Tag: odishaelection2024

ବାଲେଶ୍ବର: ମହିଳାମାନଙ୍କୁ ପ୍ରକୃତରେ ବିଜେପି ସମ୍ମାନ ଦିଏ ନାହିଁ। ମହିଳା ସଂରକ୍ଷଣ ବିଲ ପାଶ କରିବା ଏକ ଲୋକ ଦେଖିଣିଆ କଥା। ବର୍ତ୍ତମାନ ଓଡିଶାରେ ବିଜେପି ଲୋକସଭା ପାଇଁ ଯେଉଁ ପ୍ରାର୍ଥୀ ଦେଇଛି ସେଥିରେ କେତେ ମହିଳା ଅଛନ୍ତି ? ଏହିପରି କିଛି ବାଣରେ ବିଜେପିକୁ ଘାଇଲା କରିଛନ୍ତି ବିଜେଡି ନେତ୍ରୀ ତଥା ବାଲେଶ୍ବର ଲୋକସଭା ପ୍ରାର୍ଥୀ ଲେଖାଶ୍ରୀ ସାମନ୍ତସିଂହାର।

ବାଲେଶ୍ବର ଲୋକସଭା ନିର୍ବାଚନ ମଣ୍ଡଳିର ଏକ ପ୍ରଚାର ସଭାରେ ଲେଖାଶ୍ରୀ କହିଛନ୍ତି ଯେ, ବର୍ତ୍ତମାନ ବିଜେପି ଓଡିଶାରେ ଯେଉଁ ପ୍ରାଥୀ ଦେଇଛି ତାହା ମାତ୍ର ସାତ ପ୍ରତିଶତ। କୁଆଡେ କହିଲା ମହିଳା ସଂରକ୍ଷଣ ବିଲ, କୁଆଡେ ଗଲା 33 ପ୍ରତିଶତ ସଂରକ୍ଷଣ ବୋଲି ପ୍ରଶ୍ନ କରିଛନ୍ତି ଲେଖାଶ୍ରୀ। ମୁଁ ଜଣେ ମହିଳା ହୋଇଥିବାରୁ ଦଳ ମୋତେ ବହୁ ପୂର୍ବରୁ ପର କରିସାରିଥିଲା। ଯେତେବେଳେ ମୁଁ ଜାଣିଲି ବିଜେପିରେ ମହିଳାମାନଙ୍କ ସ୍ଥାନ ନାହିଁ ସେତେବେଳେ ଦଳ ଛାଡିବି ବୋଲି ନିଷ୍ପତି କଲି। ଏହା କହିଛନ୍ତି ଲେଖାଶ୍ରୀ।

ସେହିପରି ସେ କହିଛନ୍ତି ଯେ, ବିଜେପି ପାଇଁ ମୁଁ କଣ ନ କରିଛି। ମୋର ସୀମାହ୍ରଦ ଡେଇଁ ଦଳ ପାଇଁ ସବୁକିଛି ତ୍ୟାଗ କରିଥିଲି। ହେଲେ ଦଳ ମୋତେ ପଚାରିଲା ନାହିଁ। କାରଣ ମୁଁ ଜଣେ ମହିଳା। ସେ କହିଛନ୍ତି ଯେ, ଧନ୍ୟବାଦ ଦେବି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସେ ମୋତେ ତାଙ୍କ ଦଳରେ ସାମିଲ କଲେ। ମୁଁ କେବେ ବି ଭାବି ନ ଥିଲି ଯେ, ନବୀନ ପଟ୍ଟନାୟକ ମୋତେ ତାଙ୍କ ଦଳରେ ନେବେ ବୋଲି। ଦେଖନ୍ତୁ ନବୀନ ପଟ୍ଟନାୟକଙ୍କ କିପରି ବିଶାଳ ହୃଦୟ, ସେ ମୋତେ ତାଙ୍କ ଦଳରେ ସାମିଲ କଲେ।

ବାଲେଶ୍ବରରେ ଜଣେ ମହିଳାଙ୍କୁ ପ୍ରାର୍ଥୀ କରିବେ ବୋଲି ଦଳ ଚିନ୍ତା କରି ସେ ଆସନରେ ପ୍ରାର୍ଥୀ ଦେଇ ନ ଥିଲେ। ଜଣେ ମହିଳା ପ୍ରାର୍ଥୀ ମିଳିବା ପରେ ବିଜେଡି ବାଲେଶ୍ବରରେ ମୋତେ ପ୍ରାର୍ଥୀ କରିଛି। ସେଥିପାଇଁ ମୁଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବହୁତ ବହୁତ ଧନ୍ୟବାଦ ଦେବି। ପ୍ରକୃତରେ ବିଜେଡି ହେଉଛି ମହିଳାଙ୍କ ବଳ। ବିଜୁ ଜନତା ଦଳ ମହିଳାଙ୍କ ବଳ ବୋଲି ଲେଖାଶ୍ରୀ ଜନସଭାକୁ କହିଥିଲେ।

ଲେଖାଶ୍ରୀ ବର୍ତ୍ତମାନ ବାଲେଶ୍ବର ଲୋକସଭା ଆସନ ପାଇଁ ପ୍ରଚାର ଜୋରଦାର କରିଛନ୍ତି। ସେମାନଙ୍କୁ ଧିରେ ଧିରେ ବିଜେଡି କର୍ମି ଆଦରି ନେବାରେ ଲାଗିଛନ୍ତି। ଆଗକୁ ସେ ଏହି ପ୍ରଚାରକୁ ଆହୁରି ତୀବ୍ର କରିବେ ବୋଲି ଜଣାପଡିଛି। ଏପରିକି ତାଙ୍କ ପାଇଁ ପ୍ରଚାର କରିବାକୁ ଭୁବନେଶ୍ବରରୁ ପ୍ରମୁଖ ନେତାମାନେ ଯିବେ ବୋଲି ବିଜେଡି ରଣନୀତି ତିଆରି କରୁଛି।

ଭୁବନେଶ୍ବର: ପଶ୍ଚିମ ଓଡିଶା ନିର୍ବାଚନୀ ଯୁଦ୍ଧ କ୍ଷେତ୍ରରେ ବିଜୁ ଜନତା ଦଳ ଏଥର ନିଜର ସେନାପତିଙ୍କୁ ଅବତୀର୍ଣ୍ଣ କରିଛି। ସେଠାରେ ସେ କେବଳ ଗଡ ବିଜୟ କରିବେ ନାହିଁ, ନିଜେ ବିଜୟୀ ହେବା ସହିତ ବିଜେପି ଗଡକୁ ଧୂଳିସାତ କରିବାକୁ ବ୍ୟୁହ ରଚନା କରିବେ।

ବିଜେଡିର ଏହି ସେନାପତି ହେଲେ ଦଳର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ। ଗୋଟିଏ ରାଜନୈତିକ ପରିବାରରୁ ଆସିଥିବା ବିଜେଡିର ଏହି ଚାଣକ୍ୟ ଯାଜପୁର ଆସନରୁ ବିଧାୟକଭାବେ ନିର୍ବାଚିତ ହେବା ସହିତ ରାଜ୍ୟ ମନ୍ତ୍ରୀମଣ୍ଡଳରେ ସ୍ଥାନ ପାଇଥିଲେ। ବର୍ତ୍ତମାନର ଦଳର ରଣନୀତି ନିର୍ଦ୍ଧାରଣ ଓ ପରିଚାଳନାଭାର ତାଙ୍କ କାନ୍ଧରେ।

ତେବେ ଉପକୂଳ ଓଡିଶାର ଏହି ନେତାଙ୍କୁ ଚଳିତ ନିର୍ବାଚନରେ ବିଜେଡି ପଶ୍ଚିମ ଓଡିଶାର ଗଡ ସମ୍ଭାଳିବାକୁ ପଠାଇଛି । ସେ ଏଥର ସମ୍ବଲପୁର ଲୋକସଭା ପାଇଁ ଦଳୀୟ ପ୍ରାର୍ଥୀ ହୋଇଛନ୍ତି। ତାଙ୍କର ସିଧାସଳଖ ଲଢେଇ ହେବ ବିଜେପିର ଜାତୀୟ ଚେହେରା ତଥା କେନ୍ଦ୍ରମନ୍ତ୍ରୀ ଧମେନ୍ଦ୍ର ପ୍ରଧାନଙ୍କ ସହିତ ।

ଛାତ୍ର ରାଜନୀତିରୁ କ୍ୟାରିଅର ଆରମ୍ଭ କରିଥିବା ଧର୍ମେନ୍ଦ୍ର ଏବେ ଜାତୀୟ ସ୍ତରରେ ଆଗଧାଡିର ରାଜନେତା। ତାଙ୍କୁ ଟକ୍କର ଦେବେ ରାଜ୍ୟରେ ୨୫ବର୍ଷ ଧରି କ୍ଷମତାରେ ଥିବା ବିଜେଡିର ସାଂଗଠନିକ ସମ୍ପାଦକ। ତେଣୁ ସମ୍ବଲପୁରର ରୋଚକ ଲଢେଇକୁ ସମସ୍ତେ ଚାହିଁ ବସିଛନ୍ତି।

ପ୍ରଣବ ପଶ୍ଚିମ ଓଡିଶା ଯିବା ପଛରେ ରହିଛି ତାଙ୍କର ଓ ଦଳର ସୁଚିନ୍ତିତ ରଣନୀତି। କାରଣ ୨୦୧୯ ନିର୍ବାଚନରେ ପଶ୍ଚିମଓଡିଶାର ୫ଟି ଲୋକସଭା ଆସନ ଯଥା ସମ୍ବଲପୁର, ବରଗଡ, ସୁନ୍ଦରଗଡ, ବଲାଙ୍ଗିର ଓ କଳାହାଣ୍ଡିକୁ ବିଜେପି ହାତେଇ ନେଇଥିଲା। କେବଳ ବରଗଡକୁ ବାଦ୍‍ଦେଲେ ଅନ୍ୟ ୪ଟି ଲୋକସଭା ନିର୍ବାଚନମଣ୍ଡଳୀ ଅର୍ନ୍ତଗତ କେତେକ ବିଧାନସଭା କ୍ଷେତ୍ରରେ ବିଜେପିର ବିଧାୟକ ଜିଣିଥିଲେ।

ଏହି ୫ଟି ଆସନକୁ ବାଦ୍‍ ଦେଲେ ମୟୁରଭଞ୍ଜ, ବାଲେଶ୍ୱର ଓ ଭୁବନେଶ୍ୱର ଆସନ ମଧ୍ୟ ବିଜେପି ଦଖଲ କରିଥିଲା । ତେବେ ବିଜେଡିର ସଫଳ ଗୋଟିଚାଳନା ଯୋଗଁ ବିଜେପି ଉପକୂଳରେ ପଶ୍ଚିମଓଡିଶା ଭଳି ଫଳାଫଳ କରିପାରିନଥିଲା।

ଖୋଦ ସାଂଗଠନିକ ସମ୍ପାଦକ ଏଥର ସମ୍ବଲପୁରରେ ଲଢିବା ଫଳରେ ସେ ଗୋଟିଏ ତୀରରେ ଏକାଧିକ ଶିକାର କରିବେ ବୋଲି ଆଶା କରାଯାଉଛି। ପ୍ରଥମତଃ ବିଜେଡି ଶିବିର ଅଧିକ ଚଳଚଞ୍ଚଳ ହୋଇ ଲଢିବ। ଦ୍ୱିତୀୟରେ ନିର୍ବାଚନୀ ରଣନୀତିରେ ଓସ୍ତାଦ କୁହାଯାଉଥିବା ଧର୍ମେନ୍ଦ୍ରଙ୍କୁ ସମ୍ବଲପୁରରେ ପ୍ରଣବ ରୋକି ପାରିବେ।

କାରଣ ଧର୍ମେନ୍ଦ୍ର ସମ୍ବଲପୁରରେ ପ୍ରାର୍ଥୀ ହେବା ପରେ ବିଜେପି ପଶ୍ଚିମ ଓଡିଶାର ଅନ୍ୟ ଲୋକସଭା ଓ ଏହା ଅର୍ନ୍ତଗତ ବିଧାନସଭା କ୍ଷେତ୍ରରେ ଭଲ ପ୍ରଦର୍ଶନ କରିବ ବୋଲି ଆଶା ରଖିଛି । ଏଥି ସହିତ ଧର୍ମେନ୍ଦ୍ର ରାଜ୍ୟର ବିଭିନ୍ନ ସ୍ଥାନରେ ପ୍ରଚାର କରିବେ। କିନ୍ତୁ ବିଜେଡିର ସେନାପତି ମଇଦାନକୁ ଓହ୍ଲାଇବା ପରେ ଚିତ୍ର ଧିରେ ଧିରେ ବଦଳିବାରେ ଲାଗିଛି ।

ସମ୍ବଲପୁର ଜିଲ୍ଲା ଦାୟିତ୍ୱରେ ଦୀର୍ଘଦିନ ଧରି ପ୍ରଣବ ରହିଥିବାବେଳେ ଜିଲ୍ଲାରେ ଅନେକ ଉନ୍ନୟନ ଓ ରୂପାନ୍ତରଣ କାର୍ଯ୍ୟ ହାତକୁ ନେଇ ପ୍ରତ୍ୟେକ୍ଷ ଭାବେ ଜିଲ୍ଲା ରାଜନୀତି ସହିତ ଜଡିତ ହୋଇଛନ୍ତି। ଫଳରେ ବିଜେଡିର ଏହି ସେନାପତି ଏବେ ସମ୍ବଲପୁରରେ ରହି ସମଗ୍ର ପଶ୍ଚିମଓଡିଶାକୁ ପ୍ରଭାବିତ କରିବେ। ଉପକୂଳ ଓଡିଶାରେ ବିଜେଡିର ପ୍ରଭାବ ଭଲ ରହିଥିବା ଏବଂ ପ୍ରଣବଙ୍କର ଜନସମ୍ପର୍କ ଭଲ ଥିବାରୁ ଉପକୂଳରେ ଅଳ୍ପ ସମୟ ଦେଇ ପୂର୍ବଭଳି ଦଳକୁ ସଫଳ କରାଇ ପାରିବେ ବୋଲି ବିଜେଡି ଆଶା ରଖିଛି।

ତେବେ ପଶ୍ଚିମଓଡିଶାରେ ଲୋକସଭା ମଇଦାନକୁ ବିଜେପି ତାହାର ଜଣେ କେନ୍ଦ୍ରମନ୍ତ୍ରୀ, ଜଣେ ପୂର୍ବତନ କେନ୍ଦ୍ରମନ୍ତ୍ରୀଙ୍କ ସମେତ ଦୁଇ ଜଣ ରାଣୀ ଓ ପୂର୍ବତନ ବିଧାୟକଙ୍କୁ ମଇଦାନକୁ ଓହ୍ଲାଇ ଥିବାରୁ ବିଜେଡିର ସେନାପତି ସେମାନଙ୍କୁ ମାତ୍‍ ଦେବାପାଇଁ କେଉଁ ରଣନୀତି ଆପଣେଇବେ ତାହା ଉପରେ ଏବେ ସମସ୍ତଙ୍କ ନଜର।

ଉଲ୍ଲେଖନୀୟ ଯେ ସୁନ୍ଦରଗଡ ଲୋକସଭା ଆସନରେ ପୂର୍ବତନ କେନ୍ଦ୍ରମନ୍ତ୍ରୀ ଜୁଏଲ ଓରାମ ପ୍ରାର୍ଥୀ ହୋଇଥିବାବେଳେ ବଲାଙ୍ଗିରରେ ରାଣୀ ସଙ୍ଗୀତା କୁମାରରୀ ସିଂହଦେଓ ଓ କଳାହାଣ୍ଡିରେ ରାଣୀ ମାଳବିକା କେଶରୀ ଦେଓ ଏବଂ ବରଗଡରେ ପୂର୍ବତନ ବିଧାୟିକ ପ୍ରଦୀପ ପୁରୋହିତଙ୍କୁ ବିଜେପି ପ୍ରାର୍ଥୀ କରିଛି। ଏମାନଙ୍କୁ ବିଜେଡିର ଏହି ସେନାପତି ପରାସ୍ତ କରିବା ସହିତ କିଭଳି ବିଜେଡିର ବିଜୟବାନା ଉଡାଉଛନ୍ତି ତାହା ଉପରେ ଏବେ ସମଗ୍ର ରାଜ୍ୟବାସୀଙ୍କ ନଜର।

ଭୁବନେଶ୍ବର: ରାଉରକେଲା ରାଜନୀତି ଏବେ କଡ଼ ଲେଉଟାଇଛି। ଗୁମସୁମ ଥିବା ଦିଲ୍ଲୀପ ରାୟ ହଠାତ ଚଳଚଞ୍ଚଳ ହୋଇଯାଇଛନ୍ତି। ୨୦୧୯ ଭଳି ଚବିଶରେ ବି ନିର୍ବାଚନୀ କାଦୁଅରେ ଘାଣ୍ଟି ହେବାକୁ ଦିଲ୍ଲୀପ ଚାହୁଁ ନ ଥିଲେ। ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଅନୁରୋଧକୁ ବି ଏଡ଼ାଇ ଦେଇଥିଲେ। ହେଲେ କେବଳ ଶାରଦା ପ୍ରସାଦ ନାୟକଙ୍କ ପାଇଁ ଏବେ ରାଉରକେଲା ଅଙ୍କ ବଦଳି ଯାଇଛି।

ଇଚ୍ଛା ନ ଥିଲେବି କର୍ମୀଙ୍କ ଚାପରେ ମଇଦାନକୁ ଓହ୍ଲାଇବା ପାଇଁ ସଜବାଜ ହେଉଛନ୍ତି ଦିଲ୍ଲୀପ। ଶାରଦା ବିରୋଧୀମାନେ ଏବେ ତାଙ୍କ ସହ ହାତ ମିଳାଇଥିବାବେଳେ ଏଥର ଜବରଦସ୍ତ ଲଢ଼େଇ ହେବା ନିଶ୍ଚିତ ହୋଇଯାଇଛି।

ଦିଲ୍ଲୀ ହାଇକୋର୍ଟରୁ ଆଶ୍ୱସ୍ତ ହେବା ପରେ ଦିଲ୍ଲୀପଙ୍କୁ ନେଇ ରାଜ୍ୟ ରାଜନୀତିରେ ଚହଳ ସୃଷ୍ଟିହୋଇଛି। ସେ ବିଧାନସଭା ନିର୍ବାଚନ ଲଢ଼ିବା ପାଇଁ ହାଇକୋର୍ଟଙ୍କୁ କହିଥିବାରୁ ସେ କେଉଁ ଦଳରୁ ଲଢ଼ିବେ ତାହାକୁ ନେଇ ବି ଅଙ୍କକଷା ଆରମ୍ଭ ହୋଇଯାଇଛି। ଦିଲ୍ଲୀପ ପୂର୍ବରୁ ବିଜେପି ଛାଡ଼ିଥିବାବେଳେ ୨୦୧୯ ନିର୍ବାଚନବେଳେ ନବୀନ ନିବାସରେ ନବୀନଙ୍କ ସହ କଥା ହୋଇଥିଲେ।

ବିଜୟ ଏବେ ପରୋକ୍ଷରେ ବିଜେଡିରେ ଥିବାରୁ ଦିଲ୍ଲୀପ ବି ସେହି ରାସ୍ତାରେ ଫେରିପାରନ୍ତି ବୋଲି କୁହାଯାଉଥିଲା। ତେବେ ଟାଣୁଆ ବିଜେପି ନେତା ଜୁଏଲ ଓରାମ୍‌ ଏନେଇ ବଡ଼ ମନ୍ତବ୍ୟ ଦେଇଛନ୍ତି। ଦିଲ୍ଲୀପଙ୍କ ଟିକେଟ ବିଜେପି ଫାଇନାଲ କରିସାରିଛି। ସେ ରାଉରକେଲାରୁ ଲଢ଼ିବେ ବୋଲି ଜୁଏଲ କହିଛନ୍ତି।

ଏସବୁ ରାଜନୀତିକ ଚର୍ଚ୍ଚା ଭିତରେ ନିର୍ବାଚନ ଲଢ଼ିବାକୁ ଆଗ୍ରହୀ ନ ଥିବା ଦିଲ୍ଲୀପ କାହିଁକି ମଇଦାନକୁ ଆସିଲେ ତାହାକୁ ନେଇ ଚର୍ଚ୍ଚା ହେବା ସ୍ୱାଭାବିକ। ତେବେ ଦିଲ୍ଲୀପଙ୍କ ଅଳିନ୍ଦରେ ହେଉଥିବା ଚର୍ଚ୍ଚା ଅନୁଯାୟୀ, ଦିଲ୍ଲୀପଙ୍କ ଟାର୍ଗେଟ ହେଉଛନ୍ତି ଶାରଦା।

ଯଦି ବିଜେଡି ଶାରଦାଙ୍କୁ ଟିକେଟ ଦେଇନଥାନ୍ତା ତେବେ ଦିଲ୍ଲୀପ ନିର୍ବାଚନୀ ମଇଦାନକୁ ଆଦୌ ଓହ୍ଲାଇନଥାନ୍ତେ। ଶାରଦାଙ୍କୁ ରାଉରକେଲା ରାଜନୀତିରୁ ହଟାଇବା ପାଇଁ ଦିଲ୍ଲୀପଙ୍କ ସମର୍ଥକମାନେ ସଂକଳ୍ପ ନେଇଛନ୍ତି। ସେଥିପାଇଁ ଶାରଦା ବଧ ନିମନ୍ତେ ଦିଲ୍ଲୀପ ମଇଦାନକୁ ଓହ୍ଲାଇବେ ବୋଲି ତାଙ୍କର ସମର୍ଥକମାନେ ମତବ୍ୟକ୍ତ କରିଛନ୍ତି।