ଭୁବନେଶ୍ବର: ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ ବର୍ତ୍ତମାନ ଖୋର୍ଦ୍ଧା ମୁହାଁ ହେଲେଣି। ନିର୍ବାଚନ ଆଉ ମାସ କେଇଟା ଥିବାରୁ ସେ ନିଜର ଆସନକୁ ସୁଦୃଢ କରିବା ପାଇଁ ଲାଗିପଡିଛନ୍ତି। କୋର୍ଟ ପ୍ରତିବନ୍ଧକ ଯୋଗୁଁ ସେ ଚିଲିକା ଯାଇପାରୁ ନ ଥିବାରୁ ସେଠାକାର ସଂଗଠନ ଦୁର୍ବଳ ହୋଇପଡିଛି। ସେଥିପାଇଁ ସେ ନିଜ ଜନ୍ମସ୍ଥାନ ଖୋର୍ଦ୍ଧାରେ ନିଜର ରାଜନୈତିକ ଭବିଷ୍ୟତ ଦେଖିବା ପାଇଁ ସେଠାରେ ସଂଗଠନ ଆରମ୍ଭ କରିଛନ୍ତି।
ବିଜେଡିରୁ ବହିସ୍କୃତ ହୋଇଥିବାରୁ ସେ ବର୍ତ୍ତମାନ ସିଧା ଦଳୀୟ ରାଜନୀତି କରିପାରିବେ ନାହିଁ। ସେଥିପାଇଁ ସେ ଖୋର୍ଦ୍ଧାରେ ଗଠନ କରିଛନ୍ତି ଦୁଇଟି ଅଣ ରାଜନୈତିକ ସଂଗଠନ। ଗୋଟିଏ ଟାଙ୍ଗୀ ବିକାଶ ପରିଷଦ ଏବଂ ଅନ୍ୟଟି ଖୋର୍ଦ୍ଧା ବିକାଶ ପରିଷଦ। ଏହି ଦୁଇ ସଂଗଠନ ମାଧ୍ୟମରେ ପ୍ରଶାନ୍ତ ଜଗଦ୍ଦେବ ବର୍ତ୍ତମାନ ଖୋର୍ଦ୍ଧା ବିଧାନସଭା ନିର୍ବାଚନ ମଣ୍ଡଳୀରେ ଡେରା ପକାଇଛନ୍ତି। ସେଠାକାର ପୁରୁଣା ବିଜେଡି ନେତା ତଥା ଯୁବକମାନଙ୍କୁ ନେଇ ଅଣରାଜନୈତିକ କାର୍ଯ୍ୟ ଜାରୀ ରଖିଛନ୍ତି।
ନିକଟରେ ସେ ଟାଙ୍ଗୀଠାରେ ଏହି ସଂଗଠନ ମାଧ୍ୟମରେ ଏକ ସଭା କରିଥିଲେ। ସେଠାରେ ତାଙ୍କୁ ବିପୁଳ ସମ୍ବର୍ଦ୍ଧନା ଦିଆଯିବା ସହିତ ଖୋର୍ଦ୍ଧାରୁ ଲଢେଇ କରିବା ପାଇଁ ଦାବୀ କରାଯାଇଥିଲା। ସେହିପରି ଖୋର୍ଦ୍ଧାରେ ସେ ବିଭିନ୍ନ ଉତ୍ସବ ଅନୁଷ୍ଠାନ ଏବଂ କ୍ଲବ ସଂଘ ପ୍ରଭୃତି ଗସ୍ତ କରି ତାଙ୍କର ପୁରୁଣା ସଂଗଠନକୁ ମଜବୁତ କରିବାରେ ଲାଗିଛନ୍ତି। ପୁରା ଖୋର୍ଦ୍ଧାଗଡରେ ଡେରା ପକାଇ ନିଜର ଜାନ ଲଗାଇ ଦେଇଛନ୍ତି ଏହି ପାଇକ ପୁଅ।
ପୂର୍ବରୁ ପ୍ରଶାନ୍ତ ଜଗଦ୍ଦେବ ଖୋର୍ଦ୍ଧା ଜିଲ୍ଲା ପରିଷଦର ସଭାପତି ଥିବା ସହିତ ବିଜେଡିର ଦୁଇଥର ଜିଲ୍ଲା ସଭାପତି ମଧ୍ୟ ହୋଇଛନ୍ତି।ଏପରିକି ସେ ମଧ୍ୟ ଖୋର୍ଦ୍ଧା ଜିଲ୍ଲା ଯୋଜନା ବୋର୍ଡର ଅଧ୍ୟକ୍ଷ ଥିଲେ। ଅନ୍ୟପକ୍ଷରେ ଖୋର୍ଦ୍ଧା ନିର୍ବାଚନ ମଣ୍ଡଳୀର ବଡପୋଖରୀଆ ହେଉଛି ତାଙ୍କର ଜନ୍ନସ୍ଥାନ। ସେହି ନିର୍ବାଚନ ମଣ୍ଡଳୀରୁ ସେ ଛାତ୍ର ନେତା ଭାବେ ନିଜର ରାଜନୈତିକ କ୍ୟାରିୟର ଆରମ୍ଭ କରିଛନ୍ତି। ତେଣୁ ଚିଲିକା ଅପେକ୍ଷା ଖୋର୍ଦ୍ଧା ତାଙ୍କ ପାଇଁ ଉପଯୁକ୍ତ ବୋଲି ଭାବି ସେ ନିଜର କାର୍ଯ୍ୟକ୍ରମ ଆରମ୍ଭ କରିଛନ୍ତି।
ଅନ୍ୟପଟେ ଖୋର୍ଦ୍ଧାର ବିଧାୟକ ଜିତେନ୍ଦ୍ରନାଥ ମିତ୍ର ଆଉ ନିର୍ବାଚନ ଲଢିବେ ନାହିଁ ବୋଲି ଚିନ୍ତା କରିଛନ୍ତି। ସେ ତାଙ୍କ ପୁତ୍ର କିମ୍ବା ପ୍ରଶାନ୍ତ ଜଗଦ୍ଦେବ ପ୍ରାର୍ଥୀ ହୁଅନ୍ତୁ ବୋଲି ଚାହୁଁଛନ୍ତି। ସେଥିପାଇଁ ଖୋର୍ଦ୍ଧାରେ ପ୍ରଶାନ୍ତଙ୍କ ସଂଗଠନ ପାଇଁ ଜିତୁ ମିତ୍ର ପୁରା ରାସ୍ତା ଛାଡି ଦେଇଛନ୍ତି। ଏପରିକି ଉଭୟ ମିଶି ବିଭିନ୍ନ କାର୍ଯ୍ୟକ୍ରମ ଖୋର୍ଦ୍ଧା ଜିଲ୍ଲାରେ ଜାରୀ ରଖିଛନ୍ତି।
ଅନ୍ୟପକ୍ଷରେ ଖୋର୍ଦ୍ଧାର ପୂର୍ବତନ ଏବଂ ବର୍ତ୍ତମାନ ବେଗୁନିଆର ବିଧାୟକ ରାଜେନ୍ଦ୍ର ସାହୁ ମଧ୍ୟ ପୁଣି ଖୋର୍ଦ୍ଧା ଆସିବା ପାଇଁ ଇଚ୍ଛା ପ୍ରକାଶ କରିଛନ୍ତି। ତାଙ୍କୁ ଆଉ ବେଗୁନିଆରେ ମନ ଲାଗୁ ଲାଗୁ ନାହିଁ। ହେଲେ ସେ ଖୋର୍ଦ୍ଧାର ବିଧାୟକ ଥିବା ବେଳେ ତାଙ୍କ ଉପରେ ବହୁ କର୍ମି ଅସନ୍ତୁଷ୍ଠ ଅଛନ୍ତି। ତେଣୁ ସେ ଆସିଲେ ତାଙ୍କ ବିରୋଧରେ ବିଦ୍ରୋହ ହେବାର ସମ୍ଭାବନା ମଧ୍ୟ ରହିଛି। ସେଥିପାଇଁ ରାଜେନ୍ଦ୍ର ସାହୁ ଚିଲିକା ନିର୍ବାଚନ ମଣ୍ଡଳୀ ଆଡେ କୁଆଡେ ମୁହାଁଉଛନ୍ତି ବୋଲି କୁହାଯାଉଛି। ଇତିମଧ୍ୟରେ ସେ ଦଳୀୟ କାର୍ଯ୍ୟକ୍ରମ ନେଇ ଚିଲିକାକୁ ତିନିଥର ଗସ୍ତ କରିସାରିଲେଣି।
ସବୁ ଦୃଷ୍ଟିରୁ ଦେଖିଲେ ପ୍ରଶାନ୍ତ ଜଗଦ୍ଦେବଙ୍କ ପାଇଁ ଖୋର୍ଦ୍ଧା ବେଶ ସୁରକ୍ଷିତ ହୋଇ ଥିଲେ ମଧ୍ୟ ପ୍ରଶ୍ନ ଉଠୁଛି ଯେ ତାଙ୍କୁ ବିଜେଡି ଟିକେଟ ଦେବ କି ନାହିଁ। ପ୍ରଶାନ୍ତ ନିଜେ ମଧ୍ୟ ବିଜେଡି ଟିକେଟ ମିଳିବା ନେଇ ଦ୍ବନ୍ଦରେ ଅଛନ୍ତି। କାରଣ ତାଙ୍କ ଉପରୁ ଦଳ ଏ ପର୍ଯ୍ୟନ୍ତ ବହିସ୍କାର ଆଦେଶ ଉଠାଇ ନାହିଁ। ହେଲେ ତାଙ୍କ ମନ ଏବଂ ରକ୍ତ କିନ୍ତୁ ବିଜେଡି ସାଥୀରେ ରହିଛି। ଦଳରୁ ଦୂରରେ ରହିଥିବାରୁ ସେ ସେଥିପାଇଁ ବିଭିନ୍ନ ଅଣ ରାଜନୈତିକ ସଂଗଠନ କରି ଗାଁକୁ ଗାଁ ବୁଲୁଛନ୍ତି। ନିଜର ପତିୟାରା ଜାହିର କରିବାରେ ଲାଗିଛନ୍ତି।
ୱାର୍ଡ ମେମ୍ବରଙ୍କ ପାଇଁ ଶଗଡଗାଡି, ନିକିତି, କଲମ, ନଡିଆଗଛ ପରି ବିଭିନ୍ନ ଚିହ୍ନ ଜାରୀ କରାଯାଇଛି। ସେହିପରି ସରପଞ୍ଚଙ୍କ ପାଇଁ ଲଣ୍ଠନ, ମହମବତୀ, ନିଶୁଣି, କ୍ୟାମେରା, ପାନିଆଁ ପ୍ରଭଡି ଚିହ୍ନ ପ୍ରଦାନ କରାଯାଇଛି। ସମିତି ସଭ୍ୟଙ୍କ ପାଇଁ କେଟିଲ୍, ଫୁଟବଲ, ବଂଶୀ, ମକା ଏବଂ ଘଣ୍ଟି ପରି ଚିହ୍ନ ପ୍ରଦାନ କରାଯିବ।
