ବାଲୁଗାଁ: ବାଲୁଗାଁ ମହାବିଦ୍ୟାଳୟର ରାଜନୀତି ବିଜ୍ଞାନ ବିଭାଗ ପକ୍ଷରୁ ଆଜି “ବିଶ୍ୱ ବାଣିଜ୍ୟିକ ସଂଗଠନର ପରିଚାଳନାରେ ଭାରତର ହସ୍ତକ୍ଷେପ ଓ ବିଘଟନ” ଶୀର୍ଷକ ଜାତୀୟ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ପ୍ରାରମ୍ଭରେ ଅତିଥିମାନେ ଶ୍ରୀଜଗନ୍ନାଥଙ୍କ ମୂର୍ତ୍ତି ନିକଟରେ ପ୍ରଦୀପ ପ୍ରଜ୍ବଳନ ପୂର୍ବକ ଏହି ଆଲୋଚନଚକ୍ରକୁ ଉଦଘାଟନ କରିବାପରେ ଅଧ୍ୟକ୍ଷ ଡ଼କ୍ଟର ଲଷ୍ମୀଧର ସୁବୁଦ୍ଧି ଆମନ୍ତ୍ରିତ ଅତିଥିମାନଙ୍କୁ ସମ୍ବର୍ଦ୍ଧିତ କରିଥିଲେ। ଅଧ୍ୟାପିକା ସୁନିତା ନନ୍ଦ ଅତିଥି ପରିଚୟ ପ୍ରଦାନ କରିବା ପରେ ବିଭାଗୀୟ ମୁଖ୍ୟ ଅଧ୍ୟାପକ ସୁବାସ ଶ୍ରୀଚନ୍ଦନ ଭିତ୍ତି ପ୍ରବନ୍ଧ ଉପସ୍ଥାପନ କରିଥିଲେ।
ଅଧ୍ୟକ୍ଷ ଡ଼କ୍ଟର ଲକ୍ଷ୍ମୀଧର ସୁବୁଦ୍ଧି ସମସ୍ତଙ୍କୁ ଆନୁଷ୍ଠାନିକ ଭାବେ ସ୍ୱାଗତ କରିବା ସହ ଏହି ଜାତୀୟ ଆଲୋଚନଚକ୍ରର ଉଦ୍ଦେଶ୍ୟ ଜ୍ଞାପନ କରିଥିଲେ। ଏହାପରେ ଉକ୍ତ କାର୍ଯ୍ୟକ୍ରମର ମୁଖ୍ୟ ଆଲୋଚକ ଭାବେ ଯୋଗ ଦେଇ ଦିଲ୍ଲୀ ବିଶ୍ୱବିଦ୍ୟାଳୟର ସହକାରୀ ପ୍ରଫେସର ବିଜୟ କୁମାର ମହାନ୍ତି ପ୍ରାକ – ସ୍ୱାଧୀନତା ଓ ସ୍ୱାଧୀନତା ପରବର୍ତ୍ତୀ ସମୟରେ ଭାରତର ଅର୍ଥନୈତିକ ବିକାଶ, ରପ୍ତାନି କାରବାର,ଅନ୍ତର୍ଜାତୀୟ ସମ୍ପର୍କ ସହିତ ରାଜନୈତିକ ଅର୍ଥନୀତି, ବିଶ୍ୱ ବାଣିଜ୍ୟିକ ସଂଗଠନର ପରିଚାଳନାଗତ ନିୟମ ସମେତ ଆତ୍ମନିର୍ଭର ଭାରତର ସଙ୍କଳ୍ପ ଓ ସୁଯୋଗ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ।
ଅନ୍ୟତମ ପ୍ରମୁଖ ବକ୍ତାଭାବେ ବଣିକ ଆଇଏଏସ କୋଚିଂର ମୁଖ୍ୟ ପରାମର୍ଶଦାତା ଡ଼କ୍ଟର ପ୍ରମୋଦ କୁମାର ପାଢ଼ୀ ଯୋଗଦେଇ ଭାରତର ସାମଗ୍ରିକ ବିଚକ୍ଷଣତା, ଦକ୍ଷ ମାନବ ସମ୍ବଳ, ପ୍ରାକୃତିକ ସମ୍ବଳ, ଦୁର୍ମୁଲ୍ୟ କୃଷିଜାତ ଦ୍ରବ୍ୟ, ରପ୍ତାନି ସାମଗ୍ରୀ ଓ ଆତ୍ମ ନିର୍ଭର ଭାରତ ସଙ୍କଳ୍ପ ଜରିଆରେ ଦ୍ରୁତ ଅର୍ଥନୈତିକ ପ୍ରଗତି ହାସଲ କରି କିପରି ବିଶ୍ୱରେ ନିଜର ପ୍ରଭାବ ବିସ୍ତାର କରିବାକୁ ଯାଉଛି, ତାହା ଉଲ୍ଲେଖ କରିଥିଲେ।
ମୁଖ୍ୟ ଅତିଥି ଭାବେ ଯୋଗଦେଇ ବିଜେବି ସ୍ୱୟଂ ଶାସିତ ମହାବିଦ୍ୟାଳୟର ସହଯୋଗୀ ପ୍ରଫେସର ଡ଼କ୍ଟର ବୈକୁଣ୍ଠ ସ୍ୱାଇଁ କହିଲେ ଯେ ଆମେରିକା ରାଷ୍ଟ୍ରପତି ଟ୍ରମ୍ଫଙ୍କର ଭାରତ ପ୍ରତି କଠୋର ମନୋଭାଵ ଭାରତ ପାଇଁ ଏକ ଆହ୍ୱାନ ଓ ସୁଯୋଗ। ଏଥିସହ୍ ଆତ୍ମନିର୍ଭର ଓ ବିକଶିତ ରାଷ୍ଟ୍ର ଭାବେ ଭାରତର ସଙ୍କଳ୍ପ ବିଶ୍ୱ ବାଣିଜ୍ୟିକ ସଂଗଠନକୁ ମଧ୍ୟ ପ୍ରଭାବିତ କରିଛି ବୋଲି ସେ କହିଥିଲେ।
ଏହାପରେ ପ୍ରଧ୍ୟାପକ ଲକ୍ଷ୍ମୀ ପ୍ରସାଦ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ଦ୍ୱିତୀୟ ଅଧିବେଶନରେ ଆଲୋଚକ ଭାବେ ଅଧ୍ୟାପକ ଆଦିତ୍ୟ ସାରଥୀ ବେଦମତ୍ତା, ଅଧ୍ୟାପକ ସନ୍ତୋଷ କୁମାର ଶତପଥୀ, ଅଧ୍ୟାପକ ହିମାଂଶୁ କୁମାର ଦାଶ, ଅଧ୍ୟାପିକା ପିଙ୍କି ନାୟକ ଯୋଗଦେଇ ବିଶ୍ୱ ବାଣିଜ୍ୟିକ ସଂଗଠନର ଦାୟିତ୍ୱ,ଭବିଷ୍ୟତ ଓ ଏହା ପ୍ରତି ଭାରତର ସମ୍ପର୍କ ପ୍ରସଙ୍ଗରେ ବକ୍ତବ୍ୟ ଉପସ୍ଥାପନ କରିଥିଲେ।
ଛାତ୍ରୀ ଦୀପାଞ୍ଜଳି ସାମନ୍ତରାୟ, ସଂଗ୍ରାମ କେଶରୀ ବେହେରା, ଶ୍ୟାମଲି ନାୟକ,ପପିନା ବଲବନ୍ତରାୟ୍, ଯସ୍ମିନ ବେଗମ, ପ୍ରଜ୍ଞା ସ୍ମିତା ସାହୁ,କାର୍ତ୍ତିକେଶ୍ୱର ଜେନା ନିଜର ପ୍ରବନ୍ଧ ଉପସ୍ଥାପନ କରିଥିଲେ। ଅଧ୍ୟାପକ ଡ଼କ୍ଟର କୈଳାସ ଚନ୍ଦ୍ର ମହାରଣା କାର୍ଯ୍ୟକ୍ରମଟିକୁ ସଂଯୋଜନା କରିଥିବା ବେଳେ ଅଧ୍ୟାପିକା ସ୍ନିଗ୍ଧାରାଣୀ ମୁଦୁଲି ଧନ୍ୟବାଦ ଅର୍ପଣ କରିଥିଲେ।
କାର୍ଯ୍ୟକ୍ରମ ପରିଚାଳନା କରିଥିଲେ ଅଧ୍ୟାପକ ହିମାଂଶୁ କୁମାର ଦାଶ।