Tag: ବାଣପୁର

ବାଣପୁର: ଆଉ କେତେ ଘଣ୍ଟାର ଅପେକ୍ଷା ମାତ୍ର। ଆସନ୍ତାକାଲି ରାତିରେ ଆରମ୍ଭ ହେବ ଓଡ଼ିଶା ପ୍ରସିଦ୍ଧ ଐତିହାସିକ ବାଣପୁର ପଞ୍ଚୁଦୋଳ। ଏ ବର୍ଷ ଜମିବ ପଞ୍ଚୁଦୋଳ। ଗାଁ ଗଣ୍ଡା ପୁରପଲ୍ଲୀରେ ଘରେ ଘରେ ଜମିଲେଣି କୁଣିଆ। କାହିଁ କେତେ ବାଟରୁ ଆସିଲାଣି ରଂଗ ବେରଙ୍ଗର ପସରା। ରାସ୍ତାଘାଟରେ ବେଲୁନ୍‌ବାଲା ବଜେଇଲେଣି ଫେଁକାଳି। ଝିଅ ଶାଶୁ ଘରକୁ ଦେବା ପାଇଁ କାଠ ପଥର, କୁଲା ବାଉଂଶିଆ, କସାଂ ବାସନ, ଲୁହା ଲହୁରୁଣି, ଛାଞ୍ଚୁଣି, ପହଁରା, ମନୋହରୀରର ମନଲୋଭା ପସରାରେ ପୁରିଗଲାଣି ପଡ଼ିଆ। କୁନା କୁନି ପାଇଁ ଭଳିକି ଭଳି କଣ୍ଢେଇ, ଚକ୍ର ଦୋଳି, ଯାଦୁ ଖେଳ ପ୍ରସ୍ତୁତ ହେଲେଣି ସବୁ। ମଥୁରା କେକ୍ ଠାରୁ ଆରମ୍ଭ କରି କଟକର ଠୁଙ୍କାପରି, ଦହିବରା ଆଳୁ ଦମ୍, ଦୋସା ସାମ୍ବର, ପକଡ଼ି, ଆଳୁଚପ, ଗୁପଚୁପ ସହିତ ଆଇସକ୍ରିମ୍, ସାଲେପୁର ରସଗୋଲା ରମହ ମହବାସ୍ନା ମନ କିଣି ନେଲାଣି।

ଠାକୁର ଠାକୁରାଣିଙ୍କୁ ବୁକୁରେ ଧରିବାକୁ ଝୋଟି ଚିତାରେ ଚିତ୍ରିତ ହେଲାଣି ଦୋଳ ପିଣ୍ଡି। ମନ୍ଦିରମାନଙ୍କରେ ରଂଗ ବେରଙ୍ଗର ମଣ୍ଡଣି, ଆଲୁଅ ଫୁଲମାଳରେ ସଜେଇ ହେଲାଣି ଦୋଳବିମାନ, ଗରୁଡ଼, ହନୁମାନ ବାହାନ। ଯୋଡି ଶଙ୍ଖ, ଘଣ୍ଟ ବାଦ୍ୟ, ବଡ଼ ଢୋଲ, ମହୁରୀ, ସଂକୀର୍ତ୍ତନ, ପାଇକ ଆଖଡ଼ା ଢୋଲ, ଚାଙ୍ଗୁ, ବାଘ, ଘୋଡ଼ାଇ, କେଳା କେଳୁଣୀ, ରଜାରାଣି, ଷଣ୍ଢ ନୃତ୍ୟସବୁ ପଟୁଆରରେ ସାମିଲ ହେବାକୁ ଗାଁଗାଁରେ ଚାଲିଛିପ୍ରସ୍ତୁତି। ତେତିଶି କୋଟି ଦେବାଦେବୀଙ୍କୁ ନିମନ୍ତ୍ରଣ କରିସାରିଲେଣି ସ୍ଥାନାଧିପତି ଶ୍ରୀ ଶ୍ରୀ ଚରଣ ଚକାଦେଓ।

ଜଗତଜନନୀ ମା’ଭଗବତୀଙ୍କୁ ଖଣ୍ଡୁଆ ପାଟ ପତନୀରେ ବନ ଦୁର୍ଗା ବେଶରେ ପିନ୍ଧେଇ ଦେଲେଣୀ କାଠି ନାହାକ। ଅଗଣିତ ଭକ୍ତଙ୍କ ଠେଲା ପେଲା ଖାଇ ଯାତ୍ରାରେ ଦେବା ଦେବୀଙ୍କୁ ଭେଟିବାକୁ ବଢିଲାଣି ମନରେ ଉତ୍କଣ୍ଠ। ହରିବୋଲ ହୁଳହୁଳି ଧୂନୀରେ ପୁରି ଉଠିବ ମେଳଣ ପଡିଆ।ମା’ ଭଗବତୀଙ୍କ ସହିତ ପ୍ରଭୁ ଚନ୍ଦ୍ରଶେଖରଙ୍କ ମହାମିଳନର ମାହେନ୍ଦ୍ର ବେଳାକୁ ଦର୍ଶନ କରି ଅଶେଷ ପୂର୍ଣ୍ୟ ଅର୍ଜନ କରିବାକୁ ଶ୍ରଦ୍ଧାଳୁଙ୍କ ବଢିଲାଣି ଆବେଗ।

ବସନ୍ତ ଋତୁର ଏହି ମହା ମିଳନ ମହୋତ୍ସବ ସମସ୍ତଙ୍କ ମନରେ ଭରିଦେବ ଅଶେଷ ଆନନ୍ଦ। ଚଳିତ ବର୍ଷ ଯାତ୍ରାକୁ ଆକର୍ଷିତ କରିବା ପାଇଁ ସ୍ଥାନୀୟ ବିଧାୟକ ତଥା ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ପଞ୍ଚୁଦୋଳ କମିଟି କୁ ସହଯୋଗର ହାତ ବଢ଼ାଇଛନ୍ତି। ରାଜ୍ୟ ସଂସ୍କୃତି ବିଭାଗ ପକ୍ଷରୁ ଏକାଧିକ ସାଂସ୍କୃତିକ କାର୍ଯ୍ୟକ୍ରମ ହେବାକୁ ଥିବା ବେଳେ ପଡିଆ ଚତୁଃପାର୍ଶ୍ୱରେ ଲାଗିଛି ଏକାଧିକ ଅସ୍ଥାୟୀ ଫ୍ଲଡ ଲାଇଟ। ତତସହିତ ଚଳିତ ବର୍ଷ ଦୋକାନ ବଜାର ଅଧିକ ଦିନ ଖୋଲା ରହିବ ବୋଲି କମିଟି ସୂତ୍ରରୁ ପ୍ରକାଶ।

ବାଣପୁର: ବାଣପୁର ଗୋଦାବରୀଶ ମହାବିଦ୍ୟାଳୟ ଓ ଗୋଦାବରୀଶ ଉଚ୍ଚ ମାଧ୍ୟମିକ ବିଦ୍ୟାଳୟର ଜାତୀୟ ସେବା ଯୋଜନାର ସ୍ବେଚ୍ଛାସେବୀ ମାନଙ୍କ ଦ୍ବାରା ବାଣପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ ଏକ ସଫେଇ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏହି ସଫେଇ କାର୍ଯ୍ୟକ୍ରମ ପୂର୍ବାହ୍ନ ୭ ଘଟିକା ଠାରୁ ଆରମ୍ଭ ହୋଇ ୧୦ ଘଟିକା ପର୍ଯ୍ୟନ୍ତ ଚାଲିଥିଲା।

ଏହି ସଫେଇ କାର୍ଯ୍ୟକ୍ରମ ଶେଷରେ ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତା ସ୍ବେଚ୍ଛାସେବୀ ମାନଙ୍କୁ ଏହିପ୍ରକାର କାର୍ଯ୍ୟକ୍ରମ କରିବା ପାଇଁ ଉତ୍ସାହିତ କରିବା ସହିତ ଅନେକ ସଦୁପଦେଶ ଦେଇ ଶ୍ରେଷ୍ଠ ସ୍ବେଚ୍ଛାସେବୀ ମାନଙ୍କୁ ପୁରସ୍କୃତ କରିଥିଲେ। ଏହି ସଫେଇ କାର୍ଯ୍ୟକ୍ରମ ଟି ସ୍ବାସ୍ଥ୍ୟକେନ୍ଦ୍ରର ଦୁଇ ଅଧିକାରୀ ଅଶୋକ କୁମାର ବେହେରା ଓ ପ୍ରମୋଦ କୁମାର ଦେହୁରୀଙ୍କ ପରାମର୍ଶ କ୍ରମେ ଉଚ୍ଚ ମାଧ୍ୟମିକ ବିଦ୍ୟାଳୟର ଜାତୀୟ ସେବା ଯୋଜନା ଅଧିକାରୀ ଜୟନ୍ତ କୁମାର ବିହାରୀ ଓ ମହାବିଦ୍ୟାଳୟର ଜାତୀୟ ସେବା ଯୋଜନା ଅଧିକାରୀ ଡଃ ଲକ୍ଷ୍ମୀପ୍ରିୟା ପଲାଇଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ପରିଚାଳିତ ହୋଇଥିଲା।

ବାଣପୁର: ଭାରତୀୟ ସାହିତ୍ୟ ଆକାଶର ଏକ ଉଜ୍ବଳ ନକ୍ଷତ୍ର, ସରସ୍ଵତୀ ସମ୍ମାନରେ ସମ୍ମାନୀତ ବିଶିଷ୍ଟ କବି ପଦ୍ମଶ୍ରୀ ରମାକାନ୍ତ ରଥଙ୍କ ବିୟୋଗରେ ବାଣପୁରର ‘ସାହିତ୍ୟସିନ୍ଦୁରା’ ଅନୁଷ୍ଠାନ ତରଫରୁ ପରିଡ଼ା ପାଠାଗାର ପରିସରରେ ଏକ ଶୋକ ସଭା ଅନୁଷ୍ଠିତ ହୋଇଯାଇଛି। ଅନୁଷ୍ଠାନର ଆବାହକ ସାହିତ୍ୟପ୍ରାଣ ଗୋଲକ ପରୀଡ଼ାଙ୍କ ସଭାପତିତ୍ଵରେ ଆୟୋଜିତ ଏହି ସଭାରେ ବରିଷ୍ଠ କବି ପୁରୁଷୋତ୍ତମ ମହାପାତ୍ର , ଚିଲିକା ସାହିତ୍ୟ ସମାଜର ସଭାପତି କବିବାଳମୁକୁନ୍ଦ ଦାସ, କବିଦିଗମ୍ବର ବିଶ୍ୱାଳ, ବରିଷ୍ଟ ନାଗରିକ ସଂଘର ସଭାପତି ଡ଼ଃ ଚିନ୍ତାମଣି ମିଶ୍ର, ସାହିତ୍ୟିକ ହିମାଳୟଶତପଥୀ, କବୟତ୍ରୀସ୍ମୃତି ପଟ୍ଟନାୟକ, ସଂଧ୍ୟାରାଣୀହରିଚନ୍ଦନ ସମେତ ଅନେକ ସାହିତ୍ୟିକ ଉପସ୍ଥିତ ରହି ଦିବଙ୍ଗତ ଆତ୍ମାର ସଦଗତି କାମନା ନିମନ୍ତେ ଦୁଇ ମିନିଟ୍ ନୀରବ ପ୍ରାର୍ଥନା ସହ କବିଙ୍କ ସ୍ମୃତିଚାରଣ କରିଗଭୀର ଶ୍ରଦ୍ଧାଞ୍ଜଳି ଅର୍ପଣ କରିଥିଲ। କବିଙ୍କ କାଳଜୟୀ କବିତା ସଂକଳନ “ଶ୍ରୀରାଧା”, ଚିରକାଳତାଙ୍କୁ ଭାରତର ପ୍ରତ୍ୟେକଙ୍କ ହୃଦୟରେ ଉଦଜୀବିତ କରି ରଖିଥିବ ବୋଲି ମତପ୍ରକାଶ ପାଇଥିଲା।

ବାଣପୁର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମହିଳା ମାନଙ୍କୁ ଉଦ୍ୟୋଗୀ ହେବାସହ ଲକ୍ଷପତି ଦିଦିହେବାର ସୁଯୋଗ ସୃଷ୍ଟି କରୁଛନ୍ତି। ଏହି ଅବସରରେ ବାଣପୁର ବ୍ଲକ ଅନ୍ତର୍ଗତ ନନ୍ଦପୁର ଗ୍ରାମ ପଞ୍ଚାୟତର ଲକ୍ଷପତି ଦିଦି ହେବାର ସୁଯୋଗ ପାଇଥିବା ମା ମାନଙ୍କର ଏକ ସମାବେଶ ଶ୍ରୀରାଜ କଲ୍ୟାଣ ମଣ୍ଡପ ଠାରେ ଅନୁଷ୍ଠିତ ହୋଇଥିଲା। ପଞ୍ଚାୟତ ସଭାନେତ୍ରୀ ସରୋଜିନୀ ପାଳ ଙ୍କ ସଭାପତିତ୍ୱରେ ଅନୁଷ୍ଠିତ ସମାବେଶରେ ମୁଖ୍ୟ ଅତିଥି ଭାବେ ବାଣପୁର ବ୍ଲକ ଅଧକ୍ଷ ଅମରେନ୍ଦ୍ର ରଣସିଂହ, ସମ୍ମାନିତ ଅତିଥି ଭାବେ ନନ୍ଦପୁର ସରପଞ୍ଚ ପୁଷ୍ପମିତ୍ର ଖୁଣ୍ଟିଆ, ଆଇନଯିବି ରାଜ କିଶୋର ପଣ୍ଡା, ସାମ୍ବାଦିକ ଅରୁଣ ପଣ୍ଡା, ଇଣ୍ଡିଆନ ଓଭରସିଜ ବ୍ୟାଙ୍କ ଶାଖା ପରିଚାଳକ ବିମଲେଶ କୁମାର ପାଶ୍ବାନ ଯୋଗ ଦେଇଥିଲେ।

ଅତିଥି ମାନେ କେନ୍ଦ୍ର ଓ ରାଜ୍ୟ ସରକାର ମହିଳା ମାନଙ୍କୁ ଅଗ୍ରାଧିକାର ଦେଇ ସେମାନଙ୍କୁ ସ୍ୱାବଲମ୍ବୀ କରିବାକୁ ଚେଷ୍ଟା ଜାରି ରଖିଥିବା ବେଳେ ପ୍ରତ୍ୟେକ ମହିଳା କିପରି ଲକ୍ଷପତି ହୋଇପାରିବେ ସେ ଦିଗରେ ପରାମର୍ଶ ଦେଇଥିଲେ। ବ୍ୟାଙ୍କରୁ ଋଣ କରି କୃଷି, ଉଦ୍ୟୋଗ ଭଳି କ୍ଷେତ୍ରରେସେହି ଅର୍ଥକୁ ବିନିଯୋଗ କରି ଲାଭବାନ ହେବା ସହ ନିଜ ପରିବାରର ପିଲା ମାନଙ୍କର ଉଚ୍ଚଶିକ୍ଷା ହେଉ କି ଗୃହ ନିର୍ମାଣ ପ୍ରତ୍ୟେକ କ୍ଷେତ୍ରରେ ମହିଳା ମାନଙ୍କର ସହାଭାଗିତା ହେବାକୁ ଅରୁଣ ପଣ୍ଡା କହିଥିଲେ।

ସ୍ୱୟଂ ସହାୟକ ଗୋଷ୍ଠୀର ପ୍ରତ୍ୟେକ ମହିଳା ପ୍ରଧାନମନ୍ତ୍ରୀଙ୍କ ଯୋଜନାକୁ ସାକାର କରିବାକୁ ଉପସ୍ଥିତ ମହିଳା ମାନଙ୍କୁ ଅଧକ୍ଷ ଶ୍ରୀଯୁକ୍ତ ରଣସିଂହ କହିବା ସହ ମା ମାନଙ୍କୁ ମୋ ତରଫରୁ ସମ୍ପୂର୍ଣ୍ଣ ସହଯୋଗ ଜାରି ରହିବ ବୋଲି ମତ ରଖିଥିଲେ। ପଂଚାୟତର ଏମବିକେ, ସମସ୍ତ ସିଆରପି, ବ୍ୟାଙ୍କମିତ୍ରଙ୍କ ସହଯୋଗରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।

ବାଣପୁର: ଏକତା ପରିଷଦ ଟ୍ରଷ୍ଟ ସଂଗଠନ ପକ୍ଷରୁ ବରବରା ଗ୍ରାମପଞ୍ଚାୟତର ଲୋଧଭୂଇଁ ଠାରେ ବିଶ୍ୱ ମହିଳାଦିବସ ପାଳନ କରାଯାଇଛି। ଦୁଇ ପଂଚାୟତର ଏକ ଶହରୁ ଉର୍ଦ୍ଧ୍ଵ ମହିଳା ମୁଖିଆ, ଅଙ୍ଗନବାଡି କର୍ମୀ ଓ କିଶୋରୀ ବାଳିକା ମାନେ ଯୋଗ ଦେଇଥିଲେ। ଏକତା ପରିଷଦ ଟ୍ରଷ୍ଟର ମୁଖ୍ୟ ସନ୍ଧ୍ୟା ଦେବୀ ସଭାପତିତ୍ୱ କରିଥିଲେ। ମାଳତି ଯାନୀ ସଭା ପରିଚାଳନା କରିଥିଲେ।

ମହିଳା ଦିବସରେ ଆଦିବାସୀ ମହିଳାଙ୍କ ସଶକ୍ତି କରଣ, ଶିକ୍ଷା ଓ ବିକାଶ ନେଇ ବିଭିନ୍ନ ସରକାରୀ ଯୋଜନାକୁ କିପରି ସଠିକ ପାଇପାରିବେ ଓ ମହିଳା ସୁରକ୍ଷା ନେଇ ବିଭିନ୍ନ ଆଇନକୁ ଜାଣିବେ ସେସମ୍ପର୍କରେ ଚର୍ଚ୍ଚା ହେବା ସହ କନ୍ୟା ଶିଶୁଙ୍କ ଶିକ୍ଷା ବିକାଶ ପାଇଁ କାମ କରିବାକୁ ସ୍ଥିର କରାଯାଇଥିଲା। ପ୍ରାକୃତିକ ପରିବେଶ ଦିନକୁଦିନ ଅଧିକ ଆସନ୍ତୁଳନ ହେଉଥିବାରୁ ମା ମାନେ ଏକାଠି ହୋଇ ପାଖ ଜଙ୍ଗଲକୁ ସୁରକ୍ଷିତ କରିବାକୁ ମଧ୍ୟ ସ୍ଥିର କରାଗଲା।

ଏକତା ପରିଷଦ ଟ୍ରଷ୍ଟ ପକ୍ଷରୁ ମା ମାନଙ୍କ ଅଧିକାର ଓ ସୁରକ୍ଷା ନେଇ ବିଭିନ୍ନ ଆଇନ ସଚେତନତା କରା ଯାଇଥିଲା। ବିଶେଷକରି ଏ ବର୍ଷ ମହିଳାଦିବସର ଅନୁଚିନ୍ତା ମା ମାନଙ୍କ ବିକାଶ, ଓ ଅଧିକାର ସୁରକ୍ଷା ପାଇଁ କାମ କରିବାକୁ ନିଷ୍ପତି କରାଯାଇଥିଲା। ଏଥିରେ ଟ୍ରଷ୍ଟ ର କର୍ମୀ ଟୁନିଦାସ, ସନ୍ଧ୍ୟା ରାଣୀ ବେହେରା, ଆରତୀ ନାୟକ, ଟିଟୁ ରାଉତ, ରାମେଶ୍ୱର ସାହୁ ଆଦି ସହଯୋଗ କରିଥିଲେ।

ବାଣପୁର: ନନ୍ଦପୁର ପଞ୍ଚାୟତ ପାରିନୁଆଗାଁ ଓ ଭେଷରୀ କେନାଲ ରାସ୍ତା ନରଣଡିହ ଛକରେ ଦୀର୍ଘଦିନ ଧରି ରାସ୍ତା କଡରେ ଏକ କ୍ୟାବିନରେ ମଦ ବିକ୍ରୀ ହେଉଥିବା ବାରମ୍ବାର ଅଭିଯୋଗ ହୋଇ ଆସୁଛି। ସକାଳୁ ରାତି ପର୍ଯ୍ୟନ୍ତ ବିଭିନ୍ନ ଅସାମାଜିକ ଲୋକ ଏଠାକୁ ଆସି ମଦ ପିଅନ୍ତି। ଆଖପାଖ ଗ୍ରାମର ଯୁବକ ମାନେ ସର୍ବଦା ମଦ ପିଇ ଗ୍ରାମରେ ଅଶାନ୍ତି ସୃଷ୍ଟି କରୁଥିବାରୁ ମଦ ବିକ୍ରି କରୁଥିବା ଯୁବକ ବସନ୍ତ ମହାରଣାଙ୍କୁ ବିକ୍ରି ବନ୍ଦ କରିବାକୁ ବାରମ୍ବାର ତାଗିଦ କରିବା ସତ୍ତ୍ୱେ ସେ ନିର୍ଭୟରେ ମଦ ବିକ୍ରି କରି ଚାଲୁଥିଲେ। ବସନ୍ତ ଏବଂ ତାଙ୍କର ବାପା ସୁରେନ୍ଦ୍ର ମହାରଣାଙ୍କୁ ବାଣପୁର ପୋଲିସ ଏବଂ ଅବକାରୀ ବିଭାଗ ମଦ ଜବତ କରି ବିଭିନ୍ନ ସମୟରେ ଜେଲ ପଠାଇ ଥିବାବେଳେ ଜାମିନରେ ଆସି ମଦ ବିକ୍ରି କରିବା ଜାରି ରଖିଛନ୍ତି।

ପଞ୍ଚାୟତର ବିଭିନ୍ନ ଗ୍ରାମବାସୀ ଏହାକୁ ବିରୋଧ କରି ଆଜି ସକାଳୁ ଉକ୍ତ ଜାଗାରେ ଥିବା କ୍ୟାବିନ ଭିତରୁ ଚୋରା ମଦ ଜବତ କରି ନଷ୍ଟ କରିଛନ୍ତି। ଘଟଣା ସ୍ଥଳକୁ ବସନ୍ତ ନ ଆସି ତାଙ୍କର ବାପା ସୁରେନ୍ଦ୍ର ଆସି ଆମେ ଗରିବ ଲୋକ ଏଥିରୁ ପରିବାର ଚଳାଉଛୁ ବୋଲି କହିଥିଲେ। କିନ୍ତୁ ଏଠାରେ ମଦ ବିକ୍ରିକଲେ ପ୍ରତିଦିନ ଏହିପରି ଚଢ଼ାଉ କରି ମଦ ନଷ୍ଟ କରିବୁ ବୋଲି ଯୁବକ ମାନେ ବସନ୍ତଙ୍କୁ ଚେତାବନୀ ଦେଇଥିଲେ।

ଉକ୍ତ ଘଟଣାକୁ ନେଇ ବାଲୁଗାଁ ଅବକାରୀ ଅଧିକାରୀ ସୁଜିତ ମୁଦୁଲିଙ୍କୁ ପଚାରିବାରେ ମୁଁ ଚଢ଼ାଉ କରି ବସନ୍ତଙ୍କ ବାପାଙ୍କୁ ଜେଲ ପଠାଇଥିଲି। ପୁଣି ଯଦି ସେ ବିକ୍ରି କରନ୍ତି, ତାଙ୍କ ଉପରେ ଆଉଥରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ।

ତେବେ ପ୍ରତ୍ୟେକ ଦିନ ଚୋରା ମଦ ବିକ୍ରି କରୁଥିବା ସ୍ଥାନ ଉପରେ ପୋଲିସ ଏବଂ ଅବକାରୀ ବିଭାଗ ଚଢ଼ାଉ ଜାରି ରଖିବାକୁ ସାଧାରଣରେ ଦାବି ହେଉଛି।

ବାଣପୁର: ଆଜି ନୂତନ ଅପରାଧିକ ଆଇନ ଉପରେ ବାଣପୁର ପୋଲିସ ପକ୍ଷରୁ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ସଂସଦରେ ପାରିତ ଭାରତୀୟ ଦଣ୍ଡ ସଂହିତା, ନାଗରିକ ସଂହିତା, ଓ ସାକ୍ଷ୍ୟ ବିଧି ଆଇନ ଲାଗୁ ହେବା ପରିପ୍ରେକ୍ଷୀରେ ବାଣପୁର ଥାନା ପୋଲିସ ପକ୍ଷରୁ ଏକ ସଚେତନତା ଶିବିର ସ୍ଥାନୀୟ ପଲଟନ ପଡିଆସ୍ଥିତ ସହିଦ କୃତିବାସ ଭବନ ଠାରେ ବରିଷ୍ଠ ନାଗରିକ, ସଚେତନ ନାଗରିକ, ପଞ୍ଚାୟତ ସଦସ୍ୟ,ମହିଳା ଓ ବୁଦ୍ଧିଜୀବିମାନଙ୍କୁ ନେଇ ଅନୁଷ୍ଠିତ ହୋଇଯାଇଛି।

ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବାଲୁଗାଁ ଏସଡିପିଓ ସଞ୍ଜୟ କୁମାର ପଟ୍ଟନାୟକ ଯୋଗ ଦେଇଥିବା ବେଳେ ସରକାରୀ ଓକିଲ ଜଳଧର ପ୍ରଧାନ,ତାଲୁକ ସେବା ପ୍ରାଧିକରଣ ସଭ୍ୟ ବିପ୍ଳବ ମୁଦୁଲି,ବାଣପୁର ଆଇଆଇସି ରମେଶ କୁମାର ଦେବତା ପ୍ରମୁଖ ଯୋଗ ଦେଇଥିଲେ। ସାଧାରଣ ନାଗରିକ ମାନେ ଭାରତୀୟ ନ୍ୟାୟ ସଂହିତାର ମୂଳତତ୍ତ୍ୱକୁ ଉପଲବ୍ଧି କରିବା ଉକ୍ତ କାର୍ଯ୍ୟକ୍ରମର ମୂଳ ଲକ୍ଷ ବୋଲି ଏସଡିପିଓ ଶ୍ରୀ ପଟ୍ଟନାୟକ ମତ ରଖିବା ସହ ବରିଷ୍ଠ ନାଗରିକ ଓ ମହିଳା ମାନଙ୍କୁ ନୂତନ ଆଇନ ସମ୍ବନ୍ଧରେ ଅନେକ ତଥ୍ୟ ପ୍ରଦାନ କରିଥିଲେ। ଅତିଥି ମାନେ ସାଧାରଣ ନାଗରିକର ଆଇନ ସମ୍ବନ୍ଧୀୟ ଅଧିକାର ସମ୍ବନ୍ଧରେ ବିସ୍ତୃତଭାବେ ବର୍ଣ୍ଣନା କରିଥିଲେ।

ବରିଷ୍ଠ ଆଇନୀଜୀବୀ ଶ୍ରୀ ପ୍ରଧାନ ଅଭିଯୁକ୍ତକୁ ନ୍ୟାୟାଚିତ ଦଣ୍ଡ ମିଳିବାକୁ ହେଲେ ନ୍ୟାୟାଳୟରେ ସତ୍ୟତା ପରିପ୍ରକାଶ କରିବାକୁ ଉପସ୍ଥିତ ନାଗରିକମାନଙ୍କୁ ପରାମର୍ଶ ଦେଇଥିଲେ। ପୋଲିସ ହେଉଛି ଆପଣ ମାନଙ୍କର ବନ୍ଧୁ। ତେଣୁ ପୋଲିସ ଆଉ ସାଧାରଣ ଜନତାଙ୍କ ମଧ୍ୟରେ ସମ୍ପର୍କ ନିବିଡ଼ ହେଲେ ଲୋକଙ୍କ ମନରୁ ଭୟ ଦୂରହୋଇ ଅଂଚଳରେ ଶାନ୍ତ ବାତାବରଣ ସୃଷ୍ଟି ହେବ ବୋଲି ଆଇଆଇସି ଶ୍ରୀ ଦେବତା ମତବ୍ୟକ୍ତ କରିଥିଲେ।

ବାଣପୁର: ଆଜି ବାଣପୁର ପୋଲିସ ନୀଳାଦ୍ରି ଗ୍ରାମ ପଞ୍ଚାୟତର କାଜୁ ଜଙ୍ଗଲରୁ ଜଣେ ଯୁବକଙ୍କ ମୃତଦେହ ଉଦ୍ଧାର କରି ତଦନ୍ତ ଜାରି ରଖିଛି। ପ୍ରକାଶ ଥାଉକି ଉକ୍ତ ପଞ୍ଚାୟତର ପୁଞ୍ଜିଆମା ଗ୍ରାମର ଭୂପେନ୍ଦ୍ର ପ୍ରଧାନ (୨୨) ଦୋଳଗୋବିନ୍ଦ ପୁର ଗ୍ରାମ କାଜୁ ଜଙ୍ଗଲର ଏକ ଗଛରେ ବେକରେ ଓଢଣୀ ସାହାଯ୍ୟରେ ଝୁଲି ପଡ଼ିଛି। ମୃତକଙ୍କ ଭାଇ ମହେନ୍ଦ୍ର ପ୍ରଧାନ ଥାନାରେ ଲିଖିତ ଅଭିଯୋଗ ପରେ ପୋଲିସ ପହଞ୍ଚି ମୃତଦେହକୁ ଜବତ କରିଛି।

ଅଭିଯୋଗ ମୁତାବକ ମୃତକ ଜଣକ ଦୋଳଗୋବିନ୍ଦପୂର ଗ୍ରାମ କାଜୁ ଫ୍ୟାକ୍ଟ୍ରିରେ ଦିନ ମଜୁରିଆ ଭାବରେ କାମ କରୁଥିବା ବେଳେ ସେହି ଗ୍ରାମର ଜନୈକ ଝିଅକୁ ଭଲ ପାଇ ବସିଥିଲେ। କୌଣସି କାରଣବଶତଃ ଆଜି ଆତ୍ମହତ୍ୟା କରିଥିବା ପରିବାର ଲୋକ ଅଭିଯୋଗ କରିଥିବା ବେଳେ ସାଧାରଣ ଲୋକ ଏହାକୁ ହତ୍ୟା ହୋଇଥିବା ପୋଲିସ ଆଗରେ ଅଭିଯୋଗ କରିଥିଲେ। କିନ୍ତୁ ପୋଲିସ ପହଂଚିବା ପୂର୍ବରୁ ମୃତଦେହକୁ ଗଛରୁ ତଳକୁ ଓହ୍ଲାଇ ଦିଆଯାଇଥିବା ବେଳେ ପାରିପାର୍ଶ୍ଵିକ ସ୍ଥିତିକୁ ଅନୁଧ୍ୟାନ କରି ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖିଛି।

ତେବେ ଶବ ବ୍ୟବଚ୍ଛେଦ ପରେ ପ୍ରକୃତ ସତ୍ୟ ଜଣାପଡିବ ବୋଲି ତଦନ୍ତକାରି ଅଧିକାରୀଣି ଏସଆଇ ଗାୟତ୍ରୀ ଗୋଛାୟତ କହିଛନ୍ତି।

ବାଣପୁର: ବାଣପୁର ତାଲୁକ ଆଇନ ସେବା ସମିତି ପକ୍ଷରୁ ବାଣପୁର ବ୍ଲକ ସଭାଗୃହରେ ଶୁକ୍ରବାର ଦିନ ଅନ୍ତର୍ଜାତୀୟ ମହିଳା ଦିବସ ଅବସରରେ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ସମିତି ଅଧ୍ୟକ୍ଷ ତଥା ବରିଷ୍ଠ ଦେୱାନୀ ବିଚାରପତି ଅମରେଶ ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକ୍ରମରେ ପ୍ରଥମ ଶ୍ରେଣୀ ବିଚାର ବିଭାଗୀୟ ବିଚାରପତି ଇପ୍ସିତା ପ୍ରିୟା ଏକ୍କା, ଫ୍ରଣ୍ଟ ଅଫିସ ରିଟେନର, ଆଇନ ସେବା ସମିତି ସଦସ୍ୟ, ସିଡିପିଓ ଓ ଅଙ୍ଗନବାଡି କର୍ମୀ ମାନେ ଯୋଗଦେଇଥିଲେ।

ଉଭୟ ବିଚାରପତି ଉପସ୍ଥିତ ମହିଳା ମାନଙ୍କୁ ଅନ୍ତର୍ଜାତୀୟ ମହିଳା ଦିବସର ଅଭିନନ୍ଦନ ଜଣାଇବା ସହ ମହିଳା ମାନଙ୍କ ପାଇଁ ଉଦିଷ୍ଟ ବିଭିନ୍ନ ଆଇନ ବିଷୟରେ ସଚେତନ କରାଇଥିଲେ। ସମ୍ପ୍ରତି ସମାଜରେ ମହିଳା ମାନଙ୍କୁ ସମସ୍ତ କ୍ଷେତ୍ରରେ ପ୍ରାଥମିକତା ଦିଆଯାଉଥିବା ବେଳେ ସେମାନଙ୍କ ସୁରକ୍ଷା ପାଇଁ ଏକାଧିକ ଆଇନ ପ୍ରଣୟନ ହୋଇଛି।

ଉକ୍ତ ଆଇନ ସମସ୍ତ ମହିଳା ମାନେ ଜାଣିବା ଦରକାର ଏବଂ ଅଙ୍ଗନବାଡି କର୍ମୀମାନେ ଉକ୍ତ ଆଇନ କୁ ମହିଳା ମାନଙ୍କ ମଧ୍ୟରେ ପହଞ୍ଚାଇବାରେ ବିଶେଷ ସହାୟକ ହେବେ ବୋଲି ଉପସ୍ଥିତ ଅତିଥିମାନେ ମତ ଦେଇଥିଲେ।

ବାଣପୁର: ଆଜି ଖୋର୍ଦ୍ଧା ଜିଲ୍ଲା ବାଣପୁର ତାଲୁକ ଆଇନ ସେବା ସମିତି ପକ୍ଷରୁ ତୁମୁରାପୁଟ ଗ୍ରାମ ପଞ୍ଚାୟତ କାର୍ଯ୍ୟାଳୟରେ ସଡ଼କ ସୁରକ୍ଷା, ଏମଏସିଟି, ଯାନବାହାନ ଅଧିନିୟମ, ବିକଳ୍ପ ବିବାଦ ସମାଧାନ ସୂତ୍ର ଓ ସ୍ଥାୟୀ ଲୋକ ଅଦାଲତ ଆଦି ବିଷୟରେ ଏକ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଉକ୍ତ କାର୍ଯ୍ୟକ୍ରମରେ ତାଲୁକ ଆଇନ ସେବା ସମିତି ଅଧ୍ୟକ୍ଷ ତଥା ବାଣପୁର କୋର୍ଟ ବରିଷ୍ଠ ଦେୱାନୀ ବିଚାରପତି ଅମରେଶ ମହାପାତ୍ର ଅଧ୍ୟକ୍ଷତା କରିଥିବା ବେଳେ, ପ୍ରଥମ ଶ୍ରେଣୀ ବିଚାର ବିଭାଗୀୟ ବିଚାରପତି ଇପ୍ସିତା ପ୍ରିୟା ଏକ୍କା, ସରପଞ୍ଚ ଅକ୍ଷୟ ସେଠି,ଫ୍ରଣ୍ଟ ଅଫିସ ରିଟେନର ଦେବି ସାମନ୍ତରାୟ,ଆଇନ ସେବା ସମିତିର ସଦସ୍ୟ ଆଇନଜୀବୀ ଜଗଦୀଶ ପଟ୍ଟନାୟକ ଓ ବିପ୍ଳବ ମୁଦୁଲି ଉପସ୍ଥିତ ରହି ନିଜର ବକ୍ତବ୍ୟ ରଖିଥିଲେ।

ଏହି ଅବସରରେ ବିଚାରପତି ଶ୍ରୀ ମହାପାତ୍ର ଉପସ୍ଥିତ ଜନସାଧାରଣଙ୍କୁ ସଡ଼କ ସୁରକ୍ଷା,ଏମଏସିଟି,ଯାନବାହାନ ଅଧିନିୟମ,ବିକଳ୍ପ ବିବାଦ ସମାଧାନ ସୂତ୍ର ଓ ସ୍ଥାୟୀ ଲୋକ ଅଦାଲତ ଆଦି ବିଷୟରେ ସଚେତନ କରାଇଥିଲେ। ଏବଂ ଏହାର ବିଭିନ୍ନ ଆଇନଗତ ଦିଗ ବିଷୟରେ ଆଲୋଚନା କରିଥିଲେ। ବିକଳ୍ପ ବିବାଦ ସମାଧାନ ସୂତ୍ର ଓ ସ୍ଥାୟୀ ଲୋକ ଅଦାଲତ ଦ୍ୱାରା ବିଭିନ୍ନ ମାମଲା ଆପୋଷ ସମାଧାନ ହୋଇଥାଏ ଯାହାଦ୍ୱାରା ନାଗରିକ ମାନେ ଅଯଥା କୋର୍ଟରେ ମାମଲରେ ଛନ୍ଦି ନହୋଇ ନ୍ୟାୟ ପାଇଥାନ୍ତି ବୋଲି ବିଚାରପତି କହିଥିଲେ। ଉକ୍ତ କାର୍ଯ୍ୟକ୍ରମରେ ବହୁ ସ୍ଥାନୀୟ ବାସିନ୍ଦା ଯୋଗଦେଇଥିଲେ।

ବାଣପୁର: ବାଣପୁର ପବିତ୍ର ମହାଶିବରାତ୍ରୀ ଉପଲକ୍ଷେ ଗୋଦାବରୀଶ ମହାବିଦ୍ୟାଳୟ ଓ ଗୋଦାବରୀଶ ଉଚ୍ଚ ମାଧ୍ୟମିକ ବିଦ୍ୟାଳୟର ଜାତୀୟ ସେବା ଯୋଜନାର ସ୍ବେଚ୍ଛାସେବୀ ମାନଙ୍କ ଦ୍ବାରା ଏକ ଦିନିକିଆ ଶିବିର ଆୟୋଜନ କରାଯାଇ ବାଟୋଇ ତଥା ଗଛବାଲୁଙ୍କେଶ୍ବର ମନ୍ଦିରକୁ ଆସୁଥିବା ଭକ୍ତଜନମାନଙ୍କୁ ଜଳଛତ୍ର ମାଧ୍ୟମରେ ଜଳ ବଣ୍ଟନ କରାଯାଇଥିଲା। ଏହି ଜଳ ବଣ୍ଟନ କାର୍ଯ୍ୟକ୍ରମ ପୂର୍ବାହ୍ନ ୧୦ ଘଟିକା ଠାରୁ ଆରମ୍ଭ ହୋଇ ସଂନ୍ଧ୍ଯା ୬ ଘଟିକା ପର୍ଯ୍ୟନ୍ତ ଚାଲିଥିଲା।

ଏହି ଦିନିକିଆ ଶିବିର ଟି ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତାଙ୍କ ଦ୍ବାରା ଉଦଘାଟନ ହୋଇଥିଲା। ଏହି ଦିନିକିଆ ଶିବିର ଟି ଗୋଦାବରୀଶ ଉଚ୍ଚ ମାଧ୍ୟମିକ ବିଦ୍ୟାଳୟ ର ଜାତୀୟ ସେବା ଯୋଜନା ଅଧିକାରୀ ଶ୍ରୀଯୁକ୍ତ ଜୟନ୍ତ କୁମାର ବିହାରୀଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ପରିଚାଳିତ ହୋଇଥିଲା।

ବାଣପୁର:ଖୋର୍ଦ୍ଧା ଜିଲ୍ଲା ବାଣପୁରର ଆରାଧ୍ୟ ଦେବତା ଶ୍ରୀ ଶ୍ରୀ ଶ୍ରୀ ରଙ୍କନାଥ ଦେବଙ୍କ ପୀଠର ଉନ୍ନତିକରଣ ନିମନ୍ତେ ଗତକାଲି ଭିତ୍ତିପ୍ରସ୍ତର ସ୍ଥାପନ କରିଛନ୍ତି ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ। ଶ୍ରୀ ଶ୍ରୀ ଶ୍ରୀ ରଙ୍କନାଥ ଦେବ ୧୦୮ ହନୁମାନ ଚାଳିଶା ଯଜ୍ଞ କମିଟି ଆନୁକୂଲ୍ୟରେ ମନ୍ଦିର ପରିସରରେ ଜାରି ରହିଥିବା ତିନି ଦିବସୀୟ ପ୍ରବଚନ କାର୍ଯ୍ୟକ୍ରମରେ ଯୋଗଦେଇ ଉକ୍ତ ଉନ୍ନୟନମୂଳକ କାର୍ଯ୍ୟର ଭିତ୍ତିପ୍ରସ୍ତର ସ୍ଥାପନ କରିଛନ୍ତି ମନ୍ତ୍ରୀ ଶ୍ରୀ ହରିଚନ୍ଦନ।

ଏହି ଅବସରରେ ଚିଲିକା ବ୍ଲକ ଅଧ୍ୟକ୍ଷା ଜ୍ୟୋତ୍ସ୍ନା ବେହେରା,ପୂର୍ବତନ ଜିଲ୍ଲା ପରିଷଦ ସଭ୍ୟ ସୁମନ୍ତ ପଟ୍ଟନାୟକ, ସମାଜସେବୀ ନନ୍ଦ କିଶୋର ମିଶ୍ର, ବାଣପୁର ନଗର ମଣ୍ଡଳ କାର୍ଯ୍ୟକାରୀ ସଭାପତି ରବିନାରାୟଣ ମିଶ୍ର, ଶ୍ରୀ ଶ୍ରୀ ଶ୍ରୀ ରଙ୍କନାଥ ଦେବ ୧୦୮ ହନୁମାନ ଚାଳିଶା ଯଜ୍ଞ କମିଟି ସଭାପତି ପବନ କୁମାର ରାମ, ସମ୍ପାଦକ ମନୋଜ କୁମାର ଅଗ୍ରୱାଲ, ବରିଷ୍ଠ ସଭ୍ୟ ରାଧାମୋହନ ଅଗ୍ରୱାଲ, ଗିରିଧାରୀ ପାତ୍ର, ଅଶୋକ ପାତ୍ର, ଦେବଦତ୍ତ ପାତ୍ର, ସଚ୍ଚିଦାନନ୍ଦ ପରିମାଣିକ,ରଙ୍କନାଥ ଦେବ ମନ୍ଦିର କମିଟି ସଭାପତି ଦାଶରଥି ସାହୁ, ସମ୍ପାଦକ ରବି ପ୍ରଧାନ, ବରିଷ୍ଠ ସଭ୍ୟ ଆଇନଜୀବୀ ଶ୍ୟାମ ସୁନ୍ଦର ମିଶ୍ର, ଦେବଦତ୍ତ ପାଣି, ବାଳମୁକୁନ୍ଦ ଦାସ ଏବଂ ଉଭୟ କମିଟିର ସମସ୍ତ ସଭ୍ୟ ଉପସ୍ଥିତ ଥିଲେ। ରଙ୍କନାଥ ଦେବ ପିଠ ପରିସରରେ ଛାତ ନିର୍ମାଣ ଏକ ଜରୁରୀ କାର୍ଯ୍ୟ ହୋଇଥିବା ବେଳେ ଦୀର୍ଘ ବର୍ଷ ହେଲା ଏଥିନିମନ୍ତେ ଉଭୟ କମିଟି ପକ୍ଷରୁ ପ୍ରଚେଷ୍ଟା ଜାରି ରହିଥିଲା।

ତେବେ ନିକଟରେ ୧୦୮ ହନୁମାନ ଚାଳିଶା ଯଜ୍ଞ କମିଟି ପକ୍ଷରୁ ଏ ନେଇ ମାନ୍ୟବର ମନ୍ତ୍ରୀଙ୍କୁ ଅନୁରୋଧ କରାଯାଇଥିବା ବେଳେ, ମନ୍ତ୍ରୀ ତୁରନ୍ତ ଉକ୍ତ ପ୍ରକଳ୍ପକୁ ଅନୁମୋଦନ କରିବା ସହ ଏହାର ଶୁଭ ଦେଇଛନ୍ତି। ଏବଂ ଆସନ୍ତା ରଥଯାତ୍ରା ମଧ୍ୟରେ ଉକ୍ତ କାର୍ଯ୍ୟ ଶେଷ ହେବ ବୋଲି ଉପସ୍ଥିତ ଭକ୍ତମାନଙ୍କୁ ସୂଚନା ଦେଇଥିଲେ। ଯାହାଫଳରେ ଭକ୍ତମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି।

ଏହି ଅବସରରେ ମାନ୍ୟବର ମନ୍ତ୍ରୀଙ୍କୁ ୧୦୮ ହନୁମାନ ଚାଳିଶା ଯଜ୍ଞ କମିଟି ପକ୍ଷରୁ ଉତ୍ତରୀୟ ଓ ମାନପତ୍ର ଦେଇ ସମ୍ମାନିତ କରାଯାଇଥିଲା। ମନ୍ଦିର ଉନ୍ନୟନ ପ୍ରକଳ୍ପ ଅନୁମୋଦନ କରିଥିବାରୁ ମନ୍ତ୍ରୀଙ୍କୁ ସମସ୍ତ ଭକ୍ତମାନେ କୃତଜ୍ଞତା ଜଣାଇଛନ୍ତି।