ବାଲୁଗାଁ: ମରାଳ ମାଳିନୀ ନୀଳାମ୍ବୁ ଚିଲିକା ହେଉଛି ପକ୍ଷୀ ଭୂସ୍ବର୍ଗ। ଏହାର ଆର୍ଦ୍ରଭୂମି ଓ ଅନୁକୂଳ ଜୈବ ବିବିଧତା ଓ ସନ୍ତୁଳିତ ପରିବେଶ ଦ୍ୱାରା ଆକର୍ଷିତ ହୋଇ ପ୍ରତିବର୍ଷ ହଜାର ହଜାର ସଂଖ୍ୟାରେ ବିଶ୍ୱର ବିଭିନ୍ନ ପ୍ରଜାତିର ବିହଙ୍ଗ ଚିଲିକାର ନଳବଣ ଓ଼ ଉପକୂଳରେ ଶୀତ ତଥା ଆଦ୍ୟ ବସନ୍ତ ଅତିବାହିତ କରି ନିଜ ନିଜ ଦେଶକୁ ବାହୁଡ଼ି ଯାଆନ୍ତି। ଏମାନଙ୍କୁ ଦେଖିବା ପାଇଁ ପର୍ଯ୍ୟଟକ ମାନଙ୍କ ଭିଡ଼ ଜମେ। ଏହି ସମୟରେ କତିପୟ ପକ୍ଷୀ ଶିକାରୀ ସକ୍ରିୟ ହୋଇ ନିରୀହ ବିଦେଶୀ ପକ୍ଷୀମାନଙ୍କୁ ବିଭିନ୍ନ ଉପାୟରେ ଶିକାର କରିଥାନ୍ତି।
ଚଳିତ ବର୍ଷ ବାଲୁଗାଁ ମହାବିଦ୍ୟାଳୟର ଜାତୀୟ ସେବା ଯୋଜନା ଓ଼ ଚିଲିକା ବନ୍ୟପ୍ରାଣୀ ବନଖଣ୍ଡର ମିଳିତ ଆୟୋଜନରେ “ପକ୍ଷୀ ବଞ୍ଚାଅ – ଚିଲିକା ବଞ୍ଚାଅ” ଶୀର୍ଷକ ପ୍ରସଙ୍ଗ ନେଇ ସାଇକେଲ ଅଭିଯାନ ମାଧ୍ୟମରେ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମ ଅଧିକାରୀ ଡକ୍ଟର କୈଳାସ ଚନ୍ଦ୍ର ମହାରଣା ଓ ଅଧ୍ୟାପିକା ରୀନା ରାଉତଙ୍କ ନେତୃତ୍ୱରେ ଅନୁଷ୍ଠିତ ଉକ୍ତ କାର୍ଯ୍ୟକ୍ରମକୁ ଯୁକ୍ତ ଦୁଇ ଅଧ୍ୟକ୍ଷ ସୁବାସ ଚନ୍ଦ୍ର ଶ୍ରୀଚନ୍ଦନ, ବାଲୁଗାଁ ବନ୍ୟପ୍ରାଣୀ ରେଞ୍ଜର ରଶ୍ମିତା ଜେନା, ମିଳିତ ଭାବେ ଉଦଘାଟନ କରିବା ପରେ ସାଇକେଲ ଶୋଭାଯାତ୍ରା ଆରମ୍ଭ ହୋଇଥିଲା।
ଡ଼ିଏଫଓ ଅମ୍ଲାନ ନାୟକ ଓ ଅଧ୍ୟକ୍ଷ ଡକ୍ଟର ଲକ୍ଷ୍ମୀଧର ସୁବୁଦ୍ଧିଙ୍କ ଦିଗଦର୍ଶନରେ ଆୟୋଜିତ ଏହି ଉଦଘାଟନ କାର୍ଯ୍ୟକ୍ରମରେ ଡକ୍ଟର ମୋନାଲିସା ମାନସିଂହ ଅଧ୍ୟାପକ ମୃଡ଼ାଣି ଶଙ୍କର ପ୍ରସାଦ ମିଶ୍ର, ଚନ୍ଦନ ନାୟକ, ସ୍ୱାତୀ ସ୍ଵାଗତିକା ସାହୁ, ପ୍ରିୟମ୍ବଦା ମହାପାତ୍ର, ବିଶ୍ୱଜିତ ଦାସ ପ୍ରମୁଖ ସ୍ବେଛାସେବୀ ମାନଙ୍କୁ ଉତ୍ସାହିତ କରିଥିଲେ। ସ୍ଵେଚ୍ଛାସେବୀମାନେ ଚିଲିକା କୁଳ ଓ ବାଲୁଗାଁ ବଜାର ପରିକ୍ରମା କରି ବିଦେଶାଗତ ପକ୍ଷୀଙ୍କୁ ଆମର ଅତିଥି ଭାବେ ବିବେଚନା କରି ସେମାନଙ୍କୁ ସୁରକ୍ଷା ଦେବା ପାଇଁ ସଚେତନ କରାଇଥିଲେ। ଏହାପରେ ସ୍ଵେଚ୍ଛାସେବୀ ମାନେ ବଡକୁଳ ଗ୍ରାମ ପରିକ୍ରମା କରି ଚିଲିକା ଉନ୍ନୟନ କର୍ତ୍ତ୍ତୃପକ୍ଷଙ୍କ କାର୍ଯ୍ୟାଳୟ ନିକଟ ଚିଲିକା କୂଳ ସଫେଇ କରି ପଲିଥିନ ମୁକ୍ତ ଚିଲିକାର ବାର୍ତ୍ତା ପ୍ରଚାର କରିଥିଲେ।
କାର୍ଯ୍ୟକ୍ରମରେ ମନୋରଞ୍ଜନ ମିଶ୍ରଙ୍କ ସମେତ ସିଡିଏ ର ସମସ୍ତ କର୍ମଚାରୀ, ଚିଲିକା ବନ୍ୟପ୍ରାଣୀ ବନଖଣ୍ଡର କର୍ମଚାରୀ ଓ ବାଲୁଗାଁ ମହାବିଦ୍ୟାଳୟର ଅଧ୍ୟାପକ ଅଧ୍ୟାପିକା ମାନେ ସାମିଲ ହୋଇଥିଲେ।
