ସିିଙ୍ଗାପୁର ଓପନ ବ୍ୟାଡମିଣ୍ଟନ୍ ଟୁର୍ଣ୍ଣାମେଣ୍ଟର ପ୍ରଥମ ରାଉଣ୍ଡରେ ସହଜ ବିଜୟ ହାସଲ କରିଛନ୍ତି ଦୁଇ ଭାରତୀୟ ସୁପରଷ୍ଟାର ପିଭି ସିନ୍ଧୁ ଏବଂ ସାଇନା ନେହ୍ବାଲ। ପ୍ରଥମେ ମୁକାବିଲାରେ ଅବତୀର୍ଣ୍ଣ ହୋଇଥିବା ସିନ୍ଧୁଙ୍କ ମୁକାବିଲା ସମ୍ପୂର୍ଣ୍ଣ ଏକପାଖିଆ ରହିଥିଲା। ସିନ୍ଧୁ ମାତ୍ର ୨୭ ମିନିଟ୍ ସମୟ ନେଇ ବିପକ୍ଷ ଖେଳାଳି ଲିଆନ୍ନି ଆଲେସିାନ୍ଦ୍ରା ମାନିଆକିଙ୍କୁ ପରାସ୍ତ କରିଥିଲେ। ସିନ୍ଧୁ ସିଧାସଳଖ ମୁକାବିଲାରେ ୨୧-୯ ଏବଂ ୨୧-୭ ସେଟ୍ରେ ବିଜୟୀ ହୋଇଥିଲେ। ଅନ୍ୟତମ ଭାରତୀୟ ଖେଳାଳି ସାଇନା ନେହ୍ବାଲ ୨୧-୧୬ ଏବଂ ୨୧-୧୧ ର ସିଧାସଳଖ ସେଟ୍ରେ ଇଣ୍ଡୋନେସିଆର ୟୁଲିଆ ଯୋଶେଫିନ୍ ସୁଶାନ୍ତୋଙ୍କୁ ପରାସ୍ତ କରିଥିଲେ। ସିନ୍ଧୁ ଦ୍ବିତୀୟ ରାଉଣ୍ଡରେ ଡେନ୍ମାର୍କର ମିଆ ବ୍ଲିଚ୍ଫେଲ୍ଡଙ୍କୁ ଭେଟିବେ। ଅପରପକ୍ଷରେ ସାଇନା ମୁଗ୍ଧା ଆଗ୍ରେ ଏବଂ ପର୍ପୋନାଓ୍ବି ଚୋଚୁଓ୍ବାଙ୍ଗଙ୍କ ମୁକାବିଲାରେ ବିଜୟୀ ଖେଳାଳିଙ୍କୁ ଭେଟିବେ। ମିକ୍ସଡ୍ ଡବଲ୍ସରେ ପ୍ରଣବ ଜେରୀ ଚୋପ୍ରା ଏବଂ ଏନ୍ ସିକ୍କି ରେଡ୍ଡୀ ଅର୍ଜୁନ ଏମ୍ଆର ଏବଂ କେ ମନୀଷାଙ୍କୁୂ ୨୧-୧୮ ଏବଂ ୨୧-୭ ସେଟ୍ରେ ପରାସ୍ତ କରି ଦ୍ବିତୀୟ ରାଉଣ୍ଡରେ ପ୍ରବେଶ କରିଛନ୍ତି। ପୁରୁଷ ଡବଲ୍ସରେ ମନୁ ଅତ୍ରି ଏବଂ ବି ସୁମିତ୍ ରେଡ୍ଡୀଙ୍କ ଯୋଡି ସ୍ଥାନୀୟ ଖେଳାଳି ଡ୍ୟାନି ବାଓ୍ବା କ୍ରିଷ୍ଟିଆନ୍ ଏବଂ କିନ୍ ହିନ୍ଙ୍କ ଯୋଡି ନିକଟରୁ ୧୩-୨୧ ଏବଂ ୧୭-୨୧ରେ ପରାଜିତ ହୋଇଥିଲେ।
( ମୋବାଇଲରେ ଫଟାଫଟ ଖବର ଜାଣିବା ପାଇଁ ପ୍ଲେ ଷ୍ଟୋରରୁ ଡାଉନଲୋଡ କରନ୍ତୁ sankhipta , ଡାଉନଲୋଡ ପରେ ଟିପରେ ସ୍କ୍ରିନକୁ ତଳୁ ଉପରକୁ ଘଷି ପଢିଚାଲନ୍ତୁ ଖବର ପରେ ଖବର )