Tag: ଚିଲିକା ନିର୍ବାଚନ ମଣ୍ଡଳି

ଭୁବନେଶ୍ବର: ବିଧାୟକ ପ୍ରଶାନ୍ତ ଜଗଦ୍ଦେବ ଏବେ ତାଙ୍କ ଚିଲିକା ନିର୍ବାଚନ ମଣ୍ଡଳୀକୁ ପ୍ରବେଶ କରିବେ। ସେଥିପାଇଁ ଆୟୋଜନ ହୋଇଛି ଏକ ବିରାଟ କାର୍ଯ୍ୟକ୍ରମ। କୋର୍ଟ କଟକଣା କରିଥିବାରୁ ସେ ଦୀର୍ଘ ମାସ ଧରି ଚିଲିକା ଯାଇପାରି ନାହାଁନ୍ତି। ଏବେ ଏହି କଟକଣା ଚଳିତ ଜୁଲାଇ ୨୪ ତାରିଖର ଶେଷ ହେଉଛି।

ସେଥିପାଇଁ ବିଧାୟକ ପ୍ରଶାନ୍ତ ଜଗଦ୍ଦେବ ଜୁଲାଇ ୨୮ ତାରିଖରେ ଚିଲିକା ନିର୍ବାଚନ ମଣ୍ଡଳିରେ ପ୍ରବେଶ କରିବେ। ସେଦିନ ବିଧାୟକଙ୍କୁ ପ୍ରାୟ ୫ ହଜାର ମୋଟରସାଇକଲେ ଶୋଭାଯାତ୍ରାରେ ନିଆଯିବ। ଏଥିସହିତ ପାଇକମାନଙ୍କ ଦ୍ବାରା ଏକ ବଡ ପାଇକ ଶୋଭାଯାତ୍ରାର ମଧ୍ୟ ଆୟୋଜନ କରାଯାଇଛି।

ଏହି ଶୋଭାଯାତ୍ରା ୨୮ ତାରିଖ ଶୁକ୍ରବାର ଦିନ ହେବ। ସେଦିନ ଏହି ଶୋଭାଯାତ୍ରା ବାଲୁଗାଁର ଐତିହାସିକ ମାମୁଁଭଣଜା ପାହାଡରୁ ଆରମ୍ଭ ହୋଇ ବାଣପୁରର ଐତିହାସିକ ପଲଟନ ପଡିଆରେ ଶେଷ ହେବ।

ତେବେ ଏହି ବିରାଟ ପଟୁଆରର ଆୟୋଜନ କରିଛି ଏକ ପାଇକ ମହାସଂଘ। ସେଦିନ ସଂଘର କର୍ମକର୍ତ୍ତାମାନେ ପାଇକ ବେଶରେ ପାଇକ ଆଖଡା କରି ପ୍ରଶାନ୍ତଙ୍କୁ ଶୋଭାଯାତ୍ରାରେ ନେବେ।

ବାଣପୁର ପଲଟନ ପଡିଆରେ ଶୋଭାଯାତ୍ରା ଶେଷ ହେବା ପରେ ସେଠାରେ ଏକ ପାଇକ ଆଖଡାର ଆୟୋଜନ ମଧ୍ୟ ହେବ। ଏଥିସହିତ ସେଠାରେ ସ୍ବାଗତ ସମ୍ବର୍ଦ୍ଧନା ସଭାର ମଧ୍ୟ ଆୟୋଜନ କରାଯିବ। ଏହି ଶୋଭାଯାତ୍ରା ସଭାରେ ପ୍ରଶାନ୍ତଙ୍କର ହଜାର ହଜାର ସମର୍ଥକ ମଧ୍ୟ ସାମିଲ ହେବେ।

ନିଜ ନିର୍ବାଚନ ମଣ୍ଡଳୀରେ ପ୍ରଶାନ୍ତଙ୍କ ଦୀର୍ଘ ଦିନର ଅନୁପସ୍ଥିତ ଯୋଗୁଁ ସେଠାକାର ରାଜନୀତି ମଧ୍ୟ ଗୋଳିଆ ହୋଇ ଯାଇଛି। ନାଉରୀ ନ ଥାଇ ଚିଲିକାରେ ଡଙ୍ଗା ଚଳାଇବା ପରି ଅବସ୍ଥା ହୋଇପଡିଛି। କର୍ମିମାନେ କଣ କରିବେ, କାହାକୁ ଗୁହାରୀ କରିବେ ସେ ନେଇ ବହୁ ଅସୁବିଧାର ସମ୍ମୁଖୀନ ହେଉଛନ୍ତି।

ଅନ୍ୟପକ୍ଷରେ ପ୍ରଶାନ୍ତଙ୍କ ଦୀର୍ଘ ଅନୁପସ୍ଥିତକୁ ଦେଖି କେତେକ ନେତା ମନେ ମନେ ବିଧାୟକ ପ୍ରାର୍ଥୀ ହେବା ପାଇଁ ସ୍ବପ୍ନ ଦେଖିବାରେ ଲାଗିଛନ୍ତି। ହେଲେ ଜଗଦ୍ଦେବ ପ୍ରବେଶ ପରେ ସେଥିରେ ଭଟ୍ଟା ପଡିବା ସହିତ ଚିଲିକା ରାଜନୀତିର ମୋଡ ବଦଳିଯିବ ବୋଲି ଆଶା କରାଯାଉଛି।

ଭୁବନେଶ୍ବର: ବର୍ତ୍ତମାନ ଚିଲିକା ନିର୍ବାଚନ ମଣ୍ଡଳୀର ସବୁଠାରୁ ବଡ ଚର୍ଚ୍ଚା ହେଉଛି, ଆଗାମୀ ନିର୍ବାଚନରେ ବିଜେଡିରୁ ବିଧାୟକ ପ୍ରାର୍ଥୀ କିଏ ହେବ। କାରଣ ସମସ୍ତେ ଭାବି ନେଇଛନ୍ତି ଯେ, ବିଧାୟକ ପ୍ରଶାନ୍ତ ଜଗଦେବଙ୍କୁ ଆଉ ଟିକେଟ ମିଳିବ ନାହିଁ। ଯେହେତୁ ସେ ବର୍ତ୍ତମାନ ସୁଦ୍ଧା ଦଳରେ ସାମିଲ ହୋଇ ନାହାଁନ୍ତି, ସେଥିପାଇଁ ଏହି ଆଶଙ୍କା ବୃଦ୍ଧି ପାଇବାରେ ଲାଗିଛି।

ଏପରି ପରିସ୍ଥିତିକୁ ଦେଖି କେତେକ ନୂଆ ପୁରୁଣା ନେତା ବର୍ତ୍ତମାନ ବିଧାୟକ ପ୍ରାର୍ଥୀ ହେବେ ବୋଲି ଆଶା ବାନ୍ଧି ବସିଛନ୍ତି। ସେମାନେ ନିଜ ନିଜ ଚିହ୍ନା ପରିଚୟ ମାଧ୍ୟମରେ ଲବି ମଧ୍ୟ କରୁଥିବାର ଜଣାପଡିଛି। ସବୁଠାରୁ ବଡ ଆଶା ଯିଏ ବାନ୍ଧିଛନ୍ତି ସେ ହେଲେ ପୂର୍ବତନ ବିଧାୟକ ରଘୁନାଥ ସାହୁ। ସେ ଟିକେଟ ପାଇବେ ବୋଲି ଗୋଡ ଟେକି ବସିଛନ୍ତି। ସେପଟେ ଏହି ଅଞ୍ଚଳର ମାନସ ମଙ୍ଗରାଜ ଯେ କି ବର୍ତ୍ତମାନ ରାଜ୍ୟସଭା ସାଂସଦ ଅଛନ୍ତି ସେ ମଧ୍ୟ କୁଆଡେ ଚିଲିକାରୁ ଛିଡା ହେବେ ବୋଲି ଚର୍ଚ୍ଚା ଚାଲିଛି।

ତେବେ ଏହି ତାଲିକା ଛୋଟ ନୁହେଁ କିମ୍ବା ଦୁଇ ବା ତିନି ଜଣ ଭିତରେ ମଧ୍ୟ ସୀମିତ ନାହିଁ। ଏହା ତାଲିକା ଲମ୍ବିବାରେ ଲାଗିଛି। ଆଶ୍ଚର୍ଯ୍ୟର କଥା ନିର୍ବାଚନ ସମୟ ଯେତିକି ଯେତିକି ପାଖେଇ ଆସୁଛି ଏହି ଆଶାୟୀ ତାଲିକା ସେତିକି ବଢିବାରେ ଲାଗିଛି। ତେବେ ଚର୍ଚ୍ଚା ଅନୁସାରେ ଚିଲିକାରେ ବର୍ତ୍ତମାନ ଯେଉଁମାନଙ୍କର ନାମ ବେଶୀ ଆଲୋଚନା ହେଉଛି ସେମାନେ ହେଲେ..

1- ପ୍ରଶାନ୍ତ ଜଗଦ୍ଦେବ, ପୁଣି ଥରେ ଟିକେଟ ପାଇ ପାରନ୍ତି

2-ରଘୁନାଥ ସାହୁ, ପୂର୍ବତନ ବିଧାୟକ

3-ଗୋପୀ ମହାରଣା, ଖୋର୍ଦ୍ଧା ଜିଲ୍ଲା ପରିଷଦ ଉପସଭାପତି

4-ମାନସ ମଙ୍ଗରାଜ, ରାଜ୍ୟସଭା ସାଂସଦ

5- ପ୍ରଭାସ ସୁନ୍ଦରାୟ, ଖୋର୍ଦ୍ଧା ଜିଲ୍ଲା ବିଜେଡି ଉପସଭାପତି  ( ସ୍ତ୍ରୀ ଜିଲ୍ଲା ପରିଷଦ ସଦସ୍ୟା)

6- ସ୍ବାଗତିକା ଜଗଦ୍ଦେବ, ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ପତ୍ନୀ

ତେବେ ଏହି ତାଲିକାର କିନ୍ତୁ ଶେଷ ନାହିଁ। ଗତ ପଞ୍ଚାୟତ ଓ ପୌର ନିର୍ବାଚନରେ ଯେଉଁମାନେ ଜିତିଛନ୍ତି ସେମାନଙ୍କ ମଧ୍ୟରୁ ଅର୍ଦ୍ଧାଧିକ ବଡ ଆଶାୟୀ ହୋଇ ରହିଛନ୍ତି। ଏପରିକି ଯେଉଁମାନେ ହାରିଛନ୍ତି ସେମାନଙ୍କର ଆଶା ମଧ୍ୟ ମଉଳି ନାହିଁ। ତେବେ କମ ଚର୍ଚ୍ଚାରେ ଆସୁଥିବା ନାମ ମଧ୍ୟରେ ଯେଉଁମାନେ ଅଛନ୍ତି ସେମାନେ ହେଲେ

1- ମିଟୁ ନାୟକ, ବାଣପୁର ଏନଏସି ଅଧ୍ୟକ୍ଷ

2-ମନୋଜ ପ୍ରଧାନ, ବିଧାୟକ ପ୍ରତିନିଧି ଏବଂ ପୂର୍ବତନ ସରପଞ୍ଚ

3-ଉତ୍ପଳ ପାଇକରାୟ, ପୂର୍ବତନ ଜିଲ୍ଲା ପରିଷଦ ସଦସ୍ୟ

4- ସନ୍ତୋଷ କୁମାର ଦେବ, ପାରିକୂଦ ରାଜା

ଏତିକି ନୁହେଁ ଆହୁରି ଅନେକ ସରପଞ୍ଚ, ଜିଲ୍ଲାପରିଷଦ ସଦସ୍ୟ ଏହି ଆଶାୟୀ ତାଲିକାରେ ଅଛନ୍ତି, ଯାହା ସମସ୍ତଙ୍କ ନାମ ଲେଖିବା ସମ୍ଭବ ନୁହେଁ।

ହେଲେ ସବୁଠାରୁ ଆଶ୍ଚର୍ଯ୍ୟର ଘଟଣା ହେବ ଯେ ଏହି ନିର୍ବାଚିତ ପ୍ରତିନିଧୀମାନଙ୍କ ମଧ୍ୟରୁ ଯଦି କେହି ବିଧାୟକ ଟିକେଟ ପାଏ ତେବେ ଅନ୍ୟମାନେ ଅସନ୍ତୁଷ୍ଠ ହୋଇ ବିରୋଧ କରିବା ନିଶ୍ଚିତ। କାରଣ ଚିଲିକାରେ ବର୍ତ୍ତମାନ ଶୀର୍ଷ ନେତା କେହି ନ ଥିବାରୁ ଏମାନଙ୍କ ମଧ୍ୟରେ ତାଳମେଳ ରହୁ ନାହିଁ। ସମସ୍ତେ ଜଣେ ଜଣେ ବଡ ନେତା ବୋଲି ନିଜକୁ ଭାବୁଛନ୍ତି। ଉପରେ ଉପରେ ସମସ୍ତେ ଭଲ, ହେଲେ ଭିତର ଭିତରେ କିଏ କାହାକୁ ଦେଖିପାରୁ ନାହାଁନ୍ତି।

ତେବେ ଚିଲିକାକୁ ନେଇ ବିଜେଡି ଦଳ ତରଫରୁ ଏ ପର୍ଯ୍ୟନ୍ତ କୌଣସି ସଙ୍କେତ ବା ଆଭାସ ମିଳିପାରି ନାହିଁ। ପ୍ରକୃତରେ କିଏ ଚିଲିକାର ବିଜେଡି ମଙ୍ଗ ଧରିବା ତାହା ଏକ କୁହେଳିକା ଭିତରେ ରହିଛି। ହେଲେ ସବୁବେଳେ ମାଷ୍ଟର ଷ୍ଟ୍ରୋକ ଖେଳୁଥିବା ବିଜେଡି, ଠିକ ନିର୍ବାଚନ ସମୟରେ ଚର୍ଚ୍ଚାରେ ନ ଥିବା ବ୍ୟକ୍ତିଙ୍କୁ ଟିକେଟ ଦେବାର ସମ୍ଭାବନାକୁ ମଧ୍ୟ କେବେ ଏଡାଇ ହେବ ନାହିଁ।

ଭୁବନେଶ୍ବର: ଚିଲିକା ବିଧାୟକ ପ୍ରଶାନ୍ତ ଜଗଦେବଙ୍କୁ ପୁଣିଥରେ ବିଶ୍ବାସକୁ ନେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। କାରଣ ତାଙ୍କୁ ଦଳରୁ ନିଳମ୍ବିତ କରିଥିଲେ ମଧ୍ୟ ପଞ୍ଚାୟତ ନିର୍ବାଚନ ଟିକେଟ ପ୍ରଦାନ କରିବା ପାଇଁ ତାଙ୍କୁ ଦାୟିତ୍ବ ଦେଇଛନ୍ତି। ଏଥିରୁ ସ୍ପଷ୍ଟ ହେଲା ଯେ, ନବୀନଙ୍କ ପୁଣି ଭରସା ଯୋଗ୍ୟ ହୋଇପାରିଛନ୍ତି ବିଧାୟକ ପ୍ରଶାନ୍ତ ଜଗଦେବ।

ବିଜେପିର ଜଣେ କର୍ମିଙ୍କୁ ମାଡମାରିବା ଘଟଣାରେ ନବୀନ ତାଙ୍କୁ ଦଳରୁ ନିଲମ୍ବିତ କରିଛନ୍ତି। ବର୍ତ୍ତମାନ ସୁଦ୍ଧା ତାଙ୍କର ନିଳମ୍ବନ ଆଦେଶ ପ୍ରତ୍ୟାହାର ହୋଇ ନ ଥିବା ବେଳେ ତାଙ୍କ ମନୋନିତ ପ୍ରାର୍ଥୀଙ୍କୁ ବିଜେଡି ଟିକେଟ ଦେଇଛି। ତେବେ ନବୀନଙ୍କ ଦସ୍ତଖତ ଥିବା ଏହି ଟିକେଟ ଜିଲ୍ଲା ପରିଷଦ ପ୍ରାର୍ଥୀ ଓ ପ୍ରାର୍ଥିନୀଙ୍କୁ ସେ ସିଧା ନ ଦେଇ ତାଙ୍କ ଧର୍ମପତ୍ନୀଙ୍କ ମାଧ୍ୟମରେ ପ୍ରଦାନ କରାଇଛନ୍ତି। କାରଣ ହେଲା ଯେ, ସେ ସିଧା ଟିକେଟ ଦେଇଥିଲେ ପ୍ରସଂଗଟି ଭିନ୍ନ ମୋଡ ନେଇ ଥାଆନ୍ତା। ବିରୋଧୀ ଏହାକୁ  ନିର୍ବାଚନ ପ୍ରସଂଗ କରି ତୁମ୍ବି ତୋଫାନ କରିଥାଆନ୍ତେ। ସେଥିପାଇଁ ନବୀନ ନିବାସରୁ ଜଗଦେବଙ୍କୁ କଡା ନିର୍ଦ୍ଦେଶ ଥିଲା ଯେ ତୁମେ ପ୍ରାର୍ଥୀମାନଙ୍କୁ ସିଧା ଟିକେଟ ଦେବ ନାହିଁ।

ବର୍ତ୍ତମାନ ପ୍ରଶାନ୍ତ ଜଗଦେବଙ୍କୁ ନବୀନ ପୁଣି ଦାୟିତ୍ବ ଦେବା ପରେ ତାଙ୍କ ଶିବିରରେ ବେଶ୍ ଉତ୍ସାହ ସୃଷ୍ଟି ହୋଇଛି। କାରଣ ପଞ୍ଚାୟତ ନିର୍ବାଚନ ତାରିଖ ଘୋଷଣା ପୂର୍ବରୁ ଚିଲିକା ବିଜେଡିରେ ଏକ ପ୍ରକାରର ଦୋଦୁଲ୍ୟମାନ ପରିସ୍ଥିତି ଉପୁଜି ଯାଇଥିଲା। ପଞ୍ଚାୟତ ନିର୍ବାଚନ ଲଢେଇରେ କିଏ ବିଜେଡି ମଙ୍ଗ ଧରିବ ତାଙ୍କୁ ନେଇ କର୍ମିମାନେ ସନ୍ଦେହ ମଧ୍ୟରେ ଥିଲେ। ସମସ୍ତେ ଭାବି ନେଇଥିଲେ ଯେ, ପ୍ରଶାନ୍ତଙ୍କ ଉପରୁ ଦଳ ନିଲମ୍ବନ ଆଦେଶ ପ୍ରତ୍ୟାହାର କରିନେବ। ହେଲେ ଶେଷ ମୂହୁର୍ତ୍ତ ପର୍ଯ୍ୟନ୍ତ ବିଜେଡି ତାଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କଲା ନାହିଁ।

ଏପରି ପରିସ୍ଥିତି ଦେଖି ଚିଲିକାର ପୂର୍ବତନ ବିଧାୟକ ତଥା ବିଜେଡି ନେତା ରଘୁନାଥ ସାହୁ ନିଜେ ଭାବି ନେଲେ ଯେ, ନବୀନ ତାଙ୍କୁ ପଞ୍ଚାୟତ ନିର୍ବାଚନ ଦାୟିତ୍ବ ଦେବେ। ସେଥିପାଇଁ ସେ ନବୀନ ନିବାସରୁ କୌଣସି ଆଦେଶ ନ ପାଇ ମଧ୍ୟ ନିର୍ବାଚନ ପ୍ରଚାର ଆରମ୍ଭ କରିଦେଇ ଥିଲେ। ରଘୁ ସାହୁଙ୍କ ଏପରି ସକ୍ରିୟତା ଦେଖି ପ୍ରଶାନ୍ତ ଜଗଦେବଙ୍କ ଶିବିରରେ ଛନକା ପଶିଯାଇ ଥିଲା। ସେମାନେ ଭାବି ନେଲେ ଯେ, ହୁଏତ ବିଜେଡି ପ୍ରଶାନ୍ତ ଜଗଦେବଙ୍କୁ କଣଠୋସା କରି ରଘୁ ସାହୁଙ୍କୁ ଦାୟିତ୍ବ ଦେଇ ଦେବ।

ସେତେବେଳେ ବିଜେଡି କର୍ମିମାନେ ନା ରଘୁ ନା ପ୍ରଶାନ୍ତଙ୍କ ପାଖରେ ରହିବେ କିଛି ନିଷ୍ପତି କରିପାରୁ ନ ଥିଲେ। ଅନ୍ୟପଟେ ପ୍ରଶାନ୍ତ ଜଗଦେବ ମଧ୍ୟ ବାଉଳା ହୋଇଯାଇ ଥିଲେ। କାରଣ ସେ ଭାବିଥିଲେ ଯେ ପଞ୍ଚାୟତ ନିର୍ବାଚନ ପୂର୍ବରୁ ତାଙ୍କ ଉପରୁ ଦଳ ନିଳମ୍ବନ ଆଦେଶ ପ୍ରତ୍ୟାହାର କରିନେବ। ହେଲେ ଶେଷ ପର୍ଯ୍ୟନ୍ତ ତାହା ହୋଇ ପାରିଲା ନାହିଁ। ହେଲେ ନବୀନ ତାଙ୍କୁ ସଂଗଠନ ଦାୟିତ୍ବରୁ ନ ହଟେଇ ପୂର୍ବପରି କାମ କରିବା ପାଇଁ ଭରସା ଦେଲେ। ଯାହାଫଳରେ ପ୍ରଶାନ୍ତଙ୍କ ପାଇଁ ଏହା ଏକ ଆଶ୍ବସ୍ଥି ଆଣି ଦେଇଛି। ସେପଟେ ବିଜେଡି ତାଙ୍କୁ ଗୁରୁତ୍ବ ଦେଉ ନାହିଁ ବୋଲି ଅନୁଭବ କରି ରଘୁ ସାହୁ ହତାସ ହେବାରେ ଲାଗିଛନ୍ତି। ପରବର୍ତ୍ତି ସମୟରେ ସେ କଣ କରିବେ କୌଣସି ନିଷ୍ପତି ନେଇପାରୁ ନାହାଁନ୍ତି।