ବାଲୁଗାଁ: ବାଲୁଗାଁ ମହାବିଦ୍ୟାଳୟ ପକ୍ଷରୁ ଆଜି ଏକାଦଶତମ ଅନ୍ତର୍ଜାତୀୟ ଯୋଗ ଦିବସ “ଯୋଗ ସଙ୍ଗମ” ଅନୁଷ୍ଠିତ ହୋଇଯାଇଛି। ଆଜି ପୂର୍ବାହ୍ଣରେ ଅଧ୍ୟକ୍ଷ ଡକ୍ଟର ଲକ୍ଷ୍ମୀଧର ସୁବୁଦ୍ଧି ଏହି କାର୍ଯ୍ୟକ୍ରମରେ ସଭାପତିତ୍ୱ କରି ଯୋଗଦର୍ଶନ ଓ ପ୍ରାଚୀନ ଭାରତର ମହାନ ପରମ୍ପରା କିପରି ସମଗ୍ର ବିଶ୍ୱକୁ ଦିଗଦର୍ଶନ ପ୍ରଦାନ କରିଛି ଉପସ୍ଥାପନ କରିଥିଲେ।
ଅଧ୍ୟାପକ ଡକ୍ଟର ସନ୍ତୋଷ କୁମାର ରଥ ଚଳିତ ବର୍ଷ ଅନ୍ତର୍ଜାତୀୟ ଯୋଗ ଦିବସର ପ୍ରସଙ୍ଗ “ଏକ ପୃଥିବୀ, ଏକ ସ୍ୱାସ୍ଥ୍ୟ ପାଇଁ ଯୋଗ” ର ପ୍ରାସଙ୍ଗିକତା ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ। ଏହାପରେ କେନ୍ଦ୍ର ସରକାରଙ୍କ ଯୋଗ ମାର୍ଗଦର୍ଶିକା ନିୟମ ଆଧାରରେ ପୂର୍ବାହ୍ଣ ସାତ ଘଟିକା ସମୟରେରେ ରାଜ୍ୟସ୍ତରୀୟ ଯୋଗ ପ୍ରଶିକ୍ଷକ ଦୁର୍ଗା ପ୍ରସାଦ ପାଢ଼ୀ, ଦିଲ୍ଲୀପ କୁମାର ସୁବୁଦ୍ଧି, ପ୍ରଦୀପ ବଳବନ୍ତରାୟ ଓ ଅଧ୍ୟାପକ ବିଦ୍ୟା ଧର ଜୁଝାରସିଂଙ୍କ ଦିଗଦର୍ଶନରେ ଅନୁଷ୍ଠିତ ହୋଇଥିଲା। ଏଥିରେ ମହାବିଦ୍ୟାଳୟର ଦୁଇଶହ ଷାଠିଏ ଛାତ୍ର ଛାତ୍ରୀ, ଅଧ୍ୟାପକ, ଅଧ୍ୟାପିକା ଓ କର୍ମଚାରୀ ଅଂଶଗ୍ରହଣ କରିଥିଲେ।
ଆନୁଷ୍ଠାନିକ ଯୋଗ ପ୍ରଦର୍ଶନ ପରେ ଯୋଗଗୁରୁମାନେ ଯୋଗ ପ୍ରାଣାୟାମର ସ୍ୱାସ୍ଥ୍ୟ ଓ ବିଶ୍ୱ ଉପରେ ଥିବା ପ୍ରଭାବ ସମ୍ପର୍କରେ ସୂଚନା ଦେବାପରେ ଅଧ୍ୟକ୍ଷ ସେମାନଙ୍କୁ ଉତ୍ତରୀୟ ପ୍ରଦାନ କରି ସମ୍ବର୍ଦ୍ଧିତ କରିଥିଲେ।
ଏହି ଅବସରରେ ଜାତୀୟ ସେବା ଅନୁଷ୍ଠିତ ମହାବିଦ୍ୟାଳୟ ସ୍ତରୀୟ ଚିତ୍ରାଙ୍କନ ପ୍ରତିଯୋଗିତାରେ କୃତିତ୍ୱ ଅର୍ଜନ କରିଥିବା ଛାତ୍ର ଶିବ ମହାରଣା, ପ୍ରଜ୍ଞାସ୍ମିତା ସାହୁ, ପ୍ରାଚୀ ସାହୁ,ଦେବିସ୍ମିତା ସାହୁ, ରାଜ ଲକ୍ଷ୍ମୀ ଜେନା ଙ୍କୁ ଅତିଥିମାନେ ପୁରସ୍କୃତ କରିଥିଲେ। ଏଥିସହ ଜିଲ୍ଲା ସ୍ତରୀୟ ଚିତ୍ରାଙ୍କନ ପ୍ରତିଯୋଗିତାରେ ପ୍ରଥମ ସ୍ଥାନ ଅଧିକାର କରିଥିବା ଛାତ୍ର ଅଭି ଜାଲିଙ୍କୁ ମହାବିଦ୍ୟାଳୟ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା।
ଯୁବ ରେଡକ୍ରସ ଦିଗଦର୍ଶକ ଅଧ୍ୟାପକ ଧୋବୀ ଚରଣ ପରିଡା ସମସ୍ତଙ୍କୁ କୃତଜ୍ଞତା ଅର୍ପଣ କରିଥିଲେ। ଏହାପରେ ଅନୁଷ୍ଠିତ ହରିତ ଯୋଗ କାର୍ଯ୍ୟକ୍ରମରେ ଛାତ୍ର ଛାତ୍ରୀ ଓ ଶିକ୍ଷକମାନେ ମହାବିଦ୍ୟାଳୟ ପରିସର ପରିଷ୍କାର କରିବା ସହ ବୃକ୍ଷ ରୋପଣ କରିଥିଲେ। ସମଗ୍ର କାର୍ଯ୍ୟକ୍ରମକୁ ଜାତୀୟ ସେବା ଯୋଜନା ଅଧିକାରୀ ଡକ୍ଟର କୈଳାସ ଚନ୍ଦ୍ର ମହାରଣା, ଅଧ୍ୟାପିକା ରୀନା ରାଉତ, ଯୁବ ରେଡ଼କ୍ରସ ଅଧିକାରୀ ମନସ୍ବିନୀ ପଟ୍ଟନାୟକ,ଏନସିସି ଅଧିକାରୀ ଚନ୍ଦନ ନାୟକ, ରୋଭର ରେଞ୍ଜର ଅଧିକାରୀ ସ୍ନିଗ୍ଧାରାଣୀ ମୁଦୁଲି ଓ ଦୀପକ କୁମାର ପରିଡା ପରିଚାଳନା କରିଥିଲେ।