇଁ ୮ନଂ, ପଛୁଆ ବର୍ଗ ମହିଳା ପାଇଁ ୧ନଂ, ପଛୁଆ ବର୍ଗ ପାଇଁ ୧୧ନଂ, ମହିଳାଙ୍କ ପାଇଁ ୩ନଂ/୪ନଂ/୧୦ନଂ ହୋଇଥିବାବେଳେ ୫ନଂ/୭ନଂ/୯ନଂ ୱାର୍ଡ ପାଇଁ ଅଣସଂରକ୍ଷଣ ପ୍ରାର୍ଥୀ ନେଇ ତାଲିକା ପ୍ରକାଶ ପାଇଛି।

ସେହିପରି ଭାବେ ୧୫ ୱାର୍ଡ ବିଶିଷ୍ଟ ବାଣପୁର ବିଜ୍ଞାପିତ ଅଞ୍ଚଳ ପରିଷଦରେ ମହିଳାଙ୍କ ପାଇଁ ୧ନଂ/୮ନଂ/୧୨ନଂ/୧୫ନଂ ୱାର୍ଡ ଚୟନ ହୋଇଥିବା ବେଳେ ୩ନଂ/୫ନଂ/୬ନଂ/୭ନଂ/୧୩ନଂ ୱାର୍ଡ ଅଣସରଂକ୍ଷିତ ହୋଇଛି।

ଅନୁରୂପ ଭାବେ ପଛୁଆ ବର୍ଗ ମହିଳାଙ୍କ ପାଇଁ ୪ନଂ ଓ ୧୧ନଂ ୱାର୍ଡ ଚୟନ ହୋଇଥିବା ବେଳେ ପଛୁଆ ବର୍ଗଙ୍କ ପାଇଁ ୯ନଂ ଓ ୨ ନଂ ୱାର୍ଡ ଚୟନ ହୋଇଛି। ସେହିପରି ଭାବେ ଅନୁସୂଚିତ ଜାତି ମହିଳାଙ୍କ ପାଇଁ ୧୦ନଂ ଓ ଅନୁସୂଚିତ ଜନଜାତି ମହିଳାଙ୍କ ପାଇଁ ୧୪ ନଂ ୱାର୍ଡ ଚୟନ ହୋଇଥିବା ନେଇ ତାଲିକା ପ୍ରକାଶ ପାଇଛି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ତହସିଲରେ ଆଜି ନୂତନ ତହସିଲଦାର ଭାବେ କାର୍ଯ୍ୟରେ ଯୋଗଦେଇଛନ୍ତି ଓଏଏସ ଅଧିକାରୀ କୁଞ୍ଜବିହାରୀ ବଡ଼ଜେନା। ଶ୍ରୀ ବଡ଼ଜେନା ଏହା ପୂର୍ବରୁ ନୟାଗଡ଼ ଜିଲ୍ଲାରେ ସହକାରୀ ଜିଲ୍ଲାପାଳ ଭାବେ କାର୍ଯ୍ୟରତ ଥିଲେ। ତେବେ ବାଣପୁର ତହସିଲ ଖୋର୍ଦ୍ଧା ଜିଲ୍ଲାର ଏକ ଗୁରୁତ୍ୱପୂର୍ଣ୍ଣ ତହସିଲ ହୋଇଥିବାବେଳେ ଏଠାରେ ଜନସାଧାରଣଙ୍କ ଅଭିଯୋଗକୁ ପ୍ରାଥମିକତା ଭିତ୍ତିରେ ସମାଧାନ କରିବେ ବୋଲି ତହସିଲଦାର ଆମ ପ୍ରତିନିଧିଙ୍କୁ କହିଛନ୍ତି।

ଅନୁରୂପ ଭାବେ ମ୍ୟୁଟେସନ, ଜମି ପଟ୍ଟା ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କାର୍ଯ୍ୟଗୁଡିକୁ ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଆବେଦନକାରୀଙ୍କୁ ପ୍ରଦାନ କରାଯିବ ବୋଲି ଶ୍ରୀ ବଡ଼ଜେନା କହିଛନ୍ତି। ବେଆଇନ ଲଘୁ ଖଣିଜ ଦ୍ରବ୍ୟ ଚୋରାଚାଲାଣକୁ ଆଦୌ ପ୍ରଶ୍ରୟ ଦିଆଯିବନାହିଁ ଏବଂ ସରକାରୀ ରାଜସ୍ୱ ଲୁଟୁଥୁବା ଚୋରା ଲଘୁ ଖଣିଜଦ୍ରବ୍ୟ ମାଫିଆଙ୍କୁ ଦୃଢ଼ହସ୍ତରେ ଦମନ କରାଯିବ ବୋଲି ତହସିଲଦାର କହିଛନ୍ତି।

ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ସୋସିଆଲ ମିଡ଼ିଆ ‘ଟ୍ୱିଟର’ ଦ୍ୱାରା ଜନସାଧାରଣଙ୍କ ଅଭିଯୋଗକୁ ସମାଧାନ କରିବାକୁ ପ୍ରାଥମିକତା ଦିଆଯିବ ବୋଲି ତହସିଲଦାର କହିଛନ୍ତି।  ତେବେ ଆଜି କାର୍ଯ୍ୟଭାର ସମ୍ଭାଳିବା ପରେ ତହସିଲର ସମସ୍ତ କର୍ମଚାରୀମାନେ ନୂତନ ତହସିଲଦାରଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରିବା ସହ ଶୁଭେଚ୍ଛା ଜଣାଇଥିଲେ।

ସୂଚନା ଥାଉକି ଗତ ଜୁନ ମାସ ୩୦ ତାରିଖରେ ପୂର୍ବତନ ତହସିଲଦାର ମନ୍ମଥ ବେହରାଙ୍କ କାର୍ଯ୍ୟକାଳ ସରିବା ପରଠାରୁ ଦୀର୍ଘ ଚାରି ମାସ ହେଲା ଉକ୍ତ ଗୁରୁତ୍ୱପୂର୍ଣ୍ଣ ପଦବୀ ଖାଲି ପଡିଥିଲା।

ସୀତାରାମ ଅଗ୍ରୱାଲ

ବାଣପୁର: ଗତ ଏକମାସ ତଳେ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ କୋଷରଡ଼ା ଗ୍ରାମ ନିକଟସ୍ଥ ଶାଳିଆ ନଦୀରେ ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ଅନ୍ତର୍ଗତ ସୋରଡ଼ାପଲି ଗ୍ରାମର ବାଉରିଆ ଶବର (୫୫) ଭାସି ନିଖୋଜ ହୋଇଯାଇଥିଲେ। ଏହାପରେ ଦୀର୍ଘ ୪ ଦିନ ଧରି ଅଗ୍ନିଶମ ବାହିନୀ ବାଉରିଆଙ୍କୁ ଖୋଜି ଶେଷରେ ନିରାଶ ହୋଇଥିବାବେଳେ ବାଉରିଆଙ୍କ ପତ୍ତା ମିଳିନଥିଲା।

ସେବେଠାରୁ ତାଙ୍କ ପରିବାର ବର୍ଗ ଦୁଃଖିତ ଥିବାବେଳେ ଶୁକ୍ରବାର ସକାଳେ ମୃତ ବାଉରିଆଙ୍କ ଗଳିତ ଶବ ନିପାଣିଆ ଓ ସାହାଡ଼ାଡିହ ଗ୍ରାମ ମଝିରେ ଯାଇଥିବା ଶାଳିଆ ନଦୀର ଏକ ଗଛରେ ଲାଗି ରହିଥିବାର ଦେଖିବାକୁ ପାଇଥିଲେ ଗ୍ରାମବାସୀ। ଏ ନେଇ ସଙ୍ଗେସଙ୍ଗେ ଗ୍ରାମବାସୀ ମୃତ ବାଉରିଆଙ୍କ ପୁତ୍ର ବିପ୍ର ଶବରଙ୍କୁ ସୂଚନା ଦେବାରୁ ବିପ୍ର ଉକ୍ତ ସ୍ଥାନକୁ ଯାଇ ନିଜ ପିତାଙ୍କ ଶବକୁ ଚି଼ହ୍ନଟ କରିବା ସହ ସଂନ୍ଧ୍ୟାରେ ବାଣପୁର ଥାନାରେ ଏକ ଏତଲା ଦେଇଛନ୍ତି। ତେବେ ଆଜି ପୋଲିସ ଉକ୍ତ ସ୍ଥାନକୁ ଯାଇ ଘଟଣାର ଯାଞ୍ଚ କରିବ ବୋଲି ଆଇଆଇସି ରଶ୍ମିରଞ୍ଜନ ସାହୁ ସୂଚନା ଦେଇଛନ୍ତି।

ସୂଚନା ଥାଉକି ଗତ ସେପ୍ଟେମ୍ବର ୨୮ ତାରିଖ ଅପରାହ୍ନରେ ବାଉରିଆ ଦାମିଆ ବରବରା ପଞ୍ଚାୟତ ଅନ୍ତର୍ଗତ କୋଷରଡ଼ା ସ୍ଥିତ ନିଜ ସମ୍ପର୍କୀୟଙ୍କ ଘରୁ କାମ ସାରି ନିଜ ଗ୍ରାମ ସୋରଡ଼ାପଲି ଯିବାପାଇଁ ଉଦ୍ୟତ ହେଉଥିବାବେଳେ ନଦୀରେ ପହଁରି ଆର ପାର୍ଶ୍ଵକୁ ଯିବା ସମୟରେ ନଦୀର ପ୍ରଖର ସ୍ରୋତରେ ଭାସିଯାଇଥିଲେ।

ସୀତାରାମ ଅଗ୍ରୱାଲ

ବାଣପୁର: ଗଛକୁ ଏସୟୁଭି କାର ପିଟି ଦୁଇ ଜଣ ଗୁରୁତର ହୋଇଛନ୍ତି। ଉଭୟଙ୍କୁ ଗୁରୁତର ଅବସ୍ଥାରେ ଭୁବନେଶ୍ୱର ସ୍ଥାନାନ୍ତରିତ କରାଯାଇଛି। ଘଟଣା ଘଟିଛି ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ବରଡ଼ି ଛକ ନିକଟରେ।

ସୂଚନା ମୁତାବକ ବାଣପୁର ବ୍ଲକ ଓଡଗାଁ ଗ୍ରାମର ଲକ୍ଷ୍ମଣ ପ୍ରଧାନଙ୍କ ପୁତ୍ର ପବିତ୍ର ପ୍ରଧାନ (୨୭) ଆଜି ପୂର୍ବାହ୍ନରେ ନିଜ ମହିନ୍ଦ୍ରା ଏସୟୁଭି-୫୦୦ ରେ ବାଲୁଗାଁରୁ ଓଡଗାଁ ଫେରୁଥିଲେ। ଉକ୍ତ ଗାଡ଼ିରେ ପବିତ୍ରଙ୍କ ସହଯୋଗୀ ତଥା ଓଡଗାଁ ଗ୍ରାମର ବିଦ୍ୟାଧର ସାହୁ (୫୦) ମଧ୍ୟ ଉପସ୍ଥିତ ଥିଲେ। ତେବେ ଅସାବଧାନତା ବଶତଃ ପବିତ୍ର ବରଡ଼ି ଛକ ନିକଟରେ ଏକ ଗଛକୁ ନିଜ ଗାଡିକୁ ପିଟିଦେଇଥିଲେ। ଯାହାଦ୍ୱାରା ଗାଡ଼ିରେ ଉପସ୍ଥିତ ଥିବା ଦୁଇ ଜଣ ଗୁରୁତର ଆହତ ହୋଇଥିବା ବେଳେ ଗାଡିର ସମ୍ମୁଖ ପାର୍ଶ୍ଵ ସମ୍ପୂର୍ଣ ନଷ୍ଟ ହୋଇଯାଇଛି।

ତେବେ ସ୍ଥାନୀୟ ଅଞ୍ଚଳବାସୀ ଓ ପରିବାରବର୍ଗ ସଙ୍ଗେସଙ୍ଗେ ଖବର ପାଇ ଉଭୟଙ୍କୁ ବାଣପୁର ଡାକ୍ତରଖାନା ନେଇଥିବାବେଳେ ଉଭୟଙ୍କ ଡାହାଣ ଗୋଡ଼ ଭାଙ୍ଗିଯାଇଥିବାର ଅନୁମାନ କରାଯାଉଛି। ଅନୁରୂପ ଭାବେ ଉଭୟଙ୍କ ଶରୀରରେ ଏକାଧିକ କ୍ଷତ ହୋଇଥିବାର ଜଣାପଡ଼ିଛି। ଡାକ୍ତର ଦୁଇ ଗୁରୁତରଙ୍କୁ ଅଧିକ ଚିକିତ୍ସା ନିମନ୍ତେ ଭୁବନେଶ୍ୱର ଏମ୍ସ ହସ୍ପିଟାଲ ପଠାଇଦେଇଛନ୍ତି।

ସୀତାରାମ ଅଗ୍ରୱାଲ

ବାଣପୁର: କାଠଚୁଲିରୁ ନିଆଁ ଧରି ଘର ଜଳିଯାଇଛି। ଏହି ଅଗ୍ନିକାଣ୍ଡରୁ ବୃଦ୍ଧ ଦମ୍ପତି ଦ୍ୱୟ ଅଳ୍ପକେ ମୃତ୍ୟୁମୁଖରୁ ବର୍ତ୍ତିଯାଇଛନ୍ତି। ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ନୀଳାଦ୍ରିପ୍ରସାଦ ଗ୍ରାମରେ ଏପରି ଏକ ଦୁଃଖଦ ଘଟଣା ଘଟିଯାଇଛି।

ହସ୍ତଗତ ହୋଇଥିବା ତଥ୍ୟ ମୁତାବକ ନୀଳାଦ୍ରିପ୍ରସାଦ ଗ୍ରାମର ଗଙ୍ଗାଧର ନାୟକ ଏବଂ ଅନ୍ନପୂର୍ଣ୍ଣା ନାୟକ ନାମକ ବୃଦ୍ଧ ଦମ୍ପତି ଏକ ଛୋଟ ଚାଳ ଘରେ ବସବାସ କରନ୍ତି।  ତେବେ ଆଜି ପୂର୍ବାହ୍ନ ୧୧.୩୦ ଘଟିକାରେ ଅନ୍ନପୂର୍ଣ୍ଣା କାଠ ଚୁଲିରେ ରୋଷେଇ କରୁଥିବା ବେଳେ କୌଣସି କରଣ ବଶତଃ ଚୁଲିରୁ ନିଆଁ ଚାଳକୁ ଲାଗିଯାଇଥିଲା। ଏବଂ ଦେଖୁ ଦେଖୁ ସାରା ଘରେ ନିଆଁ ଧରିଦେଇଥିଲା। ଉଭୟ ବୃଦ୍ଧ ସ୍ୱାମୀ ସ୍ତ୍ରୀ ଚିତ୍କାର କରିବାରୁ ଗ୍ରାମବାସୀ ମାନେ ସଙ୍ଗେସଙ୍ଗେ ପାଣି ଆଣି ନିଆଁ ଲିଭାଇବାକୁ ଚେଷ୍ଟା ଜାରିରଖିଥିବା ବେଳେ ଅଗ୍ନିଶମ ବିଭାଗକୁ ମଧ୍ୟ ଖବର ଦେଇଥିଲେ।

ସୂଚନା ମୁତାବକ ଘରର ସତୁରି ଭାଗ ପୋଡି ପାଉଁଶ ହୋଇଯାଇଛି। ତେବେ ଗଙ୍ଗାଧର ନିହାତି ଗରିବ ହୋଇଥିବାରୁ ସରକାରଙ୍କ ପକ୍ଷରୁ ତାଙ୍କ ପରିବାରକୁ ସାହାଯ୍ୟ ପାଇଁ ସାଧାରଣରେ ଦାବି ହେଉଛି।

ସୀତାରାମ ଅଗ୍ରୱାଲ

ବାଣପୁର: ଜଣେ ଓଡ଼ିଆ ଯବାନ ଦେଶ ପାଇଁ ଡ୍ୟୁଟି କରୁଥିବା ଅବସ୍ଥାରେ ସହିଦ ହୋଇଛନ୍ତି। ଓଡ଼ିଆ ଯବାନ ଜଣଙ୍କ ହେଉଛନ୍ତି ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଖଣତ ଗ୍ରାମର ଦେବରାଜ ମହାରଣା ଓ ବୁଲୁବଦନୀ ମହାରଣାଙ୍କ ପୁତ୍ର ଜ୍ୟୋତି ପ୍ରକାଶ ମହାରଣା (୨୫)। ଜ୍ୟୋତି ପ୍ରକାଶଙ୍କ ପିତା ମଧ୍ୟ ପୂର୍ବତନ ସେନା କର୍ମଚାରୀ। ସେ ଦୀର୍ଘ ୩୦ ବର୍ଷ ଧରି ଭାରତୀୟ ସେନାରେ କାର୍ଯ୍ୟରତ ଥିବାବେଳେ ୨୦୧୮ ଜାନୁଆରୀ ମାସରେ ସେନା ଚାକିରିରୁ ଅବସର ନେଇଥିଲେ।

ତେବେ ତାଙ୍କ ବଡ଼ ପୁଅ ଜ୍ୟୋତିପ୍ରକାଶ ୨୦୧୬ ମସିହାରେ ଭାରତୀୟ ସେନାର ଏମଆଇଆରସି ବିଭାଗରେ ଭର୍ତ୍ତି ହୋଇଥିଲେ। ସେ ପ୍ରଥମେ ପଠାନକୋଟ ଏବଂ ବର୍ତ୍ତମାନ ପଞ୍ଜାବର ଭଟିଣ୍ଡା ଠାରେ ସେନାରେ କାର୍ଯ୍ୟରତ ଥିଲେ। କିନ୍ତୁ ଗତ ଶୁକ୍ରବାର ଦିନ ମଧ୍ୟ ରାତ୍ରିରେ ଡ୍ୟୁଟି ସମୟରେ ଜ୍ୟୋତିଙ୍କ ଦେହାନ୍ତ ହୋଇଯାଇଥିବାର ଖବର ପାଇଥିଲେ ତାଙ୍କ ପିତା ଦେବରାଜ। ଶୁକ୍ରବାର ରାତି ୧୨ ରୁ ୨ ଟା ମଧ୍ୟରେ ଦ୍ଵିତୀୟ ପର୍ଯ୍ୟାୟ ଡ୍ୟୁଟିକୁ ବାହାରୁଥିବା ବେଳେ ମୂର୍ଚ୍ଛା ହୋଇ ପଡିଯାଇଥିଲେ। ଏହି ଘଟଣା ବାବଦରେ ଗାର୍ଡ କମାଣ୍ଡର ଦେବରାଜଙ୍କୁ ଟେଲିଫୋନ ଯୋଗେ ସୂଚନା ଦେଇଥିଲେ। ସେଠାରୁ ତୁରନ୍ତ ତାଙ୍କୁ ସେନା ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିଲା ପରେ ମୃତ୍ୟର କାରଣ ଜଣାପଡ଼ିବାକୁ ଥିବା ବେଳେ ପ୍ରାଥମିକ ତଦନ୍ତରେ ଏହା ହୃଦଘାତ ଲାଗି ହୋଇଥିବାର ଜ୍ୟୋତିଙ୍କ ପିତା କହିଛନ୍ତି।  ଆଜି ଜ୍ୟୋତିଙ୍କ ମର ଶରୀରକୁ ଜାତୀୟ ପତାକାରେ ଅଚ୍ଛାଦିତ କରି ରାଷ୍ଟ୍ରୀୟ ମର୍ଯ୍ୟାଦା ସହ ଭାରତୀୟ ସେନା ବିମାନ ଯୋଗେ ଭଟିଣ୍ଡାରୁ ଭୁବନେଶ୍ୱର ବିମାନ ବନ୍ଦର ପଠାଇବା ବ୍ୟବସ୍ଥା କରିଥବାର ସୂଚନା ମିଳିଛି।

ତେବେ ଆଜି ରାତି ୧୦.୨୦ ଘଟିକାରେ ସହିଦ ଜ୍ୟୋତିଙ୍କ ମର ଶରୀର ଭୁବନେଶ୍ୱର ପହଞ୍ଚିବ ଏବଂ ତାଙ୍କୁ ଗ୍ରହଣ କରିବାକୁ ବିଷ୍ଣୁଡିହ ପଞ୍ଚାୟତ ସରପଞ୍ଚ ଭୁବନେଶ୍ୱର ଯାଇଥିବାର ଦେବରାଜ କହିଛନ୍ତି। ତେବେ ପିତା ଦେବରାଜ ପୁଅ ଡ୍ୟୁଟିରେ ସହିଦ ହୋଇଥିବାରୁ ଗୋଟାଏ ପଟେ ଗର୍ବ ଅନୁଭବ କରୁଥିବାବେଳେ ଅନ୍ୟପଟେ ଘରର ବଡ ପୁଅ ଚାଲିଯିବାରୁ ବୁକୁ ଫଟାଇ କାନ୍ଦୁଛନ୍ତି ଜ୍ୟୋତିଙ୍କ ପରିବାର।

ଜ୍ୟୋତିଙ୍କ ଜଣେ ସାନ ଭାଇ ଥିବାବେଳେ ଆଉ ଜଣେ ଭଉଣୀ ଅଛନ୍ତି। କିନ୍ତୁ ଏହି ଘଟଣା ପରେ ସହିଦଙ୍କ ପିତା ତଥା ପୂର୍ବତନ ସେନା କର୍ମଚାରୀ ଦେବରାଜ ଏକ ଇଚ୍ଛା ପ୍ରକାଶ କରିଛନ୍ତି। ପୁଅର ମର ଶରୀର ଗ୍ରାମରେ ଆସିବାପରେ ସ୍ଥାନୀୟ ପ୍ରଶାସନ ପକ୍ଷରୁ ତାଙ୍କର ଶେଷକୃତ୍ୟ ରାଷ୍ଟ୍ରୀୟ ମର୍ଯ୍ୟାଦା ସହ ସମ୍ପନ୍ନ କରାଯାଉ ବୋଲି ପୂର୍ବତନ ସେନା କର୍ମଚାରୀ ନିବେଦନ କରିଛନ୍ତି। କାରଣ ଏଯାବତ ଏହି ବିଷୟରେ ସ୍ଥାନୀୟ ଏବଂ ଜିଲ୍ଲା ପ୍ରଶାସନ ପକ୍ଷରୁ କୌଣସି ସୂଚନା ନଥିବାରୁ ସହିଦ ଜ୍ୟୋତିପ୍ରକାଶଙ୍କ ପିତା ଦୁଃଖ ପ୍ରକାଶ କରିଛନ୍ତି।