Tag: ଟାଟା ପାୱାର

ଭୁବନେଶ୍ୱର :  ରାଜ୍ୟରେ ବିଜୁଳି ବିଭ୍ରାଟ ଏବଂ ଶକ୍ତି ବିଭାଗର ବିଫଳତା ପ୍ରତିବାଦରେ ଭାରତୀୟ ଜନତା ପାର୍ଟୀ ତରଫରୁ ଆସନ୍ତା କାଲି ୧୪ ଓ ୧୫ ତାରିଖରେ ସାରା ରାଜ୍ୟରେ ଥିବା ଟାଟା ପାୱାର କାର୍ଯ୍ୟାଳୟ ସମ୍ମୁୁଖରେ ବିକ୍ଷୋଭ ପ୍ରଦର୍ଶନ କରାଯିବ। ଆଜି ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ସାଧାରଣ ସଂପାଦକ ଶ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି।

ରାଜ୍ୟରେ ଅଘୋଷିତ ବିଜୁଳି କାଟ୍ କଣ ପାଇଁ ? ରାଜ୍ୟବାସୀଙ୍କୁ ନିରବିଚ୍ଛନ ଭାବେ ବିଜୁଳି ସେବା ଯୋଗାଇ ଦେବାର ଦାୟିତ୍ୱ ନେଇଥିବା ଟାଟା ପାୱାର ସମସ୍ତ ଚୁକ୍ତି ଓ ନିୟମକୁ ଖିଲାପ କରୁଛି ଏବଂ ଗ୍ରାମାଂଚଳରେ ଦିନକୁ ୪-୫ ଘଂଟାରୁ ଉଦ୍ଧ୍ୱର୍ ଏବଂ ସହରାଂଚଳରେ ଦିନକୁ ୨୦-୨୫ ଥର ଅଘୋଷିତ ପାୱାର କଟ୍ କରୁଛି । ୧୯୯୫ ମସିହାରୁ ରାଜ୍ୟବାସୀଙ୍କ ଟ୍ୟାକ୍ସ ପଇସାରେ ବିଜୁଳି ବିଭାଗର ଭିତିଭୁମିର ଆଧୁନିକୀକରଣ ଆରମ୍ଭ ହୋଇଥିଲା।

ରାଜ୍ୟର ସମସ୍ତ ବିଜୁଳି ଭିତିଭୁମିକୁ ମାଗଣାରେ ସଂପୂର୍ଣ୍ଣ ବ୍ୟବହାର କରି ମଧ୍ୟ ବିଜୁଳି ସେବା ଯୋଗାଇ ଦେବାରେ ଟାଟା ପାୱାର ଫେଲ୍ ମାରିଛି ଏବଂ ରାଜ୍ୟ ସରକାର ଏଥି ପ୍ରତି କର୍ଣ୍ଣପାତ କରୁନାହାନ୍ତି। ରାଜ୍ୟ ସରକାର ଟାଟା ପାୱାର ଉପରୁ ନିଜ ନିୟନ୍ତ୍ରଣ ହରାଇଛନ୍ତି। ଶକ୍ତି ବିଭାଗ ସ୍ଥାଣୁ ପାଲଟିଛି। ବାସ୍ତବରେ ଏଠି କିଏ ସରକାର ଚଲାଉଛି ଏବଂ ଏହି ସରକାରର ମାଲିକ କିଏ ବୋଲି ଶ୍ରୀ ହରିଚନ୍ଦନ ପ୍ରଶ୍ନ କରିଛନ୍ତି।

ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁଙ୍କ ଓଡିଶା ଗସ୍ତ କାର୍ଯ୍ୟକ୍ରମରେ ବିଜୁଳି କଟ୍ ହେବା ଭଳି ଦୁର୍ଭାଗ୍ୟପୂର୍ଣ୍ଣ ସ୍ଥିତି ସୃଷ୍ଟି ହୋଇଛି। ମାତ୍ର ୧୫-୨୦ ମିନିଟ କାଳବୈଶାଖୀରେ ରାଜଧାନୀ ଭୁବନଶ୍ୱେର ସମେତ ଓଡିଶାର ବିଭିନ୍ନ ସ୍ଥାନରେ ୨୪ ଘଂଟା ପର୍ଯ୍ୟନ୍ତ ବିଦ୍ୟୁତ କାଟ୍ ହେଲା। ପାୱାର କଟକୁ ପାୱାର ଟ୍ରିପ୍ ବୋଲି କହି ବିଭାଗୀୟ ମନ୍ତ୍ରୀ ଶ୍ରୀ ପ୍ରତାପ ଦେବ ଟାଟା ପାୱାର ସପକ୍ଷରେ ଯୁକ୍ତି ବାଢିଲେ ଏବଂ ଟାଟା ପାୱାରକୁ ସୁହାଇଲା ଭଳି ମନ୍ତବ୍ୟ ଦେଉଛନ୍ତି ବୋଲି ହରିଚନ୍ଦନ କହିଛନ୍ତି।

ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ଉପସଭାନେତ୍ରୀ ପ୍ରଭାତୀ ପରିଡା, ରାଜ୍ୟ ସାଧାରଣ ସମ୍ପାଦିକା ଡ.ଲେଖାଶ୍ରୀ ସାମନ୍ତସିଂହାର, ରାଜ୍ୟ ଗଣମାଧ୍ୟମ ପ୍ରମୁଖ ଦିଲୀପ ମଲ୍ଲିକ ପ୍ରମୁଖ ଉପସ୍ଥିତ ଥିଲେ।

ଭୁବନେଶ୍ୱର: ଅସହ୍ୟ ଗରମ ଓ ଗୁଳୁଗୁଳି ରାଜ୍ୟବାସୀଙ୍କୁ ଯେତେ କଷ୍ଟ ଦେଇନାହିଁ, ତାହଠୁ ଅଧିକ ନିର୍ଯ୍ୟାତନା ଦେଉଛି ଅଘୋଷିତ ବିଜୁଳି କାଟ୍। ଗ୍ରାମାଂଚଳଠାରୁ ଆରମ୍ଭ କରି ସହରାଂଚଳ ପର୍ଯ୍ୟନ୍ତ ଅଘୋଷିତ ବିଜୁଳି କାଟ୍ କାୟା ବିସ୍ତାର କରିସାରିଛି। ଏଭଳି ସମୟରେ ରାଜ୍ୟ ଶକ୍ତି ବିଭାଗ ମନ୍ତ୍ରୀ ପ୍ରତାପ ଦେବଙ୍କ ଅଯୌକ୍ତିକ ବକ୍ତବ୍ୟ ଓ ଆଚରଣ ସମସ୍ତଙ୍କୁ ଆଚମ୍ବିତ କରିଛି ବୋଲି ବିଜେପି କହିଛି।

ଅଘୋଷିତ ବିଜୁଳି କାଟ୍‌କୁ ନେଇ ରାଜ୍ୟର ମୁଖ୍ୟ ଶାସନ ସଚିବଙ୍କ ଘର ସମେତ ସଚିବାଳୟ, ବିଧାନସଭା, କ୍ୟାପିଟାଲ ହସପିଟାଲ ଅନ୍ଧକାରରେ ଥିବା କାରଣରୁ ତାଙ୍କ ନିଦ ହଜିଯାଇଛି। ଅନ୍ୟ ପଟେ ଓଡିଶାବାସୀଙ୍କୁ ଭ୍ରମିତ କରିବାକୁ ଯାଇ ଶକ୍ତିମନ୍ତ୍ରୀ ଗୋଟିଏ ପରେ ଗୋଟିଏ ଗାଲୁ ମାରିଚାଲିଛନ୍ତି। ରାଜ୍ୟ ସରକାରଙ୍କ ନୁହେଁ ବରଂ ବିତରଣ କଂପାନୀରର ପ୍ରବକ୍ତା ଭାବେ ଶ୍ରୀ ଦେବଙ୍କ ଭୂମିକା ତୁଲାଉଛନ୍ତି ବୋଲି ବିଜେପି କହିଛି। ଓଡିଶା ସରକାରଙ୍କ ବିଦ୍ୟୁତ ବିଭାଗ ସମ୍ବେଦନହୀନ ଏବଂ ଶକ୍ତିମନ୍ତ୍ରୀଙ୍କ ଶକ୍ତିହରଣ ହୋଇଯାଇଛି।

ଆଜି ରାଜ୍ୟ କାର୍ଯ୍ୟାଳୟଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ମୁଖପାତ୍ର ଶ୍ରୀ ସତ୍ୟବ୍ରତ ପଣ୍ଡା କହିଛନ୍ତି ଯେ, ବିଜୁଳି କାଟ୍ କଥା ଆସିଲେ ଶକ୍ତିମନ୍ତ୍ରୀ ଭିତିଭୁମି ଅଭାବକୁ ଆଳ କରି ହାତ ଟେକି ଦେଉଛନ୍ତି। ଶକ୍ତି ବିଭାଗର ସମୀକ୍ଷା ବେଳେ ମୁଖ୍ୟମନ୍ତ୍ରୀ କରୁଛନ୍ତି କଣ ? ଟ୍ରାନ୍ସଫରମର, ଗ୍ରୀଡ, ତାର ଭଳି ଆବାଶ୍ୟକୀୟ ଭିତିଭୁମିର ବିକାଶ ପାଇଁ ଗତ ୧୦ ବର୍ଷ ଭିତରେ ଖର୍ଚ୍ଚ ହୋଇଥିବା ୨୦ ହଜାର କୋଟି ଟଙ୍କା ଗଲା କୁଆଡେ ? ଅନ୍ୟ ପଟେ ଭିତିଭୁମି ପାଇଁ ୨୦ହଜାର କୋଟି ଟଙ୍କା ଦିଆଯାଇଥିବାର କଥା କୁହାଯାଇଥିବା ବେଳେ ଅଧିଗ୍ରହଣ ସମୟରେ ବିତରକ ଟାଟା ପାୱାର ଏହାକୁ ମାତ୍ର ୧୫୦୦ କୋଟି ଟଙ୍କା ଦର୍ଶାଇଥିଲା, ଯାହାକି ଏକ ବଡ ଆର୍ଥୀକ ଚଂଚକତାକୁ ସ୍ପଷ୍ଟ କରିଛି ଏବଂ ଏହାର ତଦନ୍ତ ହେବା ନିହାତି ଆବଶ୍ୟକ।

ସେହିପରି ୨୦୧୬ ମସିହାରେ ଆରମ୍ଭ ହୋଇ ୫ ବର୍ଷ ଭିତରେ ଶେଷ ହେବାକୁ ଥିବା ଭୁତଳ ବିଜୁଳି ତାର ବସାଇବା କାର୍ଯ୍ୟ ୭ ବର୍ଷ ପରେ କାର୍ଯ୍ୟକ୍ଷମ ହୋଇପାରିଲା ନାହିଁ। ଏଥି ପାଇଁ କେବଳ ରାଜଧାନୀ ଭୁବନେଶ୍ୱରରେ ୨୦୦୦ କୋଟି ଟଙ୍କା ଖର୍ଚ୍ଚ ହୋଇସାରିଥିବାବେଳେ ବର୍ତମାନ ସୁଦ୍ଧା କାର୍ଯ୍ୟକ୍ଷମ ହୋଇନପାରିବା ରାଜ୍ୟ ସରକାରଙ୍କ ବିଫଳତା ନୁହେଁ କି ? ସମସ୍ତ ସର୍ତ ଓ ଚୁକ୍ତିକୁ ଖିଲାପ କରି ବେଦାନ୍ତ କଂପାନୀ ବାର୍ଷିକ ୧୨୫୦ କୋଟି ଟଙ୍କାର ବିଜୁଳି ଲୁଟ୍ କରୁଥିବା ଓଇଆରସି କହିବା ପରେ ରାଜ୍ୟ ସରକାରଙ୍କ ଆଉ ଏକ କେଳେଙ୍କାରୀ ସାମ୍ନାକୁ ଆସିଛି । ଓଡିଶାରେ ଉତ୍ପାଦିତ ହେଉଥିବା ବିଜୁଳିକୁ ବାହାର ରାଜ୍ୟରେ କମ୍ ଦରରେ ବିକ୍ରି କରି ଅନ୍ୟ ରାଜ୍ୟମାନଙ୍କଠାରୁ ଆମ ରାଜ୍ୟ ପାଇଁ ଅଧିକ ଦରରେ କିଣାଯିବା ପଛର ରହସ୍ୟ କଣ ବୋଲି ଶ୍ରୀ ପଣ୍ଡା ପ୍ରଶ୍ନ କରିଛନ୍ତି।

ଏପରି ଭିତିଭୁମି ପ୍ରସ୍ତୁତ କରାଯାଉଛି, ଯାହା ଦ୍ୱାରା ଘଂଟା ପ୍ରତି ୩୦୦ କିଲୋମିଟର ବେଗରେ ପବନ ବୋହିଲେ ମଧ୍ୟ ବିଜୁଳି ଖୁଂଟ ପ୍ରବାବିତ ହେବ ନାହିଁ ବୋଲି ୨୦୨୧-୨୨ ବାର୍ଷିକ ରିପୋର୍ଟରେ ଶକ୍ତି ବିଭାଗ ତରଫରୁ ଘୋଷଣା କରାଯାଇଥିଲା। ଦୁର୍ଭାଗ୍ୟର ବିଷୟ ଯେ, ସାମାନ୍ୟ ପବନ ଓ ଝଡବର୍ଷାରେ ବିଜୁଳି ଖୁଂଟ ମାଟିରେ ମିଶିଯାଉଛି। ରାଜ୍ୟବାସିଙ୍କୁ ନିରବିଚ୍ଛନ ବିଜୁଳି ସେବା ଯୋଗାଇ ଦେବୁ କହିବା ପରିବର୍ତେ ଶକ୍ତିମନ୍ତ୍ରୀ ବିଜୁଳି କାଟି ଦେବା କଥା କହିବା ଅତ୍ୟନ୍ତ ଦୁର୍ଭାଗ୍ୟଜନକ। ସାଢେ ୪ କୋଟି ଓଡିଆଙ୍କ ସ୍ୱାର୍ଥ ରକ୍ଷା ପାଇଁ ଦାୟୀତ୍ୱ ମିଳିଥିବାବେଳେ ମନ୍ତ୍ରୀ ଶ୍ରୀ ଦେବ ୫-ଟି ସଚିବଙ୍କ ପାଇଁ ମଂଚ ବାନ୍ଧୁଛନ୍ତି ଓ ହେଲିପ୍ୟାଡ ପ୍ରସ୍ତୁତିର ତଦାରଖ କରୁଛନ୍ତି। କିନ୍ତୁ ଲୋକଙ୍କ ସମସ୍ୟାର ସମାଧାନ ପାଇଁ ଦେଖା ମିଳୁନାହିଁ। ଏହା କେଉଁ ପ୍ରକାରର ଶାସନ ବ୍ୟବସ୍ଥା ?

କାଳବୈାଶାଖୀ, ସାମାନ୍ୟ ଝଡକୁ ମୁକାବିଲା କରିବା ପାଇଁ ପ୍ରସ୍ତୁତ ନଥିବା ରାଜ୍ୟ ସରକାର ପ୍ରାକୃତିକ ବିପର୍ଯ୍ୟୟକୁ ମୁକାବିଲା କରିବା ପାଇଁ କେତେ ପ୍ର୍ରସ୍ତୁତ, ତାହା ସାଧାରଣରେ ଅନୁମେୟ। ରାଜ୍ୟବାସୀଙ୍କୁ ୨୪ ଘଂଟିଆ ନିରବିଚ୍ଛନ ବିଜୁଳି ଯୋଗାଣର ପ୍ରତିଶୃତି କେବଳ ସ୍ଲୋଗାନରେ ସୀମିତ ନକରି ଏହାକୁ ସୁନିଶ୍ଚିତ କରାନ୍ତୁ ରାଜ୍ୟ ସରକାର। ନଚେତ୍ ରାଜ୍ୟବାସୀଙ୍କ ଅସନ୍ତୋଷ ବିରୋଧରେ ବଡ ଆନ୍ଦୋଳନର ସମ୍ମୁଖୀନ ପାଇଁ ପ୍ରସ୍ତୁତ ରୁହନ୍ତୁ ରାଜ୍ୟ ସରକାର ବୋଲି ଶ୍ରୀ ପଣ୍ଡା କହିଛନ୍ତି। ଏହି ଅବସରରେ ରାଜ୍ୟ ମୁଖପାତ୍ର ଠାକୁର ରଣଜିତ୍ ଦାସ ଏବଂ ରାଜେନ୍ଦ୍ର ପଣ୍ଡା ପ୍ରମୁଖ ଉପସ୍ଥିତ ଥିଲେ।